தென்சீனக் கடலில் சீனாவின் ஆட்டம்

ஒட்டுமொத்த உலகிலும் தீயைப்போட்டுக் கொளுத்தி கொரோனா வேடிக்கை பார்த்துவரும் நெருக்கடி மிகுந்த காலகட்டத்தில் (மார்ச் 2020-க்குப் பின்னான போதாதகாலம்), தெற்கு ஆசியாவின் சில இடங்களில் நோண்டிப் பார்த்தது போதாதென, மேலும் சில தடாலடி நடவடிக்கைகளை சீனா மேற்கொண்டது. தென் சீனக்கடலில்  நீர்வழிகள், இயற்கைவளமிக்க நிலத்திட்டுகளைச் சுற்றி இருக்கும் பரப்புகள் சிலவற்றிற்கு வியட்நாம், ஃபிலிப்பைன்ஸ், தைவான், மலேஷியா, ப்ருனெய் (Brunei) போன்ற நாடுகள் பல வருடங்களாக உரிமை கோரிவருகின்றன. திடீரெனக் கிளம்பி, பேயாட்டம்போட்டுவரும் கொரோனாவோடு பல நாடுகள்  ஒரு நிழல்யுத்தத்தில் ஈடுபட்டிருக்கையில், தென்சீனக் கடல்பகுதியின் சிறுநாடுகளின் உரிமைகளைத் தூக்கிக் கடாசிவிட்டு தன் போர்க்கப்பல்கள், ஆய்வுக்கப்பல்களை அனுப்பி அங்கே முகாமிட்டு நீர்வளங்களைக் குடையத் துவக்கிவிட்டது சீனா. குறிப்பாக இரண்டாவது உலகமகாயுத்தத்திற்குப் பின், யாருக்குச் சொந்தம் என்கிற சர்ச்சைகளுடன் ஜீவிக்கின்றன  பாரஸெல் மற்றும் ஸ்ப்ராட்லி தீவுகள் (Paracel, Spratly islands). (ஒருகாலத்தில் ஜப்பானால் ஆட்சி செய்யப்பட்டவை). இவற்றின் அருகில், செயற்கை நகரம் ஒன்றை சீனா உருவாக்கிவருவது தெரிந்தது. அதற்கு ஸன்ஷா நகர் (Sansha city) எனப் பெயர் சூட்டலும் நடந்திருக்கிறது. (ஸ்ப்ராட்லி தீவுப்பகுதி இதுவரை மனிதனால் துருவப்படாத, எண்ணெய் மற்றும் இயற்கைவாயு வளம் கொண்டது எனக் கணிக்கப்பட்டிருக்கிறது). போனவருடமே இந்த நீர்ப்பரப்பில் சீனக் கடற்படையுடன் பிரச்னைகளை சந்தித்திருந்த அண்டை நாடான வியட்நாம், தன் அதிகாரபூர்வ எதிர்ப்பையும் சீனாவுக்குத் தெரிவித்திருந்தது. அதைப்போலவே சர்ச்சைக்குரிய கடற்பிராந்தியம் தொடர்பாக முன்னொரு முறை ஃபிலிப்பைன்ஸோடும் சீனா மோதிப் பார்த்திருக்கிறது.

இத்தகைய பின்புலத்தில், ட்ரம்ப்பின் அமெரிக்கா அலர்ட் ஆனது. தனது கடற்படையின் 7-ஆவது அணியின் போர்க்கப்பல்கள் சிலவற்றை தியகோ கார்சியா (Diego Garcia) கடற்தளத்திலிருந்து தென்சீனக்கடலுக்கு அனுப்பி நிலைகொண்டது. ஏற்கனவே சீனாவின் அதிரடி ராஜீய, ராணுவ நடவடிக்கைகளினால் கடுப்பிலிருந்த ஆஸ்திரேலியா, தன் போர்க்கப்பல் ஒன்றை அங்கு செலுத்தி, அமெரிக்கக் கப்பற்படையுடன் சேர்ந்துகொண்டு (யுத்தப்) ’பயிற்சிகளை’ ஆரம்பித்தது. சீனாவின் ரத்த அழுத்தம் எகிறிவிட்டது!

சுயமான வெளியுறவுக் கொள்கையோடு செயல்படாமல், அமெரிக்காவழி (அதாவது ட்ரம்ப்  அரசின்வழி) சர்வதேச அரசியல் செய்வதாக ஆஸ்திரேலியாவை விமரிசித்தது சீனா. ஆஸ்திரேலியா அலட்டிக்கொள்ளவில்லை. மாறாக, சில வாரங்களில்,  கல்வான் (Galwan) எல்லைச்சண்டை சமயத்தில், இந்திய மகாசமுத்திரம் மற்றும் சுற்று நீர்ப்பரப்பு பாதுகாப்பு தொடர்பாக இந்தியாவுடன் கப்பற்படைகள்- ஒத்துழைப்பு ஒப்பந்தத்தில் கையெழுத்திட்டது. ஏற்கனவே அமெரிக்காவுக்கும், இந்தியாவுக்கும் குறிப்பாக இந்துமகா சமுத்திரப் பகுதிகளில்  நீர்வழிப் போக்குவரத்து, பாதுகாப்பு பற்றிய  புரிதல் இருக்கிறது. பெரிதாக முன் அறிவிப்பு ஏதும் செய்யாமல், சில வாரங்களுக்கு முன் அமைதியாகத் தன் போர்க்கப்பல் ஒன்றை தென்சீனக் கடலுக்கு அனுப்பிவைத்தது இந்தியா. கூடவே சர்வதேச விதிமுறைப்படி,  கடல்வழிப் போக்குவரத்துகள் எல்லா நாடுகளுக்கும் பொதுவானது.  தென்சீனக் கடல்பிராந்தியத்திலும் அது தங்குதடையின்றி நடைபெறவேண்டும் என்பதே இந்தியாவின் நிலைப்பாடு என்றது. சம்பந்தப்பட்ட நாடுகளின் இத்தகைய strategic moves, மூலோபாய நடவடிக்கைகள், அறிக்கைகள் சீன ராணுவ அமைச்சகத்தில் மேலும் புகைச்சலை ஏற்படுத்தியிருக்கின்றன.

அமெரிக்கா, ரஷ்யா போன்ற பேரரசுகளுடன் நேரடி மோதலைத் தவிர்க்கும் சீனா, மற்ற பிராந்திய  நாடுகளோடு அவ்வப்போது மோத நேர்ந்தால் தனக்குப் பரவாயில்லை, பெரிய நஷ்டம் ஒன்றும் வந்துவிடாது என்பதான கணக்குகளுடன் ஆங்காங்கே காயை முன்னகர்த்திவருகிறது. எந்த ஒரு மகா யுத்தமும், முதலில் இப்படிச் சிறு சிறு மோதல்கள், சண்டைகளில்தான் ஆரம்பிக்கும் என மனித சரித்திரம் தெளிவாகக் கூறும். ராணுவ பலத்துடன் முஷ்டியை உயர்த்திவரும் ஷி ஜின்பெங் (Xi Jinpeng), சரித்திரம் படித்தவரல்ல. இனியும் அதையெல்லாம் படிக்க, அவருக்கு நேரமில்லை. கம்யூனிஸ்ட் மேனிஃபெஸ்ட்டோ படித்துத்தான், சீனக் கம்யூனிஸ்ட் கட்சியின் அதிகாரப்பாதையில் முன்னேறி இப்போதிருக்கும் நிலைக்குவந்திருக்கிறார். அதனால் அவருடைய தலைமையில் இயங்கும் சீனா, மேலும் சச்சரவுகள்,  மோதல்கள் என்கிற வகையில் தொல்லைகளைத்தான்  தரும் என எதிர்பார்த்து, தன்னை ராணுவரீதியாக ஆயத்தப்படுத்திக்கொள்ளும் நிலையில் இருக்கிறது  தெற்காசியா.

**

 

அடங்க மறுக்கும் சீனா ?

டிசம்பர் 2019-ல் ஒட்டுமொத்த உலகத்துக்கு எதிராக, தான்தோன்றித்தனமாக, குள்ளநரித்தனமாகக் கிளப்பிவிட்ட வைரஸ் நிழல் யுத்தம், ஹாங்காங் மக்களின்மீதான அடக்குமுறைகள், தைவானுக்கு எதிரான சவால்கள், ராணுவ பயமுறுத்தல்கள், இந்தியாவோடு ஒருபக்கம் பொருளாதார உறவு, மற்றொரு பக்கம் எல்லை அத்துமீறல்கள் என சீனாவின் சமீபகால நடவடிக்கைகள் ஒரு மாதிரியாகப் போய்க்கொண்டிருப்பது வல்லரசு நாடுகளின் தலைவர்களால், பாதுகாப்பு வல்லுநர்களால் உன்னிப்பாகக் கவனிக்கப்பட்டே வருகிறது.  அதற்கு எதிர்சவாலாக, குறிப்பாக அமெரிக்கா, இந்தியா, ஆஸ்திரேலியா, ஜப்பான் போன்ற நாடுகள் சீனாவை மட்டுப்படுத்தும் பொருளாதார நடவடிக்கைகளை மேற்கொண்டுவருகின்றன. சர்வதேச வெளியில்,  யாரும், எதற்கும் நம்ப விரும்பாத, ஆபத்தான  நாடு அது என்கிற நிதர்சனம் பிரும்மாண்டமாக எழுந்து நிற்கிறது. கொரோனா உள்புகுந்து அழித்துவிட்ட வல்லரசுகளின் பொருளாதார அடித்தளத்தை, அதன் கட்டுக்கடங்கா பின் விளைவுகளைத் தனக்கு சாதகமாகப் பயன்படுத்திக்கொண்டு, உலக அரங்கில் ஒரே வல்லரசாக பொங்கி எழுவதற்கான சரியான தருணம் இது என கம்யூனிஸ்ட் சீனாவின் அதிபர் க்‌ஷி ஜின்பிங் (Xi Jinping) நோட்டம்விட்டிருப்பதாகத் தெரிகிறது. தன் வெகுநாள், ரகசிய முயற்சியான  பிராந்திய ‘விஸ்தார’ நோக்குடனான (expansionist motives)  சதித்திட்டங்களை ஒவ்வொன்றாக, வேகமாக அமுல்படுத்துவதற்கு உரிய காலம்  கனிந்துவிட்டது என முடிவுசெய்து காரியங்களை ஆரம்பித்துவருகிறது சீனா. இது எங்கே போய் முடியும் என இப்போதும் எவரும் சரியாகக் கணிக்க இயலாது.

இயற்கைவளம் மிகுந்த தென்சீனக்கடல் பகுதியில் ஃபிலிப்பைன்ஸ், சிங்கப்பூர், மலேஷியா, தைவான், வியட்நாம், ப்ரூனெய் (Brunei) என வரிசையாக ஒவ்வொரு நாட்டோடும் கடல்வழி மோதல்கள், சவால்கள். ட்ரம்ப்பின் அமெரிக்கா ஆவலுடன் இதனை கவனித்துக்கொண்டிருக்கிறது. ஜப்பானும்தான். சமீபத்தில் அமெரிக்க வெளியுறவு மந்திரி மைக் போம்பியோ, சர்வதேச விதிமுறைகளை மீறி, சீனா தென்சீனக் கடலில் தன் இஷ்டத்துக்கு மேய்வதை அனுமதிக்கமாட்டோம் என எச்சரித்திருக்கிறார். அமெரிக்க, ஆஸ்திரேலிய போர்க்கப்பல்களோடு, இப்போது இந்தியக் கடற்படையின் போர்க்கப்பல் ஒன்றும் அங்கு அனுப்பிவைக்கப்பட்டுள்ளது.

இந்தியாவின் வடக்கு, வடகிழக்கு எல்லைப்பகுதிகளில் லடாக்கிலிருந்து அருணாச்சல் வரை சீனா தன் வாலை நீட்டி வைத்திருக்கிறது. 1950-களின் இறுதியில் ‘பஞ்ச்ஷீல்’ கொள்கை, ‘இந்தியா-சீனா பாய்-பாய் (Bhai-Bhai) எனப் பிதற்றிய கோமாளி கோஷங்களில், சீனப் பிரதமர் ஸௌ-என்லாயின் (Zhou-Enlai) தொடர்ந்த பல்லிளிப்பில், பகட்டுகளில் முட்டாள்தனமாக விழுந்து நொறுங்கிய பிரதமர் நேரு, வெளியுறவு மந்திரி கிருஷ்ண மேனன் ஆகியோரின் பலவீனமான இந்தியத் தலைமை, 1962 யுத்தத்திற்குப் பின் இந்தியாவை ஒரு ஏமாளியாக, பலவீனனாக சர்வதேச அரங்கில் காண்பித்திருந்தது. அதன் கடுமையான பின்விளைவுகள் இந்தியாவை இன்னும் விட்டபாடில்லை. 1962 அக்டோபரில், சீனா காண்பித்த கயமைத்தனத்திற்குப் பின், நீண்ட இந்திய எல்லைப்பகுதிகளில் அத்துமீறல்கள் தொடர்ந்து  நீடித்தே வருகின்றன. சீனா எல்லை மீறுவதும், இந்திய எதிர்ப்பும், தடுப்புமுயற்சிகளும்,   அதன்பின்னான இருதரப்பு படைத் துணைத்தளபதிகள்-நிலைப் பேச்சுவார்த்தைகள் ஆரம்பித்துத் தொடர்வதும்,  கடைசியில் அவை ஒன்றுமில்லாமல் போவதும், கடந்த  30 வருடங்களுக்கும் மேலாக ஒரு ராணுவ வழக்கமாக நிகழ்ந்துகொண்டிருக்கிறது.

கல்வான் பள்ளத்தாக்கு (Galwan valley) எல்லைச்சண்டைக்குப்பின், தீவிர பேச்சுவார்த்தைகள் இரு ராணுவத் தரப்பினரிடையே ஆரம்பிக்கப்பட்டு நடந்துவருகின்றன. அமெரிக்கா இந்த விஷயத்தில் சீனாவை எச்சரித்தபோதெல்லாம், ‘இது எங்களுக்குள்ளேயான இருதரப்பு பிரச்னை. நாங்கள் ‘பேசி’த் தீர்த்துக்கொள்வோம்’ என அவ்வப்போது கூறிவருகிறது சீனா. ஆனால் அதன் எல்லை செயல்பாடுகள் நேரெதிரானவை. ஆகஸ்டு 30-ஆம் தேதி மீண்டும் சில இடங்களில் அத்துமீறப் பார்த்தது. இந்த முறை இந்திய ராணுவ வீரர்கள் கணிசமான அளவில், வான்படையின் பின்னணியோடு அங்கு நிறுத்தப்பட்டிருந்ததால், வேறுவழியின்றி சீனா பின் வாங்கியிருக்கிறது. மேலும் இந்த முயற்சிக்குப்பின், இந்திய வீரர்கள் கல்வான் மலைப்பகுதியின் மூலோபாயமான குன்றுகளை வளைத்ததோடு,  அங்கே போய் தயாராக நிலைகொண்டுவிட்டார்கள். இதைச் சற்றும் எதிர்பார்க்காத சீனா, எரிச்சலில் இருக்கிறது!

ஷாங்காய் பாதுகாப்புக் கூட்டமைப்பின் (Shanghai Cooperation Organization) வருடாந்திர கூட்டத்திற்காக ரஷ்யா சென்றிருக்கிறார் இந்திய ராணுவ மந்திரி. மாஸ்கோவில் ரஷ்ய ராணுவ மந்திரியுடன் ஏற்கனவே பேச்சுவார்த்தை நடந்திருக்கிறது. பேச்சுவார்த்தையின்போது இந்தியா கேட்டுக்கொண்டபடி, பாகிஸ்தானுக்கு நவீன ஆயுதங்களை விற்பதில்லை என ரஷ்யா முடிவு செய்திருக்கிறது. இதற்குப்பின் இந்திய-சீன ராணுவ மந்திரிகளும் தங்களது அணியினருடன் சந்தித்துப் பேசியிருக்கிறார்கள். எல்லைப்பிரச்னை நிச்சயம் பேசப்பட்டிருக்கும். விளைவு? பெரிதாக ஒன்றும் சீனாவிடமிருந்து எதிர்பார்ப்பதற்கில்லை.

இந்த நிலையில், தேர்தலை சந்திப்பதில் பிஸியாகிவரும் அமெரிக்க அதிபர் ட்ரம்ப், இந்தியா, சீனாவுக்கிடையே எல்லை நிலைமை மோசமாகிவருகிறது எனக் கூறியிருக்கிறார். இருநாடுகளிடமும் பேசி, ஒத்துழைக்க நாங்கள் தயார் என அறிவிப்பு வேறு!  இது ஒருபுறமிருக்க, அமெரிக்க தேர்தல் சமயத்தில் (நவம்பர் 03, 2020), வாஷிங்டனில் நிகழக்கூடிய அரசியல் குழப்பத்தைப் பயன்படுத்திக்கொண்டு, சீனா, இந்தியாவுக்கு புதிய சவால்களை எல்லையின் பல்வேறுபகுதிகளில் கொடுக்கத் திட்டமிட்டிருக்கலாம். சீனாவின்  அடிவருடி, சம்ச்சா (Chamcha)வான பாகிஸ்தான் மேற்கு எல்லையில் அதே சமயத்தில் தன் விஷமத்தைக் காண்பிக்கும் சாத்தியக்கூறுகள் தெரிகின்றன. இந்திய ராணுவக் கூட்டமைப்பின் தளபதி (CDS), ’எந்தத் தரப்பிலிருந்தும், எத்தகைய சவாலையும் எதிர்கொள்ள இந்திய ராணுவம் தயார்நிலையில் இருக்கிறது’ என சிலநாட்கள் முன்பு கூறியிருப்பது கவனிக்கத்தக்கது.

**

 

மேலும் மேலும் அணு ஆயுதங்கள்

அமெரிக்காவின் பொதுவான ஆதரவை, குறிப்பாக நிதி உதவியை அவசரமாகக் கோரியிருக்கிறது பிரிட்டன். என்ன.. ஏன் ? கொரோனா பிரச்னையில் நாடு நொடித்துவிட்டதா? அவ்வளவுதானா கிரேட் பிரிட்டன்? அமெரிக்க, ஐரோப்பிய நாடுகளின் பொருளாதாரத்திற்கு கொரோனா பெரிய கலக்கத்தைக் கொடுத்திருக்கிறது என்பது ஒருபக்கம் இருக்கட்டும். இது வேற விஷயம். ‘ஐரோப்பியப் பாதுகாப்பு’ என்கிற முகமூடியைப் போட்டுக்கொண்டு அமெரிக்கக் கூட்டாளியான பிரிட்டன் வகுக்கும் புதுவகை ஆயுதத் தயாரிப்புத் திட்டம்.

’கப்பற்படையில் சேர்க்கவென, நவீன அணு ஆயுதம் தயாரிக்கும் முனைப்பில் இருக்கிறோம், நீங்களும் சேர்ந்து கொண்டால் பின்னாளில் ஒட்டுமொத்த ஐரோப்பாவிற்கும் வரவிருக்கும் பேராபத்தை நேட்டோ கூட்டணி (NATO Alliance) சார்பாக சரியாக எதிர்கொள்ளமுடியும்…’ என்கிறது தற்செயலாகக் கசிந்துவிட்ட ஒரு அதிகாரபூர்வக் கடிதத்தின் சாரம். பிரிட்டிஷ் பாதுகாப்பு மந்திரி பென் வாலஸ் (Ben Wallace) தன்னுடைய அமெரிக்க இணைக்கு ரகசியமாக அனுப்பிய அன்பு மடல். அமெரிக்க செனட்காரர்களை (பார்லிமெண்ட் குழு உறுப்பினர்கள்) இப்போது மண்டையைப் பிய்த்துக்கொண்டு உட்காரவைத்திருக்கிறது இது. ஏற்கனவே அமெரிக்க அணு ஆயுதங்கள், வகை, வகையான ஏவுகணைகள் போன்றவற்றின் நவீனமயமாக்கலுக்காக ட்ரம்ப் அரசின் அமெரிக்க பட்ஜெட் திட்டங்கள், 1 ட்ரில்லியன் டாலர்களுக்கு மேல் செல்லும் என எதிர்பார்க்கப்படுகிறது.

W-93 அழைக்கப்படும் இந்த பிரிட்டிஷ்-வகை ரகசிய அணு ஆயுதம்பற்றி கூடுதல் விபரங்கள் வெளிவரவில்லை. அமெரிக்க-சோவியத் பனியுத்த காலத்தில் (Cold War Period) பேசப்பட்டு, தயாரிப்பில் தாமதிக்கப்பட்ட ’டிசைன்’-ஐ மையமாகக் கொண்டது இது என்கிறது ஒரு தகவல். ஏற்கனவே அமெரிக்கக் கப்பற்படையில் பணியிலிருக்கும் ட்ரைடண்ட் 2 (Trident II) ஏவுகணைகளில், ஏகப்பட்ட பட்ஜெட் பணத்தை விழுங்கிவிட்ட அமெரிக்க W-76 நவீன அணுஆயுதங்கள் இணைக்கப்பட்டு, தயார்நிலையில் உள்ளன. அமெரிக்க W-76-ன் அழிக்கும் சக்தி, ஜப்பானின் நாகசாகி, ஹிரோஷிமாவின் மீது அமெரிக்காவினால் 1945-ல் வீசப்பட்ட அணுகுண்டுகளைவிட ஆறு மடங்கு அதிகம் என பாதுகாப்புத்துறை நிபுணர்கள் கூறுகிறார்கள். பிரிட்டன் தயாரிக்கவிருக்கும் W-93, அமெரிக்க W-76-ஐ விடக் கூடுதல் அழிவுசக்தி கொண்டதாக இருக்கும் என்பது நிபுணர்களின் யூகம். இவை விரைவில் தயாரிக்கப்பட்டு, பிரிட்டிஷ் கப்பற்படைக்கான ட்ரைடண்ட் (Trident) வகை ஏவுகணைகளில் வரும் வருடங்களில் பொருத்தப்படவிருக்கிறது.

ஏற்கனவே உலகில் இருக்கும் அணு ஆயுதங்களில் 85%-க்கும் மேலானவை, சூப்பர் வல்லரசுகளான அமெரிக்கா, ரஷ்யாவின் கைவசம் இருக்கின்றன. பிரிட்டன், சீனா, இந்தியா, ஃப்ரான்ஸ், பாகிஸ்தான், இஸ்ரேல், வடகொரியா ஆகிய நாடுகளில் மீதமுள்ள 15% அணு ஆயுதங்கள் உள்ளதாக மதிப்பிடப்பட்டுள்ளது. ஏதாவது ஒரு பெரிய யுத்தம் நடந்து, அதில் தற்செயலாக ஓரிரண்டு நவீன அணுஆயுதங்கள் வீசப்பட்டாலே போதும், அந்தப் பிரதேசமே அழிந்துவிடும். மீண்டு நிமிர்ந்து எழ பல வருடங்கள் ஆகும். அதுவரை அங்கே புல்கூட முளைக்காது. இப்படிப்பட்டப் பேரழிவு ஆயுதங்களை (அணு ஆயுதங்கள், கண்டம் விட்டுக் கண்டம் பாயும் ஏவுகணைகள் போன்றவை) விதம்விதமாகத் தொடர்ந்து தயாரிக்க, மேம்படுத்த ரகசிய முயற்சிகள் நடந்துகொண்டேதான் இருக்கின்றன. இடையிடையே ’அணுஆயுதத்தைக் குறைப்போம், உலக அமைதியைக் காப்போம்’ எனச் சொல்லிக்கொண்டு அணு ஆயுதக் குறைப்பு ஒப்பந்தம் (START -Strategic Arms Reduction Talks) என்கிற பாதுகாப்பு ஒப்பந்தம் அமெரிக்கா, ரஷ்யாவுக்கிடையே அவ்வப்போது கையெழுத்திடப்படுகின்றது.

ஒப்பந்தத்தில் கையெழுத்திடும் ஒபாமா, மெட்வடேவ்

தற்பொழுது நடப்பில் இருக்கும் அணுஆயுதக் குறைப்பு ஒப்பந்தம் (New START Treaty) முன்னாள் அமெரிக்க ஜனாதிபதி பாரக் ஒபாமா (Barack Obama) மற்றும் ரஷ்ய அதிபர் த்மித்ரி மெட்வடேவ் (Dmitry Medvedev) ஆகியோரால் 5 பிப்ரவரி 2011-ல் கையெழுத்திடப்பட்டது.5 பிப்ரவரி 2021-ல் முடிவுக்கு வரும். இந்த ஒப்பந்தம் இரு நாடுகளும் மேற்கொண்டு பேரழிவு ஆயுதங்களை ராணுவப்பணியில் அமர்த்துவதைத் தவிர்க்கிறது. இந்த ஒப்பந்தம் இரு நாடுகளும் 1550 அணுஆயுதங்களைத் தன் ராணுவம் பயன்படுத்த அனுமதிக்கிறது. அதற்குமேல் போகக்கூடாதாம். அடடா, என்ன ஒரு முன் ஜாக்ரதையான பாதுகாப்பு உணர்வு!

கொரோனாவின் கைங்கர்யம் காரணமாக, அமெரிக்காவில் அதிபர் ட்ரம்ப்பின் பொதுமக்கள் ஆதரவு வெகுவாகக் குறைந்து வருகிறது. போகிறபோக்கைப் பார்த்தால், 2021-ல் வாஷிங்டனில் ஜோ பிடென் (Joe Biden) ஜனாதிபதியாக உட்கார்ந்திருப்பார் எனத் தோன்றுகிறது. அவருக்கும் ரஷ்ய அதிபர் வ்ளாடிமிர் புடினுக்கும் (Vladimir Putin) இடையே மேற்கொண்டு இன்னொரு ஒப்பந்தத்திற்காகத் தீவிரப் பேச்சுவார்த்தை நடக்கும். ஏதேதோ பேசி, ஒரு முடிவுக்கு வந்து, கையெழுத்திடுவார்கள். ஆனால், மற்றொரு பக்கம் மேலும் மேலும் அணுஆயுதங்கள் ஏதோ ஒரு வடிவில் ரகசியமாகத் தயார் செய்யப்பட்டுக்கொண்டுதான் இருக்கும். எந்த ஒரு அணுஆயுத நாடும் இன்னொரு நாட்டை இந்த விஷயத்தில் நம்பத் தயாராக இல்லை. அறிந்தும் தவிர்க்கமுடியாதது போலாகி அழிவை நோக்கி, போட்டி போட்டுக்கொண்டு உலகை நகர்த்திவருகிறார்கள் நாடுகளை ஆள்பவர்கள். எத்தனைதான் தாங்கும் இந்த உலகமும்?

**

ஐ.நா.வுக்கான இந்திய தூதர் டி.எஸ். திருமூர்த்தி

நியூயார்க்கைத் தலைமையகமாகக் கொண்ட ஐக்கியநாடுகள் சபையின் ’நிரந்தர இந்தியப் பிரதிநிதி’யாக (Permanent Representative of India to the UN) (ஐ.நா.வுக்கான இந்திய தூதர்),  இந்திய வெளியுறவுத்துறை உயர் அதிகாரியான திரு. டி.எஸ்.திருமூர்த்தி மத்திய அரசினால் நியமிக்கப்பட்டு பணியில் சேர்ந்துள்ளார். மத்திய அரசில் பணிபுரியும் தமிழ்நாட்டைச் சேர்ந்த தலைசிறந்த வெளியுறவுத்துறை அதிகாரிகள் சிலரில் ஒருவர். ஏற்கனவே அப்படிப் பணியாற்றிய ஒருவர்தான் இன்று இந்தியாவின் வெளியுறவு அமைச்சர் – டாக்டர் ஜெய்ஷங்கர்!

இந்திய தூதர் திரு. திருமூர்த்தி

பிரதமர் நரசிம்மராவின் ஆட்சியில், மத்தியகிழக்கில் பாலஸ்தீனத்துடனான வெளியுறவு மேம்படுத்தப்பட்டபோது,  இந்திய தூதராலயம் அங்கு 1996-ல் திறக்கப்பட்டது. அதன் முதல் இந்தியப் பிரதிநிதியாக(1996-98) பாலஸ்தீனிய தலைநகர் காஸா (Gaza)வில் பணியாற்றியிருக்கிறார் இவர். டெல்லியில் வெளியுறவு அமைச்சகத்தில், ஆரம்பத்தில் பூடான் தொடர்பாகவும், பின்னர் பங்களாதேஷ், ஸ்ரீலங்கா, மாலத்தீவுகள் சார்ந்த துறைக்குத் தலைமை வகித்தும் பணியாற்றியுள்ளார். மலேஷியாவில் இந்தியாவின் ஹைகமிஷனராக (தூதுவராக) ஐந்து வருடங்கள்(2013-18) சீரிய பணியாற்றிய பெருமையும் உண்டு. பதவிக்காலம் முடிந்து இந்தியா திரும்பியதும் வெளியுறவுத்துறையில் உயர்பொறுப்புகளில் ஒன்றான ‘செயலர்(பொருளியல் உறவுகள்) (Secretary (Economic Relations) -ஆக பணியாற்றியபின், மோதி அரசு ஐநா-வில் இந்தியாவின் தூதராக திரு. திருமூர்த்தியை நியமித்துள்ளது.

உயர் செயல்திறன், நளினம், மேன்மை என்கிற விரும்பத்தகுந்த குணாதிசயங்களோடு, பழகுவதற்கு மிக இனிமையானவராக, மென்மையானவராக அறியப்படுபவர் அம்பாஸடர் திருமூர்த்தி. தனது அலுவலகப் பயணங்கள், பணி நெருக்கடிகளைத் தாண்டியும், இளநிலையில் உள்ளோரின் குறைதீர்க்க அவர்களை அவ்வப்போது சந்தித்துப் பேசியவர். இந்தியாவிலும், வெளிநாட்டிலும் துறை ரீதியாகப் பலருக்கும் தகுந்த சமயத்தில் உதவிய உன்னத உள்ளம் கொண்ட மனிதர்.

ஐ.நா.விற்கான இந்திய தூதராகப் பதவி ஏற்றுக்கொண்டபின், ’ஐ.நா.வின் சர்வதேச அமைதிப்படை நாள்’-ஐ (மே 29) முன்னிட்டு அவர் வெளியிட்ட செய்தியில்,  ஐ.நா.வின் சர்வதேச அமைதிப் படையில் (UN Peacekeeping Force), பலவருடங்களாக இந்தியாவின் மகத்தான பங்கு குறித்துப் பேசியிருக்கிறார். ”இந்திய அமைதிப்படையினர் (Indian Peace Keeping Force (IPKF)) உலகின் பல்வேறு சவாலான, நெருக்கடியான பகுதிகளில் போர்நிறுத்தம்,  அமைதிக்காகக் கடுமையாக உழைப்பவர்கள். வீரத்திற்கும், தன்னலம் கருதாத் தியாகத்திற்கும் பேர்போனவர்கள். உலகின் அமைதிப்படையினரிடையே, மற்றநாடுகளைவிட இந்தியாதான் அதிக உயிர்த்தியாகங்கள் செய்திருக்கிறது என்பதைக் கவனத்தில் கொள்ளவேண்டும்” எனக் குறிப்பிட்டார். சர்வதேச அமைதிக்காகப் போரிட்டு, தங்கள் இன்னுயிரைத் தியாகம் செய்த இந்திய மாவீரர்களுக்கு அப்போது உருக்கமாக அஞ்சலி செலுத்தினார் இந்திய தூதர் திருமூர்த்தி.

2018-ல் பிரதமர் மோதியின் வருகையின்போது, தென்னாப்பிரிக்காவுடனான ‘விண்வெளி ஒத்துழைப்பு ஒப்பந்தத்தில்’ இந்தியாவின் தரப்பில் கையொப்பம் இடும் திரு. திருமூர்த்தி

சமீபத்தில், ஐ.நா.வின் சர்வதேச ஒத்துழைப்பு, மேம்பாட்டுத் திட்டத்தின் வருடாந்திரக் கூட்டத்தில் பேசுகையில்,  “கொரோனாவைரஸ் பரவலால் உலகெங்கும் பல்வேறு வகை மக்கள், குறிப்பாக சமூகத்தின் அடித்தட்டைச் சேர்ந்தவர்கள் மிகவும் பாதிக்கப்பட்டுள்ளனர். சுகாதாரப் பிரச்னை எங்கும் ஒரு பெரும் பொருளாதார நெருக்கடியாகவும் உருவெடுத்துள்ளது. இந்தியாவில் பாதிக்கப்பட்டோருக்கு நேரடியாக விரைந்து உதவுவதில், டிஜிட்டல் தொழில்நுட்பம் வெகுவாகக் கைகொடுத்திருக்கிறது. டிஜிட்டல் தொழில்நுட்பத்தின் மகத்துவத்தை கொரோனா நமக்குக் காட்டியிருக்கிறது. மக்கள்நலத் திட்டங்கள் அனைத்திலும் டிஜிட்டல் தொழில்நுட்பம் இந்தியாவில் இப்போது தீவிரமாகப் பயன்படுத்தப்பட்டுவருகிறது. கொரோனா வைரஸால் பாதிக்கப்பட்டிருக்கும் உலக நாடுகள் பலவற்றிற்கு, சர்வதேசவெளியில் ஒரு பொறுப்புமிகு நாடாக இந்தியா மருத்துவ, உபகரண ஏற்றுமதி மற்றும் கொரோனா-தகவல் பரிமாற்றம் என தக்கநேரத்தில் பல உதவிகளைச் செய்திருக்கிறது” என்று ஐ.நா. சபையின் கவனத்துக்குக் கொண்டுவந்து பேசியிருக்கிறார் இந்திய தூதர்.

தாய்நாட்டின் சிறப்பு, பெருமையை நிலைநாட்டும்விதமாக, அதன் மென்னுணர்வுகளை சர்வதேச ராஜீயவெளியில் தகுந்தவிதமாக வெளிக்கொணர்ந்து இந்திய நலனைப் பாதுகாக்கும் வகையில், ஐ.நா.வில் நமது நாட்டின் தூதராக சிறப்பான பங்களிப்பை அவர் அளிப்பார் என்பதில் ஐயமேதுமில்லை

திருமூர்த்தி ஒரு எழுத்தாளரும்கூட. அவருடைய முதல் ஆங்கில நாவல் ‘Clive Avenue’ (2004)  Penguin India-வினால் பிரசுரிக்கப்பட்டது. ’கைலாஷ்-மானசரோவர் யாத்திரை’ பற்றிய பயணக் கட்டுரை நூலையும் எழுதி வெளியிட்டுள்ளார். இவரது மனைவி கௌரி கிருஷ்ணன்-திருமூர்த்தி, புகழ்பெற்ற அந்நாளைய இந்திய டென்னிஸ் ஜாம்பவான் ராமனாதன் கிருஷ்ணனின் மகள். 1982-ல் கௌரி கிருஷ்ணன் இந்திய தேசீய ஜூனியர் பேட்மிண்ட்டன் டைட்டிலை வென்றிருக்கிறார்.

ஒரு சிறு காலகட்டத்தில் ஸ்விட்ஸர்லந்தின் ஜெனீவாவில் உள்ள இந்திய தூதரகத்தில், அவரோடு இளநிலையில் பணிபுரியும் வாய்ப்பு கிடைத்ததை, கொஞ்சம் பழகநேர்ந்ததை மகிழ்வோடு நினைத்துப்பார்த்துக்கொள்கிறேன்.

**

சீனர்களுக்கு துறைமுக ’இறங்கல் அனுமதி’: இந்தியா மறுப்பு

இந்தியத் துறைமுகங்கள்
கோவிட்-19 தொற்றுநோய் ஆரம்பித்து பரவிக்கொண்டிருக்கையில், குறிப்பாக ஜனவரி 27 முதல் ஏப்ரல் 30 வரை, 1990 அந்நிய வர்த்தகக் கப்பல்கள் (பெரும்பாலானவை சீனாவிலிருந்து) இந்தியத் துறைமுகங்களில் நங்கூரம் பாய்ச்ச முயன்றுள்ளன. அவற்றில் அதிகாரபூர்வ ஏற்றுமதி/இறக்குமதிகளுக்காக என, 1621 கப்பல்கள் மட்டுமே அனுமதிக்கப்பட்டு, மற்றவை இந்தியாவால் திருப்பிவிடப்பட்டிருக்கின்றன. அனுமதிக்கப்பட்ட வர்த்தகக் கப்பல்களில் இருந்த சீன மற்றும் இதரநாட்டு மாலுமிகள், கப்பல்களின் ஊழியர்களுக்கு கொரோனா தொடர்பான சோதனைகள் இந்திய சுகாதார அதிகாரிகளால் நடத்தப்பட்டுத் தெளிவான பின்னரே, பொருட்களை இறக்க, ஏற்றிக்கொள்ள துறைமுக அதிகாரிகள் அனுமதி தந்திருக்கிறார்கள்.

இத்தகைய வர்த்தகக் கப்பல்கள் ஒன்றிரண்டு வாரங்கள் துறைமுகங்களில் நின்று காற்றுவாங்குவதுண்டு. வழக்கமாகக் கப்பலில் வருபவர்கள் அந்தக் கால அவகாசத்தைப் பயன்படுத்தி இறங்கி உள்ளே வருவதற்காகத் தரப்படும், ’துறைமுக அனுமதிச்சீட்டுகள்’ இந்தமுறை இந்தியத் துறைமுக அதிகாரிகளால் மறுக்கப்பட்டுவிட்டன. இந்திய கப்பல்போக்குவரத்து அமைச்சகத்தின் கடும் நடவடிக்கைகள் காரணமாக, சீனக்கப்பல்களின் மாலுமிகள், ஊழியர்கள் மற்றும் இதர பயணிகள், இந்தியத் துறைமுகங்களில் இறங்கி காலாற ஊர்சுற்றிப் பார்க்க, உல்லாசம் அனுபவிக்க, முடியவில்லை. ’வேகமாக சாமான்களை இறக்கு, ஏற்று, ஓடு!’ என்பதே கடைப்பிடிக்கப்பட்ட நடைமுறை.

’துறைமுக இறங்கல் அனுமதிச்சீட்டு’ வழங்கப்பட்டிருந்தால், இந்தக் கப்பல்களில் வந்திருந்த மொத்தம் 62,948 பேர் (பெரும்பாலானோர் சீனர்கள்), தமிழ்நாட்டின் துறைமுகங்கள் உட்பட, 12 முக்கிய இந்தியத் துறைமுகங்களில் இறங்கி ஊருக்குள்ளும் சென்று ஆனந்தமாக உலவியிருப்பார்கள்! உயிர்வாங்கி கொரோனாவின் தொற்றுப் பரவல் நாட்டில் மேலும் அதிகரித்துவிடாதபடி, இந்திய கப்பல் போக்குவரத்து அமைச்சகம் இந்த முன்னெச்சரிக்கை நடவடிக்கைகளை எடுக்கவேண்டிவந்தது.

**

சீனாவுக்கெதிரான சர்வதேசப் புகைச்சல்கள்

உயிர்க்கொல்லி வைரஸைக் கிளப்பிவிட்டு, தனது உலகளாவிய ஆதிக்க முயற்சிக்கு சவாலாக இருந்துவந்த வல்லரசுகளைச் சாய்த்துப் படுக்கவைத்தாகிவிட்டது, ’இவர்கள் எழுந்து நிற்பதற்குள் நாம் நமது ரகசிய ஏகாதிபத்திய இலக்குகளை நோக்கி ஜாலியாக நடைபோடலாம். உலகில் இனி நம்ம ராஜ்யம்தான்’ என செஞ்சீனா கனவு காண ஆரம்பித்திருந்தால், அது பகல்கனவாகத்தான் போய் முடியும் என்பதற்கான அறிகுறிகள் சர்வதேச வெளியில் தெரிய ஆரம்பித்திருக்கின்றன.

கொரோனா எனும் தீநுண்மியின் கோரத் தாக்குதலால், உலகம் ஆடித்தான்போய்விட்டது. எழுகின்ற பேச்சையே காணோம். அமெரிக்கா, பிரிட்டன், ஃப்ரான்ஸ், ஜெர்மனி, இத்தாலி மற்றும் ஜப்பான், தென்கொரியா, ரஷ்யா போன்ற பொருளாதார சக்திவாய்ந்த நாடுகள் குப்புற விழுந்துகிடக்கின்றன. தீநுண்மியின் பாதிப்பிலிருந்து விரைந்து மீண்டதாலும், தொழிற்சாலைகளையும் திறந்து உற்பத்திகளை மீண்டும் ஆரம்பித்துவிட்டதாலும், இப்போதைக்கு சீனப் பொருளாதாரம் மட்டும்தான் தாக்குப்பிடிக்கும் நிலையில் உள்ளது.

அமெரிக்காவிலும் மற்றும் மேலைநாட்டு சமூகங்களிலும் காணப்படாத, இந்தியாவின் நேர்மறைசக்திகளான சமூக, வாழ்வியல் வழிமுறைகள், தலைபோகும் பிரச்னை வந்தாலும் மற்ற நாட்டு மக்களைப்போல் பதறிச் செத்துவிடாமல், இந்திய மக்களின் தத்வார்த்தமான சிந்தனைப்போக்கு, பிரச்னைகளை எதிர்கொள்ளும் மனோபலம், அதீத சகிப்புத்தன்மை, மேலும் ‘ஆத்மநிர்பர்’ எனப்படும் ’self-reliant’ பொருளாதாரக்கூறுகள் பற்றிய கூரிய அவதானிப்பும், கூடவே பயமும் சீனாவுக்கு எப்போதும் உண்டு. ஆனால் காட்டிக்கொள்வதில்லை. இந்த நிலையில், உலகெங்கும் பரவியிருக்கும் கொரோனா சீரழிவுபற்றிக் கூறுகையில், ‘இந்தியா இந்தப் பிரச்னையை சமாளித்து மீண்டுவரும் தன்மை கொண்ட நாடு’ என்றிருக்கிறது சீனா. கூடவே, வைரஸ் பரவல் தொடர்பாக, மற்ற நாடுகளோடு சேர்ந்துகொண்டு, சீனாவைக் குறைசொல்ல, விமரிசிக்கவேண்டாம் என்றும் இந்தியாவைக் கேட்டுகொண்டிருக்கிறது!

அமெரிக்க ஜனாதிபதி டொனால்ட் ட்ரம்ப், கொரோனாவின் ‘பிறந்தகம்’ வுஹான் சோதனைச்சாலைதான் என ஆரம்பத்திலிருந்தே வலியுறுத்தி வருகிறார். உலகெங்குமான நோய்த்தொற்றுக்கு, சீரழிவிற்கு சீனாதான் காரணம் என்பதே அவரது வாதம். அமெரிக்காவின் இந்த சீன எதிர்ப்புக்கு மேலைநாடுகள் நேரடியாக ஒத்துழைப்பு தருகின்றன. குறிப்பாக அமெரிக்காவின் பிரதான கூட்டாளியான பிரிட்டன், இந்தப் பிரச்னை ஒருவழியாகக் கட்டுக்குள் வரட்டும், பிறகு சீனாவை ’கவனிப்போம்’ என்றிருக்கிறது! பொதுவாகவே சீனாவை விமரிசனக் கண்ணோட்டத்துடன் பார்க்கும் நாடு ஜப்பான். சரித்திரம் அப்படி. கடந்தகால பகைமையை எளிதில் மறந்துவிடும் நாடல்ல அது. கொரோனா பூகம்பத்தினால் கடும் கொந்தளிப்பில் இருக்கிறது. தங்களது பெருவணிகக் குழுமங்கள் (டொயோட்டா, நிஸான், ஹோண்டா, ஸுஸுகி, சோனி, பானஸானிக், தோஷிபா, நிப்பான், சான்யோ, டோக்கொமோ(Docomo) போன்ற பல) சீனாவிலிருந்து உடனே வெளியேறவேண்டும் என அறிவுறுத்தியிருக்கிறது ஷின்ஸோ அபே (Shinzo Abe)யின் தலைமையிலான ஜப்பானிய அரசு. இந்த ‘வெளியேறுதலுக்கான’ நஷ்டத்தில் பெருமளவை ஜப்பானிய அரசு தருவதாக அறிவித்தும்விட்டது. ’’ஜப்பானுக்கே எல்லா உற்பத்தித் தொழிற்சாலைகளையும் மாற்றவேண்டும் என நாங்கள் சொல்லவில்லை. முதலில் சீனாவிலிருந்து உங்கள் ‘கடை’யைத் தூக்குங்கள். ’புதுக்கடைகளை’த் திறக்க, ஆசியாவிலேயே நிறைய வாய்ப்புகள் காத்திருக்கின்றன’’ என்கிறார் அபே. அவர் குறிப்பிட்ட வர்த்தக-சாதகமான நாடுகள் பட்டியலில் இந்தியா, தாய்லாந்து, வியட்நாம், இந்தோனேஷியா ஆகியவை அடங்கும்.

தென்சீனக் கடலில் சீனாவோடு பிரச்னைகள், ஆஸ்திரேலியப் பெருநிறுவனங்களின் பங்குகளை அழுத்தம்கொடுத்து மலிவு விலையில் வாங்கி, ஆஸ்திரேலியப் பொருளாதாரத்தில் ஆதிக்கம் செலுத்த முயற்சிக்கும் சீனாவின் தில்லுமுல்லுத் திட்டங்கள் ஆகியவை, ஆஸ்திரேலியாவுக்குப் புதுத் தலைவலியாக மாறியுள்ளன. சீனர்களுக்கு எதிரான கோஷங்கள் ஆஸ்திரேலியாவின் பொது வெளியிலே கேட்கத் துவங்கியுள்ளன. ஆஸ்திரேலிய பிரதமர் ஸ்காட் மாரிஸன் ‘கொரோனா நெருக்கடி’ தொடர்பாக பிரிட்டன், ஃப்ரான்ஸ், இத்தாலி, ஜெர்மனி, ஜப்பான், தென்கொரியா நாடுகளின் தலைவர்களுக்கு எழுதியிருக்கிறார். இந்த தீநுண்மி சீனாவிலிருந்துதான் வந்ததா இல்லையா என விஜாரிக்க, சர்வதேச கமிஷன் அமைக்கப்படவேண்டும் என்பது ஆஸ்திரேலியாவின் கோரிக்கை. கடுப்பான சீனா, அமெரிக்க அரசியல்வாதிகள் சிலரின் சீன-எதிர்ப்பு சிந்தனைக்கு ஆஸ்திரேலியா ஒத்து ஊதுவதாக விமரிசித்துள்ளது. ஆஸ்திரேலியாவைத் ’தண்டிக்கும்’ வகையில், அங்கிருந்தான முக்கிய இறக்குமதிகள் சிலவற்றிற்குத் (மாட்டிறைச்சி, பார்லி) தடைகளையும் விதித்து, ஆஸ்திரேலியப் பெருவணிகக் களத்தில் சலசலப்பை ஏற்படுத்தியிருக்கிறது சீனா. ஆஸ்திரேலிய வர்த்தக மந்திரி இதுகுறித்துப் பேச ஃபோன் போடுகையில், சீன வர்த்தக மந்திரி ஃபோனை எடுக்கவில்லையாம்! ’இந்த வர்த்தக அழுத்தமெல்லாம் எங்களிடம் எடுபடாது. மசியமாட்டோம்’ என இரண்டு நாட்கள் முன்பு சீறியிருக்கிறது ஆஸ்திரேலியா.

தன் நாட்டில் தொற்றுப்பரவலைக் கட்டுப்படுத்த இயலாமல் திணறும் அமெரிக்கா, சீனாவுக்கெதிராக தினம்தினம் கொதித்துக்கொண்டிருக்கிறது. சமீபத்தில் பத்திரிக்கையாளர் சந்திப்பில் அதிபர் ட்ரம்ப்: ”சீனாவுடன் சில மாதங்கள் முன்புதான் வர்த்தக ஒப்பந்தம் செய்தோம். அதற்குள் இது (தீநுண்மி கொரோனா) வந்துவிட்டது சீனாவிலிருந்து! தங்கள் நாட்டைத் தாண்டிப் பரவாமல், சீனா இதனைத் தடுத்திருக்கவேண்டும். ஏனோ செய்யவில்லை. உலகின் 186 நாடுகள் கடுமையாக பாதிக்கப்பட்டுள்ளன. ரஷ்யாவும் இப்போது பாதிக்கப்பட்டுள்ளது. ஃப்ரான்ஸ் பாதிக்கப்பட்டுள்ளது.. ஒவ்வொரு நாடாகப் பாருங்கள். ‘பாதிக்கப்பட்டுள்ளது’ என்றோ ’தொற்று பரவியுள்ளது’ என்றோ நீங்களே சொல்லிக்கொள்ளுங்கள்..!” என்று கிண்டல்தொனிக்கும் தொனியில் கூறியிருக்கிறார். ’சீன அதிபர் க்ஸி ஜின்பிங் (Xi Jinping) -உடன் பேசுவீர்களா?’ – என்ற கேள்விக்கு, சுற்றிவளைத்துப் பேசத் தெரியாத ட்ரம்ப், ‘நான் அவருடன் இப்போது பேச விரும்பவில்லை!” என்றார்.

இதற்கிடையே கொரோனா பரவல் தொடர்பான ஆராய்ச்சித் தகவல்களை (research data) சீன ’ஹேக்கர்கள்’ திருடிவிட்டதாக அமெரிக்கா குற்றம் சாட்டியுள்ளது. செமி-கண்டக்டர் தொழில்நுட்பப் பரிமாற்றம், வர்த்தகத்தில் சீனப் பெருவணிக நிறுவனமான ஹுவாவே (Huawei) அமெரிக்கத் தொழில்நுட்பத்தையே கையாண்டு தன்னாதிக்கம் செலுத்தமுற்படுவதாக, அதன் செயல்பாடுகளுக்குத் தடைகளை சிலநாட்கள் முன்பு விதித்துள்ளது. சீனாவுக்கு ஏகப்பட்ட எரிச்சல். இத்தகு குழப்பமிகு பின்னணியில், அமெரிக்க-சீன ராஜீய உறவில் இறுக்கம் நாளுக்குநாள் எகிறுகிறது. எண்பதுகளுக்கு முன்னால், அமெரிக்கா-சோவியத் யூனியனிடையே காணப்பட்ட ’பனிப்போரின்’(Cold War) தடயங்கள் தூரத்தில் தெரிய ஆரம்பிக்கின்றன. ஜப்பானும், ஜெர்மனி, ஆஸ்திரேலியாவும் சீனாவுடன் முறுக்கிக்கொண்டுவிட்டன. பிரிட்டன் ஏதோ திட்டம் வகுக்கும் நிலையில் உள்ளது. இன்னும் என்னென்ன நிகழவிருக்கிறதோ .. பார்ப்போம்.

**

Covid-19: சீனாவுக்கு ஒத்து ஊதும் WHO

இரண்டாம் உலகப்போருக்குப் பின் 1948-ல் நிறுவப்பட்ட, ஐ.நா.வுக்குக் கீழ்வரும் சர்வதேச அமைப்பான உலக சுகாதார நிறுவனம் (World Health Organization), சமீப காலமாகக் கடும் விமரிசனத்திற்கு ஆளாகிவருகிறது. சென்ற வருட இறுதியில் சீனாவின் வுஹான் நகரில் கொரோனா வைரஸ் வெடித்த நிலையிலிருந்து இதுநாள் வரை தன் செயல்பாடுகள், அறிக்கைகளால் குழப்பி, ஏற்கனவே தாங்கமுடியாத நோய்த்தாக்கம், உயிரிழப்பினால் தத்தளிக்கும் நாடுகளுக்கு, குறிப்பாக வல்லரசு நாடுகளுக்குக் கடுப்பை ஏற்றிவருகிறது. 1918 ஸ்பேனிஷ் காய்ச்சலிற்குப் (The Spanish Flu of 1918) பிறகான உலகின் பெரும் உயிர்க்கொல்லியாக மாறிவரும் தொற்றுநோயின் அசுரவேகப் பரவலின்போது, அது சம்பந்தமான தகவல்களை ஆரம்பத்திலிருந்தே சரியாக வெளிப்படுத்தாதிருந்தது, மூடிமறைத்தல், நோய்த்தொற்றைக் கட்டுப்படுத்துதல் சம்பந்தமாக சீனாவுக்கு சாதகமாகப் பேசிவருதல் எனத் தொடர் சர்ச்சைக்குள்ளாகிவருகிறது இந்த உலக நிறுவனம்.

WHO Secretary General Tedros
இந்தச் சர்ச்சையின் மையப்புள்ளி உலக சுகாதார நிறுவனத்தின் டெட்ரோஸ் என சுருக்கமாக அழைக்கப்படும் டெட்ரோஸ் ஆதனோம் கெப்ரெயெஸஸ் (Tedros Adhanom Ghebreyesus ). நிறுவனத்தின் செகரெட்டரி-ஜெனரல். மேற்கு ஆப்பிரிக்க நாடான எத்தியோப்பியாவின் முன்னாள் வெளியுறவு அமைச்சராகவும், சுகாதார அமைச்சராகவும் இருந்தவர். 2017-ல் இவர் இந்தப் பொறுப்பிற்கு வந்தபோதே சர்ச்சைகள் தலையைக் காட்டின. ஒரு கொடுங்கோல் ஆட்சியில் மந்திரியாக இருந்த இந்த ஆளுக்கு, உலக சுகாதாரத்தைப்பற்றி என்ன தெரியும் என மேற்கத்திய நாடுகள் முறைத்தன. இந்தப் பதவிக்கான தேர்தலில் இவரை எதிர்த்து நின்றவர் ஒரு தேர்ந்த பிரிட்டிஷ் டாக்டர். இருந்தும், எத்தியோப்பியா-சீனா இடையில் வலுவான இருதரப்பு உறவுகள் ஏற்பட்ட நிலையில், சீனாவின் செல்லப்பிள்ளையான டெட்ரோஸ், சீன ஆதரவுப்பின்னணியில், ஆசிய, ஆப்பிரிக்க நாடுகளின் ஓட்டுகளை வசப்படுத்திக்கொண்டு WHO-வின் தலைமைப் பொறுப்பிற்கு வந்தார். உலகே எரிச்சலுடன் சீனாவைப் பார்க்கும் இந்நிலையில், சீனாவின் பழைய உதவிக்கு விசுவாசம் காட்டவேண்டிய நிலையில் இருக்கிறாரா டெட்ரோஸ்?

நவம்பர் இறுதி-டிசம்பர் 2019 ஆரம்பத்திலிருந்து நடந்த சில நிகழ்வுகள் உலக சுகாதார நிறுவனத்தின் செயல்பாடுகளைக் கேள்விக்குறியாக்கிவிட்டன. பயங்கரமான ஒரு தொற்றுநோய்பற்றி உலகத்தை சரியான நேரத்தில் எச்சரிப்பதற்கு பதிலாக, WHO சீனாவின் பேச்சைக்கேட்டு, சர்வதேச வெளியில் அதற்கு ஒத்து ஊதிக்கொண்டிருந்தது. கொரோனா தாக்குதலை முதலில் வுகான் நகரில் அனுபவித்த சீனா, அதுபற்றிய செய்தியை நைஸாக அமுக்கிவிடப் பார்த்தது. (ஆச்சரியப்பட ஏதுமில்லை. சீனா ஒரு கம்யூனிஸ்ட் நாடு. கம்யூனிச ஆட்சியில் அரசு சார்ந்த ரகசியம், அதனைப் பாதுகாப்பது, அதற்காக எந்தவழியையும் மேற்கொள்வது என்பதெல்லாம்தான் முக்கியம். கருத்துச் சுதந்திரம் என்று வாயைத் திறந்தால், வாய் கிழிந்துவிடும் சீனாவில். சம்பந்தப்பட்ட அப்பாவிகள் ’காணாமல்’ போய்விடுவார்கள். (தமிழக அரைவேக்காட்டு படிப்பாளிகளுக்கு, அறிவுசீவிகளுக்கு இதெல்லாம் புரியவர நாளாகும்). தன்னுடைய டாக்டர்கள் 8 பேரை-அவர்கள் அதுபற்றி தங்களிடையே(!) பேசிக்கொண்டதை உளவுபார்த்து, பிடித்து உடனே உள்ளே தள்ளியது சீனா. அதில் முதலில் விசில் அடித்தவரை மேலுலகத்திற்கு அனுப்பிவிட்டது சீனா. டிசம்பர் 2019 கடைசி வாரத்தில் சீனாவின் வுஹான் நகரில் ஏதோ பயங்கரம் நடக்கிறது என்கிற தகவல் வெளி உலகிலும் கசிந்தது. அமெரிக்கா, பிரிட்டன், ஜப்பான் போன்ற நாடுகள் கவனிக்க ஆரம்பித்தன. உலக சுகாதார நிறுவனம் இதுபற்றித் தெரிந்துகொண்டபின், சீனாவுடன் தொடர்பில் வந்தது. வுஹான் நகருக்கு தனது டாக்டர்கள் அணியை அனுப்ப WHO விருப்பம் தெரிவித்தது. இந்தக் கட்டம்வரை WHO-வின் செயல்பாடு, சற்றே தாமதமாகியிருந்தாலும், சரிதான்.

WHO-வின் கோரிக்கையைக் கேட்டு சீனா அரண்டது. வெளி உலகத்துக்கு மணி அடித்துச் சொன்னதாக ஆகிவிடுமே! WHO நிபுணர் குழு வுஹானுக்கு வந்து ’பார்க்க’, சீனா அனுமதி தரவில்லை. வெளி உலகம் அலர்ட் ஆனது. WHO-வின் கோரிக்கை நியாயமானதுதானே. சீனா ஏன் அனுமதிக்கவில்லை? என்ன நடக்கிறது அங்கே? வல்லரசு நாடுகளோடு மற்றவைகளும் முணுமுணுக்க ஆரம்பித்தன.

ஒரு ’ராணுவ ஸ்டைல் லாக்-டவுன்’ வுஹானைக் கட்டுக்குள் கொண்டுவந்தது. (அதாவது வாயைத் திறப்பவர்களைக் கிழித்து, அடைக்கவேண்டியவர்களை அடைத்து, ஒழுங்குபடுத்தவேண்டியவர்களை ‘ஒழுங்கு’படுத்தி துரிதமாக காரியத்தில் ஈடுபட்டுக்கொண்டிருந்தது சீன அரசு. உலக நாடுகள் சந்தேகிக்க ஆரம்பிக்க, திடுக்கிட்டது. (சீனாவுக்கு விஷமம் செய்வது முக்கியம். கூடவே இப்போதெல்லாம், தன் ‘இமேஜ்’ பற்றியும் கவலை!) மேலை நாடுகளின் வாயைக் கொஞ்சம் அடைக்கத்தான் வேண்டும்.. WHO தலைவர் டெட்ரோஸிடம் டிசம்பர் இறுதியில் பேசியது. ’’டாக்டர்கள்/நிபுணர்கள் அணியெல்லாம் இங்கு வரவேண்டிய அவசியமில்லை. நீங்கள் வந்தால் போதும்’’ என்றது. எங்கே? எங்கே பிரச்னையோ அந்த வுஹானுக்கு அல்ல. ’பெய்ஜிங் (தலைநகர்) வந்து பேசுங்கள்’ என்றது. ஏற்கனவே சீனா என்றால் வாயெல்லாம் பல்லாக இருக்கும் டெட்ரோஸுக்கு குஷி! சென்றார். சீன ஜனாதிபதி தன் முன்னாள் நண்பரை பெய்ஜிங்கில் கவனமாக வரவேற்று விருந்தளித்தார். வுஹானில் வெடித்த கொரோனா வைரஸ்பற்றி ’படம்’ காட்டினார் அதிபர் க்ஸி ஜின்ப்பிங் (Xi Jinping). அதாவது ” பெரிய ஆபத்தெல்லாம் ஒன்றுமில்லை. சாதாரணமானதுதான். கட்டுக்குள் வந்துவிட்டது. பரவமுடியாதபடி தடுத்தாயிற்று. உயிர்ப்பலியா? அதெல்லாம் சும்மா.சொற்பம்தான்..’’ என்பதுபோன்ற பசப்புகள். சீனா சொல்லச்சொன்னதை நன்றாகக் கேட்டுக்கொண்டு ஜெனீவா திரும்பியவுடன் கிளிப்பிள்ளை போல் உலகுக்குப் படித்துக்காட்டினார் டெட்ரோஸ். கூடவே, வைரஸைப் பரவாமல் கட்டுப்படுத்திவிட்டதாக சீனாவை வாயாறப் புகழ்ந்தது உலக சுகாதார நிறுவனம். இதற்குள் சீனாவிலிருந்து அமெரிக்கா, ஐரோப்பா, தென்கொரியா, ஜப்பான் என விமானத்தில் பயணிகள் இஷ்டத்துக்கும் பயணித்து, ‘அமைதி’யாக நோய்க்கூறுகளை அவிழ்த்துவிட்டுக்கொண்டிருந்தார்கள். உலகின் மோசமான காலகட்டம். இந்தக் காலவெளியில் சுமார் 4,30,000 பேர் சீனாவிலிருந்து அமெரிக்காவுக்கு வருவதும் போவதுமாய் இருந்திருக்கிறார்கள். கிட்டத்தட்ட 40000 அமெரிக்க தொழில்துறைக்காரர்கள், டூரிஸ்ட்டுகள் சீனாவுக்கு ‘மலிவு சுற்றுலா’ சென்று ‘சுற்றிவிட்டு’ ஆனந்தமாகத் திரும்பினர். வரப்போகும் பேராபத்திற்கான உஷார்நிலையில் யாரும் இல்லை. சீனப்பயணம் குறித்து எந்தத் தடையும் எந்த நாட்டிலிருந்தும் வரவில்லை அப்போது. வைரஸே குதூகலித்திருக்கும் – என்ன ஒரு முட்டாள் உலகம்டா இது!

இங்கே இன்னொரு விஷயம். 2019 டிசம்பரிலேயே, தைவான் (Taiwan – சீனாவுக்கு அருகிலிருக்கும் சிறுநாடு) இந்த வைரஸ்பற்றி, தங்கள் நாட்டில் காணப்பட்ட சில கேஸ்களை ஆராய்ந்து, சரியாக விளக்கி WHO-வை எச்சரித்தது. ” நெருக்கத்தினால், அருகாமையினால் ஒருவருக்கொருவர் பரவக்கூடிய மிகவும் ஆபத்தான உயிர்க்கொல்லி!” என்றது தைவான். சரியான நேரத்தில் கொடுக்கப்பட்ட துல்லியமான எச்சரிக்கை. ஆனால் டெட்ரோஸுடனான பேச்சுவார்த்தையில் அந்த விஷயம் எடுக்கப்பட்டபோது, சீனா மழுப்பியது. ‘தைவான் ஒரு திமிர்பிடித்த நாடு. அதன் பேச்சையெல்லாம் பொருட்படுத்தாதீர்கள்’ எனச் சொல்லி நம்பவைத்தது. சீனாவின் புத்திமதியைக் கேட்டுக்கொண்டு, WHO தைவானின் எச்சரிக்கையை அலட்சியம் செய்தது. ஊர், உலகத்துக்கும் அப்படியே ஒப்பித்தது: ‘அப்படியெல்லாம் பரவக்கூடிய தொற்று அல்ல இந்த வைரஸ்..’ என்று உளறியது ஆரம்பத்தில் WHO. இதனை அப்போது நம்பிய அமெரிக்க ஜனாதிபதியும் ‘இது ஒரு ஃப்ளூ போன்றதுதான். பயப்படத் தேவையில்லை!’ எனத் தன் மக்களிடம் அசடுவழிந்தார். முழு ஐரோப்பாவும், தென்கொரியா, ஜப்பானும்கூட ஏமாந்தது. ஆங்காங்கே தென்பட்ட, வளர்ந்த கேஸுகளை சரிவர சோதிக்காமல், கையாளாமல் இருந்தது அப்பாவி உலகம். உயிர்ப்பலி நாளுக்கு நாள் அதிகமாக, நன்றாக அனுபவிக்கிறது இப்போது.

Cartoon courtesy: Satish Acharya
இந்த கொரோனா தாக்குதலால், அமெரிக்க உயிரிழப்புகள்தான் மிக அதிகம். அடுத்தாற்போல் இத்தாலி, ஸ்பெய்ன், இங்கிலாந்து, ஃப்ரான்ஸ் போன்ற நாடுகள். தன் நாட்டில் கட்டுக்கடங்காது பரவி உயிர் பலி வாங்கும் கொரோனாவினால் அமெரிக்கா ஆடிப்போயிருக்கும் நிலையில் அதிபர் ட்ரம்ப் WHO சரியான நேரத்தில் உரிய தகவல்களைத் தராமல், சீனாவைப் புகழ்வதில் மும்முரமாக இருந்ததையும் வெளிப்படையாகக் கூறிக் கடுமையாக விமரிசித்தார். உலக சுகாதார நிறுவனம் சீனாவைச் சார்ந்து இயங்கும் ஒரு நிறுவனமாக ஆகிவிட்டது என்பது அவர் கூற்று. இதே சமயத்தில் ஜப்பானின் துணைப்பிரதமர் தாரோ ஆஸோ, ”WHO ‘சீன சுகாதார நிறுவனம்’ என அழைக்கப்படுவது இப்போது வழக்கமாகிவிட்டிருக்கிறது!” என்றார். டிசம்பர் 2019-இறுதியில் நிகழ்ந்த அந்த தகவல் தாமதம், உலகம் கொடிய வைரஸ் ஒன்றை எதிர்ப்பதற்கான முன்னெச்சரிக்கை நடவடிக்கைகள் எடுப்பதைத் தவிர்த்துவிட்டது என்றது அமெரிக்கா, ஜெர்மனி, ஜப்பான் போன்ற நாடுகள். பிரிட்டனின் பிரதமரே கோவிட்-19-ல் சிக்கிய நிலையில் அந்த நாடு ’இதற்கெல்லாம் சீனா பதில் சொல்லவேண்டிவரும்’ என எச்சரித்துள்ளது.

பரபரப்பு நிறைந்த சர்வதேச சூழலில், அமெரிக்க அதிபர் ட்ரம்ப், WHO-க்கு அமெரிக்கா தந்துவரும் வருடாந்திர நிதி உதவியை நிறுத்திவிட்டார். ’சரியாக இயங்காத ஒரு நிறுவனத்திற்கு அமெரிக்கப் பணம் எதற்கு?’ என்பது அவரின் கேள்வி. இது பிரிட்டன், ஜப்பான், சீனா போன்ற நாடுகள் தரும் நிதி உதவிகளை விடப் பலமடங்கு பெரிய தொகை. பெரும் நாடுகளிலிருந்து முதலில் தன் செயல்பாடுகள் குறித்த விமரிசனம், அப்புறம் நிதி நெருக்கடி என வரிசையாக பிரச்னைகளை சந்தித்து வருகிறது உலக சுகாதார நிறுவனம்.
**

பாரசீகம்: வரப்போகும் யுத்தத்தின் முன்னுரை ?

எண்ணெய் வளமிக்க பாரசீகப் பிரதேசம் புகைந்துகொண்டிருக்கிறது. சமீபத்தில் ஈரானிய ஜெனரல் சுலைமானி அமெரிக்கர்களால் கொல்லப்பட்டதற்கு பதிலடியாக, 7 ஜனவரியின் அதிகாலை  ஈரான், ஈராக்கில் நிலைகொண்டுள்ள இரண்டு அமெரிக்க வான்படை தளங்களை ஏவுகணைகளால் தாக்கியிருக்கிறது. தாக்கிவிட்டு சும்மா இருந்ததா? வாயை உடனே பெரிசாகத் திறந்து தெரியப்படுத்தியது: ’சுலைமானியின் வீரமரணத்திற்கு, எதிரியைக் கடுமையாகப் பழிவாங்கிவிட்டோம். சுமார் 80 அமெரிக்கத் தீவிரவாதிகள் (அமெரிக்கப் படைகளை இனி அப்படித்தான் ஈரான் அழைக்குமாம்!) தாக்குதலில் கொல்லப்பட்டுவிட்டனர்.’ கூடவே ஈரானிய ’ஸுப்ரீம் லீடர் ’அலி கமேனியின் அறிவிப்பும்: ’அமெரிக்காவின் கன்னத்தில் விழுந்தது அறை! ..’ Supreme ‘Cat and Mouse’ game!

அமெரிக்கா, இதுபோன்ற ஒரு எதிர்விளைவை, எதிர்பார்த்தே இருந்தது. தாக்குதலோ ஈராக்கின் மண்ணில் நிகழ்ந்துள்ளது. ஈராக் என்ன சொல்கிறது? தங்களுக்கு ஏவுகணைத் தாக்குதல்பற்றி  ஈரான் முன்னறிவிப்பு செய்ததாகவும், தானும் அதை ஈராக்கில் நிலைகொண்டுள்ள அமெரிக்கப் வான்படைத் தலைமைக்கு, தாக்குதலுக்கு முன்னேயே தெரியப்படுத்தியதாகவும் இப்போது கூறியிருக்கிறது. அங்கிருந்த தனது முக்கிய அதிகாரிகள்/ வீரர்களை வேறுபகுதிக்கு அமெரிக்கா உடனே மாற்றியிருக்கும். சாவு எண்ணிக்கை/சேதம் வெகுவாகக் குறைக்கப்பட்டிருக்கலாம். ஈரானிய தாக்குதலுக்கு பதிலாக, ‘All is well ..!’ என்று ’கூல்’-ஆக ட்வீட்டியிருக்கிறார் அதிபர் ட்ரம்ப்.  ‘கூலாக’ இருப்பது அவரது சுபாவமில்லை என்பது உலகறிந்ததே. பின்னணியில், ஏதாவது ரகசிய ராணுவ/உளவு ஏற்பாடுகள் பென்ட்டகனில் (Pentagon) நிகழ்ந்துகொண்டுதான் இருக்கும். எல்லாமும் வெளியுலகத்திற்குத் தெரியவேண்டியதில்லையே.

ஈரானிய வெளியுறவு மந்திரி ஜாவத் ஜரீஃப் (Javad Zarif) தன் அறிக்கையில் : ’எங்கள் (ராணுவ) உயர் அதிகாரிகள், வீரர்கள் மீதான கோழைத்தனமான தாக்குதலுக்கு பதிலாக, எங்களின் தற்காப்பிற்காக,  ’போதிய அளவில்’ எதிரிகளைப் பழிவாங்கிவிட்டோம். மேற்கொண்டு, போராக இது உருவெடுப்பதை ஈரான் விரும்பவில்லை’ என்றிருக்கிறார்.   எதிரியைத் திருப்பி உதைத்துவிட்டதாக எங்கள் மக்களுக்கும், இனக்குழுக்களுக்கும் காண்பித்துவிட்டோம். போருக்கு நாங்கள் தயாரில்லை’. ஈரானின் ராணுவ நிலைப்பாடு இது என்பதே ராஜீய வெளியில் இதன் மறைமுகப் பொருள்.

அமெரிக்காவும் இந்த ‘அளவான எதிர்த்தாக்குதலில்’ ஒருவேளை, திருப்தியுற்றிருக்குமோ? மேற்கொண்டு நிலைமை மோசமாகாதிருப்பதே இப்போதைக்கு நல்லது என நினைத்திருக்குமோ?  சற்றுமுன் கிடைத்த அமெரிக்கத் தரப்பு ஆய்வின்படி, ஈரானிய ஏவுகணைகள் (மொத்தம் 22) அமெரிக்க தளங்களுக்கு சற்றே வெளியேயுள்ள நிலப்பரப்பைத்தான் தாக்கியிருக்கின்றன. ஈரானால் துல்லியமாகத் திட்டமிடப்பட்டு ,மிகக்குறைவான இழப்பை அமெரிக்காவுக்கு விளைவிக்கும் வகையில், இது நடத்தப்பட்டிருக்கவேண்டும் என்கிறது நிபுணர் குழாம். ஏன் இப்படி? ஈரான் பதிலடி கொடுத்ததாகக் காண்பிக்க விரும்பியதே தவிர, போராக இது மாறுவதை அது நினைத்தும் பார்க்கமுடியாத நிலை, அதன் ’வாய்ச்சவடால்’ வழக்கம்போல் உச்சத்தில் இருந்தபோதிலும். அமெரிக்காவும் ‘நாம் எதிரியின் முக்கியமான ஆளைப் போட்டுத் தள்ளிவிட்டோம். இவன்க  ஏதோ ரெண்டு ஏவுகணைகளை வீசிவிட்டுப்  போய்த் தொலையட்டும். இதுவே இப்போதைக்கு சரி’ என நிலைப்பாடு எடுத்திருக்க வாய்ப்புண்டு.  

புதிதாகப் பதவியேற்றிருக்கும், சர்வதேச அரசியலில் அமெரிக்காவின் வலதுகையான,  (ஜான்சனின்) பிரிட்டிஷ் அரசின் நிலைப்பாடு என்ன? ‘சுலைமானி கொல்லப்பட்ட பின்னணியில் நாங்கள், எங்களது கூட்டாளி அமெரிக்காவோடு ‘ஒரே பக்கத்தில்’ இருக்கிறோம்’ என்றது முதலில். ஈரானிய ஏவுகணைத் தாக்குதலுக்குப் பின், ‘தேவைப்பட்டால் நொடியில் பாரசீக வளைகுடாவில் போய் இறங்க எங்களது படைகள் தயார்’ என்கிறது பிரிட்டன். இத்தகு சூழலில், ஈரானின் ஜென்ம விரோதியான இஸ்ரேல், இப்போது திருவாய் மலர்ந்திருக்கிறது. ‘நாங்கள் தாக்கப்பட்டால், எதிர்விளைவுகள் கடுமையாயிருக்கும்.’ தினம்தினம் முஷ்டி உயர்த்துதல், சூடான வார்த்தைப் பிரயோகங்கள்..

ஒரு பக்கம் ’போரை நாங்கள் விரும்பவில்லை’ என அதிகாரபூர்வ அறிக்கைகளை, கூட்டுசேரா நாடுகள் மற்றும் ஐநா-போன்ற அப்பாவி அமைப்புகளுக்குப் போக்குக்காண்பிப்பதற்காக விடுவதும், இன்னொரு பக்கம் – ‘வரட்டும்; விடமாட்டோம். அழித்துவிட்டுத்தான் மறுவேலை!’ என்பதுமாய் ராணுவ வலிமை மிக்க நாடுகள் உறுமிப் பார்ப்பதும் – நல்லதற்கில்லை. பதற்றம் அதிகரிக்கவே வழிகோலும். ஏற்கனவே மத்திய கிழக்கில், சில வருடங்களாக நடந்துவந்த போர்களினால் சுமார் 2 1/2 கோடி ஏமன் நாட்டவரும், 1 1/4 கோடி சிரிய மக்களும், சிதறி வெளியேறி, வாழவழியின்றி தவித்தலைகிறார்கள். ஒரு பக்கம் செல்வக்கொழிப்பைக் காண்பிக்கும் மத்திய கிழக்கு, மறுபக்கத்தில் அகதிகளின் பெரும் கூடாரமாக வேகமாக மாறிவருகிறது. கச்சா எண்ணெயை வைத்தோ,  ஏகாபத்திய ஆசைகளினாலோ அல்லது எதிரும் புதிருமான இஸ்லாமிய இனக்குழுக்களின் ஆதிக்க முயற்சிகளினாலோ, நாளையோ அல்லது நாளை மறுநாளோ அங்கே ஒரு யுத்தம் வெடிக்கலாம். அப்படி நிகழ்ந்தால் அது, பாரசீக வளைகுடா மக்களின் நீண்டகால அமைதிக்கும், வாழ்விற்கும் கடும் குந்தகம் விளைவிப்பதிலேதான் போய் முடியும். அத்தகைய போர் மேலும் பரவாது, வளைகுடாப் பிரதேசத்துடன் அமுங்கிவிடும் என்கிற உத்தரவாதம் ஏதும் அதில் இருக்கமுடியாது.

**