ICC U-19 மகளிர் கிரிக்கெட்: இந்தியா உலக சேம்பியன்

சர்வதேச கிரிக்கெட் கௌன்சிலின் (ICC) முதல் U-19 பெண்களுக்கான உலகக்கோப்பையை இந்திய வீராங்கனைகள் வென்றுவிட்டார்கள். நேற்று (29-1-2023) தென்னாப்பிரிக்காவின் பாட்ஷெஃப்ஸ்ட்ரூமில் (Potschefstroom) நடந்த உலகக்கோப்பை இறுதிப்போட்டியில், இங்கிலாந்தை 7 விக்கெட் வித்தியாசத்தில் அனாயாசமாக வீழ்த்திவிட்டது இந்தியா. சர்வதேச வெளியில், பெண்கள் கிரிக்கெட்டில் இந்தியாவுக்கு கிடைத்திருக்கும் முதல் உலகக்கோப்பை. மாபெரும் கௌரவம்.

19-வயதுக்குட்பட்டோருக்கான இந்திய அணியை 17-வயது ஷெஃபாலி வர்மா (Shefali Verma) அபாரமாகத் தலைமை தாங்கி நடத்திச்சென்றார். (இவர் தன் 15 வயதிலேயே இந்திய சீனியர் மகளிர் அணிக்குத் தேர்வான அதிரடி பேட்டர் (batter). ஆட்டத்தின் முக்கிய கட்டத்தில் விக்கெட் வீழ்த்தும் ஆஃப் ஸ்பின்னரும் கூட. இவருடன் இந்தியாவுக்கு உலகக்கோப்பை போட்டிகளில் அதிக ரன்கள் எடுத்துக்கொடுத்த இன்னுமொரு பேட்டர் ஷ்வேதா செஹ்ராவத் (Shweta Sehrawat). நேற்றைய ஃபைனலில் இவர்களின் விக்கெட்டுகளை இங்கிலாந்து சீக்கிரமே வீழ்த்திவிட்ட நிலையில், இந்தியாவுக்குத் தக்க சமயத்தில் கைகொடுத்துக் கரேயேற்றிவிட்டவர்கள் சௌம்யா திவாரி (Sowmya Tiwari), ஜி. த்ரிஷா எனும் இருவர். Cool and composed. செம ஜோடி!

டாஸ் வென்ற இந்தியா, இங்கிலாந்தை முதலில் பேட் சொன்னபோது, கம்பீரமாக பிட்ச்சில் வந்து நின்றது அவர்களின் துவக்க ஜோடி: கேப்டன் க்ரேஸ் ஸ்க்ரிவன்ஸ் (Grace Scrivens) மற்றும் லிபர்ட்டி ஹீப். இந்தியா வேகப்பந்துவீச்சாளர் டிட்டஸ் சாதுவை  (Titus Sadhu) ஒரு பக்கமும், மறுமுனையில் ஸ்பின்னர் அர்ச்சனா தேவியையும் இறக்கித் தாக்கியது. முதல் ஓவரிலேயே சாது, இங்கிலாந்தின் துவக்க ஆட்டக்காரர் ஹீப்பை காட்-அண்ட்- போல்ட் செய்துவிட்டார். அடுத்த முனையில் எளிதாகத் தெரிந்த அர்ச்சனாவின் சுழல் வீச்சைத் தூக்கி அடித்து ரன் சேர்க்கப் பார்த்தது இங்கிலாந்து. ஆனால் சுழலை சமாளிப்பதில் குழப்பத்தையும் தடுமாற்றத்தையும் மட்டுமே அது வெளிப்படுத்தியது. இந்தியப் பெண்களின் ஷார்ப் ஃபீல்டிங்கும் சேர்ந்துகொள்ள,  இங்கிலாந்தின் ஸ்கோர் முன்னேறமாட்டேன் என்று அடம்பிடித்தது.

Archana Devi takes a stunning one-handed catch

ஏழு ஓவர்களுக்குள், 22 ரன்களிலேயே இங்கிலாந்தின் முக்கிய நான்கு வீராங்கனைகளை ஆளுக்கு இரண்டாக வெளியேற்றிவிட்டார்கள் பௌலர்கள் சாதுவும், அர்ச்சனாவும். கேப்டன் ஷெஃபாலி சாதுர்யமாக இரு முனைகளிலும் மேலும் ஸ்பின்னை நுழைத்தார். பர்ஷவி சோப்ராவும் (Parshavi Chopra), மன்னத் கஷ்யப்பும் (Mannat Kashyap) நெருக்கோ நெருக்கென்று நெருக்க, தடுத்தாடவும் தெரியாமல், அடித்தாடவும் முடியாமல் தடுமாறித் தத்தளித்த இங்கிலாந்தின் இன்னிங்ஸ், 68 என்கிற சொற்ப எண்ணிக்கையில் உயிரை விட்டது. அவர்களது கோச்கள், நிர்வாகிகள் பேயறைந்ததுபோல் மைதானத்தில் உட்கார்ந்திருந்ததை காமிரா படம்பிடித்துக் காண்பித்தது. செமிஃபைனலில் வலிமை வாய்ந்த ஆஸ்திரேலிய அணியை வீழ்த்திய இங்கிலாந்தா இது? நம்பமுடியவில்லை.. இல்லை… இல்லை..!

Indian U 19 Women’s Cricket team lofts the World Cup !

கோப்பையைக் கைப்பற்ற இந்தியாவின் முன் 69 என்கிற இலக்கு. ஆனால் எளிதாக நினைத்துவிடக்கூடாது. இது உலகக் கோப்பை  ஃபைனல். விட்டுவிடாதே… ஜாக்ரதை! – என்று எச்சரிக்கை மணி ஒவ்வொரு இந்திய வீராங்கனையின் மனதிலும் அடித்திருக்கும். அதிரடி ஆட்டத்துக்குப் பேர்போன ஷ்வேதாவும், ஷெஃபாலியும் இந்திய பதில் ஆட்டத்தைத் துவக்கினார்கள். ஷெஃபாலி ஒரு சிக்ஸர், ஒரு பௌண்டரி. 15 ரன்னில் காலியானார். ஷ்வேதா 5 ரன்னில் அவுட் ஆகி வெளியேற, இங்கிலாந்துக்கு ஏகப்பட்ட குஷி. ஸ்பின் போட்டு இந்தியாவை வீழ்த்திவிடலாம் என பொறி வைத்தது. அடுத்ததாக ஆடவந்த பத்தாம் வகுப்புப் பையனைப்போல் காட்சி தந்த சௌம்யாவும்,  எட்டாவது வகுப்பு மாணவி ஒருத்தி கையில் பேட்டுடன் நிற்பது போன்ற தோற்றத்தில் தென்பட்ட த்ரிஷாவும், கஷுக் மொஷுக்கென்றிருந்த  இங்கிலாந்துப் பெண்களுக்கு சிரிப்பை வரவழைத்திருக்கவேண்டும். இவர்களாவது உலகக்கோப்பையை வெல்வதாவது.. என்கிற சிந்தனை அவர்களுக்குள் தலையெடுத்திருக்கலாம். ஆனால் நிலமையின் தீவிரத்தை உணர்ந்திருந்த இந்தியப் பிஞ்சுகள் அயரவில்லை. தளரவில்லை. அதிஜாக்ரதையாக இங்கிலாந்தின் பந்துவீச்சை எதிர்கொண்டார்கள். ஸ்கோர் மெல்ல சீராக உயர்ந்தது. 48 ரன் பார்ட்னர்ஷிப். வெற்றி சில ரன்களில் நிகழ்ந்துவிடும் என்கிற நிலையில் 24 ரன்னில் அவுட் ஆனார் அழகாக பேட்டிங் செய்துகொண்டிருந்த த்ரிஷா. அதே ஸ்கோரில் திறனோடு ஆடிக்கொண்டிருந்த சௌம்யா வெற்றி ரன்னை ஆஃப் சைடில் லேசாகத் தட்டிவிட்டு குதித்துக்கொண்டு மறுமுனைக்கு ஓட.. ஹேய் ! இந்திய கோச்சுகளும், அணிவீரர்களும் மைதானத்துக்குள் பாய்ந்தோடிவந்து சூழ்ந்து கொண்டனர். சில வீரர்கள் சந்தோஷச் சத்தம்போட, சிலரின் கண்களில் உணர்ச்சிப் பிரவாகம் நீராக வழிந்ததைக் காணமுடிந்தது. .

அபூர்வமான இந்த உலகக்கோப்பை ஃபைனலைப் பார்க்க இந்திய வம்சாவளியினர், இந்திய ரசிகர்கள் குழு ஒன்று ஆர்வமாக வந்திருந்தது. ஆட்ட ஆரம்பத்திலிருந்தே வேகவேகமாகக் கொடிகளை அசைத்துக்கொண்டிருந்தது. ஐ லவ் யூ இந்தியா ! – என்றெல்லாம் பேனர்கள். பெண்கள், இளைஞர்கள், வயதானவர்கள், பள்ளி மாணவ, மாணவிகளோடு, சில கருப்பினத் தென்னாப்பிரிக்கர்களையும்  அடக்கிய கதம்பக் கூட்டம் அது. இப்போது இந்தியா! இந்தியா ! – என்று சந்தோஷமாக, சத்தமாக ஆர்ப்பரித்தார்கள் அவர்கள். இந்தியாவின் ஜாவலின் த்ரோ ஒலிம்பிக் சேம்பியன் நீரஜ் சோப்ராவும் உட்கார்ந்து மேட்ச் பார்த்து கைதட்டி, இந்திய அணியை உற்சாகப்படுத்திக்கொண்டிருந்தார். மற்றபடி இங்கிலாந்தின் ரசிகர்களே ரொம்பி வழிந்தார்கள் அந்த தென்னாப்பிரிக்க மைதானத்தில்.

England Captain Grace Scrivens congratulates Indian Skipper Shefali Verma

சர்வதேசத் திறனோடு, போராட்ட, அர்ப்பணிப்பு குணங்கள் நிறைந்த பெண்களினாலும் இந்தியாவுக்கு கிரிக்கெட் உலகக்கோப்பை கிட்டிவிட்டது. இந்திய கேப்டன் ஷெஃபாலி வர்மாவின் கையில் வெற்றிக்கோப்பை வந்ததும் அந்த வீராங்கனைகளின் குதூகலம், ஆர்ப்பரிப்பு காணக்கிடைக்காதது. சேம்பியன்ஷிப்பை வென்ற இந்திய அணியில் ஒவ்வொரு வீராங்கனைக்கும் பதக்கம் ஐசிசியால் வழங்கப்பட்டது. உலகின் நம்பர் 2-ஆக முடிவான இங்கிலாந்து அணி ஏமாற்றத்துடன் தங்களுக்கான மெடல்களைக் கழுத்தில் மாட்டிக்கொண்டு, ஆட்ட முடிவை நம்பமுடியாதவர்கள் போன்று குழப்பமாக ஓரத்தில் போய் நின்றது!

அதிக ரன்களும், விக்கெட்களும் எடுத்த இங்கிலாந்தின் திறன்மிகு கேப்டன் க்ரேஸ் ஸ்க்ரிவன்ஸுக்கு உலக்கோப்பைத் தொடர் ஆட்ட நாயகி விருது வழங்கப்பட்டது. இந்திய வேகப்பந்து வீச்சாளர் டிட்டஸ் சாதுவுக்கு ஃபைனலில் ஆட்டநாயகி விருது.

India’s terrific coach (and former India fast bowler) Nooshin Al Khadeer

இந்த உலகக்கோப்பை வெற்றியில் இந்திய மகளிர் கிரிக்கெட் கோச்சும், முன்னாள் வீராங்கனையுமான நூஷின் அல் காதிரின் (Nooshin Al Khadeer) பங்களிப்பு மிகவும் முக்கியமானது. போற்றத்தகுந்தது என்கிறார் முன்னாள் மகளிர் அணி கேப்டன் மிதாலி ராஜ். கிரிக்கெட் போர்டு, இந்திய ஆண்கள் அணி வீரர்கள், மிதாலி ராஜ், ஜூலன் கோஸ்வாமி போன்ற முன்னாள் மகளிர் லெஜண்ட்கள் ஆகியோரிடமிருந்து பாராட்டு மழையில் இந்திய மகளிர் அணி இப்போது. வென்ற அணிக்கும், கோச் போன்ற பயிற்சியாளர் குழுவுக்குமாக சேர்ந்து ரூ.5 கோடியை நேற்று இரவே பரிசாக அறிவித்துவிட்டது கிரிக்கெட் போர்டு. உலகக்கோப்பையை வென்ற அணியை, புதன்கிழமை அஹமதாபாதில் நடக்கவிருக்கும், இந்தியா – நியூஸிலாந்து மூன்றாவது டி-20 போட்டியை நேரில் பார்க்கவருமாறும் அழைத்திருக்கிறது. அங்கு நிரம்பி வழியப்போகும் நரேந்திர மோதி மைதானத்தில் ரசிகர்கள் முன்னிலையில் உலக சேம்பியன்களான நமது இளசுகளை அறிமுகப்படுத்தும் முன்னெடுப்பு!

உலகிலேயே முதன் முதலாக பெண்களுக்கான டி 20 ப்ரிமியர் லீக் இந்த மார்ச்சில் இந்தியாவில்  துவங்கவிருக்கிறது. இத்தகைய சரித்திர முக்கியத்துவம் வாய்ந்த வருடத்தில் உலகக்கோப்பையுடன் சிலிர்க்கிறார்கள் நமது இளம் பெண்கள்.. ஆஹா!

Brief scores :

England Women Under 19s: 68 all out (17.1 overs)

India Women Under19s: 69 for 3 (14 overs)

**

கிரிக்கெட்: Back in form கோஹ்லியும் வேறு சிலரும்..

பொங்கலன்று ஸ்ரீலங்காவுக்கெதிரான கடைசி ஒரு-நாள் கிரிக்கெட் போட்டியில்  முன்னால் கேப்டன் விராட் கோஹ்லி ஆடிய விதம் (13 பவுண்டரி, 8 சிக்ஸர்), அவர் ஃபார்முக்குத் திரும்பிவிட்டார் என்பதை உறுதிப்படுத்துகிறது. நாளை (18-1-23) ஹைதராபாதில் துவங்கவிருக்கிற நியூஸிலாந்துக்கெதிரான ஒரு-நாள் தொடர் அதை மேலெடுத்துச் செல்லும் என எதிர்பார்க்கலாம்.

கடந்த டிசம்பரில் பங்களாதேஷுக்கு எதிரான தொடர், இந்த மாதம் முடிந்த ஸ்ரீலங்கா தொடர், வரவிருக்கும் நியூஸிலாந்து, ஆஸ்திரேலியாவுக்கு எதிரான ஒரு-நாள் தொடர்கள் – ஏன் இப்படி ஒவ்வொரு அயல்நாட்டு அணியும் வேகவேகமாக இந்தியாவில் வந்து ஆடுகின்றன? வரவிருக்கும் அக்டோபர் –நவம்பரில் இந்தியாவில் நடக்கவிருக்கும் ஐசிசி கிரிக்கெட் ஒரு-நாள் உலகக் கோப்பையே காரணம். இந்திய பிட்ச்சுகளில் ஆடிய அனுபவம் உலகக்கோப்பையில் அவர்களுக்குக் கைகொடுக்கும் அல்லவா?

நியூஸிலாந்து தொடரில் ஆடுவதிலிருந்து கே.எல். ராஹுல், அக்ஷர் பட்டேல் ஆகியோர் கிரிக்கெட் போர்டினால் விடுவிக்கப்பட்டிருக்கிறார்கள் – அவர்களது பர்ஸனல் கோரிக்கைகளின்படி. இந்த இடத்தில் ஆடப் பொருத்தமானவர்கள்: சமீபத்தில் அதிவேக 200 அடித்த இஷான் கிஷனும், ஆல்ரவுண்டர் வாஷிங்டன் சுந்தரும். டி-20 சூப்பர்ஸ்டார் சூர்யகுமாருக்கும் உள்ளே வந்து கலக்க வாய்ப்பு கிட்டவேண்டும். ரோஹித்தையும், கோஹ்லியையும் வெகுநாட்கள் நம்பிக்கொண்டிருக்கமுடியாது. வளர்ந்துவரும் வீரர்களுள் ஒருவரான ஷுப்மன் கில் (Shubman Gill) ஓப்பனராகத் தொடரலாம். அல்லது கிஷன் முன்னேறி அந்த இடத்தைக் கைப்பற்றலாம். ஷ்ரேயஸ் ஐயரும் இடையில். மிடில் ஆர்டர் பேட்ஸ்மன் சஞ்சு சாம்ஸன், இடது கை சுழல் யுஸி சாஹல் – தற்போது காயப் பட்டியலில்!

வேகப்பந்துவீச்சில் ஸ்ரீலங்காவுக்கு எதிரான தொடரில் உத்வேகம் காட்டிய முகமது சிராஜ் முன் வரிசையில் நிற்கிறார். உலகக்கோப்பைக்காகத் தன்னை அவர் கடுமையாகத் தயார்செய்துகொண்டிருப்பது, ஸ்ரீலங்காவுக்கெதிரான கடைசி மேட்ச்சில் அவர் போட்ட பௌலிங் (4 விக்கெட்டுகள்) காண்பித்தது. பும்ரா இன்னும் உடற்தகுதி பெற்று ரெடியாகாத நிலையில், சிராஜ் இந்தியாவின் முக்கியமான வேகப்பந்துவீச்சாளர். ஜம்மு எக்ஸ்ப்ரெஸ் உம்ரான் மாலிக் தன் கரியர் க்ராஃபில் வெகுவான முன்னேற்றம் காண்பித்துவருவதும் மகிழ்ச்சி தருகிறது . ஸ்பின் பிரிவில், குல்தீப் யாதவ் எதிரிகளைத் தொடர்ந்து சிக்கலில் மாட்டிவருகிறார். வாஷிங்டன், அக்ஷர் ஆகியோர் அவர்கூட உலகக்கோப்பை பவனி வரலாம். இருவரும் பேட்டிங்கில் அடித்து விளாசும் திறனுடையவர்கள் என்பதும் போனஸ்.

தொடர், தொடராக பார்க்கவேண்டியிருக்கிறது – இவர்கள் யாவரும் எப்படி ஆடுகிறார்கள் என்பதை. வரவிருக்கும் போட்டிகளில் இவர்களின் பங்களிப்பைப் பொறுத்தே உலகக்கோப்பைக்கான இந்திய அணி முழு உருவெடுக்கும்.

**

Pics from Google: Washington Sundar & Ishan Kishan

ஜொலித்த சூர்யா. விக்கித்துப்போன லங்கா !

ஸ்ரீலங்காவுக்கு எதிரான டி-20 தொடரை முடிவு செய்யும் 3-ஆவது போட்டியில் இந்தியா முதலில் பேட்டிங் செய்தது, அதுவும் ரொம்பச் சரியாகச் செய்தது திருப்திகரமாய் அமைந்தது. இஷான் கிஷன் எளிதாக விழுந்தாலும், தன் இரண்டாவது மேட்ச்சை ஆடிய ராஹுல் த்ரிப்பாட்டி (Rahul Tripathi) லங்கா கேம்ப்பின் மீதான தாக்குதலை ஆரம்பித்துவைத்தார். 16-இல் 35 விளாசி வெளியேறிய த்ரிப்பாட்டிக்குப் பின்  உள்ளே நுழைந்தார் ஸ்கை (SKY). அடுத்த முனையில் ஷுப்மன் கில் (Shubman Gill) நிதானம்.

A hint of Surya’s fireworks !

சில பந்துகளை கவனித்துவிட்டு கில், சூர்யா சில பௌண்டரிகளை அடிக்க, பதற்றத்தில் வேகவேகமாக பௌலிங்கை மாற்றினார் லங்கா கேப்டன் ஷனகா. சூர்யாவுக்கு ஆவேசம் வந்துவிட்டால், எதிரி பௌலர்கள் மைதானத்தை விட்டு ஓடிவிடுவதே நல்லது! ஆனால் அவர்கள்,  ஸ்பின், ஸ்லோ டெலிவரி, wide outside the off-stump என்றெல்லாம் வெரய்ட்டி காண்பிக்க முயல, வந்ததே கோபம் சூர்யாவுக்கு. சுற்ற ஆரம்பித்துவிட்டார் பேட்டை. ஸ்கோர் திடீரென எகிற, ஸ்ரீலங்கா பௌலர்கள், ஃபீல்டர்கள் அடிக்கடி ஆகாசம் பார்க்கவேண்டியதாயிற்று. குறிப்பாக, மதுஷன்காவையும் கருணரத்னேயையும் ஒரு பிடி பிடித்தார் அவர். உட்கார்ந்தவாறும், தரையில் படுத்து உருண்டும் பறக்கவிடப்பட்ட சிக்ஸர்கள், குஜராத் ரசிகர்களை போதையில் கிறுகிறுக்கவைத்தன. மொத்தம் 7 பௌண்டரிகள், 9 சிக்ஸர்கள். வெறும் 45 பந்துகளில் பிடி, சதம் என்றார் சூர்யா. கிடுகிடுத்துப்போனது லங்கா. ஒரு பக்கம் கில் (46), ஹூடா (4), பாண்ட்யா (4) என வெளியேற, அக்‌ஷர் பட்டேலின் (21, 9 பந்துகள்) துணையோடு இறுதிவரை அவுட் ஆகாமல் விளாசிய சூர்யா 112 நாட் அவுட் (51 பந்துகள்)..

ஸ்ரீலங்காவுக்கு இலக்கு 229 ! நாங்களும் காண்பிப்போம் அதிரடி என்பதாக ஆரம்பித்தது லங்கா. கொஞ்சம் ரன் ஏற, விக்கெட்டுகள் ஒருபக்கம் சரிய ஆரம்பித்தன. இந்த மேட்ச்சிலும் ஆடவைக்கப்பட்ட அர்ஷ்தீப் சிங் பௌலிங்கில் கொஞ்சம் முன்னேற்றம் காண்பித்ததாகத் தோன்றியது. 5 நோபால்களுக்கு பதில் 4 வைட் ! அவ்வப்போது பாண்ட்யா எச்சரிப்பது தெரிந்தது. எனினும் 2.4 ஓவர்தான் அவருக்கு வந்தது அதில் 3 விக்கெட்! ஆச்சர்யம். பாண்ட்யா, சாஹல், மாலிக் ஆளுக்கு 2 எடுக்க, ஸ்ரீலங்கா நிலைகுலைந்தது. 17-ஆவது ஓவரில் 137 ரன்களில் அதன் ஸ்கோர் மடிந்தது.

ஒரு கட்டத்தில் இது Surya Vs Sri Lanka என்று ஆகிவிட்டிருந்தது என்றார் கேப்டன் பாண்ட்யா. கோச் ராஹுல் ட்ராவிட் புகழ்ந்தார் சூர்யாவை இப்படி: ”சிறுவயதில், இளம் கிரிக்கெட் வீரனாக வளர்ந்துகொண்டிருக்கையில், நல்லவேளையாக நான் ஆடியதை நீ பார்த்திருக்கமாட்டாய் என நினைக்கிறேன். நிச்சயம் என் ஆட்டத்தைப் பார்த்திருக்கமாட்டாய்! “

இந்தியாவுக்கு தொடர் வெற்றி. இதுவரை உள்நாட்டு டி-20 தொடரை ஸ்ரீலங்காவிடம் தோற்றதில்லை இந்தியா.

ஆட்டநாயகன் விருதை எதிர்பார்த்தாற்போல் சூர்யா சுருட்ட, தொடர்நாயகன் விருதை வென்றார் அக்‌ஷர் பட்டேல். Consistent performance.

ஒருநாள் தொடர் ஜனவரி 10-ல் அஸாம் தலைநகர் குவஹாட்டியில் ஆரம்பம். இரவு-பகல் கூத்து!

**

கிரிக்கெட்: நோ-பால் ஸ்பெஷலிஸ்ட்?

16 ரன்னில்  இரண்டாவது மேட்ச்சைத் தோற்றதில், இந்தியாவின் பரிதாப டி-20 கதையின் திரை விலகுகிறது. ஆரம்ப ஆட்டக்காரர்கள் சொதப்ப, மிடில் ஆர்டர், லோயர் ஆர்டர் என இந்தியாவைத் தாங்குதாங்கெனத் தாங்கிற்று. முதல் போட்டியில் தீபக் ஹூடா–அக்‌ஷர் பட்டேல் ஜோடி. இரண்டாவதில் சூர்யகுமார் யாதவ்-அக்‌ஷர் பட்டேல் இணை. அக்‌ஷரின் ஆக்ரோஷ பேட்டிங் லங்காவின் வயிற்றில் புளியைக் கரைத்தது. இன்னுமொரு போட்டியை குறுகிய மார்ஜினில் தோற்கப்போகிறோமோ எனப் பதற்றம்கொள்ளவைத்தது. கடைசி ஓவரில் அக்‌ஷர் அவுட் ஆகிவிட, லங்கா சமாளித்து வென்றுவிட்டது.

ஆனால் பேச வந்தது அக்‌ஷரின் அபார ஆட்டம்பற்றியல்ல. இந்தியாவின் ஆபாச வேகப்பந்துவீச்சுபற்றி. முதல் ஓவரில் ஹாட்ரிக் நோ-பால். 16 ரன்கள் எதிரிக்குத் தானம். 19-ஆவது ஓவரை இவரை நம்பி கேப்டன் கொடுக்க, இன்னும் ரெண்டு நோபால் எடுத்துக்கோ. 18 ரன்னும் ஒனக்குத்தான் என கேவலப் பந்துவீசிய அர்ஷ்தீப் சிங். இந்த மாதிரி பௌலர்களை வைத்துக்கொண்டு, என்னதான் மாத்தி யோசிக்கும் கேப்டனாக இருந்தாலும் எப்படி ஜெயித்துக்கொடுக்கமுடியும்? போதாக்குறைக்கு ஷிவம் மாவியின் மோசமான கடைசி ஓவரில் 20 ரன்கள் லங்காவுக்கு அன்பளிப்பு. இப்படித்தான் இந்தியா உதவியது லங்காவுக்கு ஸ்கோர் 200-ஐத் தாண்ட!

Pathetic bowling

அர்ஷ்தீப் சிங்கிற்கு பாண்ட்யா தந்தது இரண்டே ஓவர்தான். அதில் 37 ரன். முதல் ஓவரில் வரிசையாக 3 நோபால்கள். டெத் ஓவரில் 2 நோபால்கள். நோ-பால் என்றால் அதற்கு அடுத்து பேட்ஸ்மனுக்கு கிடைக்கும் ஃப்ரீ ஹிட்டும் நினைவில் வரவேண்டும். அர்ஷ்தீப்பின் இந்த வீரதீர சாதனைபற்றி எதிர்பார்த்ததுபோல் கடும் விமர்சனம். காயத்திலிருந்து மீண்டு வந்ததால் இப்படித்தான் இருக்கும், அவரை விமரிசிப்பதற்கு பதிலாக தட்டிக்கொடுக்கவேண்டும் கேப்டன் –  என சப்பைக்கட்டு கட்ட சில வர்ணனையாளர்கள்.. தூக்கு இந்தமாதிரி ஆட்களை அணியைவிட்டு! – எனப் பாயும் கவாஸ்கர், கம்பீர் போன்ற முன்னாள் வீரர்கள்/வர்ணனையாளர்கள். பௌலர் என்பவர் மோசமான பந்துகளை சில சமயங்களில் வீசக்கூடும். அதனால் பேட்ஸ்மனால் விளாசப்படக்கூடும். இதெல்லாம் சர்வதேச கிரிக்கெட்டில் நடப்பதுதான். ஆனால் பௌலிங் க்ரீஸே கண்ணுக்குத் தெரியாதவன் எல்லாம் பௌலிங் போட, நேஷனல் டீமுக்கு ஏன் வரணும்? நோ-பால் போட்டால் என்ன? என் ரெப்யுடேஷன் தெரியும்ல? – என்பதுபோன்ற attitude. கேப்டன் பாண்ட்யா முகத்தைக் கைகளால் மூடிக்கொண்ட காட்சி! இந்த சமயத்தில் தேவை – அனில் கும்ப்ளே போன்ற ஒருவர் கோச்சாக.

Pandya’s plight !

இதே அணியில்தான் வலிமையான வெஸ்ட் இண்டீஸுக்கெதிராக அகமதாபாத் டெஸ்ட் ஒன்றில் விக்கெட் மேல் விக்கெட் சாய்த்த பின்னும்  குதித்துக் கொண்டாடாமல், ஒரு சிரிப்பைக் கூட உதிர்க்காமல்,  கடமையே என அடுத்த பந்தை ஓடிவந்து வீசிய கபில்தேவ் என்றொருவனும் இருந்தான் ஒருகாலத்தில். முதல் இன்னிங்ஸில் மீடியம் பேஸ் வீசி, அடுத்த இன்னிங்ஸில் ஸ்பின் பந்துபோட்டு க்ரெக் சாப்பலை அனாயசமாகத் தூக்கி வீசிவிட்டு, ஏதும் நடக்காததுபோல் ஃபீல்டிங் செய்யப்போன கர்ஸன் காவ்ரி (Karsan Ghavri) என்றொரு ஆல்ரவுண்டரும் இதே அணிக்காக ஆடியவன் தான். தன்னுடைய ஃபார்வர்ட் ஷார்ட்லெக் ஃபீல்டிங் திறமையை மட்டுமே பிரதான ஆயுதமாகக் கொண்டு, எதிரணியைப் பதற்றத்திலே வைத்த ஏக்நாத் சோல்கர் என்பவனும் அப்போது இந்தியாவுக்காக ஆடிக்கொண்டிருந்தான். இவர்களெல்லாம்  சொற்ப சம்பளத்திலும்,  நாட்டுக்காக நாலு மேட்ச் ஆடினாலும் போதும் என்ற பெருமையோடு ஆடியவர்கள். இன்றும் மனதில் நிறுத்தி ரசிகர்களால் கொண்டாடப்படும் தீர்க்கமான வீரர்கள். இப்போதெல்லாம் சிலருக்கு,  முயற்சி அதிகம் இல்லாமலேயே, கோடிக்கணக்கில் வந்து அதுமாட்டுக்கு கொட்டினால் இப்படி அதுகள் அணிக்குள் வந்து நாசம்பண்ணிவிடும் வாய்ப்பும் நிகழ்ந்துவிடுகிறது. காலத்தின் கோலம்..

இன்றைய மேட்ச்சில் அர்ஷ்தீப் சிங்கை பெஞ்சில் உட்காரவைக்கவேண்டும்.  அவரிடத்தில் மீண்டும் ஹர்ஷல் பட்டேல் (முந்தைய மேட்ச்சில் ரன் அதிகம் கொடுத்திருந்தாலும் 2 விக்கெட் வீழ்த்தியவர், பேட்டிங் செய்யவும் தெரியும்) வரவேண்டும். இல்லையெனில் ஆஃப் ஸ்பின் போடுவதோடு, லோயர் ஆர்டரில் ரன் சேர்க்கும் திறமைகொண்ட வாஷிங்டன் சுந்தர் அணிக்குள் கொண்டுவரப்படவேண்டும் – (சுந்தரை எதற்காக பெஞ்சில் உட்காரவைத்து வேடிக்கைபார்க்கிறார்கள் என்பது தெரியவில்லை) மூணாவது மேட்ச்சிலாவது தேறவேண்டும், தொடரைக் கைப்பற்றவேண்டும் என கோச் நினைத்தால். பார்ப்போம், ராஜ்கோட்டில் இன்று என்ன நடக்கப்போகிறது என்று.

**

SL-IND டி-20: மும்பை த்ரில், Pandya’s gamble!

கடைசி ஓவர் களேபரம் நேற்று (03-01-23)வங்கெடேயில். 13 எடுக்கவேண்டும் ஸ்ரீலங்கா வெற்றிக்கு. தான் போட்டிருக்கவேண்டிய ஓவரை அக்‌ஷர் பட்டேலிடம் கொடுத்தார் கேப்டன் ஹார்திக் பாண்ட்யா. ஸ்ரீலங்காவிற்கு ஆச்சர்யம். களத்தில் விளாசும் ஆல்ரவுண்டர் கருணரத்னே, டெய்ல்-எண்டர் ராஜிதா. இன்னும் 2 விக்கெட்வேறு கையில். நாம் ஜெயிச்சிட்டோம் என்று SL dugout ரிலாக்ஸ் ஆகி, கால்களை நன்றாக நீட்டிக்கொண்டு மும்பையின் இரவில் அமர்ந்திருந்தது!

அக்‌ஷரின் முதல் பந்து வைட். 2-ஆவதில் ராஜிதா ஒரு ரன். 3-ஆவதை வைட் என நினைத்து கருணா சும்மா இருக்க, அது வைட் இல்ல தம்பி..dot ball! 4-ஆவதை (legal 3rd) தூக்கி விளாச, சிக்ஸர்! ஸ்ரீலங்கா பக்கம் சட்டெனத் திரும்பிய முள்! 3-பந்தில் 5 ரன்தான் தேவை. மேட்ச் போச்சு இந்தியாவுக்கு –ரசிகர்கள் பதற்றம். அப்படியே பட்டேலும், கிஷனும் டென்ஷன் முகத்தோடு கேப்டனுடன் வாக்குவாதம். ஏன் எங்கிட்ட கொடுத்தே .. நீயே போட்டிருக்கலாம்ல என்று பட்டேல் கேப்டனைக் கேட்டது போல, நீ போட்றபடி போடு.. தோத்தா அதுக்கு நான்தான் பொறுப்பு.. போ.. போய்ப் போடு என்று பாண்ட்யா சொல்வதுபோல் உடல்மொழிகள் துல்லியமாக ஸ்க்ரீனில்.  அடுத்த பந்து அக்‌ஷரின் dot ball ! 2-ல் 5 தேவை. யார்க்கர்போல 5-ஆவதை அக்‌ஷர் வீச, 2 ரன் எடுக்க ஆசைப்பட்டு ராஜிதா ரன் அவுட். ஹூடா த்ரோவில் அக்‌ஷர் காரியம். கடைசிப்பந்தில் 4 தேவை ஸ்ரீலங்காவிற்கு. 109 கி.மீ.யில் வேகத்தோடு போட, மிட்-ஆனில் ஃபீல்ட் ஆனது. அதே ஹூடா. இப்போது த்ரோ விக்கெட்கீப்பருக்கு. ஒரு ஃப்ளாஷில் காரியத்தை முடித்த கீப்பர் கிஷன். மதுஷன்கா ரன் அவுட். லங்கா ஆல் அவுட்160. 2 ரன்னில் த்ரில் வெற்றி இந்தியாவுக்கு என்றது ஸ்கோர்போர்டு!

ஆட்டத்திற்குப் பிறகான நேர்காணலில் பாண்ட்யா : ’வேண்டுமென்றேதான் கடைசி ஓவரை அக்‌ஷரிடம் கொடுத்தேன். அவர்கள் 13 ரன் அடிக்கலாம். நாம் தோற்கலாம். இருந்தாலும் நெருக்கடி  சிச்சுவேஷனை உண்டாக்கி சோதித்துப் பார்க்க எண்ணம். அக்‌ஷர் கடைசி ஓவர் ப்ரெஷரை சாமர்த்தியமாகக் கையாண்டார்.’ என்றார். 4 விக்கெட் எடுத்த புது வேகப்பந்துவீச்சாளர் ஷிவம் மாவிக்கும் பாராட்டு .

முதல் ஓவரில் கிஷன் அடித்த 16 ரன்கள், ஏதோ ஸ்கோர் 180-190 வரை போகப்போகிறது என்கிற கற்பனையை ரசிகர்களிடம் ஓஹோவென வளர்த்துவைத்தது. அடுத்தடுத்து ஹுப்மன் கில், சூர்யகுமார் யாதவ், சஞ்சு சாம்ஸன் என ஒற்றை இலக்க சரிவுகள் இந்தியாவுக்கு ஸ்ரீலங்கா பௌலர்கள் கொடுத்த செட்பேக்ஸ். கிஷனும், பாண்ட்யாவும் மிடில் ஓவர்களைத் தாக்குப்பிடித்து வண்டி ஓட்ட, இறுதி ஜோடியான தீபக் ஹூடாவும், அக்‌ஷர் பட்டேலும்தான் நெருக்கடியை சமாளித்து, இந்தியாவை 150-ஐக் கடக்கவைத்தார்கள். 23 பந்தில் 4 சிக்ஸர்களுடன் 43 நாட் அவுட் என மிரட்டிய ஹூடா ப்ளேயர் ஆஃப் தி மேட்ச். அக்‌ஷர் 31 நாட் அவுட், , கிஷன் 37, பாண்ட்யா 29. தன் முதல் டி-20 மேட்ச்சை ஆடிய Gill, ஏழேடுத்து ஏமாற்றம். சூர்யா, சாம்ஸன் சல்லீஸாக வீழ்ந்ததில் லங்காவுக்கு ஆனந்தம்.

எதிரியின் ரன்-அவுட்டில் ஆனந்தப்படும் பாண்ட்யா, பட்டேல்! (மேலே)

இலக்கைத் துரத்திய ஸ்ரீலங்காவும் ஆரம்பத்தில் சரிந்தது ஷிவம் மாவியிடம். ஆனால் இந்திய ஸ்பின்னர்களை வெளுத்தது. பாண்ட்யா, ஷிவம், மாலிக் ஆகியோரிடம் லங்கா பேட்ஸ்மன்கள் பயந்து பின்வாங்கினார்கள் என்பதும் தெரிந்தது. 144, 145 என வீசிக்கொண்டிருந்த உம்ரான்  மாலிக், திடீரென 155 கி.மீ. (record ball) ஒன்றை ஏவி, வேக ரன்னெடுத்த ஸ்ரீலங்கா கேப்டன்  ஷனகாவை (45) சாஹலிடம் கேட்ச் கொடுக்கவைத்து, வீட்டுக்கு அனுப்பிவைத்தார். ஹஸரங்கா, கருணரத்னா க்லெவர் பேட்டிங்.  இந்திய அணியில், சாஹல், சாம்ஸன், ஹூடா ஆகியோர் அபார ஃபீல்டிங். Super keeping by Ishan Kishan. Lot of saves behind the wicket in a low-scoring match.

Scores (20 overs): India 162/5.  SL 160 all out.Player of the match: Deepak Hooda

**

கிரிக்கெட்: ஸ்ரீலங்காவுக்கு எதிராக ஆடவிருக்கும் இந்திய டி-20 அணி

இந்திய கிரிக்கெட் போர்டில் நேற்றைய இரவின் (27-12-22) நீண்ட ஆலோசனைகளுக்குப் பின், புத்தாண்டில் இந்தியாவுக்கு வரவிருக்கும் ஆசிய டி-20 சேம்பியன் ஸ்ரீலங்காவுக்கு எதிராக ஆட என, இந்திய வெள்ளைப்பந்து கிரிக்கெட் அணிகள் அறிவிக்கப்பட்டுள்ளன.

ஜனவரி 3-லிருந்து டி-20 தொடர் (3 போட்டிகள்) தொடங்குகிறது. ஜனவரி 10-லிருந்து ஒரு-நாள் போட்டிகள் மூன்று. பங்களாதேஷில் தடுமாறிய இந்திய அணியை ஒரு குலுக்கு குலுக்கிப்போட்டதில், சிலரைக் காணவில்லை! சில புதுமுகங்கள் துள்ளுகின்றன. ரன் ஏதும் எடுக்காமல் பங்களாதேஷ் கேப்டனை வம்புக்கிழுத்த விராட் கோஹ்லி, கே.எல். ராஹுல், அரைகுறை ஃபிட்னெஸ் காண்பித்து ஆடிய தீபக் சாஹர் – காக்கா.. காக்கா.. ஹோஷ்.. ! இரண்டாவது டெஸ்ட்டில் நன்றாக ஆடிய ரிஷப் பந்திற்கு இரு தொடர்களிலும் ஓய்வு. ஷ்ரேயஸ் ஐயர் டி-20 அணியில் இல்லை.

Shivam Mavi, Fast bowler

வேகப்பந்துவீச்சில், பழக்கப்பட்ட வீரர்கள் அகற்றப்பட்டு இந்த ஆண்டில் முஷ்டாக் அலி ட்ராஃபியில் (இந்திய தேசிய டி-20) சிறப்பாக பங்களித்த பௌலர்கள் கவனிக்கப்பட்டு சேர்க்கப்பட்டிருப்பது மகிழ்ச்சி தருகிறது. வேகப்பந்துவீச்சாளர்கள் ஷிவம் மாவி (UP/ Gujarat Titans), முகேஷ் குமார் (Bengal/ Delhi Capitals) தேர்வாகி உள்ளனர். கூடவே, வேகப்புயல் உம்ரான் மாலிக் (J&K/ SRH), வேகத்திலும் ஸ்லோ வேலை காண்பித்து பேட்ஸ்மன்களைக் குழப்பும் death-over specialist ஹர்ஷல் பட்டேல் (Haryana/ Royal Challengers Bangalore), Left arm pacer அர்ஷ்தீப் சிங் (Punjab /Punjab Kings) உள்ளே பிரவேசித்திருக்கிறார்கள். இவர்களின் வேகம், ஸ்விங், லங்கர்களை ஒரு கலக்கு கலக்கும் என எதிர்பார்க்கலாம்.  ஸ்பின் டெபார்ட்மெண்ட்டில்: பங்களாதேஷ் தொடரில் சிறப்பாக ஆடிய Off-spinner வாஷிங்டன் சுந்தர் (TN/ Sunrisers Hyderabad), 2022-ல் அதிக விக்கெட்டுகள வீழ்த்திய லெக்ஸ்பின்னர் யஜுவேந்திர சாஹல் (Haryana, Rajasthan Royals), பங்களாதேஷுக்கு எதிராக டெஸ்ட்டில் தன் பேட்டிங் திறமையை வெளிப்படுத்திய ஆல்ரவுண்டர்/ இடதுகை சுழல் அக்ஸர் பட்டேல் (Gujarat/ Delhi Capitals).

ஹார்தீக் பாண்ட்யா கேப்டனாகும் இந்திய டி-20 அணி சுறுசுறுப்பாக இயங்கும் என்பதில் சந்தேகமில்லை. டி-20 உலகின் சூப்பர்ஸ்டாரான சூர்யகுமார் யாதவ் முதன்முதலாக வைஸ்-கேப்டனாக நியமிக்கப்பட்டுள்ளார். ரிஷப் பந்தின் விக்கெட் கீப்பர் இடத்தில்,  ரசிகர்களிடையே ஏகப்பட்ட ஆதரவுபெற்ற (கத்தார் FIFA கால்பந்து கோப்பையிலும் ரசிகர்களின் பதாகை இவருக்கு – Select Sanju Samson !) சஞ்சு சாம்ஸன் (Kerala/ Rajasthan Royals). இன்னொரு ஆப்ஷனாக சமீபத்தில் பங்களாதேஷை இரட்டை சதத்தால் விரட்டோ விரட்டென்று விரட்டி சித்திரவதை செய்த மும்பை இந்தியன்ஸின் இஷான் கிஷன்! ஒருவேளை ஆரம்பத்திலேயே விக்கெட்டுகள் சரிந்தால், மிடில் ஆர்டரில் இந்திய ரன் ரேட்டைத் தூக்கிப்பிடிக்க தீபக் ஹூடா (Rajasthan/ Gujarat Titans) பயன்படக்கூடும். இதுவரை டி-20 யில் சேர்க்கப்படாத, ஃபார்மில் உள்ள ஷுப்மன் கில் (Shubman Gill, Punjab/ Gujarat Titans) அணிக்குள் நுழைந்துள்ளார். அநேகமாக இவரும், இஷான் கிஷனும் ஆட்டத்தைத் துவக்குவார்கள். ருதுராஜ் கெய்க்வாட் (Maharashtra/ CSK) இன்னுமொரு ஆப்ஷன். மிடில் ஆர்டர் அல்லது துவக்கம் என எங்கே நுழையச் சொன்னாலும் ஆடவல்ல, இதுவரை இந்தியாவுக்காக ஆட வாய்ப்பு கிட்டாத, ராஹுல் த்ரிபாட்டியும் (Rahul Tripathi-Maharashtra/ SRH) இருக்கிறார்.

ஸ்பின், வேகம், துவக்க மற்றும் மிடில் ஆர்டர்  என சரியான  காம்பினேஷன் அமைந்திருப்பதாகத் தோன்றுகிறது.வெளியேறவிருக்கும் சேத்தன் ஷர்மாவின் தலைமையிலான தேர்வுக்குழுவுக்கு இந்திய அணிகளை தேர்வு செய்ய, ரோஜர் பின்னி தலைமையிலான கிரிக்கெட் போர்டு கொடுத்திருக்கும் கடைசி வாய்ப்பாகும் இது. புதிய சீனியர் கிரிக்கெட் தேர்வுக்குழு விரைவில் வரவிருக்கிறது.

India T-20 team: Hardik Pandya (Capt), Suryakumar Yadav (VC), Shubman Gill, Rahul Tripathi, Ruthuraj Gaekwad, Ishan Kishan, Sanju Samson, Deepak Hooda, Washington Sundar, Yuzvendra Chahal, Axar Patel, Umran Malik, Arshdeep Singh, Harshal Patel, Mukesh Kumar, Shivam Mavi

அடுத்த பதிவில்  இந்திய ஒரு-நாள் அணி (ODI team) தேர்வை கொஞ்சம் அலசிவைப்போம்..!

**  

சூப்பர்மேன் சூர்யா !

Mount Maunganui-யில் நேற்றைய (20-11-22) டி-20 ஆட்டத்தில் சூர்யப்புயலில் நியூஸிலாந்து பரிதாபமாக சிக்கி சீர்குலைந்தது. டிம் சௌதீ (Tim Southee) அபாரப் பந்துவீச்சு. இருந்தும், 65 ரன் வித்தியாச அதிரடி வெற்றி இந்தியாவுக்கு

ரோஹித், கோஹ்லி, அஷ்வின், ஜடேஜா, பும்ரா போன்ற பெரிசுகள் இல்லாத இந்திய அணி நியூஸிலாந்து டூரில் தற்போது. துவக்க ஆட்டக்காரர் கேஎல் ராகுலும் இல்லாததால் விக்கெட்கீப்பர் ரிஷப் பந்த், இஷான் கிஷனோடு ஓப்பன் செய்தார். பந்த்திற்கு டி-20 ஆட்டமே புரியவில்லை போலும். வந்தார். திரும்பிப்போ டக்-அவுட்டில் உட்கார்ந்துகொண்டார். சும்மா ஒரு ஃபார்மாலிட்டிதான் மைதானத்தில் இறக்குவதும், வெளியேறுவதும் என்பதாக. அவர் இடத்தில் பாண்ட்யா இறக்கினார் (கேப்டனாயிற்றே!) சூர்யகுமார் யாதவை. பற்றிக்கொண்டது மைதானம்! திரளாக கிரிக்கெட் பார்க்க வந்திருந்த ஹாலிடே கூட்டத்திற்கு டாப் க்ளாஸ் பேட்டிங் விருந்து!

இஷான் கிஷன் வேகமாக ஆரம்பித்து 36-ல் அவுட் ஆக, ஷ்ரேயஸ் ஐயரும் ஹிட்-விக்கெட் ஆகி (பகவானே!) வெளியேற,  மைதானத்தில் ஸ்கிப்பர் ஹார்திக் பாண்ட்யா சேர்கிறார் ’இன்–பார்ம்’  சூர்யகுமார் யாதவுடன். 32 பந்தில் 50-ஐத் தாண்டிப் பறந்த சூர்யா, அவர் ஏன் உலகின் மிகச்சிறந்த டி-20 பேட்டராக, கிரிக்கெட் வல்லுநர்களால் பார்க்கப்படுகிறார் என்பதை நியூஸிலாந்து ரசிகர்களுக்கு நிரூபிப்பதுபோல் பேட்டை சுழற்றினார். டெத் ஓவர்ஸ். கவனியுங்கள்: நியூஸிலாந்தின் வேகப்பந்துவீச்சாளர்கள் லாக்கீ ஃபெர்குஸன், ஆடம் மில்ன், டிம் சௌதீ தங்கள் பணியில் சோடை போகவில்லை. நன்றாகத்தான் பந்துவீசினார்கள். குறிப்பாக சௌதீ). ஃபைன் லெக்கில் அனாயாசமான ஃப்லிக் சிக்ஸ், தேர்ட்மேனின் தலைக்குமேல் விர்ரென்று எழும்பி இறங்கிச் சென்ற பௌண்டரிகள், விக்கெட்கீப்பர் அண்ணாந்து பார்க்க, ஸ்டேடியமே ஆஹா என அலற, பௌண்டரியைக் கிழித்த பந்துகள், போறாக்குறைக்கு லாங்-ஆஃபில் எஃபர்ட்லெஸ் சிக்ஸ் வேற. சூர்யா என்ன சாப்பிட்டு வந்தாரோ! நியூஸிலாந்தின் கேப்டன் வில்லியம்சனுக்குத் தெரிந்துவிட்டது. நான் என்னதான் பௌலிங் மாற்றினாலும், ரிஸல்ட் அதேதான் வரும். போச்சு இந்த மேச்சு!

கடைசி ஓவர்க் கூத்தில் நியூஸி பௌலர் சௌதீ அபாரம். ஸ்ட்ரைக்கில் இருந்த பாண்ட்யா தானும் தன் பங்குக்கு ஒரு  சிக்ஸர் போட்டுவைப்போம் எனத் தூக்க, எளிதான கேட்ச்சில் வெளியேற்றம். அப்போது வந்த ஹிட்டர் ஹூடா தன் முதல் பந்தை நேராக ஷார்ட் ஃபைன்லெக்கில் கைமாற்றிவிட்டு தலையை சிலுப்பிக்கொண்டு வெளியேறல். அடுத்து அனுப்பப்பட்ட வாஷிங்டன் சுந்தர் சுதாரிக்கவேண்டாம்? ஹாட்ரிக் பந்தாயிற்றே.. க்ரவுண்டில் தட்டி ஓடி, சூர்யாவை அடிக்கவிடுவோம் எனத் திட்டம் வேண்டாம்? என்ன செய்ய? கடைசி ஓவர் பரபரப்பில் அவரும் லாங் ஆஃபில் தூக்கிவிட, பௌண்டரியைக் கடக்க மாட்டேன் என அடம் பிடித்த பந்து ஃபீல்டரின் கையில் தஞ்சம்! டி-20 கிரிக்கெட்டில் டிம் சௌதீக்கு இரண்டாவது ஹாட்ரிக். நியூஸிலாந்து முகாமில் சிறிது வெளிச்சம். இத்தகைய ஆக்‌ஷன் –பேக்ட் கடைசி ஓவரில் சூர்யாவுக்கு விளாச வாய்ப்பே வரவில்லை. கடைசி பந்தை புவனேஷ்வர் குமாருக்கு போடப் போகையில், எதிர்த் திசையில் நின்றிருந்த சூர்யாவின் இயலாமையைக் கண்டு சிரித்தவாறு, அவரை அணைத்துத் தட்டிக்கொடுத்துவிட்டு செல்கிறார் சௌதீ! இந்தியா 170-ஐத் தாண்டினால் போதும் என்றிருந்த நிலையில் 191வரை சென்றுவிட்டது. 51 பந்துகளில் 111 நாட்-அவுட் நம்ம ஹீரோ சூர்யா. 11 fours, 7 sixes. இதுவல்லவா இன்னிங்ஸ் என்றிருந்தது மைதானத்திலும், டிவிக்கு முன்னாலும் கண்டுகளித்த ரசிகர்களுக்கு. சூர்யாவிடமிருந்து புயல்போல் வந்த டி-20 இரண்டாவது சதம். ப்ளேயர் ஆஃப் தி மேட்ச்சை அவருக்கு பரிசளித்தது.

பதிலளிக்க பேட்டிங் செய்த நியூஸிலாந்து வரிசையாக, குறிப்பாக இந்திய ஸ்பின்னர்களிடம்  தன் விக்கெட்டுகளைப் பறிகொடுத்தது. பெரிதும் எதிர்பார்க்கப்பட்ட துவக்க ஆட்டக்காரர் ஃபின் ஆலனும் (Fin Allen) , மிடில் ஆர்டர் க்ளென் ஃபிலிப்ஸும் (Glenn Philipps) க்ளிக் ஆகவில்லை. வில்லியம்ஸனின் போராட்டம் வீணாக பாண்ட்யாவின் இந்தியா வென்றது. பார்ட்-டைம் ஆஃப் ஸ்பின்னர் தீபக் ஹூடாவுக்கு 4 விக்கெட்டுகள். முதல் போட்டி மழையிடம் பறிபோக, இந்தியா இரண்டாவதைப் பறித்துக்கொள்ள, மூன்றாவது போட்டியில் (நேப்பியர், 22-11-22) நியூஸிலாந்து வித்தை காட்டுமா?    

நியூஸிலாந்தின் முன்னாள் கேப்டன் மற்றும் இந்நாள் வர்ணனையாளர் ராஸ் டேலர்: பேட்டிங் செய்ய அவ்வளவு தோதான பிட்ச் இல்லை இது. இருந்தும் நியூஸி பௌலர்களோடு இஷ்டத்துக்கும் ‘விளையாடிக்கொண்டிருந்தார்’ சூர்யா. நானும் நியூஸிலாந்தின் கரைகளில் மக்கல்லம், மன்ரோ, மார்ட்டின் கப்ட்டில் என அதிரடி இன்னிங்ஸ் சில பார்த்திருக்கிறேன். சூர்யாவின் இந்த இன்னிங்ஸ் எல்லாவற்றிற்கும் மேலே இருக்கவேண்டியது. நம்ப முடியாதது.

Brief Scores : India 191/6.   New Zealand 126 all out.

**

ஆசிய கோப்பை கிரிக்கெட்: ஆஹா..வட போச்சே!

”காக்கா, ‘கா..கா..’ன்னு கத்திச்சா.. வடை கீழே விழுந்திருச்சு.. நரி தூக்கிட்டு ஓடிருச்சு..!” – ஆசியகோப்பை 2022-ன் கதைச் சுருக்கம்.

ஃபைனலுக்கு ஒரு நாள் முன்னால் பாகிஸ்தான் கிரிக்கெட் போர்டு தலைவர் (முன்னாள் வீரர்) ரமீஸ் ராஜா, துபாய்க்கு வந்து தங்கள் அணியின் வியூகம், வீர தீர மகாத்மியத்தைப்பத்தி, கூடவே இந்தியா வெளியேற்றப்பட்ட விதம் (சந்தோஷம்) பற்றி அபாரமா கமெண்ட் அடிச்சிவிட்டிருந்தார் (ஸ்ரீலங்கா ஃபைனலில் இருப்பதைப்பற்றிப் பேசியதாகத் தெரியவில்லை!): ’’இந்தியாவிடம் திறமையான வீரர்கள் அதிகம்தான். அதுக்காக இப்படி அடிக்கடி டீமை மாத்தியிருக்கக்கூடாது. அதான் டீம் செட் ஆகல.. க்ரூப் 4-லேயே வெளியேறும்படி ஆகியிருச்சு. ஆனா.. பாகிஸ்தான் அப்படிச் செய்யல. எங்களோட பெஸ்ட் 11-ஐ மெய்ண்ட்டெய்ன் பண்ணி, முனைப்பா ஆடினோம். வந்துட்டோம் ஃபைனலுக்கு!’’ (இனி என்ன, கோப்பை எங்களுக்குத்தான்!-னு சொல்லவேண்டியதுதான் பாக்கி). வாயைத் திறந்து காக்கா கத்த, வடை கீழே விழ, லங்கா தூக்கிட்டு ஓடிருச்சு..

Sri Lanka lifts Asia Cup 2022

வியூகக் கணக்குகளையும், திறமைகளையும் தாண்டி, கிரிக்கெட் ஒரு விசித்திர விளையாட்டு. ஒரு சில ஓவர்களில், ஒரு சில விளாசல்களில் கதை மாறிவிடும். எத்தனைப் பார்த்திருக்கிறோம். டாஸ் வென்றபின், முதலில் பேட்டிங் செய்ய பாகிஸ்தானால் அனுப்பப்பட்ட ஸ்ரீலங்கா 36 ரன்களில் 3 விக்கெட்டுகளை இழந்து முழித்தது. 58 ரன் எடுக்கையில் 5 விக்கெட்டுகள் காலி! பாகிஸ்தான் கோப்பையை கையால் தொட்டுவிட்ட நிலை. பச்சை-வெள்ளைகளின் உற்சாக ஆரவாரம். இயற்கைதானே. அப்படித்தான் இருந்தது மைதானத்து நிலமை. ஆனால் மிடில் ஆர்டர் பேட்ஸ்மன் பனுகா ராஜபக்சவும் (Bhanuka Rajapaksa) , ஆல்ரவுண்டர் வனிந்து ஹஸரங்காவும் ஒரு தீர்மானத்துடன் களத்தில் இறங்கியிருந்தார்கள். பாகிஸ்தானின் பெஸ்ட் பௌலர்களான, நஸீம் ஷா, ஹஸ்னெய்ன், ஷதாப் கான் ஆகியோரை ஆக்ரோஷமாகத் தாக்கி, ரன்களை வேகமாக அடுக்கினார்கள். பாகிஸ்தான் திணறியது. டென்ஷனில் கேட்ச்சுகளை நழுவவிட்டது. 120-130 -ஐத் தாண்டாது ஸ்ரீலங்கா ஸ்கோர் என நினைத்திருக்கையில், 170-ல் போய் நின்றது. ராஜபக்ச 71. சிக்ஸர் 3, பௌண்டரி 6 என சூப்பர் ஆட்டம்.

பாகிஸ்தான் கோப்பைக்கான இலக்கை நோக்கி இறங்குகையில், துவக்க ஆட்டக்காரர் முகமது ரிஸ்வான் மட்டும் ஆடினார் நன்றாக. விராட் கோஹ்லியோடு அடிக்கடி ஒப்பிடப்படும் பாக். சூப்பர்ஸ்டார் கேப்டன் பாபர் 5 ரன்னிலே ஓட்டம். அடுத்துவந்த ஃபகர் ஸமனும் (Fakhar Zaman) ரன் எடுக்காமலே காலி. லங்காவின் பிரமோத் மதுஷன் லியனகமகே ( பல் சுளுக்கிக்கிது) படுதுல்லியப் பந்துவீச்சு. 4 விக்கெட்டுகள். போதாக்குறைக்கு மகேஷ் தீக்‌ஷனா (Maheesh Theekshana), ஹஸ்ரங்காவின் ஸ்பின் வேற. பாகிஸ்தான் தடதடத்தது. நொறுங்கி, 147-ல் வாயைப் பிளந்தது.

வெகுவருஷங்களுக்குப் பின் ஸ்ரீலங்காவுக்கு ஆசிய கோப்பை. நினைத்துப் பார்க்கையில், இந்தியா, பாகிஸ்தானோடு ஒப்பிடுகையில் அதிகம் பேசாத லங்கர்கள். முனைப்போடு இலக்கை நோக்கி நகர்ந்தவர்கள். கோச் க்றிஸ் சில்வர்வுட்டும் (Chris Silverwood), கேப்டன் தஸுன் ஷனகாவும் (Dasun Shanaka) காட்டிய தீவிரம். உழைப்பு.  கோப்பைக்குத் தகுதியானவர்கள்தான் ஸ்ரீலங்கா அணி.

Asia Cup Final -Score: Sri Lanka 170 for 6. Pakistan 147 all out.

**

கோஹ்லிக்கு சதம். இந்தியாவுக்கு?

ஓவராக சிந்தித்து, திட்டம் தீட்டி, என்னென்னவோ செய்து ஆசிய கோப்பையைத் தவறவிட்டுவிட்டது ராஹுல் திராவிட் / ரோஹித் தலைமையிலான இந்தியா. க்ரூப் 4-ல், ஸ்ரீலங்காவிடம் தோற்றவுடனேயே இந்திய அணியின் வீடு திரும்பலுக்கான ஏர் டிக்கெட்டுகள் புக் செய்யப்பட்டுவிட்டனதான். இருந்தாலும் பாக்கி இருக்கும் ஒரு மேட்ச்சை ஆடித்தானே ஆகவேண்டும். ஐசிசி விடாதே! சரியாக முயற்சிக்கப்படாத வீரர்களுக்கு மேலும் வாய்ப்புகொடுக்கலாம் என்கிற சிந்தனையில் (!), கேப்டன் ரோஹித், பாண்ட்யா, பிஷ்னோய் போன்றவர்கள் விலக, மீதமுள்ள இந்திய அணி இறங்கியது துணைக்கேப்டன் ராஹுல் தலைமையில், ஆஃப்கானிஸ்தானுக்கெதிராக.

Coach Dravid, Captain Rohit

ஆசிய கோப்பை போட்டிகளில் ஆடிய இந்திய அணித் தேர்வினை கூர்ந்து கவனித்தால் ஒன்று புரியும். ஒரே ஒரு வீரரைத் தவிர கிட்டத்தட்ட எல்லோரும் உள்ளே.. வெளியே ஆட்டம் ஆடிக்கொண்டிருந்தார்கள். அதாவது ஆடவைக்கப்பட்டார்கள். தான் நீக்கப்படுவோம் என்கிற கவலையோ, பயமோ இல்லாமல் எல்லா மேட்ச்சையும் வரிசையாக ஆனந்தமாக ஆடிய ஒரே வீரர் விராட் கோஹ்லி. ஃபார்மில் இல்லாத கோஹ்லி அணியில் ஏன் என்கிற அளவுக்கு ஆசிய கோப்பையின் ஆரம்பத்தில் எரிச்சலூட்டியது அவரது தேர்வு. ஆயினும் இந்திய அணி அவரை மட்டும் ஆடு பார்க்கலாம்.. ஆடு என ஆடவைத்தது. சரியாக அவர் ஆடாவிட்டாலும் அழகுபார்க்கும் மனநிலையில் இருந்தது நிர்வாகம். அணியின் வெற்றிவாய்ப்பெல்லாம் முக்கியம் அல்ல, கோஹ்லி என்கிற கிரிக்கெட் ஸ்டாரை, கார்ப்பரேட் செல்லக்குழந்தையை எப்படியாவது ஃபார்முக்குக் கொண்டுவந்துவிடவேண்டும் என்கிற முயற்சியில் முனைப்பு காட்டிக்கொண்டிருந்த  ராஹுல் திராவிட் & கோ! தைர்யம் கொடுக்கப்பட்ட நிலையில், கோஹ்லியும் சஞ்சலமின்றி ஆடி ஆடி, ரன்னும் கொஞ்சம் கொஞ்சமாக சேர்த்து, இறுதிவாய்ப்பை இழந்துவிட்ட இந்தியாவின் கடைசி போட்டியில் சதம் அடித்துவிட்டார். எண்ணற்ற வாய்ப்புகளை விழுங்கி, 1000 நாட்களுக்கப்புறம் ஒரு சதம். வாயெல்லாம் பல் அவருக்கு. ஆளில்லா ஸ்டேடியத்தில் இந்திய ரிசர்வ் வீரர்கள், கோச், மற்றும் இன்னபிறக்கள் கைதட்டி சிரித்துக்கொண்டிருந்தன நேற்று இரவு(8-9-22). வாழ்த்துகள்.. வாழ்த்துகள்! நாலா திசையிலிருந்தும் வந்துவிழும் வாழ்த்துகள்..

Chetan Sharma, Chief Selector, India

இந்தியா நடப்பு சேம்பியனாக இருக்கும் ஆசிய கிரிக்கெட் சேம்பியன்ஷிப் போட்டிகள் எக்கேடுகெட்டாவது போகட்டும். கோப்பையை பாகிஸ்தான் வெல்லட்டும், இல்லை, லங்கா லவட்டிச் செல்லட்டும். நமக்கு நம்ம கோஹ்லி ஃபார்முக்கு வந்தாச்சு..! இதுதான் இந்திய கிரிக்கெட் போர்டின் குறிக்கோள் போலத் தெரிகிறது. வேறெந்த நாட்டிலும் 3 வருடமாக ஃபார்மில் இல்லாத ஒரு சீனியர் ப்ளேயருக்கு இப்படி ஒரு அதீத முக்கியத்துவம், (இளம் வீரர்களைத் தடுத்த நிலையில்-at the cost of young, promising players) தொடர் வாய்ப்புகள்  தரமாட்டார்கள். இந்த காலகட்டத்தில் இரண்டு இளம் வீரர்களை அவரிடத்தில் தயார் செய்து விட்டிருப்பார்கள். அத்தகைய முனைப்புதான் அணியின் எதிர்காலம் குறித்து ஒரு நாட்டின் கிரிக்கெட் நிர்வாகத்திற்கு இருக்கவேண்டிய தொலைநோக்குப் பார்வை. இந்திய விளையாட்டு நிர்வாகிகளுக்கு நாடு, அணி, வெற்றிவாய்ப்பு எல்லாம் ஒரு பொருட்டல்ல. ஹீரோ! சூப்பர் ஸ்டார்! புகழ்.. இப்படி ஹீரோ வர்ஷிப் செய்துகொண்டு, கதைபேசியே காலம் ஓட்டுபவர்கள் இந்தியர்கள். நினைத்து வருந்த வேண்டிய விஷயமிது.

கோஹ்லி எப்படியோ ஃபார்முக்கு திரும்பியது நல்லதாப்போச்சு என முடியக்கூடும். ஆஸ்திரேலியாவில் நடக்கவிருக்கும் உலகக்கோப்பை போட்ட்டிகளில் அவர் விளாசக்கூடும்தான். அப்படி நடந்தால் அணிக்கு நல்லது. ஆனால் ஒரு ஆளை நம்பி உலகக்கோப்பை கைமாறிவிடாது! கிரிக்கெட் ஒரு ’அணி விளையாட்டு’. ஒருத்தர் மட்டுமே ஃபார்மில் இருந்தால் போதும், உலக சேம்பியனாகிவிடலாம் என ஆட்டம் காட்டும் விளையாட்டல்ல கிரிக்கெட். இதனை நமது கிரிக்கெட் போர்டு நிர்வாகிகள் இனிமேலாவது தெளிவாகப் புரிந்துகொள்ளவேண்டும். ஒருத்தரையே பிடித்துக்கொண்டு தொங்கிக்கொண்டிராமல், எதிர்கால ஸ்டார்களை வளர்த்து, உருவாக்குவதில் கவனம் செலுத்தவேண்டும்.

**   

இந்தியா-பாகிஸ்தான் கிரிக்கெட்: ஜெய் ஹிந்த் !

அனல் பறந்த ஆசியக்கோப்பை கிரிக்கெட்டில், ஆயிரக்கணக்கில் ஸ்டேடிய ரசிகர்கள் மூவர்ணத்துடனும், பச்சை-வெள்ளையுடனும் ஆர்ப்பரிக்க, துபாயில் நேற்று இரவு (28-8-22) இந்தியா பாகிஸ்தானைப் பழிதீர்த்தது! ஆல்ரவுண்டர்கள் ஹார்திக் பாண்ட்யா, ரவீந்திர ஜடேஜா ஆகியோர் இந்திய அணியின் வெற்றி வியூகங்களில் தங்களின் பங்கு எவ்வளவு கூர்மையானது என மீண்டும் ஒருமுறை கோடிட்டுக் காண்பித்தார்கள்.  இவர்களின் ஆட்டத்திறனும், மன உறுதியும் ஒரு கட்டத்தில் பாகிஸ்தானின் கைப்பிடியிலிருந்த ஆட்டத்தை அஸால்ட்டாக லாவி  இந்தியாவின் கைக்கு மாற்றியது. கிரிக்கெட் இரவின் அதீத போதை உலகெங்குமுள்ள இந்திய ரசிகர்களைக் கிறுக்கிறுக்கவைத்தது! கடைசி ஓவர் சிக்ஸரில் வெடித்த இந்திய வெற்றி 11:40-க்கு பெங்களூரில் எங்கள் ஏரியாவில் வாணவெடிகளை படார் படாரென  மேலுயர்ந்து சிதறவைத்தன. தூங்காத இளைஞர்கள், சிறுவர்கள் வீதிகளில் வந்து கோஷமிட்டுக்கொண்டிருந்தார்கள். இது சிலபல இந்திய நகரங்களில் நிகழ்ந்திருக்கும்தான்.

துபாய் மேட்ச்சின்போது கொடிகளின் ஆட்டபாட்டம் (Courtesy; DNA, Mumbai)

டாஸை வென்று பாகிஸ்தானை உள்ளே அனுப்பிய இந்தியா, வேகவேகமாக எதிரியின் விக்கெட்டுகளுக்கு வேட்டு வைத்தது. பும்ரா, ஷமி டீமில் இல்லை என்கிற உணர்வே ஏற்படவில்லை. எதிர்பார்க்கப்பட்ட பாக். கேப்டன் பாபர், ஃபகர் ஜமன், குஷ்தில் ஷா போன்றவர்கள் அடிக்கவிடாமல் வெளியேற்றப்பட, விக்கெட் கீப்பர் முகமது ரிஸ்வான்(43) பொறுப்பாக ஆடினார். துணை ஓரளவு கொடுத்தவர் இஃப்தகார்அஹ்மது (28). மற்றவர்கள் சும்மா ’ஆயாராம்.. கயாராம்’ தான்! புவனேஷ்வர் குமார், ஹார்திக் பாண்ட்யா. அர்ஷ்தீப் சிங் என இந்திய வேகப்பந்துவீச்சு விளையாடிக் காண்பித்தது. ஒரு கட்டத்தில் 130-க்கருகில் பாகிஸ்தான் சமாப்தி ஆகிவிடும்போலிருந்தது. 10, 11 எண்வரிசையில் ஆடிய பாக். பௌலர்கள் சிக்ஸர், பௌண்டரி எனக் காட்டியதால் 147 வரை போய்விட்டது. புவனேஷ்வர் குமார் 4, பாண்ட்யா 3, அர்ஷ்தீப் சிங் 2, ஆவேஷ் கான் 1 எனப் பாகிஸ்தானை நிலைகுலைய வைத்தார்கள். ஸ்பின்னர்கள் விக்கெட் எடுக்காதது ஆச்சரியம். கேட்ச்சுகளை நழுவவிட்டதும் காரணம். இந்திய ஃபீல்டிங் மோசமாகத்தான் இருந்தது.

இந்தியா 148-ஐத் துரத்துகையில், முதல் பந்தில் ரோஹித் ஒரு ரன் எடுக்க, அடுத்த பந்தில் வீட்டுக்கு ஓடிவிட்டார் துணைக் கேப்டன் ராஹுல்! ஃபார்மைத் தேடும் கோஹ்லி அடுத்தாற்போல். இந்த விக்கெட்டும் எந்த நிலையிலும் விழுந்துவிடும் என ரசிகர்கள் சலித்திருக்க, வெகுநாட்களுக்கப்புறம் கோஹ்லி சில நல்ல ஷாட்களை ஆடி ஆச்சர்யப்படுத்தினார். ரன்கள் ஆரம்பத்தில் ஏற அவர்தான் காரணம். ஃபார்மில் வந்துவிட்டார்யா நம்ப பழைய கேப்டன், இன்று மேலும் எதிர்பார்க்கலாம் என ரசிகர்கள் ஆர்வமாகையில் சிக்ஸர் அடிக்க பிரயத்னப்பட்டு பாக் ஸ்பின்னர் நவாஸிடம் வீழ்ந்தார். சேர்த்த ரன்கள் 35. டீஸண்ட். நாலாவதாக ஆடவந்தார் ரவீந்திர ஜடேஜா. தூக்கி விளாசும் திறனுள்ள ஜடேஜாவால் நிதானமாகவும் ரன் சேர்க்கமுடியும் என்பதே காரணம். அவர் ஏமாற்றவில்லை. முதலில் சூர்யகுமாருடன் சிறிய பார்ட்னர்ஷிப். அப்புறம் பாண்ட்யாவுடன் சேர்ந்துகொண்டு இந்தியாவுக்கு வெற்றி வாங்கித்தந்தபின் தான் வெளியேறவேண்டும் என்று சங்கல்பம் செய்துகொண்டு வந்திருந்தார்போலும். அடுத்த பக்கம் பாண்ட்யா நிலைமை மோசமாகிவிடக்கூடாது என்பதில் கவனம் காட்டி நிதானம், அவ்வப்போது அதிரடி என பாகிஸ்தானுடன் பந்துவிளையாட ஆரம்பித்திருந்தார். ஜெயித்துவிடலாம் என மனப்பால் குடித்திருந்த பாகிஸ்தானுக்கு இப்போது வியர்வை மழை. இவன்களைப் பிரித்தாலொழிய வெற்றி சாத்தியமில்லை என்பதைப் புரிந்தவாறு அபாரமாக பந்துவீசியது, ஃபீல்டிங் செய்தது எதிரி அணி. ஒரு கட்டத்தில் பௌண்டரி வரும் என்றே தோன்றவில்லை. ஜடேஜாவும், பாண்ட்யாவும் சிங்கிள், சிங்கிளாக வியர்க்க வியர்க்க ஓடிக்கொண்டிருந்தார்கள். ஒரே காந்தாக காந்திய துபாயின் மோசமான சீதோஷ்ண நிலை மைதானத்தில் அனல் அலைகளைப் பரப்பிவைத்தது.

கால் சுளுக்கை/வலியை வாழ்வில் முதன்முறையாக அனுபவிக்கும் அப்பாவி பாக். வீரர்கள்!

18-ஆவது ஓவர் போடப்படுகையில் இந்தியா ஜெயித்துவிடும்போலிருக்கிறதே என்கிற பதற்றம் பாகிஸ்தானி கேம்ப்பில் அதிகரிக்க ஆரம்பித்திருந்தது. ஓவரைப் போட்ட பாக். பொடியன் சர்வதேச டி-20 யில் முதல் மேட்ச் ஆடிய நஸீம் ஷா.  தன்னை  அபார பௌலராக (வந்தவுடனேயே ராஹுலின் விக்கெட்டை எடுத்தாகிவிட்டதல்லவா), நஸீம் காட்ட முயற்சித்ததில் தவறில்லை. ஆனால் தான் ஒரு சிறந்த நடிகனும்கூட எனக் காட்டி விருது பெற முயன்றதுதான் எரிச்சலையும், அதிர்ச்சியையும் ஒருசேர மைதானத்தில் பரப்பியது. ஃபீல்டிங், பௌலிங்கின் போது கால் சுளுக்கு ஏற்படலாம்தான். அதற்காக இப்படியா? ஓடிவந்து பந்துவீசிய பின் கால் நொண்டல், சுளுக்கு.. ஆ… ஓ… என்றுமுகத்தை அஷ்டக்கோணாலாக வைத்துக்கொண்டு, பிட்ச்சில்உட்காந்து, சரிந்து புரண்டது நாடகத்தின் உச்சபட்ச காட்சியானது. பாக்.  டீமின் ஃபிஸியோ (மருத்துவ உதவி) மைதானத்துக்கு ஓடிவந்து அவரை கவனித்துக்கொண்டிருக்கையில், பாக். டீமே அவரைச் சுற்றிக்கொண்டு என்னவோ அவர் உயிருக்குப் போராடிக்கொண்டிருப்பதுபோலான சீன்களை ஏற்படுத்தியதும்,  ஆட்டத்தை அளவுக்கு அதிகமாக நிறுத்தி தாமதத்தை ஏற்படுத்தியதும், நெருக்கடி நேரத்தில்  ரசிகர்கள், கிரிக்கெட் நிர்வாகிகளிடையே அதிர்ச்சியையும், குழப்பத்தையும் ஏற்படுத்தியது. அம்பயர்களின் நிலையைப்பற்றிச் சொல்லவேண்டியதில்லை. மருத்துவ டீம் வந்து காலைப்பிடித்துவிட்டு, ஸ்ப்ரே அடித்து சரிசெய்துவிட்ட அகன்ற பின்னும், பௌலரின் ஆக்டிங் டிராமா தொடரும் என்பதை யாரும் எதிர்பார்க்கவில்லை. அவ்வளவு வலி இருந்திருந்தால், ஆடமுடியாத நிலையென்றால்  நஸீம் பெவிலியன் திரும்பியிருக்கவேண்டும். பௌலிங்கைத் தொடர்ந்திருக்கவேண்டிய கட்டாயம் ஏதுமில்லையே. அவருக்கு பதிலாக அந்த ஓவரின் மீதிப் பந்துகளை வேறொரு பௌலரைவைத்துப் போடச்சொல்லி பாக். கேப்டன் ஓவரை முடித்திருக்கவேண்டும். இதுதான் இம்மாதிரி சந்தர்ப்பங்களில் உலகெங்கும் நடப்பது. ஆனால் பாகிஸ்தான் சூப்பர் டீமல்லவா? கிரிக்கெட் மட்டும்தானா அவர்களுக்கு தெரியும்! நிற்கமுடியாமல், நடக்கமுடியாமல் சில நிமிடங்களுக்கு முன் வேதனை காண்பித்த நஸீம், அடுத்த பந்திற்காக ஒன்றுமே நடக்காததுபோல் இப்போது தூரத்திலிருந்து பேட்ஸ்மனை நோக்கி வேகமாக – எஸ்.. வேகமாக ஓடிவருகிறார். கவனியுங்கள். காலில் பிரச்னை இல்லைபோலிருக்கிறதே! அதே வேகம். அதேமாதிரி இயல்பான பந்துவீச்சு. ஓடுகையில், பந்தை வீசுகையில் அவர் முகத்தில் எந்த வேதனையும் காணப்படவில்லை. வீசியபின் இந்திய பேட்ஸ்மன் அடித்தோ, தடுத்தோ ஆடி ரன் ஓட முயற்சிக்கையில், உடனே நஸீமின் நாடக மீட்சி: முகக்கோணல், ஒற்றைக்கால் நடனம். கீழே உட்கார்வது.. காலைப்பிடித்துக்கொண்டு ஆ.. ஊ..ஐயோக்களுக்கு நடுவே ஜடேஜாவுக்கு எதிராக எல்பிடபிள்யூ அவுட் கேட்கிறார் அம்பயரைப் பார்த்து! அம்பயரும் குழப்பத்தில் டென்ஷனில் விரல் உயர்த்த, இந்திய அணியில் டென்ஷன். ரிவ்யூ.. ஜடேஜா நாட்-அவுட்! இன்னும் ஒரு பந்து பாக்கி. மீண்டும் காலில் எந்தப் பிரச்னையும் தெரியவில்லை ஓடிவந்து வீசுகிறார் நஸீம். நாடகத்தைத் தொடர்ந்து பார்த்த எரிச்சலில் கடுப்பாகியிருந்த ஜடேஜா, முன்னே வேகமாக நகர்ந்து, பந்தை ஆவேசமாகத் தூக்கினார் பௌலரின் தலைக்குமேலே.. பந்து  சிக்ஸர்..சிக்ஸர் என்று அலறியவாறு ஸ்டேடியத்தில் போய் விழுந்தது.  நஸீமின் சூப்பர் நாடக ஓவர் சிக்ஸரில் முடிந்தது. காலையில் ஹைலைட் பார்க்கையில் இந்த நாடகப் பகுதியை ஸ்டார் சேனல் அகற்றிவிட்டு, ஏதோ அமைதியாக மேட்ச் நடந்ததுபோல் காட்டிக்கொண்டிருந்தது.

வெற்றியை சிக்னல் செய்யும் பாண்ட்யா. வெதும்பிப் பார்க்கும் பாகிஸ்தான்!

19-ஆவது ஓவரை ஹாரிஸ் ராஃப் போட்டபோது, ஃபுல் சார்ஜில் இருந்த பாண்ட்யா விறுவிறுவென  பௌண்டரி பௌண்டரியாக  விளாசிவிட்டார். பாகிஸ்தானின் முகம் பேயறைந்ததுபோலாகிவிட்டது. பச்சை-வெள்ளைகளில் படபடப்பு, கிறுகிறுப்பு. 20-ஆவது ஓவரைபோட்ட ஸ்பின்னர் முகமது நவாஸ் அருமையாக வீசியிருந்தார் ஏற்கனவே. நவாஸின் முதல் பந்தில் ஜடேஜா அவுட் ஆகி இந்திய அணிக்கு/ரசிகர்களுக்கு டென்ஷன் தர, அடுத்துவந்த கார்த்திக் ஒரு ரன் எடுத்து அடுத்தபக்கம் ஓடினார். இப்போது ஈக்வேஷன்: 4 பந்தில் 6 ரன். பாண்ட்யா நவாஸின் அடுத்த பந்தை கவர் பக்கம் அடிக்க, உடனடி ஃபீல்டிங். ரன் எடுக்கவாய்ப்பில்லை. கார்த்திக் டென்ஷனாக, பாண்ட்யா மேலும்கீழுமாகத் தலையாட்டுகிறார்: கவலைப்படாதப்பா. .நான் இருக்கேன்ல.. 3 பந்துகள் பாக்கி, 6 ரன் தேவை இந்திய வெற்றிக்கு. முடியவில்லை என்றால் பச்சை-வெள்ளைப் பரவசம்தான். நவாஸ் ஓடிவந்து ஆஃப் ஸ்டம்புக்கு வெளியே குத்திப்போட, சரியாகப் பந்தின் திசை, வேகத்தைக் கணித்திருந்த பாண்ட்யா அனாயாசமாக உயரே தூக்கினார். மைதானமே திடுக்கிட்டு இரவு வானில் வெள்ளைப்பந்தை அன்னாந்து பார்க்க, ஸ்டேடியத்திற்குள் சீறிப் பாய்ந்தது சிக்ஸர்! இந்தியக் கொடிகள் மேலே மேலே ஆடி அசைய, ரசிகர்களின் கொண்டாட்டம் துபாய் இரவுக்குக் கிளுகிளுப்பூட்டியது!

இப்படியாக வந்துசேர்ந்தது இந்தியாவுக்கு வெற்றி 5 விக்கெட் வித்தியாசத்தில். ப்ளேயர் ஆஃப் தி மேட்ச் விருது பாண்ட்யாவுக்கு. விக்கெட்கீப்பராக உயரத் தவ்விப் பிடித்த ஒரு அபூர்வ கேட்ச்சிற்காக தினேஷ் கார்த்திற்கு பரிசு. வெள்ளைப்பந்து கிரிக்கெட்டில் பாண்ட்யாவும், ஜடேஜாவும் தீர்க்கமான திறமையான ஆல்ரவுண்டர்கள் என்பதை இந்த ஹை-டென்ஷன் மேட்ச் உறுதிசெய்திருக்கிறது மீண்டும்.

Scores: Pak :147 all out. India: 148 for 5.

கொசுறு: இந்திய நடிக நடிகைகளும் வண்ணம் சேர்த்தனர் துபாய் ஸ்டேடியத்தில் நேற்று:

இந்தியா பாக் ஆட்டத்தை உற்றுப் பார்க்கும் விஜய் தேவரகொண்டா, (லெஜண்ட் சரவணன் புகழ்(!) ஊர்வசி ரௌத்தேலா !

**