உனக்காக .. எல்லாம் உனக்காக ..

ஐயா! மாட்டேன். என்னால் இது முடியாது.

கோபம், ஆசிரியர் நிக்கோலஸ் தில்லனுக்கு (Nicholas Dhillon).

ஏன் முடியாது?

என் அப்பாவை எனக்குத் தெரியாது. நான் பார்த்ததில்லை…

ஒவ்வொரு மாணவனையும் தன் தந்தையைப்பற்றி கொஞ்சம் எழுதிக் காட்டச் சொல்லியிருந்தார் அன்று. அதற்குக் கிடைத்த ஒரு சிறுவனின் பதில் இது. திடுக்கிட்ட ஆசிரியர், மற்ற சிறுவர்கள் பதற்றத்தோடு திரும்பிப் பார்க்க,  அவனை நெருங்கினார். மெல்ல அவன் தலையை வருடிக்கொடுத்தார். மிருதுவாக, அழுத்தமாகச் சொன்னார்: ‘இதைப்பற்றி அதிகம் மனதை வருத்திக்கொள்ளாதே. இது ஒரு தடையாக இருக்கக்கூடாது உன் வாழ்வில்..” என்றார் எச்சரிக்கும் தொனியில்.

தன் பள்ளி ஆசிரியரை பிற்காலத்தில் நினைவில் கொள்கிறான், இப்போது வளர்ந்துவிட்டிருக்கும் அந்த இளைஞன். ஆசிரியரை மட்டுமா? அவன் அம்மா? சாதாரண மனுஷியா அவள்? அவளன்றி இன்று, நின்று பேசுவானா அவன்?

அமெரிக்க வெளிக்குக் கீழே, கரீபியத் தீவுகளின் (Carribean Islands) சிறுநாடுகளில் ஒன்றான ஜமைக்கா. எங்கோ ஒரு கிராமத்தில் வர்ணத்தையே பார்த்திராத தகரம். அதை வளைத்தும், நிமிர்த்தும் ஓருவாறு ‘கட்டப்பட்ட’ வீடு. எத்தனை மழை  இரவுகள். நாலாபுறமும் தண்ணீர் வழிய, அம்மாவின் படுக்கை நனைந்துவிடாது, அதை ’வீட்டின்’ நடுவில் இழுத்துப்போட்டுத் தூங்கவைத்திருக்கிறான். அவளும் எத்தனை மறுத்திருக்கிறாள். ’நாளைக்கு பள்ளி செல்லவேண்டும். நீ தூங்கு கொஞ்சமாவது’ என்று. அவளுக்கும் ஓய்வு வேண்டுமே. அடுத்த நாளும் வேலைக்குச் செல்லவேண்டாமா அவள்? பாத்திரம் தேய்க்கணும், துணி தோய்க்கணும், இன்னும் ஏகப்பட்ட எடுபிடி வேலைகளை மற்றவர்களுக்கு செய்தால்தானே இந்த வீட்டில் அடுப்பு  சூடாகும்? தட்டில் ஏதாவது விழும்.. பசி கொஞ்சமாவது தணியும்? என் அம்மா முழித்துக்கொண்டிருக்க, நான் தூங்குவதா? எப்படியெல்லாமோ வாதாடி அவளைக் கண்ணயர வைத்துவிட்டு, நீண்ட இரவுகளில் கூரையின் சொட்டும் மழைநீரைப் பார்த்தவாறு உட்கார்ந்திருக்கிறான். மற்ற அம்மாக்களைப் போலல்லாது, இவ்வளவு கஷ்டப்படுகிறாளே இவள்.. என்று தீரும், விலகும் இந்தத் துன்பம். அம்மா.. நான் ஏதாவது செய்வேன் உனக்கு ஒரு நாள். நீ மேலும், மேலும் கஷ்டப்படாது பார்த்துக்கொள்வேன்…

அங்கே ஒரு தொலைக்காட்சி சேனல் தன்னை அணுகியபோது, அந்த அம்மா வேதனை நினைவுகளை வலியுடன் மீட்கிறாள். காதலியாக ஒருவனுக்கு இருந்தவள், ஒருநாள் கர்ப்பமானாள். அறிந்த அவன் அதிர்ந்தான். சொன்னான். ’நிறுத்து இதை உடனே. போய் அபார்ஷன் செய்துகொள்!’ திடுக்கிட்டது அவளது மென்மையான பெண்மை. ’முடியாது!’ என்றது தீர்க்கமாக. கோபத்தில் எரிந்து விழுந்தான். போனான். போயே விட்டான். ஏழை. தான் விரும்பியவனைத் தவிர வேறு உலகறியாத பெண். துணையேதுமின்றி அபலையானாள். வீடுகளில் வேலை செய்வது, வயிற்றைக் கழுவுவது இப்படிச் சென்றது கொடுங்காலம். இந்த ஒரு மாதம் போய் விடட்டும் எப்படியாவது.. இன்னும் ஒரு மாதம். இதோ இந்த மாதந்தான்… அப்பாடா, பெத்துட்டேன் என்று தனக்கென வந்து பிறந்த உயிரை ஆசையோடு பார்த்தாள். ஏதோ கொடுத்தாள், ஊட்டிவிட்டாள், வளர்த்தாள், அவளுக்குத் தெரிந்தபடி, வாய்த்தபடி..

அம்மா.. அம்மா என்றவாறு வளர்ந்து உருகும் தன் பையன் ஒரு நாள் கையில் ஏதோ பிடித்தபடி பள்ளியிலிருந்து வருவதைப் பார்த்தாள். கிரிக்கெட் பேட்! அம்மாவைப் பார்த்து மட்டையைத் தூக்கியவாறு சிறுவன் சொன்னான்: ”அம்மா உனக்கு நான் கிரிக்கெட் ஆடி சம்பாதித்துப் போடுவேன். ஒரு இடத்தில் அமைதியாக உன்னை உட்காரவைத்து சாப்பிட வைப்பேன்..” அந்தத் தாய் கண்கலங்க நினைவு கூர்கிறாள். ”எனக்குக் கோபம் வரவில்லை. நம்பிக்கை வந்தது. இவன் செய்வான்.. செய்யக்கூடியவன்தான் இந்தப் பிள்ளை! என் மகன்….”

ஜமைக்கா, ட்ரினிடாட், பார்படோஸ் போன்ற கரீபிய உலகின் பொருளாதார வளர்ச்சியில்லாத சிறுசிறு நாடுகளில், நம்நாட்டிலும், பிற வளர்ந்த நாடுகளிலும் காணப்படும் பெருவணிகம் என்று ஏதுமில்லை. சிறுதொழில்கள் உருப்படியாக நடத்தப்பட்டாலே பெரும் விஷயம் அங்கெல்லாம்.  மக்கள் நலம் சார்ந்த, ஏழைகளுக்கு உதவும் திட்டங்களெல்லாம் அரசாங்கங்களிடம் இல்லை அங்கே.  சினிமா என்கிற தொழிலோ அதுசார்ந்த கொழுத்த பணக்காரர்களான ஸ்டார்களோ இல்லை. கொஞ்சம் வசதியானவர்கள், பணக்காரர்கள், புகழ்பெற்றவர்கள் என்றால், அவர்கள் அங்கே கிரிக்கெட் ஆட்டக்காரர்களாகத்தான் இருக்க முடியும் என்கிற விசித்திர நிலை, கிட்டத்தட்ட. அத்தகைய பின்புலத்தில், கரீபியச் சிறுவர்கள் ’நான் ஒருநாள் பெரிய கிரிக்கெட்டராக வருவேன், பெரும் பணம் சம்பாதிப்பேன், என்னைப்பற்றி மற்றவர்கள் பெருமையாகப் பேசுவார்கள்..’ என்றெல்லாம் கற்பனை செய்வது சகஜம்.

அன்று அந்தத் தாயின் முன் அப்படிக் கிரிக்கெட் மட்டையை உயர்த்திய அந்தச் சிறுவனின் வாழ்க்கை எளிதாக அமைந்துவிடவில்லை. பல சங்கடங்கள், போட்டிகள், தடைகள். சோதனைகள். ஒவ்வொரு முறை மனம் வெதும்பியபோதும் தனக்குத்தானே சொல்லிக்கொண்டிருக்கிறான். ’நான் இதை எனக்காகப் பிரதானமாகச் செய்யவில்லை. அந்தப் பெண்ணிற்காக, என் தாய்க்காக செய்துகொண்டிருக்கிறேன். என் தங்கைக்குமாகவும்..’ சிபிஎல் என்கிற கரீபியன் ப்ரிமியர் லீக்  டி-20 கிரிக்கெட்டில் விளையாடி கொஞ்சம் பெயரும் வாங்கிவிட்டான். வெஸ்ட் இண்டீஸுக்காகத் தேர்வாகி ஆடியுமிருக்கிறான் சில ஆட்டங்கள். ஐபிஎல்-இல் டெல்லி அணிக்காக நேற்று மட்டையைப் பிடித்தவன், தன் அம்மாவை நினைத்தானோ.. அப்பாவை நினைத்தானோ.. என்ன நடந்ததோ அவன் மனதில். கிரிக்கெட் மைதானத்தில் பொறி பறந்தது. எதிரணியை துவம்சம் செய்து சிக்ஸர்களாகப் பறக்கவிட்டான். அவுட் ஆகாது மும்பை மைதானத்தில் கம்பீரமாக நின்றான். கைதட்டல்களுக்கிடையே பெவிலியன் திரும்பினான் ரோவ்மன் பவல் (Rovman Powell).

எது எப்படி இருப்பினும், தாய்க்குக் கொடுத்த வாக்கை நிறைவேற்றிவிட்டான் பிள்ளை. தன் மகன் கட்டிய வசதியான வீட்டில் அம்மா உட்கார்ந்து, சற்றே நிம்மதியாகத் தன் கடைசிகாலத்தை அனுபவிக்குமாறு செய்துகொடுத்திருக்கிறான். அப்பாவைப்பற்றி அவன் எப்படி நினைக்கிறான் என்பது தனிமனிதனாக அவன் யாரென்று கொஞ்சம் சொல்கிறது: ” தேடுதலை நிறுத்திவிட்டேன். விந்தை விதைத்தவனுக்கும் நன்றி. அவனன்றி நான் இங்கே வந்திருக்கமுடியாதல்லவா…”

**

விடாத அது …

இடதுபக்கம் மஸாலா நூடுல்ஸ். வலதுபக்கம் சிக்கன் நூடுல்ஸ். இடையிலே உப்புமா, கறுப்புக் காப்பி. இண்டிகோவில் சீட் 1-இ, நல்ல லெக்-ரூமுடன் வசதியாக இருந்தது. மஸாலாவை முடித்தபின் லேப்டாப்பை முடுக்கி, ஹாலிவுட் சினிமாவில் உறைய ஆரம்பித்திருந்தான், ஃபிட்னெஸ் பற்றி அதிகம் கவலைப்படாதவன் போன்ற அமைப்பிலிருந்த அந்த இளைஞன். வெந்நீர் விட்டுக் கொடுத்த விமானப்பணிப்பெண், அஞ்சு நிமிஷம் கழித்து சாப்பிடனும்னு சொல்லியும், ஓரிரு நிமிஷம்கூட பொறுக்கமாட்டாமல் பயங்கரப் பசியில் சிக்கன் நூடுல்ஸை உள்ளே தள்ளி, தீர்த்துக்கட்டிவிட்டு, லேப்டாப்பில் கேம் ஒன்றில் களிக்க ஆரம்பித்திருந்தான் இந்தப்பக்கத்து ஒல்லி. நடுவிலே, உப்புமா முடித்து, காப்பியை ரசித்தவாறு விரித்த புத்தகத்தோடு நான். காட்சி.. கொஞ்சம் விசித்திரமாகத்தான் எனக்கே இருந்தது. புத்தகத்தின் தலைப்பை யாரும் கவனித்திருந்தால், என்னை ஒரு மாதிரி ஏற இறங்கப் பார்த்திருக்கக்கூடும். படிக்கிறதுக்கு இந்த ஆளுக்கு கெடச்சுது பாரு ஒரு புஸ்தகம்.. என்றோ, என்ன இது.. அபசகுனம் மாதிரி பக்கத்தில் ஒக்காந்து இதைப் படிக்கிறான் இந்த மனுஷன்.. நம் கண்ணில்வேற பட்டுத் தொலச்சிருச்சே.. ஒருவேளை நமக்கு ஏதாவது ஆபத்து.. சே.. சே.. அப்படியெல்லாம் நடக்காது.. என்றெல்லாம் அவர்களுக்குள் சிந்தனை ஒரு இடத்தில் நில்லாது ஓடியிருக்கக்கூடும்.

டெல்லி போனபின், வீட்டில் ஆர, அமர  மெல்ல வாசிக்கவேண்டும் என்று கொண்டுவந்திருந்த புத்தகம்.  ஆவலில் ஃப்ளைட்டிலேயே திறந்து படிக்க ஆரம்பித்திருந்தேன். பலரும் சற்றே தூரத்தில் இருந்தாவது பார்க்க நேருகின்ற, அவ்வப்போது பேச வாய்க்கின்ற, அல்லது நினைத்து பயப்படுகின்ற, பொதுவாக உள்ளே செல்ல விரும்பாத கருத்தாழம் காட்டும் ஒரு  நூல். சத்குரு ஜக்கி வாசுதேவ் எழுதிய Death – An inside story (Penguin India). பிறப்பெடுத்துவிட்ட ஒவ்வொரு ஜீவனாலும் தவிர்க்கமுடியாத ஒரு இறுதி நிகழ்வு.. மரணம்.

வந்தே தீர்க்கும் வயோதிகம், உடலை விட்டுவிட்டு உயிர் நீங்கிடும் உன்னதம் போன்ற, பயங்கர அல்லது மர்மம் நிறைந்த (ஆளாளுக்கு ஏற்றபடியான) தருணங்களை சந்திப்பதற்கான ஆயத்தங்கள் பற்றியெல்லாம் ஆதிகாலத்து இந்து மரபின் ஆழமான அவதானிப்புகள், அது சார்ந்த தார்மீக வழிநடத்துதல்கள் எனவும், தொடர்பான சடங்குகள்பற்றியும், இந்தக்கால அவசரக்குடுக்கைப் பிரகிருதிகளுக்குக் கொஞ்சம் சொல்லப் பார்க்கும் புத்தகம். மனிதவாழ்க்கை எனும் பெருவெளியை சீரியஸாக கவனித்துவரும் எல்லோராலும் வாசிக்கப்படவேண்டிய முக்கியமான நூல் எனத் தோன்றுகிறது. எங்கே பக்கம் திறந்ததோ அங்கே நிறுத்தி, திட்டுத்திட்டாக மனம் போனபடிக் கொஞ்சம் வாசித்திருக்கிறேன் பயணத்தின்போது. நிதானமாகத் தொடர்வேன் சில நாட்களில் என்று நினைக்கிறேன்

33 -ல் புறப்பட்டிருந்து, சுமார் இரண்டரை மணிநேரத்தில் 38-ல் இறக்கிவிடப்பட்டேன். பாய்லருக்குள் தலையை விட்டது போல் ஒரு அதிர்ச்சி. டெல்லி ஏர்ப்போர்ட்டின் டர்மினல் 1 வித்தியாசமாக இருந்தது. பேக்பேக்குடன் மட்டுமே பெங்களூரிலிருந்து வந்ததால் வேகமாக வெளியேறி, வாசல் கவுண்ட்டரில் மேஹ்ரூவை புக் செய்தேன். டாக்ஸியில் அமர்ந்ததும் ஓட்டுநரை சற்று எரிச்சலோடு கேட்டேன். ஏசி சல் ரஹா ஹை ?.. யா நஹி(ன்)!  சற்றே அதிர்ந்தவனாய், ஹா(ன்) ஜி.. சல் ரஹா ஹை! என்றான் உஷாராக அந்த இளைஞன். உள்ளே மெதுவாக நோட்டம் விட்டேன். மஹிந்திரா எலெக்ட்ரிக்.. புது வண்டி! இருந்தும் எனக்கு சந்தேகம் ஏசிபற்றி, அதன் திறன்பற்றி. நான் ஏசி வென்ண்ட்டையே பார்ப்பதைக் கண்டதும் கொஞ்சம் கூட்டிவைத்து அவன்பாட்டுக்கு ஓட்டிக்கொண்டு வந்தான், டெல்லியின் கோடையில் ஊறி விளைந்திருந்த அந்த தென்னகத்து இளைஞன்.

**

ஐபிஎல் 22 : புதிய அணிகளின் மோதல்

ஆரம்ப மேட்ச்சில் கொல்கத்தாவிடம் காலியான சென்னை. டெல்லியிடம் அடி வாங்கிய மும்பை. 200-க்கு மேல் எடுத்தும் பஞ்சாபிடம் பலியான பெங்களூரு! ஐபிஎல் 2022-ன் அதகளம் ஆரம்பம்.

தற்போது ஐபிஎல்-ன் இரு புது அணிகள் தங்களுக்குள் மோதுகின்றன. குஜராத் டைட்டன்ஸ் vs லக்னோ சூப்பர் ஜயண்ட்ஸ். இதுவரை மும்பை இந்தியன்ஸ் அணியின் பிரபல முகங்களில் ஒருவராயிருந்த ஹார்திக் பாண்ட்யா முதன்முறையாக கேப்டனாக களம் இறங்குகிறார், குஜராத்திற்காக. அவரது நண்பர் கே.எல்.ராஹுல் லக்னோவின் கேப்டன். இரண்டும் சமபல அணிகளாகத் தோன்றுகின்றன என்றாலும் களத்தில் கதை என்னவோ ..

Captain, Gujarat Titans

குஜராத் அணியில் (நியூஸிலாந்தின்) லாக்கி ஃபெர்குஸன், முகமது ஷமி, வருண் ஆரோன் -முக்கிய வேகங்கள். ஸ்பின்னில் இருக்கிறார் டாப் மேன் ரஷித் கான் (ஆஃப்கானிஸ்தான்). ஆல்ரவுண்டர்கள் விஜய் ஷங்கர், ராஹுல் தெவட்டியாவும் கூடவே. பேட்டிங் ஷுப்மன் கில், ஹார்திக் பாண்ட்யா, (ஆஸ்திரேலிய) மேத்தியூ வேட் (Mathew Wade) என்று மையம் கொள்கிறது. லக்னோவில் ராஹுல், (தென்னாப்பிரிக்காவின்) குய்ண்ட்டன் டி காக், (வெஸ்ட் இண்டீஸின்) எவின் லூயிஸ், மனிஷ் பாண்டே ப்ரதானம். ஆல்ரவுண்டர்களாக ரஞ்சியில் சண்டைபோட்டுக்கொண்ட தீபக் ஹூடாவும், ஹார்திக்கின் அண்ணன் க்ருனால் பாண்ட்யாவும். வேகவீச்சு முக்கியமாக துஷ்யந்தா சமீரா (ஸ்ரீலங்கா) மற்றும் இந்திய அணியின் புதுவருகையான ஆவேஷ் கான் என இருவரின் கைகளில். ஸ்பின்னில் ரவி பிஷ்னோய் (Ravi Bishnoi) தன் வேலையைக் காட்டுவார் என எதிர்பார்க்கலாம், எதிர் அணி ரஷீத் கானிடம் எதிர்பார்ப்பதைப் போல – கிட்டத்தட்ட.

ஹார்தீக் பாண்ட்யா இன்று பௌலிங் போடுவாரா என்பது ரசிகர்களின் மனதில் திண்டாடும் கேள்வி. அவருடைய கேப்டன்சி எப்படியிருக்கும் எனக் கவனிப்பதிலும் ஆர்வம் நிறையப்பேருக்கு. ஹார்தீக் vs ராஹுல் – கள வியூகங்களையும் கவனிப்போம்..!

**

ஜடேஜாவின் தலைமையில் சென்னை சூப்பர் கிங்ஸ் (CSK)

ஆரம்பத்திலிருந்தே CSK-யின் கேப்டனாக மிக வெற்றிகரமாக செயல்பட்டவர். அவருக்கும் 40 ஆயிடுச்சே. வயசு யாரை விட்டது… சரியான தருணமிது. கிரீடத்தை வேறு யாருடைய தலையிலாவது வைத்துவிட்டு டீமோடு டீமா நிற்பதே நல்லது என அவருக்குத் தோன்றியிருக்கலாம். தோனியின் இந்த முடிவினால், ரவீந்திர ஜடேஜா ஆனார் கேப்டன், சிஎஸ்கே. இன்று ஐபிஎல் 2022-ன் முதல் போட்டியில் சென்னையை கொல்கத்தாவுக்கெதிராகத் திருப்புகிறார். கேப்டன்சி எப்படி இருக்கும் எனப் பார்ப்பதில் ரசிகர்களுக்கு ஒரே ஆவல், அவசரம்.

Ravindra Jadeja alongside outgoing CSK Captain

இதற்கு முன் அவர் ரஞ்சிக்காக ஆடும் சௌராஷ்ட்ரா உட்பட, முக்கிய அணி எதற்கும் ஜடேஜா தலைமை வகித்ததில்லை. பலவருடங்களுக்கு முன் U-19 போட்டி ஒன்றில் அந்த அணிக்கு தலைமை தாங்கியிருக்கிறார் ஒரு முறை. மற்றபடி அனுபவம் என்பதாக ஏதுமில்லை. ஆயினும், கெவின் பீட்டர்சன் சொல்கிறார்: கூர்மையான கிரிக்கெட் மூளை உண்டு ரவி ஜடேஜாவுக்கு. அவர் தலைமையில் சிஎஸ்கே சில ஆச்சர்யங்களைக் கொடுக்கக்கூடும்…

பழைய வீரர்களில் சிலரும் ஜடேஜா சென்னையின் தலைமைக்கு சரியான ஆள்தான் என ஒப்புதல் தருகிறார்கள். இந்த ஐபிஎல் -இல் சில சுவாரஸ்யமான பெயர்கள், அணிகளின் கேப்டன்களாக. ஷ்ரேயஸ் ஐயர் – கொல்கத்தா, ஹார்தீக் பாண்ட்யா – குஜராத், மயங்க் அகர்வால் – பஞ்சாப், ஃபாஃப் டூப்ளஸீ – பெங்களூரு. இப்போது,  ரவி ஜடேஜா! (பதவி இழந்தவர்கள் லிஸ்ட்டே தனி!) என்னென்ன வியூகங்களோடு புதுக் கேப்டன்கள் மைதானத்தில் இறங்கப்போகிறார்கள் என்பது டாடா ஐபிஎல் 2022- தரும் குறுகுறுப்பு, கிளுகிளுப்பு !

First match : KKR vs CSK 26/3/2022 @ 1930 hrs, Wankhede, Mumbai.

**

இருதரப்பு கிரிக்கெட்: இந்தியா-நியூஸிலாந்து டி-20 தொடர்

கைக்கெட்டாத உலகக்கோப்பையை மறந்துவிடலாம்! இன்று (17/11/21) ஜெய்ப்பூரில் துவங்குகிறது நியூஸிலாந்து, இந்தியாவுக்கு இடையேயான 3-மேட்ச் டி-20 தொடர். இதற்குப் பின் 2-மேட்ச் டெஸ்ட் போட்டித்தொடரும் வரும் (அடுத்த உலக டெஸ்ட் சேம்பியன்ஷிப் போட்டிகளின் ஆரம்பம்).

சாஸ்திரி-கோஹ்லியின் சத்தமான  சகாப்தத்தின் கதவு மூடப்பட்டுவிட்டது. இரைச்சல் தாங்கமுடியவில்லை! ’பிங்க் சிட்டி’யில் ஆரம்பமாகும் இந்தத் தொடர் இந்திய கிரிக்கெட்டின் புதிய பாதை/அணுகுமுறைகளின் துவக்க வாயிலாக அமையக்கூடும். திராவிட்-ரோஹித்தின் தலைமை டி-20 தொடர்களில் புதிய யுக்திகளை அறிமுகப்படுத்தும் என்கிற எதிர்பார்ப்புடன் ஆரம்பிக்கிறது தொடர்.

டெஸ்ட்களுக்கு இன்னும் கோஹ்லிதான் கேப்டன். அவர் ‘ஓய்வில்’ இருப்பதால், இந்த மாத இறுதியில் கான்பூரில் ஆரம்பிக்கவிருக்கும் முதல் டெஸ்ட்டிற்கு ’ஆஸ்திரேலியா புகழ்’ அஜின்க்யா ரஹானே தலைமை தாங்குகிறார். பேசாமல், இரண்டு போட்டிகளுக்குமே அவரை கேப்டனாக அறிவித்து, பழைய பூஜாரி கோஹ்லிக்கு ’இன்னும் கொஞ்சம்’ ஓய்வு கொடுத்திருக்கலாம். ஒன்றிரண்டு புது விளம்பரப்படங்களில் நடிக்க அவகாசம் கிடைத்திருக்கும்!  

Rohit Sharma briefs Venkatesh Iyer in the nets

இந்த டி-20 தொடருக்கான இந்திய அணியில் இவர்கள் இல்லை: கோஹ்லி, ரவீந்திர ஜடேஜா, முகமது ஷமி, பும்ரா, ஹார்தீக் பாண்ட்யா, ஷர்துல் டாக்குர், வருண் சக்ரவர்த்தி. கடந்த ஐபிஎல்-இல் வித்தை காட்டிய இவர்கள் முதன்முதலாக உள்ளே : ஆல்ரவுண்டர்கள் வெங்கடேஷ் ஐயர் (மத்திய பிரதேசம்/ கொல்கத்தா நைட்ரைடர்ஸ்), ஹர்ஷல் பட்டேல் (ஹரியானா/ ராயல் சேலஞ்சர்ஸ் பெங்களூர்), வேகப்பந்துவீச்சாளர் ஆவேஷ் கான் (மத்திய பிரதேசம்/ டெல்லி கேப்பிடல்ஸ்) மற்றும் ருதுராஜ் கேய்க்வாட் (மஹாராஷ்ட்ரா/ சென்னை சூப்பர் கிங்ஸ்). ரோஹித் ஷர்மா தலைமை வகிக்கும் (கே.எல்.ராஹுல், வைஸ்-கேப்டன்) இன்றைய முதல் மேட்ச்சுக்கான அணிவரிசை இப்படியிருந்தால் நன்றாக இருக்கும்: 1. ரோஹித் ஷர்மா 2. கே.எல். ராஹுல் 3. ஷ்ரேயஸ் ஐயர் 4. சூர்யகுமார் யாதவ் 5. இஷான் கிஷன் 6. ரிஷப் பந்த் 7. ஹர்ஷல் பட்டேல் 8. அஷ்வின் (இருவரும் ஆல்ரவுண்டர்கள்) 9. புவனேஷ்வர் குமார் 10. முகமது சிராஜ் 11. யஜுவேந்திர சாஹல்.

திராவிட்-ரோஹித் ஜோடி ஒருவேளை இப்படியும் சிந்திக்கக்கூடும்: வெங்கடேஷ் ஐயருக்கு அவருக்கான ‘இந்தியா வாய்ப்பை’ இந்த மேட்ச்சில் வழங்கலாம். வெங்கடேஷின் ஐபிஎல் பேட்டிங் ஃபார்ம் அப்படி. மிதவேகப் பந்துவீச்சும் அவரால் முடியும் (பாண்ட்யா இல்லாததும் நினைவில் வரும்). சாஹலுக்குப் பதிலாக அக்‌ஷர் பட்டேலை சேர்க்கலாம். பேட்டிங்கில், கீழ்வரிசையில் ஆக்ரோஷமாகத் தாக்கக்கூடிய ஆல்ரவுண்டர் என்பதால். இப்படியெல்லாம் கோச்சும், கேப்டனும் மாற்றி யோசிக்க வாய்ப்புண்டு!

திராவிட்-ரோஹித் காம்பினேஷனை ஜெய்ப்பூர் வெற்றிகரமாகத் துவக்கிவைக்குமா என இந்த இரவினில் தெரிந்துவிடும்.

உலகக்கோப்பை இறுதியில் தோற்ற அந்த அணியிலும் மாறுதல்கள் நிச்சயம் உண்டு. லோக்கி ஃபெர்குஸன் சேர்ந்திருக்கிறார். இந்திய பேட்ஸ்மன்களுக்கு அவரது துல்லியம் தொந்தரவு தரும் நிச்சயம். நியூஸிலாந்துக்கு வேகப்பந்துவீச்சாளர் டிம் சௌதீ (Tim Southee) கேப்டனாக நியமிக்கப்பட்டுள்ளார். அசல் கேப்டன் கேன் வில்லியம்சன் டெஸ்ட் தொடருக்காகத் தன்னைத் தயார்செய்துகொண்டிருக்கிறாராம்.

**

ICC T-20 World Cup: ஆஸ்திரேலியா சேம்பியன்

உலகக்கோப்பையில் ’குரூப் ஸ்டேஜ்-இல் மட்டும் ஐந்து மேட்ச் விளையாடிய விராட் கோஹ்லியின் இந்தியா,  ‘சிறிய’ நாடுகளுக்கு எதிரான வெறும் 3 வெற்றிகளுடன் செமிஃபைனலுக்குள் கால்வைக்க முடியாமல் கந்தலாகி வீடு திரும்பியது. (Bio-bubble-தான் காரணம்: மாஜி கோச் ரவி சாஸ்திரி!). கோப்பையை வெல்லும் என எதிர்பார்க்கப்பட்ட, சிறப்பாக ஆடிவந்த பாகிஸ்தானுக்கும் கூடுதலாக ஒரு போட்டி மட்டுமே (செமிஃபைனல்) ஆடித் தன் ரசிகர்களைக் குஷிப்படுத்திவிட்டு கராச்சிக்கு அவசர ஃப்ளைட் பிடிக்கவேண்டியிருந்தது.  உலக டெஸ்ட் சாம்பியனான நியூஸிலாந்தும், ஆஸ்திரேலியாவும் நேற்று (14-11-21) துபாயில் டி-20 உலகக்கோப்பை இறுதிப்போட்டியில்  மோதின.

world-cup-2021-prize-money-australia-runner-up-new-zealand-team-india-also-gets-money-after-elimination-from-super-12-list-of-all-awards  – first time T20 champion became Australia's $ 1.6 million, Team India out  of Super-12 had to be satisfied with ...

சரிபலத்துடன் மோதிய இரு அணிகள், டி-20 வகைமையில் சிறந்த கிரிக்கெட் ஆட்டத்தை வெளிப்படுத்தின. டாஸ் ஜெயித்த அணிகள் இரண்டாவதாக பேட்டிங் செய்து இலக்கைத் துரத்தி ஜெயிப்பதே வழக்கமாகிப்போன அமீரகக் கிரிக்கெட் கதைகளின் தொடர்ச்சியாக, நேற்றும் அதுவே நிகழ்ந்தது. ஆஸ்திரேலியா டாஸ் வென்று நியூஸிலாந்தை உள்ளே அனுப்ப, ஆரம்பத்தில் நிதானமாக ஆடி, பின்னர் கேப்டன் வில்லியம்சன் (85) அதிரடி காட்ட, ஸ்கோரை வேகமாக உயர்த்திய நியூஸிலாந்து 172 எடுத்து கோப்பைக்கான இலக்கை ஆஸ்திரேலியாவுக்கு நிர்ணயித்தது.

முதல் டி-20 கோப்பைக்காக ஏங்கிக்கொண்டிருந்த ஆரோன் ஃபிஞ்ச் தலைமையிலான ஆஸ்திரேலிய அணி வெகு  உற்சாகமாக இலக்கை எதிர்கொண்டதாகத் தோன்றியது. ஃபிஞ்ச் எளிதில் விழுந்துவிட்டாலும், டேவிட் வார்னர் தன்னை விமர்சித்தவர்களுக்கு ஆவேச பதிலடி தருவதுபோல் அபாரமாகத் தாக்கி ஆடினார். ஃபிஞ்ச் அவுட்டானபின், பேட்டிங் வரிசையில் மூன்றாவதாக, வழக்கமான ஸ்மித்திற்கு பதிலாக மிட்செல் மார்ஷை அனுப்பிய கோச் ஜஸ்டின் லாங்கரின் யுக்தி சரியான சமயத்தில் கைகொடுத்தது. வார்னரோடு சேர்ந்து நியூஸிலாந்து பௌலிங்கை ஒரு கை பார்த்தார் மார்ஷ். இவரும் அதுவரை முக்கிய பங்களிப்பு ஏதும் தரமுடியாமல், விமர்சனத்துக்கு உள்ளாகி நொந்துபோயிருந்தார்! அடிபட்ட புலிகளாய் வார்னரும், மார்ஷும் சீற, ரன்கள் வேகமாக எகிறின. வார்னர் அரைசதத்துக்குப் பின் வெளியேற்றப்பட்டுவிட்டாலும், அடுத்து வந்த மேக்ஸ்வெல்லும் தன் கைவரிசையைக் காட்ட, இலக்கு எளிதில் வீழ்த்தப்பட்டது. திரளான ஆஸ்திரேலிய ரசிகர்களின் ஆரவாரத்தின் பின்னணியில், முதன்முறையாக ஆஸ்திரேலியாவின் கைக்கு வந்தது டி-20 உலகக்கோப்பை. 8 விக்கெட் வித்தியாச வெற்றி. 50 பந்துகளில் 77 விளாசி நாட் அவுட்டாக கம்பீரம் காட்டிய மிட்செல் மார்ஷ் ஆட்ட நாயகன் ஆனார். டேவிட் வார்னர் தொடர் நாயகன்.

ஃபைனலுக்கு முன்னான, முன்னாள் வீரர்களின் வெற்றிக் கணிப்புகளில், இந்தியாவின் ஹர்பஜன் சிங் இப்படிச் சொல்லியிருந்தார்: ’மனசு சொல்லுது நியூஸிலாந்துதான் ஜெயிக்கும்னு. புத்தி என்னடான்னா, ஆஸ்திரேலியாதான் சாம்பியன்ங்கறதே!..’ என்னே, சர்தார்ஜியின் புத்திசாலித்தனம்!

வார்னரை ஐபிஎல் கேப்டன்சியிலிருந்து இந்த வருடம் தூக்கியிருந்த ’சன் ரைசர்ஸ் ஹைதரபாத்’ அணி நிர்வாகம், நகத்தை கடித்துக்கொண்டு உட்கார்ந்திருந்ததோ என்னவோ? 2022-ல் வரவிருக்கும் இரு புதிய ஐபிஎல் அணிகளில் ஒன்றிற்கு டேவிட் வார்னர் தலைமை தாங்கும் வாய்ப்புண்டு எனத் தெரிகிறது.

அடுத்த மாதம் வரவிருக்கும் ‘ஆஷஸ்’ டெஸ்ட் தொடரில் வலிமையான இங்கிலாந்தை சந்திக்கவிருக்கும் ஆஸ்திரேலியாவுக்கு பெரும் உத்வேகம் தருவதாக   அமைந்த திடீர் டானிக், இந்த உலகக்கோப்பை வெற்றி. ஆனால், ’டெஸ்ட்’ கதையே வேறயாச்சே.. என்ன நடக்குமோ..

**  

கொட்டவா.. இன்னும் கொட்டவா ?

வருஷத்தில் பாதிநாள் தண்ணீர் தண்ணீர் என்று தவிக்கிறோம். மீதி நாட்களில், தண்ணீரில் மூழ்கியே செத்துவிடுகிறோம் !

இது என்ன, ஏதாவது புதுப்பட வசனமா? இல்லை சஞ்ஜிப் பானர்ஜியும், ஆதிகேசவலுவும் சேர்ந்து அலறிவைத்தது. எந்தத் தேள் கொட்டியது? யார் இந்த மஹானுபாவர்கள்? மதராஸ் ஹைகோர்ட் ஜட்ஜுகள்தான். பொறுக்கமுடியவில்லை போலிருக்கிறது. வாயிலிருந்து கொட்டிவிட்டது வார்த்தை. ஹைகோர்ட்டு வளாகத்திலும் தண்ணி புகுந்துவிட்டதோ என்னவோ? ஆக்‌ஷன் எடுக்காவிட்டால்.. நீதி அரசர்கள் சென்னை கார்ப்பரேஷனுக்கு எச்சரிக்கை விடுத்திருக்கிறார்கள். கார்ப்பரேஷன் என்பதென்ன, பொட்டிக்கடைதானே.. பெருவணிகமான அரசுக்கு எச்சரிக்கை விடுத்துப்பார்ப்பதுதானே?

In Chennai, rains stop, but problems continue to persist - Rediff.com India  News

சமூகநீதிக்குப் பேர்போன அரசு என்ன சொல்கிறது? ’சமரசம் உலாவும் இடம்.. நம் வாழ்வில் காணா.. சமரசம் உலாவும் இடமே..!’ – என வெள்ளக்காடாய் மாறிவிட்ட சென்னையின் கோலாகலத்தைப் பார்த்து, கோவிந்தராஜன் மாதிரிப் பாட்டுப் பாடிக்கொண்டிருக்கிறதா? அது சொன்னது இது: மழையோ, வெள்ளமோ எங்களுக்கு அதெல்லாம் தெரியாது; முன்னாடி ஆண்டவங்கதான் எல்லாத்துக்கும் காரணம்..

கொட்டிக்கொட்டிப் பேசி.. கதிகலங்கவைக்கும் வானம்.

கார் மிதக்குது, கட்டடம் மிதக்குது,  ஊரே மிதந்து ஓடமா ஆடுது.

இப்படியே போனா..

விடிஞ்சிரும் !

**

பௌத்தம் – குஷிநகரில் புத்தர்

சொர்கத்திலிருந்து புத்தர் பூமிக்குத் திரும்பிய நாள் என இந்தியாவிலும், பௌத்தமதத்தைப் பிரதான மதமாகக் கொண்ட தாய்லாந்து, மயன்மார், கம்போடியா, ஸ்ரீலங்கா, தென்கொரியா, பூட்டான் போன்ற  நாடுகளிலும் கொண்டாடப்படும் விசேஷமான தினம் இன்று (20/10/21). ’அபிதம்மா தினம் ’(Abhidhamma Day). தான் மறைந்த பிறகு, மூன்று மாதங்களுக்குப் பின் இந்த நாளில்தான், இந்தியாவின் குஷிநகரில் புத்தர் மீண்டும் காட்சியளித்தார் என்கின்றன பௌத்த இலக்கியங்கள்.

Ramabhar Stupa was built over a portion of the Buddha's ashes on the spot where he was cremated by the ancient Malla people.
ராமாபர் ஸ்தூபி, குஷி நகர், உத்திரப்பிரதேசம்

உத்திரப்பிரதேசத்திலுள்ள குஷிநகரில் உள்ள மகாபரிநிர்வாணா பௌத்த கோவிலில் ‘அபிதம்மா தினம்’ வெகுவிமரிசையாக இன்று கொண்டாடப்பட்டது. பௌத்தமதத்தினர் பலர்,  பிஷுக்கள் ஆகியோர் தாய்லாந்து, ஸ்ரீலங்கா, பூட்டான், நேப்பாள், மயன்மார் ஆகிய நாடுகளிலிருந்து குஷிநகருக்கு வந்து புனிதவிழாவில் கலந்துகொண்டனர்.  6 அடி நீள புத்தர் சயனக்கோலத்தில் அழகாகக் காட்சிதருகிறார் இங்கு. இந்த பரிநிர்வாணா புத்தர் சிலை 1876-ல் பூமிக்கடியிலிருந்து தோண்டியெடுக்கப்பட்டு, பின் கோவில் கட்டப்பட்டு பிரதிஷ்டை செய்யப்பட்டிருக்கிறது.  உலகெங்குமுள்ள பௌத்தர்கள் தங்களின் புனிதஸ்தலங்களில் மிகவும் விசேஷமானது எனக் குஷிநகரைக் கொண்டாடுகின்றனர். இங்குள்ள  ஹிரண்யாவதி ஆற்றின் கரையிலே, புத்தர் தன் கடைசிக்காலத்தை, தன் அன்யோன்ய சிஷ்யர்களுடன் கழித்திருக்கிறார். தன் அந்திமசமயத்தில் புத்தர் குஷிநகரில், அங்கிருந்த மரங்கள் நிறைந்த ஒரு தோப்புக்கு வர, அங்கு பூத்துக்குலுங்கிய  ’சால மரங்களின்’ (Sala trees) பேரழகில் லயித்தவாறு அந்த இடத்திலேயே அவர் படுத்திருக்க அவரது உயிர் பிரிந்ததாகவும்,  அதே இடத்தில் அவரது உடல் தகனம் செய்யப்பட்டதாகவும் ’மகாயான மகாபரிநிர்வான சூத்திரம்’ (Mahāyāna Mahāparinirvāṇa Sūtra) எனும் பௌத்தநூல் கூறுகிறது.  இங்குள்ள ’ராமாபார் ஸ்தூபி’ (Ramabar Stupa) கட்டப்பட்டுள்ள இடத்தில்தான், குஷிநகர் பிரதேசத்தில் அக்காலத்தில் வசித்துவந்த ‘மல்லர்’ (Mallas) இனத்தினரால், கௌதம புத்தரின் உடல் தகனம் செய்யப்பட்டிருக்கிறது. ’மல்லர்’ இனத்தலைவனான குஷிநகரை அப்போது ஆண்ட மன்னனே புத்தர் தகனம் செய்யப்பட்ட இடத்தில் நினைவுச்சின்னமாக இந்த ராமாபார் ஸ்தூபியை நிறுவியவன்.

குஷிநகரின் புராணப்பெயர் குஷாவதி. ராமபிரானின் இரு மகன்களில் ஒருவனான மன்னன் குஷனின் ஆட்சியில், அவன் பெயரால் இந்நகரம் புராணகாலத்தில் நிறுவப்பட்டிருக்கிறது. (’குஷ்’ எனும் ஒருவகை புல் மண்டிக்கிடந்த பிரதேசமானதால் இது ‘குஷாவதி’ என அந்தக்காலத்தில் வழங்கப்பட்டது எனச் சொல்வோருமுண்டு). கி.மு. 3-5-ஆம் நூற்றாண்டுவாக்கில் இந்த நகரில் பல பௌத்தவிஹாரங்களும் ஸ்தூபிகளும் இருந்தன. பேரரசன் அசோகன் பலவித பௌத்த நினைவுச்சின்னங்களை குஷிநகரைச் சுற்றியுள்ள பிராந்தியத்தில் நிர்மாணித்திருக்கிறான். பிற்கால மொகலாயப் படையெடுப்புகளின்போது இவை தாக்குதலுக்குள்ளாகி, சிதைவுற்றன. கவனிப்பாரற்று சில நினைவுச்சின்னங்கள் மண்ணிலும் புதைந்துபோயின. Buddha relics  என அழைக்கப்படும் கௌதம புத்தரின் வாழ்வோடு சம்பந்தப்பட்ட (அவர் பயன்படுத்திய சில பொருட்கள், அவருடைய எலும்புகள், சாம்பல் போன்றவை) குஷிநகர் பகுதியில்  பிரிட்டிஷ் காலத்தில் பூமிக்கடியிலிருந்து தற்செயலாக ஒரு மரப்பெட்டியில் கிடைத்திருக்கிறது.

குஷி நகர் சர்வதேச விமானநிலையம்

புகழ்பெற்ற மகாபரிநிர்வாணா புத்தர் கோவிலோடு, 19-20ஆம் நூற்றாண்டுகளில் தாய்லாந்து, சீன, ஜப்பானிய கட்டிடக்கலைகளைக் கொண்டு கட்டப்பட்டுள்ள புத்தர்கோவில்களும் குஷிநகரிலும்  சுற்றிவரவும் காணப்படுகின்றன. இவையன்றி இந்துமதக் கடவுள்களுக்கான குருகுல்லா ஆஸ்தான், குபேர் ஆஸ்தான், சமண மத தீர்த்தங்கரர்களுக்கான தேவ்ரஹா ஆஸ்தான் போன்ற கோவில்களும் குஷிநகரில் இருக்கின்றன. இந்தியாவில் மதங்கள்பற்றி, குறிப்பாக பௌத்தமதம் தொடர்பான ஆராய்ச்சியாளர்களும், இளம் பௌத்த பிக்ஷுக்களும், மாணவர்களும் குஷிநகருக்கு அடிக்கடி வந்து போகின்றனர். சிறப்பான சர்வதேச பௌத்த சுற்றுலாத்தலமாக சமீபகாலங்களில் குஷிநகர் மாறியிருக்கிறது.

குஷிநகரில் சர்வதேச விமானநிலையம் கட்டப்பட்டு, பௌத்தர்களின் புனித நாளான ’அபிதம்மா தின’மான இன்று பிரதமர் நரேந்திர மோதியால் திறந்துவைக்கப்பட்டு, தேசத்துக்கு அர்ப்பணிக்கப்பட்டது. நிகழ்ச்சிக்கு முன், பிரதமர் மகாபரிநிர்வானா கோவிலுக்குச் சென்று புத்தரை வழிபட்டுவிட்டுச் சென்றிருக்கிறார். சுற்றுலாவாசிகளை வெகுவாகக் கவர்ந்துவரும் குஷிநகரின் வளர்ச்சியோடு, உத்திரப்பிரதேசம், பீஹாரின் பௌத்தம் தொடர்பான பகுதிகளின் தொழில், கல்வி வளர்ச்சிக்கான திட்டங்களும் சமீபகாலத்தில்  முன்னெடுக்கப்பட்டு, முனைப்புடன் செயல்படுத்தப்பட்டுவருகின்றன. குஷிநகர் ஏனைய முக்கிய நகரங்களுடன் விமானவழி இணைக்கப்படவுள்ளது.

**

’சொல்வனம்’ இதழில் கவிஞர் ஆர்.எஸ். தாமஸ்

கவிஞர் ஆர்.எஸ். தாமஸ்

பிறப்பு: 1913-ல் கார்டிஃப் (Cardiff),  வேல்ஸ்.

வேல்ஸ் (British Wales) பிராந்தியத்தின் கிராமிய வெளியில், வேல்ஷ் ஆங்கிலிக்கன் சர்ச்சில் ஒரு பாதிரியாக இளம் வயதிலிருந்தே பணியாற்ற ஆரம்பித்து, பல வருடங்களாக சர்ச் பணியில் ஆழ்ந்திருந்தவர் ஆர்.எஸ். தாமஸ்.

Welsh Poet R.S. Thomas

வேல்ஸின் சூழ்ந்து படர்ந்திருக்கும் நீல மலைகள், ஆறுகள், அப்பாவி மக்களென இயற்கையின் வண்ணங்கள் அவரில் பெரிதும் வியாபித்துக்கிடந்தன. மெருகேற்றி அவரை உருவாக்கி ஒரு கவிஞனாய் வெளியுலகிற்கு ஒரு கட்டத்தில் காண்பித்தன. மண்ணின் மைந்தனாக இல்லாமல், உலகளாவிய கவிஞனாக நீ இருக்கமுடியாது எனும் ஆங்கிலேயக் கவி ராபர்ட் ஃப்ராஸ்டின் கூற்றை ஆமோதிப்பதுபோல் தன் தாய்மண்ணான வேல்ஸ் நிலத்தை, மனிதர்களை தொடர்ந்து தன் எழுத்தில் வெளிக்கொணர்ந்தவாறே இருந்தார் அவர். பணியாற்றுமாறு நேர்ந்த வேல்ஸ் சர்ச்சின் பணிசூழல், செயல்பாடுகள் ஒருபுறம், மாறா நம்பிக்கையுடன் வந்து சென்ற ஒன்றுமறியா மனிதர்களின் வாழ்வு மதிப்பீடுகள் மறுபுறம் எனவும், பொதுவாக தேசத்தின் கலாச்சாரச் சீரழிவுபற்றிய கவலையும் விரவிக்கிடக்கின்றன அவரது கவிதை வெளியில். இருபதாம் நூற்றாண்டின் முக்கியமான ஆங்கிலக் கவிஞர்களுள் ஒருவராக பிரசித்தி பெற்றிருந்த தாமஸ், நோபல் பரிசுக்கெனப் பரிந்துரைக்கப்படலாம் எனும் பேச்சும் இருந்தது ஒரு கட்டத்தில். பிரிட்டிஷ் ராணியின் கவிதைக்கான தங்க மடலை 1964-ல் பெற்றார்.  2000-ல் மறைந்தார்.  

ஆர்.எஸ். தாமஸின் சில கவிதைகளை மொழியாக்கம் செய்திருக்கிறேன். அவர்பற்றிய என் மேற்கண்ட குறிப்போடு அந்தக் கவிதைகளை ‘சொல்வனம்’ இலக்கிய இதழ் வெளியிட்டிருக்கிறது. நன்றி: ’சொல்வனம்’.

சொல்வனத்தின் நடப்பிதழில் காணப்படும் தாமஸின் கவிதைகளில் மூன்றைக் கீழே தருகிறேன்: ( மற்றவைகளை சோம்பல்படாமல், சமர்த்தாக ‘சொல்வனம்’பக்கம்போய் வாசிப்பீர்களல்லவா ! https://solvanam.com )

அ வ ர் க ள்

அவர்களது கைகளை

என் கைகளில் எடுத்துக்கொள்கிறேன்

அழுத்தமான கைகள்

அன்பில்லை அவற்றில்,

வலிய வரவழைக்கப்பட்ட

ஒரு மென்மையைத் தவிர.

கிராமத்தின் பாழுங்குடிசைகளிலிருந்து

வந்து நிற்கும் அற்பமான ஆண்கள்.

சோகத்துடன் தங்கள் துக்கங்களை

எனது பின்வாசலருகே

கொண்டுவந்து வைத்துவிட்டு

வாயடைத்து நிற்கிறார்கள்.

பகலொளியின் பிரகாசத்தில்

வீசும் காற்றில்

அவர்களைப் பார்க்கையில்,

அவர்களின் கண்களின் ஈரத்தில்

அவர்களின் அழுகைக்கான

காரணம் புரிகிறது

தங்களை இந்த நிலைக்குக் கொண்டுவந்தவர்களோடு

மல்லுக்கு நிற்கிறார்கள் அவர்கள்..

தினமும் வானம் நீரைப் பிரதிபலிக்கிறது

நீர், வானத்தை.

தினமும் அவர்களது போராட்டத்தில்

நான் நிற்கிறேன் அவர்கள் பக்கம்,

அவர்களது குற்றங்களையும்

என்னுடையதாக ஏற்றுக்கொண்டு.

வீட்டிலிருந்து, வாழ்விலிருந்து

நினைவுகளிலிருந்துகூட

அவர்களால் வெளியேற்றப்பட்டுவிட்ட

அவர்களது ஆன்மாவுக்கு,

பின் எப்படித்தான் நான் சேவை செய்வது ?

**

வ ரு த ல்

கடவுளின் கையில்

ஒரு சின்னஞ்சிறு உலகம்.

பார் இங்கே.. என்றார்.

பார்த்தான் மகன்.

எங்கோ வெகுதூரத்தில்,

நீரினுள் பார்ப்பதுபோல்,

வறண்டு வெடித்திருந்த

செந்நிற பூமியைப் பார்த்தான்.

விளக்குகள் அங்கு எரிந்தன.

பெரும் கட்டிடங்கள் தங்கள்

நிழலைப் பரப்பியிருந்தன

பாம்பைப்போல் நெளிந்து மின்னும்

ஆறொன்று ஒளிவீசி ஓடிக்கொண்டிருந்தது

அந்த மலைப்பகுதியின்  குன்றின்மீது

ஒரு மொட்டை மரம்

வானத்துக்கே துக்கம் தந்து நின்றிருந்தது.

பலர் அதனை நோக்கி

தங்கள் மெலிந்த கைகளை

நீட்டியவாறு நின்றுகொண்டிருந்தார்கள்,

காணாமற்போன வசந்தம்

அதன் கிளைகளுக்குத் திரும்பவேண்டுமென

இறைஞ்சுவதுபோல.

அந்த மகன்

அவர்களைப் பார்த்தான்.

என்னை அங்கே போகவிடுங்கள் என்றான்

**


ம ற் றொ ன் று

தூரத்தில் அட்லாண்டிக் சமுத்திரத்தின்

ஏதோ ஒரு பகுதி ஒரேயடியாகப் பொங்க,

விளக்கில்லாத, துணையேதுமில்லாத

அந்தக் கிராமத்தின் கரையோரத்தில்

சீறும் அலைகள் எழுவதும் வீழ்வதும்,

எழுவதும் வீழ்வதுமான சத்தத்தை

அதிகாலையில் தூக்கமின்றி

படுத்தவாறு கேட்டுக்கொண்டிருக்கிறேன்.

சில மணிநேரத்துக்கு, சில நாட்களுக்கு

சில வருஷங்களுக்கு என்றல்ல –

என்றென்றைக்குமாகவும் நமது பிரர்த்தனைகள்

தன் மீது மோதிமோதி விழுந்து நொறுங்குமாறு

இருந்துகொண்டிருக்கும் அந்த மற்றொன்றும்

தூங்காமல்தானிருக்கிறது

என்கிற நினைவும் கூடவே ..

**

டி-20 உலகக்கோப்பை 2021

ஐபிஎல் முடிந்த சூட்டோடு சூடாக, அமீரகத்தில் ஆரம்பித்துவிட்டது இன்று (17-10-2021) டி-20 உலகக்கோப்பைக்கான போட்டிகள். ஓமனின் தலைநகரான மஸ்கட்டில் முதல் மேட்ச்சில் , ஓமன், பாப்புவா நியூ கினீயைத் தோற்கடித்துவிட்டது. இன்றைய இரண்டாவது போட்டியில் ஸ்காட்லாந்து, பங்களாதேஷை எதிர்த்து ஆடிவருகிறது.

ICC T-20 World Cup

உலகின்  டாப்-8 கிரிக்கெட் நாடுகளின் அணிகள் இரு பிரதான குழுக்களாகப் பிரிக்கப்பட்டுள்ளன:

Group-1 : இங்கிலாந்து, ஆஸ்திரேலியா, வெஸ்ட் இண்டீஸ் மற்றும் தென்னாப்பிரிக்கா.

Group-2 : இந்தியா, பாகிஸ்தான், ஆஃப்கானிஸ்தான், நியூஸிலாந்து.

இவை தவிர, மேலும் இரண்டு குழுக்கள் உண்டு – இப்படி:

Group A: ஸ்ரீலங்கா, நெதர்லாந்து, அயர்லாந்து, நமீபியா.

Group B: பங்களாதேஷ், ஸ்காட்லாந்து, ஓமன், பாப்புவா நியூ கினீ.

இந்தியா விளையாடும் உலகக்கோப்பையின் முதல் மேட்ச் 24/10/2021 (ஞாயிறு) துபாயில் நடக்கும். பரமவைரியான பாகிஸ்தானுடன் ஆட்டம். ரசிகர்களின் ஆட்டபாட்டங்களும் ரசமாக இருக்கும்! இப்படி ஐசிசி-யின் மெகா டூர்னமெண்ட்டுகளில் மட்டும், பாகிஸ்தான், இந்தியா மோதிக்கொள்வது வழக்கமாகிவிட்டிருக்கிறது, சமீப காலமாக. காகிதத்தில், கோஹ்லியின் இந்தியா, பாபர் ஆஸமின் பாகிஸ்தானைவிட (குறிப்பாக பேட்டிங்கில்) வலுவானதாகத் தெரிகிறது. டி-20 உலகில், எந்த நாளில் என்ன நடக்கும் எனச் சொல்லமுடியாது. ஞாயிறு வரட்டும், வந்து சொல்லட்டும் கதை!

டி-20 உலகக்கோப்பைக்கான இந்திய அணி: விராட் கோஹ்லி(கேப்டன்), ரோஹித் ஷர்மா (துணைக்கேப்டன்), கே.எல்.ராஹுல், சூர்யகுமார் யாதவ், ரவீந்திர ஜடேஜா, ரிஷப் பந்த், இஷான் கிஷன், ஆர்.அஷ்வின், ஜஸ்ப்ரித் பும்ரா, ராஹுல் சாஹர், முகமது ஷமி, புவனேஷ்வர் குமார், ஹர்தீக் பாண்ட்யா, வருண் சக்ரவர்த்தி, ஷர்துல் டாக்குர்.  (டாக்குர், அக்ஷர் பட்டேலுக்குப் பதிலாகக் கடைசிகட்டத்தில் அணியில் சேர்க்கப்பட்டிருக்கிறார். Fast bowling allrounder in form – என்பதால்.)

**