கிரிக்கெட்: இந்தியா-தென்னாப்பிரிக்கா டெஸ்ட்-ஒரு முன்னோட்டம்

பஞ்சாபின் மொஹாலி (Mohali) மைதானத்தில் இன்னும் சிலமணி நேரத்தில், தொடங்கவிருக்கிறது இந்தியா-தென்னாப்பிரிக்காவுக்கு இடையே பெரும் எதிர்பார்ப்பை ஏற்படுத்தியிருக்கும் கிரிக்கெட் டெஸ்ட் தொடர். இது 4 மேட்ச்சுகள் கொண்டது. விராட் கோஹ்லி (Virat Kohli) தலைமை தாங்கும்-இந்தியாவில் ஆடப்படும்-முதல் டெஸ்ட் தொடர்.

இந்தியாவில் ஆட வந்திருக்கும் தென்னாப்பிரிக்க அணி, வலிமையானதாக, இந்தியாவுக்கு பெரும் சவாலாக இருக்கிறது என்பதில் சந்தேகமில்லை. தலைமை தாங்குவது ஹஷிம் ஆம்லா(Hashim Amla). அருமையான ஆட்டக்காரர். கூடவே இருக்கிறார்கள் – எதிரணியைக் கதி கலங்கவைக்கும் டி வில்லியர்ஸ் (AB de Villiers) மற்றும் ஃபாஃப் டூ ப்ளஸீ (Faf du Plessis), குய்ண்டன் டி காக் (Quinton de Cock) போன்ற பேட்ஸ்மென்கள். இவர்கள் நல்ல ஃபார்மில் இருக்கிறார்கள் என்பது இந்திய பௌலர்களுக்கு முன் அமர்ந்திருக்கும் சவால். தென்னாப்பிரிக்காவின் வேகப்பந்து வீச்சாளர்கள் –டேல் ஸ்டேன்(Dale Steyn), ஃபிலாண்டர் (Philander), மார்னீ மார்க்கெல் (Mornie Morkel), ஆபாட் (Abbot) ஆகியோர்- திறமையானவர்கள், எதிரணியின் விக்கெட்டுகளைக் கெல்லி எறிவதில் சூரர்கள். ஃபீல்டிங்? கேட்க வேண்டியதில்லை. டாப் க்ளாஸ்!

இத்தகைய எதிரிக்கு எதிராகத்தான் இந்திய அணியை முனைப்படுத்தி விளையாடும் நிலையில் இருக்கிறார் விராட் கோஹ்லி. கோஹ்லி –டெஸ்ட் விளையாட்டைப்பொறுத்தவரை- தோனி(Dhoni)-யிடமிருந்து வேறுபட்ட சிந்தனைகளும். விளையாட்டு வியூகங்களும் உள்ளவர். அதன்படி, அவர் 5 பௌலர்கள், 6 பேட்ஸ்மன்களோடு களமிறங்குவார் எனத் தோன்றுகிறது. இந்தியாவின் துவக்க ஆட்டக்காரர்களாக அனேகமாக முரளி விஜய்யும், ஷிகர் தவனும் (Shikar Dhawan) இறக்கப்படுவார்கள் என நினைக்கலாம். இதே மைதானத்தில்தான் போனவருடம், ஷிகர் தவன் ஆஸ்திரேலிய பௌலர்களை துவம்சம் செய்தார். இப்போது என்ன செய்வாரோ? கோஹ்லி, ரஹானேயோடு, புஜாரா-வும்(Pujara) அணியில் சேர்க்கப்படலாம் என்பது பெரும்பாலானோரின் யூகம். ஸ்ரீலங்காவுக்கு எதிராக கடைசி டெஸ்ட்டில் இறங்கி சதமடித்து, இந்திய வெற்றிக்கு வழிவகுத்த புஜாராவை நீக்குதல் பேட்டிங் தற்கொலைக்குச் சமானமாகும்.

பௌலிங்கில், அஷ்வின் அணிக்கு திரும்பியிருக்கிறார் என்பது கோஹ்லிக்குக் குஷியூட்டும் விஷயம். உலகின் தற்போதைய சிறந்த ஆஃப் ஸ்பின்னர் தன் அணியில் இருப்பது எந்தக் கேப்டனுக்குத்தான் சந்தோஷம் தராது? கூடவே, ஜடேஜாவும், மிஷ்ராவும் இறக்கப்படலாம். ஜடேஜா, அஷ்வின் இருவரிடமும், பௌலிங்கோடு, பேட்டிங் திறமையையும் எதிர்பார்ப்பார் கோஹ்லி. இஷாந்த் ஷர்மா ஒரு-டெஸ்ட்போட்டித் தடையை அனுபவித்துவருவதால், இந்த மேட்ச்சில் விளையாடமாட்டார். கோஹ்லி, அனேகமாக வருண் ஆரோன், உமேஷ் யாதவ் இருவரையும் வேகப்பந்து வீச அழைப்பார் எனலாம். இருவரின் வேகமும் 145 கி.மீ.க்கு நெருக்கத்தில் இருந்தாலும், எவ்வளவு துல்லியமாக, லைன்-லென்க்த்(line and length)-ஆகப் பந்து வீசுவார்கள் என்பதைப் பொறுத்தே விக்கெட்டுகள் விழும். அல்லது எதிரணிக்கு ரன்கள் தாரை வார்க்கப்படும்.

ஸ்டேன் & கோ.-வின் ஆவேசப் பந்துவீச்சை இந்திய பேட்ஸ்மன்கள் எப்படிச் சமாளிப்பார்கள் என்பதே இந்தத் தொடர் முழுதும் நீடிக்கவிருக்கும் சஸ்பென்ஸ்/எதிர்பார்ப்பு. தென்னாப்பிரிக்காவிடம் உள்ள ஒரே டெஸ்ட்-தரம் வாய்ந்த ஸ்பின்னர் இம்ரான் தாஹிர் (Imran Tahir). மைதானம் சுழலுக்கு சாதகமாக அமைந்தால், இந்திய பேட்ஸ்மன்களுக்கு தாஹிர் கூடுதல் தலைவலி.

இது நவம்பர் முதல்வாரம். பஞ்சாபில் காலை நேரப் பனி, பார்வையை மங்கவைக்கும். மைதானத்தைக் குளிர்விக்கும். கூடவே, வேகப்பந்து வீச்சைச் சந்திக்கும் பேட்ஸ்மென்களுக்கு அதிகமாகவே குளிரெடுக்க வைக்கும். தென்னாப்பிரிக்கா முதலில் பௌலிங் செய்தால், இந்திய பேட்ஸ்மன்கள் அதிஜாக்ரதையாக ஆடவேண்டிவரும்.

இந்தியர்கள் தீபாவளிப்பட்டாசுகளைக் கொளுத்த ஆயத்தமாகி வருகிறார்கள். டெல்லியில் ஏற்கனவே வெடிச்சத்தங்கள் கேட்க ஆரம்பித்துவிட்டன. பஞ்சாப்-மொஹாலியில் அடுத்த 5 நாட்களில், இரண்டு அணி வீரர்களில், யார், யாரின் பட்டாசு பெருஞ்சத்தம் போட்டு வெடிக்கும், யாருடையது நமுத்துப்போய்ப் பிசுபிசுக்கும் என்பது விரைவிலேயே தெரியவரும்!

**

2 thoughts on “கிரிக்கெட்: இந்தியா-தென்னாப்பிரிக்கா டெஸ்ட்-ஒரு முன்னோட்டம்

  1. முதல் நாள் ஆட்ட இறுதியில் பந்து வீசுபவர்களே இந்தியாவைக் காப்பாற்ற வேண்டும் என்று நினைக்க வைக்கிறது என் தளத்தில் உங்களைப்பற்றி எழுதி இருக்கிறேன் பார்த்தீர்களா.?

    Like

  2. சற்றுமுன் தான் படித்தேன். என்னை அறிமுகம் செய்து நீங்கள்போட்ட புதிரும், அதற்கு பதிவநண்பர்களின் பதில்களும் சுவாரஸ்யம் தந்தன.
    நேற்றுதான் டெல்லி திரும்பினேன்.
    மொஹாலி பிட்ச் மர்மம் நிறைந்ததாக இருக்கும்போலிருக்கிறது. பந்துவீச்சாளர்கள் இன்று பேட்டிங் செய்கிறார்கள். ஒருவேளை நமது பேட்ஸ்மன் யாராவது -முரளி விஜய் அல்லது கோஹ்லி- நாளை பந்துவீசவும் நேருமோ!

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s