தேடித் தேடியே …

புதிதாகக் குடிவந்த இடத்தை
பொழுதுபோகாமல் சுற்றிப் பார்த்தேன்
குட்டித்தெருக்களில்
வட்டமிட்டபோது
புதுசு புதுசாகக் கண்ணில்பட்டன
ஏகப்பட்ட தெருநாய்கள்
நீளமும் குட்டையுமாய்
பெரிசும் சிறிசுமாய்
கருப்பும் சிவப்புமாய்
ஆசையாக வாங்கி வளர்த்து
அம்போ என்று விட்டுவிட்டார்களோ
விதவிதமாய் முகத்தைவைத்துக்கொண்டு
விசித்திரமாய் சத்தம் எழுப்புகின்றன
எந்தெந்த நாடுகளின்
இறக்குமதி வடிவங்கள் இவை
நாட்டு நாய்களெல்லாம் எங்கே?
தேடினாலும் எளிதாகத் தென்படுவதில்லை
நாட்டில் மனிதர்களும்கூடத்தான்

**

நகலாத நாசகாரர்கள்

`போய் வருகிறேன்` என்றார்
ஒரு நேர்காணலில் அவர்
ஏன் அப்படிச் சொன்னார்?
தமிழில் அவருக்குப் பிடித்த வாக்கியமாம்
அது சரி
ஆனால் போகவேண்டியது அவரல்ல
எப்போதடா தொலைவான் என நம்மைத்
தவிக்கவைக்கும் பிரகிருதிகள்
ஏகப்பட்டது உண்டு நாட்டில்
பிடித்துத் தள்ளினால் ஒழிய
இடத்தைக் காலி செய்யாதுகள் இதுகள்

**

இல்லையெனில்

வெங்காயம் இல்லாமல் ஒரு வீடா
சட்னி அரைக்க வெங்காயம் இல்லை
என்றதும்தான் போட்டேன் இப்படி
காலையில் ஒரு கூப்பாடு
யோசித்துப் பார்க்கையில்
ஏதேதோதான் இல்லை இந்த நாட்டில்
இருந்தும் ஓடிக்கொண்டிருக்கிறதே
நாடே ஓடிக்கொண்டிருக்கையில்
ஓடாதா வீடு?

**