CWC 2019 :  முதல் செமிஃபைனலில் இந்தியா, நியூஸிலாந்து

 

ரசிகர்களுக்கு அதிர்ச்சிதரும் வகையில்  மகா மோசமாக ஆடி, உலகக்கோப்பையிலிருந்து வெளியேறிய தென்னாப்பிரிக்கா, தன் கடைசி போட்டியில் உலகக்கோப்பை ஃபேவரைட்களில் ஒன்றான ஆஸ்திரேலியாவை ஒரு போடு போட்டுவிட்டுப் போய்விட்டது. விளைவு? செமிஃபைனலுக்கான வரிசையில் இந்தியா முதல் இடத்துக்கு வந்துவிட்டது. கடைசி நிலையில் இருக்கும் நியூஸிலாந்தை 09/07/19 அன்று, முதல் செமிஃபைனலில் சந்திக்கிறது. ஆரம்பச்சுற்றில் மழையின் காரணமாக, இந்தியா-நியூஸிலாந்து போட்டி ரத்தானது. வியாழன் (11/7/19) வரும் இரண்டாவது செமிஃபைனலில், ஆஷஸ் (Ashes) எதிரியான இங்கிலாந்தை, ஆஸ்திரேலியா கவனிக்கும்!

வலிமையான அணியென மார்தட்டி நின்ற ஆஸ்திரேலியாவின் தலையில் அழுந்தக் குட்டி, ‘ஒன்னத் தெரியும்டா..டேய்.. !’ என்றது, தென்னாப்பிரிக்கா அன்று. போட்டியில் சதம் அடித்துக் காண்பித்த அணியின் கேப்டன் ஃபாஃப் தூ ப்ளஸீ (Faf du Plessis) , ’இந்தப் போட்டியின் முடிவு இந்தியாவுக்கு மகிழ்வு தரும் !’ – என்றிருக்கிறார். கூடவே, ’உலகக்கோப்பையிலிருந்து வெளியே செல்கையில், ஒரு சின்னச் சிரிப்புடன் போகிறோம்!’ என்றும் குறிப்பிட்டார் தென்னாப்பிரிக்கக் கேப்டன்.

இந்தியா தன் கடைசி ‘ரவுண்ட்-ராபின்’ போட்டியில் (6/7/19) ஸ்ரீலங்காவை 7 விக்கெட் வித்தியாசத்தில் வென்றது. சாதனை சதமாக உலகக்கோப்பையில் தன் 5-ஆவது சதத்தை அடித்த ‘hit-man ‘ ரோஹித் ஷர்மாவுடன், இன்னொரு துவக்க ஆட்டக்காரரான கே.எல்.ராஹுலும் சேர்ந்துகொண்டார். ஸ்ரீலங்காவுக்காக முன்னாள் கேப்டன் ஆஞ்சலோ மேத்யூஸ்  பொறுமையாக ஆடி சதம் அடித்தார்.

விராட் கோஹ்லி – கேன் வில்லியம்ஸன்

ஓல்ட் ட்ராஃபர்ட், மேன்செஸ்டரில் (Old Trafford, Manchester), நியூஸிலாந்தை,  இந்தியா விளையாடவிருக்கிறது. மழைமேகங்கள்வேறு கவியப்போவதாக சேதி. வருணபகவானும்  செமிஃபைனல் பார்க்க ஆசைப்படுவாரோ!  முன்னதாக, உலகக்கோப்பையின் ஹை-ப்ரொஃபைல் மேட்ச்சில், டாஸ் வென்று முதலில் பேட் செய்த இந்தியா,  பாகிஸ்தானுக்கெதிராக 336 விளாசி வென்றது இங்கேதான். இதே மைதானத்தில்,  ஆஃப்கானிஸ்தானுக்கெதிராக விளையாடி வென்ற இங்கிலாந்து, 397 (உலகக்கோப்பையின் உச்ச ஸ்கோர்) எடுத்தது. வெஸ்ட் இண்டீஸை வென்ற நியூஸிலாந்து முதலில் பேட் (bat) செய்து 291 எடுத்தது. ரன் அதிகமாக வரும் இந்த மைதானத்தில், இந்தியா டாஸ் வென்று முதலில் பேட் செய்வது முக்கியம். இல்லாவிட்டால் நியூஸிலாந்து குவிக்க ஆரம்பித்துவிடும். விராட் கோஹ்லி என்ன செய்வாரோ?

இதற்கு முந்தைய போட்டியில் ஸ்ரீலங்காவை தோற்கடித்த இந்திய அணியில் நாளைய அரையிறுதிக்காக  மாற்றம் இருக்கலாம்.  புவனேஷ்வர் குமார் போன மேட்ச்சில் சரியாக ஆடவில்லை. கிட்டத்தட்ட குல்தீப் யாதவின் நிலையும் அதேதான். முகமது ஷமி  புவனேஷ்வரின் இடத்தில் உள்ளே வருவதே நலம். பேட்டிங்கில், நம்பர் 6, 7 ஆவது இடங்களில் எம்.எஸ்.தோனியும், ரவீந்திர ஜடேஜாவும் அவசியம் இறங்கவேண்டும். மிடில் ஆர்டர் அசடு வழிந்தால், கீழ்வரிசையில், டெத்-ஓவர்களில் (death-overs) தாக்கி ஆட, ஜடேஜாவால் முடியும். அவருக்குப் பின் வரும் பௌலர்கள் குல்தீப், சாஹல், ஷமி, பும்ரா (8,9,10,11) – பேட்டிங்கில் வெறும் தெண்டம்.  அவர்களால் டீமிற்கு ரன் சேரும் என நம்பினால், இந்தியா காலி.

நியூஸிலாந்து டீமில் காயத்தால் கடைசி போட்டிகளில் ஆடாதிருந்த, டாப் பௌலரான லோக்கி ஃபெர்குஸன் (Lockie Ferguson), நாளை இந்தியாவுக்கு எதிராக இறங்குவார் என எதிர்பார்க்கலாம். அவரோடு ட்ரெண்ட்  போல்ட் (Trent Boult), இடதுகை ஸ்பின்னர் சாண்ட்னர் (Mitchell Santner) ஆகியோர் இந்திய பேட்ஸ்மன்களை புரட்டிப்போடப் பார்ப்பார்கள். இவர்களையும், நியூஸியின் அருமையான ஃபீல்டிங்கையும் தாண்டி, மேன்செஸ்டரில் முதலில் பேட் செய்தால்,  இந்தியா 320-க்குமேல் எடுக்கவேண்டியிருக்கும். இதற்குக் குறைந்தால், கதை தேறாது. ரோஹித், கோஹ்லி, ராஹுல் ஆகியோரின் ரன்சேர்க்கை, வேகமாகவும், விரைவில் விக்கெட் இழக்காமலும் அமையவேண்டும். இளம் ரிஷப் பந்த், ஹர்தீக் பாண்ட்யா ஆகிய பெரிதாகப் பேசப்படும் பேட்டிங்-புயல்கள், தங்கள் வேலையை எதிரிக்குக்  காட்டவேண்டிய தருணம் இது.

நியூஸிலாந்தின் துவக்க ஆட்டக்காரர் மார்ட்டின் கப்ட்டில் (Martin Guptill), மிடில்-ஆர்டரில் கேப்டன் வில்லியம்ஸன், ராஸ் டேய்லர் ஆகியோரைக் குறிவைத்து  விரைவில் தூக்கிவிடுவதே உத்தமம். இவர்கள் வெகுநேரம் தாக்குப்பிடித்தால் அது, இந்தியா ஃபைனலில் நுழைவதைத்  தடுத்துவிடும். இவர்களை பிட்ச்சில் செட்டில் ஆகவிடாமல் விரட்டுவதில், பும்ராவுக்கும், ஷமிக்கும், இரண்டாவது பவர்-ப்ளேயில் பௌலிங் செய்யும் சாஹல், குல்தீப் ஆகியோருக்கும் ( இருவரும் ஒருவேளை ஆடினால்) முக்கியப் பொறுப்பு இருக்கிறது. இடதுகை சுழல் ஜடேஜா ஒருபக்கம் ரன் கொடுக்காது அழுத்தி, எதிரியை நெருக்குவார் என எதிர்பார்க்கலாம்.

நாளைய முதல் செமிஃபைனலில், இந்தியாவில் ஐபிஎல் ஆடிய அனுபவம் நியூஸிலாந்தின் வில்லியம்ஸனுக்கும், ட்ரெண்ட்  போல்ட்டிற்கும் கைகொடுக்கும் என்கிறார் நியூஸிலாந்தின் முன்னாள் கேப்டனும், ஐசிசி-யின் கிரிக்கெட் பத்தி-எழுத்தாளருமான டேனியல் வெட்டோரி. இந்த மதிப்பீடு சரியாக இருக்கலாம். இருவரும் ரோஹித், ராஹுல், கோலி, பாண்ட்யா போன்றவர்களுக்கெதிராக நிறைய ஆடியவர்கள். அப்படிப் பார்த்தால், இந்திய வீரர்களும்தான் இவர்களுக்கெதிராக ஐபிஎல் ஆட்டம் போட்டிருக்கிறார்கள்!

மைதான நிலவரத்தை பூரணமாகப் புரிந்துகொண்டு, எதிர் அணிக்கெதிராக சரியான வியூகம் அமைத்து, சிறப்பான கிரிக்கெட்டைத் தரும் அணியே வெற்றி பெற்று, உலகக்கோப்பையின் ஃபைனலுக்கு முன்னேறும். அது இந்தியாவாக இருக்கவேண்டுமே என்கிற ஏக்கம், நமக்கு இருப்பது நியாயம்தான்!

**

கிரிக்கெட் உலகக்கோப்பை: முஷ்டியை உயர்த்திய இந்தியா !

நேற்று (09-06-19) லண்டனின் ஓவல் மைதானத்தில் ஒரு  high-scoring மேட்ச்சில்,  36 ரன்கள் வித்தியாசத்தில் இந்தியா, ஆஸ்திரேலியாவைத் தூக்கி வீசியது. பெரிதும் எதிர்பார்க்கப்பட்ட போட்டி, கடுமையாகவே அமைந்தது. சில சிறப்பு அம்சங்களை மட்டும் கவனிக்கலாம்.

இந்தியா முதலில் பேட் செய்கையில், அதிகவனமாக ஆரம்பித்தது. முதல் பவர் ப்ளேயில் (10 ஓவர்கள்) விக்கெட் இழக்காமல், ஒரு அஸ்திவாரம் அமைத்துக்கொண்டு, பிறகு தாக்கலாம் என்பது வியூகம். நேற்று இந்தியாவின் நாள் – வியூகம் க்ளிக் ஆனது! ரோஹித், விராத் கோலி அரைசதங்கள், தவன் சதம் என அமர்க்களமாக இருந்தாலும் கடைசி 10 ஓவர்களை நெருங்குகையில் பேட்டிங் இன்னும் வேகமெடுத்தாலொழிய சரியான இலக்கை எதிரிக்குக் கொடுக்கமுடியாது என்கிற எண்ணம் கோஹ்லியின் மனதில் அரித்துக்கொண்டிருந்திருக்கவேண்டும்.

Hardik Pandya

37-ஆவது ஓவரில் ஷிகர் தவன் விழுந்தவுடன், கே எல். ராஹுல் வந்திருக்கவேண்டும். பெரிதும் பேசப்பட்ட 4-ஆம் எண் ஆட்டக்காரரின் நிலையில் ஹர்தீக் பாண்ட்யாவை அழைத்தார் கோஹ்லி. பௌலரைப்பற்றி சிந்திக்காமல், இறங்கியவுடன் விளாசும் தன்மைவாய்ந்த உலகின் மிகச் சில வீரர்களுள் பாண்ட்யாவும் ஒருவர். A freakish streak in him all the time.. கோஹ்லி எதிர்த்திசையில் ஆடிக்கொண்டிருக்க, சில பந்துகளிலேயே வெடித்தார் பாண்ட்யா. ஆஸ்திரேலியாவின் நேற்றைய சிறந்த பௌலரான கம்மின்ஸை (Pat Cummins) ஏறிவந்து, அவருடைய தலைக்குமேலே சிக்ஸர் தூக்கியும், ஆஃப் சைடில் பௌண்டரி  விளாசிய விதமும் ஆஸ்திரேலியாவை நடுங்கவைத்தது. அவர்கள் காட்டிக்கொள்ளவில்லை என்பது வேறுவிஷயம். 3 சிக்ஸர்கள், 4 பௌண்டரிகளென, வெறும் 27 பந்துகளில் 48 விளாசல். கோஹ்லிக்கும் இந்தியாவுக்கும் அந்த நேரத்தில் அதுதான் தேவையாக இருந்தது. பாண்ட்யாவுக்குப்பின் வந்த எம் எஸ் தோனி தன் பழையபாணியை மறக்கவில்லை. 14 பந்துகளில் 27 ரன்கள் அவரிடமிருந்தும் பறக்க, ஆஸ்திரேலியா பதறியது. இடையிடையே விக்கெட்டுகள், கோஹ்லி உட்பட விழுந்தும் இந்தியா உயர்ந்து எழும்பியது. 352 என இந்தியா ஸ்கோரை முடித்துக்கொண்டு, ’வந்து விளையாடிக் காமிங்கடா பாக்கலாம்! –  என்றது ஆஸ்திரேலியாவை!

அதிரடிக்குப் பேர்போன டேவிட் வார்னர், அரைசதம் கடந்தாலும், மிக மந்தமான பேட்டிங் செய்து கிரிக்கெட் ரசிகர்கள் மற்றும் விமரிசகர்களைக் கடுப்பேற்றினார். அதிரடியாவது, மண்ணாவது,  விட்டால்போதும் என்றாகிவிட்டது, ஃபின்ச் (Aaron Finch), கவாஜா, மேக்ஸ்வெல் போன்ற ஒவ்வொரு ஆஸ்திரேலிய ஸ்பெஷலிஸ்ட் பேட்ஸ்மனுக்கும். நின்று ஆடி ரன் சேர்த்த ஸ்டீவ் ஸ்மித்,  69 எடுத்து அவுட் ஆகையில் ஆஸ்திரேலியாவுக்கு ஏறவேண்டிய மலையுச்சி உயரத்தில் மிக உயரத்தில் தெரிந்து பயமுறுத்தியது. புவனேஷ்வர், சாஹல், குல்தீப் என இந்திய பௌலர்களுக்கு வேகமாக விக்கெட் விழவில்லை என்றாலும், ஆஸ்திரேலியாவைத் துள்ள  விடவில்லை. கடும் கட்டுப்பாட்டில் ஆஸ்திரேலிய அதிரடிகளை அழுத்திவைத்திருந்தார்கள். வெஸ்ட் இண்டீஸுக்கெதிராக ஒரேயடியாக ஆட்டம்போட்ட நேத்தன் கூல்ட்டர் நைலை (Nathan Coulter-Nile), 9 பந்துகளில் கழுத்தை  நெறித்து வெளியேற்றினார்  பும்ரா (Jasprit Bumrah). எதிர்பாராதவிதமாக, ஆஸ்திரேலிய விக்கெட் கீப்பர் அலெக்ஸ் கரே (Alex Carey) 35 பந்துகளில் 55 எனத் தூள்கிளப்பினார். அதைத்தவிர,  ஆஸ்திரேலியாவிடம் அவிழ்த்துவிட வேறொன்றுமில்லை. டெத் ஓவர்களை (death overs) பும்ராவும், புவனேஷ்வரும் அபாரமாக வீச (49-ஆவது ஓவரில் பும்ரா கொடுத்தது ஒரு ரன் – அதுவும் தோனியின் மிஸ்ஃபீல்டிங்கினால் விளைந்தது!), அழுத்தம் உச்சத்தைத் தொட, விக்கெட்டுகள் நொறுங்கின. ஆஸ்திரேலியாவின் தவிர்க்கமுடியாத தோல்வி. நீலத்திற்கு முன், மஞ்சளினால் ஆட்டம் காண்பிக்க முடியவில்லை. ரிஸல்ட்!

சில சுவாரஸ்யங்கள்:

1. Ball tampering கேஸில் மாட்டி, ஒருவருட ban-ற்குப்பின் ஆட வந்திருக்கும் ஆஸ்திரேலியாவின் முன்னாள் கேப்டன் ஸ்டீவ் ஸ்மித் பௌண்டரி எல்லையில் ஃபீல்ட் செய்துகொண்டிருக்கையில் இந்திய ரசிகர்களின் ஒரு குழு cheat ! .. cheat ! எனக் கூச்சலிட்டு கலவரப்படுத்தினர். இந்தியக் கேப்டன் கோஹ்லி தன் ஜெர்ஸியைக் காண்பித்து ’எங்களை ஆதரித்துக் கோஷமிடுங்கள். அவரைத் தொந்திரவு செய்யவேண்டாம்’ என ரசிகர்களை நோக்கி சைகை செய்தும், ரசிகர்கள் நிறுத்தவில்லை. ஆட்டம் முடிந்தபின் இந்திய ரசிகர்களின் இந்த செய்கைக்காகத் தான் மன்னிப்பு கேட்பதாக ஸ்மித்திடம் கூறினார் கோஹ்லி.

2. ஆஸ்திரேலியா பேட் செய்கையில் பும்ரா வீசிய முதல் பந்து டேவிட் வார்னரின் லெக்ஸ்டம்பிற்குக் கிஸ் கொடுத்துச் சென்றது பெய்ல்களுக்கு(bails) அது பிடிக்கவில்லை போலும். கீழே விழவில்லை! வார்னர் தப்பித்தார்.

3. ஆஸ்திரேலிய லெக்-ஸ்பின்னர் ஆடம் ஜாம்ப்பா (Adam Zampa) ஒவ்வொரு முறை பந்துவீசுவதற்கு முன்னும் தன் பேண்ட் பாக்கெட்டுக்குள் கைவிடுவார். பின் பந்தைத் தேய்ப்பார். வீசுவார். பாக்கெட்டுக்குள் என்ன? ரசிகர்கள் சந்தேகப்பட்டார்கள். Ball tempering? (இப்போதுதான் இரண்டு ஆஸ்திரேலியர்கள் ஒருவருட தண்டனைக்குப்பின் ஆடத் திரும்பியிருக்கிறார்கள்). ஆஸ்திரேலிய கேப்டன் Finch விளக்கினார்: ஜாம்ப்பா தன் பாக்கெட்டுக்குள் hand-warmers வைத்திருந்தார். அதைத்தான் தொட்டுக்கொண்டார்! ஜாம்ப்பாவிற்கு விக்கெட் ஏதும் விழாததால், இது இத்தோடு விடப்பட்டது..

ஆயினும் ட்விட்டர்க்காரர்கள் சீறினார்கள். ஒருவர் : Australians were, are and will be cheaters..! இது ரொம்பவே ஓவர். ஆஸ்திரேலியா உலகக்கோப்பையின் வலிமையான அணிகளில் ஒன்று. நாம் ஆட்டத்தில் கவனம் செலுத்துவோம்..

**

டெஸ்ட் கிரிக்கெட் :  ஆஸ்திரேலியாவை அலறவிட்ட இந்தியா

Pujara with the Cup in Sydney

கிரிக்கெட் dhamaaka  என்று சொல்லத்தக்க ஒரு தடாலடி டெஸ்ட் தொடர் இந்தியாவுக்கு ஒரு வரலாற்று வெற்றி என்கிறவாறு சிட்னி, ஆஸ்திரேலியாவில் நிறைவுபெற்றது. கோஹ்லியின் ஆட்டபாட்டம், இந்திய அணி, மற்றும் இந்திய ரசிகர் பட்டாளத்தின் ஆரவாரம் புரிந்துகொள்ளக்கூடியதுதான். குறிப்பாக ஆஸ்திரேலியாவின் இந்திய ரசிகர்கள் மேகத்தில் மிதக்கிறார்கள். இருக்காதா பின்னே! எத்தகைய கிரிக்கெட் விருந்தை அவர்கள் கண்டு களித்திருக்கிறார்கள், இடையிடையே மழையும், சூறாவளிக்காற்றும் வந்து பயமுறுத்திச் சென்றபோதிலும்.

ஆஸ்திரேலியாவுக்கெதிராக பார்டர்-கவாஸ்கர் டிராஃபிக்கான (Border-Gavaskar Trophy) தொடரை இந்தியா வென்றது இது முதல் தடவையல்ல. ஆஸ்திரேலியாவிலேயே, அவர்களுக்கு சாதகமான பிட்ச்களில் ஆடி, 2-1 என்கிற வித்தியாசத்தில்  டெஸ்ட் தொடரை வென்றதுதான் இந்திய வீரர்களின் சாதனை மைல்கல். மழைவந்து கெடுக்காவிட்டால் சிட்னி டெஸ்ட்டையும் இந்தியா வென்றிருக்கும். வித்தியாசம் 3-1 என்றாகி கொஞ்சநஞ்சம் மிஞ்சியிருக்கும் ஆஸ்திரேலியாவின் தன்னம்பிக்கையையும் நிலைகுலைய வைத்திருக்கும்.

தொடரின் ஆரம்பத்திலேயே இந்தியர்கள் சரியான தாக்குதல் மனப்பாங்குடன் இருந்தார்கள். தொடர்முழுதும் நேர்மறை மனப்போக்கை நிலைநிறுத்தியதோடு, சிறப்பான திறன் வெளிப்பாட்டை ஒட்டுமொத்த அணி என்கிற வகையிலும், தனிப்பட்ட முறையில் இந்திய வீரர்கள் சிலரும்  செய்துகாட்டியதில் இந்த வரலாற்று வெற்றி நிகழ்ந்திருக்கிறது.  முன்னாள் சர்வதேச டெஸ்ட் ஜாம்பவான்களான இயான் சேப்பல், ஷேன் வார்ன், மைக்கேல் வாஹ்ன், சுனில் கவாஸ்கர், சச்சின் டெண்டுல்கர், கபில் தேவ், ரிக்கி பாண்ட்டிங் மற்றும் விவியன் ரிச்சர்ட்ஸ், இம்ரான் கான் என முக்கிய இடங்களிலிருந்து கோஹ்லியின் இந்திய அணிக்கு பாராட்டு மாலைகள்.

ஆஸ்திரேலியாவுக்கெதிரான இந்த தொடரில், இந்திய வெற்றிக்கு டெஸ்ட்  ஸ்பெஷலிஸ்ட்டும், அணியின்  3-ஆம் எண் ஆட்டக்காரருமான செத்தேஷ்வர் புஜாராவின் (Chetheshwar Pujara) பங்களிப்பு மெச்சத்தக்கதாக அமைந்ததை பல சர்வதேச கிரிக்கெட் விமரிசகர்கள் குறிப்பிடத் தவறவில்லை. (ஆஸ்திரேலியர்களுக்கும் வேறுவழியில்லாமல், பாராட்ட வேண்டி வந்தது). 4 மேட்ச் தொடரில் 3 சதங்கள் (highest 193) ஆஸ்திரேலிய மண்ணிலே விளாசுவது,  அதுவும் ஸ்டார்க், கம்மின்ஸ், ஹேஸல்வுட், நேதன் லயன் போன்ற சூப்பர் பௌலர்களுக்கெதிராக, பௌலர்களுக்குப் பொருந்திவந்த பிட்ச்சுகளில் என்பது, வியந்து பாராட்டப்படவேண்டியதே. புஜாராவின் தனித்திறமை தெரியாமல் முன்பெல்லாம்  அவரது பங்கை அலட்சியப்படுத்தி, அசட்டுத்தனம் காட்டிய சாஸ்திரி-கோஹ்லி மேனேஜ்மெண்ட்டுக்கு, விஷயம் கொஞ்சம் லேட்டாகத்தான் புரிய ஆரம்பித்திருக்கிறது . Better late, than never.

இந்தத் தொடரில் 21 வயதான விக்கெட் கீப்பர் ரிஷப் பந்த் (Rishab Pant) காட்டிய உத்வேகமும், பேட்டிங் திறமையும் (கூடவே ஆஸ்திரேலிய பேட்ஸ்மன்களை வம்புக்கிழுத்தது!)  இந்திய ரசிகர்களைப் பெரிதும் குதூகலிக்கவைத்தது.  அவருடைய கேச்சிங்-திறன் இன்னும் முன்னேற்றமடையவேண்டியுள்ளது என்கிறபோதிலும், தொடரில் 20 கேட்ச்சுகளைப் பிடித்து அசத்திவிட்டாரே பையன்! பேட்டிங்கில் ஆரம்பத்தில் 25, 30 எனத் தட்டிவிட்டு, சிக்ஸர் அடிக்கிறேன் என்று கேட்ச்சில் அவுட்டாகிக்கொண்டு விமரிசனத்துக்குள்ளான பந்த், சிட்னியில் தன் ஸ்க்ரிப்ட்டை மாற்றியமைத்தார்.  தூக்கியடித்து ஆடும் தன் அதிரடி சிக்ஸர்களை வெகுவாகக் கட்டுப்படுத்தி,  சிட்னியில்  பௌண்டரிகளாக அவர் அடித்து நொறுக்கிய 159 நாட்-அவுட்டை (Kohli’s declaration) ஆஸ்திரேலியா அவ்வளவு எளிதாக மறந்துவிடாது.  ஆயினும், அடுத்தவாரம் ஆஸ்திரேலியாவில் தொடங்கவிருக்கும் ஒரு-நாள் கிரிக்கெட் தொடருக்கான இந்திய அணியில் அவர் பெயர் இல்லை என்பது நமது செலக்டர்கள் காட்டும் சாணக்யத்தனம் !

வழக்கமான துவக்க ஆட்டக்காரர்களான விஜய் மற்றும் ராஹுலின் அதிர்ச்சிதரும் தொடர் வீழ்ச்சியும், ப்ரித்வி ஷாவின் ஆரம்பக்காயமும், வெளியேற்றமும், ஒரு நல்ல விளைவை ஏற்படுத்தியது. வெகுநாட்களாகக் காத்திருப்பில் இருந்த மயங்க் அகர்வாலுக்கு வாய்ப்பமைய, அவரும் அதனை இறுகப்பற்றிக்கொண்டார். கடைசி இரு போட்டிகளில் மட்டும் இறக்கப்பட்ட அகர்வால், 76, 42, 77 என எழுப்பிய ஸ்கோர்கள் வெறும் எண்ணிக்கையல்ல. சில வருடங்களாகவே இந்திய ரஞ்சி கிரிக்கெட்டில் ஒரு இளம் வீரரின் ஆர்வம் மற்றும் கடும் உழைப்பின் பலனாய், சர்வதேச வெளியில், இந்திய அணிக்கு தக்க நேரத்தில்   இவை பலன் தந்தன. இளம் ப்ரித்திவ் ஷாவோடு, இந்தியாவுக்கு இன்னுமொரு நம்பகமான ஓப்பனர் கிடைத்தது இந்தத் தொடரின் வெள்ளிக்கீற்று.

இந்திய பௌலர்களில், முதல் மேட்ச்சில் அஷ்வினும் பிறகு வந்த மேட்ச்களில் முகமது ஷமி மற்றும் ஜஸ்ப்ரித் பும்ராவும் தீரம் காட்டினர். பும்ரா 21 விக்கெட்கள் வீழ்த்தி தொடரின் அதிகபட்ச விக்கெட் வீழ்த்திய இந்திய வீரர் என்கிற பெருமையை தன் முதல் ஆஸ்திரேலிய டூரிலேயே பெற்று அசத்தினார். ஷமியும், பும்ராவும் இன்னிங்ஸில் 6 விக்கெட்டுகள் எனத் தலா ஒருமுறை சாதித்துக் காட்டினர். சிட்னி டெஸ்ட்டில் காயம் காரணமாக அஷ்வின் ஆடமுடியாமற்போக, வாய்ப்பு கிடைத்த ரிஸ்ட்-ஸ்பின்னர் குல்தீப் யாதவ் ஆஸ்திரேலியர்களைத் திணறவைத்ததோடு, தனக்குக் கிடைத்த ஒரே இன்னிங்ஸில் 5 விக்கெட்டுகளை வீழ்த்தி அசத்தி விட்டார். ரவீந்திர ஜடேஜாவின் கடைசி இரு போட்டிகளில் பங்களிப்பு குறிப்பிடத்தக்கது. சிட்னியில் அவர் ரிஷப் பந்துடன் சேர்ந்து அலட்சியமாக ஆஸ்திரேலிய பௌலர்களைப் போட்டுத்தாக்கிய 81 ரன்களை, ஒரு ஆல்ரவுண்டரின், லோயர்-ஆர்டர் பேட்ஸ்மனின் முக்கியமான பங்களிப்பு என்கிற வகையில் பார்க்கவேண்டும். ஜடேஜாவின் பேட்டிங் திறனை இந்திய அணி நிர்வாகம் சரியாகப் பயன்படுத்திக்கொள்வதில்லை என்கிற விமரிசனம் கொஞ்சநாட்களாகவே உண்டு.

பொதுவாக கேப்டனாக இந்தத் தொடரில் விராட் கோஹ்லி காட்டிய தலைமைப்பண்புகள் பாராட்டுதல்களை அள்ளின. ஒரு சதத்திற்குமேல் அவர் பேட்டிங்கில் பெரிதாக செய்யவில்லை என்றபோதிலும், மற்றவர்களை உற்சாகப்படுத்தி அணியை நடத்திய விதம், குறிப்பாக  முக்கிய கட்டங்களில் ஸ்பின்னர்களைக் கையாண்ட விதம், வெற்றியை நோக்கி இந்தியாவை வேகமாகச் செலுத்தியது.

2018-ஆம் ஆண்டு, உலகளவில் புகழ்பெற்ற ஆஸ்திரேலியக் கிரிக்கெட்டை, பரிதாபமான நிலைக்குக் கொண்டுவந்திருந்தது. தென்னாப்பிரிக்காவின் கேப்டவுனில், பந்தில் தில்லுமுல்லு செய்து கேமராவில் மாட்டிக்கொண்டு அவமானப்பட்ட ஆஸ்திரேலியாவினால்,  தன் முன்னணி வீரர்கள் மூவர், ஒரு வருடத்திற்கு  விளையாடத் தடைசெய்யப்பட்ட  அதிர்ச்சியிலிருந்து விடுபடமுடியவில்லை. டிம் பேய்னின் (Tim Paine) தலைமையில் மாற்றி அமைக்கப்பட்ட ஆஸ்திரேலிய அணியில் சிறந்த இளம் வீரர்கள் சேர்க்கப்பட்டும்,  தென்னாப்பிரிக்கா, பாகிஸ்தான், இந்தியா போன்ற கடும் எதிரிகளுக்கு முன்னால் சர்வதேச அரங்கில் ஆஸ்திரேலியாவினால் சோபிக்கமுடியவில்லை. இந்திய பேட்ஸ்மன்களின் 5 சதங்களுக்கெதிராக, இந்த 4-போட்டித் தொடரில் ஆஸ்திரேலியாவின் தரப்பிலிருந்து ஒரு சதமும் இல்லை என்பது ஆஸ்திரேலிய அணியின் விமரிசகர்களுக்கே அதிர்ச்சி தந்துள்ளது. ஆஸ்திரேலிய கிரிக்கெட் ரசிகர்களால் இதனை ஜீரணிக்க முடியவில்லை என்பது ட்விட்டர் ட்ரெண்டுகளில் விமரிசையாகக் காட்சிப்படுத்தப்பட்டது. ஆஸ்திரேலிய பேட்ஸ்மன்களின் உச்சபட்ச தனிப்பட்ட ஸ்கோரே, துவக்க ஆட்டக்காரரான மார்கஸ் ஹாரிஸ் கடைசி போட்டியில் அடித்த 79 தான். பௌலிங்கில் ஸ்பின்னர் நேதன் லயன் (21 விக்கெட்கள்) மற்றும் வேகப்பந்துவீச்சாளர் பாட் கம்மின்ஸ் (Pat Cummins) தவிர, வேறு யாரும்  டெஸ்ட் உயர்தரத்தில் ஒன்றும் பிரமாதமாக  செய்யமுடியவில்லை. அதற்கு, புஜாராவின் அசாத்திய நிதான ஆட்டமும், கோஹ்லி, ரிஷப் பந்த், ரஹானே போன்றோர் பிட்ச் கண்டிஷனுக்கேற்ப ஆடிக்காட்டிய திறனும் முக்கிய காரணம் என ’ தி ஆஸ்திரேலியன்’,  ‘சிட்னி மார்னிங் ஹெரால்ட்’,  ’ஹெரால்ட் சன்’ ஆகிய ஆஸ்திரேலிய பத்திரிக்கைகள் விஸ்தாரமாக எழுதியிருக்கின்றன.

ஆஸ்திரேலியாவின் நம்பர் 1 பௌலரான மிட்ச்செல் ஸ்டார்க் தொடர் முழுதும் ஒரு சோர்வுடன் காணப்பட்டதை ஆஸ்திரேலிய செலக்டர்களும், விமர்சகர்களும் கவனிக்கத் தவறவில்லை.  இப்போதெல்லாம் இருதரப்பு தொடர்கள் ஒன்று அல்லது இரண்டு டெஸ்ட்டுகளோடு முடிவடைவது வழக்கமாக ஆகிவிட்டிருக்கையில், 4 போட்டி கொண்ட டெஸ்ட் தொடர், அதுவும் அவர்களுக்கு அதிசாதகமான உள்நாட்டு பிட்ச்சுகளில் ஆடப்பட்டது, அவர்களுக்கு இப்படி ஒரு தள்ளாட்டத்தைக் கொடுத்ததெனில் என்னதான் சொல்வது?  மாற்றுவீரர்களுடன் அணி அமைக்கப்பட்டவிதம், அல்லது  எதிர்பார்த்ததைவிட பயங்கரமாக மிரட்டிய இந்தியப்பந்துவீச்சை சரியாக ஆடத் தவறிய முன்னிலை பேட்ஸ்மன்களின் அனுபவமின்மை, திறமையின்மையே  தோல்விக்குக் காரணம் எனக் கடுமையான உள்நாட்டு விமரிசனங்களும் எழுந்துள்ளன. ஆஸ்திரேலியாவின் இந்தத் தள்ளாடல், மற்றும் இந்திய ஸ்பின்னர்களைக் கையாள்வதில் அவர்கள் வெளிப்படுத்திய குழப்ப மனநிலை ஆகியவற்றை, விராட் கோஹ்லி சிறப்பாகப் பயன்படுத்திக்கொண்டார். இந்தியாவுக்குக் கிடைத்தது கைமேல் பலன். டெஸ்ட் கிரிக்கெட்டில் பலவருட போராட்டங்களுக்குப்பின், ஆஸ்திரேலியாவை அவர்களது மண்ணிலேயே சாய்த்த பெருமை, ஆஸ்திரேலிய அணிக்கு அவர்களது சிட்னியில்  ஃபாலோ-ஆன் (follow-on) கொடுத்து கலங்கவைத்தது   எனப் புகழ்மாலைகள்.. (இதற்கிடையே கோச் ரவி சாஸ்திரியின் உளறல்கள் ஆஸ்திரேலியர்களுக்கான காமெடி சீன்!).

அடுத்து வருவது, சிட்னியில் 12-ஆம் தேதி ஆரம்பிக்கவிருக்கும் ஒரு-நாள் கிரிக்கெட் தொடர். இரு தரப்பிலும் அணி வீரர்களில் மாற்றம். சற்றுமுன் வந்த செய்திப்படி டெஸ்ட் தொடரில் இந்தியாவின் டாப் பௌலரான ஜஸ்ப்ரித் பும்ராவுக்கு ஓய்வு கொடுக்கப்பட்டிருக்கிறது. பதிலாக இளம் வேகப்பந்துவீச்சாளர், ஹைதராபாதின்  முகமது சிராஜ் இணைகிறார். ரோஹித் ஷர்மா, தோனி, ஹர்தீக் பாண்ட்யா, கேதார் ஜாதவ், தினேஷ் கார்த்திக், யஜுவேந்திர சஹல் என ஒன் –டே ஸ்பெஷலிஸ்ட்டுகள் இந்திய அணியில். ஆஸ்திரேலிய அணியில், க்ளென் மேக்ஸ்வெல் (Glenn Maxwell), ஆரோன் ஃபின்ச், ஆடம் ஜாம்ப்பா (Adam Zampa), மார்கஸ் ஸ்டோய்னிஸ் என ஆக்ரோஷம் காட்டும் வீரர்கள்.

ஒரு-நாள் கிரிக்கெட் என்பது வேறொரு மேடை; காட்சிகள் வெவ்வேறுவிதமாக  மாறக்கூடும்!

Picture courtesy: Google

*

டெஸ்ட் க்ரிக்கெட் : புனேயில் மண்ணைக் கவ்விய இந்தியா

ஓ’ கீஃப் (Steve O’Keefe) என்கிற உலகம் அதிகம் அறிந்திராத ஒரு ஃபிங்கர் ஸ்பின்னரைக் கையில் வைத்துக்கொண்டு, முதல் டெஸ்ட்டில் இந்தியாவை மிரட்டியே கொன்றுவிட்டது ஆஸ்திரேலியா. பேரதிர்ச்சி !

புனேயில் நேற்று (25-2-17)-ல் முடிந்த போட்டியைப் பார்த்த இந்திய ரசிகர்கள் இன்னும் அதிர்ச்சியிலிருந்து மீண்டபாடில்லை. நடந்தது க்ரிக்கெட்டா? இல்லை ஹிப்னாட்டிசமா? ஏன் இப்படி சுருண்டு சுருண்டு விழுந்தார்கள் இந்திய ஸ்பெஷலிஸ்ட் பேட்ஸ்மன்கள்- அதுவும் ஒரே பௌலரிடம்? ஸ்பின் பௌலிங்கை சந்தித்திராதவர்களா இவர்கள்?

புனேயில் நடந்த முதல் டெஸ்ட் மேட்ச் இது. இந்தியாவுக்கு சாதகமான சூழல் என்று கணிக்கப்பட்ட பிட்ச். டாஸை வென்றது சாதகமானது ஆஸ்திரேலியாவுக்கு. முதல் இன்னிங்ஸ் பேட்டிங்கே இந்திய ஸ்பின்னுக்கு எதிராகப் பெரும் சவாலாக இருக்கும் எனக் கணிக்கப்பட, ஆஸ்திரேலியா திணறியது. இருந்தும் சுதாரித்து தன் ஸ்கோரை 260-க்கு கொண்டு சென்றது. முக்கியமான பேட்ஸ்மன்கள், அஷ்வின்-ஜடேஜா, மற்றும் உமேஷ் யாதவிடம் பலியாக, 8-ஆம் நம்பரில் வந்த பௌலரான மிட்ச்செல் ஸ்டார்க், இந்திய ஸ்பின்னர்களைக் குறிவைத்து விளாசினார். 63 பந்துகளில் 61 எடுத்துவிட்டார். துவக்க ஆட்டக்காரர் மேட் ரென்ஷாவின் அருமையான 68-க்குப் பின் அதிகபட்ச ஆஸி பங்களிப்பு. ஸ்டார்க்கின் அதிரடி நிகழ்ந்திருக்காவிடில் ஆஸ்திரேலியா 250-ஐ நெருங்கியிருக்கவும் வாய்ப்பில்லை. இந்தியாவின் பௌலர்கள் சிறப்பாகவே வீசினர். இந்த சந்தோஷம் அதிக நேரம் நீடிக்கவில்லை. புனே ஒரு ஹாரர் ஸ்டோரியை இந்தியாவுக்காகத் தயாராக வைத்திருந்தது என்பது யாருக்கும் முன்கூட்டியே தெரிந்திருக்க நியாயமில்லை.

இந்திய துவக்க ஆட்டக்காரர்கள் சரியாகத்தான் ஆட ஆரம்பித்தார்கள். அல்லது அப்படித் தோன்றியது. குறிப்பாக கே.எல். ராஹுல். ஆஸ்திரேலியாவின் நம்பர் 1 ஸ்பின்னரான நேத்தன் லயனிடம் அஞ்சவேண்டியிருக்கும் என்றே எதிர்பார்க்கப்பட்டது. லஞ்சுக்கு முன்பு அவரும் ஓ’கீஃபும் வீசியவிதத்தில், வரவிற்கும் புயல்பற்றிய எந்த ஒரு அறிகுறியும் தென்படவில்லை. {லஞ்ச் இடைவேளையின்போது ஆஸ்திரேலியாவின் ஸ்பின் கோச்சான ஸ்ரீதரன் ஸ்ரீராமுடன் (முன்னாள் தமிழ்நாடு/இந்தியா ஆல்ரவுண்டர்) தான் பேசியதாகவும், சில நுணுக்கங்களைத் தெரிந்துகொண்டு, லஞ்ச் இடைவேளையில் பயிற்சி செய்ததாகவும் பிற்பாடு கூறினார் ஓ’கீஃப். Look at his professionalism)}. இடைவேளைக்குப் பின் திரும்பிய ஓ’கீஃப் மந்திரவாதியாக மாறிவிட்டிருந்தார். ஏதோ விசையை அழுத்தி விழுக்காட்டுவதுபோல் இந்திய பேட்ஸ்மன்களை ஒவ்வொருவராக விழவைத்தார். முதல் ஓவரிலேயே மூன்று விக்கெட். ராஹுல், ரஹானே, சாஹா, ஜடேஜா, ஜயந்த், உமேஷ் என, சூலையிலிருந்து செங்கல் சரிவதைப்போல் சரிந்தார்கள், 40 ஓவர் விளையாடுவதற்குள் நாக்குத் தள்ளிவிட்டது இந்தியாவுக்கு. ஒரு பொறுப்பின்றி, எதிர்ப்பின்றி. இந்தியா 105-ல் சுருண்டது. ஓ’கீஃபின் இந்த அசுரவிளையாட்டை ஆஸ்திரேலியர்களே நம்ப முடியாமல் மூக்கில் விரல்வைத்துப் பார்த்திருந்தார்கள். அவரை அணிக்காகத் தேர்வு செய்யாது சிலவருடங்களாகக் காலந்தாழ்த்தி, ஒரு இரண்டாந்திர பௌலரைப்போல நடத்தியவர்கள்தான் இந்த ஆஸ்திரேலியர்களும். ஆனால் புனேயில், ஆஸ்திரேலியா எதிர்பாராதவிதமாக 155 ரன் முன்னிலை வகிக்க வழிசெய்தது இந்த ஓ’கீஃப்-தான்.

ஆஸ்திரேலியா இரண்டாவது இன்னிங்ஸ் ஆடுகையில், கதையை அஷ்வினை வைத்தே ஆரம்பித்தார் கோஹ்லி. முதல் ஓவரிலேயே வார்னர் காலி. அடுத்த சில ஓவர்களிலேயே அஷ்வின் இரண்டாவது விக்கெட்டை எடுக்க, ஜடேஜா துல்லியமாக அந்தப் பக்கத்திலிருந்து வீசிக்கொண்டிருந்தார். ஆனால் 155 முன்னிலை ரன்களை கைவசம் வைத்திருந்த ஆஸ்திரேலிய கேப்டன் ஸ்மித் அசரவில்லை. நிதானம். அவ்வப்போது ஸ்பின்னர்களுக்கெதிரான தாக்குதல் ஆட்டம். விக்கெட்டுகள் வரிசையாக விழுந்தாலும், இந்திய ஸ்பின்னர்களிடம் ஆஸ்திரேலியா சரணடைய வில்லை. குறிப்பாக அஷ்வினைக் குறிவைத்துத் தாக்கினார்கள். இருந்தும் அஷ்வின் விக்கெட் எடுத்துக்கொண்டிருந்தார். அஷ்வின் விஸ்வரூபம் எடுக்க முடியாதபடி இந்திய ஃபீல்டர்கள் பார்த்துக்கொண்டார்கள் ! ஆஸ்திரேலியாவுக்கு கடுமையாக ஒத்துழைத்தார்கள் நமது ஃபீல்டர்கள்! ஸ்மித்தின் 5 கேட்ச்சுகளை, ஆமாம்-5 கேட்ச்சுகளை நழுவவிட்டுக் கையைப் பிசைந்துகொண்டு, சூயிங் கம்மை மென்றுகொண்டு நின்றிருந்தார்கள் இந்தியர்கள். உலகின் நம்பர் 1 டீம்!

இப்படி ஒரு கேவல ஆட்டம் ஆடினால் ஆஸ்திரேலியா என்ன, ஜிம்பாப்வேக்கு எதிராகவும்கூட கிரிக்கெட்டில் ஜெயிக்கமுடியாது. ஸ்மித் சதம் எடுத்து வெந்த புண்ணில் வேல் பாய்ச்சினார். ஆஸ்திரேலியா மூன்றாவது நாள் லஞ்ச் பொழுதில் 285 எடுத்து ஆல் அவுட்டானார்கள். முதல் இன்னிங்ஸில் 41 ஓவர் கூடத் தாக்குப் பிடிக்கமுடியாத இந்திய சூரர்களுக்கு 400+ இலக்கு! சான்ஸே இல்லை. அதுவும் இந்தியர்கள் இருந்த மனநிலையில்.

ஏதோ ஒரு இன்னிங்ஸில் அபத்தமாக ஆடிவிட்டார்கள். நமது ஜாம்பவான்கள் இரண்டாவது இன்னிங்ஸில் சுதாரித்துக் கௌரவத்தைக் காப்பாற்றுவார்கள் என யாரும் நினைத்திருந்தால் அவர்கள் எதிர்ப்பார்ப்பில் உடனே விழுந்தது மண். இந்தியர்கள் ஆடுகையில் அதே ஸ்டீவ் ஓ’கீஃப்-ஐ முன்னே கொண்டுவந்து பயமுறுத்தினார் ஸ்டீவ் ஸ்மித். Instant effect ! புயற்காற்றில் முருங்கை மரம் சாய்வதுபோல் சாய்ந்தது இந்திய பேட்டிங். விஜய், ராஹுல், புஜாரா, கோஹ்லி, ரஹானே, அஷ்வின். . கடந்த இரு வருடங்களாக இந்தியாவின் தூண்களாக நின்றவர்கள். இத்தகைய வீரர்களா இப்படி ’சொத்’ ’சொத்’-தென வீழ்ந்தார்கள் ஆம்! ஓ’கீஃபைக் கண்டதுமே ஏனோ கால்கள் நடுங்க ஆரம்பித்தன. முதல் இன்னிங்ஸைப்போலவே, 6 விக்கெட்டுகளை அவருக்கே தாரை வார்த்தார்கள். 107-ல் இந்தியா ஆல் அவுட். தொடர்ச்சியாக 19 மேட்ச்சுகளில் தோல்வியைக் காணாத விராட்டின் இந்திய அணி, புனேயில் மூன்று நாட்களுக்குள் நொறுங்கியது. பரிதாப சரித்திரம் திரும்பிவிட்டதா? டெஸ்ட் க்ரிக்கெட்டில் தோற்பது என்பது ஆச்சரியப்படவேண்டிய விஷயமில்லை. ஆனால் எதிர்த்துப் போராடாமல், இரண்டு இன்னிங்ஸிலும் இப்படி ஒரு சரணாகதி – அதுவும் இந்திய மண்ணில்? ஜீரணிக்க முடியாதது.

க்ரிக்கெட் இத்தகைய கொடூர விளையாட்டு என்பது தெரிந்ததுதான். அதாவது படுமோசமாகத் தோற்ற அணிக்கு. 11 ரன்களில் 7 விக்கெட்டை இழக்கும் அணி (இந்திய முதல் இன்னிங்ஸ்), ஒரே பேட்ஸ்மனுக்கு 5 கேட்ச்சுகளைத் தவறவிடும் அணி எப்படி ஜெயிக்கமுடியும் – கேட்கிறார் இந்தியக் கேப்டன். சரிதான் ஐயா! ஆனால், ஏன் இப்படி திடீரென அனைவருமே மழுங்கி மண்ணாய்ப் போய்விட்டீர்கள் என்பது ரசிகர்களின் கேள்வி ! காலங்காலமாக இந்திய மைதானங்களில் ஸ்பின்னுக்கு எதிராக விளையாடியே வளர்ந்த இந்திய பேட்ஸ்மன்கள், திடீரென்று ஒரு ஓ’கீஃப் வந்துவிட்டார் என்று எல்லாவற்றையும் அவுத்துப்போட்டுவிட்டு ஓடுவானேன்? இது இந்தக் கேள்வியின் சாரம். இது புனேயில் மட்டும்தானா? இனி வரவிருக்கும் போட்டிகளிலும் இந்த அபத்தக்காவியம் தொடருமா? இந்திய ரசிகர்களை சின்னாபின்னமாக்கும் பெருங்கேள்வி இது !

படுமோசமான தோல்விக்குப்பின் அணியில் மாறுதல் தேவை என்கிற சலசலப்பு இயல்பானது. ஏற்கனவே இருக்கும் ஒரு சலசலப்பு இப்போது உச்சம் பெற்றுவிட்டது. 300 அடித்த கருண் நாயர் ஏன் இல்லை அணியில்? அவர் உள்ளே வரவேண்டுமெனில், 5-ஆம் நம்பரில் ஆடும் அஜின்க்யா ரஹானே வெளியேறவேண்டியிருக்கும். ராஹுல் முதல் இன்னிங்ஸில் 64 எடுத்ததினால் அவரைக் கொஞ்சம் விட்டுவிடுவோம். மற்றபடி, கேப்டன் உட்பட, இந்திய பேட்ஸ்மன்கள் அனைவருமே மூஞ்சியில் புனே கரியைப் பூசி நிற்கும் வேளையில், ரஹானேயை மட்டும் ’வெளியே போ’ என்பதிலும் நியாயமில்லைதான். ஆயினும் நியாய, அநியாயங்களைத் தாண்டி, அணியின் வெற்றிக்காக அறிவுபூர்வமாக சிந்திக்கவேண்டிய தருணம் இது.

இந்தியாவுக்காக டி-20-ல் சிறப்பாக ஸ்பின் வீசிய, legbreak googly bowler-ஆன யஜுவேந்திர சாஹல்(Yuzvendra Chahal)-ஐ பெங்களூர் டெஸ்ட்டில் (மார்ச் 4-8) கொண்டுவந்தால் என்ன என்கிற எண்ணம் தலைகாட்டுகிறது. ஜெயந்த் யாதவிற்கு பதிலாக இவர் வரலாமோ? அஷ்வினோ, ஜடேஜாவோ அடிவாங்க நேரிடுகையில், சாஹல் ஒருமுனையில் ஆஸ்திரேலியர்களின் கழுத்தை நெரிக்க உதவக்கூடும். வேகப்பந்துவீச்சில் இஷாந்த் ஷர்மாவின் இடத்தில், யார்க்கர் ஸ்பெஷலிஸ்ட்டான, குஜராத்தின் ஜஸ்ப்ரித் பும்ராவுக்கு வாய்ப்பு தருவதும் உசிதமே. இப்படி நாம் நினைக்கிறோம். கும்ப்ளேயும், கோஹ்லியும் எப்படித் தலையைப் பிய்த்துக்கொண்டு உட்கார்ந்துகொண்டிருக்கிறார்களோ தெரியவில்லையே.

இதெல்லாம் சரி, கைகளில் வெண்ணெயைத் தடவிக்கொண்டு மைதானத்துக்கு வரும் இந்திய ஃபீல்டர்களை எந்தக் கழுவில் ஏற்றலாம் ?

**

கிரிக்கெட்: டெல்லி மேட்ச்சை நழுவவிட்ட இந்தியா

நியூஸிலாந்துக்கெதிரான ஒரு-நாள் கிரிக்கெட் தொடரின் இரண்டாவது போட்டி நேற்று(20-10-16) டெல்லியில் நடந்தது. வழக்கம்போல் நியூஸிலாந்து முதல் பேட்டிங் செய்தது. உமேஷ் யாதவின் வேகத்துக்கு ஈடுகொடுக்கமுடியாத மார்ட்டின் கப்ட்டிலை முதல் ஓவரிலேயே இழந்தது. தோல்விமேல் தோல்வியாகப் பார்த்து அலுத்துப்போன கேப்டன் வில்லியம்சன் நியூஸிலாந்தின் விதியைத் தன் கையில் எடுத்துக்கொண்டார்போலும். இந்தியா டூரில் முதன்முதலாக மிகச்சிறப்பான ஆட்டத்தை வெளிப்படுத்திய அவர் டாம் லேத்தத்துடன் சேர்ந்து நல்லதொரு பார்ட்னர்ஷிப்பைக் கொடுத்தார். லேத்தம் 46 ரன்கள் எடுத்தபின் கேதார் ஜாதவின் ஸ்பின்னில் வீழ்ந்தார். வில்லியம்சன் தொடரின் முதல் சதத்தை விளாசி 118 ரன் சேர்த்தபின், அமித் மிஷ்ராவிடம் தன் விக்கெட்டை பறிகொடுத்தார். அடுத்துவந்த ராஸ் டேய்லர் என்னதான் அடித்து விளையாட முயன்றும், பந்து பேட்டில் படுவேனா, பௌண்டரிக்குப்போவேனா என அடம்பிடித்தது. அவரும் கோரி ஆண்டர்சனும் தலா 21 ரன் மட்டும் எடுத்து மிஷ்ராவின் சுழலுக்குப் பலியாகினர். அடுத்துவந்தவர்கள் யாரும் நிலைக்கமுடியவில்லை. ரன் அதிகம் கொடுக்காமல் சிக்கனமாக வேகப்பந்து வீசினார் ஜஸ்ப்ரித் பும்ரா. டெத் ஓவர்களில்(death overs) ஒரேயடியாக யார்க்கர்போட்டு நொறுக்கிய பும்ராவுக்கு 3 விக்கெட்டுகள். என்னதான் முயற்சித்தும் நியூஸிலாந்தினால் 242 ரன்களைத்தாண்ட முடியவில்லை.

280-க்குமேல் எடுத்தால்தான் நியூஸிலாந்து இந்தியாவுக்கு நெருக்கடி கொடுக்கமுடியும் என்றனர் கிரிக்கெட் வர்ணனையாளர்கள். ஆதலால், 243 என்கிற வெற்றி இலக்கு மிகச்சாதாரணமாகப்பட்டது டெல்லி ரசிகர்களுக்கு. இந்தியா ஊதித் தள்ளிவிடும் என்றே எதிர்பார்த்தார்கள். ஆனால் நியூஸிலாந்தின் பௌலிங், ஃபீல்டிங் சிறப்பாக இருந்தது. குறிப்பாக ட்ரெண்ட் போல்ட். அதிதுல்லியம். பௌலர்களை வேகவேகமாக மாற்றியதில் வில்லியம்சனின் தலைமைத்திறன் வெகுவாக வெளிப்பட்டது. ரோஹித் ஷர்மா வழக்கம்போல் அதிரடியாக ஆரம்பித்து நிற்காது ஓடிவிட, ரஹானே, கோஹ்லி, பாண்டே என இந்திய ஊர்வலம் பெவிலியன் நோக்கி ஆரம்பித்தது. மிடில் ஆர்டரில் கேதார் ஜாதவும், தோனியும் சேர்ந்து பொறுப்பாக ஆட முயற்சி செய்தனர். நியூஸிலாந்து ஸ்பின்னர்களைத் தாக்கிய ஜாதவ் 41 ரன்கள் எடுத்தார். பௌலிங் கெடுபிடியாக இருப்பதை உணர்ந்த தோனி கொஞ்சம் கொஞ்சமாக ரன் சேர்க்கப் பார்த்தார். ஆனால் டிம் சௌதியின் பௌலிங்கில் அவரிடமே கேட்ச் கொடுத்து தொங்கிய தலையுடன் அவர் வெளியேற நேரிட்டது. இந்த நிலையில் மாற்றி யோசித்த நியூஸிலாந்து கேப்டன் யாரும் எதிர்பாராதபடி மார்ட்டின் கப்ட்டிலை ஸ்பின் போட அழைத்தார். ஒரே ஓவரில் 4 வைடுகளைத் தானமாகத் தந்த கப்ட்டில், அக்ஷர் பட்டேல், அமித் மிஷ்ரா இருவரையும் அதே ஓவரில் வீட்டுக்கு அனுப்பிவைத்தார். நியூஸிலாந்து அணிக்குப் புத்துயிர் ஊட்டப்பட்டது. பின்வந்த இந்திய பேட்ஸ்மன்களில் ஹர்தீக் பாண்ட்யா மட்டுமே சிறப்பாக ஆடி 36 ரன் எடுத்தார். அவருடைய விக்கெட் இந்திய ஸ்கோர் 232-ல் வீழ்ந்தது. இந்தியா நொண்ட ஆரம்பித்தது. உமேஷ் யாதவ் முயற்சித்தும் கடைசி ஓவரில் யார்க்கர் போட்டுத்தாக்கிய சௌதீயிடம் பும்ரா ஒரே பந்தில் க்ளீன்–போல்ட் ஆனார். தோல்விக்கரடி இந்தியாவை இறுகத் தழுவிக்கொண்டது. 6 ரன் வித்தியாசத்தில் நியூஸிலாந்துக்கு கிடைத்தது இந்தத் தொடரின் முதல் வெற்றி.

டெல்லியின் கோட்லா மைதானம் பேட்டிங் பிட்ச்சாக இருந்தும், இந்திய பேட்டிங் இந்தப் போட்டியில் எடுபடவில்லை என்பது கவனிக்கப்படவேண்டிய விஷயம். ஒருவராலும் அரைசதம்கூட எடுக்கமுடியவில்லை. வெற்றிமிதப்பில் இருந்த இந்திய அணிக்கு இத்தகைய அடி தேவைதான். ஒரு-நாள் தொடரும் 1-1 என்கிற சமநிலையில் சூடுபிடிக்க ஆரம்பித்துவிட்டது. அடுத்த போட்டியில், மொஹாலியில் மோத சுரேஷ் ரெய்னா வருவாரா?

**

உலகக்கோப்பை : இந்தியாவை நிறுத்திய வெஸ்ட் இண்டீஸ் !

இந்தியாவின் உலகக்கோப்பைக் கனவை வெஸ்ட் இண்டீஸ் நேற்று (31-3-16) தகர்த்துவிட்டது. மும்பையில் நடந்த கடுமையான செமி ஃபைனல் போட்டியில் இந்தியாவின் 192-என்கிற ஸ்கோரை அனாயாசமாகத் தாண்டி, ஃபைனலில் நுழைந்தது வெஸ்ட் இண்டீஸ்.

க்றிஸ் கேய்ல் vs விராட் கோஹ்லி, அஷ்வின் vs சாமுவேல் பத்ரீ என்றெல்லாம் ரசிகர்கள் கற்பனை செய்திருந்தார்கள். கதை எப்படியோ ஆரம்பித்து எங்கேயோ முடிந்தது. Typical T-20 !

முக்கியமான டாஸைத் தோற்ற இந்தியா, முதல் பேட்டிங் செய்யவேண்டியிருந்தது. ஆனால் ஆச்சரியமாக ரோஹித் ஷர்மா விழித்திருந்தார். முதல் 6 ஓவர் பவர்-ப்ளேயில் ரோஹித்தின் அட்டகாசம்! 3 பௌண்டரி, 3 சிக்ஸர். 31 பந்துகளில் 43 ரன்கள்.சாமுவேல் பத்ரீயிடம் ரோஹித் விழுந்தவுடன் இறங்கினார் கோஹ்லி. கோஹ்லியும், ஷிகர் தவனுக்கு பதிலாக இறங்கியிருந்த ரஹானேயும் பொறுப்புடன் ஓடி, அவ்வபோது பௌண்டரி ஆடி ரன் சேர்த்தனர். ர்ஹானே 40 ரன்களில் அவுட்டாக, தோனி இறங்கி கோஹ்லியுடன் சேர்ந்து ஆடினார். டெத்-ஓவர்களில்(death-overs) கோஹ்லி 16 பந்துகளில் 45 ரன் விளாசினார். 47 பந்துகளில் 89 நாட்-அவுட். ஒரே ஒரு சிக்ஸர்! Masterclass. இந்தியா 192-ஐத் தொட்டது.

பொதுவாக ரன்கள் குவியும் மும்பை மைதானத்தில் 192 என்பது நல்லதொரு ஸ்கோர்தான். ஆனால் இந்தியாவின் பௌலிங்கும் ஃபீல்டிங்கும் மிகக் கறாராக இருந்திருக்கவேண்டும். அதிரடி வெஸ்ட் இண்டீஸை அடக்குவது கஷ்டம். க்றிஸ் கேய்லை குறிவைத்த இந்தியா இரண்டாவது ஓவரில் அவரைச் சாய்த்தது. ஜஸ்பிரித் பும்ரா தன் யார்க்கரால் அவரை க்ளீன்-போல்ட்(clean-bowled) செய்து ரசிகர்களைக் குதிக்க வைத்தார். ஆனால் இன்னொரு ஓபனரான சார்ல்ஸ் ஜான்சன் சிறப்பாக ஆடினார். 3-ஆவதாக இறங்கிய சாமுவேல்ஸ் விரைவிலேயே வீழ்ந்தார். இந்தியர்களின் சந்தோஷம் நீடிக்கவில்லை. அடுத்து வந்தவர்தான் இந்தியாவுக்கு சனியனாக மாறினார். லெண்டல் சிம்மன்ஸ் (Lendl Simmons). ஏற்கனவே மும்பை இந்தியன்ஸ் அணிக்காக இதே பிட்ச்சில் ஐபிஎல். ஆடிய அனுபவம் உண்டு. மும்பை என்றால் அவருக்கு வெல்லக்கட்டி! கேய்ல் செய்யவேண்டிய வேலையைத் தன் பொறுப்பில் எடுத்துக்கொண்டார் இந்திய பௌலிங்கை துவம்சம் செய்ய ஆரம்பித்தார் சிம்மன்ஸ். சார்ல்ஸ் ஜான்சனும் சேர்ந்துகொண்டார். Effortless pulls and fiery hooks. பௌண்டரிகளும், சிக்ஸர்களும் பறக்க ஆரம்பித்தன. இந்திய ஃபீல்டர்கள் தடுமாறினர். தோனியின் தலைவேதனை ஆரம்பித்தது.

இக்கட்டான இந்த நிலையில் அஷ்வின் பந்துபோட்டார். அவருடைய முதல் ஓவரிலேயே சிம்மன்ஸ் விழுந்திருக்கவேண்டும். ஆஃப் சைடில் ப்ரமாதமாக லோ-கேட்ச் பிடித்தார் பும்ரா. அம்பயரின் செக்-அப்பில் அது நோ-பால் எனத் தெரிந்தது! ஸ்பின்னரான அஷ்வினிடமிருந்து மேட்ச்சின் ஒரு முக்கியமான தருணத்தில் விக்கெட் எடுத்த பந்து நோ-பால்! தோனியின் முகத்தில் ஈயாடவில்லை. அப்போதே பிடித்தது அனர்த்தம். துரதிருஷ்டத்தின் கோணல் வாய், இந்தியாவைப் பார்த்துச் சிரித்தது.

ஆஷிஷ் நேஹ்ரா மட்டுமே சிக்கனமாக பந்துபோட்டார். கோஹ்லிக்கு ஓவர் கிடைக்க முதல் பந்திலேயே ஜான்சனை வீழ்த்தினார்! மிடில்-ஓவர்களை வீசிய ஜடேஜா செம்மையாக அடி வாங்கினார். ஹர்தீக் பாண்ட்யா ஷார்ட் பிட்ச் பந்துகளைத் தெளித்தார். சிம்மன்ஸும் ஆந்த்ரே ரஸ்ஸலும் அட்டகாசமாக ஆடினர். ஸ்கோர் சீறியது. பாண்ட்யாவின் கடைசி ஒவரின்(15), கடைசி பந்தில் அஷ்வினின் ஷார்ப் கேட்ச். விக்கெட் விழுந்தது – அதாவது, அப்படி நினைத்து ரசிகர்கள் எம்பிக் குதித்தார்கள். ஆனால் அதுவும் ஒரு நோ-பால்! செமி-ஃபைனலில் பௌலிங் இப்படி இருந்தால், நாம் ஃபைனலுக்குப் போக ஆசைப்படலாமா?

நம்பிக்கை போய்விட்டது. வெஸ்ட் இண்டீஸ் ஜெயிக்க 20 ரன்கள். வேறுவழியின்றி, 19 ஓவரை ஜடேஜாவிடம் தோனி கொடுக்க, சிம்மன்ஸ், ரஸ்ஸல் ஆவேசம் காட்டினர். கடைசி ஓவர். 8 ரன்கள். அஷ்வினுக்கு ஓவர் தரப்பட்டிருக்க வேண்டும். ஆச்சரியமும் அதிர்ச்சியுமாக கோஹ்லியிடம் தந்தார் தோனி. அவர் என்ன செய்வார், பாவம்! அவர் ஒரு ரெகுலர் பௌலர் கூட இல்லை. விண்ணை முட்டிய சிக்ஸரில், இந்தியாவின் கதையை முடித்தார் ரஸ்ஸல். 7 பௌண்டரி, 5 சிக்ஸர்களுடன் நாட்-அவுட்டாக இருந்தார் சிம்மன்ஸ். ரஸ்ஸல் 20 பந்துகளில் 43 நாட்-அவுட். India – simply outplayed and outsmarted by the West Indies.

ஏப்ரல் 3-ஆம் தேதி கல்கத்தா ஃபைனலில், இங்கிலாந்தை சந்திக்கிறது வெஸ்ட் இண்டீஸ். வெஸ்ட் இண்டீஸ் வெற்றி பெற்றால், வெஸ்ட் இண்டீஸ் கிரிக்கெட் அணியை உருவாக்கிய, கிரிக்கெட்டை உயிர்நாதமாகக் கொண்ட சிறு கரீபிய நாடுகள்(Carribean countries) குதூகலித்து மகிழும். எண்ணற்ற வெஸ்ட் இண்டீஸ் ரசிகர்கள் பீர் அடிப்பார்கள். பாடுவார்கள். ஆடி மகிழ்வார்கள். வாழ்த்துவோம்!

**

கிரிக்கெட் உலகக்கோப்பை : இந்தியா-நியூஸிலாந்து ஒரு முன்னோட்டம்

இந்தியாவில் நடைபெறும் டி-20 உலகக்கோப்பை கிரிக்கெட்டின் ஜூனியர் டீம்களின் தகுதிச்சுற்று முடிவடைந்துவிட்டது. சூப்பர் 10 எனப்படும் டாப்-10 பங்கேற்கும் போட்டிகள் நாளை (15-3-2016) துவங்குகிறது. முதல் போட்டி இந்தியா நியூஸிலாந்துக்கிடையே நாக்பூரில் நடக்கிறது.

கடந்த ஒரு வருடத்தில், இந்திய டி-20 அணியின் வெற்றிகளில் – ஆஸ்திரேலியாவை அவர்களின் மண்ணிலேயே கிழித்துப்போட்டது, ஆசியகோப்பையை பங்களாதேஷில் வென்றது – போன்றவை சிறப்பான வெற்றிகளாக மின்னுகின்றன. எனினும், இவைகளை 1 ½ மாதகாலத்துக்கு நாம் மறந்துவிடுவது நல்லது. ஏனெனில், இனி நாம் காணப்போவது டி-20 உலகக்கோப்பை. உலகக்கோப்பை என்றால் உலகக்கோப்பை. மறுபேச்சு இருக்கமுடியாது.

உலகின் டாப் டி-20 கிரிக்கெட் அணிகளாக ஆஸ்திரேலியா, இந்தியா, நியூஸிலாந்து, தற்போதைய சேம்பியனான வெஸ்ட் இண்டீஸ் ஆகியவற்றைக் கருதலாம். ஆனால், பாகிஸ்தான், இங்கிலாந்து, தென்னாப்பிரிக்கா ஆகிய அணிகளைக் குறைத்து மதிப்பிடுதல் நல்லதல்ல. மேலும் டி-20 –வகை கிரிக்கெட்டில், திடீரெனக் கதை எப்படி வேண்டுமானாலும் மாறிவிடும். பௌலிங் செய்யும் அணியின் ஒரு மோசமான ஓவர், வெற்றியை எதிரணிக்கு தாரை வார்த்துவிடலாம். அதாவது இறுதி ஓவர் ஒன்றில், ஒரு பேட்ஸ்மன் தன் திறமையை எல்லாம் திடீரெனெ வெளிக்கொணர்ந்து சிக்ஸருக்குமேல் சிக்ஸராக வானவேடிக்கை நிகழ்த்தினால், அந்த அணிக்கு கிட்டாத வெற்றியும் கிட்டிவிடக்கூடும். எந்த அணி எப்போது எகிறும், எது சரியும் என மதிப்பிடல் நிபுணர்களுக்கும் சவாலான காரியம்.

மேலும், இந்திய கிரிக்கெட் பிட்ச்சுகளின் கதையே வேறு. நிறைய ரன்கள் வரும். என்றாலும் ஸ்பின்னர்களுக்கு ஒவ்வொரு போட்டியிலும் நிறைய பங்கிருக்கும். நாக்பூரில் நாளைய முதல் போட்டியில் ஆடும் இந்தியா, நியூஸிலாந்து – இரண்டு அணியிலும் தரமான ஸ்பின்னர்கள் உண்டு. இந்திய அணியில் அநேகமாக அஷ்வின், ஜடேஜா விளையாடலாம். நியூஸிலாந்து தரப்பில் சுழல்பந்துவீச்சில், மிட்செல் சாண்ட்னர், நேதன் மெக்கல்லம், இஷ் சோடி ஆகியோர் நிச்சயம் இந்தியர்களுக்கு சோதனை தருவர். நியூஸிலாந்து அதிரடி ஆட்டவீரர்களுக்கு முன், இந்திய வேகப்பந்துவீச்சாளர்களான ஆஷிஷ் நேஹ்ரா (Ashish Nehra) (அல்லது முகமது ஷமி), ஜஸ்ப்ரித் பும்ரா(Jasprit Bumrah), ஹர்தீக் பாண்ட்யா(Hardik Pandya) ஆகியோர் கடுமையான சோதனைக்குள்ளாவர். அக்னிப்பரீட்சைதான். கேப்டன் தோனி, வேகப்பந்துவீச்சாளர் முகமது ஷமியை(Mohamed Shami) நேஹ்ராவின் இடத்தில், முதல் போட்டியில் இறக்கிவிடக்கூடும் என எதிர்பார்க்கப்படுகிறது. நேஹ்ரா நல்ல ஃபார்மில் இருக்கிறார். ஷமியோ காயத்துக்குப்பின் சர்வதேசப்போட்டிக்குத் திரும்புகிறார். அவர் எப்படி பந்துவீசுவார் எனக் கணிப்பது எளிதல்ல. பும்ராவும், பாண்ட்யாவும் உலகக்கோப்பைக்குப் புதியவர்கள். ப்ளேயர் செலக்‌ஷனில், ரிஸ்க் அதிகம் எடுக்காமல், அனுபவமிக்க நேஹ்ராவைத் தேர்வு செய்வதே புத்திசாலித்தனமான முடிவாக இருக்கும். என்ன செய்யப்போகிறார் தோனி?

பேட்டிங்கைப் பொறுத்தவரை இரு அணிகளும் ஏறக்குறைய சமநிலையில் இருக்கின்றன. நியூஸிலாந்தின் சூப்பர் ஸ்டார் ப்ரெண்டன் மெக்கல்லம் (Brendon McCullum) கிரிக்கெட்டிலிருந்து ஓய்வு பெற்றுவிட்டார். அந்த பாதிப்பு தெரியாதபடி ஆட, மார்ட்டின் கப்ட்டில்(Martin Guptil), கேப்டன் வில்லியம்சன்(Kane Willamson), கோரி ஆண்டர்சன்(Corey Anderson), காலின் மன்ரோ(Colin Munroe) ஆகிய அதிரடி மன்னர்கள் இருக்கவே இருக்கிறார்கள். அனுபவமிக்க ராஸ் டெய்லர்(Ross Taylor) சிறப்பாக ஆடக்கூடியவர். இந்திய பௌலர்கள் இவர்களிடம் மாட்டிக்கொண்டு முழிக்காமல் இருக்கவேண்டும். இந்தியாவுக்கு ரோஹித் ஷர்மா, விராட் கோஹ்லி, ஷிகர் தவண், கேப்டன் மஹேந்திர சிங் தோனி ஆகியோர் பலமான பேட்டிங் தூண்கள். மீண்டும் அணியில் சேர்க்கப்பட்டிருக்கும் யுவராஜ் சிங் எப்படி ஆடப்போகிறார்? அவருக்குள், 6 பந்துகளில் 6 சிக்ஸர் விளாசிய, வீரதீரமிக்க அந்த பழைய யுவராஜ் இன்னும் இருக்கிறாரா? பெரும் சஸ்பென்ஸில், நகத்தைக் கடிக்கிறார்கள் இந்திய ரசிகர்கள். புதிய ஆல்ரவுண்டர் ஹர்தீக் பாண்ட்யாவின் அதிரடி ஆட்டம் ரசிகர்களின் ஆவலைத் தூண்டும்.

நியூஸிலாந்தின் வேகப்பந்துவீச்சு, ட்ரெண்ட் போல்ட்(Trent Boult), டிம் சௌதீ(Tim Southee), ஆடம் மில்ன(Adam Milne) ஆகியோரின் திறமையில் ஒளிவீசுகிறது. கூடவே நியூஸிலாந்தின் இந்திய வம்சாவளி வீரரான 23-வயதான இஷ் சோடி(Ish Sodhi) சிறப்பாக லெக்-ஸ்பின் போடக்கூடியவர். இடதுகை ஸ்பின்னரான மிட்செல் சாண்ட்னர்(Mitchell Santner)-க்கு இக்கட்டான நிலையில் விக்கெட் வீழ்த்தும் திறமை உண்டு. இவர்களை இந்தியர்கள் அலட்சியம் செய்யாமல் கவனித்து ஆடுவது அணிக்கு நல்லது.

மொத்தத்தில் மிகவும் சுவாரஸ்யமான மேட்ச்சாக நாளைய (15-3-2016) போட்டி இருக்கும் எனத் தோன்றுகிறது. எந்த அணி மனஅழுத்தத்தை நுட்பமாக சமாளித்து, களத்தில் சிறப்பாக ஆடுகிறதோ, அது வெல்லும்.

**

டி-20 ஆசியகோப்பை: இந்தியா சேம்பியன்

நேற்று(06-03-16) டாக்காவில் (Dhaka, Bangladesh) ஆசியகோப்பையின் இறுதிபோட்டியில், இந்தியா 6-ஆவது முறையாக கோப்பையை வென்றது.

மழையின் ஊடுருவலினால், 15-ஓவர் மேட்ச்சாக மாற்றப்பட்ட போட்டியில் பங்களாதேஷ் முதலில் பேட்டிங் செய்தது. கோப்பையை எப்படியாவது வெல்லவேண்டும் என்கிற பதற்றம் ஆட்டக்காரர்களிடமும், உற்சாகம் பங்களாதேஷ் ரசிகர்களிடமும் பெருகி இருந்தது. ஷகிப்-உல்-ஹசன் 21 ரன்கள், ஷபீர் ரஹ்மான் 32, முகமுதுல்லா 33 என மிடில் ஆர்டர் சிறப்பாக ஆடியதால் 120 ரன் எடுத்தது. 15 ஓவரில் ஓரளவு நல்ல ஸ்கோர்தான் இது. இந்திய பௌலர்களில் அஷ்வினும், பும்ராவும் ரன்களைக் கட்டுப்படுத்தி சிறப்பாக வீசினார்கள்.

121 எடுத்தால் கோப்பை என்கிற இலக்குடன் இறங்கியது இந்தியா. ரோஹித் ஷர்மா ஒரே ரன்னில் அவுட் ஆக பங்களாதேஷ் ரசிகர்களின் குதூகலம், கோஷம் வானை எட்டியது. அடுத்து வந்த விராட் கோஹ்லியை வேண்டுமென்றே கூச்சலிட்டு சீண்டினார்கள் பங்களாதேஷ் ரசிகர்கள். ஆனால் ஷிகர் தவணுடன் இணைந்த விராட் கோஹ்லி ரிஸ்க் எடுக்காது, விவேகத்துடன் ஆடினார். அவ்வப்போது தவணும், கோஹ்லியும் பௌண்டரியைத் தொட்டனர். இந்திய அணியின் ஸ்கோர் சீராக ஏறியது. சிறப்பான ஸ்ட்ரோக்ப்ளேயை வெளிப்படுத்திய தவண் 60 ரன்களில் 9 பவுண்டரி, 1 சிக்ஸர் விளாசி, 13-ஆவது ஓவரில் அவுட்டானார். இந்திய வெற்றிக்கு 22 ரன்கள் தேவை. அடுத்து ரெய்னாவோ, யுவராஜ் சிங்கோ வந்திருக்கவேண்டும். ஆவேசமாக ஆட்டத்தை முடித்துவைக்க, கேப்டன் தோனியே வந்து இறங்கினார். 14-ஆவது ஓவர் அல்-அமீன் ஹுசைனால்(Al-Amin Hossain) வீசப்பட்டது(இதுவரை மிகத் துல்லியமாக பந்துவீசியவர்). தோனி எதிர்கொண்ட முதல் பந்து பறந்தது சிக்ஸருக்கு. பங்களாதேஷ் ரசிகர்களின் அட்டகாசம், ஆரவாரம் அத்தோடு அடங்கியது. இரண்டாவதில் சிங்கிள். பேட்டிங் முனைக்கு வந்த கோஹ்லி, கேப்டனின் மூடைப் புரிந்துகொண்டு அடுத்த ஷாட்டில் 3 ரன்கள் ஓடி, அந்தப்பக்கம் போய் நின்றுகொண்டார். நாலாவது பந்தை அலட்சியமாக கவர் திசையில் தூக்கினார் தோனி. பௌண்டரி. வெற்றிக்கு இன்னும் 5 ரன்கள்.அல்-அமீன் வீசிய அடுத்த பந்தை மிட்விக்கெட் திசையில் ஆகாசத்தில் பறக்கவிட்டு பங்களாதேஷின் துள்ளலை முடிவுக்குக் கொண்டுவந்தார் தோனி. இன்னுமொரு பந்தும், ஒரு ஓவரும் பாக்கியிருந்தது. 8 விக்கெட் வித்தியாசத்தில் எளிதாக கோப்பையை வென்றது தோனியின் இந்தியா.

இந்த ஆசியத் தொடரில் சிறப்பம்சங்கள்: இந்தியாவின் சரியான அணுகுமுறை சாதித்த தொடர்வெற்றிகள். பாகிஸ்தானின் பரிதாப ஆட்டம். ஸ்ரீலங்காவின் அதிர்ச்சி தரும் வீழ்ச்சி. பங்களாதேஷின் சிறப்பான ஆட்டத்திறன். டி-20 ஆட்டங்களில் பங்களாதேஷ் வெகுவாக முன்னேற்றம் கண்டுள்ளது. இந்தியாவைத் தவிர வேறெந்த அணியிடமும் பங்களாதேஷ் தோற்கவில்லை. அதிரடி ஆட்டத்திறன் கொண்ட சௌமியா சர்க்கார், ஷபீர் ரஹ்மான், முகமதுல்லா ஆகிய பேட்ஸ்மன்கள், முஸ்டாபிஸுர் ரஹ்மான், அல்-அமீன் போன்ற துல்லியமான பௌலர்கள் ஆகியோரின் வருகையால் பங்களாதேஷ் நல்லதொரு டி-20 அணியாக உருவெடுத்து வருகிறது. உலகக் கோப்பையில் பங்களாதேஷ் பெரிய அணிகளை வீழ்த்த வாய்ப்பிருக்கிறது என்றே கொள்ளவேண்டும். எதிர்காலத்தில், இதன் ஆட்டம் கவனிக்கத் தக்கதாக அமையும்.

**

டி-20 ஆசியகோப்பை: பாகிஸ்தானைக் கசக்கிப் பிழிந்த இந்தியா

பங்களாதேஷின் மீர்பூரில் நேற்று (27-2-2016) நடந்த ஆசியக் கோப்பை டி-20 கிரிக்கெட் போட்டியில் பாகிஸ்தானை வீழ்த்தியது இந்தியா. `இந்தியா-பாகிஸ்தான் க்ளாசிக்` என இரண்டு நாடுகளின் மீடியாவினால் வெகுவாக பில்டப் கொடுக்கப்பட்ட மேட்ச். உண்மையும் அதுதான். இந்த இரண்டு நாடுகளும், சர்வதேச போட்டிகளில் எப்போதாவதுதான் மோதுகின்றன. ஆதலால் இருதரப்பு கிரிக்கெட் ரசிகர்களின் எதிர்பார்ப்பும் உச்சம். இவர்கள் மோதினால் களத்தில் அனல் பறக்கும். பறந்தது நேற்றும்.

Hottest match of the Asia Cup. மேட்ச் ஆரம்பிக்குமுன்பே இருதரப்பிலும் வீரவசனங்கள் வீசப்பட்டன. இந்திய பேட்டிங்கை திணறவைப்பதற்கென பங்களாதேஷ் கிரிக்கெட் போர்டினால் வடிவமைக்கப்பட்டது மீர்பூரின் க்ரீன்பிட்ச். ஆசியகோப்பையின் முதல் மேட்ச்சில் இந்தப் பிட்ச்சிலேயே, ரோஹித், பாண்ட்யாவின் அதிரடியால் இந்தியா 166 ரன்கள் விளாசியது. தாக்குப்பிடிக்க முடியாமல், தான் விரித்தவலையில் தானே சிக்கி உயிரைவிட்டது பங்களாதேஷ். அதே க்ரீன் பிட்ச் இன்றும் மிரட்டியது. பாகிஸ்தான் வேகப்பந்துவீச்சுக்குப் புகழ்பெற்ற டீம் என்பதில் இரண்டு கருத்துகள் இருக்க முடியாது. வகாப் ரியாஸ், முகமது சமி, முகமது இர்ஃபான். கூடவே, சூதாட்டத்தில் சிக்கி, சில ஆண்டுகளாக தடைசெய்யப்பட்டிருந்த முகமது ஆமீர் மீண்டும் பாகிஸ்தான் அணியில். அவரது அதிவேகப்பந்துவீச்சு, கூர்மையானது, சவாலானது என்பதை இந்தியர்கள் அறிந்தே இருந்தார்கள். இந்தியாவை க்ரீன் பிட்ச்சில், வேகத்தினால் நொறுக்கத் திட்டமிட்டிருந்தது பாகிஸ்தான்.

டாஸை வென்ற தோனி, பாகிஸ்தானை முதல் பேட்டிங்குக்கு அனுப்பினார். பாகிஸ்தான் அசால்ட்டாக இறங்கியது. இந்தியாவின் வேகப்பந்துவீச்சாளர்கள் எப்படி? 35 வயதான ஆஷிஷ் நேஹ்ரா. கர்வம் மிகுந்த பாகிஸ்தானிகளுக்கு, அனுபவமில்லாத புதுக் கன்னுக்குட்டிகளாகத் தோன்றிய பும்ரா, பாண்ட்யா. பூ! இவ்வளவுதானா? இன்னிக்கு இந்தியாவை நொறுக்கிருவோம் என்கிற மிதப்பில் இருந்தனர் பாகிஸ்தானிகள். அவர்கள் ஆட்டத்தை துவக்கிய விதம் அதனைச் சொல்லிற்று. நேஹ்ரா முதல் விக்கெட்டை எளிதாக தூக்கியும், பாகிஸ்தான் ஸ்கோர் வேகமாக 20-ஐத் தாண்டியது. அந்த சமயத்தில், பாகிஸ்தான் அறிந்திராத ஜஸ்ப்ரித் பும்ராவின்(Jasprit Bumrah) பந்துவீச்சின் துல்லியம் பாகிஸ்தானின் மனதில் திகிலைக் கிளப்பியது. அவருடைய குழப்பும் ஆக்‌ஷன், வேகம், யார்க்கர் எல்லாம் சேர்ந்து பாகிஸ்தானின் வயிற்றைப் பிசைந்தது. 22-வது ரன்னில் இரண்டாவது பாகிஸ்தான் விக்கெட்டை பிடுங்கினார் பும்ரா. அவருடைய 3 ஓவர்களில், 2 ஓவர்களைப் பாகிஸ்தானிகளால் தொடக்கூட முடியவில்லை. மெய்டன் ஓவர்கள். சுழலுக்கு மீர்பூர் மைதானம் துணைபோகாது. எனினும் ஜடேஜா, யுவராஜ் சிங், அஷ்வின் இறக்கப்பட்டனர். ஜடேஜா ரன் கொடுப்பதில் கஞ்சன் ஆனார். 2 விக்கெட்டுகளையும் கைபற்றினார், பாகிஸ்தானின் நிலைமை மோசமாகியது. ஜடேஜா, கோஹ்லி இவர்களின் ஃபீல்டிங் மைதானத்தில் தூள் கிளப்பியது. குர்ரம் மன்சூரும், டி-20 ஸ்பெஷலிஸ்ட்டான பாக். கேப்டன் ஷஹீத் அஃப்ரிதியும்(Shahid Afridi) வேகமாக ரன்–அவுட்செய்யப்பட்டனர். மத்திய, கடைசி ஓவர்களில் ஹர்திக் பாண்ட்யாவின்(Hardik Pandya) பந்துவீச்சு அபாரம். 3 விக்கெட்டுகளை சுருட்டி எறிந்தார். பாக். விக்கெட் கீப்பர் சர்ஃப்ராஸ் அகமது மட்டுமே சிறப்பாக ஆடி 25 ரன் சேர்த்தார். தட்டுத்தடுமாறி 83 ரன்னெடுத்து சுருண்டது; இந்தியாவை நினைத்து மருண்டது பாகிஸ்தான்.

84 என்கிற எளிதான இலக்குடன் ஆட வந்த இந்தியாவுக்கு அதிர்ச்சி, ஆமீரின் வடிவில் காத்திருந்தது. 147 கி.மீ வேகம், யார்க்கர், இன்-ஸ்விங்கர் என அனல் கக்கினார் ஆமீர். துவக்க ஆட்டக்காரர்களான ரோஹித் ஷர்மா, அஜின்க்யா ரஹானே இருவரையும் ரன் ஏதும் எடுக்கவிடாமல், முதல் ஓவரிலேயே வீட்டுக்கு அனுப்பிவைத்தார். அந்த அதிர்ச்சியிலிருந்து மீள்வதற்கு முன், ரெய்னா ஒரு முட்டாள்தனமான ஷாட்டை உயர அடித்து கேட்ச் கொடுத்து இந்தியாவின் தலைவலியை அதிகப்படுத்திவைத்தார். விராட் கோஹ்லியோடு சேரவந்தார் யுவராஜ் சிங். முகமது இர்ஃபான், முகமது ஆமீர் ஜோடியின் பிரமாத பந்துவீச்சு இருவரையும் தடுமாறவைத்தது. பாகிஸ்தானின் ஃபீல்டிங்கும் நன்றாக அமைந்துவிட, ரன்கள் வர சண்டித்தனம் செய்தது. பௌண்டரி, சிக்ஸர் எல்லாம் அடிக்கமுடியும் என்கிற நம்பிக்கை போய்விட்டது. ஆமீரின் துல்லியவேகம், ஷார்ட்-பிட்ச் பௌலிங்கினால் யுவராஜுக்கு மூச்சு போய் வந்தது. அவர் நின்று விளையாடினார் என்பதைவிட, நாட்டியமாடினார் என்று சொல்லலாம். ஆமீர், இர்ஃபான், ரியாஸ் இவர்களின் ஷார்ட்-பிட்ச் பந்துகளுக்கு குனிவதும், வளைவதும், நெளிவதுமாக பொழுதைப்போக்கினார் யுவராஜ். அடுத்த முனையில் வாய்ப்புக்காகக் காத்திருந்த கோஹ்லி, ஆமீரின் கடைசி ஓவர், ரியாஸின் ஆரம்ப ஓவர்களில் திடீரெனப் பட்டாசாய் வெடித்தார். பௌண்டரிகள் பறந்தன. அவருடைய பேட்டிங் திறனை வெளிப்படுத்தும் க்ளாசிக் க்ரௌண்ட் ஷாட்டுகளால், சரிந்திருந்த இந்திய ரசிகர்கள் எழுந்து உட்கார்ந்தனர். மூவர்ணக்கொடிகள் மீண்டும் உயர்ந்தன; அசைந்தன.

49 ரன்களில் கோஹ்லி அவுட்டாகையில் வெற்றிக்கு 9 ரன்களே தேவைப்பட்டது.ஹர்தீக் பாண்ட்யா பூஜ்யத்தில் காலியாக, தோனி வந்தார். அடித்தார் பௌண்டரி. வெற்றி மேடையில் இந்தியா ஏறி நின்றது. விராட் கோஹ்லி ஆட்ட நாயகன்.

பாகிஸ்தான் வேகப்பந்துவீச்சில் தான் கில்லாடி என மீண்டும் நிரூபித்தது. எங்கள் பேட்டிங் இதற்கெல்லாம் சளைத்ததல்ல என்று நெஞ்சை நிமிர்த்தியது இந்தியா. விராட் கோஹ்லி குறிப்பிட்டதுபோல், உலகின் அருமையான வேகப்பந்துவீச்சாளர்களில் பாகிஸ்தானின் முகமது ஆமீர் ஒருவர் என்பதை நேற்றைய போட்டி காண்பித்தது. இந்திய புதுமுகங்களான பும்ராவும், பாண்ட்யாவும் ப்ரெஷர் மேட்ச்சுகளிலும் தங்களால் வெளுத்துவாங்கமுடியும் எனச் சாதித்துக் காட்டினர். இந்த டி-20 மேட்ச்சில் ஒரு விசித்திரம்: இரண்டு அணியிலிருந்தும் ஒரு சிக்ஸர்கூட வரவில்லை! இன்னுமொரு இந்தியா-பாகிஸ்தான் கிரிக்கெட் க்ளாசிக் பசித்திருந்த ரசிகர்களுக்கு அமோக விருந்தாக அமைந்து விட்டது.

**

டி-20: ராஞ்சியில் இந்தியா வெற்றிமுகம்

ராஞ்சி (ஜார்கண்ட்)-யில் நேற்று(12-2-16) நடைபெற்ற இரண்டாவது டி-20 போட்டியில், தோனியின் ரசிகர்கள் எதிர்பார்த்தபடி, ஸ்ரீலங்கா இந்தியாவிடம் நொறுங்கியது !

ஆக்ரோஷமே, உன் பெயர்தான் இந்தியாவா!

புனேயின் க்ரீன் டாப் பிட்ச்சிற்கு நேர் எதிரானது, பந்து அதிகம் குதிக்காத ராஞ்சியின் ஸ்லோ பிட்ச். டாஸ் வென்ற ஸ்ரீலங்கா, இந்தியாவை முதல் பேட்டிங்கிற்காக இறங்கச் சொன்னது. ஏற்கனவே தலையில் அழுந்தக் குட்டுப்பட்டிருந்த இந்திய வீரர்கள், இம்முறை தங்களின் சுயரூபத்தைக் காண்பிக்க வந்திருந்தனர் போலும். துவக்க வீரர் ஷிகர் தவணின் ஆவேசத் தாக்குதலில் அது தெளிவானது. பூனேயில் ஸ்ரீலங்க பௌலிங் ஹீரோவான கசுன் ரஜிதா (Kasun Rajitha) குறிவைத்து நையப் புடைக்கப்பட்டார். இந்திய துவக்க ஆட்டக்காரர்களின் கோபத்துக்கு ஈடுகொடுக்க முடியாமல், ஸ்ரீலங்க பந்துவீச்சாளர்கள் ஓவருக்கு 10, 11 ரன்களை தாரை வார்த்தனர். 25 பந்துகளில் 7 பௌண்டரி, 2 சிக்ஸர் என அரைசதம் விளாசி இந்தியாவுக்கு செம துவக்கத்தைத் தந்தார் தவண். அடுத்த பக்கத்தில் ரோஹித் ஷர்மா 36 பந்துகளில் 43 ரன் என புழுதிபறக்கவிட்டார். 11 ஓவர்களில் இந்திய ஸ்கோர் 100-ஐத் தாண்டியிருந்தது. ரோஹித், ரஹானேவுக்குப் பின் வந்த சுரேஷ் ரெய்னா-ஹர்தீக் பாண்ட்யா(Hardik Pandya) ஜோடி கியரை மாற்றியது. வேகம் மேலும் எகிற, ராஞ்சி ரசிகர்களுக்கு போதை தலைக்கேறியது. அடுத்தடுத்து 2 சிக்ஸர்களை அனாயாசமாக விளாசி, 12 பந்துகளில் 27 ரன் எடுத்து ஸ்ரீலங்காவை கிடுகிடுக்கவைத்தார் பாண்ட்யா. ரெய்னா 19 பந்துகளில் 30 ரன் (5 பவுண்டரிகள்). வேகத்தைத் துரத்திய இருவரும் வீழ்ந்தனர் அடுத்தடுத்த பந்துகளில். அடுத்து வந்த, பழைய ரெப்யுடேஷனில் ஓடும் வண்டியான யுவராஜ் சிங், ஒரு பந்து கூடத் தாங்கவில்லை. திசரா பெரேராவின் அருமையான ஹேட்ரிக்(hat-trick). இருந்தும் அது இந்திய ஸ்கோரை பாதிக்கவில்லை. தோனியும், ஜடேஜாவும் மீதமுள்ள பந்துகளை இங்கும் அங்குமாக ஓட்டி, இந்தியாவின் ஸ்கோரை 196-க்கு எடுத்துச் சென்றார்கள்.

ஸ்பின் தாண்டவம்

190-ஐத் தாண்டிய டி-20 இலக்கு, எந்த ஒரு அணிக்கும் சிம்ம சொப்பனம்தான். கிட்டத்தட்ட ஒரு ஓவருக்கு 10 ரன் அடித்தாகவேண்டும் வெற்றிக்கு. இந்தியர்களை முதலில் பேட்டிங்கில் இறக்கி வாங்கிக் கட்டிக்கொண்ட ஸ்ரீலங்கா, இப்போது வெகுவாக அரண்டுபோயிருந்தது தெரிந்தது. அவர்களின் அணியில் அனுபவமிக்க திலகரத்னே தில்ஷன் (Tilakaratne Dilshan) சேர்க்கப்பட்டிருந்தும் ஒரு புண்ணியமும் இல்லை. தில்ஷன் ஸ்பின் பௌலிங்கை மிக நன்றாக ஆடக்கூடியவர்தான். இருந்தும் ரிஸ்க் எடுத்தார் மகேந்திர சிங் தோனி. ஸ்பின்னர் அஷ்வினுக்கு, புதிய பந்துடன் முதல் ஓவர் பௌலிங்கைக் கொடுத்தார். தன் மேல் கேப்டன் வைத்த நம்பிக்கைக்கு, அஷ்வின் இரண்டாவது பந்திலேயே பதில் சொன்னார். அஷ்வினின் சாதுர்யமான லெக்-ப்ரேக் வித்தியாசமாக வந்து தரை இறங்கியது. அஷ்வினை நொறுக்க தில்ஷன் கோட்டுக்கு வெளியே எகிற, பந்து அவரை டபாய்க்க, பெயில்களை மின்னலெனப் பறக்கவைத்தார் தோனி. அடுத்த இரண்டு விக்கெட்டுகள் நேஹ்ராவிடம் வேகமாக உயிரைவிட்டன. ரசிகர்கள் எழுந்து ஆட்டம்போட, 16 ரன்களுக்கு 3 விக்கெட்டுகள் என ஸ்ரீலங்கா பீதியில் உறைந்தது.

ராஞ்சியில் காட்டாதே மூஞ்சி!

கேப்டன் தினேஷ் சண்டிமாலும் கபுகதேராவும் ஜோடி சேர்ந்து திறமை காட்ட முயன்றனர். ஆனால் அப்போது, அஷ்வின், யுவராஜ், ரெய்னா, ஜடேஜா என இந்தியாவின் ஸ்பின் தாண்டவம் அரங்கேறியிருந்தது. புயலில் சிக்கிய தோணியானது ஸ்ரீலங்கா. சண்டிமால், கபுகதேரா இருவரும் ஜடேஜாவின் ஒரே ஓவரில் மைதானத்தை விட்டுவிட்டு ஓடினர். அஷ்வினின் ஒரு துல்லிய ஓவரில் ஷனகாவும், பெரேராவும் பரிதாபமாகப் பலியாயினர். அதற்கப்புறம் வந்தவர்களில் சிரிவர்தனா பரவாயில்லை. மற்றவர்கள் காலூன்ற இந்தியா விடவில்லை. 16-ஆவது ஓவர் வரை ஜஸ்ப்ரித் பும்ராவின் (Jasprit Bumrah) கைக்கு வரவில்லை பந்து. இறுதிச்சடங்கை விரைவில் முடிக்க எண்ணிய தோனி, பும்ராவிடம் பந்தை எறிந்தார். பும்ரா தன் இரண்டாவது ஓவரில் முடிச்சை ஒரேயடியாக இறுக்க, இரண்டு ஸ்ரீலங்க விக்கெட்டுகள் உயிரைவிட்டன. 127 ரன்களில் முடிவுக்கு வந்தது ஸ்ரீலங்காவின் கதை.

69 ரன் வித்தியாசத்தில் வென்று, தான் உலகின் நம்பர் 1 டீம் என்பதில் சந்தேகம் வேண்டாம் என்றது இந்திய அணி. இப்படிக் காண்பிப்பதற்கு, பூனேயில் அது தன் தலையில் வாங்கிக்கொண்ட குட்டு பயன்பட்டது! கிரிக்கெட் விசித்திரமான ஒரு ஸ்போர்ட். அதைவிடவும் வினோதமானது இந்திய அணி.

**