Ind vs SA : முதல் டெஸ்ட் ஆஹா! அடுத்து ..

 

விசாகப்பட்டினத்தில் விராட்டுக்குக் கிடைத்துவிட்டது வெற்றி. கடைசி நாளில் பௌலர்கள் முகமது ஷமியும், ரவீந்திர ஜடேஜாவும் போட்டுத் தாக்கியதில் நிலைகுலைந்து போனது தென்னாப்பிரிக்க பேட்டிங். முதல் இன்னிங்ஸில் திறமைகாட்டிய எல்கர், டி காக் (de Cock), டூ ப்ளஸீ (du Plessis) எளிதில் சரிந்துவிட, மார்க்ரம், பவுமா (Bavuma), டி ப்ருய்ன் போன்றவர்களிடமிருந்து எதிர்பார்ப்பு இருந்தது. மார்க்ரம் அடித்த 39 போதவில்லை. அவர், ஜடேஜாவின் சுழல் பந்தை பௌலரின் தலைக்குமேல் தூக்க, ஜடேஜா ஒரு எம்பு எம்பி, இடது கையால் கேச்சை லவட்டிய விதம், விசாகப்பட்டினத்தின் மறக்கமுடியாக் காட்சி. (ஜடேஜா சராசரி உயரம்தான் என்பது இங்கே கவனிக்கப்படவேண்டியது.) ரசிகர்களும் சீட்டிலிருந்து எம்பிவிட்டார்கள்..

ஷமியின் ஒரு அருமையான பந்தில் பவுமா க்ளீன் -போல்ட். டி ப்ருய்ன் (de Bruyn) அஷ்வினின் வேகமாக உள்ளே திரும்பிய பந்தில் ஏமாந்து போல்டானார். பேட்டிங் வரிசையில் ஏழாவதாக இறங்கிய முத்துசாமியும், பத்தாம் நபராக உள்ளே வந்த டேன் பீட் (Dane Piedt)- உம் கடுமையாகப் போராடி தென்னாப்பிரிக்காவின் ஸ்கோர் 150-ஐக் கடந்து செல்ல உதவினர். பீட் அரைசதம். முத்துசாமி 49 நாட் அவுட். வரவேண்டிய மழையும் காலை வார, அவ்வளவுதான் கதை. 191-ல் ஆல் அவுட். 203 ரன் வித்தியாசத்தில் தோற்றது தென்னாப்பிரிக்கா.

இரண்டாவது இன்னிங்ஸில் வேகப்பந்துவீச்சாளர் ஷமி அசத்திவிட்டார். அவருக்குக் கொடுக்கப்பட்ட 11-க்கும் குறைவான ஓவர்களில் 5 விக்கெட். பழைய பந்தைப் பயன்படுத்துகையிலும், துல்லியமும், ஸ்விங்கும் காண்பிக்கமுடிந்தது அவரால். அடுத்த பக்கத்திலிருந்து தாக்கிய இடது கை வீச்சாளர் ஜடேஜாவுக்கு, 4 பேர் பலி. அஷ்வினுக்கு இரண்டாவது இன்னிங்ஸில் ஒரு விக்கெட்தான் எனினும், அவர்  350 -ஆவது  டெஸ்ட் விக்கெட் எனும் சாதனை அளவை அடைய,  அதுவே போதுமானதாக இருந்தது.

Ashwin, Jadeja

கிரிக்கெட் ஒரு டீம் விளையாட்டுதான்.  எனினும், மயங்க் அகர்வால் (முதல் இன்னிங்ஸ் 215), ரோஹித் ஷர்மா ( ஆட்டநாயகன், இரு இன்னிங்ஸிலும் தலா சதம்), அஷ்வின்  டெஸ்ட் கிரிக்கெட்டில் 350 விக்கெட்கள்,  ஷமியின் இரண்டாவது இன்னிங்ஸ் 5 விக்கெட், ஜடேஜா வேகமாக எட்டிய  200-ஆவது டெஸ்ட் விக்கெட், என தனிப்பட்ட இந்திய மைல்கற்கள் மின்னின இந்த டெஸ்ட்டில். அனேகமாக அடுத்த டெஸ்ட்டுக்கான (பூனே, 10 அக்.), இந்திய அணியில் மாற்றம் இருக்காது.

தென்னாப்பிரிக்காவின் இரண்டாவது இன்னிங்ஸ் சோகம் அவர்களைத் தடுமாறவைத்தாலும், எழுந்து வருவார்கள் பூனேயில். வேகப்பந்துவீச்சாளர் வெர்னன் ஃபிலாண்டர் (Vernon Philander) சரியாக வீசாத நிலையில், லுங்கி இங்கிடி {Lungi Ngidi (IPL-CSK)}, ககிஸோ ரபாடாவுடன் (Kagiso Rabada) ஜோடி சேர்ந்து பூனே பிட்ச்சில் உறுமக்கூடும். அனேகமாக டேன் பீட், ஸெனுரன் முத்துசாமி (Senuran Muthusamy) தொடர்வார்கள் எனத் தோன்றுகிறது. முத்துசாமி இரண்டு இன்னிங்ஸிலும் அவுட் ஆகாமல், ஸ்பின்னர்களின் கடுமைக்கெதிராக அழுத்தமாக நின்று ஆடியவிதம், ’he is technically very sound’ என்று தென்னாப்பிரிக்க கேப்டனைப் புகழவைத்துள்ளது. ஸ்பின் பௌலிங்கில் முத்துசாமி,  நமது ஹனுமா விஹாரி மாதிரி. சில ஓவர்கள் மட்டுமே தரப்படும். விக்கெட் விழுந்தால் சரி. விழாவிட்டாலும் சரி.

பூனேயில் பார்ப்போம் – கோஹ்லியின் சுக்ர தெசை தொடருமா என்று !

**

CWC 2019 : இறுதிப்போட்டியில் நியூஸிலாந்து; இந்தியா வெளியே !

மேன்செஸ்டரில் மழை குறுக்கேவந்து போட்டுக்காட்டிய அதிரடி ஆட்டம் காரணமாக,  இரண்டு நாள் நீடித்த செமிஃபைனலில், நியூஸிலாந்து, முதல் ரேங்க் அணியான இந்தியாவை உலகக்கோப்பையிலிருந்து வெளியே தள்ளியது. இன்று நடக்கவிருக்கும் அடுத்த செமிஃபைனலில் ஆடும் இங்கிலாந்து மற்றும் ஆஸ்திரேலிய அணிகளில் ஒன்றை, கோப்பைக்கான இறுதிப்போட்டியில் (14/7/19) நியூஸிலாந்து சந்திக்கும்.

நேற்றோடு (10/7/19), ஒரு பில்லியன் மக்களின் உலகக்கோப்பைக் கனவு கலைந்து,  காற்றோடு போய்விட்டது. என்ன ஆடி, எவ்வளவு மேலே வந்து, என்ன புண்ணியம்? எப்போது சாத்தவேண்டுமோ அப்போது பார்த்து, 1,1,1 என முதல் மூன்று மூர்த்திகள் அபத்தமாக சரிந்துவிழ, இந்தியாவின் கதை, இன்னிங்ஸ் ஆரம்பித்த நிமிடங்கள் சிலவற்றிலேயே சிதறிவிட்டது. ’ டேபிள்-டாப்பராக இருப்பதில் என்ன பயன்? ஒரு 45-நிமிட நேரம் சரியாக விளையாடாததால் நாங்கள் வெளியேறவேண்டுமா?’ என்பது இந்தியக் கேப்டன் கோஹ்லியின் அங்கலாய்ப்பு. ஆமாண்டா, கண்ணு! இங்கேல்லாம் அப்படித்தான். கரணம் தப்பினால் மரணம் தான்..

9/7/19-ல் செமிஃபைனல் போட்டி ஆரம்பிக்கையில், முக்கியமான டாஸை வழக்கம்போல் கோட்டைவிட்டார் கோஹ்லி. முதலில் பேட் செய்த  நியூஸிலாந்து பிட்ச்சின் மந்த நிலையில், இந்திய பௌலர்களின் துல்லிய வீச்சைக் கவனமாக சந்தித்து ஆடியது. ஆரம்பத்தில் விக்கெட்டுகளை இழந்தும், கேப்டன் வில்லியம்சன் எதிர்பார்க்கப்பட்டபடி மிகவும் நேர்த்தியான ஆட்டத்தை வெளிப்படுத்தி 67 ரன்கள் சேர்த்தார். அவரோடு ஆடிய முன்னாள் கேப்டன் ராஸ் டேய்லர் நிதானத்தின் உச்சத்தில் விளையாடினார். முதல்நாள் மாலையில் மழை குறுக்கிட்டு ஆட்டத்தை நிறுத்துகையில், நியூஸிலாந்து 211 க்கு 6 விக்கெட்டுகளை இழந்திருந்தது. இந்திய பௌலர்கள் பும்ரா, புவனேஷ்வர், ஆல்ரவுண்டர் ஜடேஜா அபாரமாகப் பந்து வீசினர். ஜடேஜாவின் முதல் ஆறு ஓவர்களில் ஒரு பௌண்டரியும் அடிக்கமுடியவில்லை அவர்களால்.  (அதே சமயத்தில் இன்னொரு ஸ்பின்னரான சாஹல் அடிவாங்கினார்). மேலும் தாக்கிய மழையினால் ஆட்டம் நிறுத்தப்பட்டு, உலகக்கோப்பை விதிகளின்படி நேற்று (10/7/19), விட்ட இடத்திலிருந்து தொடர்ந்தது. 47-ஆவது ஓவரைத் தொடர்ந்து புவனேஷ்வர் குமார் வீச, ஜடேஜாவின் அபாரமான ஃபீல்டிங்கில் இந்தியா ஜொலித்தது. முதல்நாள் நாட்-அவுட் பேட்ஸ்மன்களுள் ஒருவரான டாம் லேத்தம் (Tom Latham) தூக்கிய பந்தை, பௌண்டரிக்குப் பக்கத்தில் பேலன்ஸ் இழக்காது உயர எம்பிப் பிடித்து லேத்தமை வீட்டுக்கு அனுப்பிவைத்தார் ஜடேஜா. குமாரின் விக்கெட். வேகமாக ரன் சேர்க்கமுயன்ற டேய்லரின் ஒரு ஷாட்டில் சீறிய பந்தை,  மிட்விக்கெட்டில்  அமுக்கி, ஒரு நேர்-த்ரோவில் ஸ்டம்பைத் தாக்கி ரன்-அவுட்டாக்கினார் ஜடேஜா. மூவண்ண ரசிகர்கள் சீட்டு நுனிக்கு வந்திருந்தனர். பும்ராவும், குமாரும் துல்லியமாகப்போட்டு நெருக்க, 8 விக்கெட்டுக்கு 239 ரன்களே நியூஸிலாந்தால் முடிந்தது என்பது இந்திய பௌலர்களின் திறனைக் காண்பித்தது. இதுவரை .. இந்தியக் கதை ஒரு த்ரில்லர்!

240 எடுத்தால் ஃபைனல் என்கிற நிலை. ரோஹித், ராஹுல் ஆட இறங்கினார்கள். சாதாரணமான நாட்களில்,  இந்த இலக்கு இந்திய அணிக்கு ஒரு ஜூஜூபி. ஆனால் நேற்றைய தினம் வேறு கதையை இந்தியாவுக்காக வைத்திருந்தது.

ஆட விட்டால் ஆடிக்கொண்டே இருப்பார்கள் இந்தியர்கள் என்பதை  நியூஸிலாந்து கேப்டன் அறிந்திருந்தார். இந்திய முன்னணி வீரர்களை குறிவைத்துத் தாக்கி வீழ்த்தினால்தான் விடிமோட்சம் நியூஸிலாந்திற்கு என்பது அவரது பொறியில் தட்டியது. தனது வேகப்பந்துவீச்சாளர்கள், ஃபீல்டர்களை வைத்துக் கடுமையாக வியூகம் அமைத்தார் வில்லியம்ஸன்.  அப்படியே, கேப்டன் விரும்பியபடியே செய்துகாண்பித்தனர் ஆரம்ப பந்துவீச்சாளர்களான மேட் ஹென்றியும் (Matt Henry), ட்ரெண்ட் போல்ட்டும்(Trent Boult). குறிப்பாக  ஹென்றியின் துல்லிய இன்-ஸ்விங்கர்கள் இந்திய ஸ்டாரான ரோஹித் ஷர்மாவையும், கே.எல்.ராஹுலையும் நிற்கவிடாது, அடுத்தடுத்து காவு வாங்கிவிட்டன. மறுமுனையில் பதற்றத்தோடு ஆடமுயன்ற  கோஹ்லியை,  நேரத்தை வீணாக்காது டிஸ்மிஸ் செய்தார் போல்ட். இந்தியா 5 ரன்களில் 3 விக்கெட்டுகள். என்ன நடக்கிறது என்று கோஹ்லி புரிந்துகொள்ளுமுன்பே, ரிஷப் பந்த்தும், கார்த்திக்கும் மைதானத்தில் இறங்கி தடவிக்கொண்டிருந்தனர்.

கார்த்திக் கொஞ்சம் நின்று, விளையாட முயன்றார். முடியவில்லை. இப்போது ஹர்தீக் பாண்ட்யா, ரிஷப் பந்துடன். இருவரும் தங்கள் இயற்கையான ஆட்டத்தை மாற்றியமைத்து, மெல்ல ஓட்டிப் பார்த்தனர் கொஞ்ச நேரம். நியூஸிலாந்தின் ஸ்பின்னர் சாண்ட்னர் இறங்கி பந்து போட்டது, ரிஷப் பந்தின் சிக்ஸர் பசியை ஒரேயடியாகக் கிளப்பிவிட்டது.  சாண்ட்னரின் ஒரு சுழல் பந்தை மண்டிபோட்டவாறு தூக்க, பௌண்டரியில் அதற்காக நிறுத்தப்பட்டிருந்த ஃபீல்டரிடம் பந்து சரணடைந்தது. பந்த் அசடுவழிய வெளியே வர, கோஹ்லியின் ரத்தம் சூடாகிவிட்டது. மேலே எங்கோ உட்கார்ந்திருந்தவர் வேகமாகஇறங்கி வந்தார் கோச் ஷாஸ்திரியிடம். ஏதோ வாக்குவாதம். என்ன ப்ரயோஜனம்?

நியூஸிலாந்தின் வில்லியம்சன், சுழல், வேகமென மாறி மாறிப்போட்டு நெருக்கினார் பாண்ட்யாவையும், தோனியையும். சிங்கிள்களில் எத்தனை சேர்க்கமுடியும்?  ஓவர்கள் வேஸ்ட்டாகின. பொறுமை இழந்த பாண்ட்யா, ரிஷப் பந்த் செய்த தவறைச் செய்தார். தூக்கினார் உயர. வில்லியம்சனிடம் பிடிபட்டு, முகம் வெளிறி வெளியேறினார். 240-ஐ மறந்துவிடுவது நல்லது. 150 கூட வரமுடியாது, இந்தியா அவமானத் தோல்வியடையும் என்கிற நிலை.

ஜடேஜா, தோனி

முதல் ஏழு மேட்ச்சுகளில் கோஹ்லி-ஷாஸ்திரி ஆகிய மேதைகளின் கவனத்திற்கு வந்திராத ரவீந்திர ஜடேஜா, 8-ஆவது ஆளாக இப்போது பிட்ச்சில் இறங்கியிருந்தார். தோனியோடு கொஞ்சம் பேச்சு. அடுத்த சில பந்துகளிலேயே  ஆவேசம் தெறித்தது. நியூஸிலாந்தின் சிறப்பான வேகப்பந்துவீச்சாளர்களான ஹென்றி, போல்ட், ஃபெர்குஸன்..யாரையும் விடவில்லை. வெறியோடு தாக்கினார் ஜடேஜா. ஃபீல்டர்களைப் பின்னுக்குத் தள்ளுவதும், பௌலர்களோடு பேசுவதுமாக டென்ஷன் காட்டினார் வில்லியம்சன். ஜடேஜாவிடம் மாற்றமில்லை. பௌண்டரிகள், பின் அனாயாச சிக்ஸர்கள்.  மூஞ்சி தொங்கி உட்கார்ந்திருந்த ரசிகர்கள் துள்ளிநின்றார்கள். இது யாருடா இப்ப? ஏற்கனவே ஓவர்கள் குறைந்திருக்க, இப்போது ரன்கள் எகிறின. தோனி அவ்வப்போது சிங்கிள் எடுத்து ஜடேஜாவை முன்னே பாயவிட்டுப் பார்த்துக்கொண்டிருந்தார். இந்த சமயத்தில் நியூஸிலாந்தின் ஃபீல்டிங்கும் பிரமாதம். இல்லாவிட்டால்  ஜடேஜா-தோனி ஜோடி, இன்னும் ரன் சேர்த்திருக்கும்.

நமது ஆரம்ப வீரர்கள், மிடில்-ஆர்டர் ஸ்பெஷலிஸ்ட்டுகள் தடவித் தடவி, ஏகப்பட்ட பந்துகளை வீணடித்ததால், வரப்போகும் பந்துகள் வெகுவாகக் குறைந்திருந்தன. எடுக்கவேண்டிய ரன்களோ மலைபோல் முன்னே. ஜடேஜா-தோனி ஜோடியின்மீது அளவிலா அழுத்தம். எங்கோ காணாமல் போயிருந்த இந்திய ஸ்கோரை, 200-க்குமேல் இவர்கள் கொண்டுவந்ததே ஒரு சாதனை. தோனியிடமிருந்து பௌண்டரி வராது போக,  48-ஆவது ஓவரில் போல்ட்டின் ஒரு பந்தை, முன்னே பாய்ந்து நேராக சிக்ஸருக்குத் தூக்க முயன்றார் ஜடேஜா. துரதிருஷ்ட வசமாக கேட்ச் ஆகி அவர் வெளியேறுகையில், மைதானம் அமைதியில் உறைந்தது. 59 பந்துகளில் 77 ரன்கள். அதில், 4 பௌண்டரிகள், 4 சிக்ஸர்கள். இந்தக் கட்டத்தில் தோனி அடித்தது ஒரேயொரு பௌண்டரி. தோனி-ஜடேஜா ஜோடி அசத்தலாக, 106 ரன் பார்ட்னர்ஷிப் கொடுத்தது. அதில் ஜடேஜா 77. தோனி 29. ஆட்டம் எந்த கதியில் இருந்திருக்கும் என்பது புரிந்திருக்கும். ’ஜடேஜாவும் தோனியும் பிட்ச்சில் தொடர்ந்திருந்தால், எதுவேண்டுமானாலும் நடந்திருக்கும்!’ என்கிறார் ஆட்டத்துக்குப்பின், நியூஸிலாந்தின் ட்ரென்ட் போல்ட்.

ஜடேஜா வெளியேறியபின், நாலே பந்துகளில் தோனி, மார்ட்டின் கப்ட்டிலின் நேர்-த்ரோவில் துரதிர்ஷ்டமாக ரன்-அவுட் ஆனார். 50 ரன்கள் (பௌண்டரி 1, சிக்ஸர் 1). அதற்கப்புறம் என்ன, புவனேஷ்வர், சாஹல் பின்னாடியே பெவிலியனை நோக்கி ஓட, 221 ஆல்-அவுட். ஒரு இந்தியக் கனவு இசகு-பிசகாக முடிந்தது.

சிறப்பான தலைமை, வியூகம், ஆட்டம் என சரியான தருணத்தில் வெளிக்கொணர்ந்த நியூஸிலாந்து, 2019 உலகக்கோப்பையின் இறுதிப்போட்டிக்குத் தகுதி பெற்றது.

கொசுறு: சில நாட்களுக்கு முன், ஸ்டார்-இன் வர்ணனைப்புலியான சஞ்சய் மஞ்ச்ரேகர், ரவீந்திர ஜடேஜாவை ‘bits and pieces cricketer’ என்றார். ட்விட்டரில் செமயா வாங்கிக்கட்டிக்கொண்டார்! இங்கிலாந்தின் முன்னாள் கேப்டன் மைக்கேல் வாகனும் மஞ்ச்ரேகரைக் கிழித்திருந்தார். நேற்றைய ஜடேஜாவின் ஆல்ரவுண்ட் ஆட்டத்தில் ட்விட்டர்வாசிகள் திளைத்திருக்கிறார்கள். மஞ்ச்ரேகர்? கீழே குனிந்து bits and pieces-ஆப் பார்த்துப்  பொறுக்கிக்கொண்டிருக்கிறதே ஒரு அசடு? ஓ.. அதுதானா அது?

**

Picture Courtesy: Google

 

CWC 2019 :  முதல் செமிஃபைனலில் இந்தியா, நியூஸிலாந்து

 

ரசிகர்களுக்கு அதிர்ச்சிதரும் வகையில்  மகா மோசமாக ஆடி, உலகக்கோப்பையிலிருந்து வெளியேறிய தென்னாப்பிரிக்கா, தன் கடைசி போட்டியில் உலகக்கோப்பை ஃபேவரைட்களில் ஒன்றான ஆஸ்திரேலியாவை ஒரு போடு போட்டுவிட்டுப் போய்விட்டது. விளைவு? செமிஃபைனலுக்கான வரிசையில் இந்தியா முதல் இடத்துக்கு வந்துவிட்டது. கடைசி நிலையில் இருக்கும் நியூஸிலாந்தை 09/07/19 அன்று, முதல் செமிஃபைனலில் சந்திக்கிறது. ஆரம்பச்சுற்றில் மழையின் காரணமாக, இந்தியா-நியூஸிலாந்து போட்டி ரத்தானது. வியாழன் (11/7/19) வரும் இரண்டாவது செமிஃபைனலில், ஆஷஸ் (Ashes) எதிரியான இங்கிலாந்தை, ஆஸ்திரேலியா கவனிக்கும்!

வலிமையான அணியென மார்தட்டி நின்ற ஆஸ்திரேலியாவின் தலையில் அழுந்தக் குட்டி, ‘ஒன்னத் தெரியும்டா..டேய்.. !’ என்றது, தென்னாப்பிரிக்கா அன்று. போட்டியில் சதம் அடித்துக் காண்பித்த அணியின் கேப்டன் ஃபாஃப் தூ ப்ளஸீ (Faf du Plessis) , ’இந்தப் போட்டியின் முடிவு இந்தியாவுக்கு மகிழ்வு தரும் !’ – என்றிருக்கிறார். கூடவே, ’உலகக்கோப்பையிலிருந்து வெளியே செல்கையில், ஒரு சின்னச் சிரிப்புடன் போகிறோம்!’ என்றும் குறிப்பிட்டார் தென்னாப்பிரிக்கக் கேப்டன்.

இந்தியா தன் கடைசி ‘ரவுண்ட்-ராபின்’ போட்டியில் (6/7/19) ஸ்ரீலங்காவை 7 விக்கெட் வித்தியாசத்தில் வென்றது. சாதனை சதமாக உலகக்கோப்பையில் தன் 5-ஆவது சதத்தை அடித்த ‘hit-man ‘ ரோஹித் ஷர்மாவுடன், இன்னொரு துவக்க ஆட்டக்காரரான கே.எல்.ராஹுலும் சேர்ந்துகொண்டார். ஸ்ரீலங்காவுக்காக முன்னாள் கேப்டன் ஆஞ்சலோ மேத்யூஸ்  பொறுமையாக ஆடி சதம் அடித்தார்.

விராட் கோஹ்லி – கேன் வில்லியம்ஸன்

ஓல்ட் ட்ராஃபர்ட், மேன்செஸ்டரில் (Old Trafford, Manchester), நியூஸிலாந்தை,  இந்தியா விளையாடவிருக்கிறது. மழைமேகங்கள்வேறு கவியப்போவதாக சேதி. வருணபகவானும்  செமிஃபைனல் பார்க்க ஆசைப்படுவாரோ!  முன்னதாக, உலகக்கோப்பையின் ஹை-ப்ரொஃபைல் மேட்ச்சில், டாஸ் வென்று முதலில் பேட் செய்த இந்தியா,  பாகிஸ்தானுக்கெதிராக 336 விளாசி வென்றது இங்கேதான். இதே மைதானத்தில்,  ஆஃப்கானிஸ்தானுக்கெதிராக விளையாடி வென்ற இங்கிலாந்து, 397 (உலகக்கோப்பையின் உச்ச ஸ்கோர்) எடுத்தது. வெஸ்ட் இண்டீஸை வென்ற நியூஸிலாந்து முதலில் பேட் (bat) செய்து 291 எடுத்தது. ரன் அதிகமாக வரும் இந்த மைதானத்தில், இந்தியா டாஸ் வென்று முதலில் பேட் செய்வது முக்கியம். இல்லாவிட்டால் நியூஸிலாந்து குவிக்க ஆரம்பித்துவிடும். விராட் கோஹ்லி என்ன செய்வாரோ?

இதற்கு முந்தைய போட்டியில் ஸ்ரீலங்காவை தோற்கடித்த இந்திய அணியில் நாளைய அரையிறுதிக்காக  மாற்றம் இருக்கலாம்.  புவனேஷ்வர் குமார் போன மேட்ச்சில் சரியாக ஆடவில்லை. கிட்டத்தட்ட குல்தீப் யாதவின் நிலையும் அதேதான். முகமது ஷமி  புவனேஷ்வரின் இடத்தில் உள்ளே வருவதே நலம். பேட்டிங்கில், நம்பர் 6, 7 ஆவது இடங்களில் எம்.எஸ்.தோனியும், ரவீந்திர ஜடேஜாவும் அவசியம் இறங்கவேண்டும். மிடில் ஆர்டர் அசடு வழிந்தால், கீழ்வரிசையில், டெத்-ஓவர்களில் (death-overs) தாக்கி ஆட, ஜடேஜாவால் முடியும். அவருக்குப் பின் வரும் பௌலர்கள் குல்தீப், சாஹல், ஷமி, பும்ரா (8,9,10,11) – பேட்டிங்கில் வெறும் தெண்டம்.  அவர்களால் டீமிற்கு ரன் சேரும் என நம்பினால், இந்தியா காலி.

நியூஸிலாந்து டீமில் காயத்தால் கடைசி போட்டிகளில் ஆடாதிருந்த, டாப் பௌலரான லோக்கி ஃபெர்குஸன் (Lockie Ferguson), நாளை இந்தியாவுக்கு எதிராக இறங்குவார் என எதிர்பார்க்கலாம். அவரோடு ட்ரெண்ட்  போல்ட் (Trent Boult), இடதுகை ஸ்பின்னர் சாண்ட்னர் (Mitchell Santner) ஆகியோர் இந்திய பேட்ஸ்மன்களை புரட்டிப்போடப் பார்ப்பார்கள். இவர்களையும், நியூஸியின் அருமையான ஃபீல்டிங்கையும் தாண்டி, மேன்செஸ்டரில் முதலில் பேட் செய்தால்,  இந்தியா 320-க்குமேல் எடுக்கவேண்டியிருக்கும். இதற்குக் குறைந்தால், கதை தேறாது. ரோஹித், கோஹ்லி, ராஹுல் ஆகியோரின் ரன்சேர்க்கை, வேகமாகவும், விரைவில் விக்கெட் இழக்காமலும் அமையவேண்டும். இளம் ரிஷப் பந்த், ஹர்தீக் பாண்ட்யா ஆகிய பெரிதாகப் பேசப்படும் பேட்டிங்-புயல்கள், தங்கள் வேலையை எதிரிக்குக்  காட்டவேண்டிய தருணம் இது.

நியூஸிலாந்தின் துவக்க ஆட்டக்காரர் மார்ட்டின் கப்ட்டில் (Martin Guptill), மிடில்-ஆர்டரில் கேப்டன் வில்லியம்ஸன், ராஸ் டேய்லர் ஆகியோரைக் குறிவைத்து  விரைவில் தூக்கிவிடுவதே உத்தமம். இவர்கள் வெகுநேரம் தாக்குப்பிடித்தால் அது, இந்தியா ஃபைனலில் நுழைவதைத்  தடுத்துவிடும். இவர்களை பிட்ச்சில் செட்டில் ஆகவிடாமல் விரட்டுவதில், பும்ராவுக்கும், ஷமிக்கும், இரண்டாவது பவர்-ப்ளேயில் பௌலிங் செய்யும் சாஹல், குல்தீப் ஆகியோருக்கும் ( இருவரும் ஒருவேளை ஆடினால்) முக்கியப் பொறுப்பு இருக்கிறது. இடதுகை சுழல் ஜடேஜா ஒருபக்கம் ரன் கொடுக்காது அழுத்தி, எதிரியை நெருக்குவார் என எதிர்பார்க்கலாம்.

நாளைய முதல் செமிஃபைனலில், இந்தியாவில் ஐபிஎல் ஆடிய அனுபவம் நியூஸிலாந்தின் வில்லியம்ஸனுக்கும், ட்ரெண்ட்  போல்ட்டிற்கும் கைகொடுக்கும் என்கிறார் நியூஸிலாந்தின் முன்னாள் கேப்டனும், ஐசிசி-யின் கிரிக்கெட் பத்தி-எழுத்தாளருமான டேனியல் வெட்டோரி. இந்த மதிப்பீடு சரியாக இருக்கலாம். இருவரும் ரோஹித், ராஹுல், கோலி, பாண்ட்யா போன்றவர்களுக்கெதிராக நிறைய ஆடியவர்கள். அப்படிப் பார்த்தால், இந்திய வீரர்களும்தான் இவர்களுக்கெதிராக ஐபிஎல் ஆட்டம் போட்டிருக்கிறார்கள்!

மைதான நிலவரத்தை பூரணமாகப் புரிந்துகொண்டு, எதிர் அணிக்கெதிராக சரியான வியூகம் அமைத்து, சிறப்பான கிரிக்கெட்டைத் தரும் அணியே வெற்றி பெற்று, உலகக்கோப்பையின் ஃபைனலுக்கு முன்னேறும். அது இந்தியாவாக இருக்கவேண்டுமே என்கிற ஏக்கம், நமக்கு இருப்பது நியாயம்தான்!

**

ASIA CUP : ஆஃப்கானிஸ்தான் அட்டகாசம் !

ஐக்கிய அரபு அமீரகத்தில் நடைபெற்றுக்கொண்டிருக்கும் ஆசியக் கிரிக்கெட் கோப்பையில் எனக்குப் பிடித்த அணி என்று ஆஃப்கானிஸ்தானையே சொல்வேன். வெற்றி, தோல்வியைத் தாண்டி ஜாலியாக விளையாடும் ஒரே சர்வதேச அணி. பழைய வெஸ்ட் இண்டீஸ் நினைவுக்கு வருகிறது. அந்த அளவு திறன் இவர்களிடம் இல்லை. அத்தகைய ஒப்பிடுதலே சரியில்லை. எனினும், கிரிக்கெட் உலகின் இளம் அணிகளில் ஒன்றான ஆஃப்கானிஸ்தான் தங்கள் கிரிக்கெட்டை விளையாடும் லாவகம், மனப்போக்கு மகிழ்ச்சிகரமானது. ரசிக்கத்தக்கது.

நேற்று சூப்பர்-4 போட்டியில் இந்தியாவை ஆஃப்கானிஸ்தான் முதன்முதலாகச் சந்தித்தது. அவர்களின் கடைசி மேட்ச். அதற்கப்புறம் தொடரைவிட்டே வெளியேறவிருக்கும் அணி. அந்தக் கவலையோ, சோகமோ ஏதுமில்லை அவர்களிடம். முதலில் பேட் செய்தவர்கள் நிதானமாக மைதானத்தை கவனித்தார்கள். ஆர்வமாக ஆடினார்கள். குறிப்பாக ஆரம்ப ஆட்டக்காரரான 30-வயதான முகமது ஷாஸாத் (Mohamed Shahzad). ஆள் அப்படி ஒரு குண்டு. ஃபிட்னெஸுக்காக மற்ற ஆஃப்கன் வீரர்கள் வேகவைத்த காய்கறி, சூப் என மாறியிருக்க, பிரியாணியை விடாததால் விமரிசனத்துக்குள்ளான பேட்ஸ்மன்! வேறொரு கிரிக்கெட் அணியாயின், இவர் தேர்வாக வாய்ப்பே இல்லை! ஆனால் அதிரடி ஆட்டத்துக்கு பேர்போன மனுஷன். எப்படி அவரை விடமுடியும்? அவருக்குள் ஒளிந்திருப்பது ஒரு உற்சாகச் சிறுவன்! இஷ்டத்துக்கும் பேட் சுத்த விரும்புபவன். எதிரியைத் துச்சமென மதித்து ஏறி அடிக்கத் துடிப்பவன். அவன் நேற்று ஆடிவிட்டான் ஒரு ஆட்டம் – அதுவும் தோனியின் இந்தியாவுக்கெதிராக.

இந்தியா ஏற்கனவே இறுதிப்போட்டிக்குத் தகுதிபெற்றுவிட்டபடியால் கேப்டன் ரோஹித் ஷர்மா, ஷிகர் தவண், புவனேஷ்வர் குமார், பும்ரா, சஹல் ஆகியோர் ஓய்வுகொடுக்கப்பட்டார்கள். பதிலாக, கே.எல்.ராஹுல், மனிஷ் பாண்டே, கலீல் அஹமது, தீபக் சாஹர் மற்றும் சித்தார்த் கௌல் (இந்த மூன்றும் வேகப்பந்துவீச்சாளர்கள்) அணியில் நுழைந்தார்கள். கேப்டனாக மீண்டும் மகேந்திர சிங் தோனி பொறுப்பேற்றதில் ரசிகர்களுக்கு ஒரே குதூகலம். ஆஃப்கானிஸ்தானை 42, 43 ஓவரில் ஊதிவிடும் இந்தியா என்பது பெரும்பான்மையான ரசிகர்களின் எதிர்பார்ப்பாக இருந்திருக்கும்.

முதலில் பேட்செய்த ஆஃப்கானிஸ்தானின் துவக்க ஆட்டக்காரர் முகமது ஷாஸாத் இந்தியாவின் வித்தியாச வேகப்பந்துவீச்சை வெகுவாக ரசித்ததாகத் தோன்றியது! குண்டாக இருப்பதால், மற்ற பேட்ஸ்மன்களைப்போல், இஷ்டத்துக்கும் அவர் முன்னடி எடுத்துவைத்து க்ரீஸிற்கு வெளியே பாய்வதோ, ஆஃப் சைடு, லெக்-சைடு என அடிக்கடி கால்மாற்றி முன்னும் பின்னுமாக அசைந்து ஆடுவதோ எளிதில்லை. ஸ்வீப்பிற்காகக் காலை மடக்குவதும், ஐயோ.. முடியாது. ஆசாமியின் தொப்பை அப்படி! ஆனால் அதைப்பற்றிய கவலை மனதில் கிஞ்சித்தும் இல்லை. அவர் ஆடுகையில் ஆட்டம் தோனி & கோ. Vs முகமது ஷாஸாத் என்றே இருந்தது. ஆரம்பத்திலேயே வேகப்பந்துவீச்சைக் குறிவைத்தவர், தீபக் (ச்)சாஹரின் ஒரு ஓவரில் இரண்டு சிக்ஸர், இரண்டு பௌண்டரி எனத் தூள்கிளப்பினார். தோனி உடனே தீபக்கை வெளியே எடுத்து ஃபீல்டு செய்ய அனுப்பிவிட்டு, சித்தார்த் கௌலைக் கொண்டுவந்தார். அதே ட்ரீட்மெண்ட்தான் அவருக்கும். கலீலுக்கும் அடி. விறுவிறுவென ரன் ஏறியதில் விக்கெட் இழப்பின்றி 65 என்றது ஆப்கானிஸ்தான் ஸ்கோர். மறுமுனையில் 5 ரன்தான் எடுத்திருந்தார் இன்னொரு துவக்க ஆட்டக்காரர்.

தோனி ஸ்பின்னர்களைக் கொண்டுவந்தபோது ஷாஹ்ஸாத் வீழ்த்தப்படுவார் என்றே ரசிகர்கள் நம்பினர். காமெண்ட்டேட்டர்களும் அதையே விதவிதமாக சலசலத்து சந்தோஷப்பட்டுக்கொண்டனர். ஆனால் நடந்ததென்ன? நேற்று ஷாஸாதின் நாள். அவரை, குல்தீப், ஜடேஜா பின்னர் கேதார் – யாரும் அசைக்கமுடியவில்லை. குல்தீப்பைத் தவிர, மற்ற ஐந்து பௌலர்களையும் சிக்ஸருக்குப் பறக்கவிட்டார் ஷாஸாத். அனாயாசமாக மிட்விக்கெட் திசையில் ஒரு புல் (pull), லாங்-ஆன் பக்கம் ஒரு லாஃப்ட் (lofted shot). பந்து உயர்ந்தது, பறந்தது. தொப்பென்று கூட்டத்திற்கு நடுவே விழுந்து சிரிப்பொலியைக் கிளப்பியது. தோனியும், அவரது பௌலர்களும் அவ்வப்போது ஆகாசத்தைப் பார்ப்பதைத் தவிர வேறொன்றும் செய்யமுடியவில்லை.

93-ல் அவர் இருக்கையில் கேட்ச் பிடித்த தோனியும் பௌலர் கலீல் அஹமதும் கூச்சலிட, அம்பயர் ஷாஹ்ஸாதை அவுட் கொடுத்தார். ஷாஸாத் அசரவில்லை. தோளைத் தொட்டுக்காண்பித்தார். அங்கேதான் பட்டது. பேட்டில் அல்ல. ஆஃப்கானிஸ்தான் ரெவ்யூ செய்ய, அதிரடி நாட்-அவுட்! அதன் பிறகு, சிங்கிள், சிங்கிளாக ஊர்ந்தார் ஷாஹ்சாத். 99-லிருந்து தோனிக்குப் பின்னே ஒரு பௌண்டரி தட்டி, உலகின் 2-ஆவது நம்பர் அணிக்கெதிராக ஆக்ரோஷ சதம் எடுத்து அசத்திவிட்டார் ஷாஸாத். இறுதிக்கட்டங்களில் பரபரப்பைக் குறைத்துக்கொண்டு, ஓடமுடியாத நிலையிலும் (விளாவில் அடி, அபுதாபியின் ஹீட், வெகுநேரம் ஆடும் களைப்பு) சிங்கிளுக்காக அடிக்கடி ஓடினார். பொறுப்பாகத் தொடர்ந்த அவர், கேதாரின் வெளியே போகும் பந்தை லாங்-ஆஃபில் (long-off) சிக்ஸர் அடிக்க முயன்று, 124 ரன்களில் கேட்ச்சில் அவுட்டானார். இந்திய பௌலர்கள் மூச்சை ஒருமுறை இழுத்து, மெல்ல வெளியேவிட்டிருப்பார்கள். ஹரே, பாப்ரே! பிறகு வந்தவர்களில் முகமது நபி (முன்னாள் கேப்டன்) 64 அடிக்க, 8 விக்கெட் இழந்து 258 எடுத்தது ஆஃப்கானிஸ்தான்.

கொதிக்கும் அபுதாபி பிட்ச்சில், ஆஃப்கானிஸ்தான் ஸ்பின்னர்களுக்கெதிராக 259 என்கிற இலக்கு மிகவும் சவாலானது. அப்படியெல்லாம் ஒன்றுமில்லை என்பதாகத் துவக்கினார்கள் அம்பத்தி ராயுடுவும், கே.எல்.ராஹுலும். நல்ல பார்ட்னர்ஷிப். ராயுடு 57, ராஹுல் 60 என விழுந்தவுடன் கார்த்திக் வந்து பொறுப்பேற்றார். சிறப்பாக ஆடி, 44 எடுத்தார். தோனியும், பாண்டேயும் தலா 8 ரன் என எடுத்து வீழ, கேதார் ஜாதவும் ஓடிவிட, வெற்றி பெற்றுத்தரும் பொறுப்பு ஜடேஜாவின் தலையில்! அவர் நன்றாகவே விளையாடினார் எனினும் (ச்)சாஹர், கௌல் போன்றோர் கைகொடுத்தால்தானே? கடைசியில், 50-ஆவது ஓவரை ஆஃப்கானிஸ்தானின் சூப்பர்ஸ்டாரான ரஷீத்கான் வீசினார். 9 விக்கெட்டுகளை இழந்திருந்த இந்தியாவுக்கு 7 ரன் தேவைப்பட்டது வெற்றிக்கு. ஜடேஜா இரண்டாவது பந்தில் பௌண்டரி அடிக்க, ஜெயித்துவிட்டதுபோல் தவண் வழக்கம்போல் பெவிலியனில் நின்று சிரித்துக்கொண்டிருந்தார். என்னா சிரிப்பு! வெற்றிக்கு ஒரு ரன் தேவைப்பட, ஐந்தாவது பந்தைத் தூக்கி அடித்தார் ஜடேஜா. ஆகாசத்தில் பந்து, ஃபீல்டர் என ஒரு பக்கமும், இன்னொருபக்கம் தவனின் முகம் எனவும் கேமரா விளையாட்டுக் காண்பித்தது. தவணின் சிரிப்புக் கொஞ்சம் கொஞ்சமாகக் குறைந்தது. உறைந்தது. ஆகாசத்தைப் பார்த்துக்கொண்டே தொலைவிலிருந்து படுவேகமாக ஓடிவந்த ஃபீல்டர் நஜிபுல்லா ஜத்ரன் (Najimbulla Zadran), பந்தின்மீது கண்ணும், ஏந்திய கையுமாக ஓடிக்கொண்டே கேட்ச்சை லபக்கிவிட்டார். எதிர்பாராத முடிவினால் ஆஃப்கானிஸ்தான் ரசிகர்கள் பெரிதாகக் கொடியசைத்து ஆர்ப்பரிக்க, இந்தியா 49.5 ஓவரில் சரியாக 258-ல் ஆல்-அவுட். ஆசியக்கோப்பையில் இந்தியாவுக்கு எதிராக முதல் டை (Tie) கொடுத்துக் கலக்கிவிட்டது ஆஃப்கானிஸ்தான். ஆஃப்கன் கொண்டாட்டங்களுக்கிடையில், அதிர்ந்துபோயிருந்த இந்திய ரசிகர்களில் ஒரு சர்தார்ஜி, அழ ஆரம்பித்துவிட்ட தன் சுமார் 4 வயது பொடியனைத் தேற்றிக்கொண்டிருந்ததும் கேமராவில் சிக்கியது ஒரு கவிதைக்கணம்.

’இந்தியாவுக்கெதிராக ’டை’ என்பது வெற்றிக்குச் சமம். 2018-ல் எங்களின் மிக அபாரமான ஆட்டம் இது’ என்றார் ஆஃப்கானிஸ்தான் கேப்டன் அஸ்கர் ஆஃப்கன் (Asgar Afghan). யார்தான் மறுக்கமுடியும்?

படங்கள் இணையம். நன்றி.
*

க்ரிக்கெட்: இந்தியாவின் தொடர்வெற்றியும், சர்ச்சைகளும்

இரண்டு மாதங்களாக ரசிகர்களைப் பெரும் எதிர்பார்ப்பில், பேரார்வத்தில் உறையவைத்த நான்கு போட்டிகள்கொண்ட இந்திய-ஆஸ்திரேலியா டெஸ்ட் தொடர் தரம்ஷாலாவில்(Dharamshala, Himachal Pradesh) இந்தியாவுக்கு வெற்றியாக நேற்று (28-3-17) முடிவடைந்தது. கோஹ்லி இல்லாத இந்தியா எதிர்த்துவிளையாட, எளிதில் வெற்றிகொள்ள ஏதுவாக இருக்கும் என ஆஸ்திரேலியா கணக்கிட்டிருந்தால் அது தப்புக்கணக்காக அங்கே மாறிப்போனது. தற்காலிகக் கேப்டனான அஜின்க்யா ரஹானே இந்தியாவை சிறப்பாக வழிநடத்தி, இந்தியாவை வெற்றிமேடையில் ஏற்றிவிட்டார். தொடர் 2-1 என்று இந்தியாவின் கணக்கில் வர, பார்டர்-கவாஸ்கர் ட்ராஃபி (Border-Gavaskar Trophy) ஆஸ்திரேலியாவிடமிருந்து மீட்கப்பட்டது.

தரம்ஷாலா மேட்ச்சை ஜெயித்தால்தான் தொடர் என்கிற நிலையில் இரு அணிகளும் மோதின. ஆரம்பத்தில் ஆஸ்திரேலியாவின் பக்கமே முள் சாய்ந்திருப்பதாய்த் தோன்றியது. காயம் காரணமாக விராட் கோஹ்லி ஆடமாட்டார் என்பதே ஸ்மித்தை ஏகமாகக் குஷிப்படுத்தியது. தொலஞ்சான்யா! டாஸையும் வென்றது ஆஸ்திரேலியா. தரம்ஷாலா பிட்ச் இதுவரை அமைந்த பிட்ச்சுகளில் அருமையானதாகத் தோன்றியது. முதலில் ஆடிய ஆஸ்திரேலியா வேகவேகமாக ரன் எடுத்தது. விக்கெட்டுகளும் விழுந்துகொண்டிருந்தன. இதுவரை தொடரில் ஃபார்ம் காண்பிக்காத டேவிட் வார்னர் அரைசதத்தைப் பூர்த்திசெய்தார். சர்ச்சைகள் ஒருபுறமிருக்க பேட்டிங்கில் பின்னி எடுத்தார் ஸ்டீவ் ஸ்மித். இன்னுமொரு சதம் இந்தத்தொடரில். 144-க்கு 1 விக்கெட் என ஆஸ்திரேலியா கம்பீரமாக முன்னேறியது.

லஞ்சுக்குப் போகுமுன்தான் ரஹானேக்கு முதன்முறையாக அணியில் சேர்க்கப்பட்டிருக்கும் இடதுகை ரிஸ்ட் ஸ்பின்னர் குல்தீப் யாதவின் முகம் நினைவில் வந்ததுபோலும். கொஞ்சம் போடச்சொன்னார். லஞ்ச்சில் என்ன சாப்பிட்டாரோ! குல்தீப் வெகுவாக மாறிவந்திருந்தார். அவரது சினமன்(chinaman) பந்துகள் ஆஸ்திரேலியர்களிடம் விளையாட ஆரம்பித்தன! முதலில் ஆபத்தான வார்னரைத் தூக்கி எறிந்து ஆர்ப்பரித்தார். தொடர்ந்து ஹாண்ட்ஸ்காம்ப்(Peter Handscomb), மேக்ஸ்வெல், கம்மின்ஸ் (Cummins) என ஒவ்வொருவராக குல்தீப்பின் ஜாலத்தில் சரிந்தார்கள். ஒருவழியாக 300 வந்து ஆல்-அவுட் ஆனது ஆஸ்திரேலியா. இந்தியா தனது முதல் இன்னிங்ஸை இரண்டாவது, மூன்றாவது நாட்களில் ஆடியதால் ஆஸ்திரேலிய பௌலர்களைக் கையாள்வதில் சிக்கல் எதிர்பார்க்கப்பட்டது. ஆயினும் இந்தத் தொடர் முழுதும் சிறப்பாக ஆடிவரும் கே.எல்.ராஹுல் மீண்டும் ஒரு அரைசதம் எடுத்துக் கைகொடுத்தார். அருமையாக ஆடிய புஜாராவும் அரைசதம். ஆஸ்திரேலிய ஸ்கோரை எப்படியும் தாண்டிவிட மிகவும் மெனக்கெட்டது இந்தியா. ஃபார்மில் இல்லாத கேப்டன் ரஹானே 46 எடுத்தார். பின் வந்த விக்கெட்கீப்பர் சாஹாவும் ஆல்ரவுண்டர் ஜடேஜாவும் பெரிதும் உழைத்தார்கள். குறிப்பாக ஆஸ்திரேலியா வீரர் மேத்யூ வேட் ஓவராக அவரைச் சீண்ட, கம்மின்ஸ் எகிறும் வேகப்பந்துகளினால் ஜடேஜாவைத் தாக்கப் போர்மூண்டது! சூடாகிவிட்ட ஜடேஜா தான் ஒரு ராஜ்புட் என்பதை வீரமாய் விளக்கினார் ! அடுத்தடுத்த கம்மின்ஸ் பந்துகளை பௌண்டரி, சிக்ஸர் எனச் சீறவிட்டு பெவிலியனில் உட்கார்ந்து பார்த்துக்கொண்டிருந்த கோஹ்லியையும், ரசிகர்களையும் குஷிப்படுத்தினார். சாஹா 31, ஜடேஜா 63 என அசத்தினர், சிறப்பாக வீசிய ஆஸ்திரேலியாவின் நேத்தன் லயனுக்கு 5 விக்கெட்டுகள். இந்தியா எடுத்த 332 ஆஸ்திரேலியாவின் மனதில் கிலியை உண்டுபண்ணியிருக்கவேண்டும்.

தொடரைக் கோட்டைவிட்டுவிடக்கூடாதே என்கிற அழுத்தத்தில் இரண்டாவது இன்னிங்ஸை ஆஸ்திரேலியா ஆரம்பித்தது. உமேஷ் யாதவ் வேகத்தினாலும், ரிவர்ஸ் ஸ்விங்கினாலும் ஆஸ்திரேலியர்களை அதிரவைத்தார். ரென்ஷா, வார்னர் இருவரையும் அதிரடியாக வெளியேற்றினார். நிதான ஆட்டத்திற்குப் பேர்போன ஆஸ்திரேலியக் கேப்டனை பீதி கவ்வியது. புவனேஷ்குமாரின் ஸ்விங் பௌலிங்கிற்கு உடனே பலியாகி ஆஸ்திரேலியாவின் வயிற்றில் புளியைக் கரைத்தார் ஸ்மித். மேக்ஸ்வெல்லின் அதிரடி 45-ஐத் தவிர சொல்லிக்கொள்ளும்படி ஏதுமில்லை. 137 ரன்களில் பரிதாபமாக இந்தியாவிடம் சரண் அடைந்தது ஆஸ்திரேலியா. இந்திய பௌலர்களின் உத்வேகப்பந்துவீச்சு மிகவும் பாராட்டுக்குரியது. உமேஷ், ஜடேஜா மற்றும் அஷ்வின் தலா 3 விக்கெட்டுகளை வீழ்த்தினார்கள். ரிஸ்ட் ஸ்பின்னர் குல்தீப் யாதவ் ரன் அதிகமாகக் கொடுத்துவிடக்கூடும் என்கிற பயத்தில் ரஹானே அவருக்கு ஐந்து ஓவருக்குமேல் தரவில்லை.

இந்தியாவுக்கு இலக்கு 106. இத்தகைய சிறிய இலக்குகள் 4-ஆவது நாளில் பெரும் ப்ரச்சினையை பேட்டிங் அணிக்குத் தரவல்லது. இதுவோ இறுதிப் போட்டி. தொடரின் தலையெழுத்தை நிறுவப்போவது. எனவே இந்தியா இலக்கை நோக்கி வழிமேல் விழிவைத்து நகர்ந்தது. இருந்தும் முரளி விஜய் தடுமாறி கம்மின்ஸிடம் வீழ, அதே ஓவரில் இந்தியாவின் Mr.Dependable-ஆன புஜாரா ரன்–அவுட் ஆகிவிட, 46-க்கு இரண்டு விக்கெட்டுகள்; இந்தியாவுக்குத் தலைவலி ஆரம்பித்துவிட்டதோ எனத் தோன்றியது, ஆனால் ராஹுல் தன் நிதானத்தை இழக்காது ரன் சேர்த்துக்கொண்டிருந்தார். அவருடன் ஜோடிசேர்ந்த ரஹானேயை முகத்துக்கெதிரே எகிறும் வேகப்பந்துகளினால் மிரட்டப் பார்த்தார் கம்மின்ஸ். ஆனால் தடுத்தாடி, தடுமாறிவிழும் மனநிலையில் ரஹானே இல்லை. கம்மின்ஸின் எகிறும் பந்துகளை விறுவிறு பௌண்டரிகளாக மாற்றினார். போதாக்குறைக்கு, கம்மின்ஸின் 146 கி.மீ. வேகப்பந்தொன்றை மிட்விக்கெட் திசையில் சிக்ஸருக்கு அனுப்பி ரசிகர்களுக்கு போதையூட்டினார் ஒல்லி உடம்பு ரஹானே! ஆஸ்திரேலியா நிலைகுலைந்தது. இந்தத் தொடர் நமக்கில்லை என்று அதற்குப் புரிந்துவிட்டது. ராஹுல் தன் ஆறாவது அரைசதத்தைப் பூர்த்திசெய்து வெற்றி ரன்களையும் எடுத்தவுடன், மைதானத்தில் ஆட்டம் ஆடி, கோஹ்லி அங்கில்லாத குறையை ரசிகர்களுக்காக நிவர்த்தி செய்தார். வெற்றிக்கு அடையாளமாக ஒரு ஸ்டம்ப்பை மட்டும் பிடுங்கி எடுத்துக்கொண்டு அமைதியாக நடந்தார் அஜின்க்யா ரஹானே. இளம் ரசிகர்களின் கூச்சல், ஆரவாரத்தில் தரம்ஷாலா அதிர்ந்து எழுந்தது. கோஹ்லி மைதானத்துக்குள் ப்ரவேசித்து வீரர்களோடு கைகுலுக்கி மகிழ்ந்தார். தொடரின் விதியை நிர்ணயித்த தரம்ஷாலா மேட்ச்சில் ரஹானே காட்டிய அமைதியான ஆனால் அழுத்தமான தலைமை மறக்க இயலாதது.

இத்தொடர் பற்றிய முதல் கட்டுரையில் நான் கூறியபடி இது ஒரு அபாரத் தொடராக நடந்துமுடிந்தது. இருதரப்பிலிருந்தும் அபரிமித ஆட்டத் திறமைகளின் வெளிப்பாடுகள், மைதானத்துக்குள்ளும் வெளியேயும் அதிரடிச் சச்சரவுகள் என ரசிகர்களையும், விமர்சகர்களையும் இறுதிவரை சீட்டின் நுனியில் வைத்திருந்தது. குறிப்பாக ஆஸ்திரேலியக் கேப்டன் ஸ்மித்தின் DRS தப்பாட்டம்பற்றி பெங்களூரில் விராட் கோஹ்லி வீசிய குண்டு, ஆஸ்திரேலிய கிரிக்கெட் வாரியத்தையும், ஏன் ஐசிசி-யையும்கூட அதிரவைத்தது. பதிலாக, தன் மூளை ஒருகணம் மழுங்கிவிட்டதாகவும் அது தவறுதான் என்றும் ஸ்மித் வழிந்த கோலாகலக் காட்சி அரங்கேறியது! ஹேண்ட்ஸ்காம்ப் தனக்கு DRS-பற்றி சரியாகத் தெரிந்திருக்கவில்லை எனத் தன் கேப்டனோடு ஒத்து ஊதி ஹாஸ்யத்தை அதிகப்படுத்தினார். இந்தியக் கிரிக்கெட் வாரியம் வீடியோ ரெகார்டிங்கோடு ஸ்மித்திற்கு எதிராக ஐசிசி-யிடம் குற்றம்சாட்டப்போய், திக்குமுக்காடிய ஆஸ்திரேலிய கிரிக்கெட் இந்தியாவிடம் உடனடியாகப்பேசி சமரசம் செய்துகொள்ளுமாறு நேர்ந்தது. விவ் ரிச்சர்ட்ஸ், டேல் ஸ்டெய்ன், டூ ப்ளஸீ ஆகியோரிடம் தனது ஆவேச அதிரடிகளுக்காகப் பாராட்டுப்பெற்றார் கோஹ்லி. நேர்மாறாக, ஆஸ்திரேலியா மீடியா விராட் கோஹ்லியை அவமதிப்பதில், குறைசொல்வதில் முனைப்பு காட்டியது. ஆஸ்திரேலிய வீரர்கள் இந்தியவீரர்களை மைதானத்தில் வார்த்தைகளால் சீண்டுவது, பழித்துக்காட்டுவது கடைசிப் போட்டிவரை தொடர்ந்துகொண்டுதான் இருந்தது. தோல்விபயம் தங்களைப் பற்றிக்கொள்ள என்ன செய்வதெனத் தெரியாதுவிழித்த ஸ்மித் குழுவினர் எப்பாடுபட்டாகிலும் இந்தியர்களின் ஆட்டகவனத்தைக் குலைக்க முற்பட்டனர். விளைவு தரம்ஷாலாவின் இந்திய முதல் இன்னிங்ஸில் ஜடேஜாவின் அபார பேட்டிங்கின்போது ஆஸ்திரேலிய விக்கெட்கீப்பர் மேத்யூ வேட் (Mathew Wade) விஷம வார்த்தைகளினால் ஜடேஜாவின் கவனம் கலைக்கமுயன்றது, முரளிவிஜய்யின் லோ-கேட்ச் அனுமதிக்கப்படாதபோது பெவிலியனில் உட்கார்ந்திருந்த ஸ்மித் விஜய்யை கெட்டவார்த்தைகளால் திட்டி, டெலிவிஷன் கேமராவில் சிக்கியது என ஒரே ரணகளம். தொடரின் இறுதியில் தன்னுடைய சில நடத்தைகளுக்காக மன்னிப்புக் கேட்டார் ஸ்மித். ’‘ஆஸ்திரேலிய வீரர்கள் எனது நண்பர்கள் என ஆரம்பத்தில் நான் சொன்னது உண்மைதான். ஆனால் அது இப்போது மாறிவிட்டது; இனி நான் அப்படிச்சொல்வதை நீங்கள் கேட்க வாய்ப்பில்லை !’’ என்று மனதில் உள்ளதைப் போட்டுடைத்தார் கோஹ்லி. மொத்தத்தில் பெரும் ஆர்வத்தை உலகெங்குமுள்ள க்ரிக்கெட் ரசிகர்கள், வீரர்கள், நிபுணர்களிடையே கிளர்ந்தெழவைத்த டெஸ்ட் தொடர் இது. Most riveting Test series ever played in recent times.

2016-17 க்ரிக்கெட் சீஸன் இந்தியாவுக்கு இனிதாக முடிந்தது. இந்தக் காலகட்டத்தில் விராட் கோஹ்லி, முரளி விஜய், கே.எல்.ராஹுல், ரவீந்திர ஜடேஜா ஆகியோர் தலா 6 அரைசதங்களை எடுத்து அசத்தினார்கள். கோஹ்லி 3 இரட்டை சதங்களையும், புஜாரா ஒரு இரட்டை சதத்தையும் விளாசி முத்திரை பதித்தனர். இங்கிலாந்துக்கெதிராக சென்னையில் கருண் நாயர் அடித்த முச்சதமும் இந்த சீஸனின் மகத்தான அம்சங்களில் ஒன்று. பௌலிங்கில் உமேஷ் யாதவ், அஷ்வின், ஜடேஜாவின் பங்களிப்பு மகத்தானது. தொடரில் அதிக விக்கெட்டுகளை சாய்த்த ஜடேஜா முதன்முறையாக ஐசிசி தரவரிசையில் முதல் இடத்தைப்பெற்றுள்ளார். அஷ்வினுக்கு இரண்டு ஐசிசி விருதுகள். இந்திய அணி அபாரமாக டெஸ்ட்டுகளை ஆடி 4 தொடர்களைக் கைப்பற்றிய காலமாக இது பேசப்படும். இனி வெளிநாட்டு மைதானங்களிலும் தன் திறமை காட்ட இது அணியினை உற்சாகப்படுத்தும். எனினும், அதற்கு இன்னும் நாளிருக்கிறது. அதற்குள் கொஞ்சம் ஐபிஎல் ஆடலாம் !

**

பெங்களூர் டெஸ்ட்: இந்தியாவின் ’பழிக்குப்பழி’ வெற்றி

சுழல் தந்த திடீர் திகில் க்ளைமாக்ஸில் ஆஸ்திரேலியாவை சரணடையவைத்து இரண்டாவது டெஸ்ட் மேட்ச்சைக் கைப்பற்றிவிட்டது இந்தியா. பெங்களூரில் பந்துவீச்சு, வார்த்தைவீச்சு என அனல் பறக்க ரசிகர்களை, கிரிக்கெட் விமரிசகர்களை எகிறவைத்த அதிரடிப்போட்டி, இரண்டு அணிகளையும் வெகுவாக சூடேற்றியிருக்கிறது. தொடர் 1-1 என்று சமன்படுத்தப்பட்ட நிலையில் அடுத்த களமான ரான்ச்சி (16-03-2017) பெரும் எதிர்பார்ப்பைக் கிளப்பியிருக்கிறது.

புனேயின் பிட்ச் போலில்லாவிட்டாலும், இதுவும் ஸ்பின்னிற்கு துணைபோகும்தான் எனத் தயார்செய்துகொண்டுதான் ஆஸ்திரேலியா பெங்களூரின் சின்னசாமி ஸ்டேடியத்தில் கால்வைத்தது. புனேயில் இந்திய ஸ்பின்னர்களுக்குத் தண்ணிகாட்டி, இந்திய பேட்டிங்கை முறித்து ஒரேயடியாக வீழ்த்திவிட்டதில் கண்ட பெருமிதம் ஆஸ்திரேலியர்களின் முகத்தில் வெளிச்சமாய்த் தெரிந்தது. கோஹ்லியின் தலைமையிலான இந்தியாவோ அடிபட்ட நாகமெனக் கொதித்திருந்தது. அது எப்போது சீறும், எப்போது கொட்டும் எனத் தெரியாத ஆஸ்திரேலியர்கள் கோஹ்லியையும் மற்றவர்களையும் ஆட்டத்தினூடே கமெண்ட் அடித்து, அவர்களது கவனத்தைக் கலைத்துச் சீண்டுவதில் சுகம் கண்டனர். கோஹ்லியும் ஆஸ்திரேலிய கேப்டன் ஸ்டீவ் ஸ்மித்தை விடுவதாக இல்லை. தீவிரக் க்ரிக்கெட்டோடு, கடும் உளவியல் அழுத்தப்போட்டியும் அரங்கேறியிருந்தது பெங்களூர் மைதானத்தில். ’நீயா! நானா! பார்த்துவிடுவோம்!’ என்று புஸ்..புஸ் என்று ஒருவர்மீது ஒருவர் நெருப்புப்புகை விட்டுக்கொண்டிருந்த வரலாற்றுப்போட்டி!

இந்தியா டாஸ் வென்று முதல் பேட்டிங் செய்ததே தவிர அதனை சரியாகப் பயன்படுத்திக்கொள்ளவில்லை. போட்டியின் முதல்நாள் காலையில் முரளி விஜய்க்குக் காயம் என அறிவிக்கப்பட்டு அவர் நீக்கப்பட்டார். பதிலாக, ஐந்து வருடங்களுக்குப்பிறகு தலைகாட்டிய அபினவ் முகுந்த் (தமிழ்நாடு கேப்டன்) கே.எல்.ராஹுலுடன் துவக்க ஆட்டக்காரராக இறங்கினார். ரன் சேர்க்க மறந்துபோனார். கேப்டன் கோஹ்லி? அவருக்கும் பேட்டிங் மறந்துவிட்டது என்றே தோன்றுகிறது. ஆஸ்திரேலியர்கள் கேலிசெய்வதற்கு ஏதுவாக, அற்பத்தனமாக ஆடி அவுட்டானார். புஜாரா, ரஹானே, அஷ்வின், சாஹா, ஜடேஜா ..இவர்களெல்லாம் எதற்காக மட்டையைப் பிடித்துக்கொண்டூ மைதானத்தில் இறங்கினார்கள் என்றே தெரியவில்லை. நேத்தன் லயனின் (Nathan Lyon) அபார சுழல்வீச்சில் இந்தியர்கள் தவிடுபொடியானார்கள். கே.எல்.ராஹுல் மட்டும், வாங்குகிற சம்பளத்துக்கு ஏதாவது செய்யவேண்டும் என்று நினைத்தார் போலும். பெருங்கவனத்துடன் போராடி ஆடினார். கடைசியில் துணையாக சரியாக ஜோடி இல்லாத நிலையில், நேத்தன் லயனைத் தூக்கி அடிக்க முயற்சித்து 90 ரன்களில் அவுட்டானார். லயனுக்கு 8 விக்கெட்டுகள். இந்தியா வெறும் 189. முதல் நாள் பேட்டிங் ஆடிய லட்சணம் இது. ஸ்மித் & கம்பெனியின் குதூகலத்திற்கு ஓர் எல்லையில்லை.

தொலையட்டும்; ஆஸ்திரேலியா ஆடவருகையில் அவர்களை நமது ஸ்கோரை நெருங்கவிடாமல் நொறுக்கித்தள்ளியிருக்கவேண்டாமா? அதுதான் இல்லை. ஆஸ்திரேலியாவின் ப்ரமாதமான 20-வயது துவக்கவீரர் மேட் ரென்ஷா (Matt Renshaw) (60), ஷான் மார்ஷ் (66), மேத்யூ வேட்(Mathew Wade)(40) என்பவர்களின் முதுகில் சவாரிசெய்த ஆஸ்திரேலியா, முன்னேறி 276 அடித்துவிட்டது. அஷ்வின் அருமையாகப் போட்டும், ரன்கொடுப்பதைக் குறைக்கமுடிந்ததே தவிர, விக்கெட் சரியவில்லை. ஆனால் கோஹ்லியால் குறைவாகப் பயன்படுத்தப்பட்ட ரவீந்திர ஜடேஜா, 6 விக்கெட்டுகளை அனாயாசமாக வீழ்த்தினார். ஆஸ்திரேலியா 85 ரன் முன்னிலை என்ற நிலையில், இந்தியா இந்த மேட்ச்சிலும் காலி என்பதே பெரும்பான்மையோரின் சிந்தனையாக ஆகியிருந்தது.

வெடிப்புகள் தெரிய ஆரம்பித்த இத்தகைய பிட்ச்சில் மூன்றாவது நாள் ஆடுவது எளிதானதல்ல. அதுவும் தடவிக்கொண்டிருக்கும் இந்திய பேட்ஸ்மன்கள் என்ன செய்வார்கள் என்று எல்லோரும் யூகித்திருந்தார்கள். ஆனால் கதை கொஞ்சம் வித்தியாசமாக அமைந்துவிட்டது. முதல் நாளில் துல்லியமாக வீசி இந்தியாவை எளிதில் சுருட்டிய நேத்தன் லயனை, இரண்டாவது இன்னிங்ஸில் சரியாக ஆடிவிட்டார்கள் நம்மவர்கள். அவருக்கு ஒரு விக்கெட்டும் விழவில்லை. புனேயில் இந்தியாவை அதிரவைத்த ஓ’கீஃப் இங்கே பெரிதாக ஒன்றும் செய்யமுடியவில்லை. இருந்தும் வேகப்பந்துவீச்சாளர் ஜோஷ் ஹாஸ்ல்வுட்டின்(Josh Hazlewood) ப்ரமாத பந்துவீச்சில் இந்திய விக்கெட்டுகள் பலியாகிக்கொண்டிருந்தன. கே.எல்.ராஹுல் பொறுப்பாக ஆடி இன்னுமொரு அரைசதம் எடுத்துத் துணையிருந்தார். செத்தேஷ்வர் புஜாரா(Cheteshwar Pujara) அபாரமாக ஆட, கோஹ்லியைப்போலவே இதுவரை ஃப்ளாப்-ஆகிக்கொண்டிருந்த ரஹானே இந்த முறை முழித்துக்கொண்டு ஒழுங்காக ஆடினார். இந்தியாவுக்கு எதிர்பாராத 118-ரன் பார்ட்னர்ஷிப் அமைய, ஆஸ்திரேலியாவின் தலைவலி ஆரம்பித்தது. 4-ஆவது நாளில் தொடர்ந்து ஆடிய இந்தியா வழக்கம்போல் வேகமாக விக்கெட்டுகளை இழந்தது. புஜாரா 92, ரஹானே 52, சாஹா 20(நாட் அவுட்). இந்தியா இரண்டாவது இன்னிங்ஸில், ஆஸ்திரேலியாவின் திறமையான பந்துவீச்சு மற்றும் கூர்மையான ஃபில்டிங்கிற்குமுன் போராடி 274 எடுத்ததே நம்பமுடியாததாக இருந்தது.

ஆஸ்திரேலியாவுக்கு தரப்பட்டது 188 ரன் இலக்கு. 4-ஆவது, 5-ஆவது நாட்களில் இதனை அடைந்துவிட்டால் தொடரில் அசைக்கமுடியாத ஒரு வலுவான நிலை அதற்கு கிடைத்துவிடும். கடினமான இலக்குதான். இருந்தும் ஆஸ்திரேலிய பேட்ஸ்மன்கள், குறிப்பாக ரென்ஷா, ஸ்மித், ஹாண்ட்ஸ்கோம்ப் (Peter Handscomb), ஸ்டார்க் என்று நல்ல ஃபார்மில் இருப்பதால் நம்பிக்கையுடன் ஆட ஆரம்பித்தது ஆஸ்திரேலியா. அஷ்வினிடம் மீண்டும் விழுந்தார் வார்னர். (இதுவரை அஷ்வின் வார்னரை டெஸ்ட்டுகளில் 9 தடவை அவுட் ஆக்கியுள்ளார். ஜோடிப்பொருத்தம்!) ரென்ஷா இஷாந்திடம் காலியாக, 2 விக்கெட்டுக்கு 42 வெறும் 9 ஓவர்களில். வேகமாகப் போய்க்கொண்டிருந்த ஆஸ்திரேலியாவுக்கு ப்ரேக் கொடுக்க நினைத்து அஷ்வினைத் திருப்பிக் கூப்பிட்டார் கோஹ்லி. அஷ்வினிடம் விக்கெட்டை இழக்காமல் தடுத்து ஆடவேண்டும் என்பது ஆஸ்திரேலியாவின் பொதுவான இந்தத் தொடருக்கான ப்ளான். முதல் இன்னிங்ஸில் 49 ஓவர்கள் போட்டும் அஷ்வினுக்கு இரண்டே விக்கெட்டுகள்தான். ஆனால் இதுவோ 4-ஆவது நாள் விளையாட்டு. அஷ்வினைத் தடுத்து ஆடுவது பிரச்னையை உண்டுபண்ணும் என நினைத்து அடித்து ஆட ஆரம்பித்தார் ஸ்மித். இந்த சமயத்தில் ஷான் மார்ஷ் உமேஷ் யாதவிடம் எக்கச்சக்கமாக மாட்டினார். DRS கேட்டிருக்கவேண்டும். ஸ்மித் சொன்னதை சரியாகப் புரிந்துகொள்ளாமல் மார்ஷ் வெளியேற, 67-க்கு 3 விக்கெட் என்றானது. பயப்பட ஒன்றுமில்லை 7 விக்கெட் பாக்கியிருக்கிறது 120 ரன் தானே எடுக்கவேண்டும். ஆனால் உமேஷ் யாதவின் யார்க்கர்-நீளப் வேகப்பந்துகள் எகிற மறுத்து, கீழே தடவிச்சென்று பேட்ஸ்மனின் பாதத்தில் மோதி மோசம் செய்தன. அப்படி ஒரு பந்தில் ஸ்மித் எல்பிடபிள்யூ கொடுக்கப்பட்டார். DRS review கேட்கலாமா வேண்டாமா என்பதாக எதிரே நின்றிருந்த ஹாண்ட்ஸ்காம்போடு பேசினார். தவறில்லை. ஆனால் மேலும் குழம்பி, மைதானத்தில் (டிவி-யோடு உட்கார்ந்திருக்கும்) தங்கள் அணியினரிடமிருந்து இதுகுறித்து சிக்னல் பெற முயன்றார் ஸ்மித். This is not at all allowed. இந்தப் பித்தலாட்டத்தைக் கவனித்த கோஹ்லி இடையிலே புகுந்து சீற, அம்பயர் நைஜல் லாங் ‘நோ!..நோ!’ என அலறிக் குறுக்கிடவேண்டிவந்தது. (மேட்ச் முடிந்தபின்னும் கோஹ்லி இந்த சர்ச்சைபற்றி, ஆஸ்திரேலிய கேப்டன் ஸ்மித்தின் தில்லுமுல்லுபற்றி, நேர்காணலில் ஓபனாகப் போட்டுத்தள்ள, இது ஒரு பெரும் சர்ச்சையாகி விஸ்வரூபமெடுத்துள்ளது. உலகெங்கும் நிபுணர்களும், பழைய புலிகளும் இதனைக் கூர்மையாகக் கவனித்துவருகின்றனர்.) ஸ்மித் வேறுவழியின்றி நடையைக் கட்டுகையில் ஸ்கோர் 74-க்கு 4 ஆனது. ஆஸ்திரேலியாவின் பதற்றம் தெளிவாகத் தெரிந்தது. இந்தியாவின் உற்சாகமோ கோஹ்லியின் வடிவில் பொங்கித் தெறித்தது!

குழப்பத்தைத் தலையில் சுமந்துகொண்டு ஆஸ்திரேலியா ஆடிக்கொண்டிருந்தது. மிட்ச்செல் மார்ஷ் அவுட் ஆகையில், 5 விக்கெட் இழப்பிற்கு 101 ரன்கள் எடுத்திருந்த ஆஸ்திரேலியாவுக்கு ஜெயிக்க 87 ரன்களே தேவைப்பட்டது. இன்னும் 5 விக்கெட்டுகள் கைவசம். வண்டியை இலக்கை நோக்கி ஓட்டிவிடலாம் எனத்தான் ஆஸ்திரேலியா நினைத்திருக்கவேண்டும். ரசிகர்களையும் இப்படியான சிந்தனையே ஆட்கொண்டிருந்தது. ஆனால் அந்த மாலையில், அஷ்வினின் கணக்கோ வேறுவிதமாக இருந்தது. ஹாண்ட்ஸ்காம்ப், வேட், ஸ்டார்க் எனப் பிடுங்கி எறிந்து ஆஸ்திரேலியாவின் மிடில் ஆர்டரை முறித்தார் அஷ்வின். ஆரம்பித்தது கோஹ்லியின் ருத்ர தாண்டவம். ரசிகர்களின் பக்கம் திரும்பி கைகாட்டி ஏத்திவிட்டார் மனுஷன்! ரசிகர்கள் போதையில் எழுந்தாட, இந்தியக்கொடிகளும் சேர்ந்துகொண்டன. ஆஸ்திரேலியாவின் மூடுவிழா நடந்துகொண்டிருந்தது. கடைசி இரண்டு விக்கெட்டுகளான ஓ’கீஃபையும், லயனையும் முறையே ஜடேஜாவும், அஷ்வினும் லபக்க, ஆஸ்திரேலியாவின் பெங்களூர் தீர்த்த யாத்திரை, இந்தியாவுக்கு இனிதாக முடிந்தது.

இந்த ஆட்டத்தின்போது ஆஸ்திரேலியாவின் தரப்பிலிருந்து ஒரே அலட்டல், பீற்றல் வெளிப்பட்டது. இந்தியாவின் இரண்டாவது இன்னிங்ஸில் கருண்நாயரை ’டக்’ அவுட் செய்த ஆவேசத்தில் ஸ்டார்க் அவர் முன்னே சென்று ‘கமான்!’ என்றதோடு, மேலும் முன்னேறி ‘நாலெழுத்து’ கெட்டவார்த்தையை அவர் மீது வீசினார். கருண் நாயரிடமிருந்து ரியாக்ஷன் இல்லை. புஜாரா, கோஹ்லி விளையாடுகையில் கிண்டல்கள் அதிகமாக இருந்தது. முதல் நாளில் இந்தியாவின் 8 விக்கெட்டுகளை, குறிப்பாக விராட் கோஹ்லியின் விக்கெட்டையும் சாய்த்த ஸ்பின்னர் நேத்தன் லயன் குஷி மூடில் கூறியது இது: ’’எங்களுக்குத்தெரியும். பாம்பின் தலையை வெட்டிவிட்டால் உடல் சரிந்து விழுந்துவிடும் என்று!’’. ஆட்டம் முடிந்தபின் பேசுகையில், தன் தலைமையில் இது மிகவும் இனிப்பான வெற்றி என்று கூறிய கோஹ்லி, ஆஸ்திரேலியாவை சீண்டத் தவறவில்லை. ’தலை வெட்டப்பட்டாலும் இந்தப் பாம்பு கொட்டிவிடும் என்பது நிரூபிக்கப்பட்டுள்ளது!’ என்றார். ’என் விக்கெட்டை எடுத்துவிட்டதாலேயே இந்தியாவை எப்போதும் ஜெயித்துவிடமுடியாது. மற்றவர்கள் இருக்கிறார்கள்; கவனித்துக்கொள்வார்கள். நாங்கள் ஒரு அணி !’ என்றார் மேலும்.

வீரவசனங்கள் பேசியாயிற்று. மார்ச் 16-ல் தொடங்கும் ரான்ச்சி (ஜார்கண்ட்) கதை எப்படிச் செல்லுமோ ! இந்தியா பெங்களூர் டெஸ்ட்டை வென்றுவிட்டதே ஒழிய, அதன் பேட்டிங் ப்ரச்சினைகள் இன்னும் சரிசெய்யப்படவில்லை என்பதை மறந்துவிடமுடியாது. குறிப்பாக கோஹ்லி நேரே வரும் பந்தை சரியாக யூகிக்காமல், அவசரப்பட்டு மட்டையை மேலேதூக்கி, எல்பிடபிள்யூ ஆகிற அசட்டுத்தனத்திலிருந்து விரைவில் விடுபடவேண்டும். அவர் நன்றாக பேட்டிங் செய்துவிட்டு வாயைத் திறந்தால் நல்லது . இருந்தாலும், எப்படியும் இந்தியாவை ஜெயித்துவிடவேண்டும் என்று மைதானத்திலும், மைதானத்துக்கு வெளியேயும் ஏதேதோ செய்துகொண்டிருக்கும் ஆஸ்திரேலியா போன்றதொரு அணியை எதிர்கொள்கையில், இந்தியக் கேப்டனாக அவர் பேசாமல் இருக்கமுடியாதுதான் !

**

க்ரிக்கெட்: இந்திய வெற்றியில் யுவராஜ் – தோனி ஷோ !

ஒதிஷாவின் கட்டக்கில் (Cuttack) நேற்று (19-1-17) நடந்த இரண்டாவது ஒரு நாள் கிரிக்கெட் போட்டியில் யுவராஜ்-தோனி ஜோடியின் மறக்கமுடியாத மட்டையாட்டம், கடுமையாகப் போராடிய இங்கிலாந்துக்கெதிராக, இந்தியாவுக்குத் தொடர் வெற்றியைப் பெற்றுத் தந்தது.

முதலில் பேட் செய்த இந்தியா வழக்கம்போல் தடுமாறியது. ராஹுல், தவண், கோஹ்லி ஆகிய புலிகள் ஆட ஆரம்பிக்கும் முன்னரே, துல்லிய வேகம் காட்டிய இங்கிலாந்தின் க்றிஸ் வோக்ஸினால் (Chris Woakes) பெவிலியனுக்குத் திருப்பி அனுப்பப்பட்டனர். இந்தியா 25, மூணு விக்கெட் காலி! இந்த நேரத்தில், அந்தக் காலத்திய கனவு ஜோடி களத்தில் இறங்கியது. யுவராஜ் சிங்-எம்.எஸ்.தோனி! ரசிகர்களிடத்தில் அவ்வளவு நம்பிக்கை இல்லை. ஏனோதானோவென 30, 40 அடித்து இவர்களும் மூட்டை கட்டிவிடுவார்கள் என்கிற நினைப்புதான் மேலோங்கியிருந்தது. இந்தியா 300-ஐத் தொட்டுவிடுமா? தொட்டாலும் போதுமா இங்கிலாந்தை வீழ்த்த? விடைதெரியாக் கேள்விகள் காற்றில் மிதந்தன.

யுவராஜிற்கு இதுவே கடைசி சான்ஸ். இதில் அல்ப ஸ்கோரில் வீழ்ந்தால் அடுத்த மேட்ச்சில் இல்லை. இனி இந்திய அணிக்கு திரும்ப வாய்ப்பில்லை. வாழ்வா, சாவா? இன்று நான் என்ன செய்யப்போகிறேன்? பஞ்சாப் வீரரின் மூளை கதகதத்து விடை தேடியது. வழக்கத்துக்கு மாறாக ஜாக்ரதையான ஆட்டம். அடுத்த முனையிலோ, அதைவிட மிதமாகன ஆட்டத்தை வெளிப்படுத்தினார் முன்னாள் கேப்டன் தோனி. இங்கிலாந்தின் குஷி வெளிச்சம் காட்டியது: ஃபார்மில் இல்லாத இவர்கள் எந்த நிலையிலும் அவுட் ஆகிவிடுவார்கள் !

ஆனால், கட்டக்கின் மாலைப்பொழுது வேறொரு கதை எழுத ஆரம்பித்திருந்தது. காலம் யுவராஜ், தோனியை மீண்டும் திரைக்குக் கொண்டுவந்து காட்ட விரும்பியதுபோலும். அரைசதத்தை நிதானமாகக் கடந்த யுவராஜ், தன் வழக்கமான ஷாட்டுகளுக்குத் திரும்பினார். தோனியும் அவ்வப்போது விளாசிப் பார்த்தார். 30 டிகிரி மிதமான வெப்பத்தில், கட்டக் கூட்டம் கூல்ட்ரிங்ஸ், ஐஸ்க்ரீம் ஏந்தி உற்சாகமாகி, எதிர்பார்க்க ஆரம்பித்தது: பெரிசுகள் ரெண்டும் இன்னிக்கு ஏதோ செய்யப்போறதுகள் !

அதிரடிக்குத் திரும்பிய யுவராஜ் முன்னேறி, வெகுநாட்களுக்குப்பின் சதம் கண்டார். மேலே நிமிர்ந்து சிலநொடிகள் ஆகாசத்தைப் பார்த்தார். தோனி அருகில் வந்து தட்டிக்கொடுக்க, தன் மார்பில் டார்ஜான் போல பேட்டினால் குத்திப் பெருமைப்பட்டு க்ரீஸுக்குத் திரும்பினார் யுவராஜ். (கைதட்டிப் பாராட்ட அவரது இளம் மனைவி ஏனோ மைதானத்தில் இல்லை!) பழைய யுவராஜ் கம்பீரமாய் ப்ரசன்னமாகியிருக்க, இங்கிலாந்து திடுக்கிட்டது. இதுவரை பொறுமையாக ஆடிய தோனியும் தன் கைவரிசையைக் காட்ட ஆரம்பித்துவிட்டார். பௌலர்கள் வேகவேகமாக மாற்றப்பட்டனர். ஃபீல்டர்கள் இந்தக்கோடிக்கு அந்தக்கோடி எனப் பறந்தனர். பலனில்லை. பார்ட்னர்ஷிப் 200 ரன்களைக் கடந்து இங்கிலாந்தைக் கலவரமாக்கியது.

45-ஆவது ஓவரில் இந்தியா 300-ஐத் தாண்டி சீறியது. ப்ரமாதமாக ஆடிய யுவராஜ் 150 ரன்களில் அவுட்டானார். தோனி 134 ரன்கள் (6 சிக்ஸர்கள்) எடுத்து ஸ்கோரை வெகுவாக ஏற்றிவிட்டார். பிறகு வந்த கேதார் ஜாதவ் (22), அவுட் ஆகாமல் இருந்த ஹர்தீக் பாண்ட்யா(19), ரவீந்திர ஜடேஜா(16) என பௌண்டரி, சிக்ஸராகப் படபடக்க, இந்தியா சற்றும் எதிர்பாராவிதமாக ஸ்கோரை 381 க்கு 6 விக்கெட் என உயர்த்தி, ஆட்டத்தை முடித்துக்கொண்டது.

கட்டக்கின் பிட்ச் பேட்ஸ்மன்களின் சொர்க்கம். பௌலர்களின் நரகம். சிறிய மைதானமாதலால் இங்கிலாந்து சவாலை ஏற்று சிறப்பாக ஆடியது. துவக்க ஆட்டக்காரர் ஜேசன் ராய் (82), ஜோ ரூட் (54) மூலம் எகிற ஆரமபித்தது இங்கிலாந்து. ரன் சராசரியை 7-க்கு அருகில் ஆரம்பத்திலிருந்தே வைத்திருந்து போராடியது. இங்கிலாந்து கேப்டன் ஆய்ன் மார்கன் (Eoin Morgan) சிறப்பான எதிர்ப்பு ஆட்டத்தை வெளிப்படுத்தினார். அவ்வப்போது அவரிடமிருந்து ஆக்ரோஷமான ஷாட்டுகள் பௌண்டரி, சிக்ஸர் எனப் பதம் பார்த்தன. இங்கிலாந்தின் நம்பிக்கை வளர்ந்தது. ஆல்ரவுண்டர் மோயின் அலி தன் பங்கை சிறப்பாகச் செய்து ரன் வேகத்தை மேலேற்றினார். அவர் 55 ரன்னில் அவுட்டானதும் இங்கிலாந்து தடுமாற ஆரம்பித்தது. ஆயினும் மார்கன் நம்பிக்கை இழக்காது இந்திய பௌலர்களைத் தொடர்ந்து தாக்கினார். 82 பந்துகளில் சதம் விளாசிய இங்கிலாந்து கேப்டன் 49-ஆவது ஓவரில் ரன் –அவுட் ஆனார். லியாம் ப்ளன்கெட் ( Liam Plunkett) சிறப்பாக ஆடியும், டெத் ஓவர்களில் (death overs) பந்துவீசிய புவனேஷ்வர் குமாரும், ஜஸ்ப்ரீத் பும்ராவும் வெகு பிரயாசைப்பட்டு இங்கிலாந்தை இலக்கை நெருங்கவிடாமல் தடுத்துவிட்டனர். இறுதியில் கோஹ்லியின் இந்தியா 15 ரன் வித்தியாசத்தில் இங்கிலாந்தை தோற்கடித்து தொடரையும் கைப்பற்றியது. இடையிடையே நெருக்கடியில் இருந்த கட்டக் ரசிகர் கூட்டம், நிம்மதிப்பெருமூச்சு விட்டது !

இங்கிலாந்திடம் இந்திய பௌலர்கள் செம்மையாக அடிவாங்கிக்கொண்டிருந்தவேளையில், ரவீந்திர ஜடேஜா மிகவும் பிரமாதமாக வீசி 45 ரன் மட்டுமே கொடுத்து 1 விக்கெட் வீழ்த்தினார். அஷ்வின் 63 ரன் கொடுத்தாலும், 3 விக்கெட்டுகளை சாய்த்தார். புவனேஷ்வருக்கு ஒன்று; பும்ராவுக்கு இரண்டு விக்கெட்டுகள். இங்கிலாந்தின் தரப்பில் க்றிஸ் வோக்ஸ் 4 விக்கெட்டுகளை வீழ்த்தினார். மற்றவர்களை பெண்டெடுத்துவிட்டார்கள் இந்திய பேட்ஸ்மன்கள். யுவராஜ் எதிர்பார்த்தபடி ஆட்டநாயகனானார்.

கோஹ்லி & கோ., கல்கத்தாவில் தொடரின் இறுதி போட்டியை 22 ஜனவரியில் விளையாடவிருக்கிறது. கே.எல்.ராஹுல், ஷிகர் தவன் ஆகியோர் அங்கே ஏதேனும் செய்யும் உத்தேசமுண்டா ?

**

டி-20: ராஞ்சியில் இந்தியா வெற்றிமுகம்

ராஞ்சி (ஜார்கண்ட்)-யில் நேற்று(12-2-16) நடைபெற்ற இரண்டாவது டி-20 போட்டியில், தோனியின் ரசிகர்கள் எதிர்பார்த்தபடி, ஸ்ரீலங்கா இந்தியாவிடம் நொறுங்கியது !

ஆக்ரோஷமே, உன் பெயர்தான் இந்தியாவா!

புனேயின் க்ரீன் டாப் பிட்ச்சிற்கு நேர் எதிரானது, பந்து அதிகம் குதிக்காத ராஞ்சியின் ஸ்லோ பிட்ச். டாஸ் வென்ற ஸ்ரீலங்கா, இந்தியாவை முதல் பேட்டிங்கிற்காக இறங்கச் சொன்னது. ஏற்கனவே தலையில் அழுந்தக் குட்டுப்பட்டிருந்த இந்திய வீரர்கள், இம்முறை தங்களின் சுயரூபத்தைக் காண்பிக்க வந்திருந்தனர் போலும். துவக்க வீரர் ஷிகர் தவணின் ஆவேசத் தாக்குதலில் அது தெளிவானது. பூனேயில் ஸ்ரீலங்க பௌலிங் ஹீரோவான கசுன் ரஜிதா (Kasun Rajitha) குறிவைத்து நையப் புடைக்கப்பட்டார். இந்திய துவக்க ஆட்டக்காரர்களின் கோபத்துக்கு ஈடுகொடுக்க முடியாமல், ஸ்ரீலங்க பந்துவீச்சாளர்கள் ஓவருக்கு 10, 11 ரன்களை தாரை வார்த்தனர். 25 பந்துகளில் 7 பௌண்டரி, 2 சிக்ஸர் என அரைசதம் விளாசி இந்தியாவுக்கு செம துவக்கத்தைத் தந்தார் தவண். அடுத்த பக்கத்தில் ரோஹித் ஷர்மா 36 பந்துகளில் 43 ரன் என புழுதிபறக்கவிட்டார். 11 ஓவர்களில் இந்திய ஸ்கோர் 100-ஐத் தாண்டியிருந்தது. ரோஹித், ரஹானேவுக்குப் பின் வந்த சுரேஷ் ரெய்னா-ஹர்தீக் பாண்ட்யா(Hardik Pandya) ஜோடி கியரை மாற்றியது. வேகம் மேலும் எகிற, ராஞ்சி ரசிகர்களுக்கு போதை தலைக்கேறியது. அடுத்தடுத்து 2 சிக்ஸர்களை அனாயாசமாக விளாசி, 12 பந்துகளில் 27 ரன் எடுத்து ஸ்ரீலங்காவை கிடுகிடுக்கவைத்தார் பாண்ட்யா. ரெய்னா 19 பந்துகளில் 30 ரன் (5 பவுண்டரிகள்). வேகத்தைத் துரத்திய இருவரும் வீழ்ந்தனர் அடுத்தடுத்த பந்துகளில். அடுத்து வந்த, பழைய ரெப்யுடேஷனில் ஓடும் வண்டியான யுவராஜ் சிங், ஒரு பந்து கூடத் தாங்கவில்லை. திசரா பெரேராவின் அருமையான ஹேட்ரிக்(hat-trick). இருந்தும் அது இந்திய ஸ்கோரை பாதிக்கவில்லை. தோனியும், ஜடேஜாவும் மீதமுள்ள பந்துகளை இங்கும் அங்குமாக ஓட்டி, இந்தியாவின் ஸ்கோரை 196-க்கு எடுத்துச் சென்றார்கள்.

ஸ்பின் தாண்டவம்

190-ஐத் தாண்டிய டி-20 இலக்கு, எந்த ஒரு அணிக்கும் சிம்ம சொப்பனம்தான். கிட்டத்தட்ட ஒரு ஓவருக்கு 10 ரன் அடித்தாகவேண்டும் வெற்றிக்கு. இந்தியர்களை முதலில் பேட்டிங்கில் இறக்கி வாங்கிக் கட்டிக்கொண்ட ஸ்ரீலங்கா, இப்போது வெகுவாக அரண்டுபோயிருந்தது தெரிந்தது. அவர்களின் அணியில் அனுபவமிக்க திலகரத்னே தில்ஷன் (Tilakaratne Dilshan) சேர்க்கப்பட்டிருந்தும் ஒரு புண்ணியமும் இல்லை. தில்ஷன் ஸ்பின் பௌலிங்கை மிக நன்றாக ஆடக்கூடியவர்தான். இருந்தும் ரிஸ்க் எடுத்தார் மகேந்திர சிங் தோனி. ஸ்பின்னர் அஷ்வினுக்கு, புதிய பந்துடன் முதல் ஓவர் பௌலிங்கைக் கொடுத்தார். தன் மேல் கேப்டன் வைத்த நம்பிக்கைக்கு, அஷ்வின் இரண்டாவது பந்திலேயே பதில் சொன்னார். அஷ்வினின் சாதுர்யமான லெக்-ப்ரேக் வித்தியாசமாக வந்து தரை இறங்கியது. அஷ்வினை நொறுக்க தில்ஷன் கோட்டுக்கு வெளியே எகிற, பந்து அவரை டபாய்க்க, பெயில்களை மின்னலெனப் பறக்கவைத்தார் தோனி. அடுத்த இரண்டு விக்கெட்டுகள் நேஹ்ராவிடம் வேகமாக உயிரைவிட்டன. ரசிகர்கள் எழுந்து ஆட்டம்போட, 16 ரன்களுக்கு 3 விக்கெட்டுகள் என ஸ்ரீலங்கா பீதியில் உறைந்தது.

ராஞ்சியில் காட்டாதே மூஞ்சி!

கேப்டன் தினேஷ் சண்டிமாலும் கபுகதேராவும் ஜோடி சேர்ந்து திறமை காட்ட முயன்றனர். ஆனால் அப்போது, அஷ்வின், யுவராஜ், ரெய்னா, ஜடேஜா என இந்தியாவின் ஸ்பின் தாண்டவம் அரங்கேறியிருந்தது. புயலில் சிக்கிய தோணியானது ஸ்ரீலங்கா. சண்டிமால், கபுகதேரா இருவரும் ஜடேஜாவின் ஒரே ஓவரில் மைதானத்தை விட்டுவிட்டு ஓடினர். அஷ்வினின் ஒரு துல்லிய ஓவரில் ஷனகாவும், பெரேராவும் பரிதாபமாகப் பலியாயினர். அதற்கப்புறம் வந்தவர்களில் சிரிவர்தனா பரவாயில்லை. மற்றவர்கள் காலூன்ற இந்தியா விடவில்லை. 16-ஆவது ஓவர் வரை ஜஸ்ப்ரித் பும்ராவின் (Jasprit Bumrah) கைக்கு வரவில்லை பந்து. இறுதிச்சடங்கை விரைவில் முடிக்க எண்ணிய தோனி, பும்ராவிடம் பந்தை எறிந்தார். பும்ரா தன் இரண்டாவது ஓவரில் முடிச்சை ஒரேயடியாக இறுக்க, இரண்டு ஸ்ரீலங்க விக்கெட்டுகள் உயிரைவிட்டன. 127 ரன்களில் முடிவுக்கு வந்தது ஸ்ரீலங்காவின் கதை.

69 ரன் வித்தியாசத்தில் வென்று, தான் உலகின் நம்பர் 1 டீம் என்பதில் சந்தேகம் வேண்டாம் என்றது இந்திய அணி. இப்படிக் காண்பிப்பதற்கு, பூனேயில் அது தன் தலையில் வாங்கிக்கொண்ட குட்டு பயன்பட்டது! கிரிக்கெட் விசித்திரமான ஒரு ஸ்போர்ட். அதைவிடவும் வினோதமானது இந்திய அணி.

**

டி20 கிரிக்கெட்: இந்தியாவின் ஆஸ்திரேலிய சாதனைகள்

மெல்போர்ன் (Melbourne, Australia) நகரத்தில் 29-1-2016 அன்று நடைபெற்ற இரண்டாவது டி-20 ஆட்டத்தில், ஆஸ்திரேலியாவை துவம்சம் செய்த இந்தியா தொடரையும் வென்றது. வெகுநாளைக்கப்புறம், ஆஸ்திரேலிய மண்ணில் இந்தியா நிகழ்த்தியிருக்கும் தொடர் வெற்றி இது.

நேற்றைய ஆட்டத்திலும் முதலில் பேட் செய்ய நேர்ந்த இந்தியாவுக்கு ஷிகர் தவன் (Shikar Dhawan), ரோஹித் ஷர்மா ஜோடி நல்ல துவக்கம் தந்தனர். 68 பந்துகளில் 100 ரன்களை எட்டிய இந்தியா, ஆஸ்திரேலிய பௌலர்களுக்கு தண்ணி காட்டியது. தவன் வேகமாக விளாசிய 42 ரன்களுக்குப்பின் களத்துக்கு வந்த விராட் கோஹ்லி ஆரம்பத்திலிருந்தே நல்ல மூடில் இருந்ததாகத் தோன்றியது. விறு விறு வேகம் காண்பித்த கோஹ்லி முதலில் ஷர்மாவுடனும், இறுதியில் தோனியுடனும் இணந்து சிறப்பாக ஆடினார். அருமையாக ஷாட்கள் விளையாடிய ஷர்மா 60 ரன்களில் துரதிர்ஷ்டவசமாக ரன் அவுட் ஆனார். தோனி(Dhoni) கடைசி ஓவரில் வீழ்ந்தபோதும், கோஹ்லி 33 பந்துகளில் 59 ரன்களை அனாயாசமாக அள்ளினார். இந்தியா 184 என்கிற உயரத்தில் தன் ஸ்கோரைக் கொண்டுபோய் நிறுத்தியது. ஆஸ்திரேலியாவை மிரள வைத்தது.

பதிலளிக்க வந்த ஆஸ்திரேலியா, இந்த மேட்ச்சை இந்தியாவிடம் இழந்துவிடக்கூடாது என்கிற பரபரப்பில் இருந்தது. அதிரடி ஆட்டத்துடன் தன் கதையை ஆரம்பித்தது. குறிப்பாக கேப்டன் ஆரோன் ஃபின்ச் (Aaron Finch). அருமையான ஆட்டம். ஆரம்பத்தில் பந்துவீசிய ஆஷிஷ் நேஹ்ராவும், ஜஸ்ப்ரித் பும்ராவும் (Jasprit Bumrah) தாக்கப்பட்டனர். இளம் இந்திய வீரர் பும்ராவை ஆஸ்திரேலியர்கள் குறி வைத்திருந்தது தென்பட்டது. 10-ஓவருக்குள் 94 ரன்கள்! ஆனால் தோனி, ஸ்பின்னர்களை இறக்கிவிட்டதும், ஆஸ்திரேலியா தடவ ஆரம்பித்தது. அதன் ஆதிக்கம் ஆட்டம் கண்டது. பனிவிழுந்த இரவில் (பகல்-இரவு ஆட்டம் இது-இந்தியா இரவைல் பௌலிங் செய்தது ), ஈரமும், பிசுபிசுப்பும், ஸ்பின் பௌலிங்குக்கு எதிராகவே இருந்தது. ஆயினும் அஷ்வின், ஜடேஜா, யுவராஜ் சிங் ஆகியோர் மிகுந்த லாவகத்துடன் பந்து வீசினர். சாதுர்யமான சுழல்பந்துவீச்சு. எதிர்கொள்ளமுடியாத ஆஸ்திரேலிய விக்கெட்டுகள், ஆடிக் காற்றிலே வேப்பம்பூ போல் உதிர ஆரம்பித்தன.

இந்திய வீரர்கள் இடையிடையே மோசமாக ஃபீல்டிங் செய்து எரிச்சலை ஊட்டினர். அஷ்வினின் பந்துவீச்சில் ஃபின்ச் அடித்த பந்து, `பிடி` என்பதுபோல தவணின் கையில்போய் விழுந்தது. அவருக்கு அது பிடிக்கவில்லையோ ! தடுமாறி கேட்ச்சை நழுவவிட்டார். அஷ்வின் தலையைப் பிய்த்துக்கொண்டார். வேறென்ன செய்ய? ஆனால், சில அற்புதங்களும் நிகழ்ந்தன: ஜடேஜாவின் பந்துவீச்சில், பௌலரின் தலைக்குமேலாக ஆக்ரோஷமாக ஷேன் வாட்சன் தூக்கி அடித்தார். தீக்கதிராய் சீறிய பந்தை உயர்த்திய கையுடன் எம்பி மின்னலாக லாவினார் ஜடேஜா. வாட்சனுக்குத் தன் கண்களை நம்பமுடியவில்லை போலும். சில நொடிகள் பிரமை பிடித்து நின்றார். பின் நடையைக் கட்டினார். இன்னொரு சுவாரஸ்யம்: யுவராஜ் வீசிய சுழல்பந்தை சிக்ஸர் அடிப்பதற்காக கோட்டிற்கு வெளியே பாய்ந்த மேக்ஸ்வெல் அதை நழுவவிட, பந்து தோனியின் கையில் சிக்கியது. மின்னல்வேகத்தில் ஸ்டம்ப்பிங்! சில சமயங்களில் இப்படியும் செய்வாரு நம்ம கேப்டன் !

19-ஆவது ஓவரில் 6 ரன்கள் மட்டும் கொடுத்து ஆஸ்திரேலியாவின் கழுத்தில் கை வைத்தார் ஆஷிஷ் நேஹ்ரா. இதுவரை விக்கெட் எடுக்கமுடியாமல் தவித்திருந்த பும்ராவிடம், தோனி கடைசி ஓவரை வீசுவதற்காகப் பந்தைக் கொடுத்தார். சவாலை ஏற்ற பும்ரா, 3 கூர்மையான யார்க்கர்களை வீசி ஆஸ்திரேலியாவை மூச்சுத் திணறச்செய்தார். எதிரணி ஜெயிக்க வாய்ப்பற்றுப்போன நிலையில், 6 ரன்கள் மட்டும் கொடுத்து 2 ஆஸ்திரேலிய வீரர்களைக் கடைசி ஓவரில் காலிசெய்தார். இந்தியாவை வெற்றிப்படிகளில் ஏற்றிவைத்தார் ஜஸ்ப்ரித் பும்ரா.

58000-க்கும் மேற்பட்ட ரசிகர் கூட்டம் மெல்போர்ன் ஸ்டேடியத்தில் உற்சாகத்தில் பொங்கி வழிந்தது. இந்திய வம்சாவளி ரசிகர்களுக்கு அருமையான கிரிக்கெட் விருந்து. அவர்கள் இந்தியக் கொடிகளை அசைத்தாட, இந்திய வீரர்களின் உற்சாகம் கரைபுரண்டது. அதன் விளைவு அவர்களின் ஆட்டத்தில் தெரிந்தது. அடுத்த போட்டி சிட்னியில் நாளை(31-1-2016).

இந்தியப் பெண்கள் கிரிக்கெட் அணியின் அபார சாதனை: 29-1-2016 வெள்ளிக்கிழமை மங்களகரமாக முடிந்தது இந்தியாவுக்கு. ஆஸ்திரேலியாவின் மெல்போர்னிலேயே, டி-20 பெண்களுக்கான கிரிக்கெட் தொடரில், மித்தாலி ராஜ் (Mithali Raj) தலைமையிலான இந்திய மகளிர் அணி, ஆஸ்திரேலியாவை 2-0 என்கிற கணக்கில் வென்றது. சிறப்பாக ஆடிய மித்தாலி, அவுட் ஆகாமல் 37 ரன்கள் எடுத்து இந்தியாவை வெற்றி மேடையில் ஏற்றி வைத்தார். சிறப்புப் பங்களிப்பு செய்த மற்ற இந்திய வீராங்கனைகள்: மந்தனா (பேட்ஸ்வுமன்), ஜூலன் கோஸ்வாமி (Jhulan Goswami) (பௌலர்). முதன்முறையாக ஆஸ்திரேலிய மண்ணில், வலிமை மிகுந்த ஆஸ்திரேலிய மகளிர் அணியை வீழ்த்தி சரித்திரம் படைத்தது இந்தியப் பெண்கள் அணி. இந்திய ஆண்கள் கிரிக்கெட் அணியின் வெற்றிக்கு சிலமணி நேரங்கள் முன்பு, அதே நகரில் நமது பெண்கள் நிகழ்த்தினார்கள் இந்த சாதனையை ! இந்திய கேப்டன் மித்தாலி ராஜ் பற்றி: தமிழ்நாட்டைச் சேர்ந்த, இந்திய வான்படையில் பணிபுரியும் துரை ராஜ் என்பவரின் மகள். ராஜஸ்தானில் பிறந்த மித்தாலி ராஜ், ஹைதராபாதில் வசிக்கிறார். பெண்கள் ஒரு-நாள் சர்வதேச கிரிக்கெட்டில் 5000-க்கும் மேல் ரன்கள் விளாசிய உலகின் இரண்டாவது பேட்ஸ்வுமன் மித்தாலி ராஜ். இந்தியாவின் மிகச் சிறந்த மகளிர் கிரிக்கெட் வீரர். சர்வதேச மகளிர் கிரிக்கெட் சாதனைகளுக்காக மத்திய அரசின் அர்ஜுனா விருதும், பத்மஸ்ரீ விருதும் வென்றவர்.இவ்வளவு சாதித்தும், குடத்திலிட்ட விளக்குபோன்று ஆரவாரமின்றி வாழ்பவர் மித்தாலி ராஜ்.

இந்தியப் பத்திரிக்கைகள், நேஷனல் டிவி சேனல்கள் மித்தாலி ராஜின் சாதனைகளை இதுவரைக் கண்டுகொண்டதாகத் தெரியவில்லை – இந்திய கிரிக்கெட் ரசிகர்கள் செய்த அரும்பெரும் பாக்யம்!

**