கிரிக்கெட் உலகக்கோப்பை, 2019 :  இந்திய அணித் தேர்வுகள்

கிரிக்கெட் உலகின் முக்கிய பத்து  நாடுகள் பங்கேற்கும் கிரிக்கெட் உலகக் கோப்பை இங்கிலாந்தில் ஆரம்பிக்கவிருக்கிறது, மே இறுதியில். அதற்கான தயார்நிலைக்காக, பங்கேற்கும் நாடுகள் தங்களுக்குள் ஒருநாள் போட்டித் தொடர்களை விமரிசையாக ஆடிவருகின்றன. இதுவரை கோப்பையை ஒருமுறைகூட வெல்லாத நாடுகளான இங்கிலாந்து, தென்னாப்பிரிக்கா, நியூஸிலாந்து ஆகியவை, போர்க்காலநடவடிக்கைபோல் கோப்பையைக் கைப்பற்றுவதற்கான முனைப்புகளில் ஈடுபட்டிருக்கின்றன. நடப்பு சேம்பியனான ஆஸ்திரேலியா, வார்னர்-ஸ்மித் சர்ச்சை/தடைக்குப் பின் வெகுவாக ஆட்டம் கண்டிருக்கிறது எனினும், ஒரு-நாள் கிரிக்கெட்டைப் பொறுத்தவரை ஒன்றும் சொல்வதற்கில்லை. செலக்‌ஷன் பாலிட்டிக்ஸில் சிக்கிக்கொண்டிருக்கும் ஸ்ரீலங்காவின் நிலையும் மோசம்.  அதிரடி ஆட்டத்துக்குப் பேர்போன வெஸ்ட் இண்டீஸ், எப்போதும்போல ஹாயாக இருக்கிறது.. பாகிஸ்தான் சமீபத்திய தொடர்களில் கொஞ்சம் ஜெயித்தும், கொஞ்சம் தோற்றும், ஒரேயடியாக வாயடி அடித்துக்கொண்டும் திரிகிறது. சிலநாட்கள் முன்பு, அதன் முன்னாள் வீரர் மொய்ன் கான், உலக்கோப்பைத் தொடரில் இந்தியாவை வென்று சரித்திரம் படைப்போம் என்றிருக்கிறார். கவனியுங்கள் – உலகக்கோப்பையை வென்றல்ல. பங்களாதேஷ் சமீப காலத்தில் வெகுவாக முன்னேறியிருக்கிறது. புதிதாக இந்த முறை உலகக்கோப்பை வட்டத்துக்குள் வந்திருக்கும் ஆஃப்கானிஸ்தான், ஆர்வத்துடன் கவனிக்கப்படவேண்டிய அணி. பெரிய அணிகளில் எதனையும் கவிழ்க்கும்  திறன் உடையது. கிரிக்கெட் உலகின் ஒவ்வொரு பகுதியையும், ஒவ்வொரு விதமாக உலகக்கோப்பை ஃபீவர் சூடேற்றிக்கொண்டிருக்கிறது.
சரி, இந்தியாவின் தயார்நிலை எப்படியிருக்கிறது? ஆஸ்திரேலியா மற்றும் நியூஸிலாந்து மண்ணில் சமீபத்தில் அது ஒருநாள் தொடர்களை வென்றிருக்கிறது என்பது ஒரு உற்சாகத்தை அணியினரிடையே ஏற்படுத்தியுள்ளது. மனோபலம், தன்னம்பிக்கை கொஞ்சம் அதிகம்தான். இருந்தும் உலகக்கோப்பை என்று வரும்போது,  ஓரிரு கடும்போட்டிகளிலேயே நிலைமை தலைகீழாக மாறிவிடக்கூடும்.
தன்னைக் கூர்மையாக்கிக்கொள்ளவென மார்ச் மாதத்தில் இந்தியா ஆஸ்திரேலியாவுக்கெதிராக இன்னுமொரு தொடர் விளையாடவிருக்கிறது. இது நடக்கவிருப்பது இந்தியாவில். ஆதலால் நமது ஆட்டக்காரர்கள் பிரமாத ஸ்கோரை நிறுவி, சூரப்புலிகளாகத் தெரிவார்கள்தான். உலகக்கோப்பை நடக்கப்போவதோ பந்து அதிரடியாக ஸ்விங்காகித் தெறிக்கும் இங்கிலாந்தில். இந்தப் பாச்சா அங்கே பலிக்காது. இருப்பினும் பயிற்சி எனும் நிலையில் போட்டி கடுமையாக இருக்கும் என எதிர்பார்க்கலாம்.
உலகக்கோப்பைக்கான இந்திய அணி எப்படி இருக்கும்?  யார் யார் உள்ளே, யார் யார் வெளியே என்பதே இந்திய கிரிக்கெட் ரசிகர்களின் உச்சகட்ட எதிர்பார்ப்பு இப்போது. அனேகமாக பதினைந்து பேர் கொண்ட அணி,  தேர்வுக்கமிட்டியால் தேர்வு செய்யப்படும். காயம் மற்றும் வேறு வம்புகளில் சிக்காதிருந்தால், முதல் பத்து வீரர்கள் அனேகமாக உறுதியாக உள்ளே வருவார்கள் எனலாம். அவர்கள் இவர்கள்:
ரோஹித் ஷர்மா, ஷிகர் தவன், விராட் கோலி (கேப்டன்), எம்.எஸ். தோனி, ஹர்திக் பாண்ட்யா, புவனேஷ்வர் குமார், ஜஸ்ப்ரித் பும்ரா, முகமது ஷமி, குல்தீப் யாதவ், யஜுவேந்திர சஹல் ஆகியோர். இவர்களோடு பேட்டிங் வரிசையில் நான்காவதாக வர, அனேகமாக ஹைத்ராபாதின் (சென்னை சூப்பர் கிங்ஸ்) அம்பத்தி ராயுடு தேர்வு செய்யப்படுவார் எனவும்  எதிர்பார்க்கலாம். அந்த வரிசைநிலையில் வந்து, பந்துவீச்சு எப்படியிருப்பினும் நிலைமைக்கேற்ப, நிதானமாக அல்லது தாக்கி ஆடும் திறன் அவருக்குண்டு.
மேலே குறிப்பிட்ட முதல் பத்தில், கடைசி ஆறு வீரர்கள் இந்திய அணியின் பௌலிங் துறையைத் திறம்படக் கவனித்துக்கொள்வார்கள். நம்பலாம். BCCI மேலும் ஒன்றிரண்டு ஆல்-ரவுண்டர்களை அணியில் சேர்க்கப் பார்க்கும். ஆரம்ப விக்கெட்டுகள் ஒரேயடியாக சரிந்தால் நின்று ஆட, தேவைப்பட்டால் எகிறிப் பாய, மிடில் ஆர்டரில் ஸ்கோரை வேகமாக ஏற்றும் திறன் வாய்ந்தவர்களாக மேலும் இரண்டு பேட்ஸ்மன்களாவது ரிசர்வில் அவசியம் இருக்கவேண்டும். தோனியைத் தாண்டியும் ஒரு ஃபினிஷர் – ஆறாவது அல்லது ஏழாவது என்கிற பேட்டிங் வரிசையில் இருப்பதே அணிக்கு வலு சேர்க்கும். இந்த நிலைகளில் யார் யாருக்கு வாய்ப்பு தரப்படலாம் என்பதே தலையைப் பிய்த்துக்கொள்ளவைக்கும் கேள்விகள்.
ஹர்திக் பாண்ட்யாவைத் தவிர, மேலும் ஆல்ரவுண்டர்கள் இந்திய உலகக்கோப்பை  அணியில் வேண்டும்  எனில், அதற்காக மூன்று வீரர்கள் வரிசைகட்டி நிற்கிறார்கள். கேதார் ஜாதவ்(மஹாராஷ்ட்ரா) , விஜய் ஷங்கர்(தமிழ்நாடு), க்ருனால் பாண்ட்யா(மும்பை)  ஆகியவர்கள். இவர்களில், ஜாதவ் ஆறாவது, ஏழாவது நிலைகளில் வந்து ஆடி, ஏற்கனவே தன்னை நிரூபித்துள்ளார். ஸ்பின் பௌலிங் போட்டு விக்கெட்டைத் தூக்கும் திறனுமுண்டு. விஜய் ஷங்கர் ஒரு பேட்டிங் ஆல்ரவுண்டர். முதன்மையாக, நல்லதொரு பேட்ஸ்மன். சமீபத்திய நியூஸிலாந்து தொடரில் இது தெரிந்தது.  மீடியம்-பேஸ் பௌலிங் அவ்வப்போது போட்டு எதிரியின் ரன் விகிதத்தைக் குறைக்கமுடியும். திறன்மிகு ஃபீல்டர் என்பது இன்னுமொரு ப்ளஸ். ஹர்திக்கின் அண்ணாவான க்ருனால் பாண்ட்யா, ஸ்பின் பௌலிங்-ஆல்ரவுண்டர். கீழ்வரிசையில் அதிரடி பேட்டிங்கிற்கு (மும்பை இந்தியன்ஸ்) பேர்போனவர். உள்ளே வரும் தகுதி இவருக்கும் உண்டு. மேற்சொன்ன மூவரில் ஒரேயொரு ஆல்ரவுண்டரைத்தான் தேர்வு செய்வார்கள் எனில், பெரும்பாலும் கேதார் ஜாதவ் தேர்வுசெய்யப்படவே வாய்ப்பிருக்கிறது. இரண்டு ஆல்ரவுண்டர்கள் தேர்வு செய்யப்பட்டால்,  விஜய் ஷங்கருக்கு வாய்ப்பு  கிடைக்கலாம். கிரிக்கெட் போர்டின் தேர்வுக்குழு தலைவரான எம்.எஸ்.கே. பிரசாதிற்கு இப்போதெல்லாம் ஏகப்பட்ட தலைவலி!
மாறும் நிலைமை மற்றும் களவியூகத்தின்படி திடீரென இறக்க, இன்னும் இரண்டு மிடில்-ஆர்டர் பேட்ஸ்மன்கள், அணிக்கு அவசியம் தேவை. இங்கே காட்சி தருபவர்கள் டெல்லியின் ரிஷப் பந்த், தமிழ்நாட்டின் தினேஷ் கார்த்திக், கர்னாடகாவின் கே.எல்.ராஹுல் மற்றும் மும்பையின் அஜின்க்யா ரஹானே. இங்கிலாந்து தொடரில் ஸ்பின், பேஸ் (pace) என எதனையும் அடித்து அதிரடி காண்பித்த ரிஷப் பந்த் தேர்வாகும் வாய்ப்போடு நிற்கிறார். ஒரு ஸ்பெஷல் டேலண்ட்  எனவே வல்லுனர்களால் பார்க்கப்படுகிறார், இருபத்தோரு வயதாகும் பந்த். முக்கியமான போட்டிகளில் பந்த், ஒரு பத்து ஓவர் விளையாடினாலே போட்டியின் திசை மாறிவிட வாய்ப்புண்டு. இவர் அணியில் நிச்சயம் வேண்டும். கடந்த ஆண்டில் சர்வதேசப் போட்டிகளில் ஆக்ரோஷம் காண்பித்தும், ஸ்ரீலங்காவில் லாவகமாக ஃபினிஷ் செய்தும் வெற்றியைக் கொணர்ந்த  தினேஷ் கார்த்திக் உலகக்கோப்பை அணியில்   இருக்கவேண்டியவர். இந்தியாவின் முன்னாள் கேப்டனும், கிரிக்கெட் வர்ணனையாளருமான சுனில் கவாஸ்கர், இந்தியா கார்த்திக்கை துவக்க ஆட்டக்காரராகவும் இறக்கலாம்-ஏனெனில் முன்பு இங்கிலாந்தில்  துவக்க ஆட்டக்காரராக இறங்கி ஆடிய அனுபவம் அவருக்குண்டு என்கிறார். ஆனால் தேர்வுக்குழுக்காரர்கள் என்ன நினைக்கிறார்களோ? ராஹுலையோ, ரஹானேயையோ உள்ளே சேர்த்துவிட்டு, இவ்வளவு நாளும் உழைத்துக் காத்திருக்கும் கார்த்திக்கைக் கழட்டிவிட்டுவிடுவார்களோ? ஒன்றும் சொல்வதற்கில்லை.
**
Advertisements

க்ரிக்கெட் : பலே பாண்ட்யா!

மூன்றே நாளில் முடிவுகண்டது ஸ்ரீலங்காவிற்கெதிரான கண்டி டெஸ்ட் மேட்ச். இந்திய வெற்றி. 3-0 என தன் மண்ணிலேயே ஒயிட்வாஷ் செய்யப்பட்டது ஸ்ரீலங்கா. ஸ்ரீலங்கா இந்த தொடரில் உண்மையில் க்ரிக்கெட் விளையாடியதா? நினைவுக்கு ஒன்றும் சரியாக வரவில்லை. முதல் டெஸ்ட்டில் நுவான் ப்ரதீப், பின்பு கொஞ்சம் ஹெராத், கருணரத்னே, குஸால் மெண்டிஸ் என நாங்களும் விளையாடுவோம் க்ரிக்கெட் என்றார்கள். மற்றவர்கள் ஏதோ சினிமாவில் கௌரவ நடிகர்கள் போல் வந்தார்கள்; சென்றார்கள். போதாக்குறைக்கு காயங்களினால் விளையாட முடியாத நிலையில் ப்ரதீப், லக்மல், சமீரா போன்ற வீரர்கள். கடைசி போட்டியில் மகா கேவலமாக இருந்த ஸ்ரீலங்க ஆட்டத்தில், லக்ஷன் சந்தகன் (Lakshan Sandakan) சுழல்வீரர்) மட்டும் உயிர்ப்போடு வெளிப்பட்டார். புதிய கேப்டனான தினேஷ் சண்டிமாலின் நிலை பரிதாபம். அவருடைய கேப்டன்சி மோசமில்லை. ஆனால், பேட்டிங் ஃபார்மில் அவருமில்லை. தொடரின் இறுதியில் நேர்காணலில் அவருக்கு என்ன சொல்வதென்றே தெரியவில்லை.

இந்திய பேட்டிங்-குறிப்பாக துவக்க ஆட்டம் சிறப்பாக இருந்தது. ஷிகர் தவண் இரண்டு சதங்கள் விளாசி, நல்ல துவக்கம் தந்தார். ரஹானே, புஜாரா, கோஹ்லி, ராஹுல் வழக்கம்போல் தங்களிடமிருந்து எதிர்பார்க்கப்பட்டதைச் செய்தனர். Silver lining என்பார்களே அது ஹர்தீக் பாண்ட்யாதான் (Hardik Pandya). ஏற்கனவே இந்தியாவுக்காக ஒரு-நாள், டி-20 போட்டிகளில் கவனிக்கத்தக்கப் பங்களிப்பு செய்தவர். முதன்முறையாக, இந்தத் தொடரில்தான் டெஸ்ட் போட்டிகளில் அறிமுகப்படுத்தப்பட்டார். 6,7 என்கிற இடங்களில் அஷ்வின், சாஹா வருவதால், அணியின் பேட்டிங் வரிசையில் பாண்ட்யாவுக்குக் கிடைத்தது 8-ஆவது இடம். பையன் சளைக்கவில்லை! போட்டுத்தள்ளிவிட்டார் ஸ்ரீலங்காவை.

முதல் இரண்ட் போட்டிகளில் இந்தியா முதல் இன்னிங்ஸில் 600-க்கும் மேலே எடுத்துவிட்டது. துவக்க, மிடில்-ஆர்டர் பேட்ஸ்மன்கள் நன்றாகச் செய்திருந்ததால், பாண்ட்யாவுக்கு வாய்ப்பு அதிகமில்லை. அப்படியும் போன மேட்ச்சில் குறிப்பிடத்தக்க, run-a-ball அரைசதம் விளாசியிருந்தார். கடைசிப்போட்டியில் தவண், ராஹுலுக்குப்பின் இந்தியாவின் பேட்டிங்கில் ‘தம்’ இல்லை. புஜாரா, ரஹானே எளிதாக வெளியேற்றப்பட, கோஹ்லியும் பெரிசாக ஒன்றும் செய்துவிடவில்லை. அஷ்வின், சாஹா ஆகியோர் மட்டையைச் சுழற்ற வேண்டியதாயிற்று. அஷ்வின் வீழ்ந்தபின் இறங்கினார் பாண்ட்யா. சாஹாவும் சொற்பமாக சரிந்துவிட இந்தியா 400-ஐத் தொடுமா என்பது தொடரில் முதல் முறையாக சந்தேகத்தை கிளப்பியிருந்தது. புதிதாகச் சேர்ந்திருந்தார் குல்தீப் யாதவ். கொஞ்சம் சுமாராக ஆடக்கூடிய உத்திரப்பிரதேச ஆல்ரவுண்டர். அவர் அடுத்த முனையில் ஆடும்வரை, தன் வழக்கத்துக்குப் புறம்பாக, அந்தக்காலத்து ரவி சாஸ்திரி போல் அதிநிதானமாக ஆடினார் பாண்ட்யா. ஸ்ரீலங்க பௌலர்களுக்கு தாங்கள் சிறப்பாகப் பந்துவீசுவது போன்றதொரு ப்ரமை. குல்தீப்பும் விழுந்துவிட, ஷமியும், உமேஷ் யாதவும்தான் பாக்கி என்கிற நிலையில், விஸ்வரூபம் காண்பித்தார் பாண்ட்யா. புஷ்பகுமாராவின் ஒரு ஓவரில் 4,4,6,6,6 என ஸ்ரீலங்காவை சிதறவிட்டார். என்ன நடக்கிறது எனப் புரிந்துகொள்ளுமுன் தொண்ணூறுகளில் ப்ரவேசித்துவிட்டார். உமேஷ் யாதவைத் துணையாக வைத்துக்கொண்டு ஸ்ரீலங்காவின் சிறந்த பௌலரான சந்தகனை சாத்தினார் ஒரு சாத்து. 91-லிருந்து 97. ஓ! செஞ்சுரி அடித்தேவிடுவாரோ? யாதவ் அந்தப்பக்கம், இந்தப்பக்கமாக சிங்கிளுக்காக ஓடிப்பார்க்க, அவருக்கு நிதானம் சொன்னார் பாண்ட்யா. இப்படி ஒரு தில்லா? இரண்டு ரன்கள். அடுத்து அந்த ஸ்ட்ரெய்ட் ஃபோர். 86 பந்துகளில் ஒரு டெஸ்ட் செஞ்சுரி! (108, 8 பௌண்டரி, 7 சிக்ஸர்). அவருடைய கேரியரின் முதல் first-class century-யே இந்த டெஸ்ட் சதம்தானாம். எப்படி நம்ப ஆள்? வீரேந்திர சேஹ்வாக் பார்த்திருக்கிறார் போலிருக்கிறது; ‘குங்-ஃபூ பாண்ட்யா!’ என்றார் ட்விட்டரில் அடுத்த நாள்!

இந்தத்தொடரில் பாண்ட்யாவுக்கு போதுமான பௌலிங்கை கோஹ்லி தரவில்லை. ஸ்பின்னர்கள், ஷமி, உமேஷ் என கவனம் செலுத்தினார். கிடைத்த சொற்ப ஓவர்களில் 4 விக்கெட்டுகளை வீழ்த்தியதோடு, நன்றாக ஃபீல்டிங்கும் செய்திருக்கிறார் பாண்ட்யா. செல்லவேண்டிய தூரம் அதிகம் எனினும், இந்தியாவுக்கு ஒரு உயிர்ப்பான டெஸ்ட் ஆல்ரவுண்டர் கிடைத்துவிட்டார் எனவே தோன்றுகிறது.

**

கிரிக்கெட் – ஆஸ்திரேலியாவுக்கு எதிராகத் தடுமாறும் இந்தியா

ஆஸ்திரேலியாவில் நடைபெறும், இந்தியா ஆஸ்திரேலியா ஒரு-நாள் தொடரில் இரண்டு போட்டிகள் முடிவடைந்துவிட்டன. இந்தியாவுக்கான ரிசல்ட்: 0.

சமீபத்தில்தான் தென்னாப்பிரிக்காவை டெஸ்ட் தொடரில் வென்ற டீம் இது. திடீரென என்னவாயிற்று இந்திய அணிக்கு? ஏனிந்தத் தடுமாற்றம்? பேட்டிங் சரியில்லையா? அப்படியும் சொல்வதற்கில்லை. துவக்க ஆட்டக்காரரான ஷிகர் தவண் வழக்கம்போல் சோபிக்கவில்லை.அவர் ஜாதகம் அப்படி. ஆனால் ரோஹித் ஷர்மா பிரமாதமாக ஆடினார். இரண்டு ஆட்டத்திலும் அபார சதம் அடித்துள்ளார். விராட் கோஹ்லியும், அஜின்க்யா ரஹானேயும் நன்றாக விளையாடிவருகின்றனர். இரண்டு ஆட்டங்களிலும் இந்தியா 300-ஐத் தாண்டியது. பின்னே என்னதான் பிரச்சினை? வழக்கமான பிரச்சினைதான். நமது பௌலிங் வெளி நாட்டில் எடுபடவில்லை. அடித்து நொறுக்கிவிட்டார்கள் ஆஸ்திரேலியர்கள்.

முதல் மேட்ச்சில், இந்தியாவின் புதிய இடது கை வேகப்பந்துவீச்சாளரான பஞ்சாபின் பரிந்தர் ஸ்ரன் (Barinder Sran) தனது முதல் போட்டியில் சிறப்பாகப் பந்து வீசினார். 3 விக்கெட்டுகள் வீழ்த்தினார் அவர். அடுத்த பக்கத்தில் அவருக்கு அஷ்வின் துணையிருந்தார். ஆனால் மற்ற பௌலர்கள் அடித்து துவம்சம் செய்யப்பட்டதால் 310 என்கிற இலக்கை ஆஸ்திரேலியா எளிதில் அடைந்து வென்றது. இரண்டாவது போட்டியிலும், இந்திய பௌலர்கள் ஆஸ்திரேலிய பேட்ஸ்மன்களிடம் உதை வாங்கினர். ஸ்பின்னர்கள் கொஞ்சம் நன்றாகப் பந்துபோட்டிருக்கலாம் என்று அழுகிறார் கேப்டன் தோனி. உண்மைதான். ஆனால் யார்தான் சரியாகப் பந்து போட்டார்கள்? அனுபவம் நிறைந்த இஷாந்த் ஷர்மா 5 ஒய்டுகளை வாரி வழங்குகிறார். ஒரு விக்கெட் சாய்ப்பதற்குள் போதும் போதும் என்றாகிவிட்டது அவருக்கு. இந்த மாதிரியான `அனுபவ வீரர்களை` வைத்துக்கொண்டு ஆஸ்திரேலியா போன்ற, (ச்)சாம்ப்பியன் அணியை வெல்லமுடியுமா?

இஷாந்த் ஷர்மா, உமேஷ் யாதவ் ஆகிய, விக்கெட்டுகளை வீழ்த்துவதற்கு பதிலாக, ரன்களை தானம் செய்யும் துல்லியமற்ற பௌலர்கள் இருக்கையில், வெற்றி என்பது கேப்டனின் பகல் கனவாகத்தான் போய்முடியும். இந்திய கேப்டன் இந்நிலையில் என்னதான் செய்வது? முதலில் பேட்டிங் செய்கிற அணி 300 ரன்கள் அடித்தால் போதும்; ஜெயித்துவிடலாம் என நினைத்த காலம் மலையேறிவிட்டது. இதனை இந்திய அணியினர் இனியாவது உணரவேண்டும். இந்திய அணிக்கு பேட்டிங்தான் ஓரளவுக்கு பலம். இனிவரும் போட்டிகளில் இந்தியா முதலில் பேட் செய்ய நேர்ந்தால், குறைந்தபட்சம் 340 ரன்களாவது எடுக்கவேண்டும். அப்போதுதான் வெற்றியைப்பற்றிக் கற்பனையாவது செய்யமுடியும்.

ஃபார்மில் வர சிரமப்படும் ஷிகர் தவனை உடனடியாகத் தியாகம் செய்வது, இந்திய அணிக்கு நல்லது. அவருக்கு பதிலாக நாளைய போட்டியில் (17-1-16), பஞ்சாபின் குர்கீரத் சிங் மான்(Gurkeerat Singh Mann) (பேட்டிங் ஆல்ரவுண்டர்) சேர்க்கப்படுவது உசிதமாக இருக்கும். இதனால் தோனிக்கு, ஒரு பேட்ஸ்மன் + ஒரு பௌலர் உபரியாகக் கிடைக்கும்.

நீங்களும் நானும் தவித்தால் போதுமா? உண்மையில் என்ன நடக்கப் போகிறது எனப் பொறுத்திருந்து பார்ப்போம் !

**