தொடர்ந்து வரும் அப்பா

இல்லை என்றானபின் மேலும்
இருக்க ஆரம்பித்தார் மனதில்
இப்போதெல்லாம் என்னில்
அவ்வப்போது ஒரு சிந்தனை
ஆறமாட்டாமல் வருகிறது
திரும்பிவந்து மீண்டும் சிலநாள்
இருக்கமாட்டாரா நம்மோடு
அந்தக்காலம் போலவே இரவு
ஆகாரம் முடிந்த கையோடு
ஆகாயத்தில் நிலாவும்
அதன்கீழே அப்பாவும்
தோழர்களாய்த் துணைவரக்
காலார நடக்கலாமே
கதைகதையாய்ப் பேசலாமே
ஆல் இந்தியா ரேடியோவில்
அருணாச்சலத்தின் நாதஸ்வரத்தை
ஆற அமர உறங்காதிருந்து
ஆர்வமாய் ரசிக்கலாமே
. . .
அப்பா .. ?

*