ஐபிஎல் – CSK & RR : மீண்ட சொர்கம் ?

இன்று (7-4-18) மும்பையில் கோலாகலமாகத் தொடங்குகிறது இந்த வருடத்தின் க்ரிக்கெட் விழா – ஐபிஎல். முதல் போட்டியில், மும்பை இண்டியன்ஸ் (MI) மற்றும் சென்னை சூப்பர் கிங்ஸ் (CSK) அணிகள் மோதக் காத்திருக்கின்றன.

சூதாட்டவெளியில் சிக்கியதால் தடை செய்யப்பட்டு, இரண்டு வருடங்களாக வெளியில் உட்கார்ந்திருந்த ராஜஸ்தான் ராயல்ஸ் அணியும்(RR), சென்னை சூப்பர் கிங்ஸ் அணியும் இந்த வருடம் மைதானத்துக்குள் நுழைகின்றன. போட்டிகள் அதகளமாக இருக்கும் என்பதில் சந்தேகமில்லை. ஒவ்வொரு வருடமும் ஐபிஎல் ஏலத்தின்போது, சீட்டுக்கட்டுகளைக் கலைத்து ஆளாளுக்குப் புதிதாகப் பகிர்வதுபோல, போனவருடத்து அணிகளின் வீரர்கள் அந்தந்த அணியிலிருந்து விடுவிக்கப்பட்டு ஏலத்தில் புதிதாக எடுக்கப்பட்டார்கள் (சில சீனியர் வீரர்களைத் தவிர்த்து). ஐபிஎல்-இன் எட்டு அணிகளும் தங்களுக்குத் தேவையான வீரர்களை எடுத்து, புதிய கட்டமைப்புடன் தங்கள் அணியை வைத்திருக்கின்றன.

பெரும்பாலான அணிகள், இந்தவருட ஏலத்தின்போது, குறிப்பாகத் தனக்கு வேண்டிய பௌலர்களை தேர்ந்தெடுப்பதில் நேரம் மற்றும் பணம் செலவழித்ததைக் காணமுடிந்தது. சரியான ஸ்பின் பௌலர்களைத் தங்கள் அணிக்கு வாங்குவதில், ஒவ்வொரு அணியின் பிரதிநிதிகளும் பேப்பரில் கூட்டல் கழித்தல் போட்டுக்கொண்டு ஏலமெடுத்தனர். இந்த வருடத்திய ஐபிஎல் ஏலத்தில் ரூ.11 கோடி, 12 கோடி எனப் பெற்ற கே.எல்.ராஹுல், மனிஷ் பாண்டே, ஜெயதேவ் உனாத்கட், பென் ஸ்டோக்ஸ் (Ben Stokes) போன்ற வீரர்கள் உண்டு. ஏகப்பட்ட பணத்தை விழுங்கிவிட்டு உட்கார்ந்திருக்கும் இந்த வீரர்கள், போட்டிகளில் உயர உயரப் பறப்பார்களா அல்லது காற்றுப்போன பலூனைப்போல கீழே சுருண்டு விழுவார்களா என்பதை வரவிருக்கும் நாட்கள் தெளிவாகச் சொல்லிவிடும்.

வனவாசத்திலிருந்து மீண்டு ஐபிஎல்-லுக்கு வந்திருக்கும் அணிகளான சென்னை சூப்பர் கிங்ஸ் மற்றும் ராஜஸ்தான் ராயல்ஸ் சாதித்துக்காட்டவேண்டும் எனத் துடித்துக்கொண்டிருக்கின்றன. சென்னை அணிக்கு வழக்கம்போல மகேந்திர சிங் தோனி கேப்டனாக நியமிக்கப்பட்டுள்ளார். ராஜஸ்தானுக்கு ஆஸ்திரேலியரான ஸ்டீவ் ஸ்மித் கேப்டனாக நியமிக்கப்பட்டிருந்தார். அவர் தென்னாப்பிரிக்காவுக்கெதிரான போட்டியில் பந்து சிதைப்பு சர்ச்சையில் மாட்டி ஆஸ்திரேலிய அணியிலிருந்தே நீக்கப்பட, ராஜஸ்தான் தலைமைப்பதவியும் கூடவே பறிபோனது. ராஜஸ்தான் அணிக்கு இப்போது இந்திய மிடில்-ஆர்டர் பேட்ஸ்மனான அஜின்க்யா ரஹானே கேப்டனாக அறிவிக்கப்பட்டுள்ளார். சென்னை சூப்பர் கிங்ஸ் மற்றும் ராஜஸ்தான் ராயல்ஸும் எத்தகைய வெற்றி தோல்விகளைப்பெறும் என்பதனை அந்தந்த அணிகள் ஒவ்வொரு மேட்ச்சிலும் இறக்கவிருக்கும் வீரர்களின் காம்பினேஷன் மற்றும் களவியூகம் முடிவுசெய்யும்.

ராஜஸ்தான் ராயல்ஸ் அணி எப்படி அமைந்திருக்கிறது? இந்த அணியின் பௌலிங் வலிமையானதாகத் தெரிவதால், முக்கிய போட்டிகளில் கேப்டன் ரஹானேயின் தலைபாரம் பாதியாகக் குறைந்துவிடும் வாய்ப்பு உண்டு. வேகப்பந்துவீச்சாளர்களாக ஜெயதேவ் உனாத்கட், தவல் குல்கர்னி, பென் ஸ்டோக்ஸ், துஷ்மந்தா சமீரா முன்னிலைப்படுத்தப்படலாம். இந்த அணிக்கு வாய்த்திருக்கும் ஸ்பின் பௌலிங் காம்பினேஷன்தான் ரஹானேக்கு மிகவும் கைகொடுக்கும் எனத் தோன்றுகிறது. மிகவும் சுவாரஸ்யமான சேர்ப்பு ஆஃப்கானிஸ்தானின் ஜஹீர் கான். 18 வயதான லெக்-ப்ரேக் பௌலர். இவரிடம் எதிரி விக்கெட்டுகள் வேகமாக சரியலாம். ப்ரஷாந்த் சோப்ரா, ஷ்ரேயஸ் கோபால், கே.கௌதம் போன்ற ஸ்பின்னர்களின் பலமும் கூடவே உண்டு.
இங்கிலாந்தின் இரண்டு குறிப்பிடத்தகுந்த ஆல்ரவுண்டர்கள் ராஜஸ்தானுக்கு விளையாடுகிறார்கள். ஒருவர் பென் ஸ்டோக்ஸ், நல்ல மிடில்-ஆர்டர் பேட்ஸ்மனும் கூட. இன்னொருவர் இன்னும் இங்கிலாந்து அணிக்கே ஆடாதவர்! என்னையும் எப்படி ஏலத்தில் கேட்டார்கள் என எனக்கே புரியவில்லை எனும் 22-வயதான ஆல்ரவுண்டர் ஜோஃப்ரா ஆர்ச்சர் (Jofra Archer). இங்கிலாந்தின் சிறப்புத் திறமையாக விமரிசகர்களால் கருதப்படும் இவரை, ராஜஸ்தான் ஆர்வமாய் வாங்கிப்போட்டிருக்கிறது. என்ன செய்யப்போகிறார் ஆர்ச்சர் ?

விக்கெட் கீப்பரான சஞ்சு சாம்ஸன், ராஹுல் த்ரிபாட்டி அல்லது ஜதின் சக்ஸேனாவோடு ராஜஸ்தானின் ஆட்டத்தைத் துவக்கலாம். ஸ்மித்திற்குப்பதிலாக சேர்க்கப்பட்டிருக்கும் ஹெண்ட்ரிக் க்ளாஸன் (Henrich Klassen) அணியின் இன்னொரு விக்கெட் கீப்பருமாவார். சாம்ஸனுடன் துவக்கத்தில் இறக்கப்படுவதற்கான வாய்ப்பு இவருக்கும் கிட்டலாம். மிடில் ஆர்டரில் கேப்டன் ரஹானே, ஜோஸ் பட்லர், ஸ்டோக்ஸ், ஸ்டூவர்ட் பின்னி ஆகியோர் வலுசேர்ப்பார்கள். லோயர் ஆர்டரில் ஜோஃப்ரா ஆர்ச்சரை வேகமாக அறிமுகப்படுத்துவார்கள் எனத் தோன்றுகிறது. இவருக்குப்பின் ஷ்ரேயஸ் கோபால் அல்லது கே.கௌதம் வருவார்கள் எனத் தோன்றுகிறது. சிறந்த பௌலர்கள் அணியில் இருப்பினும், அணியின் கேப்டனாக ரஹானேயின் களவியூகம் எப்படி ராஜஸ்தானின் வெற்றிக்கு ஒத்துப்போகும் என்பது கவனிக்கப்படவேண்டிய ஒன்று.

சென்னை சூப்பர் கிங்ஸ் அணியின் பேட்டிங் கடந்த வருடங்களில் காணப்பட்டதுபோல வலிமையானதுதானா என்பது பெரும் கேள்வி. துவக்க ஆட்டக்காரர்களாக முரளி விஜய், ஷேன் வாட்ஸன் அல்லது தூ ப்ளஸீ (Faf du Plessis) இறக்கப்படுவதற்கான வாய்ப்புகள் தெரிகின்றன. ஸ்டார் இடதுகை ஆட்டக்காரரான சுரேஷ் ரெய்னா 3-ஆம் இடத்திலும், அம்பத்தி ராயுடு அல்லது கேப்டன் தோனி 4-ஆவது, 5-ஆவது இடத்திலும் இறங்க வாய்ப்புள்ளது. 6-ஆவது 7-ஆவது இடங்களில் வருபவர்களுக்கு விளையாட இரண்டு மூன்று ஓவர்களே கிடைக்கும். ஆதலால் அவர்கள் பந்துகளை வீணாக்காது, வேகமாக அடித்து ஆடும் திறனுள்ளவர்களாக இருக்கவேண்டும். இந்த இடங்களில் இடம்பெறும் வீரர்களாக வெஸ்ட் இண்டீஸின் ஆல்ரவுண்டர் டுவேன் ப்ராவோ(Dwayne Bravo), ரவீந்திர ஜடேஜா அல்லது கேதார் ஜாதவ் இருக்கக்கூடும். வேகப்பந்துவீச்சுக்கு யார், யாரை நம்புவார் தோனி? இங்கிலாந்தின் மார்க் உட், டுவேன் ப்ராவோ மற்றும் ஷர்துல் டாக்குர் இந்த வேலையைச் செய்யலாம். மற்ற அணிகளோடு ஒப்பிடுகையில் சென்னையிடம் ஸ்பின்னர்கள் குறைவு. ரவீந்திர ஜடேஜா, மற்றும் தென்னாப்பிரிக்காவின் இம்ரான் தாஹிர் ஆகியோரின் திறனையே தோனி முக்கிய கட்டங்களில் நம்பவேண்டியிருக்கும். இவர்கள் அடிவாங்கினால், சென்னையும் வாங்கும்! போன வருடம் மும்பைக்கு விளையாடிய பழைய புலியான, ஆஃப் ஸ்பின்னர் ஹர்பஜன் சிங் அணியில் உண்டு. அஷ்வினை ஏலத்தில் எடுக்கமுடியாத சென்னை அணி, ஹர்பஜனிடமிருந்து அதிகம் எதிர்பார்க்கும். அவரை அடிக்கடி இறக்க முயற்சிக்கும். அது குறிப்பிடத்தகுந்த பலனைத் தருமா என்பதை ஏப்ரல், மே மாதங்கள் வெளிச்சத்துக்குக் கொண்டுவரும்.

சென்னையின் முதல் சவால் இன்றே மும்பையில் காத்திருக்கிறது. லோக்கல் ஹீரோக்களான மும்பை இண்டியன்ஸ் அணி, சென்னையின் மஞ்சள் ஜெர்ஸிகளுக்குக் கடும் சோதனையைக் கொடுக்கும். ரோஹித் ஷர்மா, கரன் போலார்ட், ஹர்திக் பாண்ட்யா, க்ருனால் பாண்ட்யா, பென் கட்டிங் (Ben Cutting) ஆகியோர் அணியின் பேட்டிங் பலம். பௌலிங்கில் ஜஸ்ப்ரித் பும்ரா, பேட் கம்மின்ஸ் (Pat Cummins), மெக்லெனெகன் (McClenagan), முஸ்தாஃபிசுர் ரஹ்மான் வேகப்பந்துவீச்சையும், க்ருனால் பாண்ட்யா, ஸ்ரீலங்காவின் அகிலா தனஞ்சயா, தென்னாப்பிரிக்காவின் ஜே.பி. டுமினி (JP Duminy) ஸ்பின்னையும் கவனித்துக்கொள்வார்கள். சென்னையைவிட மும்பை அணி குறிப்பாக பௌலிங்கில் வலிமையானதாய்த் தோன்றுகிறது. ஆனால் நடக்கப்போவது டி-20 மேட்ச். சில ஷாட்டுகளில், சில கேட்ச்சுகள், திடீர் விக்கெட்டுகளில் மேட்ச்சின் கதையே மாறிவிடும். ரோஹித்தா, தோனியா? நீலமா, மஞ்சளா ? இன்றைய இரவு சொல்லிவிடும் புதுக்கதையை.

**

ஐபிஎல் : பத்து பரவச வருடங்கள்

2008-ல் இந்திய கிரிக்கெட் வாரியத்தினால் லலித் மோதியின் தலைமையில் துவங்கப்பட்ட சர்வதேச டி-20 க்ரிக்கெட் மேலாவான (Mela) ‘இந்தியன் ப்ரிமியர் லீக்’ எனப்படும் ஐபிஎல் (IPL), அபாரப் புகழடைந்து முன்னேறி இந்த வருடம் 10-ஆவது சீஸனில் காலடி எடுத்துவைக்கிறது. சச்சின் டெண்டுல்கர், வீரேந்தர் சேஹ்வாக், எம்.எஸ்.தோனி, சௌரவ் கங்குலி, ராஹுல் த்ராவிட், அனில் கும்ப்ளே, ரிக்கி பாண்ட்டிங், ஷோயப் அக்தர், ஜெயசூரியா, முரளீதரன், சங்கக்காரா, மெக்கல்லம், க்றிஸ் கேல்(Chris Gayle), டி வில்லியர்ஸ் (AB de Villiers) என உலகப்புகழ்பெற்ற க்ரிக்கெட் ஜாம்பவான்கள் விளையாடிய முதல் சீஸன்! அதன் பிறகு எத்தனையோ வீரர்கள் வந்தார்கள், சென்றார்கள். இந்தியாவுக்குள்ளும், வெளியேயும் எண்ணற்ற க்ரிக்கெட் ரசிகர்களுக்கு ஒவ்வொரு வருடமும் இரண்டு மாதம் க்ரிக்கெட் சாகஸம் எனும் மிதமிஞ்சிய போதை உலகம் இந்த ஐபிஎல். இதற்குப்போட்டியாகவோ, பொறாமைகொண்டோ, எங்கெங்கோ என்னென்னமோ பேரில் டி-20 தொடர்களை ஆரம்பித்துப் பார்த்தார்கள். ஆனால் புகழில் எதுவும் ஐபிஎல் முன் நிற்கமுடியுமா என்ன !

முதல் சீஸனில் ஆடியவர்களில் பெரும்பாலானோர் இப்போது ஓய்வுபெற்றுவிட்டார்கள். சிலர் பயிற்சியாளர்களாகவும், சிலர் வர்ணனையாளர்களாகவும் மாறி ஐபிஎல் உலகை விடாது சுற்றிச்சுற்றி வந்துகொண்டிருக்கிறார்கள். முதல் சீஸனில் ஆடியவர்களில் க்றிஸ் கேல், தோனி மற்றும் டி வில்லியர்ஸ் மட்டுமே இன்னும் மைதானத்தில் எஞ்சியிருக்கும் ஸ்டார் வீரர்கள். கேப்டனாக அல்லாமல் சாதாரண ஆட்டக்காரராக புனே அணிக்காக இந்தமுறை ஆடவிருக்கிறார் இந்திய ஒரு-நாள் மற்றும் டி-20 கேப்டன் மகேந்திர சிங் தோனி.

இன்று (05-04-2017) ஹைதராபாதில் தொடங்கவிருக்கும் 10-ஆவது ஐபிஎல் சீஸனின் முதல் போட்டியில், கடந்த வருட சேம்ப்பியனான சன் ரைசர்ஸ் ஹைதராபாத் (SRH), ராயல் சேலஞ்சர்ஸ் பெங்களுருவுடன் (RCB) மோதுகிறது. காயம் காரணமாக பெங்களூரு கேப்டன் விராட் கோஹ்லி இரண்டு வாரங்களுக்கு ஆடமாட்டார் எனத் தெரிகிறது. முதல் மேட்ச்சில் அந்த அணிக்கு, ஆஸ்திரேலியாவின் ஷேன் வாட்ஸன் கேப்டனாக ஆடுகிறார்.

இந்த ஐபிஎல் சீஸன் ஆரம்பிக்குமுன்னேயே காயப் பட்டியல் என்னவோ நீண்டுகிடக்கிறது! பெங்களூர் அணியில் கோஹ்லியோடு, அதிரடி ஆட்டக்காரரான டி வில்லியர்ஸும் முதல் மேட்ச்சில் ஆட மாட்டார் எனத் தெரிகிறது. காயம் காரணமாக கே.எல்.ராஹுல், சர்ஃப்ராஸ் கான் ஆகியோரும் ஆடப்போவதில்லை. டெல்லி அணியில் தென்னாப்பிரிக்க வீரர்களான ஜே.பி. டூமினி (JP Duminy), க்விண்டன் டி காக் (Quinton de Cock) விலகிவிட்டார்கள். பஞ்சாப் அணியின் முரளி விஜய்யும், புனே அணியின் ரவி அஷ்வினும் காயம் காரணமாக இந்த வருடம் ஆடப்போவதில்லை. ஸ்மித்தை புதிய கேப்டனாகக் கொண்டு ஆடவிருக்கும் புனே, ஸ்டார் ஸ்பின்னர் அஷ்வின் இல்லாமல் தடுமாற வாய்ப்பதிகம். இப்படி வீரர்களின் காயங்கள் அணிகளின் சமநிலையை சீர்குலைத்துவைத்திருக்கின்றன. இதுவும் ஒருவகைக்கு நல்லதே எனத் தோன்றுகிறது. ஆடவாய்ப்பில்லாமல் இதுகாறும் பெஞ்சில் உட்கார்ந்து வேடிக்கைபார்த்த ரிசர்வ் வீரர்கள், மட்டையோடு மைதானத்தில் இறங்க வாய்ப்பு வந்திருக்கிறது.

2017 ஐபிஎல் ஏலத்தின்போது இரண்டு புதிய வீரர்கள் பார்வையாளர்களையும், ரசிகர்களையும் புருவங்களை உயர்த்தவைத்தார்கள். அவர்களில் ஒருவர் ஏழைக்குடும்பத்து இளைஞர், வேகப்பந்துவீச்சாளர் நடராஜன். யார்க்கர் ஸ்பெஷலிஸ்ட். சென்ற ஆண்டு துவக்கப்பட்ட ’தமிழ்நாடு ப்ரிமியர் லீக்’-இல், திண்டுக்கல் அணிக்காக ஆடி அதிரவைத்தவர். பஞ்சாப் அணியின் மெண்ட்டரான (Mentor) வீரேந்தர் சேஹ்வாகின் கவனத்தைக் கவர்ந்தார். விளைவு ? இந்தியவீரருக்கான இவ்வருட அதிகபட்சத் தொகையான ரூ.3 கோடியில் பஞ்சாப் அணி நடராஜனை வாங்கியுள்ளது. ‘’க்ரிக்கெட் இல்லையென்றால் என் அப்பாவைப்போல நானும் கூலிவேலைக்குப் போயிருப்பேன்’’ என்று நேர்காணலில் அடக்கமாகச் சொல்லிக் கண்கலங்கவைத்தார் நடராஜன். ஐபிஎல் எனும் ராட்சதக் களத்தில் எப்படி ஆடப்போகிறார் இவர் எனப் பார்க்க ரசிகர்கள் ஆவலாகிறார்கள். இதேபோன்ற இன்னுமொரு கதை ஹைதராபாதின் முகமது சிராஜ். வயதான ஆட்டோ ட்ரைவரின் மகன். இவரும் வேகப்பந்துவீச்சாளர்தான். சன் ரைசர்ஸ் ஹைதராபாத் இவரது திறமையில் நம்பிக்கை கொண்டு வாங்கியிருக்கிறது. இந்த இருவரையும் போலவே, இன்னும் மெருகூட்டப்படவேண்டிய வைரங்களை ஐபிஎல் இந்த வருடமும் கண்டெடுக்கக்கூடும். இந்திய நட்சத்திரங்களான அஜின்க்யா ரஹானே, ரவீந்திர ஜடேஜா, உமேஷ் யாதவ் ஆகியோரை ஐபிஎல்-தானே கண்டுபிடித்து வெளி உலகுக்குக் காட்டியது?

**

க்ரிக்கெட்: இந்திய வெற்றியில் யுவராஜ் – தோனி ஷோ !

ஒதிஷாவின் கட்டக்கில் (Cuttack) நேற்று (19-1-17) நடந்த இரண்டாவது ஒரு நாள் கிரிக்கெட் போட்டியில் யுவராஜ்-தோனி ஜோடியின் மறக்கமுடியாத மட்டையாட்டம், கடுமையாகப் போராடிய இங்கிலாந்துக்கெதிராக, இந்தியாவுக்குத் தொடர் வெற்றியைப் பெற்றுத் தந்தது.

முதலில் பேட் செய்த இந்தியா வழக்கம்போல் தடுமாறியது. ராஹுல், தவண், கோஹ்லி ஆகிய புலிகள் ஆட ஆரம்பிக்கும் முன்னரே, துல்லிய வேகம் காட்டிய இங்கிலாந்தின் க்றிஸ் வோக்ஸினால் (Chris Woakes) பெவிலியனுக்குத் திருப்பி அனுப்பப்பட்டனர். இந்தியா 25, மூணு விக்கெட் காலி! இந்த நேரத்தில், அந்தக் காலத்திய கனவு ஜோடி களத்தில் இறங்கியது. யுவராஜ் சிங்-எம்.எஸ்.தோனி! ரசிகர்களிடத்தில் அவ்வளவு நம்பிக்கை இல்லை. ஏனோதானோவென 30, 40 அடித்து இவர்களும் மூட்டை கட்டிவிடுவார்கள் என்கிற நினைப்புதான் மேலோங்கியிருந்தது. இந்தியா 300-ஐத் தொட்டுவிடுமா? தொட்டாலும் போதுமா இங்கிலாந்தை வீழ்த்த? விடைதெரியாக் கேள்விகள் காற்றில் மிதந்தன.

யுவராஜிற்கு இதுவே கடைசி சான்ஸ். இதில் அல்ப ஸ்கோரில் வீழ்ந்தால் அடுத்த மேட்ச்சில் இல்லை. இனி இந்திய அணிக்கு திரும்ப வாய்ப்பில்லை. வாழ்வா, சாவா? இன்று நான் என்ன செய்யப்போகிறேன்? பஞ்சாப் வீரரின் மூளை கதகதத்து விடை தேடியது. வழக்கத்துக்கு மாறாக ஜாக்ரதையான ஆட்டம். அடுத்த முனையிலோ, அதைவிட மிதமாகன ஆட்டத்தை வெளிப்படுத்தினார் முன்னாள் கேப்டன் தோனி. இங்கிலாந்தின் குஷி வெளிச்சம் காட்டியது: ஃபார்மில் இல்லாத இவர்கள் எந்த நிலையிலும் அவுட் ஆகிவிடுவார்கள் !

ஆனால், கட்டக்கின் மாலைப்பொழுது வேறொரு கதை எழுத ஆரம்பித்திருந்தது. காலம் யுவராஜ், தோனியை மீண்டும் திரைக்குக் கொண்டுவந்து காட்ட விரும்பியதுபோலும். அரைசதத்தை நிதானமாகக் கடந்த யுவராஜ், தன் வழக்கமான ஷாட்டுகளுக்குத் திரும்பினார். தோனியும் அவ்வப்போது விளாசிப் பார்த்தார். 30 டிகிரி மிதமான வெப்பத்தில், கட்டக் கூட்டம் கூல்ட்ரிங்ஸ், ஐஸ்க்ரீம் ஏந்தி உற்சாகமாகி, எதிர்பார்க்க ஆரம்பித்தது: பெரிசுகள் ரெண்டும் இன்னிக்கு ஏதோ செய்யப்போறதுகள் !

அதிரடிக்குத் திரும்பிய யுவராஜ் முன்னேறி, வெகுநாட்களுக்குப்பின் சதம் கண்டார். மேலே நிமிர்ந்து சிலநொடிகள் ஆகாசத்தைப் பார்த்தார். தோனி அருகில் வந்து தட்டிக்கொடுக்க, தன் மார்பில் டார்ஜான் போல பேட்டினால் குத்திப் பெருமைப்பட்டு க்ரீஸுக்குத் திரும்பினார் யுவராஜ். (கைதட்டிப் பாராட்ட அவரது இளம் மனைவி ஏனோ மைதானத்தில் இல்லை!) பழைய யுவராஜ் கம்பீரமாய் ப்ரசன்னமாகியிருக்க, இங்கிலாந்து திடுக்கிட்டது. இதுவரை பொறுமையாக ஆடிய தோனியும் தன் கைவரிசையைக் காட்ட ஆரம்பித்துவிட்டார். பௌலர்கள் வேகவேகமாக மாற்றப்பட்டனர். ஃபீல்டர்கள் இந்தக்கோடிக்கு அந்தக்கோடி எனப் பறந்தனர். பலனில்லை. பார்ட்னர்ஷிப் 200 ரன்களைக் கடந்து இங்கிலாந்தைக் கலவரமாக்கியது.

45-ஆவது ஓவரில் இந்தியா 300-ஐத் தாண்டி சீறியது. ப்ரமாதமாக ஆடிய யுவராஜ் 150 ரன்களில் அவுட்டானார். தோனி 134 ரன்கள் (6 சிக்ஸர்கள்) எடுத்து ஸ்கோரை வெகுவாக ஏற்றிவிட்டார். பிறகு வந்த கேதார் ஜாதவ் (22), அவுட் ஆகாமல் இருந்த ஹர்தீக் பாண்ட்யா(19), ரவீந்திர ஜடேஜா(16) என பௌண்டரி, சிக்ஸராகப் படபடக்க, இந்தியா சற்றும் எதிர்பாராவிதமாக ஸ்கோரை 381 க்கு 6 விக்கெட் என உயர்த்தி, ஆட்டத்தை முடித்துக்கொண்டது.

கட்டக்கின் பிட்ச் பேட்ஸ்மன்களின் சொர்க்கம். பௌலர்களின் நரகம். சிறிய மைதானமாதலால் இங்கிலாந்து சவாலை ஏற்று சிறப்பாக ஆடியது. துவக்க ஆட்டக்காரர் ஜேசன் ராய் (82), ஜோ ரூட் (54) மூலம் எகிற ஆரமபித்தது இங்கிலாந்து. ரன் சராசரியை 7-க்கு அருகில் ஆரம்பத்திலிருந்தே வைத்திருந்து போராடியது. இங்கிலாந்து கேப்டன் ஆய்ன் மார்கன் (Eoin Morgan) சிறப்பான எதிர்ப்பு ஆட்டத்தை வெளிப்படுத்தினார். அவ்வப்போது அவரிடமிருந்து ஆக்ரோஷமான ஷாட்டுகள் பௌண்டரி, சிக்ஸர் எனப் பதம் பார்த்தன. இங்கிலாந்தின் நம்பிக்கை வளர்ந்தது. ஆல்ரவுண்டர் மோயின் அலி தன் பங்கை சிறப்பாகச் செய்து ரன் வேகத்தை மேலேற்றினார். அவர் 55 ரன்னில் அவுட்டானதும் இங்கிலாந்து தடுமாற ஆரம்பித்தது. ஆயினும் மார்கன் நம்பிக்கை இழக்காது இந்திய பௌலர்களைத் தொடர்ந்து தாக்கினார். 82 பந்துகளில் சதம் விளாசிய இங்கிலாந்து கேப்டன் 49-ஆவது ஓவரில் ரன் –அவுட் ஆனார். லியாம் ப்ளன்கெட் ( Liam Plunkett) சிறப்பாக ஆடியும், டெத் ஓவர்களில் (death overs) பந்துவீசிய புவனேஷ்வர் குமாரும், ஜஸ்ப்ரீத் பும்ராவும் வெகு பிரயாசைப்பட்டு இங்கிலாந்தை இலக்கை நெருங்கவிடாமல் தடுத்துவிட்டனர். இறுதியில் கோஹ்லியின் இந்தியா 15 ரன் வித்தியாசத்தில் இங்கிலாந்தை தோற்கடித்து தொடரையும் கைப்பற்றியது. இடையிடையே நெருக்கடியில் இருந்த கட்டக் ரசிகர் கூட்டம், நிம்மதிப்பெருமூச்சு விட்டது !

இங்கிலாந்திடம் இந்திய பௌலர்கள் செம்மையாக அடிவாங்கிக்கொண்டிருந்தவேளையில், ரவீந்திர ஜடேஜா மிகவும் பிரமாதமாக வீசி 45 ரன் மட்டுமே கொடுத்து 1 விக்கெட் வீழ்த்தினார். அஷ்வின் 63 ரன் கொடுத்தாலும், 3 விக்கெட்டுகளை சாய்த்தார். புவனேஷ்வருக்கு ஒன்று; பும்ராவுக்கு இரண்டு விக்கெட்டுகள். இங்கிலாந்தின் தரப்பில் க்றிஸ் வோக்ஸ் 4 விக்கெட்டுகளை வீழ்த்தினார். மற்றவர்களை பெண்டெடுத்துவிட்டார்கள் இந்திய பேட்ஸ்மன்கள். யுவராஜ் எதிர்பார்த்தபடி ஆட்டநாயகனானார்.

கோஹ்லி & கோ., கல்கத்தாவில் தொடரின் இறுதி போட்டியை 22 ஜனவரியில் விளையாடவிருக்கிறது. கே.எல்.ராஹுல், ஷிகர் தவன் ஆகியோர் அங்கே ஏதேனும் செய்யும் உத்தேசமுண்டா ?

**

க்ரிக்கெட்: புனேயில் கோஹ்லி, கேதார் சரவெடி !

நேற்று (15-1-17), புனேயில் நடைபெற்ற முதல் ஒரு-நாள் க்ரிக்கெட் போட்டியில் விராட் கோஹ்லி, கேதார் ஜாதவ் ஆகியோரின் ரன் மழையால், இந்தியா பெரிய இலக்கைத் தகர்த்து வென்றது.

முதலில் பேட் செய்த இங்கிலாந்து அணியில் துவக்க வீரர் ஜேசன் ராய் அருமையாக ஆடி 36 பந்துகளில் அரைசதம் கடக்க இங்கிலாந்து குஷியானது. ’ஆடு மனமே ஆடு… இது பேட்டிங் பிட்ச்சுதான் ஆடு !’ என்று அதற்குள் பாட்டு கிளம்பியிருக்கவேண்டும். இந்தியாவின் பலம் எனக் கருதப்பட்ட அஷ்வின், ஜடேஜா ஸ்பின் ஜோடியை இங்கிலாந்தின் பேட்ஸ்மன்கள் அனாயாசமாக துவம்சம் செய்தார்கள். ஆனால் நன்றாக ஆடிக்கொண்டிருந்த ராய், ஜடேஜாவின் ஸ்பின் ஆகாத ஒரு நேர்ப்பந்தை தாக்க முன்னே பாய, பந்து டிமிக்கி கொடுத்து தோனியிடம் தஞ்சமாகி ஸ்டம்ப் செய்யவைத்தது. ராய் 73. முதலில் மெதுவாகத் துவங்கினாலும், ஜோ ரூட் ஸ்கோரை சீராக உயர்த்த ஆரம்பித்தார். சுவாரஸ்ய மிகுதியால், ஜஸ்ப்ரீத் பும்ராவின் பந்தை மிட்விக்கெட்டுக்குத் தூக்கப்போக, ஹர்தீக் பாண்ட்யாவின் அருமையான கேட்ச்சில் 78 ரன்னில் காலியானார். இந்திய பௌலர்கள் தடுமாறிக்கொண்டிருக்கையில், பாண்ட்யா மட்டும் சிறப்பாக வீசினார். கேப்டன் மார்கனையும், பட்லரையும் விரைவில் தூக்கி வீசி, இங்கிலாந்து மிடில் ஆர்டரைக் குலைத்தார். 300 க்குள் இங்கிலாந்தை நிறுத்திவிடலாம் என கோஹ்லி கணக்குப் போட்டுக்கொண்டிருந்த வேளையில் வந்து சேர்ந்தார் பென் ஸ்டோக்ஸ். வெங்கலக் கடையில் யானை புகுந்ததுபோல கிடுகிடுத்து 5 சிக்ஸர்களை விளாசி 40 பந்துகளில் 62 எடுத்தார். இங்கிலாந்து ஸ்கோர் 350-ஐ எட்டிவிட, கோஹ்லியின் முகத்தில் சிந்தனைக்கோடுகள்.

351-ஐத் துரத்த எத்தனித்த இந்தியாவின் ஆரம்பமே அபத்தம். துவக்க வீரர்கள் எப்போது வந்தார்கள், போனார்கள் என்றே தெரியவில்லை. கோஹ்லி 3-ஆம் நம்பரில் இறங்கி நிலைமையைச் சீர் செய்ய முனைந்தார். ஆனால், மறுபக்கம் பெரிசுகளான யுவராஜ் சிங்கும், தோனியும் அசட்டுத்தனமாக ஆடி அவுட்டாகிச் செல்வதை வேதனையுடன் பார்க்கவேண்டிவந்தது. இந்தியா சரிய, ஸ்கோர் 63. இழப்பு 4 விக்கெட்டுக்கள். ம்ஹூம்..! உருப்புடுகிற வழியாகத் தெரியவில்லை.

ஆனால் அடுத்து இறங்கிய கேதார் ஜாதவ் எதிர்பாராத வகையில், கோஹ்லியின் வெற்றி முனைப்புக்கு உறுதுணையாக ஆனது ஆச்சரியம். விராட் கோஹ்லி வேகம் காட்ட, கேதார் ஜாதவ் பொறுமையாக ஆடித் துணையிருப்பார் என நம்பிக்கை பிறந்த நிலையில், கேதார் தன் கேப்டனையும் அதிரடியில் மிஞ்சி புனே ரசிகர்களை ஆனந்தக் கூத்தாட வைத்தார். விராட்டும், கேதாரும் பட்டாசு கிளப்ப, இந்திய ஸ்கோர் சீறிப்பாய்ந்தது. இதை சற்றும் எதிர்பார்க்காத இங்கிலாந்து குழம்பிக் கிறுகிறுத்தது. 5-ஆவது விக்கெட்டிற்கு 200 ரன் அதிரடியாக சேர்க்கப்பட்டது. தன் 27-ஆவது சதத்தைக் கடந்து 122 ரன்(5 சிக்சர்கள்) எடுத்திருக்கையில், அசால்ட்டாக அடித்த ஒரு ஷாட் மிட்-ஆஃபில் லட்டு மாதிரி இறங்க, கேட்ச் கொடுத்து தலையைச் சிலுப்பிக்கொண்டு வெளியேறினார் இந்தியக் கேப்டன்.

இங்கிலாந்தின் நம்பிக்கை திரும்பிவரும்போல் இருந்தது. அடுத்துவந்த ஆல்ரவுண்டர் ஹர்தீக் பாண்ட்யா நிலைமையைப் புரிந்துகொண்டு நிதானமானார். எதிர்முனையில், கேதார் ஜாதவ் தன் புயல் சதத்தைப் பூர்த்தி செய்தார். ஆனால் காலில் ஏற்பட்ட சுளுக்கு அவரை நொண்டவைத்து நோகவைத்தது. ஓடுவதற்கு சிரமப்பட்டு பந்தை அவ்வபோது தூக்கி அடித்து ரன் சேர்த்தார். அப்படி ஒரு முயற்சியில் 120 ரன்னில்(4 சிக்சர்கள்) கேட்ச் கொடுத்து கேதார் அவுட் ஆனதும், இங்கிலாந்தின் முகம் மலர்ந்தது.

ஆனால் அசராத பாண்ட்யா, கழுகுபோல் மறுமுனையில் காத்திருந்தார். அவ்வப்போது பௌண்டரி விளாசி இந்தியாவை வெற்றி நோக்கி செலுத்துவதில் மும்முரமாயிருந்தார். இந்த நிலையில் ஜடேஜா ஒரு சாதாரணப்பந்திலேயே கேட்ச் ஆகி விழுந்தார். 7 விக்கெட்டுகள் காலி. அஷ்வின் மைதானத்தில் இறங்குகையில், ஜெயிக்க சொற்ப ரன்களே தேவைப்பட்டது. எனினும் க்ரிக்கெட்டில் ஒன்றையும் நம்பமுடியாதே என்கிற கவலை ரசிகர்களில், குறிப்பாகப் பெண்முகங்களில் படபடப்பாய்த் தெரிந்தது. அஷ்வினும் பாண்ட்யாவும், ரிஸ்க் எடுக்காமல் சிங்கில்களாகத் தட்டி இலக்கை நெருங்கிக்கொண்டிருந்தனர். 7 ரன் தான் தேவை என்கிற நிலையில் 48-ஆவது ஓவரின் கடைசி பந்தை திடீரென சிக்ஸருக்குத் தூக்கி ஆரவாரத்தை ஆரம்பித்துவைத்தார் பாண்ட்யா. அடுத்து வந்த 49-ஆவது பந்தின் முதல் பந்தை மொயின் அலி வீச, அஷ்வின் ’என்னாலும் முடியும் தம்பி!’ என்றார். பந்து உயர்ந்து ஸ்டேடியத்துக்குள் சீறியது; இந்தியா வென்றது.

மஹாராஷ்ட்ராவின் ரஞ்சி கேப்டன் கேதார் ஜாதவ், புனே ரசிகர்களோடு சேர்ந்து விளையாட்டைப் பார்த்துக்கொண்டிருந்த தன் வயசான பெற்றோர்முன் ஆட்ட நாயகன் விருதை வென்றது சந்தோஷம்.

விராட் கோஹ்லி இந்திய ஒரு-நாள் க்ரிக்கெட் அணிக்கு கேப்டனானபின் விளையாடிய முதல் போட்டியும் வெற்றியாக முடிந்தது. 2016-ல் ஆரம்பித்த கோஹ்லியின் சுக்ர திசை தொடர்கிறது எனத் தெரிகிறது !

**

கோஹ்லியின் கீழ் தோனி !

மகேந்திர சிங் தோனி கேப்டன் பொறுப்பைத் துறந்தபின், விராட் கோஹ்லி தலைமையில் இந்திய அணி பங்கேற்கும் முதல் ஒரு-நாள் தொடர் இன்று (15-01-2017) புனேயில் ஆரம்பமாகிறது. கடந்த மாதம் இந்தியாவிடம் டெஸ்ட் தொடரில் படுதோல்வி கண்ட இங்கிலாந்து எதிரணி; ஒரு-நாள் கிரிக்கெட் ஸ்பெஷலிஸ்ட் அய்ன் மார்கன் (Eoin Morgan) தலைமையில்.

இந்தியாவிற்கு இரண்டு கிரிக்கெட் கேப்டன்கள் இருப்பது பொருந்தி வரவில்லை. டெஸ்ட் கேப்டனான விராட் கோஹ்லியும் ஒரு-நாள் மற்றும் டி-20 அணிகளின் தலைமையை ஏற்கப் போதிய பக்குவம் அடைந்துவிட்டதால், நான் கேப்டன்சி பொறுப்பிலிருந்து விலகிக்கொண்டேன் என்றார் இந்தியாவின் முன்னாள் கேப்டன். தோனியின் இந்திய கிரிக்கெட் அணித் தலைமை சகாப்தம் இவ்வாறாக முடிவடைந்தது. இந்தியாவின் மறக்கமுடியாத, மக்கள் மனதில் இடம்பெற்ற கேப்டன் தோனி என்பதில் எந்த சந்தேகமும் யாருக்கும் இருக்கமுடியாது. அவரது தலைமைப்பண்புகளும், பக்குவமும், வெற்றி வியூகங்களும் வெகுநாட்களுக்கு கிரிக்கெட் ரசிகர்களால் ஸ்லாகிக்கப்படும்.

விராட் கோஹ்லியோ முற்றிலும் வித்தியாசமான மனிதர். தோனியிடம் காணப்பட்ட குளிர்ச்சியான சுபாவம் அரவே இல்லாதவர். ஆதலால் தோனியிலிருந்து வெகுவாக விலகிய பிம்பம் உடையவர். டெஸ்ட் கேப்டனாக அவரது உணர்ச்சிக்கொந்தளிப்புகள், வியூகங்கள், அணியைக் கையாளும் விதம், குறிப்பாக அனுபவமற்ற இளம் வீரர்களில் முகிழ்த்து நிற்கும் திறமையை ஊக்குவிக்கும் திறன் ஆகியவை ஏற்கனவே கிரிக்கெட் நிபுணர்கள், ரசிகர்களின் கவனத்துக்கு வந்துவிட்டவை. கூடவே, கடுமையான போட்டி மனப்பான்மை கொண்ட கோஹ்லி எந்த எதிரணியையும் வெகுவாக சோதிக்கும், திகைக்கவைக்கும் இயல்புகள் கொண்ட ஒரு கேப்டன். ஒரு-நாள் மற்றும் டி-20 வகைக்கிரிக்கெட்டில் அவரது கூரிய, ஆக்ரோஷத் தலைமைத் திறன் உன்னிப்பாகக் கவனிக்கப்படும்.

கோஹ்லிக்கு கொடுக்கப்பட்டிருக்கும் ஒரு-நாள் இந்திய அணி, திறமையான வீரர்களோடு சர்வதேச விளையாட்டுக்கு திரும்பிவரும் சில வீரர்களையும் கொண்டுள்ளது. குறிப்பாக மிடில் ஆர்டர் அதிரடி யுவராஜ் சிங். ரஞ்சி ஃபார்மை வைத்து சர்வதேசக் கிரிக்கெட்டில் ஒருவரின் விளையாட்டு எப்படி இருக்கும் என கணிப்பது அவ்வளவு எளிதானதல்ல. எப்படி இருப்பினும் கொஞ்சம் ரிஸ்க் எடுத்து கோஹ்லி யுவராஜை முதல் போட்டியில் ஆடவிடுவார் என எதிர்பார்க்கலாம். இதே போன்று ஷிகர் தவன், கே.எல்.ராஹுல்-உடன் துவக்க ஆட்டக்காரராக இறங்கவாய்ப்பு உள்ளது. முன்னால் கேப்டன் தோனி அனேகமாக நம்பர் 4-ல் கோஹ்லிக்கு அடுத்தபடியாக இறங்குவார் எனத் தோன்றுகிறது. தோனியின் அனுபவ பேட்டிங் பலம் சேர்க்கும். 5-ஆவதில் யுவராஜ் என்றால், 6-ஆவது இடம் மிகவும் முக்கியமானது. இந்த இடத்தில் மனீஷ் பாண்டே ஆடுவது அணிக்கு-ஒருவேளை விக்கெட்டுகளை இழந்து தடுமாறும் பட்சத்தில்- ஒரு ஸ்திரத்தன்மையைத் தரும். ஸ்பின் போடும் மிடில் ஆர்டர் பேட்ஸ்மனான கேதார் ஜாதவ் ஒருவேளை கோஹ்லியின் கணக்கில் நுழையக்கூடும். 7, 8, 9-ஆவது இடங்களில் ஹர்தீக் பாண்ட்யா, ரவீந்திர ஜடேஜா, அஷ்வின் இறங்குவதே உசிதம். ஜஸ்ப்ரீத் பும்ரா, உமேஷ் யாதவ் வேகப்பந்து வீச்சைக் கவனித்துக்கொள்வார்கள் என யூகிக்கவேண்டியிருக்கிறது.

யுவராஜ் சிங்கின் ஸ்பின் திறன் கோஹ்லிக்கு இந்தத் தொடரில் உதவலாம். டெஸ்ட் தொடரைப்போலவே, ஒரு-நாள், டி-20 போட்டிகளிலும் அஷ்வின் கோஹ்லியின் வெற்றி வியூகத்தில் முதலிடம் வகுப்பார் என்றே தெரிகிறது. அமித் மிஷ்ரா முதல் மேட்ச்சில் இருப்பாரா என்பது சந்தேகமே. இந்த ஒரு-நாள் அணியில் மிடில் ஆர்டர் பேட்ஸ்மன்கள் அஜின்க்யா ரஹானே, அம்பத்தி ராயுடு இல்லாதது ஆச்சரியம்.

கடந்த டெஸ்ட் தொடரில் இங்கிலாந்து இந்தியாவில் படுதோல்வி கண்டதால், இங்கிலாந்தின் ஒரு-நாள் கதையும் அதே கோட்டில் செல்லும் என எதிர்பார்ப்பது அசட்டுத்தனம். மார்கன் தலைமையில், ஜேசன் ராய், அலெக்ஸ் ஹேல்ஸ், ஜோ ரூட், பென் ஸ்டோக்ஸ் (Ben Stokes), பேர்ஸ்டோ (Jonny Bairstow), பட்லர் என பேட்டிங் ஆழம் நிறைந்த அணி இது. பயிற்சிப் போட்டியில் 93 அடித்த சாம் பில்லிங்ஸையும் (Sam Billings) இங்கே குறிப்பிடவேண்டும். ஸ்பின் ஆல்ரவுண்டர்களான மோயின் அலியும், ஆதில் ரஷீத்தும்(Adil Rashid) வேகபந்துவீச்சாளர்களுக்குத் துணைநின்று இந்திய பேட்ஸ்மன்களைத் திணற அடிக்க முயல்வார்கள். அவர்களது முயற்சிகள் எப்படி இருப்பினும், இங்கிலாந்து அணி இந்திய அணிக்கு முன், மிகவும் திறமையான ஃபீல்டிங் அணி என்பது உண்மை. இந்திய ஃபீல்டிங்கில் ரவீந்திர ஜடேஜா, மனீஷ் பாண்டே, ஹர்தீக் பாண்ட்யாவைத் தவிர்த்துக் குறிப்பிட்டு சொல்லும்படியாக யாரும் இல்லை. யுவராஜின் ஃபீல்டிங் காலம் மலையேறி வருடங்களாகிவிட்டது.

கேப்டனாகப் பொறுப்பேற்றபின், இந்தியாவிற்கான தன் முதல் ஒரு-நாள் தொடரைக் கைப்பற்ற கோஹ்லி நிறைய முனைவார். உழைக்கவேண்டிவரும். தோனி, யுவராஜ் போன்ற சீனியர்களின் ஒத்துழைப்பும் அவசியம். மொத்தத்தில், அணியில் மிகச்சரியான காம்பினேஷன் அமைப்பதிலேயே பாதி வெற்றி கைக்குள் வந்துவிடும் எனத் தோன்றுகிறது. வெற்றிமுகம் காண்பாரா விராட் கோஹ்லி?
**

க்ரிக்கெட்: இந்திய சுழலில் மூழ்கிய நியூஸிலாந்து

தொடரின் கடைசிப் போட்டிக்கான கும்ப்ளே-தோனியின் சுழல் வியூகம் தீபாவளியன்று (29-10-16), விசாகப்பட்டினத்தில் விஸ்வரூபமெடுத்தது. அமித் மிஷ்ரா & Co.- வின் அசுரத் தாக்குதல்களில் நிலைகுலைந்தது நியூஸிலாந்து.

முதலில் பேட் செய்த இந்தியா 280-க்குக் குறையாமல் எடுக்கும் என எதிர்பார்க்கப்பட்டவேளையில், அதனால் முடிந்தது 269. அத்திபூத்தாற்போல் பெரிய இன்னிங்ஸ் விளையாடும் ரோஹித் ஷர்மா 65 பந்துகளில் தீபாவளிப் பட்டாசாக வெடித்த 70 ரன்களே இந்தியாவின் டாப்-ஸ்கோர். கோஹ்லி 65, தோனி 41, கேதார் ஜாதவ் 39, அக்ஷர் பட்டேல் 24 ஆகியவை குறிப்பிடத் தகுந்த மற்ற ஸ்கோர்கள். ஸ்பின் எடுக்க ஆரம்பித்த விசாகப்பட்டினம் பிட்ச்சில் நியூஸிலாந்தின் சுழல்வீரர்களான மிட்ச்செல் சாண்ட்னரும், இஷ் சோடியும் நன்றாகத்தான் வீசினர். நியூஸிலாந்தின் ஃபீல்டிங் கூர்மையாக இருந்ததால் இந்திய பேட்டிங் மேலும் சாதிக்கமுடியவில்லை.

மேட்ச் மற்றும் தொடர் வெற்றிக்கான நியூஸிலாந்துக்கான இலக்கு 270. சுழலெடுக்கும் பிட்ச்சில் நியூஸிலாந்துக்கு இரண்டாவது பேட்டிங் செய்யவேண்டியிருந்தது. இதுவரை முதலில் பேட்டிங் செய்து ஓரளவு சமாளித்துவந்த நியூஸிலாந்தைக் கவனிக்க, சனி, அமித் மிஷ்ராவின் வடிவில் மைதானத்தில் வந்து இறங்கியிருந்தது. உமேஷ் யாதவிடம் முதல் ஓவரிலேயே பலியான மார்ட்டின் கப்ட்டிலுக்குப்பின், டாம் லேத்தம் கேப்டன் வில்லியம்சன் இணைந்தனர். நன்றாக விளையாட ஆரம்பித்த இருவரிடமும் இந்திய ஸ்பின் பௌலிங் வருவதற்குமுன் வேகமாக ஸ்கோர் செய்து ரன்னை உயர்த்திவிடவேண்டும் என்கிற பரபரப்பு காணப்பட்டது. ஆனால் 19 ரன்னில் ஜஸ்ப்ரித் பும்ராவிடம் வீழ்ந்தார் லேத்தம். இப்போது வில்லியம்சனுடம் சேர்ந்துகொண்டவர் ராஸ் டேலர். ஸ்கோர் சீராக உயர ஆரம்பித்தபோது தோனி அக்ஷர் பட்டேலிடம் பந்துகொடுத்து, ஸ்பின் வித்தையைத் தொடங்கிவைத்தார். 15-ஆவது ஓவரில் திடீரென பொறுமை இழந்த வில்லியம்சன், பட்டேலின் பந்து ஒன்றை அலாக்காகத் தூக்க, அது மைதானத்துக்கு வெளியே போகவேமாட்டேன் என்று அடம்பிடித்து, ஜாதவின் கையில் தஞ்சம் புகுந்தது. வில்லியம்சனின் விக்கெட் நியூஸிலாந்துக்கு சற்றே அதிர்ச்சி கொடுத்தது. ஸ்கோர் 3 விக்கெட்டுக்கு 63. அவ்வளவு மோசமில்லை.

இந்நிலையில், தன் துருப்புச்சீட்டான லெக்-ஸ்பின்னர் அமித் மிஷ்ராவை இறக்கிவிட்டார் தோனி. வியூகம் உடனே வேலைசெய்ய ஆரம்பித்தது. துல்லியமான சுழல்வீச்சில் மிஷ்ரா, மிடில்-ஆர்டரின் டேய்லர், வாட்லிங் என அடுத்தடுத்துத் தூக்கிக்கடாசினார். கதிகலங்கிய நியூஸிலாந்து அதிரடி கோரி ஆண்டர்சன், ஜேம்ஸ் நீஷம் ஆகியவர்களிடம் அதிகம் எதிர்பார்த்தது. ஆனால் ஆசையோ நிராசையானது. இந்தியாவுக்காக முதல் போட்டியில் ஆடும் ஸ்பின்னர் ஜயந்த் யாதவிடம் எல்பிடபிள்யூ ஆகி சரணடைந்தார் ஆண்டர்சன். அந்தப்பக்கத்தில் நீஷத்தைத் தன் கூர்ச்சுழலில் க்ளீன் –போல்ட் செய்து மிரட்டினார் மிஷ்ரா. ஸ்கோர் 63/3 என்பதிலிருந்து 74/7 எனப் பரிதாபமாகச் சரிய, இனி இந்திய ஸ்பின்னுக்கெதிராக ஆட்டம் சாத்தியம் இல்லை என்கிற நிதர்சனம் நியூஸிலாந்தை பயமாக பீடித்தது. பட்டேலிடம் பதற்றத்திலேயே சாண்ட்னர் விழுந்துவிட, அடுத்தடுத்து சௌதீ, சோடி என அலட்சியமாகச் சுருட்டிவிட்டார் மிஷ்ரா.ஆறே ஓவர்களில் 18 ரன் கொடுத்து 5 விக்கெட்டுகளைச் சாய்த்தார். 24 ஓவரிலேயே 79 ரன்களில் ஆல்-அவுட்டாகித் தோல்வி அடைந்தது நியூஸிலாந்து. 99 நிமிடங்களில் இன்னிங்ஸ் க்ளோஸ்! 190 என்கிற பெரிய ரன்வித்தியாசத்தில் போட்டியைக் கைப்பற்றியதில், இந்தியா 3-2 எனத் தொடரை வென்றது.

அபார லெக்-ஸ்பின் போட்டு அசத்திய அமித் மிஷ்ரா ஆட்ட நாயகன். இந்தியத் தொடர் வெற்றியில் முக்கிய பங்கிற்காக தொடர் நாயகனாகவும் தேர்ந்தெடுக்கப்பட்டார் அவர். இத்தொடரில், அக்ஷர் பட்டேல், கேதார் ஜாதவ் மற்றும் ஹர்தீக் பாண்ட்யா ஆகிய சின்னவர்களின் பங்களிப்பையும் மறுப்பதற்கில்லை.

விசாகப்பட்டினம் மேட்ச்சில் இன்னொரு சுவாரஸ்யம். பொதுவாக கிரிக்கெட் வீரர்கள் தங்களது பெயர் அல்லது குடும்பப்பெயரையே (family/surname) தங்கள் கிரிக்கெட் ஜெர்சியின் பின்பக்கத்தில் காண்பிப்பர். அதாவது தோனி, கோஹ்லி, யாதவ் எனக் குடும்பப்பெயர்கள் அல்லது அஷ்வின், விஜய், ரோஹித் என வீரர்களின் பெயர்களே சட்டையில் எழுதப்பட்டிருக்கும். ஆனால் நேற்றைய மேட்ச்சின் கதை வித்தியாசமானது. இந்திய வீரர்கள் தங்களது வெற்றிக்கு, பேர்புகழுக்குக் காரணமாகத் தங்களது தந்தைக்கு சமமாகவோ அல்லது அவர்களை விஞ்சியோகூடப் பங்களித்து, ஆனால் தலைகாட்டாது, பின்னணியில் மறைந்திருக்கும் தங்களது அன்னைகளை நினைவுகூர்ந்தனர். தங்களது நீலநிற இந்திய ஜெர்சியில், தங்களது தாயின் பெயருடன் மைதானத்தில் இறங்கி, பெற்றவளுக்கு மரியாதை காட்டினர். மகேந்திர சிங் தோனியின் சட்டையில் அவரது தாயின் பெயரான தேவகி, கோஹ்லியின் சட்டையில் அவரது அன்னையான சரோஜ், ரஹானேயின் சட்டையில் சுஜாதா, ரோஹித்தின் சட்டையில் பூர்ணிமா, பட்டேலின் சட்டையில் ப்ரீத்திபென் என்றும், இதுபோல் ஒவ்வொருவரும் தங்களது தாயின் பெயர்தாங்கி நாட்டிற்காக விளையாடியது பெருமிதமாக இருந்தது. ஒவ்வொரு மனிதனின் வாழ்விலும் அவனது தாயின் எழுதப்படாத, சொல்லவும்படாத தியாகக்கதை ஒன்று நிச்சயம் உள்ளது. அதனை மௌனமாகக் கூற முயற்சித்தது இந்த நிகழ்வு. தங்களது குழந்தைகளுக்காக வாழ்நாளெல்லாம் கடுமையாக உழைக்கும் இந்தியாவின் பாசமிகு அம்மாக்களுக்கு வீரர்களின் வந்தனம். ப்ரமாதம் !

**

மொஹாலியில் கோஹ்லி !

நேற்று(23-10-16) பஞ்சாபின் மொஹாலி மைதானத்தில் விராட் கோஹ்லி ஆடிய ஆட்டமிருக்கிறதே, அடடா! ரொம்ப நாளைக்கப்புறம் கொஞ்சம் ஃப்ரீயாக மட்டையைச் சுத்த விரும்பினார் போலும். விளைவு? 154 நாட் அவுட்! `இலக்கைத் துரத்த ஆரம்பித்துவிட்டால், கோஹ்லியை நிறுத்தமுடியாது`! இது வில்லியம்சனின் கமெண்ட்.

இந்தியாவுக்கு எதிரான 3-ஆவது ஒருநாள் கிரிக்கெட் போட்டியில், நியூஸிலாந்து முதலில் பேட் செய்தது. டாம் லேத்தம், ராஸ் டேய்லர், ஜிம் நீஷம், மாட் ஹென்ரி ஆகியோரின் திறமையான ஆட்டத்தினால், நியூஸிலாந்து முதன் முறையாக இத்தொடரில் 280-க்கு மேல் ஸ்கோர் செய்து அசத்தியது. இந்திய ஸ்பின்னர்கள், கேதார் ஜாதவ், அமித் மிஷ்ரா மற்றும் அக்‌ஷர் பட்டேல் நெருக்கடியாகப் பந்து வீசுகையில், நியூஸிலாந்து இந்தமுறையும் 250-ஐத் தொடாது என்றே தோன்றியது. ஆனால் 9-ஆவது விக்கெட்டிற்காக நீஷம்-ஹென்ரி ஜோடியின் பிரமாத பேட்டிங்கினால் நியூஸிலாந்து ஸ்கோர் 285 வரை வந்தது. இறுதியில் பௌலிங் செய்த உமேஷ் யாதவை அடித்து விளையாடி இருவரும் பழிதீர்த்துக்கொண்டனர். யாதவ் 3 விக்கெட் எடுத்தும் 75 ரன்கள் விட்டுக் கொடுக்கவேண்டியதாயிற்று. கேதார் ஜாதவுக்கு 5 ஓவர்கள் மட்டுமே கொடுக்கப்பட்டது. இருந்தும் 3 விக்கெட்டுகளை வீழ்த்தினார். மிஷ்ரா, பட்டேலின் சுழல்வீச்சு ரன் அதிகம் கசிந்துவிடாமல் தடுத்தது.

286 என்கிற இலக்கு இந்தியாவை ஆச்சரியப்படுத்தியது; சற்றே பயமுறுத்தியது. டெல்லியில் திணறியதுபோலவே, துவக்கவீரர்களான ரோஹித் ஷர்மாவும், அஜின்க்யா ரஹானேயும் நின்று ஆடமுடியவில்லை. மணீஷ் பாண்டேவுக்கு முன்னால் களமிறங்கிய தோனி, வெகுநாட்களுக்கப்புறம் பழைய தோனிபோல் விளையாடினார். கோஹ்லியுடன் சிறப்பான பார்ட்னர்ஷிப் அமைந்ததால் நியூஸிலாந்து பௌலர்கள் திணறினர். தோனி 80 ரன்கள் எடுத்தபின் தான் அவரை வெளியேற்ற நியூஸிலாந்தால் முடிந்தது. மறுமுனையில் அசத்திக்கொண்டிருந்தார் விராட் கோஹ்லி. மணீஷ் பாண்டே இறங்கியபின் மேலும் வேகம் காட்டினார் கோஹ்லி. ஒரு-நாள் போட்டிகளில் தனது 26-ஆவது சதத்தைப் பிடித்தபின், சூடு அதிகமாகியது. மைதானத்தில் ரசிகர்களின், குறிப்பாக கன்னத்தில் மூவண்ண முத்திரை இட்டுக்கொண்டு வந்திருந்த இளம் பஞ்சாபிப்பெண்களின் குதூகலம் உச்சத்தில் இருந்தது. நியூஸிலாந்தின் ட்ரெண்ட் போல்ட் வீசிய 48-ஆவது ஓவரில் ருத்ர தாண்டவம் ஆடிய கோஹ்லி, 3 பௌண்டரிகளை விளாசி, ஒரு சிக்ஸரையும் பறக்கவிட்டார். ஒரு ரன் வெற்றிக்குத் தேவைப்படுகையில், 49-ஆவது ஓவரின் 2-ஆவது பந்தை பௌண்டரிக்குத் தட்டிவிட்ட பாண்டே, இந்திய வெற்றியை உறுதி செய்தார்.

ஒரு வருஷம் கழித்து தோனி அடித்த முதல் அரைசதமாகும் இந்தப் போட்டியில் அவர் அடித்த 80. இந்தியா வெற்றி இலக்கை துரத்தும்போதெல்லாம் விராட் கோஹ்லி அருமையாக ஆடி இதுவரை 16 சதங்களை அடித்துள்ளார். துரத்தலில் அவரது ரன் சராசரி: 90.10. Truly masterclass.

இது ஒருபுறமிருக்க, நம்ப ரோஹித்துக்கு என்னதான் ஆயிற்று? அடுத்த மேட்ச்சிலாவது அவரது மட்டை பேசுமா?

ஒருநாள் கிரிக்கெட்: தர்மசாலாவில் இந்தியாவின் வெற்றி

நியூஸிலாந்துக்கு எதிரான டெஸ்ட் கிரிக்கெட் தொடரை 3-0 என்று விராட் கோஹ்லியின் தலைமையில் வென்ற இந்தியா, மகேந்திர சிங் தோனியின் தலைமையில் ஒரு-நாள் தொடரை அக்டோபர் 16-ல், ஹிமாச்சல் பிரதேஷின் தர்மசாலா மைதானத்தில் தொடங்கியது. டெஸ்ட் தொடரிலிருந்து மாறுபட்ட அணி, தோனிக்குக் கொடுக்கப்பட்டிருந்தது. இந்தியாவின் மேட்ச்-வின்னர் ரவிச்சந்திரன் அஷ்வின் அணியில் இல்லை. அவரோடு முகமது ஷமி, ரவீந்திர ஜடேஜா போன்ற முன்னணி வீரர்களும் ஓய்வுகொடுக்கப்பட்டனர். அவர்களின் இடத்தில் அமித் மிஷ்ரா, ஹர்திக் பாண்ட்யா மற்றும் அக்‌ஷர் பட்டேல் ஆகியோரை சேர்த்தது இந்திய கிரிக்கெட் தேர்வுக்குழு. ஹர்திக் பாண்ட்யா தன் முதல் ஒரு-நாள் மேட்ச்சை இந்தியாவுக்காக ஆடினார். அதிரடி சுரேஷ் ரெய்னா வைரல் ஜுரத்தில் போர்த்திக்கொண்டு படுத்துவிட்டதால், கேதார் ஜாதவ் (யாதவ் அல்ல, ஜாதவ்!) சேர்க்கப்பட்டார்.

அஷ்வினின் சூப்பர் சுழல் தாக்குதலுக்கு ஈடுகொடுக்கமுடியாமல் டெஸ்ட் தொடரில் மூச்சுத் திணறிய நியூஸிலாந்து, ஒரு-நாள் தொடரில் சிறப்பான ஆட்டத்தை வெளிப்படுத்தும் என இரு தரப்பிடமிருந்தும் எதிர்பார்க்கப்பட்டது. ஏனெனில், நியூஸிலாந்தின்` ஒரு-நாள், டி-20 போட்டி` செயல்பாடுகள் கடந்த ஒருவருடமாக மிகவும் சிறப்பாக அமைந்திருந்ததே காரணம். அப்போது நியூஸிலாந்தின் சூப்பர்ஸ்டார் ப்ரெண்டன் மெக்கல்லம் (Brendon McCullum) பேயடியாக எதிரி பௌலர்களை இஷ்டத்துக்கும் போட்டுத்தள்ளிக்கொண்டிருந்தார். ஆனால் அவர் இப்போது அணியில் இல்லை. இந்த சூழலில், தர்மசாலாவின் அழகுவண்ண மைதானத்தில் நியூஸிலாந்து காட்டிய ஆட்டம்தான் என்ன?

முதலில் பேட் செய்த நியூஸிலாந்து உற்சாகமாகத்தான் ஆரம்பித்தது. உமேஷ் யாதவ்வின் முதல் ஓவரில் கவனமாக இருந்த மார்ட்டின் கப்ட்டில் (Martin Guptill), இரண்டாவது ஓவரில் குஷியானார். பும்ரா வீசவேண்டியது இரண்டாவது ஓவர். ஆனால் இந்தியாவுக்காகத் தன் முதல் ஒரு-நாள் போட்டி விளையாடும் ஹர்தீக் பாண்ட்யாவிடம்(Hardik Pandya) அதைக் கொடுத்து நியூஸிலாந்தை `டீஸ்` பண்ணினார் கேப்டன் தோனி. ‘புதுப்பயல் வந்துருக்கான்.. பார்த்துறவேண்டியதுதான் ஒரு கை!’ – என விளாசிய கப்ட்டில், மூன்று பௌண்டரிகளை விறுவிறுவென அடித்தார். ஆனால் ஆஃப் ஸ்டம்ப்பிற்கு நேராகத் தோன்றி, உள் திரும்பி இறங்கிய ஒரு வேகப்பந்தில் கப்ட்டிலை அசரவைத்தார் பாண்ட்யா. காலை நகர்த்தாது ஆஃப் சைடில் கட் செய்த கப்ட்டிலை, வயிற்றோடு சேர்த்துப் பிடித்தார் இரண்டாவது ஸ்லிப்பிலிருந்த ரோஹித் ஷர்மா. ஷர்மாவுக்கு வயிற்றில் வலி. அவுட்டான கப்ட்டிலுக்கோ முகத்தில் கிலி! பாண்ட்யாவின் முதல் ஒரு-நாள் விக்கெட். அடுத்த பக்கத்தில் ஆடிய டாம் லேத்தம் (Tom Latham) பந்துகளைத் தேர்வு செய்து உஷாராக ஆடியதால், நியூஸிலாந்துக்கு நம்பிக்கை தந்தார்.
அருமையாக வீசிய உமேஷ் யாதவ், பெரிதும் எதிர்பார்க்கப்பட்ட கேப்டன் கேன் வில்லியம்சன் (Kane Willamson), முன்னாள் கேப்டன் ராஸ் டேய்லர்(Ross Taylor) இருவரையும் ஒருவர் பின் ஒருவராகத் தூக்கினார். ஹர்திக் பாண்ட்யா அவ்வப்போது தொளதொள பந்துகளைப் போட்டதால் ரன்களை விட்டுக்கொடுக்க நேர்ந்தது. ஆனால் தோனிக்கு அவர் மேல் அசராத நம்பிக்கை. தொடர்ந்தார். அடுத்து வந்த ஓவர்களில் அதிரடி ஆட்டக்காரரான கோரி ஆண்டர்சன்(Corey Anderson) மற்றும் லூக் ரோன்க்கி (Luke Ronchi) இருவரையும் அருமையான பந்துகளால் விழுங்கி ஏப்பம் விட்டார் பாண்ட்யா. ஆண்டர்சன் முன்னேறி விளாசிய பந்தை, ஆஞ்சனேயர் போல் ஆகாசத்தில் எழும்பி லபக்கினார்.. யாரப்பா இந்த சூப்பர்மேன்? ஓ, நம்ம உமேஷ் யாதவ்! இப்படியெல்லாம்கூட கேட்ச் பிடிப்பாரா இவரு! முதல் மேட்ச்சிலேயே 3 விக்கெட் அள்ளிய பாண்ட்யா, கேப்டன் தன் மேல் வைத்த நம்பிக்கை சரியானதுதான் என நிரூபித்தார்.

பௌலிங்கை இப்போது மாற்றிய தோனி, சுழல் வீரர்களான கேதார் ஜாதவ், அக்‌ஷர் பட்டேல், மற்றும் வேகப்பந்துவீச்சாளர் ஜஸ்ப்ரித் பும்ரா (Jasprit Bumrah) ஆகியோரைப் புகுத்த, நியூஸிலாந்திற்கு மேலும் சோதனை வளர்ந்தது. லேத்தமைத் தவிர வேறு எந்த மிடில் ஆர்டர் பேட்ஸ்மனும் இந்திய பௌலிங்கை சமாளிக்க முடியவில்லை. ஜாதவ்-வின் அடுத்தடுத்த பந்துகளில் நீஷம் மற்றும் சாண்ட்னரின் விக்கெட்டுகளைப் பறிகொடுத்த நியூஸிலாந்துக்கு விழி பிதுங்கியது. அமித் மிஷ்ராவின் லெக்-ஸ்பின்னை லேத்தம் மற்றும் டக் ப்ரேஸ்வெல் (Doug Bracewell) கவனமாக ஆடினார்கள். ப்ரேஸ்வெல்லைக் கேட்ச் கொடுக்கவைத்து மிஷ்ரா வெளியேற்றியபின், 10-ஆவது ஆட்டக்காரராக இறங்கினார் டிம் சௌதீ (Tim Southee). பேட்டிங் திறமைகொண்ட வேகப்பந்துவீரர். இறங்கிய உடனேயே தன் வேலையை ஆரம்பிக்க, பௌண்டரிகள், சிக்ஸர்கள் எனத் தூள் பறந்தது. நியூஸிலாந்து ரசிகர்கள் முகத்தில் பிரகாசம். ஒரு-நாள் போட்டியில் தன் முதல் அரைசதத்தை 40 பந்துகளில் கடந்தார் சௌதீ. டென்ஷனில் விளையாடிக்கொண்டிருந்த லேத்தமின் முகமும் மலர்ந்தது. ஆனால் 55 ரன்னில் சௌதீயையும், ஒரே ரன்னில் இஷ் சோதியையும் மிஷ்ரா வெளியேற்றினார். லேத்தம் திறமையான ஆட்டத்தில் 79 ரன்னெடுத்து நாட்-அவுட்டாக நிற்க, 190 ரன்களில் தன் சோகக்கதையை 44-ஆவது ஓவரிலேயே முடித்துக்கொண்டது நியூஸிலாந்து.

ஜெயிப்பதற்கு 191 என்கிற இலக்கு இந்தியாவுக்கு ஒன்றுமில்லை. ரோஹித் ஷர்மாவும், அஜின்க்யா ரஹானேயும் ஆட்டத்தைத் துவக்கினார்கள். ஆனால் இருவரும் ப்ரேஸ்வெல் மற்றும் நீஷம் ஆகியோரின் துல்லிய வேகத்துக்கு பலியாகினர். 3-ஆம் நம்பரில் இறங்கிய துணைக்கேப்டன் விராட் கோஹ்லி நியூஸிலாந்து பௌலிங்கை அலட்சியமாக எதிர்கொண்டார். அவர் ஒருபக்கம் ஷாட்டுகளை விளையாட, மறுபக்கத்தில் அதிகம் நிலைக்கமுடியாத மணிஷ் பாண்டேயும் , தோனியும் பெவிலியன் திரும்பினர். கேதார் ஜாதவ்வின் துணையோடு 32-ஆவது ஓவரிலேயே இலக்கை எட்டினார் கோஹ்லி. கோஹ்லியின் அருமையான இன்னிங்ஸில் 9 பௌண்டரிகள் மற்றும் ஒரு சிக்ஸர், தர்மசாலாவில் நிறையக் குவிந்திருந்த இளம் ரசிகர்களை சீட்டிலிருந்து எகிறவைத்தன.

ஆட்டநாயகனாகத் தேர்வானார் ஆல்ரவுண்டர் ஹர்தீக் பாண்ட்யா. தொடரின் முதல் மேட்ச் எளிதாகக் கைக்கு வந்ததில் தோனிக்கு ஒரே சந்தோஷம். 20-ஆம் தேதியில் அடுத்த போட்டிக்காக ஆவலாகிறது டெல்லியின் ஃபெரோஸ் ஷா கோட்லா மைதானம். கோஹ்லியின் சொந்த ஊர். கோட்லாவில் ஏதாவது ஸ்பெஷலாக செய்யும் உத்தேசமுண்டா கோஹ்லிஜி?

**

உலகக்கோப்பை : இந்தியாவை நிறுத்திய வெஸ்ட் இண்டீஸ் !

இந்தியாவின் உலகக்கோப்பைக் கனவை வெஸ்ட் இண்டீஸ் நேற்று (31-3-16) தகர்த்துவிட்டது. மும்பையில் நடந்த கடுமையான செமி ஃபைனல் போட்டியில் இந்தியாவின் 192-என்கிற ஸ்கோரை அனாயாசமாகத் தாண்டி, ஃபைனலில் நுழைந்தது வெஸ்ட் இண்டீஸ்.

க்றிஸ் கேய்ல் vs விராட் கோஹ்லி, அஷ்வின் vs சாமுவேல் பத்ரீ என்றெல்லாம் ரசிகர்கள் கற்பனை செய்திருந்தார்கள். கதை எப்படியோ ஆரம்பித்து எங்கேயோ முடிந்தது. Typical T-20 !

முக்கியமான டாஸைத் தோற்ற இந்தியா, முதல் பேட்டிங் செய்யவேண்டியிருந்தது. ஆனால் ஆச்சரியமாக ரோஹித் ஷர்மா விழித்திருந்தார். முதல் 6 ஓவர் பவர்-ப்ளேயில் ரோஹித்தின் அட்டகாசம்! 3 பௌண்டரி, 3 சிக்ஸர். 31 பந்துகளில் 43 ரன்கள்.சாமுவேல் பத்ரீயிடம் ரோஹித் விழுந்தவுடன் இறங்கினார் கோஹ்லி. கோஹ்லியும், ஷிகர் தவனுக்கு பதிலாக இறங்கியிருந்த ரஹானேயும் பொறுப்புடன் ஓடி, அவ்வபோது பௌண்டரி ஆடி ரன் சேர்த்தனர். ர்ஹானே 40 ரன்களில் அவுட்டாக, தோனி இறங்கி கோஹ்லியுடன் சேர்ந்து ஆடினார். டெத்-ஓவர்களில்(death-overs) கோஹ்லி 16 பந்துகளில் 45 ரன் விளாசினார். 47 பந்துகளில் 89 நாட்-அவுட். ஒரே ஒரு சிக்ஸர்! Masterclass. இந்தியா 192-ஐத் தொட்டது.

பொதுவாக ரன்கள் குவியும் மும்பை மைதானத்தில் 192 என்பது நல்லதொரு ஸ்கோர்தான். ஆனால் இந்தியாவின் பௌலிங்கும் ஃபீல்டிங்கும் மிகக் கறாராக இருந்திருக்கவேண்டும். அதிரடி வெஸ்ட் இண்டீஸை அடக்குவது கஷ்டம். க்றிஸ் கேய்லை குறிவைத்த இந்தியா இரண்டாவது ஓவரில் அவரைச் சாய்த்தது. ஜஸ்பிரித் பும்ரா தன் யார்க்கரால் அவரை க்ளீன்-போல்ட்(clean-bowled) செய்து ரசிகர்களைக் குதிக்க வைத்தார். ஆனால் இன்னொரு ஓபனரான சார்ல்ஸ் ஜான்சன் சிறப்பாக ஆடினார். 3-ஆவதாக இறங்கிய சாமுவேல்ஸ் விரைவிலேயே வீழ்ந்தார். இந்தியர்களின் சந்தோஷம் நீடிக்கவில்லை. அடுத்து வந்தவர்தான் இந்தியாவுக்கு சனியனாக மாறினார். லெண்டல் சிம்மன்ஸ் (Lendl Simmons). ஏற்கனவே மும்பை இந்தியன்ஸ் அணிக்காக இதே பிட்ச்சில் ஐபிஎல். ஆடிய அனுபவம் உண்டு. மும்பை என்றால் அவருக்கு வெல்லக்கட்டி! கேய்ல் செய்யவேண்டிய வேலையைத் தன் பொறுப்பில் எடுத்துக்கொண்டார் இந்திய பௌலிங்கை துவம்சம் செய்ய ஆரம்பித்தார் சிம்மன்ஸ். சார்ல்ஸ் ஜான்சனும் சேர்ந்துகொண்டார். Effortless pulls and fiery hooks. பௌண்டரிகளும், சிக்ஸர்களும் பறக்க ஆரம்பித்தன. இந்திய ஃபீல்டர்கள் தடுமாறினர். தோனியின் தலைவேதனை ஆரம்பித்தது.

இக்கட்டான இந்த நிலையில் அஷ்வின் பந்துபோட்டார். அவருடைய முதல் ஓவரிலேயே சிம்மன்ஸ் விழுந்திருக்கவேண்டும். ஆஃப் சைடில் ப்ரமாதமாக லோ-கேட்ச் பிடித்தார் பும்ரா. அம்பயரின் செக்-அப்பில் அது நோ-பால் எனத் தெரிந்தது! ஸ்பின்னரான அஷ்வினிடமிருந்து மேட்ச்சின் ஒரு முக்கியமான தருணத்தில் விக்கெட் எடுத்த பந்து நோ-பால்! தோனியின் முகத்தில் ஈயாடவில்லை. அப்போதே பிடித்தது அனர்த்தம். துரதிருஷ்டத்தின் கோணல் வாய், இந்தியாவைப் பார்த்துச் சிரித்தது.

ஆஷிஷ் நேஹ்ரா மட்டுமே சிக்கனமாக பந்துபோட்டார். கோஹ்லிக்கு ஓவர் கிடைக்க முதல் பந்திலேயே ஜான்சனை வீழ்த்தினார்! மிடில்-ஓவர்களை வீசிய ஜடேஜா செம்மையாக அடி வாங்கினார். ஹர்தீக் பாண்ட்யா ஷார்ட் பிட்ச் பந்துகளைத் தெளித்தார். சிம்மன்ஸும் ஆந்த்ரே ரஸ்ஸலும் அட்டகாசமாக ஆடினர். ஸ்கோர் சீறியது. பாண்ட்யாவின் கடைசி ஒவரின்(15), கடைசி பந்தில் அஷ்வினின் ஷார்ப் கேட்ச். விக்கெட் விழுந்தது – அதாவது, அப்படி நினைத்து ரசிகர்கள் எம்பிக் குதித்தார்கள். ஆனால் அதுவும் ஒரு நோ-பால்! செமி-ஃபைனலில் பௌலிங் இப்படி இருந்தால், நாம் ஃபைனலுக்குப் போக ஆசைப்படலாமா?

நம்பிக்கை போய்விட்டது. வெஸ்ட் இண்டீஸ் ஜெயிக்க 20 ரன்கள். வேறுவழியின்றி, 19 ஓவரை ஜடேஜாவிடம் தோனி கொடுக்க, சிம்மன்ஸ், ரஸ்ஸல் ஆவேசம் காட்டினர். கடைசி ஓவர். 8 ரன்கள். அஷ்வினுக்கு ஓவர் தரப்பட்டிருக்க வேண்டும். ஆச்சரியமும் அதிர்ச்சியுமாக கோஹ்லியிடம் தந்தார் தோனி. அவர் என்ன செய்வார், பாவம்! அவர் ஒரு ரெகுலர் பௌலர் கூட இல்லை. விண்ணை முட்டிய சிக்ஸரில், இந்தியாவின் கதையை முடித்தார் ரஸ்ஸல். 7 பௌண்டரி, 5 சிக்ஸர்களுடன் நாட்-அவுட்டாக இருந்தார் சிம்மன்ஸ். ரஸ்ஸல் 20 பந்துகளில் 43 நாட்-அவுட். India – simply outplayed and outsmarted by the West Indies.

ஏப்ரல் 3-ஆம் தேதி கல்கத்தா ஃபைனலில், இங்கிலாந்தை சந்திக்கிறது வெஸ்ட் இண்டீஸ். வெஸ்ட் இண்டீஸ் வெற்றி பெற்றால், வெஸ்ட் இண்டீஸ் கிரிக்கெட் அணியை உருவாக்கிய, கிரிக்கெட்டை உயிர்நாதமாகக் கொண்ட சிறு கரீபிய நாடுகள்(Carribean countries) குதூகலித்து மகிழும். எண்ணற்ற வெஸ்ட் இண்டீஸ் ரசிகர்கள் பீர் அடிப்பார்கள். பாடுவார்கள். ஆடி மகிழ்வார்கள். வாழ்த்துவோம்!

**

உலகக்கோப்பை கிரிக்கெட்: ஆஸ்திரேலியாவை வீழ்த்தி அரையிறுதியில் இந்தியா

பஞ்சாபின் மொஹாலி நகரில் நேற்று இரவு (27-3-16) நடந்த கத்திமுனை கிரிக்கெட் போட்டியில், இந்தியா ஆஸ்திரேலியாவைத் தகர்த்தது. டி-20 உலகக்கோப்பை செமி-ஃபைனலில் நுழைந்தது. மீண்டும், விராட் கோஹ்லியின் இணையற்ற ஆட்டத்திறன், இந்தியாவின் மகத்தான வெற்றிக்கு வித்திட்டது.

ஆஸ்திரேலியா முதல் பேட்டிங் செய்யவந்து அதிரடியாக 51 ரன்களை 4 ஓவர்களிலேயே எடுத்துவிட்டது. ரவி அஷ்வின், ஜஸ்ப்ரித் பும்ரா போன்ற சாதுர்யமான பௌலர்களை ஆஸ்திரேலியாவின் துவக்க ஆட்டக்காரர்கள் குறிவைத்துத் தாக்கினர். அஷ்வினின் முதல் ஓவரிலேயே 2 சிக்ஸர்களைப் பறக்க விட்டார் ஆரோன் ஃபின்ச்(Aaron Finch). 5-ஆவது ஓவரில். நேஹ்ராவிடம் உஸ்மான் கவாஜா(Usman Khawaja) அவுட்டானார். ஃபின்ச் தொடர்ந்து விளாச, திருப்பிக்கொண்டுவரப்பட்ட அஷ்வின், டேவிட் வார்னரை வெளியே இழுத்து தோனியிடம் ஸ்டம்ப்ட் ஆகவைத்தார். திடீரென யுவராஜ் சிங்கை பௌலிங்கில் நுழைத்தார் தோனி. பலன் கிடைத்தது. முதல் பந்திலேயே கேப்டன் ஸ்டீவ் ஸ்மித்தை தோனியிடம் கேட்ச் கொடுக்கவைத்துக் காலி செய்தார் யுவராஜ். ஆனால், பொதுவாக ஸ்பின்னர்களைத் தாக்கி ரன்னெடுக்க வேண்டும் என்கிற ஆஸ்திரேலிய விளையாட்டு வியூகத்தை (gameplan) உணர்ந்தார் தோனி. அஷ்வினுக்கு 2 ஓவர்களுக்கு மேல் தரவில்லை. ஜடேஜா, யுவராஜுக்கும் தலா 3 ஓவர்களே தந்தார். ரெய்னாவிடம் பந்தைக் கொடுக்கவேயில்லை!

சாமர்த்தியமாக தன் வேகப்பந்துவீச்சாளர்களைச் சுழற்றினார் இந்தியக் கேப்டன். திரும்பி வந்த பும்ராவும், ஹர்தீக் பாண்ட்யாவும், தங்கள் சாகஸங்களினால் பௌண்டரிகள் பறக்காமல் பார்த்துக்கொண்டனர். பேட்ஸ்மன்கள் ஓடி, ஓடியே ரன் சேர்க்கவேண்டிய நிர்ப்பந்தம். ஃபின்ச் 43 ரன்னில் விழுந்தவுடன் வந்த க்ளென் மேக்ஸ்வெல் (Glen Maxwell), நன்றாக ஆடினார். அவரைத் தன் மந்தவேகப் பந்தொன்றில் ஏமாற்றி, பெயில்களை முத்தமிட்டார் பும்ரா. மேக்ஸ்வெல்லின் வீழ்ச்சிக்குப்பின் பாண்ட்யா, நேஹ்ராவிடம் ரன் எடுக்க ஆஸ்திரேலியர்கள் சிரமப்பட்டனர். ஒரு சமயத்தில் ஆஸ்திரேலியா 180-க்குக் குறையாமல் ரன் குவிக்கும் என எதிர்பார்க்கப்பட்டது. இந்தியாவின் கெடுபிடி பௌலிங்கிற்கு முன்னால் ஆஸ்திரேலியாவின் பேட்டிங் வியூகம் வீழ்ந்தது. 160 ரன்களில் ஆஸ்திரேலியாவுக்கு முற்றுப்புள்ளி வைக்கப்பட்டது.

மொஹாலியில், பந்து அதிகம் எழாமல் கீழேயே தங்கி சிரமம் தரும் மந்தமான பிட்ச்சில், 161 என்பது சிக்கலான இலக்கு. ஆனால், குவார்ட்டர் ஃபைனல் எனக் கருதப்பட்ட இந்த முக்கியமான போட்டியில், இந்தியாவின் துவக்க ஆட்டம் அபத்தமாக இருந்தது. 49 ரன்களில் 3 விக்கெட்டுகள். வழக்கம்போல், ரோஹித், தவன், ரெய்னா மைதானத்தில் நின்று ஆடவில்லை. அருமையாக பந்து வீசிய ஷேன் வாட்சன் (Shane Watson) ரோஹித், ரெய்னாவை வீட்டுக்கு அனுப்பிவைத்தார். இவர்களின் மோசமான ஆட்டத்தினால், விராட் கோஹ்லியின்மீது மனஅழுத்தம் மேலும் ஏறி உட்கார்ந்துகொண்டது. ஆஸ்திரேலிய பௌலிங் வெகுதுல்லியம். ஃபீல்டிங் அதிகூர்மையாக. யுவராஜ் கொஞ்ச நேரம் நின்றார். சிங்கிள்களில் ரன் எடுக்கமுயன்றார். கணுக்கால் பிரச்னையோ என்னவோ, கோஹ்லியோடு ஈடுகொடுத்து ஓடி ரன்னெடுக்க அவரால் இயலவில்லை. ஒரு சிக்ஸருக்குப்பின் அடுத்த பந்தை சோம்பேறித்தனமாக லெக்-சைடில் தூக்கப் பார்த்தார். வேகமாக நகர்ந்த வாட்சன், இறங்கிய பந்தை சிரித்துக்கொண்டே ஏற்றுக்கொண்டார். யுவராஜ் அவுட்டாகையில் இந்தியாவுக்கு 6 ஓவர்களில் 65 ரன்கள் தேவைப்பட்டது. மோசமான ஆட்டநிலை. பலருக்கு யுவராஜ் அவுட் ஆனது `அப்பாடா!` எனத் தோன்றியது.

பாண்ட்யாவை அனுப்புவதற்குப் பதிலாக மஹேந்திர சிங் தோனி தானே இறங்கினார். தோனியின் வருகை, ஏகப்பட்ட அழுத்தத்திலிருந்த கோஹ்லியின் உடம்புக்குள் மின்சாரம் பாய்ச்சியது. ஜோஷ் ஹேசல்வுட்டின் (Josh Hazlewood) ஓவரில், மின்னலாக இரண்டு, இரண்டு ரன்களாக நாலுமுறை பறந்தார்கள் தோனியும், கோஹ்லியும். பௌண்டரி ஒன்று சீறியது கோஹ்லியிடமிருந்து கடைசி பந்தில். இந்தியாவின் ஆட்டத்தில் உயிரோட்டம் தென்பட்டது.

ஜேம்ஸ் ஃபால்க்னர் (James Faulkner) ஆஸ்திரேலியாவின் மிகச்சிறந்த இறுதி-ஓவர் பௌலர்(death-over bowler). அவரை எந்தக் கொம்பனும் ஒன்றும் செய்துவிடமுடியாது என்கிறது அவரது ரெப்யுடேஷன். ஆனால் அந்த இரவில், கோஹ்லிக்குள் ஏதோ ஒரு பூதம் இறங்கியிருந்தது ஃபாக்னருக்கு தெரிந்திருக்க நியாயமில்லை. முதல் 2 பந்துகளில் இடது, வலதாக பளார், பளார் எனப் பறந்தன பௌண்டரிகள். மொஹாலி அதிர ஆரம்பித்தது. ரசிகர்களின் மூவர்ண டர்பன்கள் மேலெழுந்தன. இளம் பஞ்சாபி யுவதிகளின் கீச்சுக்கீச்சுக் கூச்சல்கள் போதை ஏற்றியது. Surreal atmosphere! விளைவு? பதற்றம் கண்ட ஃபாக்னரின் அடுத்த பந்தின்மீது பாய்ந்தார் கோஹ்லி. லாங்-ஆன் திசையில் உயர்ந்து வானில் கோபம்காட்டிய பந்து, ரசிகர்களுக்கு மத்தியில் இறங்கியது. 19 ரன்கள் வந்தன ஃபால்க்னரின் ஓவரில்(18th over). வெற்றிப்பாதையில் தான் இருப்பதான கனவில் அதுவரை மிதந்திருந்த ஆஸ்திரேலியாவிற்குத் தரை தட்டுப்பட்டது; தடுமாறியது. 19-ஆவது ஓவரை வீசிய நேத்தன் கோல்ட்டர்-நைல் (Nathan Coulter-Nile)-ஐ கோஹ்லியும் தோனியும் தாவிக் கிழிக்க, 16 ரன்கள் இந்தியாவிடம் சேர்ந்தது. ஆஸ்திரேலிய வாபஸி பயணம் உறுதிசெய்யப்பட்டது!

மொஹாலி கொண்டாட ஆரம்பித்துவிட்டது. ஃபாக்னர் 20-ஆவது ஓவரின் முதல்பந்தை தோனியை நோக்கி வீசினார் என்று சொல்லிமுடிப்பதற்குள், பந்து லாங்-ஆன் பௌண்டரியைத் தாண்டிப் பாய்ந்தது. இந்தியா உலகக்கோப்பையின் செமிஃபைனலில் பிரவேசித்தது. விராட் கோலி தன் உணர்ச்சிகளுக்கு வடிகால் அமைக்க முற்பட்டார். கீழே மண்டியிட்டுக் குனிந்துகொண்டார். தோனி வந்து கொஞ்சநேரம் அப்படியே இருக்கவைத்துப் பின் தூக்கிக் கட்டிக்கொண்டார். 82 நாட்-அவுட். 9 பௌண்டரி, 2 சிக்ஸர். 39 பந்துகளில் அரைசதம், அடுத்த 12 பந்துகளில் 32 மின்னல் ரன்கள். விராட் கோஹ்லியிடமிருந்து வீறுகொண்ட இந்தியாவுக்காக.

தலைகொள்ளாப் பிரச்னைகளுக்கு நடுவிலும் கிரிக்கெட் பார்ப்பதை நிறுத்துவதில்லை பிரதமர் நரேந்திர மோதி! மேட்ச் முடிந்த நொடிகளுக்குள் தான் அனுப்பிய ட்வீட்டில் கோஹ்லியின் அபார இன்னிங்ஸையும், தோனியின் பிரமாதமான தலைமையையும் புகழ்ந்திருக்கிறார். இந்தியாவின் அடுத்த மேட்ச்: 31 மார்ச். மும்பை. இந்தியா-வெஸ்ட் இண்டீஸ் செமிஃபைனல். மேலும் பொங்கலாம் உணர்ச்சிகளின் பிரவாகம்.

**