கோஹ்லிக்கு சதம். இந்தியாவுக்கு?

ஓவராக சிந்தித்து, திட்டம் தீட்டி, என்னென்னவோ செய்து ஆசிய கோப்பையைத் தவறவிட்டுவிட்டது ராஹுல் திராவிட் / ரோஹித் தலைமையிலான இந்தியா. க்ரூப் 4-ல், ஸ்ரீலங்காவிடம் தோற்றவுடனேயே இந்திய அணியின் வீடு திரும்பலுக்கான ஏர் டிக்கெட்டுகள் புக் செய்யப்பட்டுவிட்டனதான். இருந்தாலும் பாக்கி இருக்கும் ஒரு மேட்ச்சை ஆடித்தானே ஆகவேண்டும். ஐசிசி விடாதே! சரியாக முயற்சிக்கப்படாத வீரர்களுக்கு மேலும் வாய்ப்புகொடுக்கலாம் என்கிற சிந்தனையில் (!), கேப்டன் ரோஹித், பாண்ட்யா, பிஷ்னோய் போன்றவர்கள் விலக, மீதமுள்ள இந்திய அணி இறங்கியது துணைக்கேப்டன் ராஹுல் தலைமையில், ஆஃப்கானிஸ்தானுக்கெதிராக.

Coach Dravid, Captain Rohit

ஆசிய கோப்பை போட்டிகளில் ஆடிய இந்திய அணித் தேர்வினை கூர்ந்து கவனித்தால் ஒன்று புரியும். ஒரே ஒரு வீரரைத் தவிர கிட்டத்தட்ட எல்லோரும் உள்ளே.. வெளியே ஆட்டம் ஆடிக்கொண்டிருந்தார்கள். அதாவது ஆடவைக்கப்பட்டார்கள். தான் நீக்கப்படுவோம் என்கிற கவலையோ, பயமோ இல்லாமல் எல்லா மேட்ச்சையும் வரிசையாக ஆனந்தமாக ஆடிய ஒரே வீரர் விராட் கோஹ்லி. ஃபார்மில் இல்லாத கோஹ்லி அணியில் ஏன் என்கிற அளவுக்கு ஆசிய கோப்பையின் ஆரம்பத்தில் எரிச்சலூட்டியது அவரது தேர்வு. ஆயினும் இந்திய அணி அவரை மட்டும் ஆடு பார்க்கலாம்.. ஆடு என ஆடவைத்தது. சரியாக அவர் ஆடாவிட்டாலும் அழகுபார்க்கும் மனநிலையில் இருந்தது நிர்வாகம். அணியின் வெற்றிவாய்ப்பெல்லாம் முக்கியம் அல்ல, கோஹ்லி என்கிற கிரிக்கெட் ஸ்டாரை, கார்ப்பரேட் செல்லக்குழந்தையை எப்படியாவது ஃபார்முக்குக் கொண்டுவந்துவிடவேண்டும் என்கிற முயற்சியில் முனைப்பு காட்டிக்கொண்டிருந்த  ராஹுல் திராவிட் & கோ! தைர்யம் கொடுக்கப்பட்ட நிலையில், கோஹ்லியும் சஞ்சலமின்றி ஆடி ஆடி, ரன்னும் கொஞ்சம் கொஞ்சமாக சேர்த்து, இறுதிவாய்ப்பை இழந்துவிட்ட இந்தியாவின் கடைசி போட்டியில் சதம் அடித்துவிட்டார். எண்ணற்ற வாய்ப்புகளை விழுங்கி, 1000 நாட்களுக்கப்புறம் ஒரு சதம். வாயெல்லாம் பல் அவருக்கு. ஆளில்லா ஸ்டேடியத்தில் இந்திய ரிசர்வ் வீரர்கள், கோச், மற்றும் இன்னபிறக்கள் கைதட்டி சிரித்துக்கொண்டிருந்தன நேற்று இரவு(8-9-22). வாழ்த்துகள்.. வாழ்த்துகள்! நாலா திசையிலிருந்தும் வந்துவிழும் வாழ்த்துகள்..

Chetan Sharma, Chief Selector, India

இந்தியா நடப்பு சேம்பியனாக இருக்கும் ஆசிய கிரிக்கெட் சேம்பியன்ஷிப் போட்டிகள் எக்கேடுகெட்டாவது போகட்டும். கோப்பையை பாகிஸ்தான் வெல்லட்டும், இல்லை, லங்கா லவட்டிச் செல்லட்டும். நமக்கு நம்ம கோஹ்லி ஃபார்முக்கு வந்தாச்சு..! இதுதான் இந்திய கிரிக்கெட் போர்டின் குறிக்கோள் போலத் தெரிகிறது. வேறெந்த நாட்டிலும் 3 வருடமாக ஃபார்மில் இல்லாத ஒரு சீனியர் ப்ளேயருக்கு இப்படி ஒரு அதீத முக்கியத்துவம், (இளம் வீரர்களைத் தடுத்த நிலையில்-at the cost of young, promising players) தொடர் வாய்ப்புகள்  தரமாட்டார்கள். இந்த காலகட்டத்தில் இரண்டு இளம் வீரர்களை அவரிடத்தில் தயார் செய்து விட்டிருப்பார்கள். அத்தகைய முனைப்புதான் அணியின் எதிர்காலம் குறித்து ஒரு நாட்டின் கிரிக்கெட் நிர்வாகத்திற்கு இருக்கவேண்டிய தொலைநோக்குப் பார்வை. இந்திய விளையாட்டு நிர்வாகிகளுக்கு நாடு, அணி, வெற்றிவாய்ப்பு எல்லாம் ஒரு பொருட்டல்ல. ஹீரோ! சூப்பர் ஸ்டார்! புகழ்.. இப்படி ஹீரோ வர்ஷிப் செய்துகொண்டு, கதைபேசியே காலம் ஓட்டுபவர்கள் இந்தியர்கள். நினைத்து வருந்த வேண்டிய விஷயமிது.

கோஹ்லி எப்படியோ ஃபார்முக்கு திரும்பியது நல்லதாப்போச்சு என முடியக்கூடும். ஆஸ்திரேலியாவில் நடக்கவிருக்கும் உலகக்கோப்பை போட்ட்டிகளில் அவர் விளாசக்கூடும்தான். அப்படி நடந்தால் அணிக்கு நல்லது. ஆனால் ஒரு ஆளை நம்பி உலகக்கோப்பை கைமாறிவிடாது! கிரிக்கெட் ஒரு ’அணி விளையாட்டு’. ஒருத்தர் மட்டுமே ஃபார்மில் இருந்தால் போதும், உலக சேம்பியனாகிவிடலாம் என ஆட்டம் காட்டும் விளையாட்டல்ல கிரிக்கெட். இதனை நமது கிரிக்கெட் போர்டு நிர்வாகிகள் இனிமேலாவது தெளிவாகப் புரிந்துகொள்ளவேண்டும். ஒருத்தரையே பிடித்துக்கொண்டு தொங்கிக்கொண்டிராமல், எதிர்கால ஸ்டார்களை வளர்த்து, உருவாக்குவதில் கவனம் செலுத்தவேண்டும்.

**   

இந்தியா-பாகிஸ்தான் கிரிக்கெட்: ஜெய் ஹிந்த் !

அனல் பறந்த ஆசியக்கோப்பை கிரிக்கெட்டில், ஆயிரக்கணக்கில் ஸ்டேடிய ரசிகர்கள் மூவர்ணத்துடனும், பச்சை-வெள்ளையுடனும் ஆர்ப்பரிக்க, துபாயில் நேற்று இரவு (28-8-22) இந்தியா பாகிஸ்தானைப் பழிதீர்த்தது! ஆல்ரவுண்டர்கள் ஹார்திக் பாண்ட்யா, ரவீந்திர ஜடேஜா ஆகியோர் இந்திய அணியின் வெற்றி வியூகங்களில் தங்களின் பங்கு எவ்வளவு கூர்மையானது என மீண்டும் ஒருமுறை கோடிட்டுக் காண்பித்தார்கள்.  இவர்களின் ஆட்டத்திறனும், மன உறுதியும் ஒரு கட்டத்தில் பாகிஸ்தானின் கைப்பிடியிலிருந்த ஆட்டத்தை அஸால்ட்டாக லாவி  இந்தியாவின் கைக்கு மாற்றியது. கிரிக்கெட் இரவின் அதீத போதை உலகெங்குமுள்ள இந்திய ரசிகர்களைக் கிறுக்கிறுக்கவைத்தது! கடைசி ஓவர் சிக்ஸரில் வெடித்த இந்திய வெற்றி 11:40-க்கு பெங்களூரில் எங்கள் ஏரியாவில் வாணவெடிகளை படார் படாரென  மேலுயர்ந்து சிதறவைத்தன. தூங்காத இளைஞர்கள், சிறுவர்கள் வீதிகளில் வந்து கோஷமிட்டுக்கொண்டிருந்தார்கள். இது சிலபல இந்திய நகரங்களில் நிகழ்ந்திருக்கும்தான்.

துபாய் மேட்ச்சின்போது கொடிகளின் ஆட்டபாட்டம் (Courtesy; DNA, Mumbai)

டாஸை வென்று பாகிஸ்தானை உள்ளே அனுப்பிய இந்தியா, வேகவேகமாக எதிரியின் விக்கெட்டுகளுக்கு வேட்டு வைத்தது. பும்ரா, ஷமி டீமில் இல்லை என்கிற உணர்வே ஏற்படவில்லை. எதிர்பார்க்கப்பட்ட பாக். கேப்டன் பாபர், ஃபகர் ஜமன், குஷ்தில் ஷா போன்றவர்கள் அடிக்கவிடாமல் வெளியேற்றப்பட, விக்கெட் கீப்பர் முகமது ரிஸ்வான்(43) பொறுப்பாக ஆடினார். துணை ஓரளவு கொடுத்தவர் இஃப்தகார்அஹ்மது (28). மற்றவர்கள் சும்மா ’ஆயாராம்.. கயாராம்’ தான்! புவனேஷ்வர் குமார், ஹார்திக் பாண்ட்யா. அர்ஷ்தீப் சிங் என இந்திய வேகப்பந்துவீச்சு விளையாடிக் காண்பித்தது. ஒரு கட்டத்தில் 130-க்கருகில் பாகிஸ்தான் சமாப்தி ஆகிவிடும்போலிருந்தது. 10, 11 எண்வரிசையில் ஆடிய பாக். பௌலர்கள் சிக்ஸர், பௌண்டரி எனக் காட்டியதால் 147 வரை போய்விட்டது. புவனேஷ்வர் குமார் 4, பாண்ட்யா 3, அர்ஷ்தீப் சிங் 2, ஆவேஷ் கான் 1 எனப் பாகிஸ்தானை நிலைகுலைய வைத்தார்கள். ஸ்பின்னர்கள் விக்கெட் எடுக்காதது ஆச்சரியம். கேட்ச்சுகளை நழுவவிட்டதும் காரணம். இந்திய ஃபீல்டிங் மோசமாகத்தான் இருந்தது.

இந்தியா 148-ஐத் துரத்துகையில், முதல் பந்தில் ரோஹித் ஒரு ரன் எடுக்க, அடுத்த பந்தில் வீட்டுக்கு ஓடிவிட்டார் துணைக் கேப்டன் ராஹுல்! ஃபார்மைத் தேடும் கோஹ்லி அடுத்தாற்போல். இந்த விக்கெட்டும் எந்த நிலையிலும் விழுந்துவிடும் என ரசிகர்கள் சலித்திருக்க, வெகுநாட்களுக்கப்புறம் கோஹ்லி சில நல்ல ஷாட்களை ஆடி ஆச்சர்யப்படுத்தினார். ரன்கள் ஆரம்பத்தில் ஏற அவர்தான் காரணம். ஃபார்மில் வந்துவிட்டார்யா நம்ப பழைய கேப்டன், இன்று மேலும் எதிர்பார்க்கலாம் என ரசிகர்கள் ஆர்வமாகையில் சிக்ஸர் அடிக்க பிரயத்னப்பட்டு பாக் ஸ்பின்னர் நவாஸிடம் வீழ்ந்தார். சேர்த்த ரன்கள் 35. டீஸண்ட். நாலாவதாக ஆடவந்தார் ரவீந்திர ஜடேஜா. தூக்கி விளாசும் திறனுள்ள ஜடேஜாவால் நிதானமாகவும் ரன் சேர்க்கமுடியும் என்பதே காரணம். அவர் ஏமாற்றவில்லை. முதலில் சூர்யகுமாருடன் சிறிய பார்ட்னர்ஷிப். அப்புறம் பாண்ட்யாவுடன் சேர்ந்துகொண்டு இந்தியாவுக்கு வெற்றி வாங்கித்தந்தபின் தான் வெளியேறவேண்டும் என்று சங்கல்பம் செய்துகொண்டு வந்திருந்தார்போலும். அடுத்த பக்கம் பாண்ட்யா நிலைமை மோசமாகிவிடக்கூடாது என்பதில் கவனம் காட்டி நிதானம், அவ்வப்போது அதிரடி என பாகிஸ்தானுடன் பந்துவிளையாட ஆரம்பித்திருந்தார். ஜெயித்துவிடலாம் என மனப்பால் குடித்திருந்த பாகிஸ்தானுக்கு இப்போது வியர்வை மழை. இவன்களைப் பிரித்தாலொழிய வெற்றி சாத்தியமில்லை என்பதைப் புரிந்தவாறு அபாரமாக பந்துவீசியது, ஃபீல்டிங் செய்தது எதிரி அணி. ஒரு கட்டத்தில் பௌண்டரி வரும் என்றே தோன்றவில்லை. ஜடேஜாவும், பாண்ட்யாவும் சிங்கிள், சிங்கிளாக வியர்க்க வியர்க்க ஓடிக்கொண்டிருந்தார்கள். ஒரே காந்தாக காந்திய துபாயின் மோசமான சீதோஷ்ண நிலை மைதானத்தில் அனல் அலைகளைப் பரப்பிவைத்தது.

கால் சுளுக்கை/வலியை வாழ்வில் முதன்முறையாக அனுபவிக்கும் அப்பாவி பாக். வீரர்கள்!

18-ஆவது ஓவர் போடப்படுகையில் இந்தியா ஜெயித்துவிடும்போலிருக்கிறதே என்கிற பதற்றம் பாகிஸ்தானி கேம்ப்பில் அதிகரிக்க ஆரம்பித்திருந்தது. ஓவரைப் போட்ட பாக். பொடியன் சர்வதேச டி-20 யில் முதல் மேட்ச் ஆடிய நஸீம் ஷா.  தன்னை  அபார பௌலராக (வந்தவுடனேயே ராஹுலின் விக்கெட்டை எடுத்தாகிவிட்டதல்லவா), நஸீம் காட்ட முயற்சித்ததில் தவறில்லை. ஆனால் தான் ஒரு சிறந்த நடிகனும்கூட எனக் காட்டி விருது பெற முயன்றதுதான் எரிச்சலையும், அதிர்ச்சியையும் ஒருசேர மைதானத்தில் பரப்பியது. ஃபீல்டிங், பௌலிங்கின் போது கால் சுளுக்கு ஏற்படலாம்தான். அதற்காக இப்படியா? ஓடிவந்து பந்துவீசிய பின் கால் நொண்டல், சுளுக்கு.. ஆ… ஓ… என்றுமுகத்தை அஷ்டக்கோணாலாக வைத்துக்கொண்டு, பிட்ச்சில்உட்காந்து, சரிந்து புரண்டது நாடகத்தின் உச்சபட்ச காட்சியானது. பாக்.  டீமின் ஃபிஸியோ (மருத்துவ உதவி) மைதானத்துக்கு ஓடிவந்து அவரை கவனித்துக்கொண்டிருக்கையில், பாக். டீமே அவரைச் சுற்றிக்கொண்டு என்னவோ அவர் உயிருக்குப் போராடிக்கொண்டிருப்பதுபோலான சீன்களை ஏற்படுத்தியதும்,  ஆட்டத்தை அளவுக்கு அதிகமாக நிறுத்தி தாமதத்தை ஏற்படுத்தியதும், நெருக்கடி நேரத்தில்  ரசிகர்கள், கிரிக்கெட் நிர்வாகிகளிடையே அதிர்ச்சியையும், குழப்பத்தையும் ஏற்படுத்தியது. அம்பயர்களின் நிலையைப்பற்றிச் சொல்லவேண்டியதில்லை. மருத்துவ டீம் வந்து காலைப்பிடித்துவிட்டு, ஸ்ப்ரே அடித்து சரிசெய்துவிட்ட அகன்ற பின்னும், பௌலரின் ஆக்டிங் டிராமா தொடரும் என்பதை யாரும் எதிர்பார்க்கவில்லை. அவ்வளவு வலி இருந்திருந்தால், ஆடமுடியாத நிலையென்றால்  நஸீம் பெவிலியன் திரும்பியிருக்கவேண்டும். பௌலிங்கைத் தொடர்ந்திருக்கவேண்டிய கட்டாயம் ஏதுமில்லையே. அவருக்கு பதிலாக அந்த ஓவரின் மீதிப் பந்துகளை வேறொரு பௌலரைவைத்துப் போடச்சொல்லி பாக். கேப்டன் ஓவரை முடித்திருக்கவேண்டும். இதுதான் இம்மாதிரி சந்தர்ப்பங்களில் உலகெங்கும் நடப்பது. ஆனால் பாகிஸ்தான் சூப்பர் டீமல்லவா? கிரிக்கெட் மட்டும்தானா அவர்களுக்கு தெரியும்! நிற்கமுடியாமல், நடக்கமுடியாமல் சில நிமிடங்களுக்கு முன் வேதனை காண்பித்த நஸீம், அடுத்த பந்திற்காக ஒன்றுமே நடக்காததுபோல் இப்போது தூரத்திலிருந்து பேட்ஸ்மனை நோக்கி வேகமாக – எஸ்.. வேகமாக ஓடிவருகிறார். கவனியுங்கள். காலில் பிரச்னை இல்லைபோலிருக்கிறதே! அதே வேகம். அதேமாதிரி இயல்பான பந்துவீச்சு. ஓடுகையில், பந்தை வீசுகையில் அவர் முகத்தில் எந்த வேதனையும் காணப்படவில்லை. வீசியபின் இந்திய பேட்ஸ்மன் அடித்தோ, தடுத்தோ ஆடி ரன் ஓட முயற்சிக்கையில், உடனே நஸீமின் நாடக மீட்சி: முகக்கோணல், ஒற்றைக்கால் நடனம். கீழே உட்கார்வது.. காலைப்பிடித்துக்கொண்டு ஆ.. ஊ..ஐயோக்களுக்கு நடுவே ஜடேஜாவுக்கு எதிராக எல்பிடபிள்யூ அவுட் கேட்கிறார் அம்பயரைப் பார்த்து! அம்பயரும் குழப்பத்தில் டென்ஷனில் விரல் உயர்த்த, இந்திய அணியில் டென்ஷன். ரிவ்யூ.. ஜடேஜா நாட்-அவுட்! இன்னும் ஒரு பந்து பாக்கி. மீண்டும் காலில் எந்தப் பிரச்னையும் தெரியவில்லை ஓடிவந்து வீசுகிறார் நஸீம். நாடகத்தைத் தொடர்ந்து பார்த்த எரிச்சலில் கடுப்பாகியிருந்த ஜடேஜா, முன்னே வேகமாக நகர்ந்து, பந்தை ஆவேசமாகத் தூக்கினார் பௌலரின் தலைக்குமேலே.. பந்து  சிக்ஸர்..சிக்ஸர் என்று அலறியவாறு ஸ்டேடியத்தில் போய் விழுந்தது.  நஸீமின் சூப்பர் நாடக ஓவர் சிக்ஸரில் முடிந்தது. காலையில் ஹைலைட் பார்க்கையில் இந்த நாடகப் பகுதியை ஸ்டார் சேனல் அகற்றிவிட்டு, ஏதோ அமைதியாக மேட்ச் நடந்ததுபோல் காட்டிக்கொண்டிருந்தது.

வெற்றியை சிக்னல் செய்யும் பாண்ட்யா. வெதும்பிப் பார்க்கும் பாகிஸ்தான்!

19-ஆவது ஓவரை ஹாரிஸ் ராஃப் போட்டபோது, ஃபுல் சார்ஜில் இருந்த பாண்ட்யா விறுவிறுவென  பௌண்டரி பௌண்டரியாக  விளாசிவிட்டார். பாகிஸ்தானின் முகம் பேயறைந்ததுபோலாகிவிட்டது. பச்சை-வெள்ளைகளில் படபடப்பு, கிறுகிறுப்பு. 20-ஆவது ஓவரைபோட்ட ஸ்பின்னர் முகமது நவாஸ் அருமையாக வீசியிருந்தார் ஏற்கனவே. நவாஸின் முதல் பந்தில் ஜடேஜா அவுட் ஆகி இந்திய அணிக்கு/ரசிகர்களுக்கு டென்ஷன் தர, அடுத்துவந்த கார்த்திக் ஒரு ரன் எடுத்து அடுத்தபக்கம் ஓடினார். இப்போது ஈக்வேஷன்: 4 பந்தில் 6 ரன். பாண்ட்யா நவாஸின் அடுத்த பந்தை கவர் பக்கம் அடிக்க, உடனடி ஃபீல்டிங். ரன் எடுக்கவாய்ப்பில்லை. கார்த்திக் டென்ஷனாக, பாண்ட்யா மேலும்கீழுமாகத் தலையாட்டுகிறார்: கவலைப்படாதப்பா. .நான் இருக்கேன்ல.. 3 பந்துகள் பாக்கி, 6 ரன் தேவை இந்திய வெற்றிக்கு. முடியவில்லை என்றால் பச்சை-வெள்ளைப் பரவசம்தான். நவாஸ் ஓடிவந்து ஆஃப் ஸ்டம்புக்கு வெளியே குத்திப்போட, சரியாகப் பந்தின் திசை, வேகத்தைக் கணித்திருந்த பாண்ட்யா அனாயாசமாக உயரே தூக்கினார். மைதானமே திடுக்கிட்டு இரவு வானில் வெள்ளைப்பந்தை அன்னாந்து பார்க்க, ஸ்டேடியத்திற்குள் சீறிப் பாய்ந்தது சிக்ஸர்! இந்தியக் கொடிகள் மேலே மேலே ஆடி அசைய, ரசிகர்களின் கொண்டாட்டம் துபாய் இரவுக்குக் கிளுகிளுப்பூட்டியது!

இப்படியாக வந்துசேர்ந்தது இந்தியாவுக்கு வெற்றி 5 விக்கெட் வித்தியாசத்தில். ப்ளேயர் ஆஃப் தி மேட்ச் விருது பாண்ட்யாவுக்கு. விக்கெட்கீப்பராக உயரத் தவ்விப் பிடித்த ஒரு அபூர்வ கேட்ச்சிற்காக தினேஷ் கார்த்திற்கு பரிசு. வெள்ளைப்பந்து கிரிக்கெட்டில் பாண்ட்யாவும், ஜடேஜாவும் தீர்க்கமான திறமையான ஆல்ரவுண்டர்கள் என்பதை இந்த ஹை-டென்ஷன் மேட்ச் உறுதிசெய்திருக்கிறது மீண்டும்.

Scores: Pak :147 all out. India: 148 for 5.

கொசுறு: இந்திய நடிக நடிகைகளும் வண்ணம் சேர்த்தனர் துபாய் ஸ்டேடியத்தில் நேற்று:

இந்தியா பாக் ஆட்டத்தை உற்றுப் பார்க்கும் விஜய் தேவரகொண்டா, (லெஜண்ட் சரவணன் புகழ்(!) ஊர்வசி ரௌத்தேலா !

**    

கிரிக்கெட்: உலக டெஸ்ட் சேம்பியன்ஷிப் (WTC)

கோவிட்-19 உலகையே புரட்டிப்போட்டு அட்டகாசம் செய்துகொண்டிருக்கும் ஒரு அபாயகர காலகட்டம். Bio-secure சூழலில், பாதுகாப்பு ஏற்பாடுகளுடன் இங்கிலாந்தின் சௌதாம்ப்டனில் (Southampton) இன்று (18/6/21) ஆரம்பிக்கிறது உலக டெஸ்ட் சேம்பியன்ஷிப் மேட்ச் இறுதிப்போட்டி. கிட்டத்தட்ட 10 வருடங்களாகத் திட்டமிடப்பட்டு, பல்வேறு வகைக் குழப்பங்கள், தாமதங்களுக்குப் பின் கடைசியாக வந்து சேர்ந்திருக்கிறோம் கிரிக்கெட்டின் அசல் சேம்பியன்ஷிப்பிற்கு. சமபல அணிகளான நியூஸிலாந்தும் இந்தியாவும் மோதுகின்றன. இது கோஹ்லி vs வில்லியம்சன் போட்டியாகப் பார்க்கவும்படுகிறது. Fire and Ice எனத் தலைப்பிடும் Espn Cricinfo!

இரு அணிகளின் வலிமை என்பது கடந்த போட்டிகளை வைத்துப்பார்க்கும்போது சமமாக இருப்பதாக ஒரு தோற்றம். இந்தியா தன் பௌலிங் காம்பினேஷனில் கவனமாக இல்லையெனில் மேட்ச்சை இழக்க வாய்ப்பு இருக்கிறது என எச்சரித்தார்கள் முன்னால் வீரர்கள். பொதுவாக 5 பௌலர்கள், 6 பேட்டர்கள் (batters-விக்கெட்கீப்பர் உட்பட) என்கிற சூத்திரமே அணுகப்படுகிறது. அதையே இந்தியா இந்தப் போட்டிக்காகவும் எடுத்துக்கொண்டிருக்கிறது. இஷாந்த் ஷர்மா, ஜஸ்ப்ரித் பும்ரா, முகமது ஷமி – வேகப்பந்துவீச்சாளர்கள். அஷ்வின், ஜடேஜா  ஸ்பின்/ஆல்ரவுண்டர்கள். பேட்டர்கள் (Batters): ரோஹித் ஷர்மா, ஷுப்மன் கில், செத்தேஷ்வர் புஜாரா, விராட் கோஹ்லி, அஜின்க்யா ரஹானே மற்றும் ரிஷப் பந்த் (வி.கீ). துரதிர்ஷ்டவசமாக இன்னொரு டெஸ்ட் ஸ்பெஷலிஸ்ட் ஹனுமா விஹாரிக்கு இடமில்லை. கே.எல். ராஹுல், அக்ஷர் பட்டேல், வ்ருத்திமான் சாஹா எல்லாம் இல்லை!

நியூஸிலாந்தின் பேட்டிங் வரிசை இப்படி இருக்கலாம்: டெவன் கான்வே, டாம் லேத்தம், வில்லியம்சன், ராஸ் டெய்லர், ஹென்றி நிகோல்ஸ், வாட்லிங் (வி.கீ.). வேகப்பந்துவீச்சாளர்கள் டிம் சௌதீ, ட்ரெண்ட் போல்ட், கைல் ஜேமீஸன், நீல் வாக்னர், மேலும் ஸ்பின்னர் (இந்திய வம்சாவளி) அஜாஸ் பட்டேல். வேகப்பந்துவீச்சாளர் மேட் ஹென்றி உள்ளே எனில், நீல் வாக்னர் வெளியே போகலாம். எப்படியிருப்பினும் ஒரே ஒரு ஸ்பின்னரைத்தான் நியூஸிலாந்து கொண்டிருக்கும் எனத் தெரிகிறது. மிட்ச்செல் சாண்ட்னர் காயப்பட்டிருப்பதால், அஜாஸ் பட்டேல்தான் விளையாடுவார்.

ஸௌத்தாம்ப்டன் ஆடுகளம் வேகப்பந்துவீச்சாளர்களுக்கே பெரும்பாலும் துணைபோகும். இடையிடையே மழைக்கும் வாய்ப்பு உண்டு. தினமும் கொஞ்சம் மழைவந்தாலும் ஆச்சரியப்படுவதற்கில்லை! ஸ்விங் மாஸ்டர்களான டிம் சௌதீ, ட்ரெண்ட் போல்டுக்கு ஒரே ஆனந்தம்தான். இந்த ஜோடியோடு சேர்ந்து ப்ராதனமாக கைல் ஜேமிசன் வீசக்கூடும். இந்திய துவக்க ஆட்டக்காரர்கள் குறிப்பாக ஒரு ஒழுங்கு, முனைப்போடு ஆடினால்தான் பின் வருபவர்கள் நிலைத்து ஆட வழிவகுக்கும். ஒரு மழை இடைவேளைக்கு அப்புறம் பேட் செய்பவர்கள் உடனே விக்கெட்டைப் பரிகொடுக்கும் சம்பவங்கள் நிகழக்கூடும். ரிஷப் பந்த், புஜாரா, ரோஹித் ஆகியோர் குறிப்பாக கவனிக்கப்படுவார்கள். ரஹானே குறிப்பாக இங்கிலாந்து பிட்ச்சுகளில் சரியாக ஆடுவதில்லை என்கிற விமரிசனம் உண்டு. அவர் கதை எப்படிப் போகுமோ?

கோஹ்லி அனேகமாக டாஸைத் தோற்பார். மேட்ச்சை இழக்காதிருந்தால் சரி!

ஒரு-நாள் உலகக்கோப்பையை இங்கிலாந்திடம் ‘இழந்துவிட்ட’ நியூஸிலாந்து, உலகின் முதல் டெஸ்ட் சேம்பியன்ஷிப் கோப்பையை தட்டிச்செல்ல முனைப்பு காட்டி ஆடும். கோஹ்லிக்கு உலகக்கோப்பையை உயரப்பிடிக்கும் அதிர்ஷ்டம் இருக்கிறதா என்பது ஜூன் 22-ஆம் தேதி தெரிந்துவிடும். (ஒரு எமர்ஜென்சிக்காக ஒரு உபரி நாள் கொடுக்கப்பட்டிருக்கிறது இந்த இறுதிப்போட்டிக்கு). 4000 பேருக்கு மட்டும் ஆட்டத்தை நேரடியாகக் கண்டு களிக்க என, டிக்கெட்டுகள் இங்கிலாந்தின் கிரிக்கெட் வாரியத்தால் (England and Wales Cricket Board) விற்கப்பட்டுள்ளன. உலக சேம்பியன்ஷிப் ஆட்டத்தில் ஸ்டேடியம் காலியாகக் கிடந்தால், என்ன ஒரு அபத்தம்!

இந்தியாவில் ஸ்டார் ஸ்போர்ட்ஸ் 1/HD சேனல்கள் ஒளிபரப்பும் இந்தப் பரபரப்பு மிகுந்த சேம்பியன்ஷிப் ஆட்டத்தை. மழை போட்டுப் பிசையாமல் இருந்தால், அடுத்து வரும் நாட்கள் கடும் போட்டியைக் காட்டக்கூடும்.

**

கிரிக்கெட்: இங்கிலாந்தின் கொலவெறி !

336 அடித்து வெளியேறிய இந்திய வீரர்கள் நினைத்திருப்பார்கள் – ஹா.. ஹா… தொடர் கைக்குள் வந்துவிட்டது! ஆனல் நடந்ததோ வேறுகதை.

முதலில் ஆடிய இந்தியா இன்னும் சாத்தியிருக்கலாம் என இப்போது தோன்றியிருக்கும்.  ஆனால் துவக்கம் தந்த தடுமாற்றம்,  கோஹ்லி, ராஹுல் டெஸ்ட் மேட்ச் பயிற்சி செய்துகொண்டு, ஓவர்களை ஓட்டியது – எல்லாம் இங்கிலாந்துக்கு அதிசாதகம். ராஹுல் தன் அரைசதம் கடக்கும் வரையிலும் பேட்டை வீசி  அடிக்க முனையவில்லை, கோஹ்லி இடையிடையே சைகை கொடுத்தும்.  பின்னரும்கூட, மெல்ல தன் சதத்தைக் கொணர்வதில்தான் முனைப்பு காட்டியதாகத் தோன்றியது. இதுதான் இந்தியர்களின் குறை – அரை சதம், முக்கால் சதம், முழுசதம் கடப்பது, சாதிப்பது. அணியின் வாய்ப்பு நழுவிக்கொண்டிருக்கிறது என்கிற பிரக்ஞையே இல்லை, சிலருக்கு. Sad.

ரிஷப் பந்த் இறங்குகையில், அவர் மட்டும் ஒவ்வொரு ஓவரிலும் 10-12 ரன் அடிக்கவேண்டும் என  எதிர்பார்ப்பு/ நிலை. இப்படியேதான் ஹர்தீக் மைதானத்திற்கு வருகையிலும். அவர்கள்தான் சரியான பேட்டிங்கைக் காண்பித்தவர்கள்: ரிஷப் 40 பந்துகளில் 77 (7 sixes, 3 fours). ஹர்தீக் (35 in just 16 balls – 4 sixes). இந்த உத்வேகம், ஆவேசம் சீனியர்களான கோஹ்லி, ராஹுலிடம் ஏன் இல்லை என்பதே இந்தியாவின் கேள்வி. பந்த், பாண்ட்யா அதகளத்தினால்தான் இந்தியா 330-ஐத் தாண்டியது.

Ben Stokes
England’s fiery No. 3 !

ஆனால், நேற்று பென் ஸ்டோக்ஸ் இருந்த ஃபார்மில், இந்தியா 360 அடித்திருந்தாலும் இங்கிலாந்து போட்டு சாத்தியிருக்கும். முதல் 12 ஓவர் வரை இந்திய அணுகுமுறை. பிறகு விஸ்வரூபத்தில் இங்கிலாந்து பேட்டிங். போன மேட்ச்சில் தவறவிட்ட சதத்தை இந்தப்போட்டியில்  பிடித்து, தாண்டியும் ஓடிக்காண்பித்தார் ஜானி பேர்ஸ்டோ (124 in 112 balls. 7 fours, 11 Sixes). ஆட்டத்தின் அசல் கவர்ச்சி என்றால் அது X-factor பென் ஸ்டோக்ஸின் 52 ball 99- தான்(4 fours, 10 sixes).  டி-20 சேம்பியன்ஷிப் ஃபைனலுக்கான ஆயத்தமோ!

8 சிக்ஸர்களை எதிரிகளுக்கு வாரி வழங்கிய பெருமை குல்தீப் யாதவையே சாரும்! பாவம். Completely out of form. Casually butchered.  க்ருனால் பாண்ட்யாவும் தப்பவில்லை.  ஷர்துலுக்கும் நேற்று அடி! இதற்கு நேர்மாறாக இந்தியா பேட்டிங் செய்கையில், இங்கிலாந்தின் ஸ்பின்னர்கள் ஆதில் ரஷீத், மோய்ன் அலி அசத்தலாக ரன் அதிகம் கொடுக்காமல் போட்டார்கள். அல்லது – நாம் அவர்களைத் தாக்காது அசடு வழிந்தோம் என்பதே சரி. இத்தனைக் கூத்துகள், குழப்பங்களுக்கிடையில் புவனேஷ்வரும், ப்ரஸித் கிருஷ்ணாவும் துல்லிய வேகம் காட்டினார்கள். 

நாளைய  (28-3-21) இறுதிப் போட்டியிலாவது சூர்யா இறக்கப்படுவாரா? அல்லது ராஹுல் பூஜைதானா? நடராஜன் ஆடினால் நன்றாக இருக்கும் என்கிறார் சஞ்சய் மஞ்ச்ரேகர். யாரிடத்தில் என்பது கேள்வி. குல்தீப் யாதவை நீக்கிவிட்டு யஜுவேந்திர சாஹலுக்கு அனேகமாக கோஹ்லி வாய்ப்பு வழங்கலாம். இங்கிலாந்தின் 1,2,3 – இப்படியொரு அட்டகாசத்தை நாளைக்கும் காண்பித்துவிட்டால், தொடர்வெற்றி அவர்களையே நாடும். இந்தியா ஓடும்.

**

கிரிக்கெட்: சூர்ய குமாரன் !

 

ஆர்ச்சரிடமிருந்து தான் சந்தித்த முதல் பந்தை, நடராஜராக ஒற்றைக்காலைத் தூக்கியவாறு சிக்ஸருக்குத் தூக்கியது, அடுத்து சவால் விட்ட ஆதில் ரஷீதிற்கு அதிரடியாகப் போட்ட சூடு .. என சூர்யகுமார் நிகழ்த்திக்காட்டிய  ரகளையான பேட்டிங் அந்த இரவில். ரோஹித் அவுட்டாகியிருக்க, ராஹுல் பேட்டிங்கை மறந்து குழம்பியிருந்த நிலை. புதியவரிடமிருந்து வந்த எதிர்பாரா விளாசல். கூடவே அவர் அம்பயரினால் தவறாக அவுட்டாக்கப்பட்டதும் மைதானத்துக்கு வெளியேயும் சூட்டைக்கிளப்பிவிட்டது. ஆன் -ஃபீல்ட் அம்பயரின் ‘சாஃப்ட் சிக்னல்’ – கடும்  சர்ச்சையில். 50 மீட்டர் தொலைவையும் தாண்டி ஒரு லோ-கேட்ச் பிடிக்கப்படுவதை விக்கெட்டுக்கருகில்  நிற்கும் அம்பயர் சரியாகப் பார்க்க வாய்ப்பில்லை. ‘அவுட்’ கொடுத்துவிட்டு மூன்றாவது அம்பயருக்கு ரெஃபரென்ஸ் எதற்கு? அந்த ஆள் என்னடான்னா 4 நிமிஷம் வீடியோவை உருட்டோஉருட்டென விட்டு ’எனக்கு ஒன்னும் தெளிவாகல! ஆன் -ஃபீல்ட் அம்பயர் சொன்னதே (அவுட்) இருக்கட்டும்’ எனச் சொன்னது நவீன கிரிக்கெட்டின் அபத்தங்களில் ஒன்று – visual idiocy. கேலிக்கூத்தாக மாறிவரும் கிரிக்கெட்டின் புதுப்புது ரூல்ஸ். ஆங்கிலேய ரசிகர்களுக்காக போட்டியை ’கவர்’ செய்யும் ‘ஸ்கை ஸ்போர்ட்ஸ்’ சேனலில் ‘நான்சென்ஸ்!’ என்று எரிந்துவிழுந்திருக்கிறார்கள் முன்னாள் இங்கிலாந்து கேப்டன் மைக் ஆர்தர்ட்டனும், தினேஷ் கார்த்திக்கும். கேட்ச் சரியாகத் தெரியாத நிலையில், ‘சாஃப்ட் சிக்னலில் ‘அவுட்’ என ஏன் சொல்லவேண்டும். ஐ டோண்ட் நோ! -எனச் சொல்லலாமே’ – இது நம்ப கோஹ்லி! இப்படியாகத்தானே 14-ஆவது ஓவரில் இனிதாக முடிந்தது சூர்யகுமார் யாதவின் முதல் இந்திய இன்னிங்ஸ்.  டி-20 உலகில் உதித்திருக்கும் இன்னுமொரு ப்ரகாச நட்சத்திரம்  சூர்யா. 

சூர்ய நர்த்தனம் !

முதலில் பேட் செய்யும் டீம் தோற்கும் என்கிற நம்பிக்கை 4-ஆவது மேட்ச்சில் பொய்த்துப்போனதால், வியர்த்துப்போனது அன்று இங்கிலாந்துக்கு. இந்தியா ஜெயித்ததற்கு 15-ஆவது ஓவரின் முடிவில் கோஹ்லி பெவிலியனுக்குப்போய் சாஸ்திரிக்குப்பக்கத்தில் உட்கார்ந்ததும், ரோஹித் கேப்டன்சியை ஏற்றதும்தான் காரணம் என்கிறார்கள் ரசிகர்கள்! இருக்கும். வைஸ்-கேப்டன் ரோஹித் அணியின் பௌலிங்/ஃபீல்டிங்கை கையில் எடுத்துக்கொண்டதும் கைமேல் கிடைத்ததே பலன்.  ஷர்துல் டாக்குரிடம் பந்தைக்கொடுத்து, ஃபீல்டிங்கை மாற்றி அமைத்து, ஏதேதோ அவருக்கு சொல்லிக்கொண்டிருந்தார் ரோஹித் ஓவரின்போது. அதுவரை இடிமுழக்கம் செய்துகொண்டு, இங்கிலாந்தை வெற்றிக்கருகில் கொண்டுவந்து விட்டிருந்த பென் ஸ்டோக்ஸ் 16-ஆவது ஓவரின் முதல் பந்திலேயே  ஷர்துல் டாக்குரிடம் காலி. அடுத்த பந்தில் கேப்டன் மார்கன் போனார் வீட்டிற்கு. தோற்கும் நிலையிலிருந்த இந்தியா வெற்றியை நோக்கி வேகமாகத் திரும்பியது. கடைசி ஓவரில் 23 ரன்கள் எடுக்கவேண்டிய நிலையில், ஆர்ச்சர் பௌண்டரி, சிக்ஸர் என ஆரம்பிக்க, டாக்குர் அழுத்தத்தில் வைட் போட்டுக் கலவரப்படுத்த ஒரே படபடப்பு!  இறுதியில் ஜார்டனின் விக்கெட்டும்  விழ, 8-ரன் வித்தியாசத்தில் வெற்றி இந்தியாவுக்கு. ’ப்ரெஸ்’ முன் வாயைத்திறக்க வந்துவிட்டார் கோஹ்லி!

சரி விடுங்கள் – ரோஹித்துக்கும், ரஹானேக்கும் ‘க்ரெடிட்’ கொடுக்கமாட்டார்கள்தான். சாஸ்திரியின் மூளையினாலும், கோஹ்லியின் ‘வியூகங்களாலும்’, உத்வேகத்தினாலும்தான் இந்தியா முன்னே வென்றது, நேற்று வென்றது, நாளையும் அவ்வாறே வெல்லும் என வைத்துக்கொள்வோம்.

இன்று பேசாமல் ராஹுலை கையில் ஒரு லால்லிபாப்பைக் கொடுத்து உட்காரவைத்துவிட்டு, இஷானை ரோஹித்துடன் ஓப்பன் செய்ய விட வேண்டும். சுந்தர் போன மேட்ச்சில் ரன் ஓவராகக் கொடுத்தவிட்ட பின்னணியில், அக்ஷர் பட்டேல் அல்லது சாஹல் வரலாமோ? இன்று (20-3-21) கடைசியும், தொடரின் விதியை எழுதப்போவதுமான மேட்ச்.. சர்ச்சைகள் இல்லாது நன்றாக விளையாடப்படுமாக!

**

கிரிக்கெட்: இஷான் ஷோ !

முதல் டி-20 போட்டியை அஹமதாபாதில் இந்தியா பரிதாபமாகத் தோற்றபின், இங்கிலாந்தின் முன்னாள் கேப்டன் மைக் வாகன் (Mike Vaughan) சொன்னது: ’இந்திய அணியைவிட மும்பை இந்தியன்ஸ் சிறப்பான டி-20 டீம்!’ மிடில்-ஆர்டர் பேட்ஸ்மன் சூர்யகுமார்  நேற்றைய மேட்ச்சில் உள்ளே வருவதாயிருந்தது. வாகனின் கமெண்ட்டைப் படித்ததும் இந்தியா நினைத்திருக்கும்: ’சரி, ரெண்டு ’மும்பை இந்தியன்ஸ்’களை உள்ளே அனுப்புவோம்!’ வந்திறங்கினார்கள் சூர்யகுமார் யாதவும், இஷான் கிஷனும்!

Ishan Kishan,
the new blade !

சூர்யகுமார் யாதவ், ஷ்ரேயஸ் ஐயருக்கு அடுத்தாற்போல் பேட்டிங் வரிசையில் வந்திருக்கவேண்டும். நேற்று அந்த வாய்ப்பு வரவில்லை. ஒரு கேட்ச் பிடித்ததோடு அவரது நேற்றைய பணி நின்றது.  ஆனால் ஷிகர் தவனுக்கு பதிலாக ராஹுலுடன் இந்திய ஆட்டத்தை துவக்கிய மும்பை இந்தியன்ஸின் 22 வயது ஓப்பனர் இஷான் கிஷன், மொட்டேரா மைதானத்தை பிள்ளையார் கோவில் வாசலாக்கிவிட்டார். சதிர்த் தேங்காய்களாய் வரிசையாகப் போட்டு உடைத்தார், எதிரே கேப்டன் கோஹ்லியை முழிக்கவைத்துக்கொண்டு! சந்தித்த முதல் பந்து ஆர்ச்சரிடமிருந்து ஒரு 140+ kph. பௌண்டரி. தொடர்ந்து கண்மண் தெரியாத் தாக்குதல். புதுவரவின் விளாசலை சற்றும் எதிர்பார்த்திராத எதிரி கேப்டன் மார்கன். இவன் யாருடா இன்னொரு ரிஷப் பந்த்! – எனக் குழம்பியிருப்பாரோ? ஸ்பின்னர் ஆதில் ரஷீதைக் கொண்டுவருவதைத் தள்ளிப்போட்டுப் பார்த்தார். ஆனால் 8-ஆவது ஓவரில் வேறுவழியின்றி பந்தை ரஷீதிடம் கொடுக்க, இஷான் அதற்காகவே காத்திருந்ததுபோல் ரஷீதை வானத்தில் பறக்கவிட்டார். ’பறக்கும்.. பந்து பறக்கும்..’ எனத் தமிழில் பாடியிருப்பாரோ! ரஷீதின் 10 பந்துகளில் 21.  2 சிக்ஸர்கள். டாம் கர்ரனுக்கும் இதே பரிவட்ட மரியாதை – ரசிகர்களுக்குப் பந்துபொறுக்கி மைதானத்துக்குள் திருப்பி  வீசும் குஷியான வேலை. முதல் மேட்ச்சிலேயே இஷானின் அரைசதம். 5 பௌண்டரி. 4 சிக்ஸ். ரிஷப் பந்த் வந்தவுடன் தன் வேலையைக் காண்பிக்க, கோஹ்லியும் சேர்ந்தடிக்க, இலக்கு எளிதாக இந்தியாவின் பிடிக்குள் வந்தது. இந்திய டாப் ஸ்கோர்கள்: இஷான் கிஷன் 56 (32 balls), கோஹ்லி 73 (49 balls).

முன்னதாக இங்கிலாந்து பேட் செய்கையில், இந்திய மிதவேகப் பந்துவீச்சாளர்கள் புவனேஷ்வர் குமார், ஹர்தீக் பாண்ட்யா, ஷர்துல் டாக்குர் அருமையாகப் பந்து வீசினார்கள். Death overகளில் ஷர்துல் டாக்குர் அபாரமாகப் போட்டு இங்கிலாந்து 160+ ஐத் தாண்டவிடாது அழுத்தி உட்காரவைத்தார். வாஷிங்டன் சுந்தரும், யஜுவேந்திர சஹலும் ஸ்பின் சாதுர்யமாகப் போட்டார்கள். சுந்தரின் முதல் பந்தை சிக்ஸருக்குத் தூக்கிய ஜேஸன் ராய், மிடில் ஓவர்களில் சுந்தர் திரும்பி வந்தபோது, அவரிடமே பலியானார்!  ஜானி பேர்ஸ்டோவையும் தூக்கினார் சுந்தர். ராயுடையதுதான் அணியின் டாப் ஸ்கோர்:46. சுந்தரும், டாக்குரும் தலா 2 விக்கெட்டுகளைச் சாய்த்தார்கள். Identical analysis: 4-0-29-2. இஷான் கிஷன் ப்ளேயர் ஆஃப் தி மேட்ச்; கோஹ்லியிடமிருந்து புகழ்ச்சி.

தொடர் ஸ்கோர் 1-1. இன்னும் 3 மேட்ச்சுகள் பாக்கி. புதுப்புது வீரர்களாக இந்தியா இறக்கும் வேகத்தைப் பார்த்தால், டி-20 உலகக்கோப்பைக்குத் தயாராவதை உணரமுடிகிறது. அடுத்த மேட்ச்சில் சூர்யகுமாரைக் கவனிக்கலாமா..

**

கிரிக்கெட்: ஆரம்பிக்கிறது டி-20 !

இன்று (12-3-21) அஹமதாபாதில் ஆரம்பிக்கிறது (7.00 PM IST Star Sports 1) டி-20 தொடர்போட்டிகள். ஆய்ன் மார்கன் ஒரு புத்துணர்வான இங்கிலாந்து அணிக்குத் தலைமை தாங்குகிறார். அவரோடு ஜேஸன் ராய், டேவிட் மலன், ஜோஸ் பட்லர், பென் ஸ்டோக்ஸ் (Ben Stokes), பேர்ஸ்டோ (Jonny Bairstow) போன்ற ஸ்பெஷலிஸ்ட் பேட்ஸ்மன்கள். மோய்ன் அலி, ஆதில் ரஷீத் எனும் ஸ்பின்னர்களோடு, ஆர்ச்சர், மார்க் உட், சாம் கர்ரன், ஜார்டன் ஆகிய வேகப்பந்துவீச்சாளர்கள். அணி வலுவாகத்தான் உள்ளது. டெஸ்ட் வெற்றி மிதப்பில் இருக்கும் இந்தியா கொஞ்சம் அசந்தால், முதல் மேட்ச் கைவிட்டுப்போய்விடும் !

சூர்யகுமார் யாதவ்

இந்திய அணியில் மாறுதல்கள் இருக்கும். வைஸ்-கேப்டன் ரோஹித் ஷர்மாவோடு கே.எல்.ராஹுல்  ஆட்டத்தை துவக்கி ஆடுவார். 3-ல் கேப்டன் கோஹ்லி, 5-ல் ரிஷப் பந்த், 6-ல் ஹர்தீக் பாண்ட்யா, 7-ல் வாஷிங்டன் சுந்தர், 8-ல் ஷர்துல் டாக்குர் என இருக்க வாய்ப்பு. மும்பை இண்டியன்ஸின் 360 degree middile-order attacker சூர்யகுமார் யாதவ் இன்று இந்தியாவுக்காக முதல் போட்டியை ஆடலாம். அவர் அணியில் சேர்க்கப்பட்டால், பேட்டிங் வரிசையில் 4-ஆவது இடத்தில்தான் வரவேண்டும். அங்கே இப்போதிருப்பது (டெல்லி கேப்பிடல்ஸ் கேப்டன்) ஷ்ரேயஸ் ஐயர். நன்றாகத்தான் ஆடிவருகிறார். அவரைக் கோஹ்லி மாற்ற விரும்புவாரா? கேள்வி. சுந்தருக்கு பேட்டிங் செய்ய வாய்ப்பு வருமா?

ஸ்பின்னர் / வேகப்பந்துவீச்சாளர் காம்பினேஷன் எப்படியிருக்கும்? 3 ஸ்பின்னரா அல்லது 2 போதுமா? மூன்று எனில் இங்கிலாந்தை டெஸ்ட்களில் ஆட்டிப்படைத்த அக்ஷர் பட்டேல் ஆடுவார். இல்லையெனில் வாஷிங்டன் சுந்தரும், யஜுவேந்திர சாஹலும்  மட்டுமே இருப்பார்கள். முதல் பவர்-ப்ளேயில் (1-6 ஓவர்) எதிரியின் ரன் எகிறாமல் தடுக்க, சுந்தரை கோஹ்லி பயன்படுத்துவது வழக்கம். அதே யுக்தி தொடருமா, எடுபடுமா இன்றும்?

மூன்று வேகப்பந்து வீச்சாளர்களைப் போட்டால் அணியில் இறுதியில் பேட்டிங் செய்ய ஆளில்லாமல் தடுமாறும்.  17-20 ஓவர்களில், குறிப்பாக chasing செய்ய நேர்கையில், இந்திய பௌலர்கள் பேட் செய்ய நேரிட்டால், இந்தியா காலி! சந்தேகமில்லை. அதனால் ஷர்துல் டாக்குர் மற்றும் புவனேஷ்வர் குமார் ஆகிய மிதவேகப்பந்துவீச்சாளர்களோடு கோஹ்லி இறங்கக்கூடும். டாக்குர் கீழ்வரிசையில் தாக்கி ஆடும் திறனுடையவர். புவனேஷ்வர் ஓரளவு நின்று கொஞ்சம் தட்டுவார். ஸ்விங் பௌலரான தீபக்  சாஹர் (Deepak Chahar) வரலாமோ? யார்க்கர்-ஸ்பெஷலிஸ்ட் நடராஜன் NCA, Bangalore-இலிருந்து இன்னும் அணிக்கு அனுப்பப்படாததால், தீபக் வர வாய்ப்பு. பாண்ட்யா 2-3 ஓவர் medium pace போட்டாலே போதும்; மூன்றாவது வேகப்பந்துவீச்சாளர் தேவையில்லை என ஒருவேளை கோஹ்லி முடிவு செய்யலாம். அப்போது சாஹர் பெஞ்சில் அமர்ந்து வேடிக்கை பார்க்கவேண்டியிருக்கும்.

டெஸ்ட் தொடரில் செமயா இந்தியாவிடம் வாங்கிக்கட்டியதால் இமேஜ் காலியான இங்கிலாந்து, டி-20 தொடரில் சாகசம் காண்பிக்க முயலும்!  கட்டுப்பாடுகளை விட்டு விலகி, தாக்கி ஆடும் இந்தியா என்று ப்ரெஸ்-மீட்டில் திருவாய்  மலர்ந்திருக்கிறார் விராட் கோஹ்லி. தாக்குமா இல்லை, தாக்கப்படுமா?

**

Cricket: பகலிரவு டெஸ்ட் !

இன்று (24-2-21) அகமதாபாதின் மொடேரா (Motera) மைதானத்தில் ஆரம்பமாகிறது, இந்தியா-இங்கிலாந்து தொடரின் மூன்றாவது டெஸ்ட். உலகக்கோப்பை சேம்பியன்ஷிப் ஃபைனலுக்கு இந்தியா தகுதிபெறுமா இல்லை ஏமாற்றம்தானா என்பதை இந்த Pink-ball Day-Night Test சொல்லிவிடும்!

Motera – World’s biggest Cricket Stadium

மொடேரா அசத்தலான தோற்றம் கொண்டிருக்கிறது. எல்.ஈ.டி. விளக்குகள் பொருத்தப்பட்டு, மிகவும் நவீனப்படுத்தப்பட்ட, 110 லட்சம்பேர் உட்கார்ந்து பார்க்கக்கூடிய,  உலகின் பிரம்மாண்ட கிரிக்கெட் மைதானம் இது. ஜனாதிபதி ராம்நாத் கோவிந்த் இன்று இதைத் திறந்துவைத்து கிரிக்கெட் உலகிற்கு அர்ப்பணிக்கிறார்! சுமார் 55000 ரசிகர்கள் அனுமதிக்கப்படுவார்கள். கோவிட் பரவல்-தடை முன்னெச்சரிக்கை நடவடிக்கைகள் எடுக்கப்பட்டுள்ளன. இப்படியொரு காலத்தில் இத்தனைபேரை ஸ்டேடியத்தில் அமர்ந்து பார்க்கவைப்பதே ஒரு மாபெரும் சாதனை. இந்திய கிரிக்கெட் போர்டு பாராட்டுக்குரியது.

SG’s Pink Cricket Ball for Day-Night Tests

பிட்ச் எப்படி? பொதுவாக பகலிரவு டெஸ்ட்டில் Pink ball-கொண்டு ஆடுவதால், பிங்க் பந்தின் பளபளப்பு மங்காமலிருக்கவென பிட்ச்சில் பசுமை இருக்குமாறு பார்த்துக்கொள்வதுண்டு. 6 மி.மீ.. உயரப்புல் காட்டும் பிட்ச் பரப்பு. இது  அதிகபட்ச ஸ்விங், மூவ்மெண்ட் தருவதால் வேகப்பந்துவீச்சாளர்களின் மனதில் குஷியைக் கிளப்பும். ஸ்பின்னர்களுக்கோ  வேதனை. அவர்கள் ஜாலம் இதில் எடுபடுவதில்லை என்பது இதுவரையிலான அனுபவம். இதுதான் இந்தியாவின் முதல் பகலிரவு டெஸ்ட்டான கடந்த வருட கல்கத்தா டெஸ்ட்டிலும் நடந்தது. முக்கிய ஸ்பின்னர்களான அஷ்வினுக்கும், ஜடேஜாவிற்கும் மொத்தமாகவே 7 ஓவர்கள்தான் மேட்ச்சில் தரப்பட்டது!

ஆனால் தொடரின் 3-ஆவது முக்கியமான  டெஸ்ட் ஆடப்படவிருக்கும் மொடேரா மைதானத்தில் அந்தக் கதை திரும்பவராது எனத் தோன்றுகிறது.  புல் கிட்டத்தட்டக் காணப்படாத லெவலுக்கு Curator பிட்ச்சை சிரைத்துவைத்திருப்பதாகத் தெரிகிறது!  குறிப்பாக ஈரப்பதன் காட்டும் ட்வைலைட்/இரவு வேளையில், இந்தப் பிட்ச் எப்படி நடந்துகொள்ளும்? வேகப்பந்துவீச்சாளர்களுக்கு ரிவர்ஸ் ஸ்விங் தருமா? சுழல்வீரர்களுக்கு சுருட்டித் தருமா விக்கெட்டுகளை? இரண்டு அணிகளிலும் எதையும் சந்திக்கத் தகுதியான பௌலர்கள்  உண்டு. ஆனால் பேட்ஸ்மன்களின் பாடு ? 

இந்த டெஸ்ட்டில் ’இந்திய 11’ – எப்படி இருக்கும்? ரோஹித் ஷர்மாவிலிருந்து, ரிஷப் பந்த்-வரை – முதல் 6 பேட்ஸ்மன்களில் மாற்றம் இருக்காது. 7-ல் அக்‌ஷர் பட்டேல், 8-ல் அஷ்வினும் மாற்றப்படமாட்டார்கள். 9, 10, 11-க்கான வீரர்கள்  மாறிக் காட்சியளிப்பார்கள். 2 வேகம்,  3 சுழல் ஃபார்முலாவா? 3 வேகம், 2 சுழல் என்கிற சூத்திரமா? கோஹ்லியின் மண்டைக்குள் ஊருவது எது! அதைப்பொறுத்து இறுதி 3 வீரர்கள்.  வேகப்பந்துவீச்சாளர்கள் உமேஷ் யாதவும், இஷாந்த் ஷர்மாவும் கடந்த வருட பகலிரவு கல்கத்தா டெஸ்ட்டில் வித்தை பலகாட்டி, பங்களாதேஷைத் தூர்வாரினார்கள். இப்போது எதிரியோ இங்கிலாந்து. வேகத்தில் விதவிதமாக வைத்திருக்கும் எதிரி. அவர்களது இளம் ஸ்பின்னர்களும் திறமையானவர்கள்.  ஒரு முழுமையான டெஸ்ட் அணி இங்கிலாந்து. ஆதலால் இந்திய அணி  கவனமாக தேர்வுசெய்யப்படவேண்டும்.

வேகப்பந்துவீச்சாளர் ஜஸ்ப்ரித் பும்ரா, முகமது சிராஜின் இடத்தில் வரலாம். சுழல்வீரர் குல்தீப் யாதவின் இடத்தில் உமேஷ் யாதவ் வருவாரா? இல்லை , வாஷிங்டன் சுந்தர் அல்லது ஹர்தீக் பாண்ட்யா – ஆல்ரவுண்டர்களில் ஒருவரை இந்தியா இறக்கக்கூடுமா என்பதே ரசிகர்களின் படபடப்பு.  ஹர்தீக்கின் மைனஸ் – இப்போது அவர் முன்போல் ’மீடியம் பேஸ்’ வீசுவதில்லை. (ஆனால் அவர் மொடேராவில், பிங்க்-பந்தில் பந்துவீசி பயிற்சி எடுத்துக்கொண்டிருந்தது பத்திரிக்கையாளர் கண்களில் பட்டுள்ளது!) அசத்தலான மிடில்-ஆர்டர் பேட்ஸ்மன். புல் மழிக்கப்பட்ட மொடேரா பிட்ச், ஸ்பின் ஜாலம் காட்டும் என கணிக்கப்பட்டால், சுந்தர் நுழையக்கூடும். அவரின் பேட்டிங்கோடு, வேகமாக வந்து விழும் ஆஃப் ஸ்பின்னும் கைகொடுக்கலாம். உமேஷா, சுந்தரா, ஹர்தீக்கா? கஷ்டமான வேலை, இந்த செலக்‌ஷன் வேலை!

**

சென்னை – 2 ! விழித்துக்கொள்ளுமா இந்தியா ?

நாளை (13/2/21) ஆரம்பிக்கிறது அதே சென்னையில் இரண்டாவது டெஸ்ட். இந்தமுறை கருப்புமண்ணால் நிரப்பப்பட்டிருக்கும் பிட்ச் நம்பர் 5-ல் ஆட்டம். முதல் நாளிலேயே வேலையைக் காண்பிக்க ஆரம்பிக்கும், பந்து திரும்பும்.. என்றெல்லாம் கணிப்புரை தொடங்கிவிட்டது. இங்கிலாந்து அணியில் உற்சாகம். நேர்மாறான மனநிலையில் கோஹ்லியின் அணி. இந்தியா டாஸ் ஜெயிக்க… சரி, இது வேண்டாம். முதல் இன்னிங்ஸில் ரன் சேர்ப்பதே சிரமமாக இருக்கக்கூடும், பிட்ச் பற்றிய கணிப்பு சரியாக இருந்தால். இந்தியாவின் டாப்-5 – ரோஹித், கில் (Gill), புஜாரா, கோஹ்லி, ரஹானே இந்தப் பிட்ச்சில் எப்படி ஆடுவார்கள் என்பதைப் பொறுத்துத்தான் ரிசல்ட் அமையும்.

இங்கிலாந்து அணியில் மாறுதல்கள் அறிவிக்கப்பட்டுவிட்டன. வேகப்பந்துவீச்சில் அதிரடி மாற்றம். ஜோஃப்ரா ஆர்ச்சருக்குக் காயம். ரிவர்ஸ்-ஸ்விங் காட்டிய ஆண்டர்ட்சனும் ஆடவில்லை. மாற்றாக ஸ்டூவர்ட் ப்ராட் (Stuart Broad) மற்றும் ஓல்லி ஸ்டோன் (Olly Stone) / க்றிஸ் வோக்ஸ் – இருவரில் ஒருவர் வேகப்பந்துவீசக்கூடும். ஏனோ ஸ்பின்னர் டாம் பெஸ்ஸை (Dom Bess) எடுத்துவிட்டார்கள். பதிலாக இந்தியாவில் சிறப்பாக  பேட்டிங் செய்யும் ஸ்பின்னரான மொயீன் அலி உள்ளே. விக்கெட்கீப்பர் பட்லருக்கு ஓய்வாம். ரிசர்வ் விக்கெட்கீப்பர்  பென் ஃபோக்ஸிற்கு (Ben Foakes) வாய்ப்பு.

Axar Patel
Left-arm orthodox Spinner

இந்திய அணி? குழப்பம் தீர்ந்ததா கோஹ்லி-சாஸ்திரி ஜோடிக்கு? தெரியவில்லை. ஃபிட்டாகிவிட்ட ஆல்ரவுண்டர் அக்‌ஷர் பட்டேல்,( நதீமின் இடத்தில் ) தன் முதல் டெஸ்ட்டை ஆட வாய்ப்பிருப்பதாகத் தோன்றுகிறது. அது அணிக்கு வலிமை சேர்க்கும். பந்தை உள்ளே திருப்பும் இடது கை ஸ்பின்னர். பேட்டிங் திறமையும் உண்டு. இது மிக முக்கியம் இந்திய அணிக்கு இப்போது. ஆரம்பமே நொறுங்கினால் 7, 8-ஆவது ஆளாவது கவனமாக ஆடி, 30-40 சேர்த்து அணியை கௌரவமான நிலைக்குத் தள்ளவேண்டியிருக்கும். குல்தீப் யாதவும் வரலாம் எனவும் சிலர் யூகம். யாரிடத்தில்? வாஷிங்டன் சுந்தரின் இடத்தில்! குல்தீப் உள்ளே வருவது உபயோகமாக இருக்கும். ஆனால் போன டெஸ்ட்டில் அருமையாக பேட்டிங் செய்த சுந்தரை வெளியே போகச்சொல்வது, அபத்தக் கதையின் அடுத்த அத்தியாயமாக அமையும்.

முகமது சிராஜ் நல்ல ஃபார்மில், துடிப்போடு இருக்கும் வீரர். விக்கெட் வீழ்த்தும் ஆவேசத்தோடு, ஸ்விங் திறனும் காண்பித்தவர். அவர் அணிக்குள் நுழைவது அணிக்கு பலம் கொடுக்கும். யார் வெளியே போகவேண்டியிருக்கும்? பும்ராவின் யார்க்கர்கள்  சரியாக விழுகின்றன. விக்கெட்டுகளும் பரவாயில்லை. அதனால்  இஷாந்தின் இடத்தில், சிராஜ் ஆடினால் நாளைய பிட்ச்சில் எடுபடும் எனத் தோன்றுகிறது.

நமக்குத் தோன்றி என்ன செய்ய! ‘Ko-Sha’-வுக்குத் தோன்றவேண்டுமே..

**

கிரிக்கெட்: சென்னை கொடுத்த அடி!

டெஸ்ட் ரிசல்ட் எதிர்பார்த்தபடி. இரண்டாவது டெஸ்ட்டும் இதே மைதானத்தில்தான், மூன்றே நாட்களில். கோஹ்லி&கோ.வுக்கு அடுத்த போட்டியில் எதைக் கவனிக்கவேண்டும், என்ன செய்யவேண்டும் என்று புரிந்ததா? கோஹ்லி டாஸ் வெல்வது என்பது, ஆண்டவனின் கையில்கூட இல்லை என்பதால் அதை விட்டுவிடலாம்.

மேட்ச் முடிந்ததும் முரளி கார்த்திக்கோடு அளவளாவுகையில் கேப்டன் கோஹ்லி என்ன சொன்னார்? சப்போர்ட் ஸ்பின்னர்ஸ் போதுமான அளவுக்கு ஒத்துழைக்கவில்லை. இந்தியா தன் body language- ஐ முன்னேற்றிக்கொள்ளவேண்டும்! ஓ.. புரிகிறது. கோஹ்லி மாதிரி, முகத்தில் உணர்வு ஜாலங்கள், கைகால்களின் மூலம் சேஷ்டைகள்.. இதை மைதானத்தில் கொண்டுவந்தால் போதும். மேட்ச் நம் கைக்குவந்துவிடும். எதிரி காலி. அடடா.. என்ன ஒரு வியூகம்.

ரன்களைக் கட்டுப்படுத்துவதில் சப்போர்ட் ஸ்பின்னர்களின் முயற்சி போதவில்லை என்கிறார் கேப்டன். புது ஸ்பின்னர்கள் – நதீம், சுந்தர் – இவர்களை உடனே ரவீந்திர ஜடேஜாவுடன் ஒப்பிடக்கூடாது. ஜடேஜாவின் திறன், உழைப்பு, அனுபவம் ஒப்பிடமுடியாதது. நதீமும், சுந்தரும் இப்போதுதான் டெஸ்ட் உலகில் நுழைந்திருக்கிறார்கள்.  புதியவர்களைத் தட்டிக்கொடுப்பது, உற்சாகப்படுத்தவேண்டியது கேப்டனின் கடமை. தோல்விக்கு அவர்களைக் குறைசொல்லித் தப்பிக்கப் பார்ப்பது கோமாளித்தனம். நதீமும் சுந்தரும் டெஸ்ட்டின் எந்தெந்த நாட்களில் பந்து வீசினார்கள்? பிட்ச் சாதுவாக இருந்த, எதிரணி பேட்டிங் செய்ய ஏதுவாக இருந்த முதல் இரண்டு நாட்களில். இங்கிலாந்தின் முதல் இன்னிங்ஸில், அஷ்வினே 51 ஓவர் போட்டுத்தான் 3 விக்கெட்டுகளைத் தூக்கமுடிந்தது. கிட்டத்தட்ட எல்லா பௌலர்களுமே ஓவருக்கு 4 ரன்னுக்குமேல் கொடுத்தார்கள். இந்திய வேகப்பந்துவீச்சாளர்களுக்கு பௌன்சர் போடும் தைர்யமே வரவில்லை. பேட்ஸ்மனுக்கு ஒத்துழைத்த பிட்ச்சின் ஆரம்ப நாட்கள், இங்கிலாந்து டாஸ் வென்றதால் அவர்களுக்கு சாதகமானது என்பதுதானே பிரதான உண்மை. இது கோஹ்லியின் தலைக்குள் போகவில்லையோ?

இஷாந்த், பும்ரா, அஷ்வின் ஆகியோர்,  பௌலர்களுக்கு மோசமான பிட்ச்சில் அருமையாக உழைத்தார்கள். சில விக்கெட்டுகள் கிடைத்தன. குறிப்பாக அஷ்வின், 75 டெஸ்ட் விளையாடிய அனுபவமுள்ள ஸ்பின்னர், இரண்டாவது இன்னிங்ஸில் தூள்கிளப்பினார். சப்போர்ட் ஸ்பின்னர்களைக் குறைசொல்லும் கோஹ்லி, இங்கிலாந்து போட்டுச்சாத்திய முதல் இன்னிங்ஸில், முதல் இரண்டு நாட்கள், ஸ்பின்னர்களுக்கு கொடுத்த ஓவர்கள் எப்படி? இதோ:

அஷ்வின் ; 51.5 ஓவர்கள் : விக்கெட் 3.

நதீம்      : 44 ஓவர்கள். விக்கெட் 2.

சுந்தர்     : 26 ஓவர்கள் விக்கெட் 0.

Nadeem bowls

இப்படி சார்ட் பார்த்தால் போதாது. புரியாது. கொஞ்சம் விளக்குவோம். ஷாபாஸ் நதீம் அணியில் வந்தது அக்‌ஷர் பட்டேல் (genuine allrounder) காயம் காரணமாக இடம்பெற முடியாததால். குல்தீப் யாதவையும் அலட்சியம் செய்து ஷாபாஸ் நதீமைக் கொண்டுவந்தது கோஹ்லிதான்.  அக்‌ஷர், குல்தீப் அளவுக்குத் திறனானவர் இல்லை நதீம். கொஞ்சம் நம்பிக்கை இல்லாதவர்போலவும் பௌலிங் செய்கையில் காணப்பட்டார் என்கிறார் மஞ்ச்ரேகர். அதற்காக அனுபவக் குறைவான வீரரைத் தாக்கமுடியாது.

வாஷிங்டன் சுந்தர், அத்தகைய dead pitch-லும் சுமாராக ஆஃப்ஸ்பின் வீசினார். அவரின் ஓவரில் ஒரு நிச்சய எல்.பி.டபிள்யூ.  தரப்படவில்லை. DRS வாய்ப்புகள் மிச்சமில்லாததால் இந்தியாவால் அப்பீல் செய்யமுடியவில்லை! மேலும் சுந்தரின் இன்னொரு ஓவரில் மிட்-ஆனில் ரோஹித் ஒரு லாலிபாப் கேட்ச்சை நழுவவிட்டு அசடுவழிந்தார். இது சப்போர்ட் ஸ்பின்னரின் குற்றமல்லவே! இவை கிடைத்திருந்தால் சுந்தருக்கும் 2 விக்கெட்டுகள் 26 ஓவர்களிலேயே கிடைத்திருக்கும்தான். இரண்டாவது இன்னிங்ஸில் – அஷ்வினுக்கு 17.3 ஓவர், நதீமுக்கு 14 ஓவர் கொடுக்கப்பட்டன. சுந்தருக்கு கோஹ்லி கொடுத்தது ஒரே ஓவர். அதில் ஒரு ரன் கொடுத்தார் அவர். பேட்டிங்கும் செய்யவேண்டும் என்பதால் அதிக ஓவர்களை சுந்தருக்குக் கொடுக்கவில்லைபோலும். தவறில்லை.

Sundar & Pant

ஆட்டத்தின் இன்னொரு பக்கத்தை கவனிப்போம். முதல் இன்னிங்ஸில் இந்திய ஸ்கோர், இங்கிலாந்தின் ஸ்கோருக்கு (578) அருகிலாவது வந்திருக்கவேண்டும். 500-ஐ நெருங்கமுடியாவிட்டாலும், 450- க்குப் பக்கத்திலாவது வந்திருக்கவேண்டும். ஆனால் அதற்கு டாப்-ஆர்டர் பேட்டிங் சரியாக இயங்கவேண்டுமே. என்ன நடந்தது? ரோஹித் 6, ஷுப்மன் கில் 29, கோஹ்லி 11, ரஹானே 1. கில் (Gill)-ஐத் தவிர்த்து, இந்திய டெஸ்ட் கிரிக்கெட்டின் பெருந்தலைகளின் பேட்டிங் லட்சணம். இந்திய முதல் இன்னிங்ஸ் 73/4 எனத் தத்தளித்தது ஒரு கட்டத்தில். ரிஷப் பந்த்-உம், வாஷிங்டன் சுந்தரும் அடிக்காவிட்டால் ஸ்கோர் 200-ஐத் தாண்டுவதற்கே முக்கியிருக்கும். சென்னை பிட்ச்சில் -கடைசி நாளில்- பேட் செய்வது எளிதல்ல. பௌலர்களுக்கு சாதகமாக மாறிவிட்ட பிட்ச். Anderson’s reverse swing at its best. கில், ரஹானே,  பந்த் எனத் தலைகள் உருண்டன. இரண்டு இன்னிங்ஸிலும் batting flops : ரோஹித் , ரஹானே . (ராஹுல், ஆஹா.. நாம் நுழைந்துவிடவேண்டியதுதான் என எண்ணியிருப்பாரோ?)

கோஹ்லி, இந்தியாவின் கேப்டன், இதையெல்லாம் புரிந்துகொள்கிறாரா? இல்லை, சப்போர்ட் ஸ்பின்னர்களின் சப்போர்ட் கிடைக்காததால்தான் தோல்வி எனச் சொல்லி அடுத்த மேட்சிலும் ஜகா வாங்கப்போகிறாரா? நிபுணர் சாஸ்திரி வாயைத் திறக்கக் காணோமே?

**