இரண்டு குஞ்சுகள்

மிஸோரம். இந்தியாவின் வடகிழக்கு மாநிலம்.  சைரங் எனும் கொஞ்சம் பெரிய கிராமம். அங்கு ஒரு ஆரம்ப சுகாதார நிலையம். ப்ரைமரி ஹெல்த் செண்டர். சிறு க்ளினிக்போல இயங்கி வருகிறது. கிராமத்துக்காரர்கள் யாராவது உடம்பு சரியில்லை என்று காய்ச்சலும் இருமலுமாக வந்து நின்றாலோ, வேறேதும் சிறுசிறு மருத்துவ உதவிகள் தேவைப்பட்டாலோ  செய்ய என, கொஞ்சம் மருந்துகள், இத்தியாதிகள் சிறிய அலமாரியில் உள்ளே. அந்த க்ளினிக்கில்,  அந்த நேரத்தில் ஒரு நர்ஸ் மட்டும் இருக்கிறாள்.

Derek

நுழைவாசலில் லேசான சத்தம். மென் குரலொன்று  கூப்பிட்டது ‘டாக்டர்.. டாக்டர்..!’ யாரோ சின்னப்பிள்ளையின் குரலாக அல்லவா இருக்கிறது.  ஏதோ காரியமாக உள்ளே இருந்த நர்ஸ் வெளியே வந்து பார்க்கிறாள். ஐந்தாறு வயதிருக்குமா? ட்ரவுசரும் சட்டையுமாய் ஒல்லியாக, அப்பாவி முகத்துடன் ஒரு பொடியன் நிற்கிறான். இவனா கூப்பிட்டது என ஆச்சரியத்தோடு பார்க்கையில் கையை நீட்டுகிறான். சின்னக்கையில் ஒரு கசங்கிய பத்து ரூபாய் நோட்டு. என்ன இது? யாருக்கோ மருந்து வேண்டுமோ.. இத்தனைச் சின்னப்பிள்ளையையா அனுப்புவது..  குழம்பியவளாய், ’என்னடா கண்ணா! என்ன வேணும் ஒனக்கு?’ எனக் கேட்க,  அடுத்த கையை அப்போது தான் சிறுவன் காண்பிக்க, பார்க்கிறாள். என்ன அது பஞ்சுபோல? ’கோழிக்குஞ்சுக்கு ஒடம்பு சரியில்ல.. படுத்தே கெடக்கு. சைக்கிள்ல அடிபட்டிருச்சு..  மருந்து கொடுங்க. இந்தாங்க பணம் !’  அதிர்ச்சியில் உறைகிறாள் அந்தப் பெண். இப்படி ஒரு பேஷண்ட்டை இதுவரை கண்டதில்லையே.. சிறுவனின் பரிதாப முகம் அவளை என்னவோ செய்தது. அவளது இடதுகை,  சிறுவனின் தலையில் மெல்லப் படர, அடுத்த கையினால் வாங்கிப் பார்க்கிறாள். கோழிக்குஞ்சு விறைத்துவிட்டிருந்தது. ஆ…!  ஒரு குஞ்சு செத்துப்போயிருச்சு.. இன்னொரு குஞ்சுக்கு அதை எப்படிச் சொல்வேன்? செவிலித்தாய் சிதறுகிறாள். என்னென்னமோ சொல்லி, கையை விரித்துக்காட்டி, அவனுக்குப் புரியவைத்துவிட்டதாக நினைத்து வீட்டுக்குத் திருப்பி அனுப்பிவிட்டாள்.

செத்த கோழிக்குஞ்சுடன் தேம்பிக்கொண்டே வீடு திரும்புகிறான் சிறுவன். அப்பாவிடம் பத்துரூபாயைக் காண்பித்து, ’இது போறாது.. நூறு ரூபாய் தா! ஆஸ்பத்திரிக்குத் திருப்பிப் போகணும்.. இந்தக் குஞ்சை சரியாக்கணும்!’ என்று அடம்பிடித்திருக்கிறான். அவனது அப்பா அந்தக் கோழிக்குஞ்சு திரும்பவும் எழுந்திருக்காது, இனி நடக்காது, ஓடாது என்று அவனது அறியாமனத்துக்கு திரும்பத் திரும்பச் சொல்லி சாந்தப்படுத்துவதற்குள் போதும் போதும் என்றாகிவிட்டதாம்.  சிறுவனின் பெயர் டெரெக் லால்ச்சானிமா (Derek Lalchhanhima).

இந்த டெரெக் ஒருவேளை, அந்த காசி சிறுவனின் மறுபிறப்போ? யாருக்குத் தெரியும்? அந்தச் சிறுவனுக்கும் கிட்டத்தட்ட இப்படி நடந்திருக்கிறதே அந்தக் காலத்தில். எழுபது, எழுபத்தைந்து வருடங்கள் முன்பு..

உத்திரப்பிரதேசம். சன்னியாசிகள், சாதுக்களென இந்த லௌகீக உலகத்தின் பரபரப்போடு சம்பந்தப்படாத ஜீவன்களுக்குப் பேர்போன காசி நகரம். நகரின் வெளிப்புறத்தில் தன் வீட்டின் சுற்றுப்புறத்தில் எப்போதும் விளையாடிக்கொண்டிருப்பான் சிறுவன் ராம் சூரத். பள்ளிக்கூடம் போகின்ற பையன். அன்று அம்மாவுக்குத் தண்ணீர் தேவைப்படுகிறது என்பதற்காக தன் வீட்டுப் பின்புறத்தில் இருந்த ராட்டினம்போட்ட பழைய கிணறு ஒன்றிலிருந்து வாளியில் தண்ணீர் இறைத்துப் பாத்திரத்தில் நிரப்பி வீட்டிற்குள் சென்று ஊற்றிவிட்டு, மீண்டும் கிணற்றடிப் பக்கம் வந்தான், ஏதாவது விளையாடலாம் என. அப்போதுதான் அதைப் பார்த்தான்.

கிணற்றுச் சுவர் மேலே, ராட்டினம் போட்டிருக்கும் மர உத்திரத்தின் மேலே என்று ஒரு சிட்டுக்குருவி. அங்குமிங்கும் தாவி விளையாட்டுக் காட்டிக்கொண்டிருந்ததில் அவன் மனம் ஆழ்ந்திருந்தது. கொஞ்ச நேரம் பார்த்தவன், அது அருகில் வருகையில் ராட்டினக் கயிறின் நுனியினால் அதனை அடிப்பதுபோல் வீசி, சீண்டிக்கொண்டிருந்தான். அது மீண்டும் மீண்டும் அவன் பக்கம் வருவதும் பறப்பதுமாய் போக்குக்காட்ட, இப்போது கயிற்றை வேகமாக அதன் மீது வீசினான். கயிற்றின் நுனி முடிச்சு குருவியின் மீது பட்டுவிட்டது. குருவி அடிபட்டுக் கீழே விழுந்தது. ஓடிப்போய்ப் பார்த்தவன் பயந்துவிட்டான். குருவி மேல்தூக்கிய கால்களுடன் குப்புறக் கிடந்தது.  கால்கள் கொஞ்சம் அசைந்தன. பிறகு சலனமில்லை. சிறுவன் அதனைக் கையிலெடுத்து நிமிர்த்தி உட்காரவைத்துப் பார்த்தான். சரிந்து கீழே சாய்ந்தது. கால்கள் ஊன்றாதது அவனுக்குப் பதற்றத்தைக் கொடுத்தது. கீழே சிந்தியிருந்த சிறிது நீரைக் கையிலெடுத்து அதன் மேல் தெளித்துப் பார்த்தான். அசைவேதுமில்லை. அவனுக்கு ஒன்றும் புரியவில்லை. கவலையாகவும் இருந்தது. ஏன் இது பறக்கவில்லை? நிற்கக்கூட மாட்டேன் என்கிறதே.. என்ன ஆகிவிட்டது இப்போது? போகிற வருவோரைக் கேட்டுப் பார்த்தான். ’அதத் தூக்கிப் போட்டுரு. செத்திருச்சு..’ என்றார்கள்..

அசையாத, பறக்காத அந்தக் குருவி சிறுவன் ராம் சூரத்துக்கு கலக்கத்தைத் தந்தது. நான் என்ன செய்துவிட்டேன்.. மனம் நிம்மதியின்றித் தவித்தது. செத்திருச்சா? அப்படீன்னா? இதுவரை அதற்குள் என்ன இருந்தது? எவ்வளவு சந்தோஷமாகக் குதித்துக்கொண்டிருந்தது, வட்டமடித்துப் பறந்துகொண்டிருந்தது.. அது எங்கே போய்விட்டது இப்போது? ஏன், நிற்கக்கூட மாட்டேன் என்கிறது.. சிந்திக்க, சிந்திக்க மனம் கனத்தது. தலை வலியெடுத்தது.  சோர்வாக இருந்தது. சிலர் சொன்னதைப்போல், குருவியைத் தூக்கி எறிய மனமில்லை. மெல்ல நடக்க ஆரம்பித்தான் ராம் சூரத், கையில் செத்துப்போன குருவியுடன்.

ஆரம்பத்திலிருந்தே ராம் சூரத் மற்ற பிள்ளைகளைப் போலில்லை. தனியாக விளையாடிக்கொண்டிருப்பான்.  நேரம் கிடைக்கும்போது காசியின் கங்கை நதிக்கரைப்பக்கம் போய்விடுவான். அங்கு சுற்றிக்கொண்டிருக்கும், படுத்துக்கொண்டிருக்கும்,  சும்மா உட்கார்ந்து ஏதேதோ முணுமுணுத்துக்கொண்டிருக்கும் காவி வஸ்திரமணிந்த சாதுக்களை, அவர்களது மீசையும், தாடியும், சாம்பலுமான விசித்திரத் தோற்றத்தை நேரம் போவது தெரியாமல் பார்த்துக்கொண்டிருப்பான். சில சாமியார்களும் அவனைப் பார்த்து சிரித்திருக்கிறார்கள்.  கொஞ்சம் பேசியிருக்கிறார்கள். இன்று அவன் கால்கள் அவனை கங்கைக்கரை நோக்கி நகர்த்தின. வந்து சேர்ந்தான். இவர்களில் யாரிடமாவது இந்தக் குருவிபற்றிக் கேட்போமா.. மனம் அலைபாய்ந்தது. ஓரமாக உட்கார்ந்திருந்த ஒரு சாதுவிடம் சென்றான். குருவியைக் காண்பித்தான். நடந்ததைச் சொன்னான். ’இதை எப்படியாவது பறக்கும்படி பண்ணிவிடுங்கள்’ என்று கெஞ்சினான். அவனது கண்கள் கலங்கியிருந்ததை அந்த சாது உன்னிப்பாகப்  பார்த்தார். அவனது நிர்மலமான உள்ளம் புரிந்தது. ’குழந்தாய்.. அதோ போகிறாள் பார் கங்கா.. எத்தனை பெரிய நதி. எத்தனைத் தண்ணீர் போகிறது தடதடவென ஆரவாரமாக..பார்த்தாயா! அவள் நம் தாய். அங்கே போய், அவளிடம் இதனைச் சேர்ப்பித்துவிடு. இது அவளோடு போகட்டும். இனி திரும்பி வராது இது. சொன்னபடி கேள்!’ என்றார் அவனை தீர்க்கமாகப் பார்த்து. ராம் சூரத்தினால் தாங்கமுடியவில்லை. கண்களில் நீர்முட்ட, கேவ ஆரம்பித்தான். கனிவோடு அவனைப் பார்த்த அந்த வயதான சாது. ‘போப்பா! போய் கங்காவில் சேர்த்துவிட்டு, வீட்டுக்குப் போ!’ என்றார் உறுதியாக.

அழுதுகொண்டே கையிலிருந்த குருவியைப் பார்த்தான் ராம் சூரத். சாதுவை ஒருமுறை நோக்கினான். மெல்ல நடந்தான் கங்கையை நோக்கி. அருகில் சென்று தண்ணீரைப் பார்க்கையில் மிகவும் பயமாக இருந்தது. சாதுக்களில் சிலர் குளித்துக்கொண்டும், சிலர் பக்கத்தில் நின்று நதியைப் பார்த்து முணுமுணுத்தவாறும் இருந்தனர். மெல்லத் தண்ணீரில் இரண்டடி எடுத்துவைத்தான். ஜிலீர் எனத் தலையைத் தாக்கியது அந்தக் குளிர்ச்சி. ‘எவ்வளவு ஜில்லுப்பு.. இந்த கங்கையிலா நான் இதை விடவேண்டும்.. குருவியைப் பார்த்தான். மேலும் அழுகை பொங்கியது. சாதுவின் வார்த்தைகளும் காதில் கணீரென்றன. மெல்ல குருவியைத் தண்ணீரில் வைத்தான். நொடியில், ஓடும் தண்ணீரில் மறைந்துபோனது அது.

எப்படி ராம் சூரத் வீடு வந்துசேர்ந்தான்.. அவனது பெற்றொர்கள் என்ன கேட்டார்கள்.. என்ன சொன்னான். ஒன்றும் சரியாக ப்ரக்ஞையில் இல்லை. மரணம் என்பதென்ன? அது எப்படி, ஏன் நிகழ்கிறது?  மண்டைக்குள் பூச்சிபோல் கேள்விகள் ஊர்ந்துகொண்டேயிருந்தன. ஒருபக்கம், சராசரிப் பிள்ளைகளைப்போல் பள்ளிக்கூடம் சென்றான். படித்தான். பெரியவனாகி வேலைக்கும் போனான். விருப்பமில்லாதிருந்தும், பெற்றோர் சொல்படிக்கேட்டுக் கல்யாணமும் பண்ணிக்கொண்டான் ஆனால், கங்கைக்கரையில் நேரம் போவது தெரியாமல் நதியை வெறித்துப் பார்ப்பதும்,  சாதுக்களை கவனித்தவாறு அங்கேயே உட்காரந்திருப்பதும், பேச நேர்ந்தால், வாழ்க்கை, மரணம் என்று  கேள்வி மேல் கேள்வியாய்க் குடைவதும், ஒரு நிலையில்லாது தவித்திருப்பதும் வழக்கமாகிவிட்டிருந்தது.  ஒரு நாள் ராம் சூரத் சந்தித்த சாதுக்களில் ஒருவர் அவனது தீராத தேடலைப் புரிந்துகொண்டார்.  அவனை ’நீ தெற்குநோக்கிப் போ.. மதராஸ்.. அதற்கருகே ஒரு மலை, ஒரு சன்னியாசி.. அவரைப் போய்ப் பார்..’ என்று அறிவுறுத்தினார். ராம் சூரத்தும் குடும்ப வாழ்வைத் துறந்துவிட்டு, அவ்வாறே தெற்குதிசையில்  பயணித்தது வாழ்வின் ஒரு பெரும் திருப்பு முனை. பின்னர் திருவண்ணாமலையில் ரமண மகரிஷியை தரிசித்தது,  பாண்டிச்சேரியில் அரவிந்தர், கேரளாவில் பாப்பா ராம்தாஸ் என சாது, சன்னியாசிகளோடு நிகழ்வுகள்.. வயதாகிப்போய் சொச்சகாலமெல்லாம் திருவண்ணாமலையில் அலைந்து திரிந்தது, காலப்போக்கில் விசிறி சாமியார், யோகி ராம் சூரத் குமார் என்றெல்லாம் அழைக்கப்பட்டது, போற்றப்பட்டது என  வேகவேகமாக, அடுத்தடுத்த அத்தியாயங்களை எழுதிச் சென்றுவிட்டது காலம்.

**

15 thoughts on “இரண்டு குஞ்சுகள்

  1. முதல் சம்பவம் நானும் படித்து நெகிழ்ந்தேன். இரண்டாவது சம்பவம் – ஆனால் அதுதான் முதல் சம்பவம் – எனக்குப் புதிது.

    Liked by 1 person

    1. @ sriram:
      மிஸோரம் சம்பவம்பற்றி எல்லோரும் படித்திருப்பார்கள்தான்.ஒரு போஸ்ட் போடுவோமா, வேண்டாமா என சிந்தித்திருந்தபோது, திடீரென யோகியின் வாழ்க்கை நிகழ்வு நினைவுக்கு வந்தது. இரண்டுக்குமிருந்த ஒற்றுமையும் கூடவே மனதில் தட்டியது.

      Like

  2. ஏகாந்தன் டெரக் பற்றி சொல்லி வரும் போது வேறு ஏதோ நினைத்தால் கடைசியில் ராம்சூரத் பற்றி ….

    அண்ணா அந்த மிசோரம் டெரெக் என் மகனின் சிறு வயதை நினைவுறுத்தியது. ஒரு எறும்பு இறந்தால் கூட மனசு தாங்காமல் கண்ணில் நீர் முட்ட நின்றவன் இன்று பல செல்லங்களின் மரணங்களை நேரடியாகவே பார்த்துக் கொண்டிருக்கிறான்…..இதுதான் உண்மை! இயற்கை என்ற தத்துவத்தோடு! அந்தத் தத்துவம் அவனை பக்குவப்படுத்தி இருந்தாலும் எங்கள் வீட்டுச் செல்லங்களில் ஒன்று போனதும் குலுங்கி குலுங்கி அழுதான் பேசவும் இல்லை…..இந்த வயதிலும்! அது ப்ரொஃபஷன் இது பாசம்…

    என்னவோ தெரியல குடும்பம் என்று ஆன பிறகு அதைத் துறந்து சன்னியாசம் போவதை ஏனோ மனம் ஏற்க மறுக்கிறது.

    கீதா

    Liked by 1 person

    1. ஒரு வேளை எனக்கு அந்த அளவிற்கு மனம் பக்குவம் அடையவில்லை என்றே தோன்றுகிறது.

      கீதா

      Like

    2. ஸாரி அண்ணா! ஏகாந்தன் அண்ணானு அடித்தது அண்ணா மிஸ் ஆகிருக்கு….ஏகாந்தன் அப்படினு வந்துருச்சு…வெரி ஸாரி அண்ணா…வருந்துகிறேன்.

      கீதா

      Like

    3. @ கீதா:
      குடும்பம் என்று ஒன்று உண்டானபின், அதனை விட்டு விலகுவது எல்லோருக்கும் எப்படி சாத்தியமாகும்? சந்நியாசம்பற்றி பேசுவதற்கு நாம். சந்நியாசியாக ஆக என்று வெகு சிலரே. ராமானுஜர், புத்தர், யோகி ராம் சூரத் குமார் என்று ஒரு செலெக்ட் லிஸ்ட்…

      Like

  3. ஒரு பறவையின் மரணம்தான் ராமாயணம் பிறக்கவும் காரணமாக இருந்தது இல்லையா?

    Liked by 1 person

    1. @பானுமதி வெங்கடேஸ்வரன்:

      நீங்கள் சொல்வதும் சரி. பறவை அங்கேயும் தன் ரோலைச் செய்துவிட்டது!

      Like

  4. டெரக் மனதை விட்டு அகலவில்லை…இன்னும் மனதுள் பாவம் அந்தக் குட்டிப்பையன். …என்ன ஒரு கருணை, பாசம்… அந்தக் குட்டிப்பையனிடத்தில் அந்த வயதில்!! நெகிழ்ச்சி…மனதில் நீங்கள் போட்டிருக்கும் அந்தப் படம்…இன்னும் ..நினைத்து என்னவோ செய்கிறது மனதை. காட் ப்ளெஸ் அந்தக் குட்டிப்பையனை…

    கீதா

    Like

  5. @ கீதா:
    பையனின் படம் என்னவோ செய்கிறதுதான். அவன் முகம் அப்படி-அகத்தைக் காண்பிக்கும் முகம். இவன் என்னவாக வரவேண்டுமென அவன் நினைத்திருக்கிறானோ..

    உங்கள் பையனும் இவ்வளவு சென்சிட்டிவ்வா, இன்னும்! மனசு ஒவ்வொருவரையும் ஒவ்வொரு விதமாய்ப் படுத்துகிறது. அதனுடைய mandate படி, அது வேலை செய்கிறது.

    ஐபிஎல்-லிலிருந்து தலையை நீட்டி, ஒளிந்துகொண்டிருந்த கருத்துக்களை மாடரேட் செய்துவிட்டேன்!

    Like

  6. சாந்தி ஓம் சாந்தி.
    அந்தக் குழந்தையின் கண்களில் எத்தனி சோகம். மனம் உருகியது.
    டெரெக் நறாக இருக்கட்டும். அவனும் உயிர்களைக் காக்கும்
    சேவையைத் தேர்ந்தெடுத்த் இருப்பான்.
    யோகி ராம் சூரத் குமார் அவர்களின் கதை புதிது.
    வாடிய பயிராய்க் கண்ட போது வாடிய அப்பா அவர்.
    மிக நன்றி ஏகாந்தன் ஜி.

    Liked by 1 person

  7. முதல் செய்திவாட்ஸாப்பில் வந்ததோ விசிறி சாமியாரின் கதை இப்போதுதான் கேட்கிறேன்

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s