டி 20 தொடர்: தென்னாப்பிரிக்காவுக்கு எதிரான இந்திய அணி

ஜூன் 9 -லிருந்து தொடங்கும் தென்னாப்பிரிக்காவுடனான 5 போட்டிகள் கொண்ட டி 20 கிரிக்கெட் தொடருக்காக, இந்திய அணி அறிவிக்கப்பட்டுள்ளது. ஃபார்மில் இல்லாத ரோஹித் ஷர்மா, முன்னாள் கேப்டன் விராட் கோலி, ஜஸ்ப்ரித் பும்ரா ஆகியோர் ஓய்வு கொடுக்கப்பட்டிருக்கிறார்கள். ஷிகர் தவன், முகமது ஷமி, வாஷிங்டன் சுந்தர், தீபக் சாஹர், டி.நடராஜன், சூர்யகுமார் யாதவ், ரவீந்திர ஜடேஜா, போன்ற முக்கிய வீரர்கள்  இல்லை. கடைசி இருவரும் காயம் காரணமாக பரிசீலிக்கப்படவில்லை.

புதுமுகங்களாக இருவர். தன்னுடைய அதிவேகப் பந்துவீச்சினால் ஐபிஎல்- இல் பேட்ஸ்மன்களைப் பயமுறுத்தி, காயப்படுத்தி கைங்கர்யம் செய்துவரும், ஜம்மு காஷ்மீரைச் சேர்ந்த உம்ரான் மாலிக் (ஸன்ரைசர்ஸ் ஹைதராபாத்), எதிர்பார்க்கப்பட்டபடி இந்திய அணிக்கு முதன்முறையாகத் தேர்வாகியிருக்கிறார். 150-கி.மீ.க்கு மேல் வீசி வேகத்தில் மிரட்டும் மாலிக்கை வைத்து தென்னாப்பிரிக்க பேட்ஸ்மன்களை கதிகலங்க வைக்க நினைக்கும் தேர்வுக்குழுவின் முயற்சி. விளைவு எப்படி இருக்கும் என்பது ஜூன் இரண்டாவது வாரத்தில் தெரிந்துவிடும். குறிப்பிடத் தகுந்த இளம் வேகவீச்சாளரான (பஞ்சாப் கிங்ஸின்) அர்ஷ்தீப் சிங் அணிக்குள் நுழைந்துள்ளார். இவர் ஐபிஎல் இல் அதிக விக்கெட் சாய்க்கவில்லை எனினும், டெத் ஓவர்களில் கஞ்சத்தனமாக ரன் கொடுத்து எதிரிகளைத் திணறவைக்கும் இவரது திறன் தேர்வுக்குழு உறுப்பினர்களைக் கவர்ந்துவிட்டது. வந்தார் உள்ளே.

சிலர் எதிர்பார்த்த, மொத்தத்தில் ஆச்சர்யமான ஒரு தேர்வு தமிழ்நாட்டின் தினேஷ் கார்த்திக். உள்நாட்டு வெள்ளைப்பந்து கிரிக்கெட்டில் தொடர்ந்து கலக்கினாலும், கடந்த 3 வருடங்களாக கவனிக்கப்படாத இந்த விக்கெட் கீப்பர் பேட்ஸ்மன், ஐபிஎல்-இல் காட்டிய அபாரமான ஸ்ட்ரைக் ரேட்டினால் அதிரடியாகக் கொடுத்திருக்கிறார் ரீ-எண்ட்ரி. வரவேற்கப்படவேண்டியவர். கூடவே காயம் காரணமாக சமீபகாலமாகத் தேர்வாகாதிருந்த ஆல்ரவுண்டர் ஹார்திக் பாண்ட்யா மீண்டும் அணியில். 6, 7 போன்ற பேட்டிங் வரிசை இடங்களில் யார் ஆடுவார்கள்? கார்த்திக்கா, பாண்ட்யாவா என்பது போகப்போகத்தான் தெரியும். இருவரும் பௌலிங்கை துவம்சம் செய்யக்கூடியவர்கள். ஸ்பின் டெபார்ட்மெண்ட்டில் அஷ்வினுக்கு ஏனோ இடமில்லை. அவரிடத்தை குல்தீப் யாதவிடம் கொடுத்தது சரியாகப்படவில்லை. மற்ற ஸ்பின்னர்கள் அக்ஷர் பட்டேல்,, யஜுவேந்திர சாஹல். ரவி பிஷ்னோய்.

வலிமையான தென்னாப்பிரிக்க அணியுடனான தொடரில் ரிஸ்க் எடுக்க விரும்பாததால் ஆல்ரவுண்டர்கள்/அதிரடிகள் எனக் கூட்டியிருக்கிறார்கள். அணி கிட்டத்தட்ட சமநிலையில் இருப்பதாகத் தோன்றுகிறது:

கே.எல். ராஹுல் (கேப்டன்), ரிஷப் பந்த் (துணைக்கேப்டன்) இஷான் கிஷன், ஷ்ரேயஸ் ஐயர், ருதுராஜ் கெய்க்வாட், தீபக் ஹூடா, வெங்கடேஷ் ஐயர், ஹார்திக் பாண்ட்யா, தினேஷ் கார்த்திக், அக்ஷர்பட்டேல், யஜுவேந்திர சாஹல், குல்தீப் யாதவ், உம்ரான் மாலிக், புவனேஷ்வர் குமார், ஹர்ஷல் பட்டேல், அர்ஷ்தீப் சிங், ஆவேஷ் கான்.

**

ஐபிஎல் 22 : புதிய அணிகளின் மோதல்

ஆரம்ப மேட்ச்சில் கொல்கத்தாவிடம் காலியான சென்னை. டெல்லியிடம் அடி வாங்கிய மும்பை. 200-க்கு மேல் எடுத்தும் பஞ்சாபிடம் பலியான பெங்களூரு! ஐபிஎல் 2022-ன் அதகளம் ஆரம்பம்.

தற்போது ஐபிஎல்-ன் இரு புது அணிகள் தங்களுக்குள் மோதுகின்றன. குஜராத் டைட்டன்ஸ் vs லக்னோ சூப்பர் ஜயண்ட்ஸ். இதுவரை மும்பை இந்தியன்ஸ் அணியின் பிரபல முகங்களில் ஒருவராயிருந்த ஹார்திக் பாண்ட்யா முதன்முறையாக கேப்டனாக களம் இறங்குகிறார், குஜராத்திற்காக. அவரது நண்பர் கே.எல்.ராஹுல் லக்னோவின் கேப்டன். இரண்டும் சமபல அணிகளாகத் தோன்றுகின்றன என்றாலும் களத்தில் கதை என்னவோ ..

Captain, Gujarat Titans

குஜராத் அணியில் (நியூஸிலாந்தின்) லாக்கி ஃபெர்குஸன், முகமது ஷமி, வருண் ஆரோன் -முக்கிய வேகங்கள். ஸ்பின்னில் இருக்கிறார் டாப் மேன் ரஷித் கான் (ஆஃப்கானிஸ்தான்). ஆல்ரவுண்டர்கள் விஜய் ஷங்கர், ராஹுல் தெவட்டியாவும் கூடவே. பேட்டிங் ஷுப்மன் கில், ஹார்திக் பாண்ட்யா, (ஆஸ்திரேலிய) மேத்தியூ வேட் (Mathew Wade) என்று மையம் கொள்கிறது. லக்னோவில் ராஹுல், (தென்னாப்பிரிக்காவின்) குய்ண்ட்டன் டி காக், (வெஸ்ட் இண்டீஸின்) எவின் லூயிஸ், மனிஷ் பாண்டே ப்ரதானம். ஆல்ரவுண்டர்களாக ரஞ்சியில் சண்டைபோட்டுக்கொண்ட தீபக் ஹூடாவும், ஹார்திக்கின் அண்ணன் க்ருனால் பாண்ட்யாவும். வேகவீச்சு முக்கியமாக துஷ்யந்தா சமீரா (ஸ்ரீலங்கா) மற்றும் இந்திய அணியின் புதுவருகையான ஆவேஷ் கான் என இருவரின் கைகளில். ஸ்பின்னில் ரவி பிஷ்னோய் (Ravi Bishnoi) தன் வேலையைக் காட்டுவார் என எதிர்பார்க்கலாம், எதிர் அணி ரஷீத் கானிடம் எதிர்பார்ப்பதைப் போல – கிட்டத்தட்ட.

ஹார்தீக் பாண்ட்யா இன்று பௌலிங் போடுவாரா என்பது ரசிகர்களின் மனதில் திண்டாடும் கேள்வி. அவருடைய கேப்டன்சி எப்படியிருக்கும் எனக் கவனிப்பதிலும் ஆர்வம் நிறையப்பேருக்கு. ஹார்தீக் vs ராஹுல் – கள வியூகங்களையும் கவனிப்போம்..!

**

ஜடேஜாவின் தலைமையில் சென்னை சூப்பர் கிங்ஸ் (CSK)

ஆரம்பத்திலிருந்தே CSK-யின் கேப்டனாக மிக வெற்றிகரமாக செயல்பட்டவர். அவருக்கும் 40 ஆயிடுச்சே. வயசு யாரை விட்டது… சரியான தருணமிது. கிரீடத்தை வேறு யாருடைய தலையிலாவது வைத்துவிட்டு டீமோடு டீமா நிற்பதே நல்லது என அவருக்குத் தோன்றியிருக்கலாம். தோனியின் இந்த முடிவினால், ரவீந்திர ஜடேஜா ஆனார் கேப்டன், சிஎஸ்கே. இன்று ஐபிஎல் 2022-ன் முதல் போட்டியில் சென்னையை கொல்கத்தாவுக்கெதிராகத் திருப்புகிறார். கேப்டன்சி எப்படி இருக்கும் எனப் பார்ப்பதில் ரசிகர்களுக்கு ஒரே ஆவல், அவசரம்.

Ravindra Jadeja alongside outgoing CSK Captain

இதற்கு முன் அவர் ரஞ்சிக்காக ஆடும் சௌராஷ்ட்ரா உட்பட, முக்கிய அணி எதற்கும் ஜடேஜா தலைமை வகித்ததில்லை. பலவருடங்களுக்கு முன் U-19 போட்டி ஒன்றில் அந்த அணிக்கு தலைமை தாங்கியிருக்கிறார் ஒரு முறை. மற்றபடி அனுபவம் என்பதாக ஏதுமில்லை. ஆயினும், கெவின் பீட்டர்சன் சொல்கிறார்: கூர்மையான கிரிக்கெட் மூளை உண்டு ரவி ஜடேஜாவுக்கு. அவர் தலைமையில் சிஎஸ்கே சில ஆச்சர்யங்களைக் கொடுக்கக்கூடும்…

பழைய வீரர்களில் சிலரும் ஜடேஜா சென்னையின் தலைமைக்கு சரியான ஆள்தான் என ஒப்புதல் தருகிறார்கள். இந்த ஐபிஎல் -இல் சில சுவாரஸ்யமான பெயர்கள், அணிகளின் கேப்டன்களாக. ஷ்ரேயஸ் ஐயர் – கொல்கத்தா, ஹார்தீக் பாண்ட்யா – குஜராத், மயங்க் அகர்வால் – பஞ்சாப், ஃபாஃப் டூப்ளஸீ – பெங்களூரு. இப்போது,  ரவி ஜடேஜா! (பதவி இழந்தவர்கள் லிஸ்ட்டே தனி!) என்னென்ன வியூகங்களோடு புதுக் கேப்டன்கள் மைதானத்தில் இறங்கப்போகிறார்கள் என்பது டாடா ஐபிஎல் 2022- தரும் குறுகுறுப்பு, கிளுகிளுப்பு !

First match : KKR vs CSK 26/3/2022 @ 1930 hrs, Wankhede, Mumbai.

**

இருதரப்பு கிரிக்கெட்: இந்தியா-நியூஸிலாந்து டி-20 தொடர்

கைக்கெட்டாத உலகக்கோப்பையை மறந்துவிடலாம்! இன்று (17/11/21) ஜெய்ப்பூரில் துவங்குகிறது நியூஸிலாந்து, இந்தியாவுக்கு இடையேயான 3-மேட்ச் டி-20 தொடர். இதற்குப் பின் 2-மேட்ச் டெஸ்ட் போட்டித்தொடரும் வரும் (அடுத்த உலக டெஸ்ட் சேம்பியன்ஷிப் போட்டிகளின் ஆரம்பம்).

சாஸ்திரி-கோஹ்லியின் சத்தமான  சகாப்தத்தின் கதவு மூடப்பட்டுவிட்டது. இரைச்சல் தாங்கமுடியவில்லை! ’பிங்க் சிட்டி’யில் ஆரம்பமாகும் இந்தத் தொடர் இந்திய கிரிக்கெட்டின் புதிய பாதை/அணுகுமுறைகளின் துவக்க வாயிலாக அமையக்கூடும். திராவிட்-ரோஹித்தின் தலைமை டி-20 தொடர்களில் புதிய யுக்திகளை அறிமுகப்படுத்தும் என்கிற எதிர்பார்ப்புடன் ஆரம்பிக்கிறது தொடர்.

டெஸ்ட்களுக்கு இன்னும் கோஹ்லிதான் கேப்டன். அவர் ‘ஓய்வில்’ இருப்பதால், இந்த மாத இறுதியில் கான்பூரில் ஆரம்பிக்கவிருக்கும் முதல் டெஸ்ட்டிற்கு ’ஆஸ்திரேலியா புகழ்’ அஜின்க்யா ரஹானே தலைமை தாங்குகிறார். பேசாமல், இரண்டு போட்டிகளுக்குமே அவரை கேப்டனாக அறிவித்து, பழைய பூஜாரி கோஹ்லிக்கு ’இன்னும் கொஞ்சம்’ ஓய்வு கொடுத்திருக்கலாம். ஒன்றிரண்டு புது விளம்பரப்படங்களில் நடிக்க அவகாசம் கிடைத்திருக்கும்!  

Rohit Sharma briefs Venkatesh Iyer in the nets

இந்த டி-20 தொடருக்கான இந்திய அணியில் இவர்கள் இல்லை: கோஹ்லி, ரவீந்திர ஜடேஜா, முகமது ஷமி, பும்ரா, ஹார்தீக் பாண்ட்யா, ஷர்துல் டாக்குர், வருண் சக்ரவர்த்தி. கடந்த ஐபிஎல்-இல் வித்தை காட்டிய இவர்கள் முதன்முதலாக உள்ளே : ஆல்ரவுண்டர்கள் வெங்கடேஷ் ஐயர் (மத்திய பிரதேசம்/ கொல்கத்தா நைட்ரைடர்ஸ்), ஹர்ஷல் பட்டேல் (ஹரியானா/ ராயல் சேலஞ்சர்ஸ் பெங்களூர்), வேகப்பந்துவீச்சாளர் ஆவேஷ் கான் (மத்திய பிரதேசம்/ டெல்லி கேப்பிடல்ஸ்) மற்றும் ருதுராஜ் கேய்க்வாட் (மஹாராஷ்ட்ரா/ சென்னை சூப்பர் கிங்ஸ்). ரோஹித் ஷர்மா தலைமை வகிக்கும் (கே.எல்.ராஹுல், வைஸ்-கேப்டன்) இன்றைய முதல் மேட்ச்சுக்கான அணிவரிசை இப்படியிருந்தால் நன்றாக இருக்கும்: 1. ரோஹித் ஷர்மா 2. கே.எல். ராஹுல் 3. ஷ்ரேயஸ் ஐயர் 4. சூர்யகுமார் யாதவ் 5. இஷான் கிஷன் 6. ரிஷப் பந்த் 7. ஹர்ஷல் பட்டேல் 8. அஷ்வின் (இருவரும் ஆல்ரவுண்டர்கள்) 9. புவனேஷ்வர் குமார் 10. முகமது சிராஜ் 11. யஜுவேந்திர சாஹல்.

திராவிட்-ரோஹித் ஜோடி ஒருவேளை இப்படியும் சிந்திக்கக்கூடும்: வெங்கடேஷ் ஐயருக்கு அவருக்கான ‘இந்தியா வாய்ப்பை’ இந்த மேட்ச்சில் வழங்கலாம். வெங்கடேஷின் ஐபிஎல் பேட்டிங் ஃபார்ம் அப்படி. மிதவேகப் பந்துவீச்சும் அவரால் முடியும் (பாண்ட்யா இல்லாததும் நினைவில் வரும்). சாஹலுக்குப் பதிலாக அக்‌ஷர் பட்டேலை சேர்க்கலாம். பேட்டிங்கில், கீழ்வரிசையில் ஆக்ரோஷமாகத் தாக்கக்கூடிய ஆல்ரவுண்டர் என்பதால். இப்படியெல்லாம் கோச்சும், கேப்டனும் மாற்றி யோசிக்க வாய்ப்புண்டு!

திராவிட்-ரோஹித் காம்பினேஷனை ஜெய்ப்பூர் வெற்றிகரமாகத் துவக்கிவைக்குமா என இந்த இரவினில் தெரிந்துவிடும்.

உலகக்கோப்பை இறுதியில் தோற்ற அந்த அணியிலும் மாறுதல்கள் நிச்சயம் உண்டு. லோக்கி ஃபெர்குஸன் சேர்ந்திருக்கிறார். இந்திய பேட்ஸ்மன்களுக்கு அவரது துல்லியம் தொந்தரவு தரும் நிச்சயம். நியூஸிலாந்துக்கு வேகப்பந்துவீச்சாளர் டிம் சௌதீ (Tim Southee) கேப்டனாக நியமிக்கப்பட்டுள்ளார். அசல் கேப்டன் கேன் வில்லியம்சன் டெஸ்ட் தொடருக்காகத் தன்னைத் தயார்செய்துகொண்டிருக்கிறாராம்.

**

ICC T-20 World Cup: ஆஸ்திரேலியா சேம்பியன்

உலகக்கோப்பையில் ’குரூப் ஸ்டேஜ்-இல் மட்டும் ஐந்து மேட்ச் விளையாடிய விராட் கோஹ்லியின் இந்தியா,  ‘சிறிய’ நாடுகளுக்கு எதிரான வெறும் 3 வெற்றிகளுடன் செமிஃபைனலுக்குள் கால்வைக்க முடியாமல் கந்தலாகி வீடு திரும்பியது. (Bio-bubble-தான் காரணம்: மாஜி கோச் ரவி சாஸ்திரி!). கோப்பையை வெல்லும் என எதிர்பார்க்கப்பட்ட, சிறப்பாக ஆடிவந்த பாகிஸ்தானுக்கும் கூடுதலாக ஒரு போட்டி மட்டுமே (செமிஃபைனல்) ஆடித் தன் ரசிகர்களைக் குஷிப்படுத்திவிட்டு கராச்சிக்கு அவசர ஃப்ளைட் பிடிக்கவேண்டியிருந்தது.  உலக டெஸ்ட் சாம்பியனான நியூஸிலாந்தும், ஆஸ்திரேலியாவும் நேற்று (14-11-21) துபாயில் டி-20 உலகக்கோப்பை இறுதிப்போட்டியில்  மோதின.

world-cup-2021-prize-money-australia-runner-up-new-zealand-team-india-also-gets-money-after-elimination-from-super-12-list-of-all-awards  – first time T20 champion became Australia's $ 1.6 million, Team India out  of Super-12 had to be satisfied with ...

சரிபலத்துடன் மோதிய இரு அணிகள், டி-20 வகைமையில் சிறந்த கிரிக்கெட் ஆட்டத்தை வெளிப்படுத்தின. டாஸ் ஜெயித்த அணிகள் இரண்டாவதாக பேட்டிங் செய்து இலக்கைத் துரத்தி ஜெயிப்பதே வழக்கமாகிப்போன அமீரகக் கிரிக்கெட் கதைகளின் தொடர்ச்சியாக, நேற்றும் அதுவே நிகழ்ந்தது. ஆஸ்திரேலியா டாஸ் வென்று நியூஸிலாந்தை உள்ளே அனுப்ப, ஆரம்பத்தில் நிதானமாக ஆடி, பின்னர் கேப்டன் வில்லியம்சன் (85) அதிரடி காட்ட, ஸ்கோரை வேகமாக உயர்த்திய நியூஸிலாந்து 172 எடுத்து கோப்பைக்கான இலக்கை ஆஸ்திரேலியாவுக்கு நிர்ணயித்தது.

முதல் டி-20 கோப்பைக்காக ஏங்கிக்கொண்டிருந்த ஆரோன் ஃபிஞ்ச் தலைமையிலான ஆஸ்திரேலிய அணி வெகு  உற்சாகமாக இலக்கை எதிர்கொண்டதாகத் தோன்றியது. ஃபிஞ்ச் எளிதில் விழுந்துவிட்டாலும், டேவிட் வார்னர் தன்னை விமர்சித்தவர்களுக்கு ஆவேச பதிலடி தருவதுபோல் அபாரமாகத் தாக்கி ஆடினார். ஃபிஞ்ச் அவுட்டானபின், பேட்டிங் வரிசையில் மூன்றாவதாக, வழக்கமான ஸ்மித்திற்கு பதிலாக மிட்செல் மார்ஷை அனுப்பிய கோச் ஜஸ்டின் லாங்கரின் யுக்தி சரியான சமயத்தில் கைகொடுத்தது. வார்னரோடு சேர்ந்து நியூஸிலாந்து பௌலிங்கை ஒரு கை பார்த்தார் மார்ஷ். இவரும் அதுவரை முக்கிய பங்களிப்பு ஏதும் தரமுடியாமல், விமர்சனத்துக்கு உள்ளாகி நொந்துபோயிருந்தார்! அடிபட்ட புலிகளாய் வார்னரும், மார்ஷும் சீற, ரன்கள் வேகமாக எகிறின. வார்னர் அரைசதத்துக்குப் பின் வெளியேற்றப்பட்டுவிட்டாலும், அடுத்து வந்த மேக்ஸ்வெல்லும் தன் கைவரிசையைக் காட்ட, இலக்கு எளிதில் வீழ்த்தப்பட்டது. திரளான ஆஸ்திரேலிய ரசிகர்களின் ஆரவாரத்தின் பின்னணியில், முதன்முறையாக ஆஸ்திரேலியாவின் கைக்கு வந்தது டி-20 உலகக்கோப்பை. 8 விக்கெட் வித்தியாச வெற்றி. 50 பந்துகளில் 77 விளாசி நாட் அவுட்டாக கம்பீரம் காட்டிய மிட்செல் மார்ஷ் ஆட்ட நாயகன் ஆனார். டேவிட் வார்னர் தொடர் நாயகன்.

ஃபைனலுக்கு முன்னான, முன்னாள் வீரர்களின் வெற்றிக் கணிப்புகளில், இந்தியாவின் ஹர்பஜன் சிங் இப்படிச் சொல்லியிருந்தார்: ’மனசு சொல்லுது நியூஸிலாந்துதான் ஜெயிக்கும்னு. புத்தி என்னடான்னா, ஆஸ்திரேலியாதான் சாம்பியன்ங்கறதே!..’ என்னே, சர்தார்ஜியின் புத்திசாலித்தனம்!

வார்னரை ஐபிஎல் கேப்டன்சியிலிருந்து இந்த வருடம் தூக்கியிருந்த ’சன் ரைசர்ஸ் ஹைதரபாத்’ அணி நிர்வாகம், நகத்தை கடித்துக்கொண்டு உட்கார்ந்திருந்ததோ என்னவோ? 2022-ல் வரவிருக்கும் இரு புதிய ஐபிஎல் அணிகளில் ஒன்றிற்கு டேவிட் வார்னர் தலைமை தாங்கும் வாய்ப்புண்டு எனத் தெரிகிறது.

அடுத்த மாதம் வரவிருக்கும் ‘ஆஷஸ்’ டெஸ்ட் தொடரில் வலிமையான இங்கிலாந்தை சந்திக்கவிருக்கும் ஆஸ்திரேலியாவுக்கு பெரும் உத்வேகம் தருவதாக   அமைந்த திடீர் டானிக், இந்த உலகக்கோப்பை வெற்றி. ஆனால், ’டெஸ்ட்’ கதையே வேறயாச்சே.. என்ன நடக்குமோ..

**  

டி-20 உலகக்கோப்பை 2021

ஐபிஎல் முடிந்த சூட்டோடு சூடாக, அமீரகத்தில் ஆரம்பித்துவிட்டது இன்று (17-10-2021) டி-20 உலகக்கோப்பைக்கான போட்டிகள். ஓமனின் தலைநகரான மஸ்கட்டில் முதல் மேட்ச்சில் , ஓமன், பாப்புவா நியூ கினீயைத் தோற்கடித்துவிட்டது. இன்றைய இரண்டாவது போட்டியில் ஸ்காட்லாந்து, பங்களாதேஷை எதிர்த்து ஆடிவருகிறது.

ICC T-20 World Cup

உலகின்  டாப்-8 கிரிக்கெட் நாடுகளின் அணிகள் இரு பிரதான குழுக்களாகப் பிரிக்கப்பட்டுள்ளன:

Group-1 : இங்கிலாந்து, ஆஸ்திரேலியா, வெஸ்ட் இண்டீஸ் மற்றும் தென்னாப்பிரிக்கா.

Group-2 : இந்தியா, பாகிஸ்தான், ஆஃப்கானிஸ்தான், நியூஸிலாந்து.

இவை தவிர, மேலும் இரண்டு குழுக்கள் உண்டு – இப்படி:

Group A: ஸ்ரீலங்கா, நெதர்லாந்து, அயர்லாந்து, நமீபியா.

Group B: பங்களாதேஷ், ஸ்காட்லாந்து, ஓமன், பாப்புவா நியூ கினீ.

இந்தியா விளையாடும் உலகக்கோப்பையின் முதல் மேட்ச் 24/10/2021 (ஞாயிறு) துபாயில் நடக்கும். பரமவைரியான பாகிஸ்தானுடன் ஆட்டம். ரசிகர்களின் ஆட்டபாட்டங்களும் ரசமாக இருக்கும்! இப்படி ஐசிசி-யின் மெகா டூர்னமெண்ட்டுகளில் மட்டும், பாகிஸ்தான், இந்தியா மோதிக்கொள்வது வழக்கமாகிவிட்டிருக்கிறது, சமீப காலமாக. காகிதத்தில், கோஹ்லியின் இந்தியா, பாபர் ஆஸமின் பாகிஸ்தானைவிட (குறிப்பாக பேட்டிங்கில்) வலுவானதாகத் தெரிகிறது. டி-20 உலகில், எந்த நாளில் என்ன நடக்கும் எனச் சொல்லமுடியாது. ஞாயிறு வரட்டும், வந்து சொல்லட்டும் கதை!

டி-20 உலகக்கோப்பைக்கான இந்திய அணி: விராட் கோஹ்லி(கேப்டன்), ரோஹித் ஷர்மா (துணைக்கேப்டன்), கே.எல்.ராஹுல், சூர்யகுமார் யாதவ், ரவீந்திர ஜடேஜா, ரிஷப் பந்த், இஷான் கிஷன், ஆர்.அஷ்வின், ஜஸ்ப்ரித் பும்ரா, ராஹுல் சாஹர், முகமது ஷமி, புவனேஷ்வர் குமார், ஹர்தீக் பாண்ட்யா, வருண் சக்ரவர்த்தி, ஷர்துல் டாக்குர்.  (டாக்குர், அக்ஷர் பட்டேலுக்குப் பதிலாகக் கடைசிகட்டத்தில் அணியில் சேர்க்கப்பட்டிருக்கிறார். Fast bowling allrounder in form – என்பதால்.)

**

ஐபிஎல் 2021: சென்னை சேம்பியன்ஸ் !

ஐபிஎல் சரிதத்தில் நான்காவது முறையாக கோப்பையை வென்றிருக்கிறது சென்னை சூப்பர் கிங்ஸ். ஏகப்பட்ட மஞ்சள் சட்டைகள் பளபளத்த துபாய் மைதானம், தோனியின் சென்னைக்கு அதிர்ஷ்டகரமாக ஆனது.

Story
Ganguly presents IPL Trophy to Dhoni

டாஸ் ஜெயித்த கொல்கத்தாவின் மார்கன், சென்னையை உள்ளே அனுப்பியதன் காரணம், தனது பௌலர்கள் வித்தை காட்டுவார்கள்; விறுவென விக்கெட்டுகள் விழும்; ஸ்கோர் ரொம்ப எம்பிவிடாமல் பார்த்துக்கொள்ளலாம் என்கிற நம்பிக்கைதான். கேகேஆர்-இன் பலமே அவர்களின் பௌலிங்தான் என்று கடந்த சில போட்டிகள் சொல்லியிருந்தன.  ஆனால் துபாயின் கதை வேறானது. பவர்ப்ளேயில் எந்த அழுத்தமுமின்றி கெய்க்வாடும், டூ ப்ளஸீயும் ஆடினார்கள். கெய்க்வாட் 61-ல் விழுந்தாலும், அடுத்துவந்த ராபின் உத்தப்பாவும், டூ ப்ளஸீயும் சென்னையின் ஸ்கோர் தொய்ந்துவிடாமல் அபாரமாக ஆடினார்கள். உத்தப்பா போனால், இதுகாறும் சரியாக ஆடாத மொயீன் அலி நொறுக்கினார். இப்படியே ஸ்டெடியாகப்போய் 192 என வந்து கொல்கத்தாவை அயரவைத்தது சென்னையின் ஸ்கோர்.

Champions CSK !

அமீரக ஆட்டங்களில், கொல்கத்தா அணியில் பேட்டிங் என்றால் அதன் துவக்க ஆட்டக்காரர்கள்தான் என்றாகிவிட்டிருக்கிறது. நேற்றும் வெங்கடேஷ் ஐயர் (50), ஷுப்மன் கில் (51) ஜோடி சென்னையின் பௌலிங்கை ஒருகை பார்த்து தூள்கிளப்பியது. அவர்கள் போன வேகத்தில் 193 என்கிற இலக்கு வேகமாகக் கரைந்தது. ஆனால், ஒவ்வொருவராக இருவரும்  வெளியேற்றப்பட்டபின், கொல்கத்தாவின் மிடில்-ஆர்டர் வெளிச்சத்தில் கண்கூசி ஆட்டங்கண்டது. சுனில் நாரேன், நிதிஷ் ரானா, தினேஷ் கார்த்திக், மார்கன், ஷகிப் உல் ஹசன் – எல்லாம் ஆறாம் வகுப்பு பிள்ளைகள் போல அடுத்தடுத்து சரிந்து சென்னையின் வெற்றியை சுலபமாக்கினார்கள்.

சிஎஸ்கே-யின் பௌலிங்கில், ஷர்துல் டாக்குர் நன்றாகப்போட்டு 3 விக்கெட்டுகளை சாய்த்தார். ஆனால் 18-ஆவது ஓவரில் நோ-பால், வைட், வைட் என வரிசையாகப் போட்டு, இறுதி கட்டத்தில் தோனியின் கடுப்புக்கு உள்ளாகி, கொஞ்சம் காமெடி சேர்த்துவைத்தார்! ஹாசல்வுட், ஜடேஜா ஆளுக்கு 2 எடுத்தார்கள்.  தீபக், ப்ராவோவும் நன்றாக வீச, 27 ரன் வித்தியாசத்தில் தோற்றது கொல்கத்தா நைட்ரைடர்ஸ். அதிகபட்ச ஸ்கோர் 86 விளாசிய சென்னையின் ஃபாஃப் டூ ப்ளஸீ (Faf du Plessis) ஆட்டநாயகன்.

தோனியின் கைக்கு திரும்பியது ஐபிஎல் கோப்பை . நேற்றைய இரவில் (15/10/2021), பெண்கள், குழந்தைகள், ஆண்களென மங்கல மஞ்சளாகிவிட்டிருந்தது துபாய். போடு விசில ..!

ஐபிஎல் இறுதி ஆட்ட ஸ்கோர்: CSK: 192/3      KKR: 165/9

**  

ஐபிஎல் 2021 – கோப்பை யாருக்கு?

IPL – ன் அழகிய கொழுகொழு மொழுமொழு கோப்பை யார் கைக்குப் போகப்போகிறது? தோனியா? மார்கனா? இன்னும் கொஞ்ச நேரத்தில் தெரியவரும். குற்றம் கூறுதல், அலசல்கள் கூடவே வர்ணனையாளர்கள், ரசிகர்களிடையே தூள்கிளப்பும்!

யாரும் கொல்கத்தா நைட்ரைடர்ஸ் (KKR), இறுதிப்போட்டியில் வந்து நிற்கும் என்று எதிர்பார்க்கவில்லைதான். எதிர்பாராததைத் தருவதுதானே டி-20 -ன் வேலை!

போனவருடம் தடுமாறித் தத்தளித்த சென்னை சூப்பர் கிங்ஸ் (CSK) இந்த வருடம் துபாய் ஃபைனலில் கம்பீரமாய் நிற்கிறது. இதுவரை அவர்கள், குறிப்பாக 2021-ன் இரண்டாம் பாதியில் ஆடிய ஆட்டம், வெற்றிகளுக்கு மூலகாரணமென ஒருவரை குறிப்பிடலாமென்றால் அது நிச்சயம் தோனியல்ல. சென்னை ஓப்பனர் ருதுராஜ் கெய்க்வாட் அந்த கௌரவத்தைத் தட்டிச்செல்கிறார். கூடவே, டூ ப்ளஸீ, ப்ராவோ, ஷர்துல் டாக்குர், ஜோஷ் ஹாஸல்வுட், தீபக் சாஹர் ஆகியோரும் மிளிர்ந்தார்கள்.

அமீரக ஆட்டங்களில் கொல்கத்தா அணி எதிர்பாரா வெற்றிகளைத் தட்டியது. குறிப்பாக பந்து கீழே தங்கும், தடுமாறி முன்னேறிக் கம்பைத் தொடப் பார்க்கும் ஷார்ஜா மைதானத்தில் அவர்கள்தான் ஸ்பெஷலிஸ்ட்கள் என நிரூபித்திருக்கிறார்கள். அதற்குக் காரணம் கொல்கத்தா அணியின் மெண்ட்டரான ப்ரெண்டன் மக்கல்லம். முன்னாள் அதிரடி துவக்க ஆட்டக்காரராக எதிரணி பௌலர்களை அலறடித்த பெருமையுண்டு அவருக்கு. அவரின் சாதுர்ய டீம் செலெக்‌ஷன் கொல்கத்தாவுக்குக் கை கொடுத்திருக்கிறது. சுனில் நாரய்ன், வருண் சக்ரவர்த்தி, ஷகிப் உல் ஹஸன் என அதிரடி ஸ்பின்னர்களையும், லோக்கி ஃபெர்குஸன், ஷிவம் மாவி ஆகிய துல்லிய வேகப்பந்து வீரர்களையும் வைத்துக்கொண்டு பலமான எதிரணிகளைப் புரட்டிப் போட்டுவிட்டு வந்திருக்கிறார்கள் ஐபிஎல் ஃபைனலுக்கு.

தோனியின் சிஎஸ்கே , கேகேஆர்-ஐ கேஷுவலாக எதிர்கொள்ள வாய்ப்பில்லை. கொல்கத்தா அணிக்கு துபாய் பிட்ச் சவாலாக அமையக்கூடும். கொல்கத்தாவின் மிஸ்டரி ஸ்பின்னர்கள் சென்னை பேட்ஸ்மன்களை அடித்துச் சாய்ப்பார்களா? அல்லது சென்னையின் வேகப்பந்துவீச்சு கொல்கத்தாவின் பேட்ஸ்மன்களை குறிப்பாக அவர்களின் தள்ளாடும் மிடில்-ஆர்டரைப் (ரன் எடுக்கத் திணறும் முன்னாள் கேப்டன் தினேஷ் கார்த்திக், கேப்டன் ஆய்ன் மார்கன்) பதம் பார்த்து, வெற்றியை நோக்கி சென்னையை நகர்த்துமா? பெரும் குழப்பம் தரும் டி-20 கேள்விகள் !

முடிவு எப்படியாகினும், கடும் போட்டி துபாயில் இன்றிரவு. கிரிக்கெட் ப்ரேமிகளுக்கு ஒரு அருமையான டி-20 க்ளாஸிக் வாய்க்கக்கூடும் !

**

Ind-SL : உயிர்கொடுத்த தீபக் சாஹர்

இரண்டாவது ஒரு-நாள் போட்டியை லங்கா உத்வேகமாக ஆடியது. அவிஷ்கா, அஸ்லங்காவின் அரைசதம், கடைசியில் இறங்கும் கருணரத்னவின் 44 நாட் அவுட் என இந்திய பௌலிங்கை ஒரு கை பார்த்து 275 என போஸ்ட் செய்தார்கள். புவனேஷ்வர் (3), சாஹல்(3), தீபக் சாஹர்(2) இந்தியாவுக்காக நன்றாகப் பந்து வீசினார்கள்.

இந்தியா பதிலளிக்கையில், ப்ரித்வி ஷா 3 பௌண்டரிகளுடன் ஆரம்பிக்க, லங்கா கேப்டன் மாத்தி யோசித்தார். இவனை விட்டால் ஆபத்து! ஹஸரங்காவின் ஸ்பின் மூன்றாவது ஓவரில். ப்ரித்வி ஷா அவுட் bowled. அடுத்தாற்போல் இஷான் கிஷனைக் காலி செய்த ரஜிதா. தவண் திணறல். நன்றாக ஆடியும் பாண்டே(37) ரன் அவுட். சூர்யகுமார் மட்டுமே விளாசி அரைசதம். ஹர்தீக் பாண்ட்யா 0. க்ரீஸுக்கு வந்தவுடன் ஓவராக அலட்டிக்கொண்ட க்ருணால் பாண்ட்யாவின் மண்டையில் மாறி, மாறிப்போட்டுத் திணறவைத்த துஷ்யந்தா சமீரா! க்ருனால் தட்டுத்தடுமாறி 35. சூப்பர் சூர்யா (44 பந்தில் 53) அவுட் ஆகையிலேயே இந்தியா நிலைகுலைந்துவிட்டது. ஸ்கோர் 160/6. 8-தீபக், 9-புவனேஷ்வர், 10-குல்தீப், 11-சாஹல் – இந்த அசடுகளை வைத்துக்கொண்டு இன்னும் 116 ரன்னா எடுக்க முடியும்? சான்ஸே இல்லை எனத் தோன்றிய கட்டத்தில், பாதிப்பேர் டிவி-ஐ அணைத்துவிட்டு குறட்டைவிட ஆரம்பித்திருப்பார்கள்தான்.

Deepak Chahar

விழித்துக்கொண்டு விளையாடியவர் ஆனார், India’s sudden hero! ஓவராக தூக்கி அடித்து ஆக்ரோஷ அலட்டாமல், நிதானமாக ரன் சேர்க்க ஆரம்பித்தார். புவனேஷ்வர் குமாரை அடுத்தபக்கத்தில் வைத்துக்கொண்டே, அவ்வப்போது பௌண்டரி, சிக்ஸரும் தட்டி இந்தியாவை கரை சேர்த்துக் கலக்கிவிட்டார் தீபக் சாஹர். Career-best 69 not out. வெற்றியின் விளிம்பில் நின்றிருந்த லங்காவைப் பின்னே தள்ளிவிட்டு வென்றது இந்தியா. லங்காவின் தரப்பில் நன்றாக ஸ்பின் போட்டுத் தாக்கினார் வனிந்து ஹஸரங்கா. எதிர்கால லங்கா ஸ்டாரோ..

ஜெயித்திருக்க வேண்டிய மேட்ச்சை தோற்றதால், லங்கா கேப்டன் ஷனகாவுக்கும் கோச் மிக்கி ஆர்தருக்குமிடையே சூடாக வாக்குவாதம் கிளம்பியிருக்கிறது மைதானத்தில். வீடியோ ஆனது வைரல்!

ஹர்தீக்  பாண்ட்யா -பேட்டிங், பௌலிங்- இரண்டிலுமே தடுமாறிக்கொண்டிருக்கும் இக்கட்டான இந்திய நிலையில், ஒரு சரியான ஆல்ரவுண்டராக, வெள்ளைப்பந்து போட்டிகளில்,  தீபக்கை  நம்பலாம் போலிருக்கிறது. You are good enough to bat at No.7 -என்று திராவிட், பேட் செய்யப்போகுமுன் தன்னிடம் சொன்னார் என்கிறார் தீபக். பார்ப்போம் – இன்னும் கதை நிறைய இருக்கிறது.

**

கிரிக்கெட்: ப்ரித்வி மேஜிக் !

கொழும்புவில் நேற்று நடந்த ஒரு-நாள் கிரிக்கெட் மேட்ச்சில் இந்தியா, எதிர்பார்க்கப்பட்டபடி எளிதாக வென்றது. ஸ்ரீலங்கா பெரிய ஸ்கோராக கொடுக்கமுடியாததற்கு அவர்களது பேட்ஸ்மன்களின் அனுபவக் குறைவே காரணம்.

Prithvi Shaw & Dhawan – Good chemistry..

லங்கா விளையாடிய அழகில்,  262 என்கிற ஸ்கோரே கொஞ்சம் ஆச்சர்யமானதுதான். 235-ஐத் தாண்டமாட்டார்கள் என்றே தோன்றியது. இலக்கை இந்தியா துரத்துகையில், லங்காவின் துவக்க பௌலிங்கை துவம்சம் செய்துவிட்டார், இந்திய அணிக்குத் திரும்பியுள்ள ப்ரித்வி ஷா. தவன் அடுத்த பக்கத்தில் நின்று பார்த்துக்கொண்டிருக்க, ஏதோ சன்னதம் வந்ததுபோல் ஆடினார் ஷா. இப்படித்தான் சில மாதங்களுக்கு முன் இந்திய உள்நாட்டுக்கிரிக்கெட்டிலும், ஐபிஎல்-இலும் ஆடி, தன் ஃபார்மை தேர்வாளர்களுக்கு நினைவுபடுத்திவந்தார் அவர். ஆஸ்திரேலியாவில் இந்தியா 36-ல் ஆல் அவுட்டானதற்கு என்னமோ ப்ர்திவி ஷாதான் காரணம் என்பதுபோல், அவரை ஒரு வருடம் இந்திய நீலத்தில் ஆடவிடாமல் செய்துவந்தார்கள் (தேர்வுக்குழுவா அல்லது கோஹ்லி-ஷாஸ்த்ரி கூட்டணியா?). நேற்று ஷா ஆடிய விதம் இந்த வருட இறுதியில் வரவிருக்கும் டி-20 உலகக்கோப்பை அணியில் ப்ரித்வி ஷா இருந்தே ஆகவேண்டும் என்கிற நிதர்சனத்தை மீண்டும் வெளிச்சம்போட்டுக் காட்டியது. கொழும்புவில் இந்திய செலக்டர்கள் இருவர் உட்கார்ந்திருக்கிறார்கள். புரிந்துகொண்டிருப்பார்கள் என நம்புவோம்.

எப்படிப் போட்டாலும் சாத்துகிறானே இவன் – என்கிற குழப்பத்தில், ஆத்திரத்தில்தான் துஷ்யந்தா சமீரா ஷார்ட்-பிட்ச் பந்துகளாக ஷாவுக்கு வீசி நிலைகுலைக்க முயன்றார். ஷா இவற்றைக் குனிந்து தவிர்க்க முயல்கையில்தான் ஹெல்மெட்டைப் பதம் பார்த்தது ஒரு பந்து. தலையடியா (concussion) எனப் பதறி ஓடிவந்த நிபுணர்களை, ஷா ஆசுவாசப்படுத்தவேண்டியாயிற்று! ஹெல்மட் மாற்றிக்கொண்டு ஷா தொடர்கையில், லங்கா கேப்டன் தந்திரமாக அகிலா தனஞ்சயா மூலமாக ஸ்பின்னை இறக்கினார். நாலைந்து பந்துகளைக் கவனித்துவிட்டு தாக்கியிருக்கலாம் ஷா. அவர் இருந்த வேகத்தில் முதல் பந்தையே வானவேடிக்கை காட்ட முயற்சிக்க, கேட்ச் ஆனது பந்து. ஆட்டநாயகன் ஷா 24 பந்துகளில் 9 பவுண்டரிகளுடன் 43. அவர் இருந்தவரை லங்காவுக்கு மூச்சுவிடுவதில் ஏகப்பட்ட சிரமம் இருந்தது.

Ishan Kishan got Birthday Gift, 2nd Indian Cricketer after Gursharan Singh  ODI debut on Birthday | Ishan Kishan को मिला शानदार Birthday Gift, इस मुकाम  को हासिल करने वाले दूसरे भारतीय क्रिकेटर
Ishan Kishan – impressive debut

இந்தியாவுக்காக முதல் ஒரு-நாள் போட்டி ஆடிய இஷான் கிஷனும், சூர்யகுமாரும் சிறப்பாக ஆடினார்கள். ஷா அவுட் ஆனவுடன் வந்த கிஷன், முதல் பந்தில் சிக்ஸ் விளாசினார்; அசத்தல் அரைசதமடித்தபின்பே வெளியேறினார். ஆரம்பத்தில் நிதானமாக ஆடிய ஷிகர் தவன், பின்னர் கொஞ்சம் வேகத்தை ஏற்றி 86 நாட்-அவுட் என வந்து சேர்ந்தார். அவரது கேப்டன்சி நன்றாக அமைந்து, 7 விக்கெட் வித்தியாச வெற்றி கிடைத்தது. ஸ்பின் -இரட்டையர்கள் குல்சா (குல்தீப்-சாஹல்) ஆளுக்கு 2, தீபக் சாஹர் 2, பாண்ட்யா சகோதரர்கள் ஆளுக்கு 1, என விக்கெட்டுகள். புவனேஷ்வர் குமாரிடம் பழைய திறன் காணப்படவில்லை. அடிவாங்கியும் விக்கெட் எடுக்கவில்லை.

ஸ்ரீலங்காவுக்கு சமிகா கருணரத்ன (Chamika Karunaratne) 43 ரன்கள் அதிகபட்ச ஸ்கோர். கேப்டன் ஷனகாவின் நிதானமான 39 – உதவவில்லை. பௌலிங்கில் லங்கா ஸ்பின்னர்கள்  பரவாயில்லை. சமீராவிடம் வேகம் மட்டும் இருந்தது.

20-7-21- ல் நடக்கவிருக்கும் அடுத்த போட்டியில் – 1)உத்வேகம் பெறுமா லங்கா? 2) இந்தியப் புதுமுகங்களில் யாருக்காவது வாய்ப்புக் கிடைக்குமா ? கேள்விகள் -நாளை மதியத்தை நோக்கி நிற்கின்றன..  

**