பழைய வெஸ்ட் இண்டீஸ் !

மூன்று நாட்களாக இந்தியா-இங்கிலாந்து சென்னை டெஸ்ட்டைப் பார்த்துக்கொண்டு, இன்னொரு பக்கம் தென்னாப்பிரிக்கா-பாகிஸ்தான், பங்களாதேஷ்-வெஸ்ட் இண்டீஸ் டெஸ்ட்டுகளையும் கவனித்துக்கொண்டே வருகிறேன். நேற்று புஜாராவுடன் ஜோடி சேர்ந்து, அவருக்கு நேர்மாறான ஸ்டைலில் ரிஷப் பந்தின் விளாசல் என சென்னையில் அதிக நேரம் இழந்ததால், வெஸ்ட் இண்டீஸ் மேட்ச் ஸ்கோரை  பின் மதியத்தில் கவனிக்க அவகாசமில்லை. 200+ ல் 5 விக்கெட் இழந்த நிலையில் கைல் மேயர்ஸ் (Kyle Mayers) எனும் மிடில்-ஆர்டர் பேட்ஸ்மன் 81-ல் ஆடிக்கொண்டிருந்த நினைவு. மாலையில் நிதானமாக ஸ்கோர் போர்டைப் பார்த்தால்… என்ன, வெஸ்ட் இண்டீஸ் ஜெயித்துவிட்டதா! பங்களாதேஷின் 430-க்கு எதிராக, முதல் இன்னிங்ஸில் 259 அடிக்கவே முக்கி, முனகிய வெஸ்ட் இண்டீஸ், 395 என்கிற இமாலய இலக்கை, impossible target-ஐத் தட்டித் தூக்கிவிட்டார்களா? கடைசி நாள் பங்களாதேஷ் பிட்ச்சிலா? என்ன நடந்தது என்று complete score card-க்குள் நுழைந்தேன்.

Kyle Mayers
New star on the horizon!

ஆ! உலக அரங்கில் வெஸ்ட் இன்டீஸின் புது நட்சத்திரம்! தன் முதல் டெஸ்ட்டை அட்டகாசமாக ஆடிய கைல் மேயர்ஸ். 210 நாட் அவுட். 20 பௌண்டரி, 7 சிக்ஸர்-chasing an imposing  target. கூடவே ஜோடி சேர்ந்த இங்க்ருமா பான்னர் (Nkrumah Bonner) -இவருக்கும் அது முதல் டெஸ்ட்தான்) அடித்த 86. பங்களாதேஷ் வெலவெலத்து, விழிபிதுங்கி வெளியே ஓடிவிட்டது. 3 விக்கெட் வித்தியாசத்தில் வெஸ்ட் இண்டீஸ் வரலாற்று டெஸ்ட் வெற்றி. விவ் ரிச்சர்ட்ஸ், வீரேந்திர சேஹ்வாக், ஆந்த்ரே ரஸ்ஸல், மைக்கேல் வான் என்று ஒரே பாராட்டு மழை.. மைக்கேல் வான் ட்வீட்டுகிறார் : Kyle Mayers..Remember the name !

வாப்பா, கைல் மேயர்ஸ்! சுத்து bat-அ.. பழைய வெஸ்ட் இண்டீஸை மீண்டும் பார்க்க ஒரே ஆசை.

டெஸ்ட் கிரிக்கெட் விஸ்வரூபம் எடுத்து தான் யாரெனக் காண்பிக்கும் காலமோ..

**        

வென்றது விண்டீஸ் !

சௌத்தாம்ப்ட்டனில் நடைபெற்ற இங்கிலாந்துக்கெதிரான முதல் டெஸ்ட் போட்டியை வெஸ்ட் இண்டீஸ் நேற்று (12/7/20) வென்றது. 200 என்கிற இலகுவான இலக்காகத் தோன்றினாலும், கடைசி நாளில் வெஸ்ட் இன்டீஸ் இங்கிலாந்தின் வேகப்பந்துவீச்சாளர்கோடு,  ஸ்பின்னருக்கெதிராகவும் (Dom Bess) தாளம் போடலாம் என்று தோன்றியது. சில சமயம் இந்த மாதிரி சிறிய இலக்குகள், ‘சேஸ்’ செய்கிற அணியைக் காலைவாரி விட்டுவிடும். ஆனால் அப்படி ஏதும் நடக்காமல் நிதானமாக ஆடி, வென்றது வெஸ்ட் இண்டீஸ்.

Shane Dowrich (WI) tackling a bouncer from England- 1st Test (Pic courtesy: ESPN)

ஒரு கட்டத்தில் 27 ரன்களில் 3 விக்கெட்டை இழந்திருந்த வெஸ்ட் இண்டீஸ், இங்கிலாந்திற்கு நம்பிக்கையைக் கொடுப்பதாக இருந்தது. குறிப்பாக ஜோஃப்ரா ஆர்ச்சர் (Jofra Archer) அருமையாக பந்துவீசிக்கொண்டிருந்தார். மிடில் ஆர்டர் பேட்ஸ்மன்களான ரோஸ்டன் சேஸும், ஜெர்மேன் ப்ளாக்வுட்டும் (Roston Chase and Jermaine Blackwood) வெஸ்ட் இண்டீஸின் கொடியை உயரப் பிடித்தவாறு நிதானமாக ஆடியது, இங்கிலாந்தைத் திணற அடித்தது. 37-ல் சேஸ் விழுந்தாலும், அடக்கி வாசித்த ப்ளாக்வுட்டின்  திறனான ஆட்டம் வெஸ்ட் இண்டீஸுக்குப் பெரிய உத்வேகத்தைக் கொடுத்தது. 95 ரன்களில் அவர் வெளியேறியபோது வெஸ்ட் இண்டீஸ் அணி அவரது பங்களிப்பிற்காகக் கைதட்டியது. சாதாரணமாக ஸ்டேடியத்தின் கூட்டம் ஆர்ப்பரித்திருக்கவேண்டும். கூட்டமாவது மண்ணாவது,  கொரோனா காலத்தில்! இறுதியில் 6 விக்கெட் மட்டுமே இழந்து,  வென்றுவிட்டார்கள்.

முதன்முதலாக இங்கிலாந்து கேப்டனான பென் ஸ்டோக்ஸ் (Ben Stokes) தோல்வியைச் சந்திக்க நேர்ந்தது. ஆனால் அவர் சிறப்பாக பௌலிங் செய்ததோடு, இரண்டாவது இன்னிங்ஸில் பொறுப்பாக ஆடினார். இங்கிலாந்தின் இரண்டாவது இன்னிங்ஸின் குறிப்பிடத்தக்க பேட்டிங் டாம் சிப்ளே (Dom Sibley)(50) மற்றும் ஜாக் க்ராலே (Zak Crawley) (76) ஆகியோரிடமிருந்து வந்தது. வெஸ்ட் இண்டீஸ் தரப்பில் வேகப்பந்துவீச்சாளர் ஷனன் கேப்ரியல் (Shanon Gabriel)  அபாரமாக வீசினார் (9 விக்கெட்டுகள் மேட்ச்சில்). வெஸ்ட் இண்டீஸ் கேப்டன் ஜேஸன் ஹோல்டர் இங்கிலாந்துக்கெதிரான 5 டெஸ்ட் போட்டிகளில், நான்கை வென்றிருக்கிறார்! அடுத்த போட்டிகள் தூள்பறக்கலாம்.

ஸ்கோர்: இங்கிலாந்து 204 & 313. வெஸ்ட் இண்டீஸ் : 318 & 200/6.

**

கொரோனா கால கிரிக்கெட் !

கொரோனா காலத்தில் எதையும் நினைத்துக்கொண்டு வீட்டுக்குள் உட்கார்ந்திருக்கலாம். ஆனால் எதையும் ‘செய்துவிட’ முடியாது இஷ்டத்துக்கு! லாக்டவுன் கொல்கிறது ஒவ்வொரு சமூகத்தையும், ஒவ்வொரு பிரிவினிரையும். ஆனால் இதைவிட்டால் உயிர்தப்பிக்க வேறு உபாயம் தெரியவில்லை என்கிற விசித்திர நிலையில் உலகம்.

தீநுண்மியின் தீவிர விளையாட்டைப் பார்த்து, அனுபவித்து வரும் பதற்ற நிலையில், மனிதர்களின் விளையாட்டை எப்படி ஆரம்பிப்பது? லாக்டவுன் தளர்த்தியாச்சு என்கிற தைரியத்தில் டென்னிஸ் ஆடுகிறேன் என்று ஆரம்பித்து  நோவாக் யொகோவிச் (Novak Jokovich) சமீபத்தில் வைரஸில் சிக்கி அவஸ்தைப்பட்டது ஞாபகமிருக்கிறதா? கூடவே அவரது மனைவியும்! இருவரும் ‘கோவிட்-பாஸிட்டிவ்’ ஆக இருந்து வெளியே வந்துவிட்டார்கள் என்பது அவர்கள் முன்னோர்கள் செய்த புண்ணியம்!

இத்தகு சூழலில் கிரிக்கெட் ஆட ஆரம்பித்திருக்கிறார்கள் இங்கிலாந்தில். பாராட்டுவதா, பயப்படுவதா – தெரியவில்லை. சுமார் 100 நாள் இடைவெளிக்குப்பின் உலகம் ’லைவ்’ கிரிக்கெட்டை டிவி-மூலமாகவாவது ‘பார்க்க’ ஒரு வாய்ப்பு. இங்கிலாந்து கிரிக்கெட் போர்டின் அழைப்பின் பேரில், வெஸ்ட் இண்டீஸ் டீம் இங்கிலாந்து சென்றிருக்கிறது. முதலில் 14 நாள் ‘ஹோம் க்வாரண்டைனில்’ இருந்துவிட்டு,  இப்போது முதல் டெஸ்ட் மேட்ச்சை ஆடிவருகிறது. மூன்று டெஸ்ட் மேட்ச்சுகள், பின்னர் ஒரு-நாள் போட்டிகள் என ஜூலை-ஆகஸ்டுக்கான ஏற்பாடு.

’சோனி-சிக்ஸ்’ சேனலில் கண்டு ‘களித்து’வருகிறேன். ஆளில்லா மைதானத்தில் ஒரு பாப்புலர் ஸ்போர்ட்! ரசிகர்களின் மாபெரும் வரவேற்பு சமூக வலைதளங்களில். அவர்களும் என்னதான் செய்வார்கள் ? டிவி-யில் மட்டுமாவது கிரிக்கெட் பார்க்க வாய்ப்பு கிடைத்ததே என்கிற பரிதாப நிலை!

Players taking a knee before the start of play
(Pic courtesy : ESPN)

இங்கிலாந்துக்கு புது கேப்டன் – பென் ஸ்டோக்ஸ் (Ben Stokes). வெஸ்ட் இண்டீஸுக்கு ஜேஸன் ஹோல்டர் (Jason Holder) கேப்டன். முதல் போட்டி இங்கிலாந்தின் சௌதாம்ப்டன் – ‘ரோஸ் பௌல்’ (Rose Bowl) மைதானத்தில் இரண்டு நாளாகப் போய்க்கொண்டிருக்கிறது. போட்டி ஆரம்பமாகுமுன் இருதரப்பு வீரர்களும், அம்பயர்களும் மைதானத்தில் ’ஒருகால் முட்டி போட்டு’, உலகின் ‘கறுப்பின’ மக்களுக்கு மரியாதை செலுத்தினார்கள். குறிப்பாக சில வெஸ்ட் இண்டீஸ் வீரர்களின் ஆவேச முஷ்டி உயர்த்தல் காணக்கிடைத்தது.  துவக்க நாளன்று, கையில் கறுப்பு பேண்ட் அணிந்து ஆடினார்கள் வீரர்கள்.  அமெரிக்காவில் கறுப்பினத்தவருக்கு எதிரான போலீஸ் அராஜகத்தைக் கண்டித்து (குறிப்பாக ஜார்ஜ் ஃப்லாய்ட் (George Floyd) என்பவரின் போலீஸ் ‘கொலை’) சமீபகாலத்தில் நிறைய போராட்டங்கள் நடந்தன. வெளிநாடுகளிலும் எதிரொலித்தன. BLM (‘Black Lives Matter’) எனும் இயக்கம் இந்தப் போராட்டத்தை முன்னெடுத்து நடத்திவருகிறது.

இப்போது கிரிக்கெட்டுக்கு வருவோம். கொரோனா வைரஸ் காரணமாக கிரிக்கெட் ஆட்டத்தின்போது கடைப்பிடிக்கவேண்டிய சில நடைமுறைகளை, ஐசிசி-யின் அனில் கும்ப்ளே தலைமையிலான டெக்னிகல் கமிட்டி அறிவித்தது. அதன்படி, வீரர்கள் விக்கெட் எடுக்கையில், கேட்ச் பிடிக்கையில் என குதூகலமாக ஒருவரையொருவர் கட்டிக்கொள்ளக்கூடாது! பந்துவீச்சாளர்கள் ‘வழக்கம்போல்’ கையில் எச்சில்துப்பி பந்தை பாலிஷ்  போடுகிற வேலையே கூடாது போன்ற சில கட்டுப்பாடுகள். டாஸ் வென்ற இங்கிலாந்து, முதல் இன்னிங்ஸில் 204 ரன்னில் சுருண்டது. குறிப்பாக, வெஸ்ட் இண்டீஸின் ஷனன் கேப்ரியல் (Shanon Gabriel), ஜேஸன் ஹோல்டர் (Jason Holder)ஆகியோரின் துல்லிய ‘வேக’த் தாக்குதலற்கு இங்கிலாந்து ஈடுகொடுக்கமுடியாமல் ஒடுங்கியது. வெஸ்ட் இண்டீஸ் வழக்கத்துக்கு மாறாக நேற்று மிகவும் பொறுப்புடன் விளையாடி முதல் இன்னிங்ஸில் 318 எடுத்தது. துவக்க ஆட்டக்காரர் க்ரெய்க் ப்ராத்வெய்ட் (Kraig Brathwaite) 65 ரன், ரோஸ்டன் சேஸ் (Roston Chase) 47, ஷேன் டௌரிச் (Shane Dowrich) 61 என முக்கிய பங்களிப்பு. போட்டி தொடர்கிறது.

கிரிக்கெட் வீரர்கள் ‘வைரஸில்’ சிக்கிவிடாமல் அமைதியாக ஆட்டமாட,  ஆண்டவன் அருள்புரிவானாக.

படம். நன்றி: இந்தியா டிவி நியூஸ்.

**