உள்ளே உறைவது

பாட்டிலின் மூடி கைநழுவிக் கீழே விழுந்தது
உருண்டோடி மறைந்தது
பக்கத்தில்தான் கிடக்கும் சனியன் என்று
கட்டிலுக்கடியில் இப்படியும் அப்படியும் துழாவினேன்
கையை உள்ளே உள்ளே இழுத்தது மூடி
கூட்டப்படாத குப்பைகள் ஏகமாக சிக்கின
மூடியின் முகவரிமட்டும் தெரிந்தபாடில்லை
ஒருவழியாக என்னை நாற்காலியிலிருந்து
இறக்கி இடுப்பில் வலிகொடுத்து
இருட்டில் துழாவவைத்தபின்தான் தெரிந்தது
தூரத்துக் கடலில் ஒரு தோணிபோல
சிணுங்கி அமர்ந்திருந்த அந்தச் சின்ன மூடி
எரிச்சலில் ஒரு லாவு லாவியதில்
கைக்குள் சிக்கியது
ஜடப்பொருளாயிருந்தாலும்
அததுக்குள் இருக்கும் விஷமம் இருக்கிறதே
அப்பப்பா.. சொல்லி முடியாது

**