மன்னார்குடி மனோன்மணி !

ஜெயலலிதாவின் சமாதியில் கையால் மூன்றுமுறை அறைந்து (யாரை?) சபதம் ! எம்ஜிஆர் நினைவிடத்தில் தியானம் ! ஓபிஎஸ் எஃபெக்ட் ?

அடடா! பரப்பன அக்ரஹாரா ஜெயிலுக்குப் போகுமுன்னும் என்ன ஒரு பரபரப்பு.. என்ன ஒரு பக்தி, சிரத்தை, ஆவேசம்! சசிகலாஜி, மெய் சிலிர்க்கிறது. உங்களது வீரபராக்ரமங்களை, சபதங்களை, ஆவேச சூளுரைத்தல்களை டிவியில் கண்டு, கேட்டு களித்துக்கொண்டிருக்கும் எண்ணற்ற தமிழ்மக்கள், உங்களை என்னவென்று புரிந்துகொள்வார்கள்? யாரிடத்தில் யார்? வெறும் நாலே மாதத்தில் நாற அடித்துவிட்டீர்களே தமிழ்நாட்டை. இந்தியாவின் முக்கியமான மாநிலங்களில் ஒன்றைக் கூனிக் குறுகிப்போகும்படி செய்துவிட்டீர்களே அம்மணி!

மனதில் பெரும் ஆட்சிக்கனவோடு, பிரமாதத் திட்டங்கள், சூழ்ச்சிகளோடு திரைமறைவில் தீவிரமாக நீங்கள் இயங்கியவிதம்.. மக்களின் அபிமானம் பெற்றவரை, மாநிலத்தின் முதல்வரை, மறைத்துவைத்தே மாதங்கள் சில தள்ளி, மறைந்துவிட்டார் எனத் திடீரென மருத்துவர்களைவைத்தே குண்டுவீச வைத்து, வராத கண்ணீரை டிஷ்யூ காகிதத்தால் காமெராவுக்கு முன் நிதானமாகத் துடைத்துவிட்டுக்கொண்டீர்களே, ஆஹா! உங்களைத் தவிர வேறு யாருக்குக் கைவரும் இந்த அபரிமித நடிப்பு, சாகசம்?

உச்சநீதி மன்றத் தீர்வு வந்து உலுக்கிவிடுமுன் சிம்மாசனம் ஏறிவிட நீங்கள் செய்த சீரிய முயற்சிகளைப் பார்த்து, தமிழகம் மட்டுமா, மத்திய அரசும்கூட கொஞ்சம் ஆடித்தான்போய்விட்டது. கட்சித் தலைமையை தடாலெனக் கபளீகரம் செய்து, ஏற்கனவே பணியாற்றிவந்த முதல்வரை மிரட்டியேக் கழட்டிவிட்டு, தானே ஆட்சிபீடத்தில் சொகுசாக உட்கார்ந்துவிட பேராசைப்பட்ட உத்தமியே, தமிழ்நாட்டைப்பற்றித்தான் எப்படி சல்லீசாகக் கணக்குப்போட்டுவிட்டீர்கள்? மேலிருந்தும் சில கணக்குகள் போடப்பட்டுக்கொண்டிருக்கின்றன என்பதை மறந்தேபோய்விட்டீர்களே மங்கையர்க்கரசி! காசு சேர்த்தபின்னும் களி திங்கத்தான் விதி என்றிருந்தால் என்னதான் செய்வது?

வருஷக்கணக்காக வளர்த்துவிட்ட ஏடாகூட ஆசைகளும், அவற்றை சென்றடைய செயல்படுத்திய அசாத்திய சதிகளும், சூழ்ச்சிகளும் சேர்ந்து அல்லவா சம்பாதித்து வைத்திருக்கிறது உங்களுக்கேயான இந்த விதியை? மக்கள் ஆதரவுபெற்ற ஒரு அரசியல் ஆளுமையின் நிழலில் நின்றுகொண்டு, பாதுகாப்பில் இருந்துகொண்டு, கும்மியடிக்க குடும்பத்தையும் சேர்த்துக்கொண்டு ஒரே அடியாக ஆட்டம்போட்டீர்களே வருஷக்கணக்கில். அள்ளினீர்கள், அபகரித்தீர்கள். சுருட்டினீர்கள். அட்டூழியத்திற்கு ஒரு அளவில்லை என்கிற வகையில் சூழ்ச்சியின் உலகில் சுகமாய் உலவினீர்கள். மேலிருந்து நீளமான கயிறொன்று உங்களுக்காக விடப்பட்டிருப்பதுமட்டும் தெரியவில்லை. கண்ணுக்குத் தெரியும் கயிறுமல்ல அது. ’போதும் உன் ஆட்டம்!’ என அது நினைத்து கயிறைச் சுண்டி இழுத்ததுதான் தாமதம் ; உடனே பிடித்து உங்களையும், சார்ந்தவர்களையும் உள்ளே தள்ளிவிட்டார்கள்.

சட்டம் ஒரு இருட்டறை. எதுவும் செய்யலாம்; எதுவும் வெளியே தெரியாது, தெரிந்தாலும் யாராலும் எதுவும் புடுங்க முடியாது எனத் தப்புக்கணக்குப் போட்டுவிட்டீர்கள். இப்போது இருட்டில் தூக்கம் வராமல் கொசுவிரட்டி யோசனை செய்யுங்கள். உங்களது குடும்பத்தினரை மூலதனமாக வைத்துக்கொண்டு, மூதேவி வேலைசெய்து இன்னும் என்னென்ன கூத்தடிக்கலாம், யார் யாரைக் கவிழ்க்கலாம், மேலே தந்திரமாக அனுப்பலாம் என்று தீவிரமாக சிந்தியுங்கள். 3 ½ வருட காலம் முழித்துக்கொண்டு நிற்கின்றது உங்கள் முன்னே. இதமாக உங்கள்மேல் சாய்ந்துகொண்டு துர்ஆலோசனை சொல்ல இருக்கிறார் இளவரசியும் பக்கத்தில் !

ஜெயலலிதாவின் charisma, அவர்மீது மக்கள் கொண்டிருந்த அபிமானத்தைக்கொண்டு, கடந்த தேர்தலில் வென்றுவிட்ட அதிமுக எம்.எல்.ஏ.க்களில் மெஜாரிட்டி தற்போது உங்கள் ’வசம்’ இருப்பதாகத்தான் தோன்றுகிறது. ஏழெட்டு நாட்களாக நீங்கள் போட்டுக்கொண்டிருக்கும் ’சாப்பாடு, சொகுசு’களுக்கு எம்.எல்.ஏ.-க்கள் கொஞ்ச நாட்களாவது விசுவாசம் காட்டாவிட்டால் எப்படி ! நீங்கள் பரப்பன அக்ரஹாரத்தில் உட்கார்ந்து ஊதுவத்தி சுற்றிக்கொண்டிருக்க, உங்களது சூழ்ச்சிகளின்படி, உத்திரவுகளின்படி உங்களது ’ஆட்கள்’ சென்னைக் கோட்டையில் அமர்ந்து ஆட்சிசெய்தால் – அதுதான் நடக்கும்போலிருக்கிறது, இப்போதிருக்கும் நிலைமையைப் பார்த்தால் – இன்னல்கள்தான் தொடரும் பாமரமக்களுக்கு. அவமானமும் வேதனையும்தான் மிஞ்சும் தமிழ்நாட்டுக்கு. முறையாகத் தேர்ந்தெடுக்கப்பட்ட, நல்லதொரு ஆட்சிவரும் வரையில், கத்தலாம், போராடலாம்; இருந்தும் ஆட்சி மாறும்வரை மக்கள் காத்திருக்கத்தான் வேண்டும் ஜனநாயகத்தில்.

சசிகலாஜி! முப்பது வருடங்களுக்கும் மேலாக திரைக்குப் பின்னால் நிழலாகப் பதுங்கிப் பதுங்கி உலவிய மர்மஉருவம் நீங்கள். திரைக்குவெளியே வந்து, அரசியல் வெளிச்சத்தில் நீங்கள் காட்சியளித்த சில மாதங்களிலேயே, உங்களது ஆத்திரமுகம், அசூயைமுகம், குரோதமுகம், கொடூரமுகம் தெரிந்துவிட்டது அப்பாவித் தமிழ்மக்களுக்கு. பார்த்துவிட்டார்கள். அவர்கள் கேள்விப்பட்டது சந்தேகப்பட்டது எல்லாம் உண்மைதான் எனத் தோன்ற ஆரம்பித்துவிட்டது. இதெல்லாம் உங்களுக்குப் புரியப்போவதில்லை. இருந்தும் சொல்லவேண்டியிருக்கிறது : தமிழ்நாட்டின் பொதுவாக ஒன்றுமறியாத பாமரமக்கள்கூட, அதிலும் குறிப்பாகப் பெண்கள், இளைஞர்கள் போன்றவர்கள் – கொஞ்சம் விழித்துக்கொண்டுவிட்ட காலம் இது. எந்தக் காரணத்தை முன்னிட்டும் உணர்ச்சிவசப்படும் மக்கள் கூட்டம் முன்னே, அதிலும் ஜெயலலிதாவை இன்னும் மனசார ’அம்மா’ என்றழைக்கும், போற்றும் கிராமத்துப்பெண்களின் முன்னே, போலீஸ் பாதுகாப்பின்றி போய் நின்றுவிடாதீர்கள். பின்னிவிடுவார்கள் பின்னி !

**

Advertisements

About Aekaanthan

writer, poet , freelancer
This entry was posted in அனுபவம், இலக்கியம், சமூகம், நகைச்சுவை, புனைவுகள் and tagged , , , , , , , , . Bookmark the permalink.

One Response to மன்னார்குடி மனோன்மணி !

  1. ஸ்ரீராம் says:

    ஜெ மறைந்தபோது வராத கண்ணீர், தான் சிறைக்குச் செல்லும்போது வருகிறதே…!

    //உங்களது ஆத்திரமுகம், அசூயைமுகம், குரோதமுகம், கொடூரமுகம் தெரிந்துவிட்டது//

    சுப்பிரமணியம் ஸ்வாமிக்கு மட்டும் வேறு மாதிரி தெரிகிறது போல!!!!

    மொத்த ஜனங்களும் எதிர்ப்பு என்பது மிகப்பெரிய ஆச்சர்யம். ஆனால் அந்த எதிர்ப்பால் பயனே இல்லை என்பது அதைவிடப் பெரிய ஆச்சர்யம், சோகம். ஜனநாயக நகைமுரண்.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s