தேடித் தேடியே …

புதிதாகக் குடிவந்த இடத்தை
பொழுதுபோகாமல் சுற்றிப் பார்த்தேன்
குட்டித்தெருக்களில்
வட்டமிட்டபோது
புதுசு புதுசாகக் கண்ணில்பட்டன
ஏகப்பட்ட தெருநாய்கள்
நீளமும் குட்டையுமாய்
பெரிசும் சிறிசுமாய்
கருப்பும் சிவப்புமாய்
ஆசையாக வாங்கி வளர்த்து
அம்போ என்று விட்டுவிட்டார்களோ
விதவிதமாய் முகத்தைவைத்துக்கொண்டு
விசித்திரமாய் சத்தம் எழுப்புகின்றன
எந்தெந்த நாடுகளின்
இறக்குமதி வடிவங்கள் இவை
நாட்டு நாய்களெல்லாம் எங்கே?
தேடினாலும் எளிதாகத் தென்படுவதில்லை
நாட்டில் மனிதர்களும்கூடத்தான்

**