கிரிக்கெட்: ஆச்சர்ய இந்திய வெற்றி

நேற்று (28-3-21) புனேயில், ஒரு லாஸ்ட்-ஓவர் த்ரில்லரில் இந்தியா இங்கிலாந்தைத் தூக்கி எறிந்தது. ரிஸல்ட்டை மட்டும் பார்ப்பவர்களுக்கு மேட்ச்சின் அதிர்ச்சிகள்/ஊசலாட்டங்கள் புரிய வாய்ப்பில்லை. டிவி முன் உட்கார்ந்து படபடத்தவர்களுக்கே அந்த உச்சபட்ச அனுபவம்!

டாஸ் தோற்பதில் ரெகார்ட்-ஹோல்டரான இந்திய கேப்டன் கோஹ்லி, நேற்றும் தன் கைங்கர்யத்தைத் தவறாது செய்தார். அதனால் முதலில் பேட்டிங் .  பவர் ப்ளேயில் (1-10) வேகம் காட்டிய ரோஹித்(37), தவன்(67), அடுத்தடுத்து விழுந்தனர். அடுத்து வந்த கோஹ்லியும் அவரது தம்பி ராஹுலும் ஆளுக்கு 7 எடுத்துவிட்டு ஓடினார்கள். இளம் மிடில்-ஆர்டர் பேட்ஸ்மன்களான ரிஷப் பந்த் (78), ஹர்தீக் பாண்ட்யா(64) இருவரும் 12 ஓவருக்குள் 99 விளாசி இங்கிலாந்து பௌலிங்கை ஒரு கை பார்க்க, இந்திய ஸ்கோர் நிமிர்ந்தது. இறுதி ஓவர்களில் பேட் செய்த ஷர்துல் டாக்குர் (30), க்ருனால் பாண்ட்யா (25). இருவரது பங்களிப்பின்றி இந்தியா 300-ஐக் கடந்திருக்காது. கடைசி 3 ஓவர்களில் இந்தியா எடுத்தது 11 ரன். 48.2 ஓவர்களில் ஆல்-அவுட்!  இங்கிலாந்தின் கேப்டன் ஜோஸ் பட்லர்  7 பௌலர்களை பயன்படுத்தினார். ஒவ்வொருவரும் விக்கெட் எடுத்தார்கள். 330 என்கிற இலக்கு இங்கிலாந்துக்கு பெரிய விஷயம் இல்லை. தொடர் இங்கிலாந்திடம் போய்விட்டது எனவே தோன்றியது.

இங்கிலாந்தின் பதிலில், ஆரம்பத்திலேயே அதிரவைத்தார், இந்தத் தொடர் முழுதும் அழகாக வீசி வரும் புவனேஷ்வர். 2 விக்கெட்டுகளை அவர் தூக்க, 3-ஆவதாக வந்த பென் ஸ்டோக்ஸ் (Ben Stokes) நடராஜனிடம் சரிந்தார். (குல்தீப்பிற்கு பதிலாக உள்ளே  டி.நடராஜன். Tactical move என்றார் ‘toss-ஐத் தோற்றுப் பேசிக்கொண்டிருந்த கோஹ்லி). டாவிட் மலனின் (Dawid Malan) அரைசதம். அவர் வீடு திரும்புகையில் இங்கிலாந்தின் தள்ளாட்டம். 168க்கு 6 விக்கெட். ஷர்துல் டாக்குர் (Shardul Thakur) வரிசையாக 3 விக்கெட்டுகளை விரட்டிவிட்டதால் வந்த வினை. அந்த நேரத்தில் இந்த ஆள்! ஆல்ரவுண்டர் சாம் கர்ரன். மோய்ன் அலி கொஞ்சம் துணையிருந்தார். அதற்கப்புறம் ஒன்-மேன் ஷோதான் கர்ரனிடமிருந்து. நடராஜன், பிரசித் கிருஷ்ணா என இந்திய பௌலர்களை வரிசையாகப் பதம் பார்த்தார் கர்ரன். 200/7 என்ற நிலை வருகையில், இங்கிலாந்து ஒப்பேறாது என இந்தியர்களுக்குத் தோன்ற ஆரம்பித்தது. தொடர்ந்து விளாசி 300-ஐக் கடந்து ஸ்கோரைக் கொண்டுவந்துவிட்டார் கர்ரன். இப்போது இந்தியாவுக்கு உதறல். 47-ஆவது ஓவரில் டாக்குரைப் பின்னிப் பெடலெடுத்த கர்ர்ன், 18 ரன் சேர்த்தார். 

50-ஆவது ஓவர். 14 ரன்களே தேவை இங்கிலாந்தின் தொடர் வெற்றிக்கு. சாம் கர்ரன் இன்னும் இருக்கிறார். வேர்க்க விறுவிறுக்க 91-ல். Death over specialist நடராஜனிடம் பந்து. புவனேஷ்வரும் கோஹ்லியும் ஏதேதோ சொன்னார்கள். சிங்கிள் தொலையட்டும்,  சிக்ஸர், பௌண்டரி வராம பாத்துக்கப்பா! – என்றிருப்பார்களோ? முதல் பந்து. நடராஜன் யார்க்கர். தூக்கி அடிக்கமுடியாமல், ஸ்டம்ப் காலியாகிவிடாமல் தடுத்த கர்ரன், லாங்-ஆஃப் திசையில் செலுத்த, முதல் ரன் ஓடினார்கள். ஹர்தீக்கின் ஃபீல்டிங், ஷார்ப் த்ரோ! இரண்டாவது ரன்னுக்கு முயற்சித்த மார்க் வுட் திருப்பி அனுப்பப்பட, ஹர்தீக்கிடமிருந்து சீறிய பந்து ரிஷப் பந்தின் கையில்! கோட்டுக்குள் வுட் பாய்வதற்குள் ஒரே தட்டாகத் தட்ட, பறந்தது பெய்ல்ஸ்! சிவப்பொளி. வுட் காலி. கடைசி ஆளான ரீஸ் டாப்லே (Reece Topley) இறங்கி நடராஜனின் அடுத்த பந்தை எப்படியோ சிங்கிளுக்கு தட்டி, அந்தப்பக்கம் ஓடி நின்றுகொண்டார். எதுக்கு வம்பு! சாம் கர்ரன். நடராஜனின் அடுத்த இரண்டு பந்துகள்.. சிக்ஸா, ஃபோரா? சான்ஸே இல்லை. Dot balls!  5-ஆவது பந்தை கவர் திசையில் பௌண்டரி அடித்தார் கர்ரன். அடுத்த பந்தும் துல்லியமாகக் கீழிறங்க, யார்க்கர். Dot ball. கடைசி ஓவரில் வெறும் 6 ரன்களே அருளினார் நடராஜன்! 7 ரன் வித்தியாச ஆச்சர்ய வெற்றி இந்தியாவுக்கு. கோஹ்லியின் நடராஜன்-அணைப்பு,  ஆட்டபாட்டம் துவங்கியது!

இந்தப் போட்டியில் தோற்க, இந்தியா கடும் முயற்சி செய்ததாகத் தோன்றியது.  காட்ச்சுகள் சர்வசாதாரணமாக கை நழுவின. Poor ground fielding. இந்தியர்களுக்கு ஃபீல்டிங் எப்போதுதான் கைவருமோ! ரவீந்திர ஜடேஜாவின் ஞாபகம் உடனே வருகிறது. He is India’s gun fielder என்று புகழ்ந்தார் ஆஸ்திரேலிய வீரர்  மோஸஸ் ஹென்ரிக்ஸ் (கடந்த வருட ஆஸ்திரேலிய டூரின்போது).

95 நாட்-அவுட் என ஜொலித்த சாம் கர்ரன் Player of the match. இதற்கு முன் இங்கிலாந்துக்காக அவர் அடித்த உச்சபட்ச ஸ்கோர் 15. இங்கிலாந்து குறித்துக்கொண்டதோ இல்லையோ, CSK – யின் தோனி கவனித்திருப்பார். யூஸ் பண்ணிக்குவோம்..!

டெஸ்ட், டி-20, ஒரு-நாள் தொடர்கள் என மூன்றையும் இந்தியாவிடம் தோற்றுவிட்டு இங்கிலாந்து நாடு திரும்புகிறது, ஜூனில் இந்தியா அங்கே வரட்டும்.. பார்த்துக்கொள்வோம் என்கிற சிந்தனையோடு..

**  

கிரிக்கெட்: இங்கிலாந்தின் கொலவெறி !

336 அடித்து வெளியேறிய இந்திய வீரர்கள் நினைத்திருப்பார்கள் – ஹா.. ஹா… தொடர் கைக்குள் வந்துவிட்டது! ஆனல் நடந்ததோ வேறுகதை.

முதலில் ஆடிய இந்தியா இன்னும் சாத்தியிருக்கலாம் என இப்போது தோன்றியிருக்கும்.  ஆனால் துவக்கம் தந்த தடுமாற்றம்,  கோஹ்லி, ராஹுல் டெஸ்ட் மேட்ச் பயிற்சி செய்துகொண்டு, ஓவர்களை ஓட்டியது – எல்லாம் இங்கிலாந்துக்கு அதிசாதகம். ராஹுல் தன் அரைசதம் கடக்கும் வரையிலும் பேட்டை வீசி  அடிக்க முனையவில்லை, கோஹ்லி இடையிடையே சைகை கொடுத்தும்.  பின்னரும்கூட, மெல்ல தன் சதத்தைக் கொணர்வதில்தான் முனைப்பு காட்டியதாகத் தோன்றியது. இதுதான் இந்தியர்களின் குறை – அரை சதம், முக்கால் சதம், முழுசதம் கடப்பது, சாதிப்பது. அணியின் வாய்ப்பு நழுவிக்கொண்டிருக்கிறது என்கிற பிரக்ஞையே இல்லை, சிலருக்கு. Sad.

ரிஷப் பந்த் இறங்குகையில், அவர் மட்டும் ஒவ்வொரு ஓவரிலும் 10-12 ரன் அடிக்கவேண்டும் என  எதிர்பார்ப்பு/ நிலை. இப்படியேதான் ஹர்தீக் மைதானத்திற்கு வருகையிலும். அவர்கள்தான் சரியான பேட்டிங்கைக் காண்பித்தவர்கள்: ரிஷப் 40 பந்துகளில் 77 (7 sixes, 3 fours). ஹர்தீக் (35 in just 16 balls – 4 sixes). இந்த உத்வேகம், ஆவேசம் சீனியர்களான கோஹ்லி, ராஹுலிடம் ஏன் இல்லை என்பதே இந்தியாவின் கேள்வி. பந்த், பாண்ட்யா அதகளத்தினால்தான் இந்தியா 330-ஐத் தாண்டியது.

Ben Stokes
England’s fiery No. 3 !

ஆனால், நேற்று பென் ஸ்டோக்ஸ் இருந்த ஃபார்மில், இந்தியா 360 அடித்திருந்தாலும் இங்கிலாந்து போட்டு சாத்தியிருக்கும். முதல் 12 ஓவர் வரை இந்திய அணுகுமுறை. பிறகு விஸ்வரூபத்தில் இங்கிலாந்து பேட்டிங். போன மேட்ச்சில் தவறவிட்ட சதத்தை இந்தப்போட்டியில்  பிடித்து, தாண்டியும் ஓடிக்காண்பித்தார் ஜானி பேர்ஸ்டோ (124 in 112 balls. 7 fours, 11 Sixes). ஆட்டத்தின் அசல் கவர்ச்சி என்றால் அது X-factor பென் ஸ்டோக்ஸின் 52 ball 99- தான்(4 fours, 10 sixes).  டி-20 சேம்பியன்ஷிப் ஃபைனலுக்கான ஆயத்தமோ!

8 சிக்ஸர்களை எதிரிகளுக்கு வாரி வழங்கிய பெருமை குல்தீப் யாதவையே சாரும்! பாவம். Completely out of form. Casually butchered.  க்ருனால் பாண்ட்யாவும் தப்பவில்லை.  ஷர்துலுக்கும் நேற்று அடி! இதற்கு நேர்மாறாக இந்தியா பேட்டிங் செய்கையில், இங்கிலாந்தின் ஸ்பின்னர்கள் ஆதில் ரஷீத், மோய்ன் அலி அசத்தலாக ரன் அதிகம் கொடுக்காமல் போட்டார்கள். அல்லது – நாம் அவர்களைத் தாக்காது அசடு வழிந்தோம் என்பதே சரி. இத்தனைக் கூத்துகள், குழப்பங்களுக்கிடையில் புவனேஷ்வரும், ப்ரஸித் கிருஷ்ணாவும் துல்லிய வேகம் காட்டினார்கள். 

நாளைய  (28-3-21) இறுதிப் போட்டியிலாவது சூர்யா இறக்கப்படுவாரா? அல்லது ராஹுல் பூஜைதானா? நடராஜன் ஆடினால் நன்றாக இருக்கும் என்கிறார் சஞ்சய் மஞ்ச்ரேகர். யாரிடத்தில் என்பது கேள்வி. குல்தீப் யாதவை நீக்கிவிட்டு யஜுவேந்திர சாஹலுக்கு அனேகமாக கோஹ்லி வாய்ப்பு வழங்கலாம். இங்கிலாந்தின் 1,2,3 – இப்படியொரு அட்டகாசத்தை நாளைக்கும் காண்பித்துவிட்டால், தொடர்வெற்றி அவர்களையே நாடும். இந்தியா ஓடும்.

**

ஆஸ்திரேலிய டெஸ்ட் தொடர் வெற்றி: சின்னப்பசங்களின் சாகசம்!

டி-20 தொடருக்கான அணியில் ஆளில்லை. ஒரு-நாள் போட்டிகளிலும் இடமில்லை. டெஸ்ட் அணியில் பெயர் இருந்தது. ஆனால், முதல் டெஸ்ட்டுக்குத் தேர்வாகவில்லை. தொடரின் விதியையே மாற்றிய இறுதி மேட்ச்சில் என்னடான்னா அவர்தான் ஹீரோ! Madmax என ஒரு சிலரால் வர்ணிக்கப்படும் 23-வயது விக்கெட்-கீப்பர் பேட்ஸ்மன் ரிஷப் பந்த் (Rishab Pant). தம்பிக்கு தலையில் சூடேறிவிட்டால் மைதானத்தில் ஆட்டமென்ன…ஒரே சாமியாட்டம்தான். கொஞ்சம் ஸ்டைல் மாற்றியிருந்தாலும், அதுதான் நடந்தது அன்று (19-1-21).. ரிஷப் பந்தின்  அதகளம் டெஸ்ட் கிரிக்கெட் உலகில் ஒரு வரலாற்று வெற்றியை இந்தியாவிடம் கொண்டுவந்தது – அதுவும் ஆஸ்திரேலிய அணியின் கோட்டை எனக் கருதப்படும் ‘The Gabba’ -வில். ஆஸ்திரேலியா இந்த மைதானத்தில் கடந்த 32 வருடங்களில் ஒருதடவை கூட எந்த நாட்டிடமும் தோற்றதில்லையாமே.. அட.. !

The Captain !

2020-21 ஆஸ்திரேலிய டூர் – கோவிட் காலத்தின் மத்தியில்- இது நிகழ்ந்ததற்கே இந்திய, ஆஸ்திரேலிய கிரிக்கெட் போர்டுகளுக்கும், வீரர்கள், ஏனைய அணி அங்கத்தினர்களுக்கும் நன்றி சொல்லவேண்டும். ஆனால் கடந்த இரண்டு மாதங்கள் குறிப்பாக, இந்தியாவுக்கு கடும் சோதனை காலமாக அமைந்தது. நவம்பர் 2020-ல் அமீரகத்தில், ஐபிஎல் -இல் ஆரம்பித்த கோவிட் bio-secure bubble, பயணம், ஹோட்டல் க்வாரண்டைன், தனிமையில் மேட்ச் பயிற்சி, தொடர்ந்து பயமுறுத்திய காயங்கள் என வீரர்களைப் புரட்டி எடுத்தது கெட்ட காலம். பிரச்னை மாறி பிரச்னை. மேட்ச்சுகளில் அடி, concussion, fracture,  தொடைக்காயம், முதுகுப்பிடிப்பு, பயிற்சியின் போதும் கையில் அடி, காலில் அடி.. சே… இப்படியா ஒரு அணியைப் பேய் பிடித்து ஆட்டும்.  ஒரு சகிக்கமுடியாத சூழலில், வீரர்களும், அணியின் support staff-ம் பொதுவாக அலுத்து, சலித்துத் துவண்டிருக்கவேண்டும். ஆனால் உள்ளே நிகழ்ந்துகொண்டிருந்த ஏதோ ஒன்று, அவர்களை, ’ பயப்படாதே.. இறங்கு உள்ளே, ஆடு…’  என சொல்லிக்கொண்டே இருந்திருக்கும். காயம்பட்டு டெஸ்ட் சீனியர்கள் ஒவ்வொருவராக அணியிலிருந்து விலகிக்கொண்டிருக்கும்  வைபவம் தொடர, சர்வதேச அனுபவம் ஒரு புறம் இருக்கட்டும், இந்திய உள்நாட்டுத் தொடர்களில்கூட சரியாக ஆடி அனுபவம் அடையாத, பெஞ்சின் விளிம்பில் உட்கார்ந்து வேடிக்கை பார்த்திருந்த net bowlers / standby players, திடீரென உள்ளே, இந்தியாவுக்காக ஆட அழைக்கப்பட்டார்கள். முக்கியமான கடைசி போட்டியில், வாஷிங்டன் சுந்தர், நடராஜன், ஷர்துல் டாக்குர் (Shardul Thakur) – யார் இவர்கள் – கடைசி டெஸ்ட் மேட்ச்சுக்கான இந்திய அணியைப் பார்த்து கிரிக்கெட் உலகம் விழித்தது.. ஷமி, பும்ரா, அஷ்வின், ஜடேஜா, விஹாரி எல்லாம் எங்கே போய்விட்டார்கள் ?  வலிமையான அணியாக, கூடவே சொந்த நாட்டு பிட்ச்சுகளில் ஆடும் சாதகம் பெற்றிருந்த எதிர் அணி. கடைசி மேட்ச்சில் அவர்களது கோட்டையான ’ப்ரிஸ்பேனில் பாக்கலாம்.. வர்றியா?’ எனக் கொக்கரித்த ஆஸ்திரேலிய அணியை, முக்கிய போட்டியில் எதிர்கொள்ளும் இந்திய அணி ஒருமாதிரியாத்தான் இந்தியாவுக்கே காட்சியளித்தது! என்ன செய்வது, வேறு வழியில்லை, முகாந்திரமில்லை. ஏளனமாகப் பார்த்தது எதிரணி. அதிர்ச்சியில் கிரிக்கெட் உலகம். பாவம் இந்தியா.. துரதிர்ஷ்டம். ஆடி, நொறுங்கி வீட்டுக்குத் திரும்பப்போகிறது…

Rishab Pant
Man for the moment..

ஆனால் கத்துக்குட்டிகள் புகுந்து விளையாடிய இந்திய கிரிக்கெட் அணி நிகழ்த்தியதோ ஒரு நம்பமுடியாத வெற்றி. டெஸ்ட் கிரிக்கெட் வரலாற்றின் திகிலான ஒரு பக்கம் அந்த நாட்களில் அழுந்த எழுதப்பட்டது, பின் வருபவர்கள் படித்து சிலிர்ப்பதற்காக. ஷர்துல் டாக்குர், வாஷிங்டன் சுந்தர், நடராஜன், சிராஜ் முகமது – குறிப்பாக கடைசி நாளில் இளம் ஷுப்மன் கில் (Shubman Gill) காட்டிய திறன், சீனியர் புஜாராவின்  பொறுமை, அதிநிதான அணுகுமுறை,  ரிஷப் பந்த் வெளிக்கொணர்ந்த உத்வேகம், ஜெயிக்காமல் அகல்வதில்லை என்கிற, தீ போல் அகத்தில் எழுந்த முனைப்பு. இவைதான் ஒரு இரண்டாம் பட்ச அணியாக பார்க்கப்பட்ட இந்தியா, ஆஸ்திரேலியா என்கிற உலக நம்பர் 1  அணியை அவர்களின் கொல்லைப்புறத்திலேயே நசுக்கி, துவம்சம் செய்ய வழிவகுத்தது.

அடிபட்டு பாதிப்பேர் விழுந்துவிட்ட இந்தியாவின் படுமோசமான காலகட்டத்தில், அஜின்க்யா ரஹானே அணியை நடத்திச்சென்ற விதம் – அவரது தலைமைப்பண்பு, நிதானம், விவேகம்.. எவ்வளவு பாராட்டினாலும் தகும். அப்பாவி முகத்தை வைத்துக்கொண்டு, அதிகம் பேசாமல், அதிரடி மாற்றங்கள், முடிவுகளைக் களத்தில் எடுத்து, ஒட்டுமொத்த இந்தியாவையே ஒரு அசத்து, அசத்திவிட்டார் மனுஷன்.  கோஹ்லி என்றாலே  கேப்டன், கிங் என்கிற அழுத்தமான பிம்பத்தை, ஒரே வீச்சில் கலைத்துப்போட்டார் ரஹானே. ஆஹா.. இவரல்லவா கேப்டன்.. கிரிக்கெட் ரசிகர்கள் 2021-ஐ மறக்கமாட்டார்கள். 

கோஹ்லியின் தலைமையில் அடிலெய்டில் நடந்த முதல் டெஸ்ட் போட்டியில்,  இந்தியா சந்தித்தது அவமானத்தை. இரண்டாவது இன்னிங்ஸில் 36 ஆல்-அவுட்.  ஒரு பெரும் தோல்வியை இந்தியாவின் தலையில் சுமத்திவிட்டு நாட்டுக்குத் திரும்பிவிட்டார் அப்பாவாகப்போகும் கோஹ்லி! உலகம் அதிர்ந்திருந்த வேளையில், கோஹ்லியும் இல்லை, ரோஹித் ஏற்கனவே அணியில் இல்லை. இத்தோடு இந்தியாவின் ஆட்டபாட்டமெல்லாம் ஒழிந்தது என நினைத்து சுகித்திருந்தது ஆஸ்திரேலியா. ’நாளை பொழுது யாருக்கு விடியும்? நடந்து பார்த்தால்.. நாடகம் புரியும் !’ -என்கிற கண்ணதாசனின் வரிகளை ஆஸ்திரேலியர்கள் கேள்விப்பட்டிருக்க வாய்ப்பில்லை! ”4-0 Whitewash” -இந்தியா பரிதாபமாகத் தொடரைத் தோற்கும்” என்று கேலி செய்தார் இங்கிலாந்தின் முன்னாள் கேப்டன்/வர்ணனையாளர்-Michael Vaughan. ’India will be smoked in Tests!’ என்றது உலகக்கோப்பை வென்ற ஒரு ஆஸ்திரேலிய பெருந்தலை – மைக்கேல் கிளார்க். கடைசி நாளில் ஒரு பக்கம் ரிஷப் பார்த்திருக்க, இன்னொரு முனையில் புஜாரா, தலையில், மார்பில், கையில் என அடிபட்டு ஆடிக்கொண்டிருக்கையில்,   ‘Pujara is in his elements. Unsettle him… Rip open his helmet’ என வெறி கொண்டு ட்விட்டரில் தாக்கிய முன்னாள் ஜாம்பவான் ஷேன் வார்ன் – ஆஸ்திரேலியாவின் வீர, தீர ஒரிஜினல் முகங்கள்.

கடைசியில் Brisbane-ல் நடந்தது என்ன! குறிப்பாக இந்தியாவின் ’சின்னப்பசங்க’ ஐந்தே நாட்களில், என்னென்ன வித்தைகள் செய்துகாட்டினார்கள் ? ”நெட்-பௌலர்களையும், ஸ்டாண்ட்-பை ப்ளேயர்களையும் வைத்தல்லவா இந்தியா  கடைசியில் ஆடியது? இது இந்தியாவின் முழு டீமே இல்லையே! ஆஸ்திரேலியாவின் வலிமையான அணி, இந்தியா “A” டீமிடம் தோற்றுவிட்டதே! “ – முன்னாள் ஆஸ்திரேலிய கேப்டன் ரிக்கி பாண்ட்டிங்கின் புலம்பல்.. அப்பப்பா.. தாங்கமுடியவில்லை!

இன்னும் நிறைய எழுதலாம் இந்த மாபெரும் ’டெஸ்ட் தொடர் வெற்றி’பற்றி. இங்கே நிறுத்திக்கொள்வோம் இப்போது.

**

டி-20 தொடர் கையில்.. இனி டெஸ்ட் அரங்கம் !

மூன்றாவது டி-20 ஐ 12 ரன் வித்தியாசத்தில் ஆஸ்திரேலியா வென்றது.  மேத்யூ வேடின் (Mathew Wade)அதிரடி பேட்டிங்கிற்கு கொஞ்சம் மேலேயே போய் பதில் தந்தார் கேப்டன் கோஹ்லி. Class act. ஆனால் போதவில்லை. மிடில்-ஆர்டர் நொறுங்க, பாண்ட்யாவும் 20 ரன்னில் விழுந்ததால், இந்தியா வெல்ல இயலவில்லை. சுருக்கமாகச் சொன்னால், ஆஸ்திரேலிய பௌலர்கள் (குறிப்பாக ஸ்பின்னர் ஸ்வெப்ஸன்) அபாரமாக வீசி இந்தியர்களைத் தடுமாறவைத்தார்கள். அவர்கள் இந்தியாவைவிட ஒரு படி மேலேயே இருந்தார்கள். ஜெயித்ததே நியாயம்!

2-1 என்று தொடர் இந்தியாவின் கையில் வந்தது. தொடர் நாயகன் ஹர்திக் பாண்ட்யா நடராஜனின் கையில் தன் விருதைக் கொடுத்து ’நீ தாம்ப்பா இந்த விருதுக்கேற்ற ஆளு!’ என்று உணர்ச்சி வசப்படுகிறார். தொடர் கோப்பையை கேப்டன் கோஹ்லியும் அவரிடம் கொடுத்து நிற்க, வீரர்கள் வெற்றிமுகம் காட்டிப்படம் எடுத்துக்கொள்கின்றனர். நடராஜனுக்குத் தலை சுற்றியிருக்கும்!  Natarajan is the find of the series, no doubt என்கிறார் முன்னாள் வீரர் கௌதம் கம்பீர். இப்படியே இவர் தொடர்ந்தால், அடுத்த ஆண்டின் டி-20 உலகக்கோப்பைக்கான அணியின் வியூகங்களில் இவர் இடம்பெறலாம் என்கிறார் கோஹ்லி. ஆஸ்திரேலிய மைதானத்தில் ஷமி, பும்ராபோன்ற அனுபவ வீரர்களே தத்தளிக்கையில், எதிரி யார் எனத் தலையைப் பிய்த்துக்கொள்ளாமல், துல்லியம், variations, கடின உழைப்பு என மட்டும் மனதைக் குவியவைத்து விக்கெட்டுகளைச் சாய்த்தார் நடராஜன். சாய்த்தபின்பு? கூச்சலோ, கொண்டாட்டமோ ஏதுமில்லை. பந்தை எடுத்துக்கொண்டு அடுத்து வீசப்போவதைப்பற்றி சிந்தித்தவாறே செல்லும் நடராஜன். இதில் கபில்தேவின் சாயல். இந்தியர்கள் புகழ்வது இருக்கட்டும். ஆஸ்திரேலிய கிரிக்கெட் வீரர்கள், முன்னாள் பெரிசுகளும், இந்தக்காலத்தில் காணக்கிடைக்காத அந்த எளிமையை, பண்பை கவனிக்கத் தவறவில்லை.

Mohammed Siraj

டெஸ்ட் மைதானத்திற்கு கதை மாறுகிறது டிசம்பர் 17-லிருந்து. முதல் டெஸ்ட் அடிலெய்ட் (Adelaide) மைதானத்தில் இரவு-பகல் ஆட்டம். இந்திய பேட்டிங் கோஹ்லி, புஜாரா, ரஹானே, ராஹுல் என மையம் கொள்ளும். துவக்கத்தில் ப்ரித்வி ஷா அல்லது மயங்க் அகர்வால் – இருவரில் ஒருவர் நுழைய வாய்ப்பு. அனேகமாக வ்ருத்திமான் சாஹா விக்கெட்கீப்பராக பங்களிப்புசெய்வார். இந்தியாவின் பௌலிங் ஆஸ்திரேலியாவின் வலிமையான பேட்டிங்கிற்குப் பெரிதாக சவால் விடுக்கும் எனத் தோன்றவில்லை. வேகப்பந்தில் முகமது ஷமி, பும்ராவோடு, உமேஷ் யாதவ் மற்றும் அனுபவம் இல்லாத, ஆனால் சாதிக்க ஆசைப்படும் முகமது சிராஜ் (ஐபிஎல் பெங்களூர் அணி) இருக்க வாய்ப்பு. ஒருவேளை சிராஜ் சேர்க்கப்படவில்லை எனில், நவ்தீப் செய்னி வரலாம். ஒரே ஒரு ஸ்பின்னர்தான் இந்திய அணியில் இருப்பார். அந்த நிலையில் அனுபவ வீரர் அஷ்வினுக்கு வாய்ப்பு. சிட்னி டெஸ்ட்டில் இரண்டு ஸ்பின்னர்கள் ஆடலாம். அப்போது அஷ்வினோடு ஜடேஜா சேர்ந்துகொள்வார். ஜடேஜாவின் வலிமையான பேட்டிங் அணிக்கு உகந்தது. காயத்திலிருப்பதால், முதல் டெஸ்ட்டிற்குள் அவர் நுழைவதற்கான வாய்ப்பில்லை எனத் தோன்றுகிறது.

முதல் டெஸ்ட்டிற்குப் பின் கோஹ்லி விடுவிக்கப்படுவதால், அவரிடத்தில் ரிஷப் பந்த் அல்லது ஷ்ரேயஸ் அய்யர் இடம்பெறலாம். கோஹ்லியில்லாத இந்திய அணிக்கு அஜிங்க்யா ரஹானேதான் கேப்டன். இந்தத் டெஸ்ட் தொடர், இந்தியாவுக்கு வேறொரு கதையைச் சொல்லக்கூடும்.

**

T-20 : சிட்னியில் சிரித்த இந்தியா !

இதற்கு முன் இரண்டு ஒரு-நாள் போட்டிகளில் செம்மயா அடிவாங்கிய சிட்னி மைதானத்தில், இந்தியா அபாரமாக டி-20 ஆடியது நேற்று. 194 என்கிற ஆஸ்திரேலிய ஸ்கோர் ப்ரும்மாண்டம்தான் அங்கே. அசரவில்லை இந்தியா. இலக்கைத் துரத்தி வென்றவிதம் ரசிகர்களைக் கூத்தாடவைத்தது.

இந்திய அணியில், தலைக்காயம் ஜடேஜாவை உள்ளே வரவிடவில்லை. சீனியர் வேகப்பந்துவீச்சாளர்கள் முகமது ஷமி, ஜஸ்ப்ரித் பும்ரா சேர்க்கப்படவில்லை. மாறாக, தீபக் சாஹர், ஷர்துல் டாக்குர், நடராஜன் ஆடினர். சாஹலும், சுந்தரும் ஸ்பின் பொறுப்பை ஏற்றனர். ஆஸ்திரேலியாவுக்கு காயங்களால் பிரச்னைகள். வார்னர், ஃபின்ச் வெளியே. ஸ்டார் பௌலர்களான ஸ்டார்க், கம்மின்ஸ், ஹாசல்வுட் ஆடாதது ஆஸ்திரேலிய பௌலிங்கை பலவீனமாகக் காட்டியது. ஆனால் ஆஸ்திரேலிய ஸ்பின் (Adam Zampa, Mitch Swepson)  இந்தியர்களை அடக்குவதில் அழகாக வேலை செய்தது.   

தற்காலிகக் கேப்டன் மேத்யூ வேட் (Mathew Wade) ஆட்டத்தைத் துவக்கித் தூள்கிளப்பினார். போன மேட்ச்சில் படு டைட்டாகப் போட்ட வாஷிங்டன் சுந்தர் மற்றும் சாஹலைக் குறிவைத்துத் தாக்கினர் ஆஸ்திரேலியர்கள். வேட் 58, ஸ்மித் 46 என அதகளப்படுத்த, மேக்ஸ்வெல் சாஹலைத் தேடி விளாசினார்! விளைவு ? சாஹல் 1 விக்கெட் எடுக்க 51 ரன் கொடுக்கும்படி ஆயிற்று. சுந்தர் 35 ரன்கொடுத்தார். விக்கெட் எடுக்கவில்லை. அல்லது கோஹ்லி எடுக்கவிடவில்லை! கேட்ச்சை நழுவவிட்டுக்கொண்டே இருந்தால் பௌலர் என்ன செய்ய? இருந்தும் அதே பந்தில் கோஹ்லியின் த்ரோவினால் வேட் ரன்-அவுட் ஆனது ஒரு தமாஷ்! அப்படியும் சமாளித்து ஆடி 194-க்குப் போய்விட்டது ஆஸ்திரேலியா. எல்லோரும் ரன்னை வாரி வழங்க, நடராஜன் துல்லியம் காட்டி 20 ரன், அதில் ஒரு பௌண்டரி மட்டுமே கொடுத்தார். 2 விக்கெட்டுகளைச் சாய்த்தார்.

கதையை முடித்த பாண்ட்யா !

இந்தியா பேட்டிங் ஆரம்பிக்கையில்,  தவன் (52), ராகுல்(30) சிறப்பாக ஆடினர். கோஹ்லியின் 24 பந்தில் 40 ரன் என்பது இந்திய ரன்விகிதத்தைத் தூக்கிவிட்டது. சாம்ஸனும் கோஹ்லியும் அவுட் ஆனபின், ஹர்திக் பாண்ட்யாவும் ஷ்ரேயஸ் ஐயரும் இலக்கை நோக்கிய பயணத்தில் சீரியஸ் ஆகினர்! அப்போதும் 195 என்பது அடையமுடியாத ஸ்கோர் போலவே தோன்றியது. ஜடேஜா இல்லாத நிலையில், டெத்-ஓவர் பேட்டிங்கில் பாண்ட்யா தான் யாரென மேலும் ஒருமுறை நிரூபித்தார். கடைசி ஓவரில் 14 ரன் தேவைப்பட்டது. பாண்ட்யா நாலே பந்தில் 2 சிக்ஸ், இரண்டு ரன் என டேனியல் சாம்ஸைத் தாக்கி,  வெற்றியைப் பறித்தார்.  தொடரும் வெல்லப்பட்டது. ஸ்டேடியம் இந்தியக் கொடிகளுடன் ஆட்டம்போட்டது! பாண்ட்யா Man of the Match.

”ஹர்திக் மைதானத்தில் இறங்கும் வரை எங்களுக்கு ஆனந்தமாக இருந்தது!” என்றார் ஆஸ்திரேலிய கேப்டன் வேட்! கடைசி டி-20 நாளை (8-12-20) அதே சிட்னியில். மேலும் ஒரு high-scoring encounter வருமோ?

**

IND-AUS கிரிக்கெட்: முதல் போட்டிக்கான இந்திய அணி

சிட்னியில் இன்று (27 நவ. 2020) ஆரம்பிக்கிறது இந்தியாவின் ஆஸ்திரேலியக் கதை. கோவிட்-கால நீளத் தொடர்போட்டிகளில் முதலாவதாக ஒரு-நாள் மேட்ச். ஆஸ்திரேலியா முஷ்டியை உயர்த்தி இந்தியாவுக்காகக் காத்திருக்கிறது. சிட்னியில் ஆஸ்திரேலிய கிரிக்கெட் போர்டு 50% ரசிகர் கூட்டத்தை அனுமதித்துள்ளது. ரொம்ப நாளுக்கப்புறம் ரசிகர்கள் மைதானத்தில். சுவாரஸ்யம். விற்பனை ஆரம்பித்ததுமே டிக்கட்டுகள் போன இடம் தெரியவில்லை! ஒரு கடுமையான, சுவாரஸ்யமான கிரிக்கெட் தொடருக்காக, ரசிகர்களின் பெரிய எதிர்பார்ப்பு..

Hardik Pandya,
Allrounder

விராட் கோஹ்லியின் இந்திய அணி எப்படி இருக்கும், யார் யார் உள்ளே? துவக்க ஆட்டக்காரர்களை முடிவு செய்வதிலேயே குழப்பம் கொஞ்சம் இருக்கிறது. ஷிகர் தவன் ஐபிஎல்-இல் காட்டிய ஃபார்மோடு, தன் புகுந்த வீட்டில்/நாட்டில் நன்றாக ’ஆடி’க் காண்பிப்பார் என எதிர்பார்ப்போம்! (தவனின் மனைவி ஆயிஷா முகர்ஜி ஒரு ஆஸ்திரேலிய-இந்தியன், மெல்பர்னில் அம்மணியின் வீடு). தவனுக்குத் துணையாக மட்டையோடு இறங்கப்போவது யார்? மயங்க் அகர்வால், ஷுப்மன் கில், கே.எல்.ராஹுல் -இதில் ஒருவர். மூவரின் ஐபிஎல் ஃபார்ம் ஓகே. ஆனால் இன்று ஆரம்பிப்பது 50-ஓவர் மேட்ச். ஒரு-நாள் போட்டிகளுக்கு வேறுவித முனைப்பு, டெக்னிக், ஆட்டம் தேவை. தயாராகத்தான் இருப்பார்கள் இந்தியாவின் டாப்-ஆர்டர் பேட்ஸ்மன்கள். கே.எல்.ராஹுல் விக்கெட்-கீப்பராகவும் இயங்கப்போகிறார். ஷிகருடன் ராஹுல் இறங்கி ஆஸ்திரேலிய வேகப்பந்துவீச்சை ஆரம்பத்தில் ’கவனிப்பதே’ உசிதம் எனத் தோன்றுகிறது. மிடில் ஆர்டரில் கோஹ்லியும், ஷ்ரேயஸ் அய்யரும் கவனமாக ரன் சேர்க்காவிட்டால் அணியின் ஸ்கோர் 280-க்கு வரவே திண்டாடும். 5-ல் ஃபார்மில் உள்ள மனீஷ் பாண்டேயும் (அருமையான ஃபீல்டரும்கூட), 6-ல் எதிரியை நொறுக்கப்பார்க்கும் ஹர்திக் பாண்ட்யாவும் ஆடவேண்டும். பாண்ட்யா வெகுகாலத்துக்குப் பிறகு (காயம்), இந்திய அணியில். ஆஸ்திரேலியாவுக்கு சொல்ல, அவருக்கு சில விஷயங்கள் இருக்கக்கூடும்!

சிட்னி பிட்ச் ஸ்பின் காண்பிக்கும். இப்போது கொஞ்சம் மாறியிருக்கக்கூடும். 3 வேகப்பந்துவீச்சாளர்கள், 2 ஸ்பின்னர்கள், 6 பேட்ஸ்மன்கள் எனும் விகிதத்தில் இந்தியா களத்தில் இறங்கவேண்டும். பௌலர்கள் அநேகமாக இப்படி இருக்கலாம்: ஜஸ்ப்ரித் பும்ரா, முகமது ஷமி, நவ்தீப் செய்னி. ஸ்பின்னர்கள்? ரவீந்திர ஜடேஜாவின் இடதுகை ஆர்தடாக்ஸ் ஸ்பின் (leftarm orthodox spin) ஆஸ்திரேலிய பேட்ஸ்மன்கள் சிலருக்கு சோதனை தரும். சிட்னிபெரிய மைதானம். ஜடேஜாவின் மந்தகதிப் பந்துகளை சிக்ஸருக்குத் தூக்க முயற்சிக்கையில் எல்லோரும் தப்பிக்க முடியாது! அவருக்கு ஜோடியாக லெக்-ஸ்பின்னர் யஜுவேந்திர சாஹலே சரி. தந்திரமாக சுழல்காட்டி 10 ஓவர்கள் வீசி, ஆஸ்திரேலிய அதிரடி ஆசாமிகள் ஒன்றிரண்டு பேரையாவது வீட்டுக்கு அனுப்பிவிடுவார்.

என்னுடைய அனுமானத்தில், சிட்னியில் இப்படி இறங்கவேண்டும் இந்திய XI

1.ஷிகர் தவன் 2. ராஹுல் 3. கோஹ்லி 4. ஷ்ரேயஸ் ஐயர் 5.மனீஷ் பாண்டே 6. ஹர்திக் பாண்ட்யா. 7.ஜடேஜா 8. ஷர்துல் டாக்குர் (Shardul Thakur) 9. ஷமி 10. பும்ரா(Bumrah) 11. சாஹல்.

செய்னியின் இடத்தில் டாக்குரை மேலே சேர்த்ததன் காரணம், அவர் மிதவேகத்தில், ஆனால் ஸ்விங் காட்டிப் போடுவார். கொஞ்சம் street-smart ஆன ஆள் என்பது, சிஎஸ்கே-யில் தோனி அவரை பயன்படுத்தியவிதத்திலேயே தெரிந்தது!  செய்னி காண்பிக்க விரும்பும் 140+ வேகம் ஆஸ்திரேலியாவில் அடிவாங்கலாம்.

கோச் என்கிற பெயரில் இந்தியாவின் சாபக்கேடான சாஸ்திரி ஆஸ்திரேலியாவில்.  கோஹ்லியிடம் என்ன கிசுகிசுத்துக் குழப்புவாரோ என்கிற சஞ்சலமும் தலைதூக்குகிறது.  எத்தகைய காம்பினேஷன் அணியில் அமையுமோ! ஒருவேளை, ஷுப்மன் கில் (Shubman Gill) நாளை ஆடுவதை கோஹ்லி விரும்பலாம். அல்லது அதிரடி ஆட்டமாடும் சஞ்சு சாம்ஸன், நம்பர் 5-ல் (பாண்டேக்குப் பதிலாக) இறக்கப்படலாம். (சாம்ஸன் விக்கெட்கீப்பரும்கூட). பார்ப்போம். அமீரகத்தின் ஐபிஎல் -இல் ஆரம்பித்து, தொடர்ந்து Bio bubble-லில் இருந்துகொண்டு இறுகியிருக்கும் இந்திய வீரர்கள் எவ்வளவுக்கெவ்வளவு துரிதமாக தங்களை சரிப்படுத்திக்கொண்டு ஆஸ்திரேலிய சூழலில் பொருத்திக்கொள்கிறார்களோ, அவ்வளவுக்கவ்வளவு இந்திய வெற்றி எளிதாகும்.

சில மணிநேரங்களுக்கு முன்பாக: வேகப்பந்துவீச்சாளர் நவ்தீப் செய்னிக்கு முதுகுப்பிடிப்பு என்று கேள்வி. T.நடராஜன் – வருண் சக்ரவர்த்தியின் காயத்தினால் கடைசி தருணங்களில் டி-20 அணியில் சேர்க்கப்பட்ட சன்ரைஸர்ஸ் ஹைதராபாத் வேகப்பந்துவீச்சாளர்- ஒரு-நாள் அணியில் இப்போது இணைக்கப்பட்டிருக்கிறார். கோஹ்லி ஆஸ்திரேலியாவில் ’ரிஸ்க்’ எடுக்கத் தயாராக இல்லை என்று தெரிகிறது!

தொடங்கட்டும் போர்..

**

ஆஸ்திரேலிய கிரிக்கெட் பயணம் – இந்திய அணிகள்

முன்னாள் ஸ்பின்னர் சுனில் ஜோஷி, வேகப்பந்துவீச்சாளர் ஹர்விந்தர் சிங் ஆகியோரைக்கொண்ட இந்திய கிரிக்கெட் போர்டின் புதிய தேர்வுக்குழு  தன் முதல் பணியைச் செய்திருக்கிறது. ஆஸ்திரேலியா செல்லவிருக்கும் மூன்று இந்திய அணிகள், ஆரம்பக் குழப்பங்களுக்குப் பிறகு ’திருத்தி’ அமைக்கப்பட்டு அறிவிக்கப்பட்டுள்ளன.

ஐபிஎல்  முடிந்தபின் (ஃபைனல் 10-11-20), நவம்பர் 2020 இறுதியிலிருந்து ஜனவரி 2021 வரை 3 ஒரு-நாள், 3 டி-20, 4 டெஸ்ட் போட்டிகள் எனத் தொடர்களை இந்தியாவும், ஆஸ்திரேலியாவும் ஆடவிருக்கின்றன. அழுத்தம் நிறைந்த இந்த கோவிட் காலத்தில்,  மூன்றுவகைக் கிரிக்கெட் போட்டிகளை, அயல்நாட்டில் இந்திய வீரர்கள் தொடர்ந்து ஆடுமாறு செய்யும் இத்தகைய நீண்ட தொடர் உசிதம்தானா என்கிற கேள்வியும் தலைகாட்டத்தான் செய்கிறது.

நடராஜனைப் பாராட்டும் கேப்டன் டேவிட் வார்னர்

அணிகள் சில புதுமுகங்களைத் தவிர்த்து,  எதிர்பார்க்கப்பட்ட வகையில் இருக்கின்றன. டி-20, ஒரு-நாள் அணிகளில் அதிரடி ஆட்டக்காரரான ரிஷப் பந்த்திற்கு இடமில்லை என்பது ஒரு அதிர்ச்சி.  இந்திய டி-20 அணியில் ஆரம்பத்தில் சேர்க்கப்பட்ட தமிழ்நாடு/கொல்கத்தா நைட்ரைடர்ஸ் அணியின் மிஸ்டரி ஸ்பின்னர் வருண் சக்ரவர்த்தி,  தோள்பட்டைக் காயம் காரணமாக நீக்கப்பட்டுள்ளார். (காயம்பற்றி கொல்கத்தா நைட்ரைடர்ஸ் ஐபிஎல் அணி, இந்திய போர்டுக்கு சரிவரத் தெரிவிக்கவில்லை எனக் கூறப்படுகிறது). Someone’s loss is someone else’s gain என்கிற கூற்றுக்கேற்ப, அவருடைய இடத்தில் தமிழ்நாடு/சன்ரைஸர்ஸ் ஹைதராபாத் ஐபிஎல் அணியின் யார்க்கர் ஸ்பெஷலிஸ்ட் T. நடராஜன் சேர்க்கப்பட்டுள்ளார். (இவர் ஏற்கனவே அறிவிக்கப்பட்ட அணிகளுக்கான, மூன்று ‘ரிஸர்வ் வேகப்பந்துவீச்சாளர்கள்’ லிஸ்ட்டில் இருந்தார்). ’Natarajan is the find of IPL 2020’ என்றதோடு அவர் இந்திய அணியில் இடம்பிடித்ததற்குப் பாராட்டுத் தெரிவித்திருக்கிறார் சன்ரைஸர்ஸ் கேப்டன் டேவிட் வார்னர். 

தேர்வில், ஒரு முக்கியமான மாற்றமும் நிகழந்தது. சில நாட்களுக்கு முன் அறிவிக்கப்பட்ட அணிகளில் காணாமற்போயிருந்த, இந்தியாவின் ப்ரிமியர் பேட்ஸ்மனான ரோஹித் ஷர்மா, டெஸ்ட் அணியில் சேர்க்கப்பட்டிருக்கிறார். காயத்திற்காக ஓய்வு இன்னும் தேவைப்படுவதால் டி-20, ஒரு-நாள் போட்டிகளில் ஆடமாட்டார். இன்னுமொரு அறிவிப்பு: முதல் டெஸ்ட்டிற்குப்பின் டிசம்பர் இறுதியில், கோஹ்லி விடுப்பில் இந்தியா திரும்புகிறார் (அனுஷ்காவுக்குக் குழந்தை பிறக்கும்போது அருகிலிருக்கவேண்டுமே!) எனினும், தொடர்ந்து ஆடிவரும் கோஹ்லிக்கு விடுப்பு  தேவைதான். இதனால் டெஸ்ட்-2, 3, 4-களில் ரோஹித் கேப்டனாக ஆடக்கூடும்.

கேரளா/ராஜஸ்தான் ராயல்ஸின் விக்கெட்கீப்பர் பேட்ஸ்மன் சஞ்சு சாம்ஸன் முன்னராக டி-20 அணியில் மட்டும் இடம்பிடித்திருந்தார். இப்போது ஒரு-நாள் அணியிலும் அவர் இணைக்கப்பட்டிருப்பது அணிக்கு வலு சேர்க்கும். அவர் ஒரு அதிரடி என்பதோடு அருமையான கீப்பரும். டெஸ்ட் கீப்பர் வ்ருத்திமான் சாஹா காயத்தில் இருப்பதாகத் தெரிகிறது.காயம் சீரியஸ் இல்லை எனில் தொடர்ந்து டெஸ்ட் அணியில் நீடிப்பார்.

ஸௌரவ் கங்குலியின் குறிப்பிடத்தக்க, விமர்சகர்களால் ஸ்லாகிக்கப்பட்ட  இந்திய கேப்டன்சி காலத்தில், ராஹுல் திராவிட் துணைக்கேப்டனாகவும் விக்கெட் கீப்பராகவும் வெகுகாலம் சேவை செய்தது நினைவிருக்கலாம்! அந்த ’ரோல்’ கிட்டத்தட்ட இன்னொரு கர்னாடகா பேட்ஸ்மனான கே.எல்.ராஹுலிடம் வந்து சேர்ந்திருக்கிறது. டி-20, ஒரு-நாள் போட்டிகளில் இவரே முதல்-சாய்ஸ் விக்கெட் கீப்பராக ஆட வாய்ப்பு. சாம்ஸன் கீப்பர் எனினும், அவருடைய பேட்டிங்கிற்காகவே அணியில் இருக்கவேண்டியவர்.  அவருடைய ஆடும் ஸ்டைல், பந்து எழுந்து எகிறும் ஆஸ்திரேலியப் பிட்ச்சுகளுக்கு ஒத்துப்போகும். இதெல்லாம் கோஹ்லி-சாஸ்திரி ஜோடிக்குத் தெளிவாகவேண்டுமே! டெஸ்ட் கிரிக்கெட்டில் சாஹா ஆட முடியாத பட்சத்தில், ரிஷப் பந்த் விக்கெட் கீப்பராக இயங்குவார். இவரது கீப்பிங் தரம் ‘டாப்-க்ளாஸ்’ அல்ல – சாம்ஸன், சாஹா ஆகியோரோடு ஒப்பிடப்படுகையில். கோச் சாஸ்திரியின் பயிற்சியில், புத்திமதியில், இயற்கையாக ரிஷப்பிடம் இருந்த அதிரடி ஆட்டமும் மலையேறிவிட்டதுபோல் தோன்றுகிறது.

காயத்தினால் கடந்த வருடம் ஆடாதிருந்த ஆல்ரவுண்டர் ஹர்தீக் பாண்ட்யா, ஒரு-நாள் மற்றும் டி-20 அணிக்குத் திரும்பியிருக்கிறார். Welcome change. இவரோடு, மனீஷ் பாண்டே, ஷிகர் தவன், ஷ்ரேயஸ் ஐயர், கே.எல்.ராஹுல், மயங்க் அகர்வால், ரவீந்திர ஜடேஜா ஆகியோர் டி-20, ஒரு-நாள் அணி இரண்டிலும் இடம் பெற்றிருக்கின்றனர். இந்தியாவின் பேட்டிங்கிற்கு கோஹ்லியோடு, இவர்களின் திறனே ஆதாரம். அதைப்போலவே பௌலிங்கில், முகமது ஷமி, ஜஸ்ப்ரித் பும்ரா, நவ்தீப் செய்னி,  ஆகிய வேகப்பந்துவீச்சாளர்களும், யஜுவேந்திர சாஹல், வாஷிங்டன் சுந்தர் ஆகிய ஸ்பின்னர்களும். ஆல்ரவுண்டர் சுந்தரின் ‘off-spin’,  ‘பேட்டிங் பவர்ப்ளே’ யில் ஆஸ்திரேலிய முன்னணி பேட்ஸ்மன்களை அடக்க உபயோகமாக இருக்கும்.  சுந்தரின் பேட்டிங் ‘left-handed’, பௌலிங்  ’right-handed’ – சரியாகப் பயன்படுத்தப்படவேண்டும்.

வேகப்பந்து வீச்சாளர்
முகமது சிராஜ்

டெஸ்ட் போட்டிகளில்,  இந்தியாவின் பேட்டிங் செயல்பாடுகள்,  கோஹ்லியைத் தாண்டி, ரோஹித் ஷர்மா, கே.எல்.ராஹுல், மயங்க் அகர்வால், செத்தேஷ்வர் புஜாரா, அஜிங்க்யா ரஹானே, ஹனுமா விஹாரி ஆகியோரைத்தான் நம்பியிருக்கும். இளம் பேட்ஸ்மன் ஷுப்மன் கில் (Shubman Gill), ரிஷப் பந்த் ஆகியோருக்கும் ஆட வாய்ப்பு கிட்டலாம்.  பௌலிங்கில் அஷ்வின், குல்தீப் யாதவ், ஜடேஜா, பும்ரா (Bumrah), ஷமி, உமேஷ் யாதவ், செய்னி ஆகியோரோடு,  ஹைதராபாத்/ராயல் சேலஞ்சர்ஸ் பெங்களூரின் வேகப்பந்துவீச்சாளர் முகம்மது சிராஜும் (Mohammad Siraj) டெஸ்ட் அணியில் முதன்முறையாக சேர்க்கப்பட்டுள்ளார்.  வலிமையான ஆஸ்திரேலிய பேட்ஸ்மன்களுக்கு இவர்களது பௌலிங் நெருக்கடி தருமா? பெரும் கேள்வி.

டெஸ்ட் அணியில் இருக்கும் அஷ்வினைத் தவிர, இந்தியாவுக்காக ஆட இரண்டு தமிழர்கள் – வாஷிங்டன் சுந்தர் மற்றும் டி.நடராஜன் தேர்ந்தெடுக்கப்பட்டுள்ளனர். ஐபிஎல்-இல் சிறப்பாக ஆடிய இருவரும் டி-20 பங்களிப்புக்காக மட்டுமே இந்திய அணியில் சேர்க்கப்பட்டுள்ளனர். இந்தியா ஜெர்ஸியில் முதன்முறையாக ஆடப்போகும் சேலத்தின் நடராஜனுக்கு முற்றிலும் புதிய அனுபவம்! ஆஸ்திரேலியாவில் இவர்களின் கதை எப்படிச் செல்லுமோ பொறுத்திருந்துதான் பார்க்கவேண்டும்.

**

ஐபிஎல் : பத்து பரவச வருடங்கள்

2008-ல் இந்திய கிரிக்கெட் வாரியத்தினால் லலித் மோதியின் தலைமையில் துவங்கப்பட்ட சர்வதேச டி-20 க்ரிக்கெட் மேலாவான (Mela) ‘இந்தியன் ப்ரிமியர் லீக்’ எனப்படும் ஐபிஎல் (IPL), அபாரப் புகழடைந்து முன்னேறி இந்த வருடம் 10-ஆவது சீஸனில் காலடி எடுத்துவைக்கிறது. சச்சின் டெண்டுல்கர், வீரேந்தர் சேஹ்வாக், எம்.எஸ்.தோனி, சௌரவ் கங்குலி, ராஹுல் த்ராவிட், அனில் கும்ப்ளே, ரிக்கி பாண்ட்டிங், ஷோயப் அக்தர், ஜெயசூரியா, முரளீதரன், சங்கக்காரா, மெக்கல்லம், க்றிஸ் கேல்(Chris Gayle), டி வில்லியர்ஸ் (AB de Villiers) என உலகப்புகழ்பெற்ற க்ரிக்கெட் ஜாம்பவான்கள் விளையாடிய முதல் சீஸன்! அதன் பிறகு எத்தனையோ வீரர்கள் வந்தார்கள், சென்றார்கள். இந்தியாவுக்குள்ளும், வெளியேயும் எண்ணற்ற க்ரிக்கெட் ரசிகர்களுக்கு ஒவ்வொரு வருடமும் இரண்டு மாதம் க்ரிக்கெட் சாகஸம் எனும் மிதமிஞ்சிய போதை உலகம் இந்த ஐபிஎல். இதற்குப்போட்டியாகவோ, பொறாமைகொண்டோ, எங்கெங்கோ என்னென்னமோ பேரில் டி-20 தொடர்களை ஆரம்பித்துப் பார்த்தார்கள். ஆனால் புகழில் எதுவும் ஐபிஎல் முன் நிற்கமுடியுமா என்ன !

முதல் சீஸனில் ஆடியவர்களில் பெரும்பாலானோர் இப்போது ஓய்வுபெற்றுவிட்டார்கள். சிலர் பயிற்சியாளர்களாகவும், சிலர் வர்ணனையாளர்களாகவும் மாறி ஐபிஎல் உலகை விடாது சுற்றிச்சுற்றி வந்துகொண்டிருக்கிறார்கள். முதல் சீஸனில் ஆடியவர்களில் க்றிஸ் கேல், தோனி மற்றும் டி வில்லியர்ஸ் மட்டுமே இன்னும் மைதானத்தில் எஞ்சியிருக்கும் ஸ்டார் வீரர்கள். கேப்டனாக அல்லாமல் சாதாரண ஆட்டக்காரராக புனே அணிக்காக இந்தமுறை ஆடவிருக்கிறார் இந்திய ஒரு-நாள் மற்றும் டி-20 கேப்டன் மகேந்திர சிங் தோனி.

இன்று (05-04-2017) ஹைதராபாதில் தொடங்கவிருக்கும் 10-ஆவது ஐபிஎல் சீஸனின் முதல் போட்டியில், கடந்த வருட சேம்ப்பியனான சன் ரைசர்ஸ் ஹைதராபாத் (SRH), ராயல் சேலஞ்சர்ஸ் பெங்களுருவுடன் (RCB) மோதுகிறது. காயம் காரணமாக பெங்களூரு கேப்டன் விராட் கோஹ்லி இரண்டு வாரங்களுக்கு ஆடமாட்டார் எனத் தெரிகிறது. முதல் மேட்ச்சில் அந்த அணிக்கு, ஆஸ்திரேலியாவின் ஷேன் வாட்ஸன் கேப்டனாக ஆடுகிறார்.

இந்த ஐபிஎல் சீஸன் ஆரம்பிக்குமுன்னேயே காயப் பட்டியல் என்னவோ நீண்டுகிடக்கிறது! பெங்களூர் அணியில் கோஹ்லியோடு, அதிரடி ஆட்டக்காரரான டி வில்லியர்ஸும் முதல் மேட்ச்சில் ஆட மாட்டார் எனத் தெரிகிறது. காயம் காரணமாக கே.எல்.ராஹுல், சர்ஃப்ராஸ் கான் ஆகியோரும் ஆடப்போவதில்லை. டெல்லி அணியில் தென்னாப்பிரிக்க வீரர்களான ஜே.பி. டூமினி (JP Duminy), க்விண்டன் டி காக் (Quinton de Cock) விலகிவிட்டார்கள். பஞ்சாப் அணியின் முரளி விஜய்யும், புனே அணியின் ரவி அஷ்வினும் காயம் காரணமாக இந்த வருடம் ஆடப்போவதில்லை. ஸ்மித்தை புதிய கேப்டனாகக் கொண்டு ஆடவிருக்கும் புனே, ஸ்டார் ஸ்பின்னர் அஷ்வின் இல்லாமல் தடுமாற வாய்ப்பதிகம். இப்படி வீரர்களின் காயங்கள் அணிகளின் சமநிலையை சீர்குலைத்துவைத்திருக்கின்றன. இதுவும் ஒருவகைக்கு நல்லதே எனத் தோன்றுகிறது. ஆடவாய்ப்பில்லாமல் இதுகாறும் பெஞ்சில் உட்கார்ந்து வேடிக்கைபார்த்த ரிசர்வ் வீரர்கள், மட்டையோடு மைதானத்தில் இறங்க வாய்ப்பு வந்திருக்கிறது.

2017 ஐபிஎல் ஏலத்தின்போது இரண்டு புதிய வீரர்கள் பார்வையாளர்களையும், ரசிகர்களையும் புருவங்களை உயர்த்தவைத்தார்கள். அவர்களில் ஒருவர் ஏழைக்குடும்பத்து இளைஞர், வேகப்பந்துவீச்சாளர் நடராஜன். யார்க்கர் ஸ்பெஷலிஸ்ட். சென்ற ஆண்டு துவக்கப்பட்ட ’தமிழ்நாடு ப்ரிமியர் லீக்’-இல், திண்டுக்கல் அணிக்காக ஆடி அதிரவைத்தவர். பஞ்சாப் அணியின் மெண்ட்டரான (Mentor) வீரேந்தர் சேஹ்வாகின் கவனத்தைக் கவர்ந்தார். விளைவு ? இந்தியவீரருக்கான இவ்வருட அதிகபட்சத் தொகையான ரூ.3 கோடியில் பஞ்சாப் அணி நடராஜனை வாங்கியுள்ளது. ‘’க்ரிக்கெட் இல்லையென்றால் என் அப்பாவைப்போல நானும் கூலிவேலைக்குப் போயிருப்பேன்’’ என்று நேர்காணலில் அடக்கமாகச் சொல்லிக் கண்கலங்கவைத்தார் நடராஜன். ஐபிஎல் எனும் ராட்சதக் களத்தில் எப்படி ஆடப்போகிறார் இவர் எனப் பார்க்க ரசிகர்கள் ஆவலாகிறார்கள். இதேபோன்ற இன்னுமொரு கதை ஹைதராபாதின் முகமது சிராஜ். வயதான ஆட்டோ ட்ரைவரின் மகன். இவரும் வேகப்பந்துவீச்சாளர்தான். சன் ரைசர்ஸ் ஹைதராபாத் இவரது திறமையில் நம்பிக்கை கொண்டு வாங்கியிருக்கிறது. இந்த இருவரையும் போலவே, இன்னும் மெருகூட்டப்படவேண்டிய வைரங்களை ஐபிஎல் இந்த வருடமும் கண்டெடுக்கக்கூடும். இந்திய நட்சத்திரங்களான அஜின்க்யா ரஹானே, ரவீந்திர ஜடேஜா, உமேஷ் யாதவ் ஆகியோரை ஐபிஎல்-தானே கண்டுபிடித்து வெளி உலகுக்குக் காட்டியது?

**