Ind-SL : உயிர்கொடுத்த தீபக் சாஹர்

இரண்டாவது ஒரு-நாள் போட்டியை லங்கா உத்வேகமாக ஆடியது. அவிஷ்கா, அஸ்லங்காவின் அரைசதம், கடைசியில் இறங்கும் கருணரத்னவின் 44 நாட் அவுட் என இந்திய பௌலிங்கை ஒரு கை பார்த்து 275 என போஸ்ட் செய்தார்கள். புவனேஷ்வர் (3), சாஹல்(3), தீபக் சாஹர்(2) இந்தியாவுக்காக நன்றாகப் பந்து வீசினார்கள்.

இந்தியா பதிலளிக்கையில், ப்ரித்வி ஷா 3 பௌண்டரிகளுடன் ஆரம்பிக்க, லங்கா கேப்டன் மாத்தி யோசித்தார். இவனை விட்டால் ஆபத்து! ஹஸரங்காவின் ஸ்பின் மூன்றாவது ஓவரில். ப்ரித்வி ஷா அவுட் bowled. அடுத்தாற்போல் இஷான் கிஷனைக் காலி செய்த ரஜிதா. தவண் திணறல். நன்றாக ஆடியும் பாண்டே(37) ரன் அவுட். சூர்யகுமார் மட்டுமே விளாசி அரைசதம். ஹர்தீக் பாண்ட்யா 0. க்ரீஸுக்கு வந்தவுடன் ஓவராக அலட்டிக்கொண்ட க்ருணால் பாண்ட்யாவின் மண்டையில் மாறி, மாறிப்போட்டுத் திணறவைத்த துஷ்யந்தா சமீரா! க்ருனால் தட்டுத்தடுமாறி 35. சூப்பர் சூர்யா (44 பந்தில் 53) அவுட் ஆகையிலேயே இந்தியா நிலைகுலைந்துவிட்டது. ஸ்கோர் 160/6. 8-தீபக், 9-புவனேஷ்வர், 10-குல்தீப், 11-சாஹல் – இந்த அசடுகளை வைத்துக்கொண்டு இன்னும் 116 ரன்னா எடுக்க முடியும்? சான்ஸே இல்லை எனத் தோன்றிய கட்டத்தில், பாதிப்பேர் டிவி-ஐ அணைத்துவிட்டு குறட்டைவிட ஆரம்பித்திருப்பார்கள்தான்.

Deepak Chahar

விழித்துக்கொண்டு விளையாடியவர் ஆனார், India’s sudden hero! ஓவராக தூக்கி அடித்து ஆக்ரோஷ அலட்டாமல், நிதானமாக ரன் சேர்க்க ஆரம்பித்தார். புவனேஷ்வர் குமாரை அடுத்தபக்கத்தில் வைத்துக்கொண்டே, அவ்வப்போது பௌண்டரி, சிக்ஸரும் தட்டி இந்தியாவை கரை சேர்த்துக் கலக்கிவிட்டார் தீபக் சாஹர். Career-best 69 not out. வெற்றியின் விளிம்பில் நின்றிருந்த லங்காவைப் பின்னே தள்ளிவிட்டு வென்றது இந்தியா. லங்காவின் தரப்பில் நன்றாக ஸ்பின் போட்டுத் தாக்கினார் வனிந்து ஹஸரங்கா. எதிர்கால லங்கா ஸ்டாரோ..

ஜெயித்திருக்க வேண்டிய மேட்ச்சை தோற்றதால், லங்கா கேப்டன் ஷனகாவுக்கும் கோச் மிக்கி ஆர்தருக்குமிடையே சூடாக வாக்குவாதம் கிளம்பியிருக்கிறது மைதானத்தில். வீடியோ ஆனது வைரல்!

ஹர்தீக்  பாண்ட்யா -பேட்டிங், பௌலிங்- இரண்டிலுமே தடுமாறிக்கொண்டிருக்கும் இக்கட்டான இந்திய நிலையில், ஒரு சரியான ஆல்ரவுண்டராக, வெள்ளைப்பந்து போட்டிகளில்,  தீபக்கை  நம்பலாம் போலிருக்கிறது. You are good enough to bat at No.7 -என்று திராவிட், பேட் செய்யப்போகுமுன் தன்னிடம் சொன்னார் என்கிறார் தீபக். பார்ப்போம் – இன்னும் கதை நிறைய இருக்கிறது.

**

கிரிக்கெட்: ப்ரித்வி மேஜிக் !

கொழும்புவில் நேற்று நடந்த ஒரு-நாள் கிரிக்கெட் மேட்ச்சில் இந்தியா, எதிர்பார்க்கப்பட்டபடி எளிதாக வென்றது. ஸ்ரீலங்கா பெரிய ஸ்கோராக கொடுக்கமுடியாததற்கு அவர்களது பேட்ஸ்மன்களின் அனுபவக் குறைவே காரணம்.

Prithvi Shaw & Dhawan – Good chemistry..

லங்கா விளையாடிய அழகில்,  262 என்கிற ஸ்கோரே கொஞ்சம் ஆச்சர்யமானதுதான். 235-ஐத் தாண்டமாட்டார்கள் என்றே தோன்றியது. இலக்கை இந்தியா துரத்துகையில், லங்காவின் துவக்க பௌலிங்கை துவம்சம் செய்துவிட்டார், இந்திய அணிக்குத் திரும்பியுள்ள ப்ரித்வி ஷா. தவன் அடுத்த பக்கத்தில் நின்று பார்த்துக்கொண்டிருக்க, ஏதோ சன்னதம் வந்ததுபோல் ஆடினார் ஷா. இப்படித்தான் சில மாதங்களுக்கு முன் இந்திய உள்நாட்டுக்கிரிக்கெட்டிலும், ஐபிஎல்-இலும் ஆடி, தன் ஃபார்மை தேர்வாளர்களுக்கு நினைவுபடுத்திவந்தார் அவர். ஆஸ்திரேலியாவில் இந்தியா 36-ல் ஆல் அவுட்டானதற்கு என்னமோ ப்ர்திவி ஷாதான் காரணம் என்பதுபோல், அவரை ஒரு வருடம் இந்திய நீலத்தில் ஆடவிடாமல் செய்துவந்தார்கள் (தேர்வுக்குழுவா அல்லது கோஹ்லி-ஷாஸ்த்ரி கூட்டணியா?). நேற்று ஷா ஆடிய விதம் இந்த வருட இறுதியில் வரவிருக்கும் டி-20 உலகக்கோப்பை அணியில் ப்ரித்வி ஷா இருந்தே ஆகவேண்டும் என்கிற நிதர்சனத்தை மீண்டும் வெளிச்சம்போட்டுக் காட்டியது. கொழும்புவில் இந்திய செலக்டர்கள் இருவர் உட்கார்ந்திருக்கிறார்கள். புரிந்துகொண்டிருப்பார்கள் என நம்புவோம்.

எப்படிப் போட்டாலும் சாத்துகிறானே இவன் – என்கிற குழப்பத்தில், ஆத்திரத்தில்தான் துஷ்யந்தா சமீரா ஷார்ட்-பிட்ச் பந்துகளாக ஷாவுக்கு வீசி நிலைகுலைக்க முயன்றார். ஷா இவற்றைக் குனிந்து தவிர்க்க முயல்கையில்தான் ஹெல்மெட்டைப் பதம் பார்த்தது ஒரு பந்து. தலையடியா (concussion) எனப் பதறி ஓடிவந்த நிபுணர்களை, ஷா ஆசுவாசப்படுத்தவேண்டியாயிற்று! ஹெல்மட் மாற்றிக்கொண்டு ஷா தொடர்கையில், லங்கா கேப்டன் தந்திரமாக அகிலா தனஞ்சயா மூலமாக ஸ்பின்னை இறக்கினார். நாலைந்து பந்துகளைக் கவனித்துவிட்டு தாக்கியிருக்கலாம் ஷா. அவர் இருந்த வேகத்தில் முதல் பந்தையே வானவேடிக்கை காட்ட முயற்சிக்க, கேட்ச் ஆனது பந்து. ஆட்டநாயகன் ஷா 24 பந்துகளில் 9 பவுண்டரிகளுடன் 43. அவர் இருந்தவரை லங்காவுக்கு மூச்சுவிடுவதில் ஏகப்பட்ட சிரமம் இருந்தது.

Ishan Kishan got Birthday Gift, 2nd Indian Cricketer after Gursharan Singh  ODI debut on Birthday | Ishan Kishan को मिला शानदार Birthday Gift, इस मुकाम  को हासिल करने वाले दूसरे भारतीय क्रिकेटर
Ishan Kishan – impressive debut

இந்தியாவுக்காக முதல் ஒரு-நாள் போட்டி ஆடிய இஷான் கிஷனும், சூர்யகுமாரும் சிறப்பாக ஆடினார்கள். ஷா அவுட் ஆனவுடன் வந்த கிஷன், முதல் பந்தில் சிக்ஸ் விளாசினார்; அசத்தல் அரைசதமடித்தபின்பே வெளியேறினார். ஆரம்பத்தில் நிதானமாக ஆடிய ஷிகர் தவன், பின்னர் கொஞ்சம் வேகத்தை ஏற்றி 86 நாட்-அவுட் என வந்து சேர்ந்தார். அவரது கேப்டன்சி நன்றாக அமைந்து, 7 விக்கெட் வித்தியாச வெற்றி கிடைத்தது. ஸ்பின் -இரட்டையர்கள் குல்சா (குல்தீப்-சாஹல்) ஆளுக்கு 2, தீபக் சாஹர் 2, பாண்ட்யா சகோதரர்கள் ஆளுக்கு 1, என விக்கெட்டுகள். புவனேஷ்வர் குமாரிடம் பழைய திறன் காணப்படவில்லை. அடிவாங்கியும் விக்கெட் எடுக்கவில்லை.

ஸ்ரீலங்காவுக்கு சமிகா கருணரத்ன (Chamika Karunaratne) 43 ரன்கள் அதிகபட்ச ஸ்கோர். கேப்டன் ஷனகாவின் நிதானமான 39 – உதவவில்லை. பௌலிங்கில் லங்கா ஸ்பின்னர்கள்  பரவாயில்லை. சமீராவிடம் வேகம் மட்டும் இருந்தது.

20-7-21- ல் நடக்கவிருக்கும் அடுத்த போட்டியில் – 1)உத்வேகம் பெறுமா லங்கா? 2) இந்தியப் புதுமுகங்களில் யாருக்காவது வாய்ப்புக் கிடைக்குமா ? கேள்விகள் -நாளை மதியத்தை நோக்கி நிற்கின்றன..  

**

இந்தியா-ஸ்ரீலங்கா கிரிக்கெட்

ஸ்ரீலங்கா கிரிக்கெட் இப்போதிருக்கும் நிலையில், அந்த அணிக்கு யார் தற்போதைய கேப்டன் என்பதில் ஸ்ரீலங்கா ரசிகர்களுக்கே குழப்பம் வந்திருக்கும். கடந்த மூன்று வருடங்களாக ஒரு-நாள் போட்டிக்கான ஸ்ரீலங்கா அணிக்கு அடிக்கடி கேப்டன்கள் மாற்றப்பட்டிருக்கிறார்கள் -ஆஞ்சலோ மேத்தியூஸிலிருந்து இப்போது வந்திருக்கும் .. யாரது? -வரை. கோச்களின் கதியும் இப்படியே. ஸ்ரீலங்கா கிரிக்கெட்டில் மாறாதது அதன் கிரிக்கெட் நிர்வாகிகளின் அணி மட்டுமே! இந்த லட்சணத்தில் ஸ்ரீலங்காவுக்கு வந்திருக்கும் இந்திய அணி – ஒரு இரண்டாம் பட்ச அணியாம்.. அதற்கு ஒத்துக்கொண்டதன் மூலம் ஸ்ரீலங்காவின் கௌரவம் போய்விட்டதாம்! – முன்னாள் கேப்டன் – இந்நாள் அரசியல்வாதி அர்ஜுனா ராணதுங்காவின் புலம்பல் .

முதன்முறையாக இந்திய அணிக்கு ஷிகர் தவன் கேப்டனாகியிருக்கிறார் -இந்த ஒரு-நாள், டி-20 தொடர்களுக்காக. டெஸ்ட் டீமில் இல்லாத, சமீபத்திய இந்திய ஒரு-நாள் போட்டிகளில் ஆடிய புதியவர்கள், சிலர் ஏற்கனவே ஆடியவர்கள் என அணிவகுத்து நிற்கிறது இந்திய அணி. நிதிஷ் ரானா (பேட்ஸ்மன்), சேத்தன் ஸக்காரியா (வேகப்பந்துவீச்சாளர்), வருண் சக்ரவர்த்தி (ஸ்பின்னர்) என புதுமுகங்களும் உண்டு.

நாளைய போட்டிக்கு இந்திய அணி இப்படி இருக்கலாம்: ஷிகர் தவன், ப்ரித்வி ஷா, சூர்யகுமார் யாதவ், சஞ்சு சாம்ஸன், மணீஷ் பாண்டே, ஹர்தீக் பாண்ட்யா, க்ருனால் பாண்ட்யா, புவனேஷ்வர் குமார், நவ்தீப் செய்னி, தீபக் சாஹர், யஜுவேந்திர சாஹல். வருண் சக்ரவர்த்தியும், சேத்தன் ஸக்காரியாவும் – முதல் போட்டியிலேயே ஆடவைக்கப்படுவார்களா என்பது கேள்விக்குறி.

தஸுன் ஷனகா (Dasun Shanaka) தலைமை தாங்கும் ஸ்ரீலங்காவின் ஒரு-நாள் அணியில் முக்கியமான மூவர் இல்லை. டிக்வெல்லா, குஸால் மெண்டிஸ், குணதிலகா – இங்கிலாந்தில் சமீபத்திய டூரின்போது bio bubble-ஐ மீறி வெளியே சென்றதால் தடை செய்யப்பட்டுள்ளனர். துவக்க ஆட்டக்காரர் குஸால் பெரேரா காயம் காரணமாக ஆடவில்லை. அணியில் அனுபவஸ்தர்கள் குறைவு. புதியவர்கள் அதிகம். அவர்களுக்கு வேறுவழியில்லை. அவிஷ்கா ஃபெர்னாண்டோ, பதும் நிஸங்கா (Pathum Nissanka) துவக்க ஆட்டக்காரர்கள் : தனஞ்சயா டி சில்வா(Dananjaya de Silva) , பனுகா ராஜபக்ஸ (Bhanuka Rajapakse), தஸுன் ஷனகா ஆகியோர் மிடில் ஆர்டரில் வரக்கூடும். ஸ்பின்/வேகம் எனப் பந்துவீச்சில் லக்ஷன் ஸந்தகன், இஷுரு உடானா, துஷ்மந்தா சமீரா (Dushmantha Chameera), கஸுன் ரஜிதா இருக்கலாம். டிக்வெல்லா (Niroshan Dickwella) இல்லாத நிலையில் மினோத் பனுகா (Minod Banuka) விக்கெட் கீப்பராக ஆடுவார் எனத் தெரிகிறது.

இந்தியா ஒரேயடியாக ஸ்ரீலங்காவைத் துவம்சம் செய்துவிடுமா இல்லை, ஸ்ரீலங்கா திருப்பிக்கொடுக்குமா, அதனால் முடியுமா என்பது போகப்போகத்தான் தெரியும்.

Match starts at 1500 (IST). Live in India : Sony Ten 1, Sony Six. For Tamil coverage Sony Ten 4

**

Women’s Cricket: மித்தாலி… ஷெஃபாலி !

ஆரம்பமாகிறது ப்ரிஸ்டல் (Bristol), இங்கிலாந்தில் ஒரு-நாள் மங்கையர் கிரிக்கெட் தொடர் இன்று (27 ஜூன், 21. Sony Ten 1. 1500 IST). மித்தாலி ராஜ் தலைமையில் இந்திய அணி, ஹீதர் நைட் தலைமை தாங்கும் இங்கிலாந்து அணிக்கெதிராக முதல் போட்டியை ஆடுகிறது.

Mithali Raj, Captain, India

தன் சர்வதேச கிரிக்கெட் ப்ரவேசத்தை டி-20 கிரிக்கெட்டில் ஆரம்பித்து தூள்கிளப்பிய 17-வயது பேட்ஸ்மன் ஷெஃபாலி வர்மா, சமீபத்தில் இந்தியாவுக்காக தன் முதல் டெஸ்ட் மேட்ச்சை, சிறப்பாக ஆடி சர்வதேச கவனம் பெற்றார். தன் முதல் ஒரு-நாள் போட்டியை இன்று  அவர் ஆடுவார் எனத் தெரிகிறது. கடந்த இருவருடங்களில் இந்தியாவுக்குக் கிடைத்த ஒரே அதிரடி வீராங்கனை. எதிரணி அஞ்சும் தாக்கும்திறன், உத்வேகம் உடைய ஷெஃபாலியிடம் இந்தியா நிறையவே எதிர்பார்க்கிறது. முதல் பந்திலிருந்தே தூள்கிளப்பப் பார்க்கும் துவக்க ஆட்டக்காரர் இந்தப் பெண் எனச் சொல்வதைவிடவும், இந்தச் சிறுமி என்றாலே பொருந்தும்!

ENG vs IND: Shafali Verma among five Test debutants for India, England also  hand a debut
Shafali Verma, the new Indian star

ஸ்ம்ருதி மந்தனாவும், ஷெஃபாலி வர்மாவும் ஆட்டத்தை துவக்கக்கூடும். கடந்த டெஸ்ட் போட்டியில் ஃபார்ம் காட்டாத, கேப்டன் மித்தாலியும், ஹர்மன்ப்ரீத் கவுரும்(Harmanpreet Kaur) இந்தத் தொடரில் ரன் சேர்ப்பார்களா என்பது கவனிக்கப்படவேண்டியது. அவர்களது மிடில் ஆர்டர் பங்களிப்பு இல்லாவிட்டால், குறிப்பாக ஹர்மனின் தாக்குதல் தொடராவிட்டால், தொடரை இந்தியா ஜெயிப்பது கஷ்டம். கடந்த டெஸ்ட்டில் தோற்றிருக்கவேண்டிய இந்தியாவை, தன் சிறப்பான பங்களிப்பினால் காப்பாற்றிய ஆல்ரவுண்டர் ஸ்னேஹ் ரானா ஒரு-நாள் தொடரில் அவசியம் ஆடவேண்டும். மற்றபடி தீப்தி ஷர்மா, ஜெமிமா ரோட்ரிக்ஸ், ஆகியோரோடு வேகப்பந்துவீச்சாளர்கள் ஜூலன் கோஸ்வாமி, பூஜா வஸ்த்ரகார், அருந்ததி ரெட்டி ஆகியோர் ஆடுவார்கள் என நம்பலாம். ராதா யாதவ், ராஜேஷ்வரி கெய்க்வாட், பூனம் யாதவ் ஆகிய ஸ்பின்னர்களில் ஒருவர்தான் சேர்க்கப்பட வாய்ப்பு.

இரண்டு வருடமுன்பு நடந்த உலகக்கோப்பை இறுதியில், இந்தியா இங்கிலாந்திடம் 9 ரன் வித்தியாசத்தில் தோற்றது. வலி மிகத் தந்த தோல்வி அது. வலிமை மிக்க இங்கிலாந்து அணியை மீண்டும் சந்திக்கும் இந்திய வீராங்கனைகள் உத்வேகத்துடன் இறங்கி, புத்திசாலித்தனத்துடன் இனி ஆடுவார்கள் என எதிர்பார்க்கலாம். இங்கே அவர்கள் காண்பிக்கும் ஆட்டத்திறன், பங்களிப்பு, அணியை பலப்படுத்துவதோடு, நியூஸிலாந்தில் நடக்கவிருக்கும் அடுத்த வருட ஒரு-நாள் உலகக்கோப்பைக்கான இந்திய அணியின் சரியான தேர்விற்கும் உதவும்.

**

நியூஸிலாந்து – உலகின் முதல் டெஸ்ட் கிரிக்கெட் சேம்பியன்

தோற்றவனுக்கு ஆயிரம் காரணங்கள்.

ஜெயித்தவனுக்கோ ஒரே சிரிப்பு !

New Zealand beat India to win inaugural World Test Championship | Cricket  News - Times of India

Final Score :

India: 217 & 170. New Zealand : 249 & 140/2. Man of the Final: Kyle Jamieson (NZ)

கிரிக்கெட்: உலக டெஸ்ட் சேம்பியன்ஷிப் (WTC)

கோவிட்-19 உலகையே புரட்டிப்போட்டு அட்டகாசம் செய்துகொண்டிருக்கும் ஒரு அபாயகர காலகட்டம். Bio-secure சூழலில், பாதுகாப்பு ஏற்பாடுகளுடன் இங்கிலாந்தின் சௌதாம்ப்டனில் (Southampton) இன்று (18/6/21) ஆரம்பிக்கிறது உலக டெஸ்ட் சேம்பியன்ஷிப் மேட்ச் இறுதிப்போட்டி. கிட்டத்தட்ட 10 வருடங்களாகத் திட்டமிடப்பட்டு, பல்வேறு வகைக் குழப்பங்கள், தாமதங்களுக்குப் பின் கடைசியாக வந்து சேர்ந்திருக்கிறோம் கிரிக்கெட்டின் அசல் சேம்பியன்ஷிப்பிற்கு. சமபல அணிகளான நியூஸிலாந்தும் இந்தியாவும் மோதுகின்றன. இது கோஹ்லி vs வில்லியம்சன் போட்டியாகப் பார்க்கவும்படுகிறது. Fire and Ice எனத் தலைப்பிடும் Espn Cricinfo!

இரு அணிகளின் வலிமை என்பது கடந்த போட்டிகளை வைத்துப்பார்க்கும்போது சமமாக இருப்பதாக ஒரு தோற்றம். இந்தியா தன் பௌலிங் காம்பினேஷனில் கவனமாக இல்லையெனில் மேட்ச்சை இழக்க வாய்ப்பு இருக்கிறது என எச்சரித்தார்கள் முன்னால் வீரர்கள். பொதுவாக 5 பௌலர்கள், 6 பேட்டர்கள் (batters-விக்கெட்கீப்பர் உட்பட) என்கிற சூத்திரமே அணுகப்படுகிறது. அதையே இந்தியா இந்தப் போட்டிக்காகவும் எடுத்துக்கொண்டிருக்கிறது. இஷாந்த் ஷர்மா, ஜஸ்ப்ரித் பும்ரா, முகமது ஷமி – வேகப்பந்துவீச்சாளர்கள். அஷ்வின், ஜடேஜா  ஸ்பின்/ஆல்ரவுண்டர்கள். பேட்டர்கள் (Batters): ரோஹித் ஷர்மா, ஷுப்மன் கில், செத்தேஷ்வர் புஜாரா, விராட் கோஹ்லி, அஜின்க்யா ரஹானே மற்றும் ரிஷப் பந்த் (வி.கீ). துரதிர்ஷ்டவசமாக இன்னொரு டெஸ்ட் ஸ்பெஷலிஸ்ட் ஹனுமா விஹாரிக்கு இடமில்லை. கே.எல். ராஹுல், அக்ஷர் பட்டேல், வ்ருத்திமான் சாஹா எல்லாம் இல்லை!

நியூஸிலாந்தின் பேட்டிங் வரிசை இப்படி இருக்கலாம்: டெவன் கான்வே, டாம் லேத்தம், வில்லியம்சன், ராஸ் டெய்லர், ஹென்றி நிகோல்ஸ், வாட்லிங் (வி.கீ.). வேகப்பந்துவீச்சாளர்கள் டிம் சௌதீ, ட்ரெண்ட் போல்ட், கைல் ஜேமீஸன், நீல் வாக்னர், மேலும் ஸ்பின்னர் (இந்திய வம்சாவளி) அஜாஸ் பட்டேல். வேகப்பந்துவீச்சாளர் மேட் ஹென்றி உள்ளே எனில், நீல் வாக்னர் வெளியே போகலாம். எப்படியிருப்பினும் ஒரே ஒரு ஸ்பின்னரைத்தான் நியூஸிலாந்து கொண்டிருக்கும் எனத் தெரிகிறது. மிட்ச்செல் சாண்ட்னர் காயப்பட்டிருப்பதால், அஜாஸ் பட்டேல்தான் விளையாடுவார்.

ஸௌத்தாம்ப்டன் ஆடுகளம் வேகப்பந்துவீச்சாளர்களுக்கே பெரும்பாலும் துணைபோகும். இடையிடையே மழைக்கும் வாய்ப்பு உண்டு. தினமும் கொஞ்சம் மழைவந்தாலும் ஆச்சரியப்படுவதற்கில்லை! ஸ்விங் மாஸ்டர்களான டிம் சௌதீ, ட்ரெண்ட் போல்டுக்கு ஒரே ஆனந்தம்தான். இந்த ஜோடியோடு சேர்ந்து ப்ராதனமாக கைல் ஜேமிசன் வீசக்கூடும். இந்திய துவக்க ஆட்டக்காரர்கள் குறிப்பாக ஒரு ஒழுங்கு, முனைப்போடு ஆடினால்தான் பின் வருபவர்கள் நிலைத்து ஆட வழிவகுக்கும். ஒரு மழை இடைவேளைக்கு அப்புறம் பேட் செய்பவர்கள் உடனே விக்கெட்டைப் பரிகொடுக்கும் சம்பவங்கள் நிகழக்கூடும். ரிஷப் பந்த், புஜாரா, ரோஹித் ஆகியோர் குறிப்பாக கவனிக்கப்படுவார்கள். ரஹானே குறிப்பாக இங்கிலாந்து பிட்ச்சுகளில் சரியாக ஆடுவதில்லை என்கிற விமரிசனம் உண்டு. அவர் கதை எப்படிப் போகுமோ?

கோஹ்லி அனேகமாக டாஸைத் தோற்பார். மேட்ச்சை இழக்காதிருந்தால் சரி!

ஒரு-நாள் உலகக்கோப்பையை இங்கிலாந்திடம் ‘இழந்துவிட்ட’ நியூஸிலாந்து, உலகின் முதல் டெஸ்ட் சேம்பியன்ஷிப் கோப்பையை தட்டிச்செல்ல முனைப்பு காட்டி ஆடும். கோஹ்லிக்கு உலகக்கோப்பையை உயரப்பிடிக்கும் அதிர்ஷ்டம் இருக்கிறதா என்பது ஜூன் 22-ஆம் தேதி தெரிந்துவிடும். (ஒரு எமர்ஜென்சிக்காக ஒரு உபரி நாள் கொடுக்கப்பட்டிருக்கிறது இந்த இறுதிப்போட்டிக்கு). 4000 பேருக்கு மட்டும் ஆட்டத்தை நேரடியாகக் கண்டு களிக்க என, டிக்கெட்டுகள் இங்கிலாந்தின் கிரிக்கெட் வாரியத்தால் (England and Wales Cricket Board) விற்கப்பட்டுள்ளன. உலக சேம்பியன்ஷிப் ஆட்டத்தில் ஸ்டேடியம் காலியாகக் கிடந்தால், என்ன ஒரு அபத்தம்!

இந்தியாவில் ஸ்டார் ஸ்போர்ட்ஸ் 1/HD சேனல்கள் ஒளிபரப்பும் இந்தப் பரபரப்பு மிகுந்த சேம்பியன்ஷிப் ஆட்டத்தை. மழை போட்டுப் பிசையாமல் இருந்தால், அடுத்து வரும் நாட்கள் கடும் போட்டியைக் காட்டக்கூடும்.

**

கேப்டன் ஷிகர் தவன் !

ஜூன் 18-ல் ஆரம்பிக்கவிருக்கும் முதல் உலக டெஸ்ட் கோப்பையின் இறுதிப்போட்டியில் (WTC Final) நியூஜிலாந்தோடு மோதவென, இங்கிலாந்து போயிருக்கிறது இந்திய அணி. தற்போது அங்கே பயிற்சியில். கோஹ்லியின் தலைமையிலான ‘டெஸ்ட்’ அணியில் ரோஹித், புஜாரா, ரஹானே, ராஹுல், அஷ்வின், விஹாரி, ஜடேஜா, ஷமி, பும்ரா, ரிஷப் பந்த், வாஷிங்டன் சுந்தர்  என வழக்கமான நட்சத்திரங்கள். உலகக்கோப்பை மேட்ச்சுக்குப் பின், இந்திய டெஸ்ட் அணி இங்கிலாந்துக்கெதிராக அங்கேயே ஒரு முழு டெஸ்ட் தொடரையும் ஆடும்.

கொரோனா வருடத்திலும், ரொம்பவும் டைட்டான கிரிக்கெட் கேலண்டர் இந்தியாவுக்கு! வரவிருக்கும் டி-20 உலகக்கோப்பையையும் கருத்தில்கொண்டு, ‘வெள்ளைப்பந்து’ ஸ்பெஷலிஸ்ட்டுகளைக் கொண்டு ஒரு அணி அமைத்து ஸ்ரீலங்காவுக்கு அனுப்புகிறது இந்திய கிரிக்கெட் வாரியம். 3 ஒரு-நாள் மற்றும் 3 டி-20 ஆட்டங்களாட. கோவிட் ப்ரச்னையினால் எல்லா மேட்ச்சுகளும் கொழும்பு ஸ்டேடியத்தில்தான் நடக்கும்.

அடுத்த மாத ஸ்ரீலங்கா தொடருக்கான இந்திய அணியில், டெஸ்ட் அணியில் இடம் பிடிக்க முடியாத முக்கிய இந்திய வீரர்கள் சிலரும், சில ஐபிஎல் ஸ்டார்களும் சேர்க்கப்பட்டிருக்கிறார்கள். இந்திய அணிக்கு, முதன்முதலாக ஷிகர் தவன் தலைமை தாங்குகிறார் . தவனிடம் தாளம் போடுமா ஸ்ரீலங்கா !

Chetan Sakariya Is The Find Of The Ipl 2021- Chris Morris | Oneindia Tamil  - Oneindia Tamil

அறுவை சிகிச்சையில் குணம்பெற்றுவரும் தமிழ்நாட்டின் டி.நடராஜனும், மும்பையின் ஷ்ரேயஸ் ஐயரும் அணியில் இல்லை என்பது அவர்களின் துரதிர்ஷ்டம். ஆனால் கர்னாடகாவின் அதிரடி ஓப்பனர் தேவ்தத் படிக்கல், சிஎஸ்கே ஓப்பனர் ருதுராஜ் கெய்க்வாட், தமிழ்நாடு/கேகேஆர் ஸ்பின்னர் வருண் சக்ரவர்த்தி மற்றும் ராஜஸ்தான் ராயல்ஸ்/சௌராஷ்ட்ரா வேகப்பந்துவீச்சாளரான சேத்தன் ஸக்காரியா, டெல்லி/கேகேஆரின் நிதிஷ் ரானா ஆகியோர் இடம் பிடித்து, ஸ்ரீலங்காவை நோக்கி நகர்கிறார்கள். இந்த வருடம் முதன்முதலாக ஐபிஎல்-இல் சேர்க்கப்பட்டு, 5 மேட்ச்சுகளே ஆடியிருக்கும் துடிப்பான ஸக்காரியாவுக்கு எதிர்பாராத எண்ட்ரி!  23 வயதுக்குள், குறிப்பாக கடந்த சில மாதங்களில், பல தனிப்பட்ட துக்கங்கள் நொறுக்கின அவரை: அண்ணனின் தற்கொலை, ட்ரக் ட்ரைவரான 43 வயது அப்பாவின் கோவிட் மரணம்.. முன்னுக்கு வரவேண்டும் ஸக்காரியா..

இந்திய அணி:

ஷிகர் தவர் (கேப்டன்), புவனேஷ்வர் குமார் (வைஸ்-கேப்டன்), ப்ரித்வி ஷா, ஹர்தீக் பாண்ட்யா, தேவ்தத் படிக்கல், நிதிஷ் ரானா, சூர்யகுமார் யாதவ், இஷாந்த் கிஷன், சஞ்சு ஸாம்ஸன், மணீஷ் பாண்டே, க்ருனால் பாண்ட்யா, ருத்துராஜ் கெய்க்வாட், கிருஷ்ணப்பா கௌதம்,  ராஹுல் சாஹர், குல்தீப் யாதவ், யஜுவேந்திர சாஹல், வருண் சக்ரவர்த்தி, தீபக் சாஹர், நவ்தீப் செய்னி, சேத்தன் ஸக்காரியா.

முன்னாள் பாக் கேப்டன், தற்போதைய வர்ணனையாளர் சல்மான் பட் (Salman Butt), ’தங்கள் நாட்டுக்கு ஆடக்கூடிய தேர்ந்த ப்ளேயர்கள் என, இந்தியாவிடம் ஒரு 40-50 பேராவது எப்போதும் இருக்கிறார்கள். அது அவ்வளவு வலிமையான அணி. மேலும் ஸ்ரீலங்காவை காலிசெய்ய, இந்தியாவின் ’B’ டீமே போதும்! -என்றிருக்கிறார். இப்போதெல்லாம் இந்திய வீரர்கள்/அணியைப் புகழ்ந்து ஏதாவது டிவி-யில் சொல்லி, பிரபலமாக முயல்கிறார்கள் பாக் முன்னாள் வீரர்கள்.. பிழைத்துப்போகட்டும்!

மேலே படம்: சேத்தன் ஸக்காரியாவைப் பாராட்டும் க்றிஸ் மோரிஸ் (ராஜஸ்தான் ராயல்ஸ்)

**

கிரிக்கெட்: ஆச்சர்ய இந்திய வெற்றி

நேற்று (28-3-21) புனேயில், ஒரு லாஸ்ட்-ஓவர் த்ரில்லரில் இந்தியா இங்கிலாந்தைத் தூக்கி எறிந்தது. ரிஸல்ட்டை மட்டும் பார்ப்பவர்களுக்கு மேட்ச்சின் அதிர்ச்சிகள்/ஊசலாட்டங்கள் புரிய வாய்ப்பில்லை. டிவி முன் உட்கார்ந்து படபடத்தவர்களுக்கே அந்த உச்சபட்ச அனுபவம்!

டாஸ் தோற்பதில் ரெகார்ட்-ஹோல்டரான இந்திய கேப்டன் கோஹ்லி, நேற்றும் தன் கைங்கர்யத்தைத் தவறாது செய்தார். அதனால் முதலில் பேட்டிங் .  பவர் ப்ளேயில் (1-10) வேகம் காட்டிய ரோஹித்(37), தவன்(67), அடுத்தடுத்து விழுந்தனர். அடுத்து வந்த கோஹ்லியும் அவரது தம்பி ராஹுலும் ஆளுக்கு 7 எடுத்துவிட்டு ஓடினார்கள். இளம் மிடில்-ஆர்டர் பேட்ஸ்மன்களான ரிஷப் பந்த் (78), ஹர்தீக் பாண்ட்யா(64) இருவரும் 12 ஓவருக்குள் 99 விளாசி இங்கிலாந்து பௌலிங்கை ஒரு கை பார்க்க, இந்திய ஸ்கோர் நிமிர்ந்தது. இறுதி ஓவர்களில் பேட் செய்த ஷர்துல் டாக்குர் (30), க்ருனால் பாண்ட்யா (25). இருவரது பங்களிப்பின்றி இந்தியா 300-ஐக் கடந்திருக்காது. கடைசி 3 ஓவர்களில் இந்தியா எடுத்தது 11 ரன். 48.2 ஓவர்களில் ஆல்-அவுட்!  இங்கிலாந்தின் கேப்டன் ஜோஸ் பட்லர்  7 பௌலர்களை பயன்படுத்தினார். ஒவ்வொருவரும் விக்கெட் எடுத்தார்கள். 330 என்கிற இலக்கு இங்கிலாந்துக்கு பெரிய விஷயம் இல்லை. தொடர் இங்கிலாந்திடம் போய்விட்டது எனவே தோன்றியது.

இங்கிலாந்தின் பதிலில், ஆரம்பத்திலேயே அதிரவைத்தார், இந்தத் தொடர் முழுதும் அழகாக வீசி வரும் புவனேஷ்வர். 2 விக்கெட்டுகளை அவர் தூக்க, 3-ஆவதாக வந்த பென் ஸ்டோக்ஸ் (Ben Stokes) நடராஜனிடம் சரிந்தார். (குல்தீப்பிற்கு பதிலாக உள்ளே  டி.நடராஜன். Tactical move என்றார் ‘toss-ஐத் தோற்றுப் பேசிக்கொண்டிருந்த கோஹ்லி). டாவிட் மலனின் (Dawid Malan) அரைசதம். அவர் வீடு திரும்புகையில் இங்கிலாந்தின் தள்ளாட்டம். 168க்கு 6 விக்கெட். ஷர்துல் டாக்குர் (Shardul Thakur) வரிசையாக 3 விக்கெட்டுகளை விரட்டிவிட்டதால் வந்த வினை. அந்த நேரத்தில் இந்த ஆள்! ஆல்ரவுண்டர் சாம் கர்ரன். மோய்ன் அலி கொஞ்சம் துணையிருந்தார். அதற்கப்புறம் ஒன்-மேன் ஷோதான் கர்ரனிடமிருந்து. நடராஜன், பிரசித் கிருஷ்ணா என இந்திய பௌலர்களை வரிசையாகப் பதம் பார்த்தார் கர்ரன். 200/7 என்ற நிலை வருகையில், இங்கிலாந்து ஒப்பேறாது என இந்தியர்களுக்குத் தோன்ற ஆரம்பித்தது. தொடர்ந்து விளாசி 300-ஐக் கடந்து ஸ்கோரைக் கொண்டுவந்துவிட்டார் கர்ரன். இப்போது இந்தியாவுக்கு உதறல். 47-ஆவது ஓவரில் டாக்குரைப் பின்னிப் பெடலெடுத்த கர்ர்ன், 18 ரன் சேர்த்தார். 

50-ஆவது ஓவர். 14 ரன்களே தேவை இங்கிலாந்தின் தொடர் வெற்றிக்கு. சாம் கர்ரன் இன்னும் இருக்கிறார். வேர்க்க விறுவிறுக்க 91-ல். Death over specialist நடராஜனிடம் பந்து. புவனேஷ்வரும் கோஹ்லியும் ஏதேதோ சொன்னார்கள். சிங்கிள் தொலையட்டும்,  சிக்ஸர், பௌண்டரி வராம பாத்துக்கப்பா! – என்றிருப்பார்களோ? முதல் பந்து. நடராஜன் யார்க்கர். தூக்கி அடிக்கமுடியாமல், ஸ்டம்ப் காலியாகிவிடாமல் தடுத்த கர்ரன், லாங்-ஆஃப் திசையில் செலுத்த, முதல் ரன் ஓடினார்கள். ஹர்தீக்கின் ஃபீல்டிங், ஷார்ப் த்ரோ! இரண்டாவது ரன்னுக்கு முயற்சித்த மார்க் வுட் திருப்பி அனுப்பப்பட, ஹர்தீக்கிடமிருந்து சீறிய பந்து ரிஷப் பந்தின் கையில்! கோட்டுக்குள் வுட் பாய்வதற்குள் ஒரே தட்டாகத் தட்ட, பறந்தது பெய்ல்ஸ்! சிவப்பொளி. வுட் காலி. கடைசி ஆளான ரீஸ் டாப்லே (Reece Topley) இறங்கி நடராஜனின் அடுத்த பந்தை எப்படியோ சிங்கிளுக்கு தட்டி, அந்தப்பக்கம் ஓடி நின்றுகொண்டார். எதுக்கு வம்பு! சாம் கர்ரன். நடராஜனின் அடுத்த இரண்டு பந்துகள்.. சிக்ஸா, ஃபோரா? சான்ஸே இல்லை. Dot balls!  5-ஆவது பந்தை கவர் திசையில் பௌண்டரி அடித்தார் கர்ரன். அடுத்த பந்தும் துல்லியமாகக் கீழிறங்க, யார்க்கர். Dot ball. கடைசி ஓவரில் வெறும் 6 ரன்களே அருளினார் நடராஜன்! 7 ரன் வித்தியாச ஆச்சர்ய வெற்றி இந்தியாவுக்கு. கோஹ்லியின் நடராஜன்-அணைப்பு,  ஆட்டபாட்டம் துவங்கியது!

இந்தப் போட்டியில் தோற்க, இந்தியா கடும் முயற்சி செய்ததாகத் தோன்றியது.  காட்ச்சுகள் சர்வசாதாரணமாக கை நழுவின. Poor ground fielding. இந்தியர்களுக்கு ஃபீல்டிங் எப்போதுதான் கைவருமோ! ரவீந்திர ஜடேஜாவின் ஞாபகம் உடனே வருகிறது. He is India’s gun fielder என்று புகழ்ந்தார் ஆஸ்திரேலிய வீரர்  மோஸஸ் ஹென்ரிக்ஸ் (கடந்த வருட ஆஸ்திரேலிய டூரின்போது).

95 நாட்-அவுட் என ஜொலித்த சாம் கர்ரன் Player of the match. இதற்கு முன் இங்கிலாந்துக்காக அவர் அடித்த உச்சபட்ச ஸ்கோர் 15. இங்கிலாந்து குறித்துக்கொண்டதோ இல்லையோ, CSK – யின் தோனி கவனித்திருப்பார். யூஸ் பண்ணிக்குவோம்..!

டெஸ்ட், டி-20, ஒரு-நாள் தொடர்கள் என மூன்றையும் இந்தியாவிடம் தோற்றுவிட்டு இங்கிலாந்து நாடு திரும்புகிறது, ஜூனில் இந்தியா அங்கே வரட்டும்.. பார்த்துக்கொள்வோம் என்கிற சிந்தனையோடு..

**  

கிரிக்கெட்: இங்கிலாந்தின் கொலவெறி !

336 அடித்து வெளியேறிய இந்திய வீரர்கள் நினைத்திருப்பார்கள் – ஹா.. ஹா… தொடர் கைக்குள் வந்துவிட்டது! ஆனல் நடந்ததோ வேறுகதை.

முதலில் ஆடிய இந்தியா இன்னும் சாத்தியிருக்கலாம் என இப்போது தோன்றியிருக்கும்.  ஆனால் துவக்கம் தந்த தடுமாற்றம்,  கோஹ்லி, ராஹுல் டெஸ்ட் மேட்ச் பயிற்சி செய்துகொண்டு, ஓவர்களை ஓட்டியது – எல்லாம் இங்கிலாந்துக்கு அதிசாதகம். ராஹுல் தன் அரைசதம் கடக்கும் வரையிலும் பேட்டை வீசி  அடிக்க முனையவில்லை, கோஹ்லி இடையிடையே சைகை கொடுத்தும்.  பின்னரும்கூட, மெல்ல தன் சதத்தைக் கொணர்வதில்தான் முனைப்பு காட்டியதாகத் தோன்றியது. இதுதான் இந்தியர்களின் குறை – அரை சதம், முக்கால் சதம், முழுசதம் கடப்பது, சாதிப்பது. அணியின் வாய்ப்பு நழுவிக்கொண்டிருக்கிறது என்கிற பிரக்ஞையே இல்லை, சிலருக்கு. Sad.

ரிஷப் பந்த் இறங்குகையில், அவர் மட்டும் ஒவ்வொரு ஓவரிலும் 10-12 ரன் அடிக்கவேண்டும் என  எதிர்பார்ப்பு/ நிலை. இப்படியேதான் ஹர்தீக் மைதானத்திற்கு வருகையிலும். அவர்கள்தான் சரியான பேட்டிங்கைக் காண்பித்தவர்கள்: ரிஷப் 40 பந்துகளில் 77 (7 sixes, 3 fours). ஹர்தீக் (35 in just 16 balls – 4 sixes). இந்த உத்வேகம், ஆவேசம் சீனியர்களான கோஹ்லி, ராஹுலிடம் ஏன் இல்லை என்பதே இந்தியாவின் கேள்வி. பந்த், பாண்ட்யா அதகளத்தினால்தான் இந்தியா 330-ஐத் தாண்டியது.

Ben Stokes
England’s fiery No. 3 !

ஆனால், நேற்று பென் ஸ்டோக்ஸ் இருந்த ஃபார்மில், இந்தியா 360 அடித்திருந்தாலும் இங்கிலாந்து போட்டு சாத்தியிருக்கும். முதல் 12 ஓவர் வரை இந்திய அணுகுமுறை. பிறகு விஸ்வரூபத்தில் இங்கிலாந்து பேட்டிங். போன மேட்ச்சில் தவறவிட்ட சதத்தை இந்தப்போட்டியில்  பிடித்து, தாண்டியும் ஓடிக்காண்பித்தார் ஜானி பேர்ஸ்டோ (124 in 112 balls. 7 fours, 11 Sixes). ஆட்டத்தின் அசல் கவர்ச்சி என்றால் அது X-factor பென் ஸ்டோக்ஸின் 52 ball 99- தான்(4 fours, 10 sixes).  டி-20 சேம்பியன்ஷிப் ஃபைனலுக்கான ஆயத்தமோ!

8 சிக்ஸர்களை எதிரிகளுக்கு வாரி வழங்கிய பெருமை குல்தீப் யாதவையே சாரும்! பாவம். Completely out of form. Casually butchered.  க்ருனால் பாண்ட்யாவும் தப்பவில்லை.  ஷர்துலுக்கும் நேற்று அடி! இதற்கு நேர்மாறாக இந்தியா பேட்டிங் செய்கையில், இங்கிலாந்தின் ஸ்பின்னர்கள் ஆதில் ரஷீத், மோய்ன் அலி அசத்தலாக ரன் அதிகம் கொடுக்காமல் போட்டார்கள். அல்லது – நாம் அவர்களைத் தாக்காது அசடு வழிந்தோம் என்பதே சரி. இத்தனைக் கூத்துகள், குழப்பங்களுக்கிடையில் புவனேஷ்வரும், ப்ரஸித் கிருஷ்ணாவும் துல்லிய வேகம் காட்டினார்கள். 

நாளைய  (28-3-21) இறுதிப் போட்டியிலாவது சூர்யா இறக்கப்படுவாரா? அல்லது ராஹுல் பூஜைதானா? நடராஜன் ஆடினால் நன்றாக இருக்கும் என்கிறார் சஞ்சய் மஞ்ச்ரேகர். யாரிடத்தில் என்பது கேள்வி. குல்தீப் யாதவை நீக்கிவிட்டு யஜுவேந்திர சாஹலுக்கு அனேகமாக கோஹ்லி வாய்ப்பு வழங்கலாம். இங்கிலாந்தின் 1,2,3 – இப்படியொரு அட்டகாசத்தை நாளைக்கும் காண்பித்துவிட்டால், தொடர்வெற்றி அவர்களையே நாடும். இந்தியா ஓடும்.

**

ஒரு-நாள் தொடர்: முதல் வெற்றி இந்தியாவுக்கு

ஷிகர் தவன் (98, 106 balls), ஜானி பேர்ஸ்டோ (Jonny Bairstow) (94, 66 balls) என்று இரண்டு வித்தியாசமான அணுகுமுறை கொண்ட துவக்க ஆட்டக்காரர்களின் சிறப்பான ஆட்டம் கண்ட, புனேயில் நிகழ்ந்த இங்கிலாந்து-இந்திய தொடரின் முதல் ஒரு-நாள் மேட்ச். ஆட்டம் காண்பித்த இருவரும் 90-களில் அவுட்! பின் வந்தவர்களின் சாகசத்தினால் இந்தியா வென்றது.

Jonny Bairstow
England Opener

இந்திய அணியில் இரு புதுமுகங்கள். கர்னாடகாவின் வேகபந்துவீச்சாளர் ப்ரஸித் கிருஷ்ணா. பரோடா கேப்டன் /ஆல் ரவுண்டர் க்ருனால் பாண்ட்யா. ஹர்திக்கின் அண்ணா! தவனும் (98), கோஹ்லியும்(56) சிறப்பாக ஆட ஆரம்பித்து சூடுபிடிக்கும் வேளையில் ஒவ்வொருவராக வெளியேற்றப்பட்டார்கள். 205-க்கு 5 விக்கெட் என்ற இந்திய நிலை. 280-வரை இந்தியா வந்தாலே அதிசயம். அனேகமாக மேட்ச் காலி எனவே தோன்றியது. ஹர்திக் மலிவாக அவுட்டானபின் களத்தில் தன் முதல் இந்திய ஒரு-நாள் இன்னிங்ஸிற்காக இறங்கிய க்ருனால், ஆரம்ப முதலே அதிரடி காட்ட, அடுத்த முனையில் தடுமாறிக்கொண்டிருந்த ராஹுலுக்கும் இதுவரை சமீபத்திய தொடர்களில் காணப்படாத உற்சாகம் கிளம்பியது. ஃபார்மில் இல்லாத ராஹுல் (62), புதுவீரர் க்ருனாலிடமிருந்து அந்த சமயத்தில் இங்கிலாந்து இத்தனை வேகத்தை எதிர்பார்க்கவில்லை! நடந்தது அதுதான். இருவரும் செம பார்ட்னர்ஷிப் காண்பிக்க, இந்தியக் குதிரை திடீரென 300-ஐத் தாண்டி ஓடியது. 318 என இங்கிலாந்துக்குப் பொறி வைத்தது!

Prasidh Krishna, Medium Pacer

இங்கிலாந்தின் பதில்தான் எப்படி இருந்தது ஆரம்பத்தில்! ரோஹித்-தவன் துவக்கிவைத்த இந்தியா முதல் 10 ஓவர்களில் 39 எடுத்தது-கவனமாக ஆடினார்களாம். Conservative, cautious attitude coupled with difficulty in facing the swing! இங்கிலாந்தோ முதல் பவார்-ப்ளேயில்(10 ஓவர்கள்)  89 விளாசியது. தான் இந்த வகைமைப் போட்டிகளில் உலக சேம்பியன் எனக் காண்பிக்க முற்பட்டது போலும். விறுவிறுவென 135-க்கு ஸ்கோர் எகிறுகையில், ஸ்விங் ஆர்ட்டிஸ்ட் புவனேஷ்வர் தவிர்த்து, எல்லா இந்திய பௌலர்களுக்கும் செம அடி. தளராத ப்ரஸித் கிருஷ்ணா, இங்கிலாந்து 135-ல், ஜேஸன் ராயை முதலில் வெளியே பிடித்துத் தள்ளினார். மூன்றில் இறங்கிய ஸ்டோக்ஸ் தடுமாற அவரும்,  94 எடுத்திருந்த ஜானி பேர்ஸ்டோவும் வெளியேற்றப்பட, இந்திய பௌலிங் புத்துயிர் பெற்றுத் தாக்கியது. வழக்கம்போல் ஷர்துல் டாக்குர் அடுத்தடுத்து கேப்டன் மார்கனையும், பட்லரையும் ஒரே ஓவரில் கழுத்தைப்பிடித்துத் தள்ளிவிட இங்கிலாந்துக்கு மூச்சுத் திணறல். பிறகு மொயீன் அலி, கர்ரன் சகோதரர்கள் என இறங்கியும் கதை ஓடவில்லை இங்கிலாந்துக்கு. 251-ல் மரவட்டையாய் சுருண்டு விழுந்தது. ஷர்துல், கிருஷ்ணா, புவனேஷ்வர் பௌலிங்கில் கலக்கினர். 66 ரன் மார்ஜினில் வெற்றி இந்தியாவுக்கு என்பது, கொஞ்சம் ஜாஸ்திதான்! Shikhar Dhawan -Player of the match.

க்ருனால் பாண்ட்யா – 58 ரன், 1 விக்கெட், ப்ரஸித் கிருஷ்ணா 4 விக்கெட் – தங்கள் முதல் போட்டியில். Excellent debuts. நீண்ட நாட்கள் இந்தியாவுக்காக உழைத்து ஆடுவார்களாக.

**