ICC Women’s T-20: இந்தியப் பெண்களுக்கு இன்னுமொரு வெற்றி

ஆஸ்திரேலியாவின் பர்த் (Perth) மைதானத்தில் நேற்று (24/2/2020) இந்திய மகளிரணி பங்களாதேஷை வென்றது.

ஸ்பின்னை நன்றாக ஆடக்கூடிய, தன் வசமும் நல்ல பௌலர்களை வைத்திருக்கும் மகளிர் அணி பங்களாதேஷ். எதிர்பார்க்கப்பட்டதுபோலவே போட்டியில் கடுமை தெரிந்தது. டாஸ் வென்ற பங்களாதேஷ் கேப்டன் ’நாங்கள் பேட்டிங்’ என்றார் முதலில். பிறகு என்ன நினைத்தாரோ ஃபீல்டிங் செய்வோம் என்றார்.. சிந்தனைக் குழப்பம்! இந்தியாவின் ஷெஃபாலியும், விக்கெட் கீப்பர் தான்யாவும் மட்டையுடன் இறங்கினார்கள்.  வைரல் ஜுரத்தினால் ஆடவில்லை ஸ்ம்ருதி மந்தனா. இந்தியாவுக்கு அதிர்ச்சி. அவருக்கு பதிலாகப் புகுந்தார் (வங்கத்தின்) ரிச்சா கோஷ் (Richa Ghosh)

ஷெஃபாலி வர்மா ஒவ்வொரு மேட்ச்சிலும் தன் சர்வதேச வருகையைப் பறைசாற்றி வருகிறார். வர்ணனையாளர்கள் அவரை இந்திய ’பவர்-ஹிட்டர்’ என்கின்றனர். சேஹ்வாக்-ஸ்டைல் அதிரடியில் ஷெஃபாலி, பங்களாதேஷை ஆரம்பத்திலிருந்தே தாக்க ஆரம்பித்தார். ஒரு 16-வயது சிறுமி கொஞ்சம் ஜாக்ரதையாக ஆரம்பிக்கவேண்டாம், எதிரணியின் சீனியர் பௌலர்களை மதிக்கவேண்டாம்.. ம்ஹூம்! அதெல்லாம் இவருக்கு ஆகாது.. Defensive push, prod என்றெல்லாம் எதுவும் இல்லை. ஆஃப் ஸ்டம்புக்கு வெளியே எகிறவிட்டு சீண்டிய பங்களாதேஷின் வேகப்பந்துவீச்சை (ஜஹானரா ஆலம், பன்னா கோஷ்) கவர், பாய்ண்ட் திசைகளில் அனாயாசமாகப் பறக்கவிட்டார். ஸ்பின்னர் நுழைக்கப்பட்டபோது தலைக்குமேலே தூக்கிவிட்டு ஸ்டேடியத்தில் விழவைத்தார் – சிக்ஸ்.  பங்களாதேஷ் ஃபீல்டர்கள் ஷெஃபாலியின் பேட், ஆகாசம், பௌண்டரி என வேடிக்கை பார்க்கவேண்டியிருந்தது. 19 பந்துகளில் 39 ரன்கள். 2 பௌண்டரி, 4 சிக்ஸர். ஷெஃபாலியின் ஆட்டத்தின்போது இந்திய ஸ்கோர் 53 (5 1/2 ஓவர்கள்) என இருந்தது! அவர் அவுட் ஆனபின் ஜெமிமா ரோட்ரிக்ஸ் அமைதியாக ரன் சேர்த்தார். 34 ரன்களில் (2 பௌண்டரி, 1 சிக்ஸ்) ரன் -அவுட் ஆனபின் மற்றவர்களின் சரிவு. வேதா, தீப்தியின் குழப்ப ஓட்டத்தில் கோமாளித்தனமான ரன் -அவுட். 16 வயது ரிச்சா 14 ரன்கள் சேர்த்தார். கடைசி ஓவர்களில் வேதா கிருஷ்ணமூர்த்தி 11 பந்துகளில் 20 நாட் -அவுட் என விளாச, இந்தியா ஸ்கோர் 142-த் தொட்டது. இப்போதைக்கு உலகக்கோப்பையின் அதிகபட்ச ஸ்கோர்.

143 என்கிற இலக்கை எட்டக்கூடிய அளவுக்கு பங்களாதேஷிடம் பேட்ஸ்மன்கள் உண்டு என்பதால் இந்தியா கவனமாக பௌலிங் செய்தது. இந்திய ஃபீல்டிங்கின் தரம் மோசம். கேட்ச்சுகள் நழுவின. பங்களாதேஷ் ஒரு பக்கம் விக்கெட் விழுந்தாலும் சிங்கிள்கள், அவ்வப்போது பௌண்டரி என இலக்கு நோக்கி தீர்மானமாக நகர்ந்தது.  ஆனால், இந்திய ஸ்பின்னர்களின் வருகை பங்களாதேஷ் மிடில் ஆர்டரின் வயிற்றில் புளியைக் கரைத்தது. ராஜேஷ்வரியும், பூனமும் சுழற்றி, சுழற்றி வீச, விக்கெட்டுகள் சரிந்தன. இறுதியில் கடைசி ஓவரில் 22 ரன் எடுத்தால் வெற்றி என்கிற நிலை பங்களாதேஷுக்கு. மிதவேகப் பந்துவீச்சாளர் ஷிகா பாண்டேயிடம் பந்தைக்கொடுத்தார் இந்தியக் கேப்டன் ஹர்மன்ப்ரீத் கௌர். நன்றாக ஆடிக்கொண்டிருந்த ருமானா அஹ்மதை முதல் பந்திலேயே ’யார்க்’ செய்தார் ஷிகா. அடுத்தடுத்த பந்துகளில் அவர்களால் முண்டமுடியவில்லை. பங்களாதேஷ் 124 தான் எடுத்தது; 18 ரன் வித்தியாசத்தில் வென்று இந்தியப் பெண்கள் முத்திரை பதித்தார்கள். 

பங்களாதேஷிற்காக மின்னிய நட்சத்திரங்கள் விக்கெட் கீப்பர் நிகர் சுல்தானா (35) மற்றும் முர்ஷிதா காதும் (Murshida Khatum) (30). முர்ஷிதா எதிர்காலத்தில் பங்களாதேஷுக்கு திறனான வீராங்கனையாக வளரக்கூடும்.  பௌலிங்கில் கேப்டன் சல்மா காதுன் மற்றும் அணியின்  ஒரே ஹிந்து வீராங்கனை பன்னா கோஷ் (Panna Ghosh) -தலா 2 விக்கெட்டுகள். இந்தியத் தரப்பில் வீழ்த்திய விக்கெட்டுகள் பூனம்  3, ஷிகா, அருந்ததி  தலா 2. ராஜேஷ்வரி  1. மோசமான பௌலிங் கைங்கர்யம் தீப்தி . ரன்களை எதிரிக்குக் கொடுப்பதில் தாராளம்!

மையுண்ட விழிகளுடன் ஜஹானரா..!

பங்களாதேஷி மங்கைகளில் ஜஹானரா ஆலம்,   மைதீட்டிய விழிகளுடன், மஞ்சள்-பழுப்பு வண்ணத்தில் மாடலைப்போல் தோன்றியது, ஆட்டத்தின் கவர்ச்சிக் காட்சி! என்ன நினைத்தாரோ தெரியவில்லை, பூனம் யாதவ் நெற்றிக் குங்குமம் இல்லாமல் மைதானத்தில் இறங்குவதில்லை. அவர் ஒருவரே இந்திய அணியில் அப்படி!

பர்த் ஸ்டேடியம் சில இடங்களில் பஞ்சாபின் பாங்ரா நடனக்கூடம் போல் தோன்றியது! இந்திய சீக்கியர்கள் நிறையப்பேர் ட்ரம்களுடனும், குறிப்பாக சீக்கியப் பெண்கள், சிறுமிகள் பாரம்பரிய அலங்கார உடைகளில் வந்திருந்ததோடு அவ்வப்போது ஆடியும் காண்பித்தனர்! ஆஸ்திரேலியாவையே போட்டுத்தாக்கிய இந்திய மகளிர் அணியைக் குஷிப்படுத்தவேண்டாமா! இன்னொரு பக்கத்தில் பச்சை-சிவப்பு பங்களாதேஷ் ரசிகர்கள் புலிப்பொமைகளுடன் நடனமாடத் தயாராக இருந்தனர். வாய்ப்புதான் கிடைக்கவில்லை!

**

ICC T-20 Women’s World Cup : இந்தியாவின் அதிரடி ஆரம்பம்

மகளிர் டி-20 கிரிக்கெட்டின் உலகக்கோப்பை ஆஸ்திரேலியாவில் நடந்துவருகிறது. உலகின்  9 முக்கிய கிரிக்கெட் தேசங்களோடு 10-ஆவது நாடாக, அதிசயமாக தாய்லாந்து!   இரண்டு பிரிவுகளாக அணிகள் பிரிகின்றன. Group A: ஆஸ்திரேலியா, நியூஸிலாந்து, இந்தியா, ஸ்ரீலங்கா, பங்களாதேஷ். Group B: இங்கிலாந்து, தென்னாப்பிரிக்கா, வெஸ்ட் இண்டீஸ், பாகிஸ்தான், தாய்லாந்து. இந்திய மகளிர் அணிக்கு  முன்னணி பேட்ஸ்மன் ஹர்மன்ப்ரீத் கௌர் (Harmanpreet Kaur) தலைமை தாங்குகிறார்.

இரண்டு நாள் முன்பு நடந்த முதல் மேட்ச்சில் நடப்பு சேம்பியனான ஆஸ்திரேலியாவும் இந்தியாவும் ஆடிய ஆட்டம் கடுமையான மோதலை வெளிக்கொணர்ந்தது. ஸிட்னியில் (Sydney) முதன்முதலாக, பெண்கள் மேட்ச் ஒன்றிற்கு 18 ஆயிரத்திற்கும் மேலான ரசிகர்கள் வந்திருந்து அமர்க்களப்படுத்தினர். இந்திய மூவர்ணக்கொடிகளும், நீலச்சட்டைகளும் மினுமினுக்க, அரங்கெங்கும். ஆஸ்திரேலியர்கள் நிறையப்பேர்  தங்களது அணியைப் பெருமையுடன் ஊக்குவிப்பதைக் காணமுடிந்தது. பள்ளி சிறுவர்கள் அதிகமாக அமர்ந்து ஆர்ப்பரித்தது கோலாகலத்தைக் கூட்டியது.

டாஸ் வென்ற ஆஸ்திரேலியப் பெண்கள், இந்திய அணியை முதலில் பேட் செய்யச் சொன்னார்கள். இந்தியாவின் துவக்க ஆட்டக்காரர்கள் ஷெஃபாலி வர்மா (Shefali Verma), ஸ்ம்ருதி மந்தனா அதிரடி பேட்டிங் செய்பவர்கள். அதிலும் ஷெஃபாலி சர்வதேசக் கிரிக்கெட் உலகில்  நுழைந்திருக்கும் ஒரு சிறுமி போன்றவர். 16-ஆவது வயதுக்குள் கடந்த மாதமே பிரவேசித்தவர். ஆஸ்திரேலிய வேகப்பந்துவீச்சை துவம்சம் செய்யாமல் மீளப்போவதில்லை என கங்கணம் கட்டி நுழைந்திருந்தாரோ? மந்தனா வழக்கத்துக்கு மாறாக அமைதிகாக்க, ஷெஃபாலி சுழற்றினார் பேட்டை. 29 ரன்களில் அவுட்டானார் எனினும் அதில் 5 பௌண்டரி, 1 சிக்ஸ் ! ஷெஃபாலி அவுட்டானதும்தான் கொஞ்சம் ஆசுவாசமூச்சு விட்டது ஆஸ்திரேலியா. அதற்குப்பின் மந்தனா, கேப்டன் கௌர் என இந்தியாவின் முக்கிய பேட்ஸ்மன்களை சொற்ப ஸ்கோரில் வீட்டுக்கு அனுப்பியது. ஸிட்னியின் ஸ்லோ-பிட்ச்சிற்கு ஏற்றபடி ஆடிய ஜெமிமா ரோட்ரிக்ஸ் மற்றும் தீப்தி ஷர்மா சிங்கிள்களாக ஓடி ரன் சேர்த்தனர். ஷெஃபாலி போனபின்பு இந்தியாவுக்கு ஒரே பௌண்டரிதான் வந்தது. இந்திய அணி 132 -க்கு 4 விக்கெட் என இன்னிங்ஸை முடித்துக்கொண்டது. தீப்தி 49 நாட்-அவுட்.

Spin magician
Poonam Yadav

வலிமையான ஆஸ்திரேலிய மகளிர் அணிக்கு இது ஊதித்தள்ளிவிடக்கூடிய இலக்குதான். அப்படி ஒரு மலர்ந்த புன்னகையாக, பேட்டிங்கைத் துவக்கி நன்றாக ஆடியது ஆஸ்திரேலியா. 133 எடுத்தால் வெற்றி என்கிற நிலையில், ஒரு கட்டத்தில் 66/2 என இருந்த ஆஸ்திரேலியாவின் வெற்றிக்கு 67 ரன்கள்தான் தேவை. 8 விக்கெட்கள் கைவசம். அப்போது கேப்டன் ஹர்மன்ப்ரீத் கௌர், இந்திய சுழல் மந்திரவாதி பூனம் யாதவிடம் கொடுத்தார்: போடுடி பந்தை! என்ன நடக்கிறதெனப் பார்ப்போம்..

ஆஸ்திரேலியாவின் விக்கெட்கீப்பர் ஹீலி (Alyssa Healy) அபாரமாக அரை சதம் கடந்து ஆடிக்கொண்டிருந்தார். தன் முதல் ஓவரிலேயே அவரைத் தூக்கி வீசினார் பூனம்.  அடுத்த ஓவரில் இரண்டு பந்துகளில் இரண்டு விக்கெட்டுகள். மூன்றாவது பந்திலும் விக்கெட் வந்திருக்கவேண்டியது. ஆஸ்திரேலிய பேட்ஸ்மன் கார்ட்னரின் (Ashleigh Gardner) ஸ்டம்பை உரசி, பெயிலை விழவைத்தது. ஆனால் பந்து இரண்டு முறை பௌன்ஸ் (bounce) ஆனதாக அம்பயரால் தீர்ப்பளிக்கப்பட்டு நாட்-அவுட் என்றனர். பரவாயில்லை. ஆஸ்திரேலிய அஸ்திவாரத்தைத் தாக்கிவிட்டார் பூனம். ஆட்டம் கண்ட நிலையில் 133-ஐ நோக்கி மெல்ல நகரப் பார்த்தது ஆஸ்திரேலியா. அதிரடி காட்டமுயன்ற கார்ட்னரை,  ஷிகா பாண்டே காலி செய்தார். பூனம் யாதவ் 4 ஓவர்களில் 4 விக்கெட் வீழ்த்த ஆஸ்திரேலியா 115 ரன்களில் பரிதாபமாகத் தோல்விகண்டது.(A. Healy 51, A.Gardner 34). மீடியம் பேசர் ஷிகா பாண்டே 3 விக்கெட்டுகளையும், இன்னொரு ஸ்பின்னரான ராஜேஷ்வரி கெய்க்வாட் (Rajeshwari Gaekwad) ஒரு விக்கெட்டையும் வீழ்த்தினர். இரண்டு ரன் அவுட்கள். ஆஸ்திரேலிய ரசிகர்கள் முகங்கள் உறைந்துபோய்விட்டிருந்தன.

பூனம் யாதவின் பௌலிங் சாகஸத்தை devilish spin என்கிறது, ஆஸ்திரேலிய நாளேடு ஒன்று. ஆறு வருஷங்களாக இந்திய அணிக்காக ஆடிவரும் சீனியர் வீராங்கனை. கடந்த வருடம் காயத்தினால் ஆடமுடியாது தவித்தார். உலகக்கோப்பைக்கு முன்னர்தான் தகுதிபெற்று அணியில் சேர்க்கப்பட்டவர்.

இந்திய அணியின் வலிமையான அம்சம் ஸ்பின் பௌலிங் (பூனம் யாதவ், ராதா யாதவ், ராஜேஷ்வரி கெய்க்வாட்). ஸிட்னியைத் தவிர்த்து மற்ற மைதானங்களில் ஸ்பின் எடுபடாது போகலாம். அப்போது இந்திய மிதவேகப் பந்துவீச்சாளர்கள் தீப்தி ஷர்மா, ஷிகா பாண்டே, அருந்ததி ரெட்டி ஆகியோர் உழைக்கவேண்டியிருக்கும். பேட்டிங்கில் ஸ்ம்ருதி மந்தனா, ஷெஃபாலி வர்மா, ஹர்மன்ப்ரீத் கௌர், ஜெமிமா ரோட்ரிக்ஸ் (Jemimah Rodrigues( மற்றும் தான்யா பாட்டியா (Tanya Bhatia)  ஆகியோரின் பங்களிப்பு டி-20 உலகில் ஆர்வமாகப் பார்க்கப்படும்.

ஒரு இனிய மகளிர் உலகக்கோப்பை ரசிகர்களுக்காக, கண்முன்  விரிந்துகொண்டிருக்கிறது. இந்தியாவின் அடுத்த மேட்ச் பங்களா தேஷுக்கு எதிராக 24/2/2020 அன்று. ஸ்பின் பௌலிங்கும், பேட்டிங் திறமைகளும் போட்டிபோடலாம். ரசிப்போம்.  

**

உலகக்கோப்பை: இந்தியாவிடம் பணிந்த பாகிஸ்தான்

 

இருதரப்பிலும் ரசிகர்கள் துடிப்புடன் காத்திருந்து அனுபவித்த, மேன்செஸ்டரில் நேற்று (16-6-19) ஆடப்பட்ட உலகக்கோப்பைக் கிரிக்கெட் போட்டியில், இந்தியாவின் முன் பாகிஸ்தான், கல்லின் கீழ் கண்ணாடியென நொறுங்கியது. உலகக்கோப்பை வெற்றி ஸ்கோர் 7-க்கு 7. India in seventh heaven !

‘அப்பாக்கள் தின’த்தன்று நடந்த மேட்ச் பற்றி அமுல் விளம்பரம் !

ஏகப்பட்ட hype-உடன் அரங்கேறிய போட்டியின் சில அம்சங்கள்:

டாஸ் வென்று இந்தியாவை முதலில் பேட் செய்ய அனுப்பிய பாகிஸ்தானுக்கு, அதிர்ச்சி மேல் அதிர்ச்சி. 34 பந்துகளில் அரைசதம் கடந்த ரோஹித் ஷர்மா, உலகக்கோப்பைப் போட்டிகளில் தன் இரண்டாவது சதத்தை விளாசினார் (140).  பாக். ரசிகர்கள் தலையைப் பிய்த்துக்கொள்ளும் அளவிற்கு, எதிரி பௌலர்களை புரட்டி எடுத்துவிட்டார் ரோஹித். முகமது ஆமீர் மட்டும் ஒரு விதிவிலக்கு. முதன்முறையாக ரோஹித்துடன் ஒரு-நாள் போட்டிகளில் துவக்க ஆட்டக்காரராகக் களமிறங்கிய ராஹுல் அரைசதமடித்து வெளியேறினார், 77 ரன் எடுத்து நன்றாக ஆடிக்கொண்டிருந்த கோஹ்லி,  ஆமீரின் பந்துவீச்சில், தான் காட்-பிஹைண்ட் ஆகிவிட்டதாக நினைத்துத் தானாகவே வெளியேறிவிட்டார். அம்பயருக்கே ஒருகணம் ஒன்றும் புரியவில்லை! இந்தக்காலத்தில் இப்படி ஒரு அசடு! ரீப்ளேயில் அவர் அவுட் இல்லை எனத் தெரிந்தது. நான்காவதில் வந்த பாண்ட்யா 26, தோனி 1 என நடையைக்கட்ட, உலக்கோப்பையில் முதல் மேட்ச் ஆடவந்த விஜய் ஷங்கரும், கேதார் ஜாதவும் கொஞ்சம் சேர்த்து, இந்திய ஸ்கோரை 336 எனக் காண்பித்தார்கள். இடையிலே, வருண பகவான் வந்து பார்த்துவிட்டுப் போனார்!

பாகிஸ்தானுக்கு வெல்ல, 337 தேவை. மழை திரும்பும் பயமுறுத்தலும் இருந்தது. பாகிஸ்தான் பேட் செய்கையில், ஐந்தாவது ஓவரிலேயே தொடையை இழுத்துப்பிடிக்க, நொண்டிக்கொண்டே பெவிலியனுக்குத் திரும்பிவிட்டார் இந்தியாவின் பிரதான பௌலர்களில் ஒருவரான புவனேஷ்வர் குமார். அவருடைய ஓவரில் இருந்த மீதமுள்ள இரண்டு பந்துகளை வீசி ஓவரை முடிக்கவென, ஆல்ரவுண்டர் விஜய் ஷங்கரை அழைத்தார் கோஹ்லி. என்ன ஆச்சரியம்! உலகக்கோப்பையில் வீசிய தன் முதல் பந்திலேயே பாகிஸ்தானின் இமாம்-உல்-ஹக் -ஐ தூக்கிக் கடாசிவிட்டார் ஷங்கர். கோஹ்லிக்கே தன் கண்ணை நம்பமுடியவில்லை. அடுத்த முனையில் வீசிக்கொண்டிருந்த இந்தியாவின் டாப் பௌலரான பும்ராவுக்கே இன்னும் விக்கெட் விழவில்லை..

பாண்ட்யாவும் ஷங்கரும் கொஞ்சம் வீசியபின், இடதுகை ரிஸ்ட்-ஸ்பின்னரான குல்தீப் யாதவிடம் பந்தைக் கொடுத்தார் இந்தியக் கேப்டன். நூறு ரன் பார்ட்னர்ஷிப் போட்டு அப்போது அருமையாக ஆடிக்கொண்டிருந்த பாபர் ஆஸம் (Babar Azam) மற்றும் ஃபக்ர் ஸமன் (Fakr Zaman) ஆகிய பாக் நட்சத்திர வீரர்களை அடுத்தடுத்து வீழ்த்தினார் யாதவ். பாகிஸ்தான் அதிர்ந்தது. இருந்தும் இன்னும்  அவர்களிடம் இருக்கிறார்களே வீரர்கள்..

முகமது ஹஃபீஸ், விக்கெட் எடுக்க முயன்ற யஜுவேந்திர சாஹலை சிக்ஸருக்குத் தூக்கி ஏதோ சொல்லமுயன்றார். ஆனால் அந்தப்பொழுது வேறோன்றைச் சொன்னது. திரும்பவும் அழைக்கப்பட்ட ஹர்தீக் பாண்ட்யா, அடுத்தடுத்த பந்துகளில் ஹஃபீஸையும், ஷோயப் மாலிக்கையும் பிடுங்கி எறிந்தார். 18 பந்துகளில் 4 விக்கெட்கள் வீழ,  பாக். ரத்த அழுத்தம் எகிறியது. புவனேஷ்வர் குமார் இல்லாத நிலையில், கோஹ்லிக்கு வேறு வழியில்லை. வாப்பா.. விஜய் ஷங்கர்! ஷங்கரின் மீடியம்-பேஸ் (medium pace) தொடர்ந்தது. தன் ஐந்தாவது ஓவரில், முன்னே வந்து ஆட முயன்ற பாக். கேப்டன் சர்ஃப்ராஸ் அகமதின் பின்னே, சிவப்பு விளக்கு எரியவைத்தார் ஷங்கர். ஸ்கோர் 35-ஆவது ஓவரில் 166/6. பாக். முதுகெலும்பில் விரிசல்! பச்சை-வெள்ளைக் கொடிகள் பறப்பதை நிறுத்திக்கொண்டன. பாரத் ஆர்மியின் மேளதாளம்.. பாக். ரசிகர்களில் சிலர் மெல்லக் கழண்டுகொண்டார்கள்.

திரும்பி வந்த மழை, ஆட்டத்தை  நிறுத்தியது. மழை ஒருவழியாக நின்று, சென்று, ஆட்டம் மீண்டும் தொடங்கியபோது , டக்வொர்த்-லூயிஸ் முறைப்படி, 40 ஓவர்களில் 302 எடுத்தால்தான் வெற்றி என்கிற மோசமான நிலை பாகிஸ்தானுக்கு. இந்திய பௌலர்களின் இறுக்கமான பந்துவீச்சினால் ஏற்கனவே ரன்விகிதம் குன்றிப்போயிருந்தது. இறுதியில் 212/6 ரன்களே முடிந்தது.  89 ரன் வித்தியாசத்தில், பலமாக அடிவாங்கி வீழ்ந்தது பாகிஸ்தான். இந்தியாவின் கையில், இன்னுமொரு மோசமான தோல்வி. பாகிஸ்தானில் ஏகப்பட்ட டிவி- செட்டுகள் உடைந்து நொறுங்கியதாகக் கேள்வி.. ’அப்பாக்கள் தின’த்தன்றா இப்படியெல்லாம் செய்வது !

**

கிரிக்கெட் உலகக்கோப்பை  அணி : தினேஷ் இன், ரிஷப் அவுட் !

2019-ன்  உலகக்கோப்பையைக் கைப்பற்ற வாய்ப்பிருப்பதாகக் கருதப்படும் ஒருசில அணிகளில், இந்தியாவும் ஒன்று. ஐசிசி உலகக்கோப்பைக்கான இந்திய அணி எப்படி அமையும் என்பதில் ரசிகர்களின் எதிர்பார்ப்புகளை மிஞ்சியும், கிரிக்கெட் வல்லுனர்கள்/ வர்ணனையாளர்களின் சலசலப்பு அதிகமாக இருந்துவந்தது. நேற்று மாலை (15/4/19), ஐசிசி-க்குக் கொடுக்கப்பட்ட தேதிப்படி,  இந்திய கிரிக்கெட் போர்டு  அணியை அறிவித்துவிட்டது.

விராட் கோலி (டெல்லி) தலைமை தாங்கும் 15-பேர் அணிக்கு, ரோஹித் ஷர்மா (மும்பை) துணைக்கேப்டன். மற்றவர்கள்: ஷிகர் தவன் (டெல்லி), கே.எல். ராஹுல் (கர்னாடகா), எம்.எஸ்.தோனி (ஜார்க்கண்ட்), கேதார் ஜாதவ் (மஹாராஷ்ட்ரா), விஜய் ஷங்கர் (தமிழ்நாடு), ஹர்திக் பாண்ட்யா (பரோடா), ரவீந்திர ஜடேஜா (சௌராஷ்ட்ரா), முகமது ஷமி (மேற்கு வங்கம்), ஜஸ்ப்ரித் பும்ரா (குஜராத்), புவனேஷ்வர் குமார் (உத்திரப்பிரதேசம்), குல்தீப் யாதவ் (உத்திரப்பிரதேசம்), யஜுவேந்திர சஹல் (ஹரியானா), தினேஷ் கார்த்திக் (தமிழ்நாடு).

துவக்கத்தில் ரோஹித் ஷர்மா, ஷிகர் தவன், மூன்றாவதில் விராட் கோலி எனப் போகும் இந்திய பேட்டிங் வரிசையில்,  நான்காவதாக வரப்போவது யார் என்பதே விவாதப்புள்ளியாக இருந்துவந்தது. இந்த இடத்தில், கடந்த சில தொடர்களின் அனுபவத்தைக் கருத்தில்கொண்டு, ஆல்ரவுண்டர் விஜய் ஷங்கரைத் தேர்வு செய்திருப்பதாக தேர்வுக் கமிட்டியின் சேர்மன் எம்.எஸ்.கே.பிரசாத் விளக்கியிருக்கிறார். விராட் கோஹ்லியின் மனதுக்குப் பிடித்த கே.எல்.ராஹுல், ரோஹித்-தவன் ஜோடிக்கு ரிசர்வ் ஓபனராக இயங்குவார் என்பது தேர்வுக்கமிட்டியின் முடிவு. அணியின்  தேவைக்கேற்ப ராஹுல் மிடில்-ஆர்டரிலும் இறக்கப்படலாம் எனவும் கூறியிருக்கிறார் பிரசாத்.

வேகப்பந்துவீச்சு மூன்று திறமையான பந்துவீச்சாளர்களின் கையில் கொடுக்கப்பட்டிருக்கிறது. யார்க்கர் ஸ்பெஷலிஸ்ட் ஜஸ்ப்ரித் பும்ரா, ஸ்விங் மாஸ்டர்களான புவனேஷ்வர் குமார், முகமது ஷமி. விராட் கோலியின் நம்பிக்கைக்குப் பாத்திரமானவர்களான, ரிஸ்ட் ஸ்பின்னர் குல்தீப் யாதவும், இடதுகை லெக்-ஸ்பின்னரான யஜுவேந்திர சஹலும் ஸ்பின் டெபார்ட்மெண்ட்டை கவனித்துக்கொள்வார்கள். ஒரு எக்ஸ்ட்ரா : ஆஃப் ஸ்பின்னராக ரவீந்திர ஜடேஜா.

இந்திய விக்கெட்-கீப்பர்கள்: தோனி, கார்த்திக்

தினேஷ் கார்த்திக்கா இல்லை, ரிஷப் பந்த் (Rishab Pant)-ஆ – யாருக்குக் கொடுப்பது இடம் என்பதே, தேர்வுக்குழுவின் அதிகபட்ச விவாதநேரத்தை எடுத்துக்கொண்ட விஷயம் எனத் தெரியவருகிறது. 37 வயதாகும் தோனிக்குக் காயம்பட்டாலோ, வேறு காரணத்தினால் ஏதாவது மேட்ச்சில் விளையாடமுடியாமல் போனாலோ, முதல்தர விக்கெட்கீப்பர் ஒருவர் ரிஸர்வில் இருக்கவேண்டும். இந்தவகையில் நாங்கள் ரிஷப் பந்த், தினேஷ் கார்த்திக் இருவரது தகுதிகளையும் அலசினோம். இறுதியில், கார்த்திக்தான் ரிஸர்வ் விக்கெட்கீப்பருக்குத் தகுதியானவர் எனத் தேர்வு செய்தோம் என, ப்ரெஸ் மீட்டில் தெளிவுபடுத்தியிருக்கிறார் தேர்வுக்குழுத் தலைவர். 91 சர்வதேச ஒரு-நாள் போட்டிகளில் விளையாடிய அனுபவம், இங்கிலாந்தில் ஏற்கனவே விளையாடிய அனுபவம், ஒரு ஃபீல்டராக எந்த இடத்திலும்  ஃபீல்ட் செய்யும் திறன் ஆகியவை கார்த்திக்கிற்குத் துணை வந்திருக்கும்

இந்திய அணியின் உலகத்தரமான ஃபீல்டர்களாக,  ரவீந்திர ஜடேஜா, விஜய் ஷங்கர், ஹர்திக் பாண்ட்யா மற்றும் தினேஷ் கார்த்திக்கைச் சொல்லலாம்.

2015-ல் நடைபெற்ற உலக்கோப்பைக்கான எம்.எஸ்.தோனி தலைமை தாங்கிய இந்திய அணியில், தமிழ்நாட்டிலிருந்து ஆர்.அஷ்வின் மற்றுமே இருந்தார். இந்த முறை ’வட போச்சே!’ என்று ரசிகர்கள் நினைத்திருந்த நிலையில், விஜய் ஷங்கர், தினேஷ் கார்த்திக் என இரு தமிழர்கள்  உலகக்கோப்பை அணியில் இடம்பெற்றிருப்பது ஆச்சரியப்படவேண்டிய விஷயமே.

பல இந்திய ரசிகர்களுக்கு, டெல்லியின் இளம் அதிரடி பேட்ஸ்மன் ரிஷப் பந்த் தேர்வு பெறாதது ஏமாற்றத்தைத் தரும். இருபத்தியோறே வயதான அவர், மனம் தளராது, அடுத்த வருடம் வரும் டி -20 உலகக்கோப்பை, பின்வரும் உலகக்கோப்பைகள் என  வாய்ப்புகளுக்காகக் காத்திருக்கவேண்டும் என ஆறுதல் சொல்லியிருக்கிறார் பிரசாத்.

கிட்டத்தட்ட செலெக்‌ஷன் நிச்சயம் என நம்பப்பட்ட மிடில்-ஆர்டர் பேட்ஸ்மன் அம்பாட்டி ராயுடு அணியில் இடம் பெறாதது பல வல்லுனர்கள்/ விமரிசகர்களுக்கு எரிச்சலை ஏற்படுத்தியுள்ளது. சில மாதங்களுக்கு முன்புதான் கோஹ்லி ராயுடுவை, ‘இவர்தான் எங்களது நம்பர் 4’ என்றார். இப்போது திடீரென அவரைக் கழட்டிவிட்டுவிட்டதேன்?  மேலும், ராஹுலை சேர்க்கவேண்டிய அவசியமென்ன? என்றெல்லாம்  விமரிசனக் கேள்விகள்.  ராயுடுவின் ஒரு-நாள் போட்டி ரன் சராசரி அதிகம். கூடவே, போட்டியின்  நிலைமைக்கேற்றபடி தன் ஆட்டத்தை மாற்றியமைத்து ஆடும் திறன் உண்டு அவரிடம். எல்லாம் இருந்தும்,  லண்டன் ஃப்ளைட்டில் இடமில்லை.

இப்படியெல்லாம் சில சர்ச்சைகள் எழுந்து கோடையைக் கடுமைப்படுத்தினாலும், தேர்வாகியிருக்கும் இந்திய வீரர்களை ’வென்று வருக!’ என வாழ்த்தி அனுப்பிவைப்போம்.

**

FIFA : வென்றது ஃப்ரான்ஸ். மனதில் நின்றது க்ரோஷியா !

ஆஹா! மாஸ்கோவில் என்ன ஒரு ஃபைனல். ஃப்ரான்ஸ், எதிர்பார்த்தபடி சிறப்பான ஆட்டம் காண்பித்து, இரண்டாவது முறையாக உலகக்கோப்பையை வென்றுவிட்டது.

ஃப்ரான்ஸை ஜெயிக்கவைத்துவிட்டுத்தான் மறுவேலை என்பதுபோல் க்ரோஷியா ஆடியதாகவே, ஆரம்பத்திலிருந்து மாஸ்கோ மைதானக்காட்சிகள் விரிந்தன! Soccer-ஆ, சும்மாவா! அதுவும் உலகத்தின் அதிரசமான விளையாட்டுத் திருவிழாவின் இறுதிக்காட்சிகளின் அரங்கேற்றம். அதிர்ச்சி, அதிரடி, ஆனந்தமெனக் கலந்துகட்டி அடித்தால்தானே, உலகத்தின் பல்வேறு நாடுகளிலிருந்து வந்திருக்கும் ரசிகர்களை ஆராதிக்கமுடியும்? சும்மா நேராக ஓடி கோல்போட்டோ, கோல் வாங்கியோ ஆட்டத்தை முடித்தால் அதற்குப்பேர் உலகக்கோப்பையா? அதுவும் ஃபைனலா என்ன?

முதல்பாதியில், கோல்போஸ்ட்டிற்கு வெளியே அனுப்பவதாக எண்ணி மரியோ மாண்ட்ஸுகிச் (Mario Mandzukic) தலையால் முட்டிய பந்து கோல்போஸ்ட்டைத் தாண்டுவதற்குப்பதிலாக, கோல்கீப்பரால் எட்டமுடியா உயரத்திற்குச்சென்று கோலுக்குள் நுழைந்து, க்ரோஷிய அணியில் பெரும் அதிர்ச்சியை ஏற்படுத்தியது. மாண்ட்ஸுகிச்சின் பரிதாப முகம் இன்னும் நினைவில் இருக்கிறது. ப்ரான்ஸ் ஒரு கோல் என முன்னேற, நிமிடங்களில் க்ரோஷியாவின் இவான் பெரிஸிச் (Ivan Persic), சாய்வான கோணத்தில் ஒரு அழகான கோலடித்து ஸ்கோரை சமன் செய்து க்ரோஷிய ரசிகர்களைக் மிதக்கவைத்தார். அதற்குப் பின் நிகழ்ந்தது அதிர்ச்சி. க்ரோஷிய கோலருகே ஃப்ரான்ஸ் ஃபார்வர்ட் க்ரிஸ்மானின் பாஸை சரியாக ஏற்கமுடியாமல் ப்ளேஸ் மதூதி (Blaise Matuidi) மேலெழும்பித் தவறவிட, பந்து சற்றே பின்னகர, அங்கே அதை வேகமாக வெளியேற்ற முயற்சித்த பெரிஸிச் வேண்டுமென்றே அதைக் கையால் தடுக்கவில்லை. ஆரம்பத்தில் அதனை அலட்சியம் செய்து ஆட்டம் முன்னேற வழிவகுத்துக்கொண்டிருந்த அர்ஜெண்டீனிய ரெஃப்ரீ, ப்ரென்ச் வீரர்களால் பெரிஸிச் கையால் தேக்கியதாக குறிக்கப்பட, குற்றம் சாற்றப்பட, விஏஆர் எனும் வீடியோ மறுநோக்கலுக்கு முடிவை அனுப்பினார். இறுதியில், கையால் தேக்க பெரிஸிச் முயலவில்லை என்றபோதிலும், கையில் லேசாகப்பட்டாலும் பட்டதுதான் என்கிற கணிப்பில் க்ரோஷியாவுக்கெதிராக அந்த பெனல்ட்டி ஃப்ரான்ஸுக்குக் கொடுக்கப்பட்டது. இது ஒரு பார்டர்-லைன் முடிவுதான். இங்கே க்ரோஷியா ஒரு சிறிய நாடு என்றுதான் நடுவர்களால் பார்க்கப்பட்டிருக்கவேண்டும். க்ரோஷியாவின் இடத்தில் இங்கிலாந்தோ, ஜெர்மனியோ, ஸ்பெயினோ இருந்திருந்தால் நிச்சயம் இந்த பெனல்ட்டி கொடுக்கப்பட்டிருக்காது! இந்த முடிவு க்ரோஷிய வீரர்களை மிகவும் பாதித்து அயரச் செய்துவிட்டது என்பது உண்மை. இந்தமாதிரியான அதிமுக்கிய போட்டிகளில், வீரர்களோடு விதியும் சேர்ந்து மைதானத்தில் ஆடிக்கொண்டிருக்கிறது என்பதை ரசிகர்கள் உணர்ந்திருப்பார்கள். ஒரே விஷயம் – விதியின் விளையாட்டை மேட்ச் ரெகார்டு புத்தகங்களுக்குள் கொண்டுவரமுடியாது!

இரண்டாவது பாதியில், ஃப்ரான்ஸ் வேகமாக, நன்றாக விளையாடியது. குறிப்பாக அவர்களின் தடுப்பாட்ட வியூகங்கள், எதிர்த்துத் தாக்கிய க்ரோஷியாவை கோல் போட அனுமதிக்கவில்லை. க்ரோஷிய கோல்கீப்பரின் ஆட்டம் சாதாரணம். மேலும் இரண்டு கோல் போட்டது ஃப்ரான்ஸ். இடையில், ஃப்ரான்ஸ் கோல்கீப்பரை தனியாகச் சந்தித்து மடக்கிய மரியோ மாண்ட்ஸுகிச், க்ரோஷியாவின் இரண்டாவது கோலை சத்தமின்றி உள்ளே தள்ளித் திகைப்பூட்டினார். இறுதியில் 4-2 என்ற கணக்கில் கோப்பையை இரண்டாவது முறையாகக் கையகப்படுத்தியது ஃப்ரான்ஸ். வெற்றிபெற்ற அணியின் கிலியன் ம்பாப்பேயும்(Kylian Mbappe), பால் போக்பாவும் (Paul Pogba) அபார ஆட்டம் ஆடினர்.

இறுதிப்போட்டியின் முடிவுக்குப்பின் ஃப்ரான்ஸ் வீரர்கள் கொண்டாடிக்கொண்டிருக்க, க்ரோஷிய வீரர்கள் முகத்தில் சோகம் தாண்டவமாட, அயர்ந்துபோய் மூலையில் நின்றிருந்தார்கள். க்ரோஷிய அணியை ஒற்றுமையாக, இத்தகைய உயரத்துக்கு அழைத்துவந்த அணியின் மதிப்புமிக்க, அமைதி தவழும் பயிற்சியாளரும் அவ்வாறே முதலில் காணப்பட்டார். பின் நினைவு வந்தவர்போல், முன் வந்து நின்று தன் வீரர்களை அழைத்து, அணைத்து ஆறுதல் சொன்னார். நீங்கள் உங்கள் உழைப்பினால் எவ்வளவோ பெரிய உச்சத்திற்கு உங்களது நாட்டைக்கொண்டு வந்திருக்கிறீர்கள். நீங்கள் ஒவ்வொருவரும் உண்மையில் பெருமைப்படவேண்டிய தருணம் இது என்று அவர்களுக்கு நினைவுறுத்தி, தட்டிக்கொடுத்து உற்சாகப்படுத்தியிருக்கிறார் கோச், ஸ்லாட்கோ தாலிக் (Zlatko Dalic). இந்த உலகக்கோப்பையின் மிகவும் புகழப்பட வேண்டிய பயிற்சியாளர்.

இந்த உலகக்கோப்பையின் தங்கப்பந்து பரிசை (Golden Ball award)பெற்றபோதும், ஈரக்கண்களுடன் நின்றார் க்ரோஷிய கேப்டன் மோத்ரிச். தன் நாட்டிற்கு வெற்றிபெற்றுத்தர இயலாத நிலையில், தனிப்பட்ட பரிசெல்லாம் ஒன்றுமில்லை என்பதான தோற்றம். இறுதிப்போட்டியைக் காணத் தன் நாட்டு ரசிகர்களுடன் இகானமி க்ளாஸில் பயணம் செய்து மாஸ்கோ வந்திருந்தவர் ஒரு க்ரோஷியா விவிஐபி. அந்த நாட்டு பெண் ஜனாதிபதி கொலிந்தா க்ராபர்-கிதரோவிச் (Kolinda Grabar-Kitarović). அவர் சோக ஹீரோவான மோத்ரிச்சை அழைத்துக் கன்னத்தில் தட்டி அணைத்துக்கொண்டார். க்ரோஷியா எத்தகைய நாடு என்பதற்கு இதைவிடப் பெரிய சான்று தேவையில்லை.

மெஸ்ஸி, ரொனால்டோ, நெய்மார் என்றெல்லாம் கால்பந்தில் உலகப்புகழ் பெற்றுவிட்ட பெரிய பெரிய பெயர்களின், அவர்களின் வீரதீரப் பராக்ரமப் பின்னணியில் ஆரம்பித்தன ரஷ்யாவில், ஃபிஃபாவின் இந்த உச்சரக சேம்பியன்ஷிப் போட்டிகள். 32 நாடுகளில், கவனிக்கப்படாத சிறிய நாடாக, அணியாக ஆரம்பித்த க்ரோஷியா, கேப்டன் லூகா மோத்ரிச் (Luka Modric), இவான் பெரிஸிச்(Ivan Perisic), மரியோ மாண்ட்ஸுகிச்(Mario Mandzukic) மற்றும் இவான் ரேகிடிச் (Ivan Rakitic) போன்ற தேர்ந்த வீரர்களின் கடும் உழைப்பினால் எதிர்பார்க்காத உயரங்களை எட்டிப்பிடித்திருக்கிறது. க்ரோஷியாவின் அமைதி தவழும் கோச் குறிப்பாக இன்று கால்பந்து உலகின் மாபெரும் வீரராக, லூகா மோத்ரிச்சை இந்தக் உலகக் கோப்பை ரசிகஉலகத்திற்கு அறிமுகப்படுத்தியுள்ளது. பலவருடங்களுக்கு முன், க்ரோஷியாவின் ஏதோ ஒரு மூலையில், தன் ஏழைத் தந்தைக்குத் துணையாக ஆடுமேய்த்து மலைவெளிகளில் அலைந்து திரிந்த லூகா மோத்ரிச்! இன்று கால்பந்துலகின் சூப்பர்ஸ்டார். மோத்ரிச்சின் சிதிலடமடைந்த சிறுவீடு க்ரோஷியாவின் டூரிஸ்ட்டுகள் விரும்பிப் பார்க்கும் இடங்களுள் ஒன்றாக ஆகியிருக்கிறது. எளிமை, கடும் உழைப்பு, சோதனையிலும் ஆழ்அமைதி ஆகியவற்றிற்குப் பேர்போன மோத்ரிச்சைப்பற்றிய ஆவணப்படத்தையும் ஒருவர் தயாரித்திருக்கிறார் அங்கே. இந்த உலகக்கோப்பைக்கு முன்பே அது வெளிவந்துவிட்டிருந்தது. இனி, ரசிகர்கள் தேடி அதைப் பார்ப்பார்கள்..

ரஷ்யாவில் கடந்த ஒரு மாதமாக நடத்தப்பட்ட இந்த கால்பந்து விஷா ஒரு மாபெரும் வெற்றி எனலாம். போட்டிகளுக்கான சிறப்பான மைதான ஏற்பாடுகள், ரசிகர்களுக்கான நவீன வசதிகள், போக்குவரத்து, தங்க ஏற்பாடுகள் என ரஷ்ய அரசும் நிர்வாகங்களும் அதகளப்படுத்திவிட்டார்கள். அமெரிக்க அதிபர் டொனால்ட் ட்ரம்ப், ரஷ்ய அதிபர் புட்டினையும் ரஷ்யாவையும் இதற்காகப் பாராட்டி ட்வீட்டியுள்ளார், என்றால் பார்த்துக்கொள்ளுங்கள்!

**

ICC World T-20 : வெஸ்ட் இண்டீஸ் உலக சேம்பியன் !

கல்கத்தாவில் நேற்று(3-4-2016) கடைசி ஓவர் க்ளைமாக்ஸில், கதையை மாற்றி எழுதிவிட்டது வெஸ்ட் இண்டீஸ். ஜெயித்துவிடுவோம் என்கிற இறுமாப்பு காட்டிய இங்கிலாந்தை நொறுக்கி, கோப்பையைக் கைப்பற்றியது.

இந்தியா விளையாடாத இறுதிப்போட்டியானாலும், ஈடன் கார்டன்ஸில்(Eden Gardens) ரசிகர்கள் குவிந்திருந்தனர். இந்திய ரசிகர்களில் பெரும்பாலானோர் வெஸ்ட் இண்டீஸின் ஆதரவாளர்களே என்பது கண்கூடாகத் தெரிந்தது. இதே மைதானத்தில் பகலில், மகளிருக்கான உலகக்கோப்பையை முதன்முதலாக வென்றிருந்தது வெஸ்ட் இண்டீஸ். பெண்கள் அணியும் தங்கள் ஆடவர் அணியை உசுப்பேற்ற உடன் இருந்தனர். இங்கிலாந்து டீமின் குடும்பத்தினர், நண்பர்கள் என பெரிய குழாம் ஒன்று கொடியசைத்துக் கூச்சலிட்டு இங்கிலாந்து அணியை குஷிப்படுத்திக்கொண்டிருந்தது.

டாஸ்(toss) வெல்வதில் மன்னரான வெஸ்ட் இண்டீஸ் கேப்டன் டேரன் சேமி (Darren Samy) இந்த முறையும் வென்று, இங்கிலாந்தை உள்ளே அனுப்பினார். முதல் ஓவர் போட்டது லெக்-ஸ்பின்னர் சாமுவேல் பத்ரீ(Samuel Badree) (சென்னை சூப்பர் கிங்ஸ்). நேராகத் தாக்கும் துல்லியம், பந்தை எகிறவிடாமல் தேய்த்துச் செல்லவைக்கும்(skidding) லாவகம் உடையவர். இரண்டாவது பந்திலேயே இங்கிலாந்து ஓபனர் ஜேஸன் ராய் (Jason Roy) க்ளீன் –போல்ட்(clean bowled). ஆந்த்ரே ரஸ்ஸல் (Andre Russel) ஒரு விக்கெட் சாய்க்க, அடுத்த ஓவரில் கேப்டன் ஆய்ன் மார்கனை (Eoin Morgan) வீழ்த்தினார் பத்ரீ. 23 ரன்களுக்கு 3 விக்கெட். ஆட்டம் கண்டது இங்கிலாந்து.

இங்கிலாந்தின் விக்கெட்டுகள் சரமாரியாக விழுந்துகொண்டிருக்க, ஜோ ரூட்(Joe Root-54 ரன்கள்) சிறப்பாக எதிர்த்தாக்குதல் நடத்தினார். துணையாக ஆடியவர் விக்கெட் கீப்பர் ஜோஸ் பட்லர்(Jos Butler-36 ரன்கள்). இருவருடைய வீர சாகசங்களுக்கும் விரைவில் ஒரு முடிவுகட்டினார் கார்லோஸ் ப்ராத்வேய்ட் (Carlos Brathwaite). டுவேன் ப்ராவோவும் சிறப்பாக வீச, இருவரும் ஆளுக்கு 3 விக்கெட்டுகளை சாய்த்து, இங்கிலாந்தை 155 ரன்னில் நிறுத்தி மூச்சிறைக்கவைத்தனர்.

156 கோப்பைக்கான இலக்கு. வெஸ்ட் இண்டீஸின் பதில்? படுமோசமான ஆரம்பம். ஜோ ரூட் வீசிய 2-ஆவது ஓவரிலேயே, பெரிதும் எதிர்பார்க்கப்பட்ட க்றிஸ் கேல் (Chris Gayle), சார்ல்ஸ் ஜான்சன் ஆகியோரின் கதை முடிந்தது. அடுத்துவந்த லெண்டல் சிம்மன்ஸ்(இந்தியாவுக்கு எதிராக பொளந்து தள்ளிய ஆசாமி) டக் (duck) அவுட் ஆக, வெஸ்ட் இண்டீஸ் 11 ரன்களுக்கு 3 விக்கெட் எனத் தத்தளித்தது. மிடில் ஆர்டரில், மார்லன் சாமுவேல்ஸ் மிகுந்த பொறுப்புடன் ஆட, ப்ராவோ துணையாட்டம். ரன்கள் சேர்ந்தன. ஆனால் ரன்விகிதம் மிக மோசமாக இருந்தது. 25 எடுத்திருந்த ப்ராவோ 14-ஆவது ஓவரில் சாய, 16-ஆவது ஓவர் மேலும் அதிர்ச்சியைத் தந்தது. அதிரடி ரஸ்ஸல், கேப்டன் சேமி இருவரும் இங்கிலாந்தின் பௌலிங்கைத் தாக்குப் பிடிக்கமுடியாமல் விழுந்தனர். சாமுவேல்ஸ் மட்டும், வெஸ்ட் இண்டீஸ் ஆட்டக்காரர்களிடம் காணப்படாத அதீத பொறுமையுடன் விளையாடிக்கொண்டிருந்தார். ஆனால் எகிறும், தேவைப்படும்-ரன்விகிதத்தை (asking rate) அவரால் ஒன்றும் செய்ய முடியவில்லை. அது மலைபோல் உயர்ந்து வெஸ்ட் இண்டீஸின் கழுத்தை நெருக்கியது. ஜெயித்துவிடுவோம் என்கிற நிலை இங்கிலாந்துக்கு போதை ஏற்றியது. அப்போது சாமுவேல்ஸுடன் ஜோடி சேர்ந்தது ஒரு கத்துக்குட்டி. கார்லோஸ் ப்ராத்வேய்ட். அனுபவம் இல்லாத 6 ½ அடி உயர ஆல்ரவுண்டர். 19-ஆவது ஓவரை இங்கிலாந்தின் க்றிஸ் ஜார்டன் (Chris Jordan) அருமையாகப்போட்டு அதிக ரன் கொடுக்காமல் முடித்துவிட, இங்கிலாந்து உலகக்கோப்பையை மனதில் ஒருமுறை தொட்டுப்பார்த்துக்கொண்டது!

கடைசி ஓவர். 19 ரன்கள் எடுத்தால் வெஸ்ட் இண்டீஸ். இல்லை என்றால் இங்கிலாந்து உலக சேம்பியன். 20-ஆவது ஓவரை வீசியது இங்கிலாந்தின் பென் ஸ்டோக்ஸ் (Ben Stokes). ரன் கொடுப்பதில் கஞ்சன். விக்கெட்டும் எடுத்துவிடக்கூடிய பேர்வழி. சாமுவேல்ஸ் 85 ரன் எடுத்து நின்றார் எதிர்பக்கத்தில். பந்தை எதிர்கொண்டவர் ப்ராத்வேய்ட். இங்கிலாந்து ரசிகர்களின் முகத்தில் வெற்றி ஜொலிப்பு. வெஸ்ட்-இண்டீஸ் ரிசர்வ் ப்ளேயர்கள், கோச்சுகள், வெஸ்ட்-இண்டீஸின் மகளிர் அணி மற்றும் இந்திய ரசிகர்களின் முகத்தில் கிலி. முதல் பந்தை ஸ்டோக்ஸ் யார்க்கராக முயற்சித்து லெக்-ஸ்டம்ப்பின் கீழ் வேகமாக இறக்கினார். அதற்காகவே காத்திருந்தது ப்ராத்வேய்ட்டுக்குள் உட்கார்ந்திருந்த பெரும் பூதம் ஒன்று. கண் இமைக்கும் நேரத்தில், லெக்-சைடில் ஒரு அசுரத் தூக்கல். ஸ்டேடியத்தின் வரிசைகளில் போய் தொப்பென்று விழுந்த பந்து சிக்ஸர் என அலறியது! அடுத்த பந்து கூர்மையான யார்க்கர். லாங்-ஆன் திசையில் சீறி சிக்ஸரானது! வெஸ்ட்-இண்டீஸ் உயிரூட்டப்பட்டுவிட்டது! அதிர்ந்துபோன ஸ்டோக்ஸ், மூன்றாவது பந்தை நன்றாகத்தான் போட்டார். பந்தின் குணநலன்களை ஆராயும் மனநிலையில் ப்ராத்வேய்ட் இல்லை. தூக்கினார் மீண்டும். இப்போது லாங்-ஆஃப்-இல் தெறித்தது சிக்ஸர். மூன்றே பந்துகளில் 18 ரன்கள். திடீரென்று, இங்கிலாந்து குற்றுயிரும், குலைஉயிருமாய்ப் புரண்டது. சீட்டின் நுனியிலிருந்த வெஸ்ட்-இண்டீஸ் ரசிகர்கள் காற்றில் மிதந்தனர். வெற்றிக்கு இன்னும் ஒரே ரன் தான் வெஸ்ட் இண்டீஸுக்கு! க்றிஸ் கேய்ல், ப்ராவோ, சேமி, ரஸ்ஸல் முதான வெஸ்ட்-இண்டீஸ் வீரர்கள் வரிசையாகக் கைகோத்துக்கொண்டு மைதான விளிம்பில். கொண்டாட்டப் பாய்ச்சலுக்குத் தயாராக நின்றனர். நிலைகுலைந்த ஸ்டோக்ஸ் நடுங்கிக்கொண்டே வீசினார் நாலாவது பந்தை. மீண்டும் லெக்-சைடில் மின்னல்காட்டியது சிக்ஸர். கடைசி ஓவரின் நான்கு பந்துகள் : 6,6,6,6. ப்ராத்வேய்ட் புதிய கரீபியன் ஹீரோ. யாரிந்த கார்லோஸ் ப்ராத்வேய்ட்? கூகிள் வேகமாகத் தேடிக் கண்டது. கிரிக்கெட்டுக்கு பார்படோஸின்(Barbados) புதிய அன்பளிப்பு. IPL-ல் டெல்லி டேர்டெவில்ஸ் (Delhi Daredevils) அணி. ட்விட்டர் சிதறிப் பரவியது.

கல்கத்தாவின் நெடிய இரவு. கரீபியப் பிரதேசத்தில்(Carribean region) களிப்பான காலைப்பொழுது. உலகக்கோப்பையோடு காமிராவுக்கு காட்சி அளித்தபின், ஈடன் கார்டன்ஸில் சட்டையைக் கழட்டிவிட்டு உல்லாச நடனம் ஆடினர் வெஸ்ட் இண்டீஸ் வீரர்கள். இங்கிலாந்தில் சட்டையைக் கழற்றிச் சுழற்றிய இந்திய முன்னாள் கேப்டன் சௌரவ் கங்குலி மைதானத்தில் சிரிப்புடன் ரசித்திருந்தார்.

2016 ஒரு மறக்கமுடியாத வருடம் வெஸ்ட் இண்டீஸுக்கு. கைக்கு வந்தன கிரிக்கெட்டின் மூன்று உலகக்கோப்பைகள்! முதலில் Under-19 ICC T-20 World Cup. இரண்டாவதாக நேற்று மாலையில் ICC World T-20 Cup for Women. மூன்றாவதாக இரவில் டேரன் சேமியின் வீரர்கள் வென்ற ICC World T-20 Cricket Cup. Fabulous, memorable victories. வெஸ்ட் இண்டீஸ் கிரிக்கெட்டின் மறுமலர்ச்சி. வாழ்த்துக்கள் !

**

இந்தியா-பங்களாதேஷ் : கடைசி பந்து – கேப்டனே ! முந்து !

நேற்று(23-3-16) உலகக்கோப்பை கிரிக்கெட்டில் இந்தியா வீசிய கடைசி பந்தில் பங்களாதேஷின் கதை முடிந்தது. கூடவே, இந்தியாவின் கோப்பை வாய்ப்பு உயிர் பெற்றது.

ஸ்பின் எடுக்கும் பெங்களூர் பிட்ச்சில் இந்தியா முதல் பேட்டிங்கிற்காக இறங்கியது. ஷிகர் தவனும், ரோஹித் ஷர்மாவும் அதிரடியாக ஆரம்பித்தார்கள். ரசிகர்கள் சிக்ஸர், சிக்ஸர் எனக் கூச்சலிட, தவனும், ரோஹித்தும் குஷியாகி ஆளுக்கொரு சிக்ஸர் பறக்கவிட்டார்கள். 42 ரன்கள் சேர, என்ன அவசரமோ? அதுவரை நன்றாக விளையாடிய ரோஹித்தின் தலைக்குள் திடீரென சூடேறியது. Sudden rush of blood! அபாரமாக வீசிக்கொண்டிருந்த முஸ்தாஃபிசுர் ரஹ்மானின்(Mutafizur Rahman) ஒரு பந்தை, அவருடைய தலைக்குமேலேயே சிக்ஸர் அடிக்க அடாவடி முயற்சி! நேராக உயர்ந்த பந்து, ஃபீல்டரின் கைகளில் சொகுசாக இறங்கியது. அவுட். இன்னொருமுறை ஏமாற்றினார் ரோஹித்(18 ரன்கள்). விராட் கோஹ்லி வந்து செட்டில் ஆவதற்குள், எல்.பி.டபிள்யூ ஆகி வெளியேறினார் தவன் (23 ரன்கள்). இந்தியாவின் நல்ல ஆரம்பம், திடீரென சொதப்பல் நிலைக்குத் தள்ளப்பட்டது.

பங்களாதேஷ் பௌலிங் வெகு கூர்மையாக இருந்தது. முஸ்தாஃபிசுர் ரஹ்மானுடன் சேர்ந்து அல்-அமீனும், ஸ்பின்னர்கள் ஷுவகாதா சோம்(Shuvagata Som), ஷகிப்-உல்-ஹசன் ஆகியோரும் பிரமாதமாக வீசினர். இந்திய பௌண்டரிகள் தடுக்கப்பட்டன. இந்த நிலையிலும் கோஹ்லியும், ரெய்னாவும் உழைத்தனர். ஆனால் விரைவிலேயே, ரெய்னா 30 ரன், கோஹ்லி 24 ரன் என வெளியேற்றப்பட்டனர். ஹர்தீக் பாண்ட்யா (Hardik Pandya) ஆவேசமாகத் தாக்கினார். 2 பௌண்டரி. 1 சிக்ஸர். 15 ரன்கள். பாண்ட்யாவின் ஆக்ரோஷம், சௌம்யா சர்க்காரின் (Soumya Sarkar) நம்பமுடியாத கேட்ச்சில் முடிவடைந்தது. யுவராஜ் சிங் மைதானத்திற்கு வந்தார். 6 பந்தில் 3 ரன். மூச்சுத்திணறிக் காலியானார். ஜடேஜா, தோனி, அஷ்வின் ஏதோ கொஞ்சம் சேர்த்து இந்திய ஸ்கோரை 146-க்குக்கொண்டுவந்தனர். போதாது. இந்தியாவுக்கு முக்கியமான மேட்ச். குறைந்த பட்சம் 160-ஆவது எடுத்திருக்க வேண்டும்.

147 எடுத்து ஜெயித்து, இந்தியாவை உலகக்கோப்பையில் முன்னேறவிடாமல் செய்வது பங்களாதேஷின் இலக்கு! வேகமாக ஆரம்பித்தார் தமிம் இக்பால். பும்ராவின் ஒரு ஓவரில் 4 பௌண்டரிகள். 35 ரன்களில் அவரைத் தூக்கினார் ஜடேஜா. இந்திய ஸ்பின்னர்கள் அஷ்வின், ஜடேஜா, ரெய்னாவும் நல்ல பங்களிக்க, பங்களா 95-க்கு 5 விக்கெட்டுகள் என்றானது. சௌம்யா சர்க்கார் 21 ரன்களில் விழ, முஷ்ஃபிகுர் ரஹீம்(Mushfiqur Rahim) மொகமதுல்லாவுடன் சேர்ந்து இலக்கை நோக்கி பங்களாதேஷை செலுத்தினார். இந்தியாவா, பங்களாதேஷா என அதிர்ஷ்ட தேவதை இங்கும் அங்கும் கண்ணை உருட்டிக்கொண்டிருந்த வேளை. 19-ஆவது ஓவரை கெடுபிடியாக வீசி வெறும் 6 ரன்களே கொடுத்தார் பும்ரா(Bumrah).

கடைசி ஓவர். பங்களாதேஷுக்கு தேவை 11 ரன்கள். யோசனைக்குப்பின் தோனி, ஹர்தீக் பாண்ட்யாவிடம் கடைசி ஓவரைத் தந்தார். அவரும் நேஹ்ராவும் பாண்ட்யாவுக்கு ஆலோசனை வழங்கினார்கள். பாண்ட்யா ஒரு சுவாரஸ்யமான பேர்வழி. டென்ஷன் எதுவும் அவரிடம் இல்லை ! பந்தை கையில் வாங்கி லேசாகச் சிரித்துக்கொண்டார் ! ஆனால் சீட் நுனியில் ஒட்டிக்கொண்டிருந்த இந்திய ரசிகர்களுக்கு, மூச்சு போவதும் வருவதுமாய் இருந்தது. இதயம் நின்று நின்று துடிக்க, மூவர்ண ரசிகர்கள் சிலர் வானைப்பார்த்து பிரார்த்தனை செய்வது தெரிந்தது.

முதல் பந்தில் மொகமதுல்லா ஒரு சிங்கிள். இரண்டாவது, மூன்றாவது பந்தில் பௌண்டரி விலாசினார் ரஹீம். கூடவே, பௌலிங் போட்ட பாண்ட்யாவைப் பார்த்து ஆவேசமாகக் கையை ஆட்டி சவால் விட்டார். ஏளனமாக ஏதேதோ கூவி சூடேற்றினார். பாண்ட்யா இடுப்பில் கைவைத்து பங்களாதேஷின் கொக்கரிப்பை நிதானமாகப் பார்த்தார். பின் நடந்து சென்றார். திரும்பி ஓடிவந்து அடுத்த பந்தை சூடாக வீசினார். ஷார்ட்-பிட்ச் (short-pitched)ஆகி சீறியது பந்து. ரஹீம், சிக்ஸர் என நினைத்து அலட்சியமாகத் தூக்க, பந்து உயர எழுந்தது. தவனின் ஏந்திய கைகளில் விழுந்தது. தலையைக் குனிந்துகொண்டு ரஹீம் வெளியேறுவதை பாண்ட்யா பார்த்திருந்தார். ஒன்றும் சொல்லவில்லை. 2 பந்துகள். 2 ரன்கள். பாண்ட்யாவின் அடுத்த பந்தை இப்போது மொகமதுல்லா வானில் பறக்கவிட்டார். முடிந்தது நம் கதை என இந்திய ரசிகர்கள் தலையைத் தொங்கப்போட்டுக்கொண்டார்கள். சிலர் இரவு வானில் வெள்ளைப் பந்தைப் பார்த்து விழித்தார்கள். உயர எழுந்த பந்து பௌண்டரிக்குள்ளேயே இறங்க, கவ்விப் பிடித்தார் ஜடேஜா. பிடித்ததும் தரையில் உருண்டார். உருண்டார். உருண்டார்! ரோஹித் அவரைக் கட்டுப்படுத்த வேண்டியிருந்தது. பங்களாதேஷ் ரசிகர்கள் பேந்தப்பேந்த விழித்தார்கள். என்ன நடக்கிறது?

கடைசி பந்து. பங்களாதேஷ் ஜெயிக்க 2 ரன்கள். ஒரு ரன் எடுத்தால் மேட்ச் ட்டை (Tie). இந்தியா தோற்றால் பெரும் சிக்கல். கேப்டன் தோனி பாண்ட்யாவிடம் வந்து பேசினார். நேஹ்ராவும் ஏதோ சொன்னார். சீரியஸ்தனத்தை அறிந்திராத பாண்ட்யாவின் முகம் இறுகியது. மைதானமே உறைந்திருந்தது. ஓடிவந்து போட்டார் பாண்ட்யா கடைசிபந்தை. Medium pace. Back of a length delivery. Outside the off-stump. ஆஃப் ஸ்டம்பிற்கு வெளியே எம்பி அடிக்க முயன்ற பங்களாதேஷின் சோம்(Som) பந்தைக் கோட்டை விட்டார். தோனியின் கையில் பந்து. பங்களாதேஷ் அவசரமாக 1 ரன் எடுக்க ஓட, தோனியின் சமயோஜித புத்தி கூர்மை காட்டியது. பந்தை எறிந்தால் குறி தவறக்கூடும். எதிர்திசை பேட்ஸ்மன் கோட்டைத் தொடுமுன், பாய்ந்து ஓடி, ஸ்டம்ப்பை பந்தோடு சேர்த்தடித்தார் தோனி. ஸ்டம்ப்பின் LED `இந்தியா வெற்றி!` எனப் பிரகாசித்தது.முதல் 3 பந்துகளில் 9 ரன்கள். கடைசி 3 பந்துகளில் WWW. எப்படி இருக்கு பாண்ட்யா ஓவர்!

உலகக்கோப்பைக் கனவு பூமிக்குள் புதைந்ததுவிட, வெளிறிய முகத்துடன் வெளியேறியது பங்களாதேஷ். இந்தியாவுக்கு இருக்கிறது இன்னுமொரு வாய்ப்பு 27-ந்தேதி ; ஆஸ்திரேலியாவுக்கு எதிராக. பார்ப்போம்.

**

இந்திய அணி ! இருக்கு இனி !

உலகக்கோப்பை மேட்ச்சில் பாகிஸ்தானை வீழ்த்திவிட்டோம் என்கிற போதை தலைக்குள் இன்னும் கொஞ்சம் இருக்கத்தான் செய்யும். இந்த மிதப்பில் தரையில் கால்படாது அடுத்த மேட்ச்களில் இந்தியா இறங்கினால், சரிந்து விழ வாய்ப்புகள் அதிகம். உஷார் மனநிலை தேவை.

மகத்தான வெற்றியின்போது ஒன்று நிச்சயம் நடந்துவிடுகிறது. அணியின் பலவீனங்கள், குறைகள் பூசி மெழுகப்பட்டுவிடுகின்றன. தொழில்பூர்வ அணுகுமுறையில் பார்த்தால், வெற்றியைத் தாண்டி நாம் எங்கெங்கே சொதப்பி இருக்கிறோம் எனத் தெரியவரும். ஆசியக்கோப்பை போட்டிகளிலிருந்தே நாம் ஆரம்பித்தோம் என்றால், அணியின் ஒவ்வொரு பலமான வெற்றி, சாதனைக்குப் பின்னும் ஒரே ஒருவர் பெரும் அரணாக நின்று இந்தியாவைக் காப்பாற்றிவருவது கண்கூடு. விராட் கோஹ்லி. இந்தியாவுக்காக, கொஞ்சகாலத்துக்குமுன் சச்சின் டெண்டுல்கரும், அதற்கும் முற்பட்ட காலத்தில் சுனில் கவாஸ்கர், விஷ்வனாத் ஆகியோரும் சாகஸமாய்ச் செய்து வந்த வேலை! முன்னணி வீரர்கள் நொறுங்கிவிட்ட நிலையிலும், நிதானம், பொறுமையோடு பெரும் தாக்குதல்திறன் கொண்டு விளையாடும் இந்தியாவின் வைஸ்-கேப்டன் கோஹ்லி. கொண்டாடப்படவேண்டிய மேதமை. சந்தேகமில்லை.

ஆனால் சர்வதேச அளவில் ஒரு முன்னணி கிரிக்கெட் அணி என்கிற நிலையிலிருக்கும் இந்தியா, எப்போதும் ஒருவரையே நம்பி காலம் தள்ள முடியுமா? கிரிக்கெட் ஒரு அணி-விளையாட்டல்லவா? இதர அனுபவ பேட்ஸ்மன்கள் அணியில் என்னதான் செய்கிறார்கள்? நியூஸிலாந்துக்கெதிராக ரோஹித் ஷர்மா, ஷிகர் தவன், சுரேஷ் ரெய்னா எதிர்ப்புத்திறன் காட்டி பொறுப்புடன் ஆடியிருந்தால், இந்தியா 79-ல் ஆல்-அவுட்டாகி அவஸ்தைப்பட்டிருக்குமா? இந்திய பேட்ஸ்மன்கள், சர்வதேச அனுபவமற்ற நியூஸிலாந்து ஸ்பின்னர்களிடம் எப்படியெல்லாம் தடவினார்கள் என்பதை வீடியோ போட்டுப் பார்த்தார்களா? மேற்சொன்ன மூவரும் பாகிஸ்தானுக்கு எதிராகத்தான் என்ன சாதித்தார்கள்? கேள்வி பூதாகரமாக எழுந்து நிற்கிறது. இந்த மூவரின் தடுமாற்றம் ஒருபுறமிருக்க, கீழ்வரிசையில் ஆடும் ஆல்ரவுண்டர்களான பாண்ட்யாவும், ஜடேஜாவும் தோனிக்குத் துணைபோகாமல், துவண்டார்கள். இந்த பலவீனங்களை இந்திய அணி ஒருமித்து உட்கார்ந்து ஆராயவேண்டும். பயிற்சி எடுத்து, உடனே சரிசெய்யவேண்டும். செய்யாவிட்டால், உலகக்கோப்பை ஒரு கனவாகிவிடும்.

நாளை (23-3-2016) பெங்களூரில் நடக்கவிருக்கிறது பங்களாதேஷுக்கு எதிராக இந்தியாவின் அடுத்த மேட்ச். பெங்களூரில் இதுவரை 120-155 என்கிற ரீதியில்தான் அதிகபட்ச ஸ்கோர் செல்கிறது. பிட்ச்சானவுடன் பந்து வேகமாக திருப்பம் காணும் மைதானத்தில் ஸ்பின்னர்கள் ஆதிக்கம் செலுத்துவார்கள். இதே மைதானத்தில்தான் வெஸ்ட்-இண்டீஸ் ஸ்பின்னர்கள் சாமுவேல் பத்ரீயும்(Samuel Badree), சுலைமான் பென்(Suleiman Benn) –னும் ஸ்ரீலங்காவை 122-ல் சுருட்ட வழிசெய்தார்கள். ஆதலால், நாளை மேட்ச்சில் ஜடேஜா, அஷ்வின், ரெய்னாவுக்கு நிறைய வேலை இருக்கிறது. யுவராஜின் பார்ட்-டைம் ஸ்பின்னையும் தோனி உபயோகப்படுத்தக்கூடும். இந்திய பேட்ஸ்மன்கள் ஒன்றை நினைவில் வைத்துக்கொள்ளவேண்டும். பங்களாதேஷின் டாப் பௌலர் முஸ்தாஃபிஸுர் ரஹ்மான் (Mustafizur Rahman) காயத்திலிருந்து மீண்டு வந்துவிட்டார். அந்த அணியில் ஷகிப்-உல்-ஹசன், முகமதுல்லா, சக்லைன் சஜீப் ஆகிய ஸ்பின்னர்களும் இருக்கிறார்கள். பெங்களூரில் இவர்கள் இந்திய பேட்ஸ்மன்களை சோதனைக்குள்ளாக்குவார்கள்.

அடுத்துவரும் இரு போட்டிகளில் (எதிராக: பங்களாதேஷ், ஆஸ்திரேலியா), விராட் கோஹ்லியைத் தாண்டியும் இந்தியா என்னென்ன செய்ய முடியும்? ரோஹித் ஷர்மா, ஷிகர் தவன், சுரேஷ் ரெய்னா, ஹர்தீக் பாண்ட்யா, ஜடேஜா ஆகியோர் எத்தகைய பேட்டிங்கை வெளிக்கொணர்வார்கள்? நமது பௌலர்களின் சாகஸங்கள் தொடருமா? இனி வரும் நாட்கள் இனிதே அரங்கேறுமா? இந்தியா ஆர்வமுடன் சீட்-நுனியில் உட்கார்ந்து பார்க்கிறது.

**

உலகக்கோப்பை : பாகிஸ்தானை மீண்டும் வீழ்த்தியது இந்தியா

19-3-2016 அன்று கல்கத்தாவில் நடந்த டி-20 உலகக்கோப்பையில், இந்தியா பாகிஸ்தானை மீண்டும் சாய்த்தது. உலகக்கோப்பை போட்டிகளில் (ஒரு-நாள் கோப்பை தொடர் உட்பட), பாகிஸ்தானுக்கு எதிராக இது இந்தியாவின் 11-ஆவது வெற்றி. ஒரு அபூர்வமான சாதனை.

டாஸ் ஜெயித்த இந்திய கேப்டன் மகேந்திர சிங் தோனி பாகிஸ்தானை முதலாவது பேட்டிங் செய்யச் சொன்னார். காலையில் கல்கத்தாவில் பெய்த மழையினால் பிட்ச்சில் ஈரப்பதன் இருந்தது. மேட்ச் 18-ஓவராகக் குறைக்கப்பட்டது. மைதானத்தில் இருந்த குளிர்ச்சி வேகப்பந்து வீச்சாளர்களுக்குத் துணைபோகும் என்பது கணிப்பு. பாகிஸ்தானின் துவக்க வீரர்கள் வெகு ஜாக்ரதையாகத்தான் துவங்கினர். இந்திய பௌலிங்கை தொடங்கிய ஆஷிஷ் நேஹ்ராவும் அஷ்வினும் பிட்ச்சின் வேகம், திருப்பம் ஆகியவற்றை மனதில் கொண்டு சிறப்பாக வீசினர். ரன்கள் வர அடம் பிடித்தன. சிங்கிள், இரண்டு ரன்கள் என ஸ்கோரை மெதுவாக எடுத்துச்செல்கையில் சுரேஷ் ரெய்னாவிடம் வீழ்ந்தார் ஷர்ஜீல் கான். 38-க்கு ஒரு விக்கெட். இந்தியாவுக்கு எதிராக சாதித்தே ஆக வேண்டும் என்கிற முனைப்பில் தன்னை முன்னே கொண்டு வந்தார் பாக். கேப்டன் ஷஹீத் அஃப்ரீதி. ஹர்தீக் பாண்ட்யாவின் பௌலிங்கை அவர் தாக்க முயற்சிக்கையில், கோஹ்லியிடம் கேட்ச் கொடுத்து 8 ரன்களில் வெளியேற்றப்பட்டார். அடுத்து வந்தவர்களில் ஷோயப் மாலிக், உமர் அக்மல் இந்திய வேகப்பந்துவீச்சிற்கு எதிராகத் தாக்குதல் செய்தனர். 13, 14 –ஆவது ஓவர்களில் (பாண்ட்யா, பும்ரா) ரன்கள் வேகமாக வர ஆரம்பித்தன. ஆனால் பாகிஸ்தானின் சாகசம் அதிக நேரம் நீடிக்கவில்லை. நேஹ்ராவிடம் மாலிக் சரணடைய, ப்ரமாதமாக ஸ்பின் செய்த ஜடேஜாவிடம் அக்மல் வீழ்ந்தார். பாகிஸ்தானின் எதிர்ப்புக் கதை இத்தோடு முடிவடைந்தது. இந்திய பௌலர்களின் சாதுர்யமான பந்துவீச்சில், 18 ஓவர்களில் திக்கித் திணறி 118 ரன்கள் தான் முடிந்தது பாகிஸ்தான் அணியினால்.

119 என்கிற இலக்கு பார்க்க எளிதாகத் தோன்றினாலும் இந்த மாதிரி குறைந்தபட்ச ஸ்கோரை எட்ட முனைகையில்தான் இந்தியா பரிதாபமாகத் தன் முதல் மேட்ச்சைத் தோற்றது. இந்தியர்கள் அதை நினைவில் வைத்திருந்தனர். ஸ்பின் எடுக்கும் பிட்ச்சில் அதிக கவனம் தேவைப்பட்டது. இருந்தும், ரோஹித் ஷர்மா ஏதோ ரஞ்சி ட்ராஃபி மேட்ச் விளையாடுவது போல் அலட்சியம் காண்பிக்க, 10 ரன்களில் அவர் ஆமீரிடம் அவுட் ஆனார். விராட் கோஹ்லி களமிறங்கி ஜாக்ரதையாகத் தன்னைத் தயார்படுத்திக்கொண்டார். முகமது சமியின் வேகப்பந்துவீச்சு அதி துல்லியமாக இருந்தது. தடுமாறிய ஷிகர் தவன் தன் விக்கெட்டைப் பறிகொடுத்தார். சமியின் அடுத்த பந்து ரெய்னாவின் பெயில்களைப் பறக்கவிட்டது. ஒரே ஓவரில் இரண்டு விக்கெட். 23 -க்கு 3 விக்கெட் இழப்பு. நிலைமை திடீரென மோசமானது இந்தியாவுக்கு. பாகிஸ்தான் உற்சாகத்தில் உயிர்பெற்றது. அடுத்து யுவராஜ் சிங். கோஹ்லியும் யுவராஜும் நிலைமையை சீர்செய்வதில் கவனம் செலுத்தினர். மேற்கொண்டு நஷ்டம் ஏற்படாமல் சிங்கிள், இரண்டு என பந்துகளை இடது, வலதாக வேகமாகத் தட்டிவிட்டு ஓடினர். அவ்வப்போது கோஹ்லியின் பௌண்டரி. இந்த ஜோடி நிலைத்துவிடும் போலிருக்கிறதே என்கிற பதற்றம் பாகிஸ்தானிடம் தெரிந்தது.

குழம்பி இருந்த பாக். கேப்டன் அஃப்ரீதி பௌலிங்கை வேகமாக மாற்றினார். தானே ஸ்பின் போட்டார். ஷோயப் மாலிக்கை ஸ்பின் போட அழைத்தார். மாலிக்கின் அந்த ஓவரில் கோஹ்லி அடக்கி வைத்திருந்த ஆவேசத்தைத் திறந்துவிட்டார். ஒரு சூப்பர் சிக்ஸர். இந்திய ரசிகர்கள் தவ்விக் குதிக்க அடுத்த பந்து பாய்ந்து பௌண்டரியை முத்தமிட்டது. தலையைச் சொறிந்த அஃப்ரீதி, அடுத்த ஓவரை வேகப்பந்துவீச்சாளர் வஹாப் ரியாஸிடம் கொடுத்தார். முதல்பந்தை எதிர்கொண்ட யுவராஜ், அனாயசமாக ரியாஸை சிக்ஸருக்குத் தூக்கினார். அந்த ஓவரில் ரன்கள் வேகமாக வந்தன. அதே ஓவரின் கடைசிபந்தில் மேலும் ஒரு சிக்ஸருக்காக அவசரம் காட்டிய யுவராஜ் கேட்ச் கொடுத்து அவுட் ஆனார். 23 பந்துகளில் 24 ரன்கள். பாகிஸ்தான் கதையின் முடிவுரையை எழுத இறங்கினார் கேப்டன் தோனி. சூடுபிடித்திருந்த கோஹ்லி பௌண்டரிக்கு பந்தை விரட்ட, இலக்கு நெருங்கியது. ஒரு ஹிமாலய சிக்ஸர், ஒரு சிங்கிள் எனப் பாகிஸ்தானைப் பணியவைத்தார் தோனி. 7 பௌண்டரி, ஒரு சிக்ஸருடன் ப்ரமாதமான ஆட்டம் காண்பித்த கோஹ்லி 55 ரன்களுடன் இறுதிவரை அவுட் ஆகாதிருந்தார். பேட்டரி சார்ஜாகியிருந்த இந்திய ரசிகர்கள் பறக்காத குறையாகத் துள்ளினர்.

இந்தியாவுக்கெதிராக உலகக்கோப்பையில் பாகிஸ்தானுக்கு இன்னுமொரு துயர் தரும் தோல்வி. என்ன செய்வது – பாதுகாப்பு என்று சாக்குபோக்கு சொல்லி, தர்மசாலா மைதானத்தைத் தவிர்த்து, பாகிஸ்தான் ஆசையாகக் கேட்டுவாங்கிய கல்கத்தா மைதானம் அதற்கு ராசியாக அமையவில்லை.

கல்கத்தாவின் ஈடன் கார்டன்ஸ் (Eden Gardens, Calcutta) மைதானம் நிரம்பி நுரைத்திருந்தது. சச்சின் டெண்டுல்கர் மனைவி அஞ்சலியுடன் வந்து இந்திய அணிக்கு உசுப்பேத்திக்கொண்டிருந்தார். போதாக்குறைக்கு பாலிவுட்டிலிருந்து அமிதாப் பச்சன், அவர் மகன் அபிஷேக் மற்றும் முகேஷ்-ட்டினா அம்பானி தம்பதிகள் இந்தியக் கொடியை உல்லாசமாக அசைத்துக்கொண்டிருந்தனர். இளைஞர்கள் பகுதியிலிருந்து திடீரென முளைத்த வானவேடிக்கைள் கல்கத்தாவின் இரவு வானத்தில், பாகிஸ்தானுக்கெதிராக இந்தியாவின் கிரிக்கெட் ஆளுமையை ப்ரகாசமாக எழுதிவைத்தன.

**

டி-20: இந்தியாவின் தொடர் வெற்றிகளுக்கு அப்பால்..

பங்களாதேஷில் நடைபெற்றுவரும் ஆசியகோப்பை டி-20 போட்டிகளில் நேற்றைய போட்டியையும் சேர்த்து 4 தொடர்வெற்றிகளை இந்தியா பெற்றுள்ளது. வீழ்த்தப்பட்ட அணிகளில் பாகிஸ்தான், ஸ்ரீலங்காவும் அடங்கும். மார்ச் 6-ம் தேதி ஆடப்படவிருக்கும் இறுதிப்போட்டியில் இந்தியா பங்களாதேஷோடு மோதவிருக்கிறது.

இதுவரை இந்தியாவின் ஆட்டங்களை உன்னிப்பாக கவனித்தோருக்கு சில விஷயங்கள் பளிச்செனப் பட்டிருக்கும். அவற்றில் முதன்மையானது விராட் கோஹ்லியின் ப்ரமாத ஃபார்ம். எதிரி யாராயிருப்பினும், பௌலர்கள் எத்தகையோராயிருப்பினும், ஒவ்வொரு மேட்ச்சிலும் செம சாத்து சாத்திவருகிறார் துணக்கேப்டன் கோஹ்லி. அந்த அருமையான ஆட்டத்தை அவர் உலகக்கோப்பைக்குள் கொண்டுசெல்வது இந்தியாவுக்கு நல்லது. இதற்கடுத்தாற்போல் நன்றாக விளையாடிவரும் இந்திய பேட்ஸ்மன் ரோஹித் ஷர்மா.

Rohit Sharma is a mercurial player. வீரேந்திர சேஹ்வாக் மாதிரி எனச் சொல்லலாம். தாக்க ஆரம்பித்தார் என்றால் கண்மண் தெரியாமல் தாக்கக்கூடியவர். நம்பமுடியாத ஷாட்களை விளாசிடும் திறமை அவருக்குண்டு. அடுத்தவாரம் இந்தியாவில் துவங்கவிருக்கும் டி-20 உலகக்கோப்பையில் ரோஹித் எவ்வாறு ஆடுவார் –குறிப்பாக ஆஸ்திரேலியா, இங்கிலாந்து, தென்னாப்பிரிக்கா போன்ற வலுவான அணிகளுக்கெதிராக அவருடைய ஆட்டம் எப்படி இருக்கும் எனப் பார்க்க ரசிகர்கள் ஆவலாகிறார்கள்.

நடந்துவரும் ஆசியக்கோப்பை மேட்ச்சுகளில், மேற்சொன்ன இருவரையும் தவிர இந்திய பேட்டிங்கில் சிலாகிக்கும்படியாக எதுவும் நிகழவில்லை. ஷிகர் தவண், சுரேஷ் ரெய்னா ஆகியோரின் ஆட்டம் போதுமானதாகத் தெரியவில்லை. தோனி, ஜடேஜா ஆகியோருக்கு சரியான வாய்ப்பு வரவில்லை. யுவராஜ் சிங் ஸ்ரீலங்காவுக்கெதிராக நன்றாக ஆடினார். காரணம் அவருடைய சிறந்த ஷாட்டுகள் ஸ்பின்னர்களுக்கெதிராக வெளிப்பட்டன. தரமான சர்வதேச வேகப்பந்துவீச்சாளர்களை அவர் எப்படி சமாளிப்பார் என்பது ஒரு கேள்விக்குறி. பொறுத்திருந்துதான் பார்க்கவேண்டும்.

இந்திய பந்துவீச்சில் புதியவர்களான ஜஸ்ப்ரித் பும்ராவும்(Jasprit Bumrah), ஆல்ரவுண்டர் ஹர்தீக் பாண்ட்யாவும்(Hardik Pandya) சிறப்பான ஆட்டத்தை வெளிப்படுத்தியிருப்பது மகிழ்ச்சி தரும் விஷயம். ஆனால் இவர்கள் இந்தியாவில் நடக்கவிருக்கும் உலகக்கோப்பை போட்டிகளில், கடும் சோதனைக்கு உள்ளாவார்கள். Test by fire. இந்திய அணிக்கு திரும்பி வந்திருக்கும் சீனியரான ஆஷிஷ் நேஹ்ரா நன்றாகப் பந்துவீசி வருகிறார்.

நேற்றைய போட்டியில், பௌலர்கள் ஹர்பஜன் சிங், பவன் நேகி (Pavan Negi), புவனேஷ்வர் குமார் ஆகியோருக்கு வாய்ப்பு வழங்கப்பட்டது. யூ.ஏ.இ. (ஐக்கிய அரபு அமீரகம்) ஒரு வலுவற்ற டீம். ஆதலால் அவர்களுக்கு இது ஒரு பயிற்சி ஆட்டம் போன்றது மட்டுமே.

உலகக்கோப்பையில் விராட் கோஹ்லி, ரோஹித் ஷர்மா ஆகிய இரண்டு பேட்ஸ்மன்களை மட்டுமே நம்பி இந்தியா கதை ஓட்டமுடியாது. ஆதலால், ஞாயிற்றுக்கிழமை (6-3-16) ஆடப்படவிருக்கும் ஆசியக்கோப்பை இறுதிப்போட்டியில், இந்த இருவர்களையும் தாண்டி இந்திய பேட்ஸ்மன்கள் சோபிப்பது அவசியம். குறிப்பாக தவண், ரெய்னா, யுவராஜ் சிங், தோனி, ஜடேஜா ஆகியோரின் ஆட்டம் பெரிதும் கவனிக்கப்படும். பார்ப்போம்.

**