ஐபிஎல்: மண்ணைக் கவ்விய மும்பை இண்டியன்ஸ்!

நேற்று (24-4-18) ஐபிஎல்-இல் குறைந்தபட்ச ஸ்கோர் போட்டியொன்று, காண சற்று விசித்திரமாக இருந்தது. மும்பை இண்டியன்ஸ் அணியும் சன்ரைசர்ஸ் ஹைதராபாத் அணியும் மும்பையில் மோதிய போட்டி. எப்போதும் தோற்பதே நமக்கு வழக்கமாப் போச்சே..இந்தத் தடவையாவது ஜெயிச்சு, சச்சின் டெண்டுல்கரின் பிறந்த நாளில் அவருக்கு ஒரு வெற்றிப்பரிசு தரலாம் என நினைத்து மும்பை இண்டியன்ஸ் இறங்கியதாகத்தான் தோன்றியது ஆரம்பத்தில். நினைத்ததெல்லாம் ஒருவேளை, வாழ்க்கையில் நடந்துவிடலாம். ஆனால் ஐபிஎல்-இல் அப்படியெல்லாம் நடக்காது!

முதலில் ஆடிய ஹைதராபாத், ஆரம்பத்திலிருந்தே தடுமாறி ஒவ்வொரு விக்கெட்டாகப் பரிதாபமாகப் பறிகொடுத்தது ரசிகர்களை ஆச்சரியப்படுத்தியது. முதல் மூன்று போட்டிகளை கம்பீரமாக வென்ற ஹைதராபாத், தோற்பதையே பொழுதுபோக்காகக்கொண்டிருக்கும் மும்பையை எதிர்த்து ஆடுகிற லட்சணமா இது? நம்பமுடியவில்லை. மிட்செல் மெக்லனகனின் (Mitchel McClenaghan) முதல் ஓவரிலேயே ஹைதராபாத்துக்கு மணி அடித்திருக்கவேண்டும். ஷிகர் தவனையும் சாஹாவையும் ஒரே ஓவரில் அவர் அலட்சியமாகத் தூக்க, கேப்டன் வில்லியம்சனும், மனிஷ் பாண்டேயும் பௌண்டரி அடிக்க ஆரம்பித்தனர். இந்த வருட ஐபிஎல்-லில் தன் முதல் மேட்ச் விளையாடிய ஆஃப்கானிஸ்தானின் முகமது நபியும், யூசுஃப் பட்டானும் இன்னும் ஆடவேண்டியிருக்க, ஒரு மதிக்கத்தக்க ஸ்கோரை ஹைதராபாத் எட்டும் எனவே தோன்றியது. ஆனால் பாண்டே, ஷகிப்-உல்-ஹசன், வில்லியம்சன் என அடுத்தடுத்து சரிந்து விழ, ஹைதராபாத் எக்ஸ்ப்ரெஸ் ஆட்டம் கண்டது. மும்பையின் தரப்பில் நன்றாக பந்துவீசிய மெக்லனகன், ஹர்திக் பாண்ட்யா, மயங்க் மார்க்கண்டே தலா 2 விக்கெட்டுகள் எனப் பலிவாங்கினர். ஹைதராபாத் 118 ரன் மட்டுமே எடுத்து, இன்று தொலைந்தோம் நாம் என மும்பையின் இரவு வானைப் பார்த்துப் பெருமூச்சுவிட்டது.

மும்பைக்கான இலக்கு 119 ரன் மட்டுமே. பூ! இவ்வளவுதானா..ஊதிருவோம்! என நினைத்து ஆட இறங்கியது மும்பை. ஹைதராபாதின் பௌலிங், வேகப்பந்துவீச்சாளர்களான புவனேஷ்வர்குமார், பில்லி ஸ்டான்லேக் (Billy Stanlake) இல்லாததால், பலகீனமாகத் தெரிந்ததும் ஒரு காரணம். ஆனால் அந்த இரவு மும்பை இண்டியன்ஸுக்கு அதிர்ச்சிக்கு மேல் அதிர்ச்சியை மடியில் வைத்துக் காத்திருந்தது. பந்துவீச்சை ஆரம்பித்த சந்தீப் ஷர்மா அபாரமாக ஸ்விங் செய்ததோடு, கஞ்சத்தனமாக 3 ஓவரில் 9 ரன் மட்டும் கொடுத்து, மும்பையை தொடக்கத்திலேயே மூச்சுத் திணறவைத்தார். கூடவே எவின் லூயிஸையும் காலி செய்தார். ஸ்பின்னர்கள் ரஷித் கான், முகமது நபி, ஷகிப்-உல்-ஹசன் என ஹைதராபாத் குத்தாட்டம் போட, மும்பைக்கு அவசர ஆக்ஸிஜன் தேவைப்பட்டது. துவக்க ஆட்டக்காரரான சூர்யகுமார் யாதவ் 34, ஆல்ரவுண்டர் க்ருனால் பாண்ட்யா 24, என்பதைத் தவிர மும்பையிடம் காட்டிக்கொள்ள ஸ்கோர் ஏதுமில்லை. ரோஹித் ஷர்மா உட்பட யாருக்கும் பிட்ச்சில் என்ன நடக்கிறதென்றே கடைசிவரை புரியவில்லைபோலும். ஒரு கட்டத்தில் 78 ரன்னுக்கு 7 விக்கெட்டுகளைப் பறிகொடுத்து பரிதவிக்க, ஹர்திக் பாண்ட்யா இன்னும் இருக்கிறார்..இலக்கை அடைந்துவிடலாம் என்கிற நப்பாசை மும்பை கேம்ப்பில் அப்போது கொஞ்சம் இருந்தது. ஆனால் டெஸ்ட் மேட்ட்ச்சிலேயே அதிரடி காட்டிய ஹர்திக் பாண்ட்யா இங்கே செய்ததென்ன? 19 ரன்களில் வெறும் 3 ரன். இலக்குப் பக்கம் வரவே முடியாமல், 19-ஆவது ஓவரில் 87 ரன்னில் ஆல்-அவுட்டாகிக் கேவலமாகத் தோற்று தன் தோல்விப் பட்டியலை நீட்டிக்கொண்டது மும்பை இண்டியன்ஸ். ஒரு கடினமான போட்டியை, 31 ரன் வித்தியாசத்தில் வென்றது ஹைதராபாத்.

இறுதியில் பார்த்தால், அப்படி என்னதான் நடந்தது? 118-க்குள் ஹைதராபாதைக் கட்டுப்படுத்தியதை, மும்பைக்கு அதனாலேயே நம்பமுடியவில்லை! தான் ஆடவரும்போது, பிட்ச்சில் ஏதோ பேய், பூதம் ஒளிந்திருக்கிறது என ஒரேயடியாகப் பயந்துவிட்டது. விளைவாக மிகையான ஜாக்ரதை உணர்வோடு அவ்வப்போது மும்பை பேட்ஸ்மன்கள் தடுப்பாட்டம் காண்பிக்க, ஹைதராபாத் பௌலர்கள் உள்ளே புகுந்து, பின்னிப் பெடலெடுத்துவிட்டார்கள். சித்தார்த் கௌல் 3 விக்கெட் சாய்க்க, பஸில் தம்பி, ஆஃப்கானிஸ்தானின் ரஷீத் கான் –தலா 2 விக்கெட்டுகளையும் வீழ்த்தினர். 17 –ஆவது ஓவரை வீசிய ரஷீத், ஒரு ரன்னும் கொடுக்கவில்லை-அப்போது விளையாடிக்கொண்டிருந்தது ஹர்திக் பாண்ட்யா! இதிலிருந்தே எந்த மனநிலையில் இலக்கைத் துரத்தவந்தது மும்பை என்பது புரிந்துவிட்டிருக்கும். முடிவாக வெற்றிஇலக்கு, மும்பையைத் துரத்தி விரட்டிவிட்டது!

ஜொலித்த ஸ்பின் நட்சத்திரங்கள்: மயங்க் மார்க்கண்டே (மும்பை இண்டியன்ஸ்). ரஷீத் கான் (சன்ரைஸர்ஸ் ஹைதராபாத்)

**

Advertisements

க்ரிக்கெட் : பலே பாண்ட்யா!

மூன்றே நாளில் முடிவுகண்டது ஸ்ரீலங்காவிற்கெதிரான கண்டி டெஸ்ட் மேட்ச். இந்திய வெற்றி. 3-0 என தன் மண்ணிலேயே ஒயிட்வாஷ் செய்யப்பட்டது ஸ்ரீலங்கா. ஸ்ரீலங்கா இந்த தொடரில் உண்மையில் க்ரிக்கெட் விளையாடியதா? நினைவுக்கு ஒன்றும் சரியாக வரவில்லை. முதல் டெஸ்ட்டில் நுவான் ப்ரதீப், பின்பு கொஞ்சம் ஹெராத், கருணரத்னே, குஸால் மெண்டிஸ் என நாங்களும் விளையாடுவோம் க்ரிக்கெட் என்றார்கள். மற்றவர்கள் ஏதோ சினிமாவில் கௌரவ நடிகர்கள் போல் வந்தார்கள்; சென்றார்கள். போதாக்குறைக்கு காயங்களினால் விளையாட முடியாத நிலையில் ப்ரதீப், லக்மல், சமீரா போன்ற வீரர்கள். கடைசி போட்டியில் மகா கேவலமாக இருந்த ஸ்ரீலங்க ஆட்டத்தில், லக்ஷன் சந்தகன் (Lakshan Sandakan) சுழல்வீரர்) மட்டும் உயிர்ப்போடு வெளிப்பட்டார். புதிய கேப்டனான தினேஷ் சண்டிமாலின் நிலை பரிதாபம். அவருடைய கேப்டன்சி மோசமில்லை. ஆனால், பேட்டிங் ஃபார்மில் அவருமில்லை. தொடரின் இறுதியில் நேர்காணலில் அவருக்கு என்ன சொல்வதென்றே தெரியவில்லை.

இந்திய பேட்டிங்-குறிப்பாக துவக்க ஆட்டம் சிறப்பாக இருந்தது. ஷிகர் தவண் இரண்டு சதங்கள் விளாசி, நல்ல துவக்கம் தந்தார். ரஹானே, புஜாரா, கோஹ்லி, ராஹுல் வழக்கம்போல் தங்களிடமிருந்து எதிர்பார்க்கப்பட்டதைச் செய்தனர். Silver lining என்பார்களே அது ஹர்தீக் பாண்ட்யாதான் (Hardik Pandya). ஏற்கனவே இந்தியாவுக்காக ஒரு-நாள், டி-20 போட்டிகளில் கவனிக்கத்தக்கப் பங்களிப்பு செய்தவர். முதன்முறையாக, இந்தத் தொடரில்தான் டெஸ்ட் போட்டிகளில் அறிமுகப்படுத்தப்பட்டார். 6,7 என்கிற இடங்களில் அஷ்வின், சாஹா வருவதால், அணியின் பேட்டிங் வரிசையில் பாண்ட்யாவுக்குக் கிடைத்தது 8-ஆவது இடம். பையன் சளைக்கவில்லை! போட்டுத்தள்ளிவிட்டார் ஸ்ரீலங்காவை.

முதல் இரண்ட் போட்டிகளில் இந்தியா முதல் இன்னிங்ஸில் 600-க்கும் மேலே எடுத்துவிட்டது. துவக்க, மிடில்-ஆர்டர் பேட்ஸ்மன்கள் நன்றாகச் செய்திருந்ததால், பாண்ட்யாவுக்கு வாய்ப்பு அதிகமில்லை. அப்படியும் போன மேட்ச்சில் குறிப்பிடத்தக்க, run-a-ball அரைசதம் விளாசியிருந்தார். கடைசிப்போட்டியில் தவண், ராஹுலுக்குப்பின் இந்தியாவின் பேட்டிங்கில் ‘தம்’ இல்லை. புஜாரா, ரஹானே எளிதாக வெளியேற்றப்பட, கோஹ்லியும் பெரிசாக ஒன்றும் செய்துவிடவில்லை. அஷ்வின், சாஹா ஆகியோர் மட்டையைச் சுழற்ற வேண்டியதாயிற்று. அஷ்வின் வீழ்ந்தபின் இறங்கினார் பாண்ட்யா. சாஹாவும் சொற்பமாக சரிந்துவிட இந்தியா 400-ஐத் தொடுமா என்பது தொடரில் முதல் முறையாக சந்தேகத்தை கிளப்பியிருந்தது. புதிதாகச் சேர்ந்திருந்தார் குல்தீப் யாதவ். கொஞ்சம் சுமாராக ஆடக்கூடிய உத்திரப்பிரதேச ஆல்ரவுண்டர். அவர் அடுத்த முனையில் ஆடும்வரை, தன் வழக்கத்துக்குப் புறம்பாக, அந்தக்காலத்து ரவி சாஸ்திரி போல் அதிநிதானமாக ஆடினார் பாண்ட்யா. ஸ்ரீலங்க பௌலர்களுக்கு தாங்கள் சிறப்பாகப் பந்துவீசுவது போன்றதொரு ப்ரமை. குல்தீப்பும் விழுந்துவிட, ஷமியும், உமேஷ் யாதவும்தான் பாக்கி என்கிற நிலையில், விஸ்வரூபம் காண்பித்தார் பாண்ட்யா. புஷ்பகுமாராவின் ஒரு ஓவரில் 4,4,6,6,6 என ஸ்ரீலங்காவை சிதறவிட்டார். என்ன நடக்கிறது எனப் புரிந்துகொள்ளுமுன் தொண்ணூறுகளில் ப்ரவேசித்துவிட்டார். உமேஷ் யாதவைத் துணையாக வைத்துக்கொண்டு ஸ்ரீலங்காவின் சிறந்த பௌலரான சந்தகனை சாத்தினார் ஒரு சாத்து. 91-லிருந்து 97. ஓ! செஞ்சுரி அடித்தேவிடுவாரோ? யாதவ் அந்தப்பக்கம், இந்தப்பக்கமாக சிங்கிளுக்காக ஓடிப்பார்க்க, அவருக்கு நிதானம் சொன்னார் பாண்ட்யா. இப்படி ஒரு தில்லா? இரண்டு ரன்கள். அடுத்து அந்த ஸ்ட்ரெய்ட் ஃபோர். 86 பந்துகளில் ஒரு டெஸ்ட் செஞ்சுரி! (108, 8 பௌண்டரி, 7 சிக்ஸர்). அவருடைய கேரியரின் முதல் first-class century-யே இந்த டெஸ்ட் சதம்தானாம். எப்படி நம்ப ஆள்? வீரேந்திர சேஹ்வாக் பார்த்திருக்கிறார் போலிருக்கிறது; ‘குங்-ஃபூ பாண்ட்யா!’ என்றார் ட்விட்டரில் அடுத்த நாள்!

இந்தத்தொடரில் பாண்ட்யாவுக்கு போதுமான பௌலிங்கை கோஹ்லி தரவில்லை. ஸ்பின்னர்கள், ஷமி, உமேஷ் என கவனம் செலுத்தினார். கிடைத்த சொற்ப ஓவர்களில் 4 விக்கெட்டுகளை வீழ்த்தியதோடு, நன்றாக ஃபீல்டிங்கும் செய்திருக்கிறார் பாண்ட்யா. செல்லவேண்டிய தூரம் அதிகம் எனினும், இந்தியாவுக்கு ஒரு உயிர்ப்பான டெஸ்ட் ஆல்ரவுண்டர் கிடைத்துவிட்டார் எனவே தோன்றுகிறது.

**

ஒருநாள் கிரிக்கெட்: தர்மசாலாவில் இந்தியாவின் வெற்றி

நியூஸிலாந்துக்கு எதிரான டெஸ்ட் கிரிக்கெட் தொடரை 3-0 என்று விராட் கோஹ்லியின் தலைமையில் வென்ற இந்தியா, மகேந்திர சிங் தோனியின் தலைமையில் ஒரு-நாள் தொடரை அக்டோபர் 16-ல், ஹிமாச்சல் பிரதேஷின் தர்மசாலா மைதானத்தில் தொடங்கியது. டெஸ்ட் தொடரிலிருந்து மாறுபட்ட அணி, தோனிக்குக் கொடுக்கப்பட்டிருந்தது. இந்தியாவின் மேட்ச்-வின்னர் ரவிச்சந்திரன் அஷ்வின் அணியில் இல்லை. அவரோடு முகமது ஷமி, ரவீந்திர ஜடேஜா போன்ற முன்னணி வீரர்களும் ஓய்வுகொடுக்கப்பட்டனர். அவர்களின் இடத்தில் அமித் மிஷ்ரா, ஹர்திக் பாண்ட்யா மற்றும் அக்‌ஷர் பட்டேல் ஆகியோரை சேர்த்தது இந்திய கிரிக்கெட் தேர்வுக்குழு. ஹர்திக் பாண்ட்யா தன் முதல் ஒரு-நாள் மேட்ச்சை இந்தியாவுக்காக ஆடினார். அதிரடி சுரேஷ் ரெய்னா வைரல் ஜுரத்தில் போர்த்திக்கொண்டு படுத்துவிட்டதால், கேதார் ஜாதவ் (யாதவ் அல்ல, ஜாதவ்!) சேர்க்கப்பட்டார்.

அஷ்வினின் சூப்பர் சுழல் தாக்குதலுக்கு ஈடுகொடுக்கமுடியாமல் டெஸ்ட் தொடரில் மூச்சுத் திணறிய நியூஸிலாந்து, ஒரு-நாள் தொடரில் சிறப்பான ஆட்டத்தை வெளிப்படுத்தும் என இரு தரப்பிடமிருந்தும் எதிர்பார்க்கப்பட்டது. ஏனெனில், நியூஸிலாந்தின்` ஒரு-நாள், டி-20 போட்டி` செயல்பாடுகள் கடந்த ஒருவருடமாக மிகவும் சிறப்பாக அமைந்திருந்ததே காரணம். அப்போது நியூஸிலாந்தின் சூப்பர்ஸ்டார் ப்ரெண்டன் மெக்கல்லம் (Brendon McCullum) பேயடியாக எதிரி பௌலர்களை இஷ்டத்துக்கும் போட்டுத்தள்ளிக்கொண்டிருந்தார். ஆனால் அவர் இப்போது அணியில் இல்லை. இந்த சூழலில், தர்மசாலாவின் அழகுவண்ண மைதானத்தில் நியூஸிலாந்து காட்டிய ஆட்டம்தான் என்ன?

முதலில் பேட் செய்த நியூஸிலாந்து உற்சாகமாகத்தான் ஆரம்பித்தது. உமேஷ் யாதவ்வின் முதல் ஓவரில் கவனமாக இருந்த மார்ட்டின் கப்ட்டில் (Martin Guptill), இரண்டாவது ஓவரில் குஷியானார். பும்ரா வீசவேண்டியது இரண்டாவது ஓவர். ஆனால் இந்தியாவுக்காகத் தன் முதல் ஒரு-நாள் போட்டி விளையாடும் ஹர்தீக் பாண்ட்யாவிடம்(Hardik Pandya) அதைக் கொடுத்து நியூஸிலாந்தை `டீஸ்` பண்ணினார் கேப்டன் தோனி. ‘புதுப்பயல் வந்துருக்கான்.. பார்த்துறவேண்டியதுதான் ஒரு கை!’ – என விளாசிய கப்ட்டில், மூன்று பௌண்டரிகளை விறுவிறுவென அடித்தார். ஆனால் ஆஃப் ஸ்டம்ப்பிற்கு நேராகத் தோன்றி, உள் திரும்பி இறங்கிய ஒரு வேகப்பந்தில் கப்ட்டிலை அசரவைத்தார் பாண்ட்யா. காலை நகர்த்தாது ஆஃப் சைடில் கட் செய்த கப்ட்டிலை, வயிற்றோடு சேர்த்துப் பிடித்தார் இரண்டாவது ஸ்லிப்பிலிருந்த ரோஹித் ஷர்மா. ஷர்மாவுக்கு வயிற்றில் வலி. அவுட்டான கப்ட்டிலுக்கோ முகத்தில் கிலி! பாண்ட்யாவின் முதல் ஒரு-நாள் விக்கெட். அடுத்த பக்கத்தில் ஆடிய டாம் லேத்தம் (Tom Latham) பந்துகளைத் தேர்வு செய்து உஷாராக ஆடியதால், நியூஸிலாந்துக்கு நம்பிக்கை தந்தார்.
அருமையாக வீசிய உமேஷ் யாதவ், பெரிதும் எதிர்பார்க்கப்பட்ட கேப்டன் கேன் வில்லியம்சன் (Kane Willamson), முன்னாள் கேப்டன் ராஸ் டேய்லர்(Ross Taylor) இருவரையும் ஒருவர் பின் ஒருவராகத் தூக்கினார். ஹர்திக் பாண்ட்யா அவ்வப்போது தொளதொள பந்துகளைப் போட்டதால் ரன்களை விட்டுக்கொடுக்க நேர்ந்தது. ஆனால் தோனிக்கு அவர் மேல் அசராத நம்பிக்கை. தொடர்ந்தார். அடுத்து வந்த ஓவர்களில் அதிரடி ஆட்டக்காரரான கோரி ஆண்டர்சன்(Corey Anderson) மற்றும் லூக் ரோன்க்கி (Luke Ronchi) இருவரையும் அருமையான பந்துகளால் விழுங்கி ஏப்பம் விட்டார் பாண்ட்யா. ஆண்டர்சன் முன்னேறி விளாசிய பந்தை, ஆஞ்சனேயர் போல் ஆகாசத்தில் எழும்பி லபக்கினார்.. யாரப்பா இந்த சூப்பர்மேன்? ஓ, நம்ம உமேஷ் யாதவ்! இப்படியெல்லாம்கூட கேட்ச் பிடிப்பாரா இவரு! முதல் மேட்ச்சிலேயே 3 விக்கெட் அள்ளிய பாண்ட்யா, கேப்டன் தன் மேல் வைத்த நம்பிக்கை சரியானதுதான் என நிரூபித்தார்.

பௌலிங்கை இப்போது மாற்றிய தோனி, சுழல் வீரர்களான கேதார் ஜாதவ், அக்‌ஷர் பட்டேல், மற்றும் வேகப்பந்துவீச்சாளர் ஜஸ்ப்ரித் பும்ரா (Jasprit Bumrah) ஆகியோரைப் புகுத்த, நியூஸிலாந்திற்கு மேலும் சோதனை வளர்ந்தது. லேத்தமைத் தவிர வேறு எந்த மிடில் ஆர்டர் பேட்ஸ்மனும் இந்திய பௌலிங்கை சமாளிக்க முடியவில்லை. ஜாதவ்-வின் அடுத்தடுத்த பந்துகளில் நீஷம் மற்றும் சாண்ட்னரின் விக்கெட்டுகளைப் பறிகொடுத்த நியூஸிலாந்துக்கு விழி பிதுங்கியது. அமித் மிஷ்ராவின் லெக்-ஸ்பின்னை லேத்தம் மற்றும் டக் ப்ரேஸ்வெல் (Doug Bracewell) கவனமாக ஆடினார்கள். ப்ரேஸ்வெல்லைக் கேட்ச் கொடுக்கவைத்து மிஷ்ரா வெளியேற்றியபின், 10-ஆவது ஆட்டக்காரராக இறங்கினார் டிம் சௌதீ (Tim Southee). பேட்டிங் திறமைகொண்ட வேகப்பந்துவீரர். இறங்கிய உடனேயே தன் வேலையை ஆரம்பிக்க, பௌண்டரிகள், சிக்ஸர்கள் எனத் தூள் பறந்தது. நியூஸிலாந்து ரசிகர்கள் முகத்தில் பிரகாசம். ஒரு-நாள் போட்டியில் தன் முதல் அரைசதத்தை 40 பந்துகளில் கடந்தார் சௌதீ. டென்ஷனில் விளையாடிக்கொண்டிருந்த லேத்தமின் முகமும் மலர்ந்தது. ஆனால் 55 ரன்னில் சௌதீயையும், ஒரே ரன்னில் இஷ் சோதியையும் மிஷ்ரா வெளியேற்றினார். லேத்தம் திறமையான ஆட்டத்தில் 79 ரன்னெடுத்து நாட்-அவுட்டாக நிற்க, 190 ரன்களில் தன் சோகக்கதையை 44-ஆவது ஓவரிலேயே முடித்துக்கொண்டது நியூஸிலாந்து.

ஜெயிப்பதற்கு 191 என்கிற இலக்கு இந்தியாவுக்கு ஒன்றுமில்லை. ரோஹித் ஷர்மாவும், அஜின்க்யா ரஹானேயும் ஆட்டத்தைத் துவக்கினார்கள். ஆனால் இருவரும் ப்ரேஸ்வெல் மற்றும் நீஷம் ஆகியோரின் துல்லிய வேகத்துக்கு பலியாகினர். 3-ஆம் நம்பரில் இறங்கிய துணைக்கேப்டன் விராட் கோஹ்லி நியூஸிலாந்து பௌலிங்கை அலட்சியமாக எதிர்கொண்டார். அவர் ஒருபக்கம் ஷாட்டுகளை விளையாட, மறுபக்கத்தில் அதிகம் நிலைக்கமுடியாத மணிஷ் பாண்டேயும் , தோனியும் பெவிலியன் திரும்பினர். கேதார் ஜாதவ்வின் துணையோடு 32-ஆவது ஓவரிலேயே இலக்கை எட்டினார் கோஹ்லி. கோஹ்லியின் அருமையான இன்னிங்ஸில் 9 பௌண்டரிகள் மற்றும் ஒரு சிக்ஸர், தர்மசாலாவில் நிறையக் குவிந்திருந்த இளம் ரசிகர்களை சீட்டிலிருந்து எகிறவைத்தன.

ஆட்டநாயகனாகத் தேர்வானார் ஆல்ரவுண்டர் ஹர்தீக் பாண்ட்யா. தொடரின் முதல் மேட்ச் எளிதாகக் கைக்கு வந்ததில் தோனிக்கு ஒரே சந்தோஷம். 20-ஆம் தேதியில் அடுத்த போட்டிக்காக ஆவலாகிறது டெல்லியின் ஃபெரோஸ் ஷா கோட்லா மைதானம். கோஹ்லியின் சொந்த ஊர். கோட்லாவில் ஏதாவது ஸ்பெஷலாக செய்யும் உத்தேசமுண்டா கோஹ்லிஜி?

**

இந்தியா-பங்களாதேஷ் : கடைசி பந்து – கேப்டனே ! முந்து !

நேற்று(23-3-16) உலகக்கோப்பை கிரிக்கெட்டில் இந்தியா வீசிய கடைசி பந்தில் பங்களாதேஷின் கதை முடிந்தது. கூடவே, இந்தியாவின் கோப்பை வாய்ப்பு உயிர் பெற்றது.

ஸ்பின் எடுக்கும் பெங்களூர் பிட்ச்சில் இந்தியா முதல் பேட்டிங்கிற்காக இறங்கியது. ஷிகர் தவனும், ரோஹித் ஷர்மாவும் அதிரடியாக ஆரம்பித்தார்கள். ரசிகர்கள் சிக்ஸர், சிக்ஸர் எனக் கூச்சலிட, தவனும், ரோஹித்தும் குஷியாகி ஆளுக்கொரு சிக்ஸர் பறக்கவிட்டார்கள். 42 ரன்கள் சேர, என்ன அவசரமோ? அதுவரை நன்றாக விளையாடிய ரோஹித்தின் தலைக்குள் திடீரென சூடேறியது. Sudden rush of blood! அபாரமாக வீசிக்கொண்டிருந்த முஸ்தாஃபிசுர் ரஹ்மானின்(Mutafizur Rahman) ஒரு பந்தை, அவருடைய தலைக்குமேலேயே சிக்ஸர் அடிக்க அடாவடி முயற்சி! நேராக உயர்ந்த பந்து, ஃபீல்டரின் கைகளில் சொகுசாக இறங்கியது. அவுட். இன்னொருமுறை ஏமாற்றினார் ரோஹித்(18 ரன்கள்). விராட் கோஹ்லி வந்து செட்டில் ஆவதற்குள், எல்.பி.டபிள்யூ ஆகி வெளியேறினார் தவன் (23 ரன்கள்). இந்தியாவின் நல்ல ஆரம்பம், திடீரென சொதப்பல் நிலைக்குத் தள்ளப்பட்டது.

பங்களாதேஷ் பௌலிங் வெகு கூர்மையாக இருந்தது. முஸ்தாஃபிசுர் ரஹ்மானுடன் சேர்ந்து அல்-அமீனும், ஸ்பின்னர்கள் ஷுவகாதா சோம்(Shuvagata Som), ஷகிப்-உல்-ஹசன் ஆகியோரும் பிரமாதமாக வீசினர். இந்திய பௌண்டரிகள் தடுக்கப்பட்டன. இந்த நிலையிலும் கோஹ்லியும், ரெய்னாவும் உழைத்தனர். ஆனால் விரைவிலேயே, ரெய்னா 30 ரன், கோஹ்லி 24 ரன் என வெளியேற்றப்பட்டனர். ஹர்தீக் பாண்ட்யா (Hardik Pandya) ஆவேசமாகத் தாக்கினார். 2 பௌண்டரி. 1 சிக்ஸர். 15 ரன்கள். பாண்ட்யாவின் ஆக்ரோஷம், சௌம்யா சர்க்காரின் (Soumya Sarkar) நம்பமுடியாத கேட்ச்சில் முடிவடைந்தது. யுவராஜ் சிங் மைதானத்திற்கு வந்தார். 6 பந்தில் 3 ரன். மூச்சுத்திணறிக் காலியானார். ஜடேஜா, தோனி, அஷ்வின் ஏதோ கொஞ்சம் சேர்த்து இந்திய ஸ்கோரை 146-க்குக்கொண்டுவந்தனர். போதாது. இந்தியாவுக்கு முக்கியமான மேட்ச். குறைந்த பட்சம் 160-ஆவது எடுத்திருக்க வேண்டும்.

147 எடுத்து ஜெயித்து, இந்தியாவை உலகக்கோப்பையில் முன்னேறவிடாமல் செய்வது பங்களாதேஷின் இலக்கு! வேகமாக ஆரம்பித்தார் தமிம் இக்பால். பும்ராவின் ஒரு ஓவரில் 4 பௌண்டரிகள். 35 ரன்களில் அவரைத் தூக்கினார் ஜடேஜா. இந்திய ஸ்பின்னர்கள் அஷ்வின், ஜடேஜா, ரெய்னாவும் நல்ல பங்களிக்க, பங்களா 95-க்கு 5 விக்கெட்டுகள் என்றானது. சௌம்யா சர்க்கார் 21 ரன்களில் விழ, முஷ்ஃபிகுர் ரஹீம்(Mushfiqur Rahim) மொகமதுல்லாவுடன் சேர்ந்து இலக்கை நோக்கி பங்களாதேஷை செலுத்தினார். இந்தியாவா, பங்களாதேஷா என அதிர்ஷ்ட தேவதை இங்கும் அங்கும் கண்ணை உருட்டிக்கொண்டிருந்த வேளை. 19-ஆவது ஓவரை கெடுபிடியாக வீசி வெறும் 6 ரன்களே கொடுத்தார் பும்ரா(Bumrah).

கடைசி ஓவர். பங்களாதேஷுக்கு தேவை 11 ரன்கள். யோசனைக்குப்பின் தோனி, ஹர்தீக் பாண்ட்யாவிடம் கடைசி ஓவரைத் தந்தார். அவரும் நேஹ்ராவும் பாண்ட்யாவுக்கு ஆலோசனை வழங்கினார்கள். பாண்ட்யா ஒரு சுவாரஸ்யமான பேர்வழி. டென்ஷன் எதுவும் அவரிடம் இல்லை ! பந்தை கையில் வாங்கி லேசாகச் சிரித்துக்கொண்டார் ! ஆனால் சீட் நுனியில் ஒட்டிக்கொண்டிருந்த இந்திய ரசிகர்களுக்கு, மூச்சு போவதும் வருவதுமாய் இருந்தது. இதயம் நின்று நின்று துடிக்க, மூவர்ண ரசிகர்கள் சிலர் வானைப்பார்த்து பிரார்த்தனை செய்வது தெரிந்தது.

முதல் பந்தில் மொகமதுல்லா ஒரு சிங்கிள். இரண்டாவது, மூன்றாவது பந்தில் பௌண்டரி விலாசினார் ரஹீம். கூடவே, பௌலிங் போட்ட பாண்ட்யாவைப் பார்த்து ஆவேசமாகக் கையை ஆட்டி சவால் விட்டார். ஏளனமாக ஏதேதோ கூவி சூடேற்றினார். பாண்ட்யா இடுப்பில் கைவைத்து பங்களாதேஷின் கொக்கரிப்பை நிதானமாகப் பார்த்தார். பின் நடந்து சென்றார். திரும்பி ஓடிவந்து அடுத்த பந்தை சூடாக வீசினார். ஷார்ட்-பிட்ச் (short-pitched)ஆகி சீறியது பந்து. ரஹீம், சிக்ஸர் என நினைத்து அலட்சியமாகத் தூக்க, பந்து உயர எழுந்தது. தவனின் ஏந்திய கைகளில் விழுந்தது. தலையைக் குனிந்துகொண்டு ரஹீம் வெளியேறுவதை பாண்ட்யா பார்த்திருந்தார். ஒன்றும் சொல்லவில்லை. 2 பந்துகள். 2 ரன்கள். பாண்ட்யாவின் அடுத்த பந்தை இப்போது மொகமதுல்லா வானில் பறக்கவிட்டார். முடிந்தது நம் கதை என இந்திய ரசிகர்கள் தலையைத் தொங்கப்போட்டுக்கொண்டார்கள். சிலர் இரவு வானில் வெள்ளைப் பந்தைப் பார்த்து விழித்தார்கள். உயர எழுந்த பந்து பௌண்டரிக்குள்ளேயே இறங்க, கவ்விப் பிடித்தார் ஜடேஜா. பிடித்ததும் தரையில் உருண்டார். உருண்டார். உருண்டார்! ரோஹித் அவரைக் கட்டுப்படுத்த வேண்டியிருந்தது. பங்களாதேஷ் ரசிகர்கள் பேந்தப்பேந்த விழித்தார்கள். என்ன நடக்கிறது?

கடைசி பந்து. பங்களாதேஷ் ஜெயிக்க 2 ரன்கள். ஒரு ரன் எடுத்தால் மேட்ச் ட்டை (Tie). இந்தியா தோற்றால் பெரும் சிக்கல். கேப்டன் தோனி பாண்ட்யாவிடம் வந்து பேசினார். நேஹ்ராவும் ஏதோ சொன்னார். சீரியஸ்தனத்தை அறிந்திராத பாண்ட்யாவின் முகம் இறுகியது. மைதானமே உறைந்திருந்தது. ஓடிவந்து போட்டார் பாண்ட்யா கடைசிபந்தை. Medium pace. Back of a length delivery. Outside the off-stump. ஆஃப் ஸ்டம்பிற்கு வெளியே எம்பி அடிக்க முயன்ற பங்களாதேஷின் சோம்(Som) பந்தைக் கோட்டை விட்டார். தோனியின் கையில் பந்து. பங்களாதேஷ் அவசரமாக 1 ரன் எடுக்க ஓட, தோனியின் சமயோஜித புத்தி கூர்மை காட்டியது. பந்தை எறிந்தால் குறி தவறக்கூடும். எதிர்திசை பேட்ஸ்மன் கோட்டைத் தொடுமுன், பாய்ந்து ஓடி, ஸ்டம்ப்பை பந்தோடு சேர்த்தடித்தார் தோனி. ஸ்டம்ப்பின் LED `இந்தியா வெற்றி!` எனப் பிரகாசித்தது.முதல் 3 பந்துகளில் 9 ரன்கள். கடைசி 3 பந்துகளில் WWW. எப்படி இருக்கு பாண்ட்யா ஓவர்!

உலகக்கோப்பைக் கனவு பூமிக்குள் புதைந்ததுவிட, வெளிறிய முகத்துடன் வெளியேறியது பங்களாதேஷ். இந்தியாவுக்கு இருக்கிறது இன்னுமொரு வாய்ப்பு 27-ந்தேதி ; ஆஸ்திரேலியாவுக்கு எதிராக. பார்ப்போம்.

**